दाङ , ९ पुस । सरकारी काम गर्न प्रायः सम्बन्धित कार्यालयमै पुग्नुपर्छ। अहिलेसम्म चल्दै आएको विधि पनि यही नै हो। तर, सेवाग्राहीको सहजताका लागि सेवाग्राहीकै गाउँघरमा पुगेर कार्यालयले सेवा दिने कार्य सुरु गर्नु भने नयाँ हो। दाङको एक स्थानीय सरकार यो कार्यमा अग्रसर देखिएको छ।

सेवाग्राहीलाई कार्यालय धाउनुपर्ने परम्परागत अभ्यासलाई अन्त्य गर्दै दाङको बबई गाउँपालिकाले वडास्तरमा, त्यो पनि गाउँघरमै पुगेर वडामा सञ्चालन गरिने विकास निर्माण लगायतका योजना सम्झौता गर्ने अभियान सुरु गरेको छ। उपभोक्ता समितिको सहजता, पारदर्शिता र छिटोछरितो कामका लागि यसो गरिएको पालिकाले जनाएको छ। यो कार्य दाङ जिल्लामै पहिलो र नमुना अभ्यासका रूपमा रहेको पालिकाले दाबी छ। 
गाउँपालिकाका प्रमुख प्रशासकीय अधिकृत जोखिम ओलीले नागरिकले पालिकाबाट पाउने सेवा सहज रूपमा पाऊन् भन्ने उद्देश्यले गाउँमै पुगेर उपभोक्ताहरूसँग योजना सम्झौता गर्न थालेको बताए। गाउँपालिकाले ‘सेवा लिन होइन, सेवा दिन गाउँ जानुपर्छ’ भन्ने अवधारणालाई व्यवहारमा उतार्दै वडास्तरमै सम्झौता प्रक्रिया अघि बढाएको उनले बताए। ‘सेवा नागरिकको ढोकासम्म पुग्नुपर्छ भन्ने हो’, उनले भने, ‘पालिकाले त्यसैअनुसार सेवा दिने प्रयास थालेको छ।’ 
प्रमुख प्रशासकीय अधिकृत ओलीले नागरिकले सानासाना योजनाका लागि पालिका धाउनुपर्ने अवस्थालाई अन्त्य गर्न यो अभियान सुरु गरेको बताए। ‘सेवा नै नागरिककहाँ पुग्दा समय, खर्च र झन्झट घट््छ, साथै योजनाको काम समयमै र पारदर्शी रूपमा अघि बढ््छ, भन्ने विश्वासल राखेका छौं’, उनले भने, ‘अहिले १ नं वडाबाट यो अभियान सुरु गरेका छौं।’ दुई दिने शिविर नै सञ्चालन गरेर योजना सम्झौता गाउँबाट गर्न सुरु गरिएको उनले बताए। 

गंगटेमा दुई दिने योजना सम्झौता सिविरपालिकाको अभियानअन्तर्गत बबई गाउँपालिका–१ को गंगटेमा दुई दिने योजना सम्झौता शिविर सञ्चालन गरिएको छ। शिविरमार्फत सम्बन्धित वडाका उपभोक्ता समितिहरूसँग प्रत्यक्ष रूपमा योजना सम्झौता गरिएको छ भने वित्तीय शिक्षा र योजना कार्यान्वयनबारे सीप र जानकारीसमेत गराइएको स्थानीयले बताए। 
स्थानीय सेवाग्राहीले गाउँमै आएर योजना सम्झौता हुँदा आफूहरू लाभाम्वित भएको बताए। सानो कामका लागि पालिका जानुपर्ने बाध्यता र झन्झट हटेको, समय र खर्च दुवै जोगिएको उनीहरूको भनाइ छ। यो कार्यले स्थानीय नागरिक खुसी देखिएका छन््। उनीहरूले गाउँमै सेवा पाउनु सकारात्मक परिवर्तन भएको प्रतिक्रिया दिए। 
स्थानीयले पालिका तथा जनप्रतिनिधिहरूलाई धन्यवाद दिँदै जनप्रतिनिधिहरू यसरी नै गाउँ–घरमै पुगेर सेवा दिनु जनमुखी र प्रशंसायोग्य कार्य भएको बताए। नागरिकसँग प्रत्यक्ष सम्पर्कमा रहेर सेवा दिन सकिए स्थानीय शासन अझ प्रभावकारी र विश्वासिलो बन्ने, सरकारप्रतिको अपनत्व बढ््ने स्थानीय रगु बुढाले बताए। 
बबई गाउँपालिकाले यो अभ्यासलाई आगामी दिनमा सबै वडामा निरन्तरता दिने तयारी गरेको जनाएको छ। स्थानीय तहबाट सेवा प्रवाहलाई सरल, छरितो र नागरिकमैत्री बनाउने दिशामा बबई गाउँपालिका रहेको पालिका अध्यक्ष कुलबहादुर खत्रीले बताए । अन्नपूर्ण पोस्टबाट

