काठमाडौं,२७ मंसिर । एमालेको ११ औँ महाधिवेशनमा नेपाली कांग्रेसका सभापति शेरबहादुर देउवा ,नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’, र सहसंयोजक माधव नेपाल र सहभागी नहुने भएका छन्।

महाधिवेशनका लागि एमालेले औपचारिक निम्तो दिए पनि यी शीर्ष नेताहरू नजाने भएका हुन्। प्रचण्ड र माधव नेपाल हाल पार्टी एकता सन्देश सभालाई सम्बोधन गर्न सुर्खेत पुगेका छन्। नेपाली कम्युनिस्ट पार्टीको तर्फबाट महाधिवेशनमा नेता देव गुरुङले सम्बोधन गर्ने प्रचण्डका प्रमुख स्वकीय सचिव गोविन्द आचार्यले केन्द्रविन्दुलाई जानकारी दिएका छन्।

यस्तै, कांग्रेसको तर्फबाट शुभकामना दिन कार्यवाहक सभापति पूर्णबहादुर खड्का सहभागी हुने देउवाको सचिवालयले जनाएको छ।

एमालेले महाधिवेशनको उद्घाटन समारोहमा नेकपा, कांग्रेस, रास्वपासहित १६ राजनीतिक दललाई आमन्त्रण गरेको छ।

दाङ, २६ मंसिर। घोराहीमा सञ्चालित गोर्खा लोटस बुट क्याम्पले औपचारिक कार्यक्रममार्फत आफ्नो तालिम सेवा शुभारम्भ गरेको छ। मंसिर १ गतेबाट कक्षा सञ्चालनमा ल्याइसकेको क्याम्पको उद्घाटन गरिएको हो।

क्याम्पका अध्यक्ष तथा सञ्चालक बलबहादुर बुढाले दूरदराजबाट तालिम लिन आउने युवालाई लक्षित गर्दै सुविधासम्पन्न होस्टेलको व्यवस्था गरिएको जानकारी दिए। सुरक्षित, अनुशासित र प्रेरणादायी वातावरणमा युवालाई प्रतिस्पर्धी बनाउन क्याम्प प्रतिबद्ध रहेको उनको भनाइ थियो।

उद्घाटन समारोहका प्रमुख अतिथि दाङ उद्योग वाणिज्य संघका अध्यक्ष बसन्त जोशीले रिबन काटेर उद्घाटन गरेका थिए। उनले क्याम्पको पहललाई प्रशंसनीय भन्दै युवालाई सही दिशामा लैजाने यस्ता तालिम केन्द्र अत्यावश्यक रहेको बताए। “शारीरिक र मानसिक रूपमा सक्षम बनाउँदै राष्ट्रसेवामा अग्रसर गराउने प्रयास महत्वपूर्ण छ,” उनले भने।

विशिष्ट अतिथि नेपाल पत्रकार महासंघ दाङका पूर्व अध्यक्ष प्रा. डा. सुदिप गौतमले युवालाई राष्ट्रको मेरुदण्ड भन्दै अनुशासन र मार्गदर्शनको आवश्यकता औंल्याए। “क्याम्पले युवामा आत्मविश्वास, अनुशासन र सकारात्मक सोच विकास गर्न मद्दत गर्छ,” उनले बताए।

सञ्चालक बुढाका अनुसार क्याम्पले युवालाई नेपाल प्रहरी, नेपाली सेना, सशस्त्र प्रहरी, ब्रिटिश आर्मी र सिङ्गापुर पुलिस फोर्स जस्ता सुरक्षासम्बन्धी सेवामा प्रतिस्पर्धी बनाउन लक्ष्य राखेको छ। स्थानीय तथा बाहिरी जिल्लाबाट आउने प्रशिक्षार्थीका लागि सुलभ शुल्कमा होस्टेल, खाना र अन्य सुविधाको व्यवस्था गरिएको पनि उनले बताए।

