काठमाडौ,१४ साउन। निर्वाचन आयोगले चुनावसम्बन्धी जिज्ञासा सम्बोधन गर्न सञ्चालनमा ल्याएको ‘कल सेन्टर’मा चार हजारभन्दा बढी प्रश्न प्राप्त भई समाधान गरिएको छ।
आयोगले गएको माघ ५ गतेदेखि सञ्चालनमा ल्याएको उक्त ‘कल सेन्टर’मा बिहीबारसम्म टेलिफोन तथा ‘भ्वाइस मेल’मार्फत कुल ४ हजार ३८ वटा जिज्ञासा प्राप्त भएको जनाएको छ।
आयोगका सहसचिव तथा प्रवक्ता नारायणप्रसाद भट्टराईका अनुसार प्राप्त जिज्ञासामध्ये १ हजार ९ सय ५८ मतदाता नामावलीसँग सम्बन्धित रहेका छन्। त्यस्तै,निर्वाचन आचारसंहितासम्बन्धी ३ सय ८६, मतदाता शिक्षासम्बन्धी १ सय ५७ र अन्य १ हजार १ सय ११ जिज्ञासा रहेका छन्।
उनका अनुसार कुल जिज्ञासामध्ये ४ सय २६ वटा ‘भ्वाइस मेल’मार्फत प्राप्त भएका हुन्। आयोगले नागरिकका जिज्ञासा छिटो र सहज रूपमा सम्बोधन गर्न ‘कल सेन्टर’ सेवा सञ्चालनमा ल्याएको जनाएको छ।
प्रतिक्रिया दिनुहोस