दाङ, ९ पुस । दाङको तुलसीपुरमा जारी प्रथम तुलसीपुर महोत्सव–२०८२ को छैटौँ दिन आज चर्चित गायिका समिक्षा अधिकारीको विशेष प्रस्तुति रहने भएको छ । गायिका अधिकारीको उपस्थितिसँगै आज महोत्सवमा दर्शकको उल्लेख्य सहभागिता रहने अनुमान गरिएको छ ।

आजको सांगीतिक कार्यक्रममा समिक्षा अधिकारीसँगै गायक दीपक वली, सन्दिप सेन्चुरी तथा गायिका देवकुमारी खत्री लगायत कलाकारहरूको पनि प्रस्तुति रहने आयोजकले जनाएको छ ।

महोत्सवमा दिनप्रतिदिन दर्शकको सहभागिता बढ्दै गएको महोत्सव मूल आयोजक समितिका संयोजक लालबहादुर केसीले बताए ।

सांगीतिक कार्यक्रमसँगै महोत्सवमा लन्डन ब्रिज र जलपरी आकर्षणका प्रमुख केन्द्र बनेका छन् । स्थानीय वस्तुको बजारीकरण तथा कला संस्कृतिको संरक्षण गर्ने उद्देश्यले नेपाल घरेलु तथा साना उद्योग महासंघ तुलसीपुरको आयोजनामा पुस ४ गतेदेखि महोत्सव सञ्चालन भइरहेको छ ।

दर्शकको भीड बढेसँगै व्यापार व्यवसाय पनि बढ्दै गएको भन्दै महोत्सवले तुलसीपुरको आर्थिक गतिविधिलाई थप चलायमान बनाएको महोत्सव मूल आयोजक समितिका सदस्य सचिव भद्रबहादुर वलीले बताए ।

महोत्सवमा रुकुम पश्चिमको सिस्नोदेखि जुम्लाको मार्सी चामलसम्म बिक्री भइरहेको छ । साथै सल्यानी खुकुरी तथा स्थानीय हस्तकलाका सामग्रीको पनि राम्रो बजारीकरण भइरहेको आयोजकले जनाएको छ ।
‘औद्योगिक वातावरणको सुधार, दिगो अर्थतन्त्रको आधार’ भन्ने मूल नाराका साथ सुरु भएको प्रथम तुलसीपुर महोत्सव पुस १९ गतेसम्म सञ्चालन हुनेछ ।

दाङ,९ पुस । आज बिहानै देखि दाङ उपत्यकासहित तराईका विभिन्न जिल्लामा बाक्लो हुस्सु र कुहिरो लागेको छ । जल तथा मौसम विज्ञान विभागका अनुसार यो अवस्था अझै केही दिन कायम रहने सम्भावना छ ।

विभागले तराई क्षेत्रमा बाक्लो हुस्सु तथा कुहिरो कम्तीमा तीन दिनसम्म रहने जनाएको छ । यसका कारण जनजीवन, स्वास्थ्य तथा सडक र हवाई यातायातमा प्रभाव पर्न सक्ने भएकाले आवश्यक सतर्कता अपनाउन सबैमा अनुरोध गरिएको छ ।

मौसमविद् हरिप्रसाद दाहालका अनुसार पछिल्ला केही दिनदेखि विशेषगरी तराईका अधिकांश स्थानमा निरन्तर हुस्सु र कुहिरो लाग्दै आएको छ । यस्तो अवस्थामा न्यानो भएर बस्न र तातो तथा झोलिलो खानेकुरा सेवन गर्न सुझाव दिइएको छ ।

