रवि लामिछानेको दोहोरो राहदानी मुद्दा फिर्ता निर्णयविरुद्ध रिटमा आज पेशी

काठमाडौं,१९ माघ । रास्वपा सभापति तथा पूर्वउपप्रधानमन्त्री रवि लामिछानेको दोहोरो राहदानीसम्बन्धी मुद्दा फिर्ता लिने महान्यायाधिवक्ता कार्यालयको निर्णयविरुद्ध दायर रिटमाथि आज सर्वोच्च अदालतमा पेशी तोकिएको छ।

अधिवक्ता युवराज पौडेल (सफल) ले लामिछानेविरुद्ध राहदानी कसुरमा मुद्दा चलाउनुपर्ने माग गर्दै दुई वर्षअघि दायर गरेको रिटमा आज सुनुवाइ हुन लागेको हो। तत्कालीन महान्यायाधिवक्ता दीनमणि पोखरेलले मुद्दा नचलाउने निर्णय गरेपछि त्यसलाई कानूनविपरीत ठहर गर्दै रिट दायर गरिएको थियो।

न्यायाधीश सपना प्रधान मल्ल र नृपध्वज निरौलाको संयुक्त इजलासमा पेशी तोकिए पनि १२औँ नम्बरमा परेकाले आज सुनुवाइ हुने सम्भावना कम रहेको छ। यसअघि सर्वोच्च अदालतले यस मुद्दामा तीन पटक फाइल मगाउने आदेश दिएको थियो।

अदालतले महान्यायाधिवक्ता कार्यालयसँग रवि लामिछानेविरुद्ध राहदानी मुद्दा नचलाउने निर्णयको कारण माग गरेको थियो। उक्त निर्णय प्राप्त भएपछि दोहोरो सुनुवाइका लागि पेशी तोकिएको हो।

लामिछानेले अदालतको फैसलापछि नेपाली नागरिकता पुनः प्राप्त गरे पनि दोहोरो राहदानीसम्बन्धी मुद्दा भने बाँकी थियो। सो मुद्दा नचल्ने निर्णयविरुद्ध सर्वोच्चमा रिट दायर भएको हो।