काठमाडौ,१६ कार्तिक। सुशीला कार्की नेतृत्वको सरकारले ११ देशका राजदूत फिर्ता बोलाउने निर्णय तत्काल कार्यान्वयन नगर्न अदालतले आदेश दिएको छ।

न्यायाधीश शारंगा सुवेदी र श्रीकान्त पौडेलको इजलासले रिटमाथि प्रारम्भिक सुनुवाइ गर्दै सो निर्णयको अन्तिम आदेश नआएसम्म राजदूतहरूलाई फिर्ता नगर्न भनेको हो। ‘सरकारले कार्यसम्पादन मूल्याङ्कन नगरी फिर्ता बोलाउने निर्णय गरेको छ, जबकि कानुनअनुसार राजदूतको कार्यसम्पादन मूल्याङ्कन गरिएको हुनुपर्छ।’ – दालतले भनेको छ ।

‘राजदूतहरूको नियुक्ति अवधि अझै बाँकी छ, फिर्ता बोलाउने स्पष्ट कारण प्रस्तुत गरिएको छैन र नयाँ नियुक्तिका लागि प्रक्रिया सुरु भएको छैन।’ – अदालतको आदेशमा उल्लेख छ । इजलासले १७ मध्ये ११ जनालाई मात्र फिर्ता बोलाउने निर्णयको कारण प्रष्ट नभएको भन्दै यथास्थितिमा राख्न आदेश दिएको हो।

२०७८ साउन १४ मा तत्कालीन प्रधानमन्त्री केपी ओलीको सरकारले विभिन्न देशका लागि १७ जनालाई राजदूत नियुक्त गरेको थियो। जेनजी आन्दोलनपछि बनेको कार्की नेतृत्वको सरकारले असोज ३० मा ११ राजदूतलाई फिर्ता बोलाउने निर्णय गरेको थियो।

चुनावी सरकारले एकाएक फिर्ता बोलाउने निर्णय गरेपछि आलोचना भएको थियो। प्रधानमन्त्री कार्कीले सरकार छोटो अवधिको भएकाले ब्रिफिङ गर्ने र आर्थिक अनियमिततामा जोडिएकालाई मात्र फिर्ता बोलाउने स्पष्टिकरण दिएकी थिइन्।

काठमाडौ,१६ कार्तिक ।शिक्षा, विज्ञान तथा प्रविधि मन्त्रालयले सहिद दशरथचन्द स्वास्थ्य विज्ञान विश्वविद्यालयको उपकुलपति र रजिष्ट्रार पदका लागि खुला प्रतिस्पर्धाबाट आवेदन आह्वान गरेको छ।

विश्वविद्यालय ऐन, २०८२ बमोजिम जारी गरिएको यस सूचनामा उम्मेदवारले आवेदनसँगै अवधारण र रणनीतिक पत्र पनि पेश गर्नुपर्ने उल्लेख छ।

मन्त्रालयले आवेदनका लागि आजदेखि १५ दिने समय तोकेको छ। साविक गेटा मेडिकल कलेज यस विश्वविद्यालयमा समावेश रहेको छ।

काठमाडौ, १६ कार्तिक। धरान उपमहानगरपालिकाका मेयर हर्कराज राई (हर्क साम्पाङ) नेतृत्वको ‘श्रम संस्कृति पार्टी’ निर्वाचन आयोगमा दर्ता भएको छ।

निर्वाचन आयोगले आइतबार साम्पाङको दल ‘श्रम संस्कृति पार्टी’ दर्ता गरी आधिकारिक प्रमाणपत्र प्रदान गरेको हो। साम्पाङ स्वयं आइतबार आयोग पुगेर प्रमाणपत्र ग्रहण गरेका छन्।

पार्टीको चुनाव चिन्ह ‘माटो’ तोकिएको छ। हाल पार्टीमा २८ जना केन्द्रीय सदस्य र पाँच जना पदाधिकारी तोकिएका छन्।

दलको पदाधिकारीहरूमा अध्यक्षमा हर्कराज राई (हर्क साम्पाङ), उपाध्यक्षमा देवराज लामा, महासचिवमा आर्यन राई ,कोषाध्यक्षमा समिता राई रहेका छन् । यसैगरी प्रवक्तामा अरुण गुरुङ रहेका छन् ।

साम्पाङले दसैँअघि, असोज १२ गते, निर्वाचन आयोगमा दल दर्ताका लागि निवेदन दिएका थिए।

दाङ, १६ कार्तिक । ‘ पानी बा’ नामले परिचित रहेका घोराही खानेपानी उपभोक्ता तथा सरसफाइ संस्थाका अध्यक्ष देविबहादुर डिसीको निधन भएको छ। क्यान्सरबाट पीडित डिसीको उपचारका क्रममा आइतबार राप्ती स्वास्थ्य विज्ञान प्रतिष्ठानमा निधन भएको हो। उनको ८० वर्षको उमेरमा निधन भएको हो ।

