दाङ,३ पुस । निर्वाचन आयोगले आउँदो माघ ११ गते हुने राष्ट्रियसभा सदस्य निर्वाचनका लागि मतदानस्थल तथा मतदान केन्द्र तोकेको छ।

आयोगका प्रवक्ता तथा सह–सचिव नारायणप्रसाद भट्टराईका अनुसार हिजो सातै प्रदेशका लागि मतदानस्थल निर्धारण गरिएको हो।

सातै प्रदेशको राजधानी रहेका जिल्लामा मतदानस्थल रहने गरी स्थान तय गरिएको र प्रत्येक मतदानस्थलमा दुई–दुई वटा मतदान केन्द्र रहने व्यवस्था मिलाइएको उहाँले जानकारी दिनुभयो।

आयोगका अनुसार मतदान केन्द्र ‘क’ प्रदेशसभा सदस्यहरूका लागि तोकिएको छ भने मतदान केन्द्र ‘ख’ गाउँपालिका अध्यक्ष–उपाध्यक्ष तथा नगरपालिकाका मेयर–उपमेयरका लागि निर्धारण गरिएको छ।

निर्वाचन आयोगले मतदान प्रक्रिया व्यवस्थित र सहज बनाउन आवश्यक तयारी पूरा गरिएको जनाएको छ।

दाङ,२ पुस। घोराही उपमहानगरपालिका–१६ तेरौटेका प्रतीकराज लोहनीले प्राङ्गारिक विधिमा आधारित व्यावसायिक कागतीखेती गर्दै नमूना किसानको पहिचान बनाएका छन्। सिभिल इन्जिनियर पेसाबाट कृषि उद्यमतर्फ मोडिएका उनले रासायनिक विषादी प्रयोग नगरी कागतीखेतीमा आफूलाई स्थापित गरेका छन्।

चार बिघा १० कट्ठा जमिनबाट कागतीखेती सुरु गरेका ४१ वर्षीय लोहनीले हाल खेती क्षेत्र विस्तार गर्दै ६ बिघा पुर्‍याएका छन्। अहिलेसम्म करिब एक करोड रुपैयाँ लगानी गरिसकेका उनले आफ्नो बगैँचामा ‘सुन कागती–१’ जातका दुई हजारभन्दा बढी बिरुवा रोपेका छन्।

‘सुन कागतीको बिरुवाले रोपेको करिब तीन वर्षपछि उत्पादन दिन थाल्छ,’ लोहनी भन्छन्, ‘हाल घोराही बजारसँगै काठमाडौंसम्म कागती पठाइरहेका छौं।’ उनले थोपा सिँचाइ प्रविधि प्रयोग गर्दै उत्पादन लागत घटाउनुका साथै गुणस्तरमा ध्यान दिएको बताए।

लोहनीको बगैँचाले स्थानीयस्तरमै १० जनालाई रोजगारी दिएको छ। खेती अझै विस्तार गर्ने योजनामा रहेका उनले प्रतिकट्ठा वार्षिक तीन हजार रुपैयाँ भाडा तिर्दै जमिन उपयोग गरिरहेका छन्। कृषि व्यवसायसँगै तेरौटे गाउँलाई ‘ग्रिन भिलेज’का रूपमा विकास गर्ने उनको दीर्घकालीन लक्ष्य छ।

काठमाडौंमा अध्यापन र हाइड्रोपावर कम्पनीमा काम गरेको अनुभव रहेका लोहनी भन्छन्, ‘सागसब्जीको तुलनामा कागतीमा रोगको जोखिम कम हुन्छ र उत्पादन पनि राम्रो हुने भएकाले यही खेती रोजेँ।’

गत वर्ष प्रतिकेजी १५० रुपैयाँसम्म मूल्य पाएको कागती यस वर्ष ८० रुपैयाँमा झरे पनि उनी निराश छैनन्। ‘मूल्य घटबढ भइरहन्छ, तर दीर्घकालीन रूपमा कागतीखेती सम्भावनायुक्त छ,’ उनी आत्मविश्वासका साथ भन्छन्।

इन्जिनियरिङ पेसाबाट कृषि उद्यममा रुपान्तरण भएका प्रतीकराज लोहनीको कागतीखेती यात्रा धेरै युवाका लागि प्रेरणाको स्रोत बनेको छ।

