कृषि परियोजनामा बैंक कर्जाको ब्याजदर घट्ने

काठमाडौँ ,८ भदौ । कृषि परियोजनामा बैंक तथा वित्तीय संस्थाले प्रवाह गर्ने कर्जामा ब्याजदर घट्ने भएको छ।

नेपाल राष्ट्र बैंकले मंगलबार जारी गरेको परिपत्र अनुसार नेपाल कृषि अनुसन्धान परिषद् (नार्क) ले सिफारिस गरेका जातका कृषि उपजहरूको उत्पादन बढाउने परियोजनामा कर्जा प्रवाह गर्दा आधार दरमा बढीमा १.५ प्रतिशतसम्म मात्र प्रिमियम थप गर्न पाइने व्यवस्था गरिएको छ।

यसअघि यस्तो कर्जामा २ प्रतिशतसम्म प्रिमियम थप्ने व्यवस्था थियो।

राष्ट्र बैंकले यस्ता कर्जामा ग्रेस अवधि प्रदान गरेको पहिलो वर्ष असल कर्जाका लागि कर्जा नोक्सानी व्यवस्था ०.२५ प्रतिशत र दोस्रो वर्ष ०.५ प्रतिशत कायम गर्न सकिने प्रावधान गरेको छ।

त्यस्तै, आवश्यक परे यस्ता कर्जामा ग्रेस अवधि उपलब्ध गराउन वा ब्याज पुँजीकरण गर्ने सुविधा समेत दिने व्यवस्था गरिएको छ।