लामो समयदेखि बिरामी रहँदै आएका डिसीको प्रतिष्ठानकै भेन्टिलेटरमा उपचार भइरहेको थियो।

स्थानीयवासीबीच ‘पानी बाजे’ नामले परिचित डिसीले घोराहीमा खानेपानी सेवा विस्तारमा महत्वपूर्ण भूमिका निर्वाह गरेका थिए। उनले दशकौँदेखि संस्थाको अध्यक्षका रूपमा निरन्तर सेवा गरेका थिए ।

खानेपानी मात्र होइन, विभिन्न सामाजिक संघ–संस्थामा पनि सक्रिय रहँदै डिसीले समुदायको विकास र सेवामा जीवन समर्पण गरेको घोराहीका स्थानीयले बताएका छन्।

काठमाडौ,१६ कार्तिक। जेन–जी आन्दोलनपछि २४ भदौमा मच्चिएको अराजक घटनाको समयमा प्रहरी वृत्त स्वयम्भूबाट चोरी भएको पेस्तोल बिक्री–वितरणमा संलग्न पाँच जना पक्राउ परेका छन्।

प्रहरीका अनुसार हातहतियार बिक्री भइरहेको भन्ने सूचनाका आधारमा खटिएको टोलीले धादिङ घर भई हाल काठमाडौं–१५ मा बस्ने २१ वर्षीय कृष्ण गुरुङ, भगवानपाउ बस्ने २५ वर्षीय राजन देउला, भारतीय नागरिक २४ वर्षीय अकबर खान, विजेश्वरी बस्ने २६ वर्षीय सुमिन शाक्य र क्षेत्रपाटीमा पसल सञ्चालन गर्दै आएका ३८ वर्षीय प्रभात मल्ललाई नियन्त्रणमा लिएको हो।

प्रहरी वृत्त स्वयम्भूका डीएसपी मोहनमणि अधिकारीका अनुसार कृष्ण गुरुङले २४ भदौमा प्रहरी वृत्तबाट पेस्तोल लुटेको खुल्न आएको छ। अनुसन्धानका क्रममा उनले उक्त पेस्तोल राजन देउलालाई दिएको र देउलाले त्यसपछि अकबर खानमार्फत बिक्री गर्न खोजेको खुलेको छ।

डीएसपी अधिकारीका अनुसार, ‘अकबर खानले ग्राहक खोजेर सुमिन शाक्यलाई ६५ हजार रुपैयाँमा पेस्तोल बिक्री गरेको पाइएको छ।’ त्यसपछि शाक्यले उक्त पेस्तोल प्रभात मल्ललाई १ लाख रुपैयाँमा पुनः बिक्री गरेको खुलेको छ।

प्रहरीले मल्लको पसलको चेन्जिङ रुमभित्र कपडाले बेरेर लुकाइएको अवस्थामा पेस्तोल फेला पारेको जनाएको छ। बरामद पेस्तोलसँगै त्यसमा लाग्ने म्याग्जिन र १५ राउन्ड गोली पनि भेटिएको छ।

पक्राउ परेकाहरूमाथि हातहतियार तथा खरखजाना ऐन, २०१९ अनुसार कानुनी कारबाही प्रक्रिया अगाडि बढाइएको प्रहरीले जनाएको छ।

काठमाडौ,१६ कार्तिक । अराजक र हिंसात्मक अभिव्यक्ति दिएपछि डा. निकोलस भुसाल प्रहरीको निगरानीमा परेका छन्।

हालकी प्रधानमन्त्री सुशीला कार्की, गृहमन्त्री ओमप्रकाश अर्याल, र काठमाडौं महानगरपालिकाका मेयर बालेन शाहलगायतका नाम लिँदै भुसालले विभिन्न व्यक्तिहरूविरुद्ध अपशब्द र धम्कीपूर्ण टिप्पणी गरेका हुन्।

शनिबार संवाद डबलीमा आयोजना गरिएको पत्रकार सम्मेलनमा भुसालले गत भदौ २३ गते जेनजी आन्दोलनका क्रममा भएको दमनका लागि तत्कालीन प्रधानमन्त्री केपी शर्मा ओली र गृहमन्त्री रमेश लेखकलाई ‘हत्यारा’को संज्ञा दिएका थिए। सो घटनामा सुरक्षाकर्मीको गोली लागी १९ जनाको मृत्यु भएको थियो।