मौसम पूर्वानुमान महाशाखाका अनुसार आज देशभर पश्चिमी वायुको आंशिक प्रभाव रहेको छ । तराई क्षेत्रमा हुस्सु र कुहिरो कायमै रहने अनुमान छ भने पहाडी तथा हिमाली भूभागमा मौसम मुख्यतया सफा रहनेछ ।

काठमाडौं,८ पुस । वैदेशिक रोजगारमा जाने कामदारहरूको स्वास्थ्य परीक्षणका लागि वृद्धि गरिएको शुल्क सरकारले खारेज गरेको छ । शुल्क पुनः साविककै दरमा कायम भएपछि वैदेशिक रोजगार व्यवसायीहरूले सरकारको निर्णयलाई स्वागतयोग्य बताएका छन् ।

श्रम, रोजगार तथा सामाजिक सुरक्षा मन्त्रालयले गत कात्तिक ३० गते स्वास्थ्य परीक्षण शुल्क बढाएर ९ हजार ५ सय रुपैयाँ पुर्‍याएको थियो ।

यसअघि उक्त शुल्क ६ हजार ५ सय रुपैयाँ मात्र रहेको थियो । शुल्क वृद्धिको निर्णयप्रति वैदेशिक रोजगार व्यवसायीहरूले विरोध जनाउँदै आएका थिए । श्रममन्त्री राजेन्द्रसिंह भण्डारीले वृद्धि गरिएको शुल्क खारेज गरिएको जानकारी दिए ।

मन्त्रालयले ३४ वटा स्वास्थ्य परीक्षण आवश्यक भएको भन्दै शुल्क वृद्धि गरेको भए पनि त्यो आवश्यक नरहेको वैदेशिक रोजगार व्यवसायी संघका अध्यक्ष भुवनसिंह गुरुङले बताउनुभयो ।

“सरकारले अनावश्यक रूपमा श्रमिकको खर्च बढाउने निर्णय गरेको थियो,” गुरुङले भने, “अहिले सो शुल्क खारेज गरी श्रमिकको हितमा निर्णय गर्नु प्रशंसनीय छ ।”

दाङ,८ पुस। पूर्व–पश्चिम राजमार्ग आसपास बिना अनुमति रुख कटान गरिएको घटनामा राप्ती गाउँपालिकाका अध्यक्षसहित ८ जना जनप्रतिनिधि तथा संलग्न व्यक्ति दोषी ठहर भएका छन्।

दाङ देउखुरी जिल्ला अदालतले राप्ती गाउँपालिकाका अध्यक्ष प्रकाश विष्ट, तीन जना वडाध्यक्ष तथा अन्य संलग्न व्यक्तिहरूले सडक क्षेत्राधिकारभित्र पर्ने रुखहरू कानुनी प्रक्रिया पूरा नगरी काटी काठ ओसारपसार गरेको ठहर गर्दै सजाय सुनाएको हो। जिल्ला न्यायाधीश राजेश्वर अर्यालको एकल इजलासले पुस २ गते उक्त मुद्दामा फैसला गरेको अदालतका सूचना अधिकारी गोकर्ण वलीले जानकारी दिए।

अदालतले वडा नम्बर ४ का वडाध्यक्ष वीरबहादुर चौधरीलाई एक महिना कैद र १ लाख ४१ हजार २ सय २६ रुपैयाँ बिगो तिर्न आदेश दिएको छ। अध्यक्ष प्रकाश विष्टसहित वडा नम्बर १ का वडाध्यक्ष गेमे खड्का, वडा नम्बर ५ का वडाध्यक्ष देवप्रसाद चौधरी तथा काठ खरिदकर्ता र अन्य संलग्न व्यक्तिहरूलाई १५–१५ दिनको कैद सजाय तोकिएको छ।

तर, घटनासँग जोडिएका तत्कालीन सडक डिभिजन कार्यालय दाङका प्रमुख रामपुकार जैसवाललाई भने प्रमाण नपुगेको भन्दै अदालतले सफाइ दिएको छ। डिभिजन वन कार्यालय दाङका सहायक वन अधिकृत छोटेलाल चौधरीले २०८० मंसिर १० गते अध्यक्ष विष्टसहित ९ जना विरुद्ध मुद्दा दायर गरेका थिए।