दाङ ,१ पुस । राप्ती स्वास्थ्य विज्ञान प्रतिष्ठानको उपकुलपति नियुक्ति प्रक्रिया रोक्न उच्च अदालतले अल्पकालीन आदेश जारी गरेको छ। उच्च अदालत तुलसीपुरका मुख्य न्यायाधीश राजेश्वर तिवारीको एकल इजलासले आदेश दिएको हो।

अदालतका सूचना अधिकारी कृष्णप्रसाद शर्माका अनुसार स्वास्थ्य मन्त्रालयले प्रतिष्ठानको उपकुलपति नियुक्ति गर्न मंसिर २५ गते सूचना प्रकाशित गरेको थियो। तर प्रतिष्ठानका निमित्त निर्देशक जनार्दन पन्थीले रिट दायर गरेपछि अदालतले पुस ८ गते छलफलका लागि दुवै पक्षलाई बोलाउने आदेश दिएको छ।

८ गतेसम्म नियुक्ति प्रक्रिया अघि नबढाउने र अल्पकालीन अन्तरिम आदेशलाई निरन्तरता दिने वा नगर्नेबारे आगामी सुनुवाइपछि मात्रै निर्णय हुनेछ।

धनगढी,१ पुस। नवजात शिशुलाई झाडिमा फाल्ने एक महिलालाई प्रहरीले नियन्त्रणमा लिएको छ।

जिल्ला प्रहरी कार्यालयको टोलीले धनगढी उपमहानगरपालिकाकी ३० वर्षीया विवाहित महिलालाई नियन्त्रणमा लिएर सोधपुछ सुरु गरेको हो। ती महिलाका श्रीमान रोजगारीका सिलसिलामा विदेशमा रहेका जिल्ला प्रहरी कार्यालयका सहप्रवक्ता प्रहरी निरीक्षक कैलाशसिंह विष्टले जानकारी दिए।

प्रहरीका अनुसार प्रसव पीडाका कारण महिला हाल धेरै बोल्न सक्ने अवस्थामा नरहेकाले नवजात शिशु फाल्नुको कारण पछि मात्रै खुल्ने बताइएको छ।

आज बिहान धनगढी उपमहानगरपालिका–८ भद्रटोलमा नालानजिक नवजात शिशु फालिएको अवस्थामा फेला परेको थियो। करिब साढे ९ बजेतिर सालनालसहित कपडाले बेरिएको अवस्थामा शिशु भेटिएको हो। उद्धारपछि उपचारका लागि शिशुलाई सेती प्रादेशिक अस्पताल लगिएको प्रहरीले जनाएको छ।

नवजात शिशुको अवस्था हाल सकुशल रहेको प्रहरी निरीक्षक विष्टले बताए। शिशु बेवारिसे अवस्थामा फेला परेपछि प्रहरीले आमाको खोजबिन गर्दै महिलालाई नियन्त्रणमा लिएको हो।

काठमाडौं,१ पुस। नेपाली कम्युनिस्ट पार्टीका नेता तथा पूर्वअर्थमन्त्री वर्षमान पुनले तोकिएको मितिमा निर्वाचन नगराए सरकारको औचित्य समाप्त हुने बताएका छन्।

मंगलबार काठमाडौंमा आयोजित एक कार्यक्रममा बोल्दै उनले संविधानअनुसार ६ महिनाभित्र निर्वाचन गराउने म्यान्डेट सरकारलाई दिइएको भन्दै तोकिएको मितिमा चुनाव हुनैपर्ने बताए। निर्वाचन मिति सार्न सकिन्छ भन्ने तर्कको कुनै आधार नरहेको उनको भनाइ छ।

उनले भने, “चुनाव सर्नुको अर्थ यो सरकारको औचित्य सकिन्छ। ६ महिनाभित्र चुनाव गर्छु भनेर कमिटमेन्ट गरेर म्यान्डेट लिएको सरकारले चुनाव नगराउने भन्न पाउँदैन। परामर्श गरेर नै मिति तय गरिएको हो। ६ महिनाभित्र चुनाव नगराए सरकारको म्यान्डेट सिद्धिन्छ।”

नेता पुनले तोकिएको मितिमा निर्वाचन गरेर अघि बढे मात्र मुलुकलाई संकटबाट निकास दिन सकिने बताए।

उनले सरकारलाई अर्थतन्त्र चलायमान बनाउने गरी पूँजीगत खर्च बढाउनुपर्ने सुझाव पनि दिए। साथै जेनजी आन्दोलनका कारण प्रभावित निजी क्षेत्रका उद्योग र व्यवसायलाई राहत दिने व्यवस्था गर्न सरकारलाई सचेत गराए।