क्याम्पमा अनुभवी प्रशिक्षकद्वारा वैज्ञानिक र व्यवस्थित तालिम प्रदान गरिने, युवालाई रोजगार, सेवा तथा नेतृत्व क्षमतातर्फ प्रेरित गरिने र स्थानीय संघ–संस्था तथा समुदायसँग सहकार्य गर्दै क्षेत्रीय विकासमा योगदान पुर्‍याइने जानकारी दिइयो।

कार्यक्रममा पूर्व प्रहरी नायव निरीक्षक तथा भूतपूर्व प्रहरी संगठनका कोषाध्यक्ष घनश्याम केसी, समाजसेवी रुपक थापालगायतले शुभकामना व्यक्त गरेका थिए। कार्यक्रमको सञ्चालन पत्रकार दीपक वलीले गरेका थिए।

घोराहीमा सुरु गरिएको गोर्खा लोटस बुट क्याम्प दाङका युवाका लागि रोजगार, कौशल विकास र सुरक्षासम्बन्धी सेवामा प्रवेशका अवसरहरू विस्तार गर्दै समुदाय निर्माणको नयाँ सुरुवातका रूपमा उदाएको आयोजकहरूले विश्वास व्यक्त गरेका छन्।

दाङ, २६ मंसिर । दाङको राप्ती गाउँपालिका–२ पुन्यपुरस्थित फोहर व्यवस्थापन तथा स्रोत केन्द्रमा शुक्रबार बिहानदेखि लागिरहेको आगलागी अझै पनि नियन्त्रणमा आउन सकेको छैन। आगलागीले केन्द्रभित्रको ट्रस्ट भवन, ठूला–साना मेसिन, टायल तथा इन्टरलक पूर्णरूपमा जलेर नष्ट भएका छन्। प्रारम्भिक अनुमानअनुसार करोडौँको क्षति भएको छ।

आगो नियन्त्रणका लागि गढवाबाट आएको दमकल, राप्ती गाउँपालिकाको मिनी दमकल, डोजर, नेपाल प्रहरी, सशस्त्र प्रहरी, नेपाली सेना तथा स्थानीयवासीलाई खटाइएको छ। सबै पक्ष संयुक्त रूपमा आगो नियन्त्रणमा जुटिरहेका छन्।

आगो विद्युत् सर्टका कारण लागेको हो वा कसैले नियोजित रूपमा आगो लगाएको हो भन्नेबारे यकिन कारण भने खुलेको छैन। इलाका प्रहरी कार्यालय भालुवाङका प्रमुख प्रहरी निरीक्षक पुष्करसिंह ऐरीले घटनाको कारणबारे अनुसन्धान जारी रहेको बताए।

वडा नम्बर २ का अध्यक्ष पहलवान चौधरीले प्रहरीलाई खबर गरेपछि आगलागीबारे जानकारी भएको बताए। “फोहर व्यवस्थापनका लागि निर्माण गरिएको घर जलेको छ, विस्तृत कारण अनुसन्धानपछि मात्र थाहा हुन्छ,” निरीक्षक ऐरीले बताए।

उक्त केन्द्रमा राप्ती गाउँपालिकाले फोहर व्यवस्थापन गर्दै आएको थियो। तर पछिल्ला दिनमा फोहर व्यवस्थापनको तरिकाप्रति स्थानीयवासी असन्तुष्ट रहेका थिए। व्यवस्थापन व्यवस्थित नभएको भन्दै स्थानीयले अवरोध गर्दै आएपछि विवाद चुलिँदो थियो। केही दिनअघि मात्र वार्ता मार्फत समस्या समाधानतर्फ सहमतिका प्रयास सुरु भएका थिए।

काठमाडौं,२५ मंसिर । लुम्बिनी लायन्सले विराटनगर किङ्ग्सलाई ४० रनले पराजित गर्दै नेपाल प्रिमियर लिग (एनपीएल) क्रिकेटको फाइनल यात्रा तय गरेको छ। बिहीबार कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको क्वालिफायर–२ मा लुम्बिनीले उत्कृष्ट प्रदर्शन गर्दै फाइनल प्रवेश सुनिश्चित गर्यो।