दाङ, ८ पुस ।राष्ट्रिय युवा संघ नेपाल जिल्ला समिति दाङले तुलसीपुर उपमहानगरपालिकाका जननिर्वाचित मेयर टीकाराम खड्कामाथि अभद्र तथा आपत्तिजनक धम्की दिइएको घटनाप्रति गम्भीर आपत्ति जनाएको छ ।

जेन–जी अभियान्ता सुदन गुरुङले मेयर खड्कामाथि अभद्र धम्की दिएको र सो कार्यमा डा. किशोर खत्रीको भूमिका रहेको भन्दै संघले उक्त गतिविधि लोकतान्त्रिक मूल्य, पेशागत मर्यादा र सामाजिक उत्तरदायित्वको गम्भीर उल्लंघन भएको ठहर गरेको छ ।

राष्ट्रिय युवा संघ नेपाल, दाङका अध्यक्ष विवेक योगीद्वारा हस्ताक्षरित प्रेस विज्ञप्तिमा निर्वाचित जनप्रतिनिधिमाथि धम्की दिने, डर–त्रास सिर्जना गर्ने तथा लोकतान्त्रिक अभ्यासलाई कमजोर बनाउने गतिविधि कुनै पनि हालतमा स्वीकार्य नहुने उल्लेख गरिएको छ ।

एक जिम्मेवार चिकित्सकजस्तो सम्मानित पेशामा आबद्ध व्यक्तिबाट यस्तो कार्य हुनु झनै निन्दनीय भएको संघको भनाइ छ ।

युवा संघले यस्ता गैरजिम्मेवार, अराजक र उच्छृंखल गतिविधिको कडा भर्त्सना गर्दै दोषीमाथि कानुनअनुसार कडा कारबाही गर्न सम्बन्धित निकायसँग जोडदार माग गरेको छ ।

साथै, सुदन गुरुङले यस विषयमा सार्वजनिक रूपमा माफी नमागेसम्म आजको मितिदेखि उनलाई दाङ जिल्लामा प्रवेश निषेध गरिएको विज्ञप्तिमा उल्लेख छ ।
संघले यदि यस्ता गतिविधि समयमै नियन्त्रण नगरिए गम्भीर सामाजिक अशान्ति र अराजकता सिर्जना हुन सक्ने चेतावनी दिँदै त्यसको सम्पूर्ण जिम्मेवारी सम्बन्धित पक्षले लिनुपर्ने जनाएको छ ।

साथै, सुरक्षा निकाय, स्वास्थ्य परिषद् तथा सरोकारवाला निकायलाई तुरुन्त आवश्यक कदम चाल्न आग्रह गरिएको छ ।

राष्ट्रिय युवा संघ नेपालले लोकतन्त्र, विधिको शासन र निर्वाचित जनप्रतिनिधिको सुरक्षाको पक्षमा दृढतापूर्वक उभिने स्पष्ट पारेको छ ।

दाङ, ७ पुस । नेपाल संस्कृत विश्वविद्यालयका उपकुलपति प्रा. डा. धनेश्वर नेपाल, उनका स्वकीय सचिव चोलेन्द्र रिजाल तथा कर्मचारी संघका पूर्व अध्यक्ष खिमबहादुर केसीमाथि गरिएको आक्रमण तथा दुव्र्यवहारप्रति नेपाली कांग्रेस दाङले गम्भीर आपत्ति जनाएको छ ।

नेपाली कांग्रेस दाङले सोमबार जारी गरेको विज्ञप्तिमा पुस ६ गते आइतबार बिहान करिब ८ः३० बजे बेलझुण्डीस्थित उपकुलपतिको आवास क्षेत्रमा प्रवेश गरी अज्ञात समूहले उपकुलपतिसहित तीन जनामाथि आक्रमण र दुव्र्यवहार गरेको घटनाको घोर निन्दा गरेको छ ।

