नेपाल-भारत नाका बन्द

काठमाडौँ, ३२ असार। भारतको उत्तराखण्ड प्रदेशमा हुन गइरहेको पञ्चायत निर्वाचनलाई मध्यनजर गर्दै नेपाल–भारत सीमाका दुई प्रमुख नाका बन्द हुने भएका छन्। बैतडी र दार्चुला जिल्लाका सीमा नाका निर्वाचन अवधिमा अस्थायी रूपमा बन्द गरिने भएको हो।

भारतको उत्तराखण्ड प्रदेशमा यही जुलाई २४ र २८ (आगामी साउन ८ र १२ गते) पञ्चायत निर्वाचन हुँदैछ। निर्वाचनको सुरक्षालाई ध्यानमा राख्दै सीमावर्ती क्षेत्रबाट हुने आवत–जावत रोक्न निर्णय गरिएको बैतडीका प्रमुख जिल्ला अधिकारी पुण्यविक्रम पौडेलले जानकारी दिनुभयो।

उनका अनुसार दार्चुलाको पुलघाट नाका आगामी साउन ५ गते (जुलाई २१) बेलुकादेखि साउन ८ गते (जुलाई २४) बिहानसम्म बन्द रहनेछ। त्यसैगरी, बैतडीको झुलाघाट नाका साउन ९ गतेदेखि १२ गतेसम्म बन्द गरिने जनाइएको छ।

प्रजिअ पौडेलका अनुसार, आपत्कालीन अवस्था आएमा दुवै देशको आपसी सहमतिमा नाका खोल्न सकिने व्यवस्था गरिएको छ। निर्वाचनलाई शान्तिपूर्ण र व्यवस्थित रूपमा सम्पन्न गर्नका लागि यस्तो निर्णय गरिएको हो।