पहिले ब्याटिङको निम्तो पाएको लुम्बिनीले २० ओभरमा ८ विकेट गुमाएर १३४ रनको मध्यम स्कोर बनाएको थियो। कप्तान रोहित पौडेल र डी’आरसी शटले दोस्रो विकेटमा ६९ रनको महत्त्वपूर्ण साझेदारी गरेर टीमलाई उकासे। शटले सर्वाधिक ४५ रन बनाए भने रोहितले ३० रनको योगदान दिए।

जवाफमा उतरेको विराटनगर १७.५ ओभरमै ९४ रनमा समेटियो। विराटनगरले मात्र ६ रन जोड्दा ३ विकेट गुमाएको थियो। ट्रम्पलमनले लगातार बलमा मार्टिन गप्टिल (२) र लोकेश बम (०) लाई आउट गरे। अर्को ओभरमा शेर मल्लले फाफ डु प्लेसिसलाई ३ रनमै बोल्ड गरेपछि विराटनगर दबाबमा परेको थियो।

विराटनगरका साम हेजलेटले ३४ रन बनाए पनि अन्य ब्याट्सम्यानले साथ दिन नसकेपछि टोली १०० रन पुग्न पनि असफल भयो। नरेन भट्टले २१ रन बनाएर अन्तिमसम्म संघर्ष गरे।

लुम्बिनीका तिलकराज भण्डारी उत्कृष्ट प्रदर्शन गर्दै ४ ओभरमा १५ रन खर्चेर ३ विकेट लिए। अभिशेष गौतम, रुबेन ट्रम्पलमन र जेजे स्मिटले २–२ विकेट तथा शेर मल्लले १ विकेट लिए।

विराटनगरतर्फ सुवास भण्डारी र प्रतिश जिसीले ३–३ विकेट लिए। सुवासले ४ ओभरमा मात्र १४ रन खर्चेर शुरुवाती क्षतिका लागि जिम्मेवार बनाए।

लुम्बिनी लायन्सले अब शनिबार हुने फाइनलमा सुदूरपश्चिम रोयल्ससँग प्रतिस्पर्धा गर्दै उपाधि यात्रामा चुनौती पेश गर्नेछ।

दाङ,२५ मंसिर । दाङको तुलसीपुर उपमहानगरपालिका–७ मा निर्माण सम्पन्न प्रशासनिक भवन आज एक समारोहका बीच उद्घाटन गरिएको छ। वडा अध्यक्ष रामबहादुर जिसीको अध्यक्षता तथा तुलसीपुर उपमहानगरपालिका प्रमुख टिकाराम खड्काको प्रमुख आतिथ्यतामा नवनिर्मित भवन उद्घाटन गरिएको हो ।

भवन उद्घाटन गर्दै उपमहानगरपालिका प्रमुख टिकाराम खड्काले वडाले साँघुरो स्थानबाट सेवा दिनुपर्ने बाध्यता अन्त्य भएको बताए। उनले नयाँ भवन सञ्चालनमा आएसँगै वडाका प्रशासनिक सेवा अझ सहज र प्रभावकारी बन्ने विश्वास व्यक्त गरे।

कार्यक्रममा उपप्रमुख स्यानी चौधरीले भवनअनुसार गुणस्तरीय सेवा दिनु वडाको दायित्व भएको बताइन् । उनले सेवाग्राहीका मागलाई प्राथमिकताका साथ सम्बोधन गर्न आग्रह गरिन्। साथै, भवनको संरक्षणमा नागरिकको सक्रिय भूमिका आवश्यक रहेको उनले उल्लेख गरिन्।

तुलसीपुर उपमहानरगपालिकाका प्रमुख प्रशासकीय अधिकृत केशवराज पाण्डेले वडालाई नागरिकले प्रत्यक्ष सेवा पाउने सरकारको मूल इकाइ भन्दै नीतिको इमानदार कार्यान्वयन र नागरिक,जनप्रतिनिधि कर्मचारीबीचको समन्वय सुदृढ भएमा उपमहानगरको विकास गति थप तीव्र हुने बताए।

वडा नं. ७ का निर्वतमान वडा अध्यक्ष टोप बहादुर केसीले भवन नहुँदा सेवा प्रवाहमा भएको समस्याको स्मरण गर्दै उनले अबका दिनमा सेवा प्रभाव छिटो छरितो बन्ने अपेक्षा व्यक्त गरे।