कांग्रेस दाङका सभापति शंकरप्रसाद डाँगीद्वारा जारी विज्ञप्तिमा देशकै प्रतिष्ठित शैक्षिक संस्थाका जिम्मेवार व्यक्तिहरूमाथि भएको आक्रमणलाई अराजक, असभ्य र कानूनविपरीत कार्यका रूपमा उल्लेख गरिएको छ ।
विज्ञप्तिमा भनिएको छ, “शैक्षिक संस्थाका सम्मानित व्यक्तिहरूमाथि गरिएको आक्रमण कानून र विधिको ठाडो उल्लंघन हो ।”

यस्ता गतिविधिले विश्वविद्यालयको पठनपाठन वातावरणमा गम्भीर असर पार्नुका साथै समाजमा नकारात्मक सन्देश जाने कांग्रेस दाङको ठहर छ ।
कांग्रेस दाङले घटनामा संलग्न व्यक्तिहरूको यथाशीघ्र पहिचान गरी कानूनबमोजिम कडा कारबाही गर्न माग गर्दै विश्वविद्यालयमा सुरक्षित र शान्तिपूर्ण शैक्षिक वातावरण सुनिश्चित गर्न सम्बन्धित सबै पक्षसँग आग्रह गरेको छ ।

दाङ, ७पुस । दाङको घोराहीस्थित भरतपुर खानेपानी उपभोक्ता तथा सरसफाइ संस्थाको अध्यक्ष पदमा शंकर गौतम सातौँ पटक निर्विरोध निर्वाचित भएका छन् ।

संस्थाको नवौँ अधिवेशनअन्तर्गत सोमबार भएको उम्मेदवारी मनोनयन दर्ता प्रक्रियामा अध्यक्ष पदका लागि वर्तमान अध्यक्ष गौतमको एकल उम्मेदवारी परेपछि उनी निर्विरोध निर्वाचित भएका हुन् ।

२०५८ सालमा कोषाध्यक्षबाट संस्थागत यात्राको सुरुआत गर्नुभएका गौतम २०६४ सालदेखि निरन्तर अध्यक्षको जिम्मेवारीमा रहँदै आएका छन् । आठौँ कार्यकालका लागि आइतबार दिउँसो १२ बजेदेखि २ बजेसम्म मनोनयन दर्ताको समय तोकिएको थियो ।

भरतपुर खानेपानी उपभोक्ता तथा सरसफाइ संस्थाका कानुनी सल्लाहकार तथा निर्वाचन अधिकृत निर्मल गौतमका अनुसार ५ जना पदाधिकारीसहित ११ सदस्यीय कार्यसमितिका सबै पदमा एक–एक जनाको मात्र उम्मेदवारी परेको छ ।

नयाँ नेतृत्वका लागि उपाध्यक्षमा जंगबहादुर जिसी, सचिवमा मिनराज लम्साल, सहसचिवमा शान्तराज अधिकारी र कोषाध्यक्षमा सुनिता आचार्यको एकल उम्मेदवारी परेको छ ।

यसैगरी कार्यसमिति सदस्यमा हरिप्रसाद रिजाल, शिवकुमार भण्डारी, शारदा न्यौपाने, गीता पोख्रेल, मुना पोख्रेल र रोमा जिसीको उम्मेदवारी दर्ता भएको निर्वाचन अधिकृत गौतमले जानकारी दिए ।

उम्मेदवारी दिएका मध्ये उपाध्यक्ष जिसी यसअघि पनि उपाध्यक्ष नै रहेको थिइन् । सचिवमा उम्मेदवारी दिएका लम्साल यसअघि सहसचिव रहेका थिए भने सहसचिवका उम्मेदवार शान्तराज अधिकारी र कोषाध्यक्षकी उम्मेदवार सुनिता आचार्य कार्यसमिति सदस्य थिए । कार्यसमिति सदस्यहरूमध्ये चार जना नयाँ र दुई जना पुरानै अनुहार रहेका छन् ।

उम्मेदवारी दर्ता गरेका उम्मेदवारहरूले भोलि मंगलबार बेलुकी ४ बजेसम्म उम्मेदवारी फिर्ता लिन सक्नेछन् । त्यसपछि निर्विरोध निर्वाचित भएको औपचारिक घोषणा गरिने निर्वाचन अधिकृत गौतमले जानकारी दिए ।