काठमाडौं,१ पुस । रुखबाट लडेर एकजनाको मृत्यु भएको छ । मकवानपुरको मनहरी गाउँपालिका वडा ७ मा रुखबाट खसेर गम्भीर घाइते एक व्यक्तिको उपचारको क्रममा मृत्यु भएको हो।

मंगलबार मकवानपुरको राक्सिराङ गाउँपालिका वडा ८ टोक्चेराङ घर भइ हाल मनहरी ७ लामाटोलस्थित काका डिसा लामाको घरमा बस्दै आएका सुरेश लामाको मङ्गलबार उपचारको क्रममा मृत्युभएको जिल्ला प्रहरी कार्यालय मकवानपुरले जनाएको छ ।

स्थानीय मनकामना सामुदायिक वनमा घाँस काट्न गएका ३५ वर्षीय सुरेस साजको रुखमा चढेर  घाँस झार्ने क्रममा एक्कासि रुख बाट खस्दा गम्भीर घाइते भएका थिए ।

रुखबाट खसेर गम्भीर घाइते अवस्थामा उद्धार गरेर उपचारको लागि हेटौँडा अस्पताल ल्याइएकोमा चिकित्सकले उपचारको क्रममा मृत घोषणा गरेको जिल्ला प्रहरी कार्यालय मकवानपुरका प्रहरी प्रवक्ता प्रहरी नायव उपरीक्षक पुष्कर बोगटीले जानकारी दिए। 

उनका अनुसार घटनाको आवश्यक अनुसन्धान भइरहेको छ ।

दाङ,२९ मंसिर । युथ्स अफ तुलसीपुरले पश्चिम दाङमा देखिन सक्ने रगत अभावलाई मध्यनजर गर्दै रक्तदान कार्यक्रम सम्पन्न गरेको छ । नेपाल रेडक्रस सोसाइटी तुलसीपुरको प्राविधिक सहयोग तथा ज्ञानज्योती कलेजको व्यवस्थापनमा आज उक्त कार्यक्रम आयोजना गरिएको हो ।

कार्यक्रममा ज्ञानज्योती कलेजमा अध्ययनरत करिब ३० जना छात्रछात्राले रक्तदान गरेका थिए । क्लबका अध्यक्ष ऋषिराज लहरे ‘अरुण’ ले पश्चिम दाङमा समय–समयमा देखिने रगतको अभाव न्यूनीकरण गर्ने उद्देश्यले रक्तदान कार्यक्रम आयोजना गरिएको जानकारी दिए ।

अध्यक्ष लहरेका अनुसार युवालाई सामाजिक सेवामा सक्रिय बनाउँदै मानवीय सेवाको भावनालाई प्रवर्द्धन गर्न यस्ता कार्यक्रमहरू निरन्तर रूपमा सञ्चालन गरिँदै आएको छ ।

युथ्स अफ तुलसीपुरले यसअघि पनि रक्तदान, सरसफाइ, सचेतनामूलक कार्यक्रमलगायत विभिन्न सामाजिक गतिविधिहरू गर्दै आएको छ । कार्यक्रम सफलतापूर्वक सम्पन्न भएको भन्दै आयोजकले रक्तदाताहरू, सहकार्य गर्ने संस्थाहरू तथा व्यवस्थापन पक्षलाई धन्यवाद व्यक्त गरेका छन् ।

दाङ,२८ मंसिर। तुलसीपुरस्थित गोरखा माध्यमिक विद्यालयमा लामो समयदेखि अध्यापन गराउँदै आएका १० जना शिक्षकले सामूहिक रूपमा राजीनामा दिएका छन्। करिब १४ वर्षदेखि विद्यालयमा सेवा दिँदै आएका अनुभवी शिक्षकसमेत राजीनामा दिन बाध्य भएको घटना सार्वजनिक भएपछि विद्यालय प्रशासनको भूमिकामाथि गम्भीर प्रश्न उठेको छ।

राजीनामा दिने शिक्षकहरूका अनुसार विद्यालय प्रशासनले कुनै आधिकारिक छानबिन नगरी बाह्य हल्लाका आधारमा उनीहरूमाथि मासिक रूपमा मानसिक यातना, दोषारोपण तथा अपमानजनक व्यवहार गर्दै आएको थियो। शिक्षक कमल भण्डारीले प्रशासनले आफूलाई जानकारी नदिई प्रयोग गर्दै आएका सामग्रीहरू फिर्ता माग्ने, प्रयोगमा रहेको सिमकार्ड अचानक बन्द गरिदिने तथा ह्वाट्सएप समूहबाट एडमिन हटाउनेजस्ता कदम चालेको बताए।