कार्यक्रममा तुलसीपुर–३ का अध्यक्ष बिजय बिक, तुलसीपुर–१४ का अध्यक्ष शंकर कुमार खड्का लगायतले वडाको आफ्नै प्रशासनिक भवन बनेपछि सेवा प्रवाहमा सहजता हुने बताएका थिए । सो अवसरमा, मावि कालाखोलाका प्रधानाध्यापक राजीब ओझा, श्री गणेश सामुदायिक वनका अध्यक्ष डिल्लीराज भण्डारी, नेपाल पत्रकार महासंघ दाङका उपाध्यक्ष ओपेन्द्र बस्नेत लगायतले शुभकामना मन्तव्य व्यक्त गरेका थिए । उनीहरुले भवनको संरक्षण गर्नु नागरिकको दायित्व रहेको उल्लेख गरेका थिए ।

राप्ती लाइफ केयर अस्पतालको आयोजनामा निशुल्क स्वास्थ्य शिविर सञ्चालन भएको थियो भने लायन्स क्लबले निशुल्क खानेपानी वितरण गरेको थियो ।

कार्यक्रममा निवर्तमान वडा अध्यक्ष, वडा सदस्यहरु, विभिन्न क्षेत्रमा योगदान पुर्‍याएका ब्यक्तिलाई सम्मान गरिएको हो । वडा सदस्य सोभाराम भण्डारीको स्वागत मन्तव्यबाट सुरु भएको कार्यक्रमको सहजीकरण वडाका कर्मचारी सन्तोष केसीले गरेका थिए।

काठमाडौँ,२५मंसिर। नेपाल सरकारको मन्त्रिपरिषद् बैठकले सरकार र जेनजी प्रतिनिधिबीच बुधबार सम्पन्न भएको १० बुँदे सम्झौतालाई अनुमोदन गर्दै, सम्बन्धित मन्त्रालयमार्फत उच्च प्राथमिकताका साथ कार्यान्वयन गर्ने निर्णय गरेको छ। प्रधानमन्त्री तथा मन्त्रिपरिषद्को कार्यालय सिंहदरबारमा बसेको बैठकपछि सञ्चार तथा सूचना प्रविधिमन्त्री तथा सरकारी प्रवक्ता जगदीश खरेलले सम्झौतालाई नेपाल राजपत्रको अतिरिक्ताङ्कमा प्रकाशित गरिने जानकारी दिए।

बैठकले भदौ २३ र २४ गतेका घटनासम्बन्धी जाँचबुझ आयोगको कार्यक्षेत्र विस्तार गर्ने निर्णय पनि गरेको छ। पूर्वप्रधानमन्त्री केपी शर्मा ओलीले आयोगमा बयानबारे दिएको अभिव्यक्तिबारे सोधिएको प्रश्नमा मन्त्री खरेलले विस्तारित कार्यक्षेत्रसहित आयोगले कानुनअनुसार आफ्नो काम गर्ने विश्वास व्यक्त गरे।

त्यसैगरी, जेनजी आन्दोलनका क्रममा क्षति पुगेका सार्वजनिक सम्पत्ति तथा भौतिक संरचनाको पुनःमूल्याङ्कन र पुनर्निर्माणका लागि गठित समितिको प्रतिवेदन बैठकमा प्रस्तुत गरिँदै प्रधानमन्त्री सुशीला कार्कीलाई हस्तान्तरण गरिएको थियो।

बैठकले न्याय सेवाका सहसचिव पुष्कर सापकोटालाई सचिवमा बढुवा गरी प्रधानमन्त्री तथा मन्त्रिपरिषद्को कार्यालयमा पदस्थापन गर्ने निर्णय गरेको छ। साथै, समाजकल्याण परिषद्का रिक्त सदस्यसचिव पदमा पनि नयाँ नियुक्ति गरिएको मन्त्री खरेलले बताए।

