प्रतिष्ठानको उपकुलपति नियुक्ति प्रक्रिया रोक्न आदेश

दाङ ,१ पुस । राप्ती स्वास्थ्य विज्ञान प्रतिष्ठानको उपकुलपति नियुक्ति प्रक्रिया रोक्न उच्च अदालतले अल्पकालीन आदेश जारी गरेको छ। उच्च अदालत तुलसीपुरका मुख्य न्यायाधीश राजेश्वर तिवारीको एकल इजलासले आदेश दिएको हो।

अदालतका सूचना अधिकारी कृष्णप्रसाद शर्माका अनुसार स्वास्थ्य मन्त्रालयले प्रतिष्ठानको उपकुलपति नियुक्ति गर्न मंसिर २५ गते सूचना प्रकाशित गरेको थियो। तर प्रतिष्ठानका निमित्त निर्देशक जनार्दन पन्थीले रिट दायर गरेपछि अदालतले पुस ८ गते छलफलका लागि दुवै पक्षलाई बोलाउने आदेश दिएको छ।

८ गतेसम्म नियुक्ति प्रक्रिया अघि नबढाउने र अल्पकालीन अन्तरिम आदेशलाई निरन्तरता दिने वा नगर्नेबारे आगामी सुनुवाइपछि मात्रै निर्णय हुनेछ।