उनका अनुसार कर्मचारीमार्फत कक्षाकोठामै पुगेर ‘विद्यालयबाट निस्कनु’ भनेर दबाब दिने कार्यले आफूहरूलाई गहिरो मानसिक पीडा दिएको थियो। “बिना प्रमाण, बिना सुनुवाइ हल्लाको भरमा हामीमाथि अन्याय गरियो,” भण्डारीले भने।

यस्तै शिक्षिका मञ्जु कँडेलले कक्षाकोठामै पुगेर विद्यालय प्रशासनले ‘भोलिदेखि विद्यालय नआउनू’ भनेपछि आफू मानसिक रूपमा विचलित भएको बताइन्। पूर्वसूचना नै नदिई विद्यालयले आफूहरूको स्थानमा पहिल्यै वैकल्पिक शिक्षक तयार पारेर निकालिएको आरोप पनि उनले लगाइन्।

शिक्षक तारक रेग्मीले पनि प्रशासनले अपनाएको व्यवहार अपमानजनक र अमानवीय भएको भन्दै सामूहिक राजीनामा दिनु बाहेक अन्य विकल्प नरहेको बताए।

यसैबीच सामूहिक राजीनामा दिएका शिक्षकहरूले विद्यार्थी र अभिभावकसँग माफी मागेका छन्। उनीहरूले आफ्नो कारणले पठनपाठनमा पर्न सक्ने असरप्रति दुःख व्यक्त गर्दै भनेका छन्, “हामीले चाहेर होइन, बाध्यताले यो निर्णय लिनुपरेको हो। यसले विद्यार्थीहरूको भविष्यमा कुनै असर नपरोस् भन्ने हाम्रो कामना छ। विद्यार्थी र अभिभावकहरूसँग हामी हृदयदेखि माफी चाहन्छौं।”

यता यस विषयमा गोरखा माध्यमिक विद्यालयका प्रिन्सिपल विजयमान जिएमले कुनै प्रतिक्रिया दिन नचाहेको बताएका छन्। प्रिन्सिपल जिएमले ‘ मलाई यस विषयमा कुरै गर्नु छैन’ भन्दै प्रतिकृया दिन चाहेनन् । शिक्षकहरूको सामूहिक राजीनामाबारे विद्यालय प्रशासन तत्काल आधिकारिक धारणा सार्वजनिक गर्ने पक्षमा नरहेको उनको भनाइ छ।

घटनाले विद्यालय प्रशासनको पारदर्शिता, शिक्षकप्रति व्यवहार र संस्थागत व्यवस्थापनमाथि गम्भीर प्रश्न उठाएको छ। लामो समयदेखि सेवा दिँदै आएका शिक्षकहरू सामूहिक रूपमा बाहिरिनुले विद्यालयको शैक्षिक वातावरणमा प्रभाव पार्ने देखिएको छ।

काठमाडौं,२८ मंसिर । प्रधानमन्त्री सुशीला कार्कीले संविधानले सुनिश्चित गरेको समावेशीकरण, सामाजिक न्याय तथा सांस्कृतिक,भाषिक विविधताको संरक्षण र प्रवर्द्धन गर्नु राज्यको दायित्व भएको बताएकी छन्।

आदिवासी जनजाति उत्थान राष्ट्रिय प्रतिष्ठानको २६औँ सञ्चालक परिषद् बैठकको उद्घाटन गर्दै प्रधानमन्त्री कार्कीले आदिवासी जनजातिहरूको पहिचान, अधिकार, संस्कृति र समग्र विकासका लागि प्रतिष्ठानले गर्दै आएको योगदान प्रशंसनीय रहेको उल्लेख गरिन्।

उनले परिषद् बैठकबाट गरिने निर्णय, मार्गदर्शन तथा नीतिगत सुझावहरू राष्ट्रिय नीतिहरूको प्रभावकारी कार्यान्वयनमा महत्वपूर्ण हुने विश्वास व्यक्त गरिन्।