काठमाडौँ,२५ मंसिर । नेपाल विद्युत् प्राधिकरणका कार्यकारी निर्देशक हितेन्द्रदेव शाक्यले ऊर्जा, जलस्रोत तथा सिँचाइ मन्त्री कुलमान घिसिङसँग भेट गरेका छन् । शाक्यले मन्त्रीसंगको भेटमा आफ्नो पुनर्बहालीबारे जानकारी गराएका छन्। सर्वोच्च अदालतले शाक्यलाई कार्यकारी निर्देशकको रूपमा पुनः पदबहाली गर्न आदेश दिएपछि उनी बुधबार प्राधिकरणमा फर्किएका हुन्।

आज बिहीबार शाक्यले मन्त्रालयमा पुगेर मन्त्री घिसिङलाई अदालतको आदेशअनुसार पदमा फर्किएको जानकारी दिए। भेटमा मन्त्री घिसिङले शाक्यलाई विगतका द्वन्द्वभन्दा पनि ‘परिणाममुखी काम’मा ध्यान दिन निर्देशन दिएका छन्। उनले प्राधिकरणको काम प्रभावकारी बनाउन सबैसँग मिलेर अघि बढ्नुपर्ने बताए।

घिसिङले शाक्यलाई बाहिरी प्रभावभन्दा सरकार र प्राधिकरणको हितलाई प्राथमिकता दिन आग्रह गरे। साथै, आवश्यक सामग्रीको अभाव नहुने गरी व्यवस्थापन गर्न निर्देशन पनि दिए।

मन्त्रीको सुझाव सुनेपछि शाक्यले पहिलेझैँ मिलेर, अझ बढी जोसका साथ इमान्दारीपूर्वक काम गर्ने प्रतिबद्धता जनाए। उनले सरकारको नीति र प्राधिकरणको हितलाई प्रमुख मानेर अघि बढ्ने बताए।

काठमाडौं,२५ मंसिर । सहकारी ठगी र संगठित अपराध आरोपमा थुनामा रहेका राष्ट्रिय स्वतन्त्र पार्टी (रास्वपा)का सभापति रवि लामिछाने र गोर्खा मिडियाका तत्कालीन सञ्चालक छविलाल जोशीको मुद्दाको आजको सुनुवाइ फेरि स्थगित भएको छ।

उच्च अदालत तुलसीपुरको बुटवल इजलासले मुद्दा ‘हेर्न नमिल्ने’ कारण देखाउँदै पेसी सार्ने निर्णय गरेको हो। मुद्दा न्यायाधीश तेजनारायण पौडेल र सागर विष्टको संयुक्त इजलासमा परेको थियो। तर, मिसिलमा जाहेरवालाका कानुन व्यवसायी शालिकराम पौडेलको नाम वकालतनामामा समावेश भएको देखिएकाले सुनुवाइ रोकिएको कानुनी स्रोतले जनाएको छ।

यो घटना बारम्बार दोहोरिँदै आएको छ। कात्तिक १३ गतेको पेसी पनि जोशी पक्षका कानुन व्यवसायीको निवेदनमा स्थगित भएको थियो। लगातार सुनुवाइ नहुदा प्रक्रिया लम्बिँदै गएको छ।

रवि लामिछानेले बिगो बराबरको रकम पेश गरेर बाहिरबाट मुद्दा लड्न पाउने माग गर्दै उच्च अदालतमा पुनरावेदन गरेका छन्। तर, जिल्ला अदालत रूपन्देहीले साउन २६ गते दिएको आदेशअनुसार उनी पुर्पक्षका लागि नख्खु कारागारमै छन्। जोशी भने भैरहवा कारागारमा थुनामा छन्।

काठमाडौँ,२४ मंसिर। नेपाल प्रिमियर लिग (एनपीएल) क्रिकेटमा लुम्बिनी लायन्स दोस्रो क्वालिफायरमा प्रवेश गरेको छ। बुधबार कीर्तिपुरस्थित त्रिवि अन्तर्राष्ट्रिय क्रिकेट मैदानमा काठमाडौँ गोर्खाजलाई ४ विकेटले पराजित गर्दै लुम्बिनीले अन्तिम चरणमा स्थान पक्का गरेको हो।

