फरार ११ प्रतिवादी पक्राउ

दाङ,२६ मंसिर । दाङमा विभिन्न मुद्दामा फरार रहेका ११ जना प्रतिवादी पक्राउ परेका छन्। मंसिर २० गतेदेखि २६ गतेसम्म प्रहरीले गरेको खोजतलास अभियानमा उनीहरूलाई समातिएको जिल्ला प्रहरी कार्यालय दाङका प्रवक्ता डीएसपी चक्रबहादुर शाहले जानकारी दिए।

प्रहरीका अनुसार दाङ जिल्ला प्रहरी कार्यालय तथा मातहतका प्रहरी टोलीले लुकीछिपी बसेका प्रतिवादीलाई पक्राउ गरी आवश्यक कारबाहीका लागि दाङ जिल्ला अदालतमा बुझाएको छ।

पक्राउ परेकाहरूमाथि फैसला कार्यान्वयनका क्रममा करिब ६६ हजार १६८ रुपैयाँ बराबरको जरिवाना असुल गरिएको छ। साथै, उनीहरूका सम्बन्धित मुद्दामा तोकिएको कुल ४ वर्ष ९ महिना १७ दिन कैद सजाय कार्यान्वयनका लागि अदालत पठाइएको प्रवक्ता शाहले बताए।

न्यायिक प्रक्रियाप्रति जनविश्वास बढाउन र अदालतका फैसला प्रभावकारी रूपमा कार्यान्वयन गर्न प्रहरी आगामी दिनमा पनि खोजतलास र निगरानी अभियान निरन्तर जारी रहने बताएको छ।