भरतपुर खानेपानी उपभोक्ता तथा सरसफाइ संस्थाको २३औँ साधारणसभा गत शनिबार घोराहीमा सम्पन्न भएको थियो । यदि कुनै पदमा एकभन्दा बढी उम्मेदवारी परेको खण्डमा आगामी शनिबार पुस १२ गते निर्वाचन गर्ने कार्यतालिका सार्वजनिक गरिएको थियो ।

काठमाडौँ,७ पुस । मिराज ढुंगानाको नेतृत्वमा माइतीघर मण्डलामा भइरहेको जेनजी समूहको प्रदर्शनमा प्रहरीले हस्तक्षेप गरेको छ । प्रदर्शनका क्रममा निकोलस भुसालसहित केही व्यक्तिलाई प्रहरीले पक्राउ गरेको जनाएको छ ।

काठमाडौं प्रशासनले माइतीघर क्षेत्रमा प्रदर्शन गर्न अनुमति नदिए पनि जेनजी समूहले सो निर्णयको अवज्ञा गर्दै प्रदर्शन गरेपछि हस्तक्षेप गर्नुपरेको प्रहरीको भनाइ छ ।
प्रहरीका अनुसार अनुमति नलिइएको स्थानमा प्रदर्शन नगर्न बारम्बार माइकिङमार्फत सूचना दिइएको थियो । त्यसलाई बेवास्ता गर्दै प्रदर्शन जारी राखिएपछि बाध्य भएर हस्तक्षेप गरिएको प्रहरीले जनाएको छ ।

काठमाडौँ,७ पुस । गृहमन्त्री ओमप्रकाश अर्यालले विपद् पूर्वतयारी, पूर्वसूचना र पूर्वानुमानमा आधारित पूर्वकार्यलाई अझ मजबुत, संस्थागत र प्रभावकारी बनाउने विषयमा सरकार पूर्ण रूपमा प्रतिवद्ध रहेको बताएका छन् ।

सोमबार पूर्वानुमानमा आधारित पूर्वकार्यसम्बन्धी चौथो राष्ट्रिय संवादको उद्घाटन सत्रलाई सम्बोधन गर्दै गृहमन्त्री अर्यालले नेपालले परम्परागत प्रतिकार्य केन्द्रित विपद् व्यवस्थापनको दृष्टिकोण परिवर्तन गर्दै जोखिमको ज्ञान, पूर्वतयारी र पूर्वानुमानमा आधारित पूर्वकार्यतर्फ अघि बढिसकेको बताए ।

उनका अनुसार पूर्वानुमानमा आधारित पूर्वकार्य प्रभावकारी बनाउन तीनवटा पक्ष अत्यन्तै महत्वपूर्ण छन् । जोखिमको स्पष्ट जानकारी, विश्वसनीय पूर्वानुमान प्रणाली र प्रभावमा आधारित पूर्वसूचना प्रणाली आवश्यक रहेको उनले बताए ।

पूर्वसूचना जारी भएपछि तत्काल सक्रिय हुने स्पष्ट कार्ययोजना र पहिल्यै व्यवस्थित गरिएको स्रोत–साधन अनिवार्य रहेको उल्लेख गर्दै उनले यसले संकटको समयमा ढिलाइ नगरी काम गर्न सहयोग पुग्ने बताए ।

गृहमन्त्री अर्यालले नेपाल बहुप्रकोप जोखिमयुक्त मुलुक भएको उल्लेख गर्दै बाढी, पहिरो, खडेरी, आगलागी, चट्याङ, तातो हावाको लहर, अत्यधिक गर्मी, शीतलहर तथा महामारीजस्ता जल तथा मौसमजन्य प्रकोपहरूले नेपालमा हुने कुल विपद्को ठूलो हिस्सा ओगटेको बताए ।
जलवायु परिवर्तनका कारण यस्ता जोखिमहरू झनै अनिश्चित, तीव्र र बारम्बार देखिन थालेको भन्दै उनले विपद्जन्य घटनाका कारण नेपालले हरेक वर्ष ठूलो मात्रामा जनधनको क्षति व्यहोर्दै आएको बताए ।