काठमाडौँले दिएको ११२ रनको लक्ष्य लुम्बिनीले १४ बल बाँकी छँदै पूरा गर्‍यो। उक्त हारसँगै काठमाडौँ प्रतियोगिताबाट बाहिरिएको छ।

लुम्बिनीको सहज जित

लुम्बिनीका लागि ओपनर डार्शी सर्टले ३४ बलमा २ छक्कासहित ३३ रन बनाए। सन्दीप जोराले २३ बलमा १ चौका र १ छक्कासहित २३ रन जोडे। कप्तान रोहित कुमार पौडेलले २५ बलमा १८ रन (१ चौका, १ छक्का) जोडे।
निरोशन डिकवेलाले १४ बलमा २ चौकासहित १४ रन बनाए।

काठमाडौँका सन्तोष यादवले २ विकेट लिए भने कप्तान करण केसी, सन्नी पटेल, शाहब आलम र रासिद खानले एक–एक विकेट लिए।

काठमाडौँको चुनौतीपूर्ण अवस्था

टस जितेर पहिले ब्याटिङ थालेको काठमाडौँ १९.१ ओभरमै १११ रनमा अलआउट भयो। यो एनपीएलको दोस्रो संस्करणमा पहिले ब्याटिङ गर्दै बनेको सबैभन्दा कम स्कोर हो।

इन्किङ्सभर काठमाडौँका ब्याट्सम्यानहरू लुम्बिनीका बलरसामू संघर्षरत देखिए। टोलीले १४ रन पुग्नुअघि नै चार विकेट गुमाइसकेको थियो।

काठमाडौँका लागि आठौँ नम्बरका सन्तोष यादवले सर्वाधिक २३ रन बनाए। उनले १७ बलमा १ छक्का प्रहार गरे। नवौँ नम्बरका मोहम्मद आदिल आलमले ११ बलमा २ छक्का र १ चौकासहित १८ रन जोडे।
जोन सिम्पसनले १८ रन, भीम सार्कीले १४ रन बटुले। ओपनर आकाश त्रिपाठी र बेन चार्ल्सवर्थ क्रमशः १ र ४ रनमै आउट भए।
सनी पटेल ७, मिलिन्द कुमार २ र रसिद खान २ रनमा गिरे। कप्तान करण केसीले १४ बलमा १ छक्कासहित ९ रन बनाए। साहब आलम ४ रनमा अविजित रहे। काठमाडौँले अतिरिक्त ९ रन पायो।

लुम्बिनीका बलरको प्रभाव

लुम्बिनीका शेर मल्ल र रोहित पौडेलले ३–३ विकेट लिए। शेरले ४ ओभरमा २२ रन खर्चिए भने कप्तान पौडेलले ४ ओभरमा २५ रन दिए।
रुवेन ट्रम्पलम्यानले २ विकेट र अभिशेष गौतमले १ विकेट लिए।

अब दोस्रो क्वालिफायर

अब फाइनल प्रवेशका लागि लुम्बिनीले बिहीबार विराटनगर किङ्ससँग प्रतिस्पर्धा गर्नेछ। विराटनगर पहिलो क्वालिफायरमा सुदूरपश्चिम रोयल्ससँग ७७ रनले पराजित भएको थियो।

काठमाडौं,२४ मंसिर । सर्वोच्च अदालतको परमादेशपछि हितेन्द्रदेव शाक्य नेपाल विद्युत् प्राधिकरणको कार्यकारी निर्देशकका रूपमा पुनः पदबहाली भएका छन्।

अदालतले ऊर्जा, जलस्रोत तथा सिँचाइ मन्त्री नियुक्त भएपछि कुलमान घिसिङलाई कार्यकारी निर्देशक बनाउने निर्णय खारेज गरेपछि शाक्य आज बिहान प्राधिकरणको केन्द्रीय कार्यालय पुगेर औपचारिक रूपमा पदभार सम्हालेका हुन्।

यसअघि उनी कार्यकारी निर्देशक पदबाट हटाइएका थिए, तर सर्वोच्चको फैसलासँगै शाक्य पुनः आफ्नो जिम्मेवारीमा फर्किएका छन्।