भुसालले सरकारले ओली र लेखकलाई कारबाही नगरे आफूहरू नै कारबाहीका लागि अगाडि सर्ने चेतावनीसमेत दिए। उनले ‘कारबाहीका लागि उनीहरूको घरमै जाने’ धम्की दिएका छन्। त्यससँगै, हालकी प्रधानमन्त्री सुशीला कार्कीलाई ‘हुतिहारा’ भन्ने र गृहमन्त्री अर्याललाई अपशब्द प्रयोग गर्ने गरी अभिव्यक्ति दिएका थिए।

उनले बालुवाटार माथि ‘मिसाइल राखेको’ दाबी गर्दै कोही नबच्ने गरी धम्की पनि दिएका छन्। साथै, आगामी फागुनमा हुने भनिएको निर्वाचन प्रत्यक्ष कार्यकारी प्रमुखसहित हुनुपर्ने, नभए चुनाव हुन नसक्ने बताएका छन्। उनले मेयर बालेन शाहमाथि पनि जेनजी आन्दोलनका माग पूरा नगरेको भन्दै आक्रोश पोखेका छन्।

भुसालले सरकारविरुद्ध माइतिघर मण्डलामा भेला भएर प्रदर्शन गर्न आह्वान गरेका छन्।
नेपाल प्रहरीका अनुसार भुसाल विवादित पात्र हुन्। उनलाई गत असोज २३ गते माइतिघरमा प्रदर्शन गर्ने क्रममा पक्राउ गरिएको थियो। प्रहरी अस्पतालको मेडिकल रिपोर्टमा उनले गाँजा सेवन गरेको पुष्टि भएपछि उनका दाजु सागरले सुधार केन्द्र लैजाने शर्तमा जिम्मा लिएर छुटाएका थिए। तर, त्यसपछि पनि उनका विवादित र भड्काउ अभिव्यक्ति रोकिएका छैनन्।

शनिबारको पत्रकार सम्मेलनमा झन् उग्र र हिंसात्मक अभिव्यक्ति दिएपछि प्रहरीले उनलाई निगरानीमा राखेको जनाएको छ।

बाँके,१६ कार्तिक। बाँके जिल्लाका दुई बालसुधार गृह र एक कारागारबाट भागेका कैदीबन्दीमध्ये २२३ जना अझै फरार रहेका छन्। जिल्ला प्रहरी कार्यालय बाँकेका प्रमुख प्रहरी उपरीक्षक ९एसपी० अंगुर जिसीका अनुसार हालसम्म ३४० जना मध्ये ११७ जनामात्र पक्राउ परेका छन्।

गत भदौ २४ गते जेन्जी आन्दोलनको क्रममा बाँकेको नौबस्ता बालसुधार गृह, नौबस्ता कारागार र डुडुवाको आसमानपुरस्थित जयेन्दु बालसुधार गृहबाट ३४० जना कैदीबन्दी फरार भएका थिए। तीमध्ये धेरैजना अझै पक्राउ परेका छैनन्।
एसपी जिसीका अनुसार फरारमध्ये केही भारत प्रवेश गरेका र केही नेपालमै लुकेर बसेको अनुमान गरिएको छ। “सबैको खोजी कार्य जारी छ,” उनले बताए।

बाँकेको डुडुवा गाउँपालिकाको आसमानपुरस्थित बालसुधार गृहबाट भागेका ६६ जना बालबन्दी अझै नियन्त्रणमा आएका छैनन् भने नौबस्ता बालसुधार गृहबाट भागेका ४४ जना पनि पक्राउ परेका छैनन्। यस्तै नौबस्ता कारागारबाट भागेका १४७ जना मध्ये ३४ जना नियन्त्रणमा आएका र ११३ जना अझै फरार रहेको प्रहरीले जनाएको छ।

भाग्ने क्रममा सुरक्षाकर्मीमाथि आक्रमण भएपछि गोली चल्दा नौबस्ता बालसुधार गृहका पाँच बालबन्दीको मृत्यु भएको थियो।
भदौ २५ गते नेपालगन्जस्थित पुरानो कारागारबाट पनि कैदीबन्दीले भाग्ने प्रयास गरेका थिए। तर नेपाली सेनाले सुरक्षा कडा बनाएपछि प्रयास असफल भएको थियो। सो क्रममा सेनाले चलाएको गोली लागेर एक कैदीको खुट्टामा चोट लागेको थियो।
भागेका मध्ये केहीलाई बाँके, केहीलाई नेपाल–भारत जमुनाहा नाकामा र केहीलाई अन्य जिल्लाबाट पक्राउ गरिएको जिल्ला प्रहरी कार्यालय बाँकेले जनाएको छ।

काठमाडौ,१६ कार्तिक । शनिबार बाजुरामा भएको बस दुर्घटनामा घाइते भएका बस सहचालकको उपचारका क्रममा मृत्यु भएको छ।