प्रधानमन्त्री कार्कीका अनुसार संस्थागत सुदृढीकरण, कार्यक्रमको प्रभावकारिता, अनुसन्धानमा आधारित नीतिगत सिफारिस, मातृभाषा तथा संस्कृतिको अभिलेखीकरण र संरक्षण तथा आदिवासी जनजातिहरूको दिगो सामाजिक–आर्थिक सशक्तीकरणका लागि परिषद् बैठकले स्पष्ट दिशा तय गर्नेछ।

उनले सरकारले प्रतिष्ठानका कार्यक्रम तथा गतिविधिहरू प्रभावकारी रूपमा कार्यान्वयन गर्न आवश्यक नीतिगत तथा संरचनात्मक सुधार गर्दै बजेट व्यवस्थापन गर्दै आएको जानकारी दिइन्।

विकास साझेदार, नागरिक समाज, स्थानीय सरकार र समुदायबीचको सहकार्यलाई अझ मजबुत बनाउँदै समावेशी विकासका लक्ष्य हासिल गर्नुपर्नेमा जोड दिँदै प्रधानमन्त्री कार्कीले त्यसका लागि सरकार आवश्यक सहजीकरण गर्न तयार रहेको बताइन्।

संविधानले आत्मसात गरेको गणतन्त्र, संघीयता, धर्मनिरपेक्षता र समावेशीकरणका मान्यतालाई सबै जातजाति तथा समुदायको सर्वोपरि हितका लागि व्यवहारमा उतार्नु सरकार र नागरिक दुवैको दायित्व भएको उनको भनाइ थियो।

प्रधानमन्त्री कार्कीले विविधतालाई राष्ट्रिय एकतामा रूपान्तरण गर्न तथा आदिवासी जनजातिहरूको सांस्कृतिक अधिकार सुनिश्चित गर्न संविधानले प्रत्याभूत गरेका व्यवस्थाहरू प्रभावकारी रूपमा कार्यान्वयन गर्नुपर्ने आवश्यकता औँल्याइन्।

दाङ,२८ मंसिर । तुलसीपुरमा सन्चालन हुने महोत्सवको ८० प्रतिशत तयारी पूरा भएको छ। “स्थानीय उत्पादनलाई प्रवर्द्धन गरौँ, औद्योगिक वातावरणको सुधार गरौँ र दिगो अर्थतन्त्र निर्माण गरौँ” भन्ने नारासहित आयोजना हुन लागेको महोत्सवको ८० प्रतिशत तयारी पूरा भएको हो।

आइतबार पत्रकार सम्मेलन गर्दै महोत्सव सञ्चालन नेपाल घरेलु तथा साना उद्योग महासंघका अध्यक्ष लालबहादुर केसीले सो कुरा जानकारी गराएका हुन् ।

सो अवसरमा केसीले महोत्सव सन्चालन तथा व्यवस्थापनका लागि २ सय ५१ सदस्यीय मूल आयोजक समिति गठन गरिएको जानकारी दिए।

महोत्सवलाई व्यवस्थित र प्रभावकारी बनाउन २७ वटा विभिन्न उपसमिति गठन गरिएको आयोजकले जनाएको छ।

कृषि तथा स्थानीय उत्पादनको प्रवर्द्धनका लागि ५० वटा स्टल निःशुल्क उपलब्ध गराइनेछ। बिक्रीवितरणको आधारमा कृषकहरुलाई प्रोत्साहनस्वरूप पुरस्कार प्रदान गरिने व्यवस्था गरिएको छ।

महोत्सवमा कुल ४सय ५० वटा स्टल रहनेछन्। स्थानीय व्यवसायीलाई स्टल शुल्कमा २५ प्रतिशत छुट दिइएको छ। हालसम्म १सय ५ वटा स्टल बुक भइसकेका छन्।

युवा उद्यमशीलतालाई प्रोत्साहन गर्ने उद्देश्यले युवा उद्यम नवप्रवर्द्धन कार्यक्रमअन्तर्गत उत्कृष्ट व्यावसायिक योजना तथा आइडियाहरू छनोट गरी छलफल गरिनेछ। सो मध्यबाट उत्कृष्ट व्यवसायीक मार्गदर्शन तथा उपाय दिने युवा उद्यमीलाइ पनि पुरस्कृत गरिने मुल आयोजक समितीले जनाएको छ।

महोत्सवस्थलमा जलपरी, फिस टनेल र लन्डन ब्रिजजस्ता आकर्षक संरचनाहरू रहनेछन्। आयोजक समितिका अनुसार महोत्सवको तयारी तीव्र रूपमा अघि बढिरहेको छ।