मार्तडी–कोल्टी सडकखण्डअन्तर्गत बूढीनन्दा नगरपालिका–७ सेरकाटियामा भएको दुर्घटनामा घाइते बैतडी जिल्ला दशरथचन्द्र नगरपालिका–९ का २४ वर्षीय गणेश जोशीको उपचारका क्रममा मृत्यु भएको जिल्ला प्रहरी कार्यालय बाजुराका निमित्त प्रहरी नायब उपरीक्षक गगनसिंह भाटले जानकारी दिए ।

जोशीलाई अवस्था जटिल भएपछि धनगढी पठाइएको थियो। सेती प्रादेशिक अस्पतालमा उपचारका क्रममा शनिबार राति १० बजे उनको मृत्यु भएको प्रहरीको भनाइ छ।

बस दुर्घटनामा घाइते भएका आठ जनालाई पनि थप उपचारका लागि धनगढी पठाइएको जिल्ला अस्पताल बाजुराका सूचना अधिकारी नृपराज गिरीले बताए ।

घाइतेहरूमा स्वामीकार्तिक खापर–३ का २३ वर्षीय विशाल शाही, बूढीनन्दा–६ का १९ वर्षीय उमेश भाट, बूढीनन्दा–५ की २४ वर्षीया जमुना मल्ल, सात वर्षीया लक्ष्मी मल्ल, बूढीगङ्गा–९ की २२ वर्षीया पवित्रा सिंह, उनकी दुई वर्षीया छोरी जेनिशा सिंह, पाँच वर्षीया पल्ले सिंह, जेसिका सिंह र बूढीनन्दा–७ की ४५ वर्षीया इसरा देवी सुनार रहेका छन्।

कोल्टीबाट धनगढी जाँदै गरेको सुपप्र ०१–००१ ख ३१८१ नम्बरको बस सामान राख्ने क्रममा पछाडि गएर दुर्घटनाग्रस्त भएको प्रहरीको भनाइ छ। दुर्घटनापछि चालक फरार छन् भने घटनाबारे थप अनुसन्धान भइरहेको जिल्ला प्रहरी कार्यालय बाजुराले जनाएको छ।

रुकुम पूर्व ,१६ कार्तिक । अटो दुर्घटना हुँदा रुकुम पूर्वमा दुईजनाको मृत्यु भएको छ। जिल्लाको भूमे गाउँपालिकामा भएको अटो दुर्घटनामा दुई जनाको मृत्यु भएको छ भने चार जना घाइते भएका छन्।

जिल्ला प्रहरी कार्यालय रुकुम पूर्वका अनुसार भूमे गाउँपालिका–१ लुकुमकी ३० वर्षीया रेजिना घर्ती र २५ वर्षीया सबिता घर्तीको घटनास्थलमै मृत्यु भएको हो। मृतक दुई जना एकै घरका जेठानी–देउरानी भएको प्रहरीले जनाएको छ।

दुर्घटनामा परी २६ वर्षीया प्रतिक्षा बुढा, उनका ११ महिनाका छोरा सुभम बुढा, २५ वर्षीया ब्युटी पुन र लुकुमकै ३ वर्षीया सक्षम घर्ती घाइते भएका छन्। घाइते सबैको जिल्ला अस्पताल रुकुमकोटमा उपचारपछि डिस्चार्ज भएको प्रहरीले जानकारी दिएको छ।

प्रहरीका अनुसार अटो भिरबाट खोलामा खस्दा चार जना बीचमै अड्किएर ज्यान जोगिएका थिए।
शनिबार बेलुकी करिब पौने ६ बजे भूमे गाउँपालिका–१ लुकुमस्थित मध्ये पहाडी लोकमार्गको पञ्चासे भन्ने स्थानमा रा.१ ह ६७९७ नम्बरको अटो सडकबाट झन्डै ३०० मिटर तल खोलामा खसेको थियो।

दुर्घटनापछि सम्पर्कविहीन रहेका अटो चालक भूमे–१ का २९ वर्षीय जोते घर्ती आइतबार बिहान सम्पर्कमा आएका छन्।

चितवन,१५ कार्तिक । घुँगी खोज्न गएका एक जनाको मृत्यु भएको छ । माडी नगरपालिका–१ निवासी ६५ वर्षीय बुद्धिराम बोट घुँगी खोज्न जाँदा मृत्यु भएका छन् ।

प्रहरीका अनुसार उनी शुक्रबार दिउँसो रिउ खोलामा घुँगी खोज्न गएका थिए । शनिबार बिहान दलदलमा बोटको शव फेला परेको जिल्ला प्रहरी कार्यालय चितवनका प्रहरी नायब उपरीक्षक रविन्द्र खनालले जानकारी दिए ।

शवलाई परीक्षणका लागि भरतपुर अस्पताल ल्याइएको छ । घटनाबारे थप अनुसन्धान भइरहेको प्रहरीले जनाएको छ ।