काठमाडौँ,९ साउन । भारतको राजधानी नयाँ दिल्लीस्थित अन्तर्राष्ट्रिय विमानस्थलबाट भिजिट भिसामा कुवेत जान लागेका ४७ जना नेपाली महिलालाई नेपाल फर्काइएको छ। ती महिलाहरूले आवश्यक ‘नो अब्जेक्सन सर्टिफिकेट (NOC)’ नलिएर यात्रा गर्न खोजेकाले दिल्लीस्थित नेपाली दूतावासको समन्वयमा नियन्त्रणमा लिइएको हो।

दूतावासमा कार्यरत प्रहरी वरिष्ठ उपरीक्षक प्रकाश मल्लसहितको टोलीले ती महिलाहरूलाई स्थलमार्ग हुँदै बिहीबार राति रूपन्देहीको सुनौली नाकामा पुर्‍याई स्थानीय प्रशासनको जिम्मा लगाएको हो। रूपन्देहीका प्रमुख जिल्ला अधिकारी वासुदेव घिमिरेका अनुसार महिलाहरूलाई अहिले प्रहरी टोलीले काठमाडौँ ल्याउँदैछ।

यस घटनापछि गृहमन्त्री रमेश लेखकले गम्भीर ध्यान दिँदै मानव बेचबिखन अनुसन्धान ब्युरोलाई कडा अनुसन्धान गर्न निर्देशन दिएका छन्। गृह मन्त्रालयका अनुसार, अवैध रूपमा वैदेशिक रोजगारीमा पठाउने गिरोहबारे गहिरो छानबिन गरी दोषीमाथि कारबाही गर्न मन्त्री लेखकले आग्रह गरेका छन्।

रौतहट,७ साउन ।सिँचाइका लागि आफ्नै खेतमा मोटरबाट पानी हाल्ने क्रममा राैतहटमा करेन्ट लागेर दुइ युवकको मृत्यु भएको हो ।

रौतहटको माधबनारायण नगरपालिका ४ बिशुनपुर्ब मानपुरमा आज बिहान करेन्ट लागेर एक युवकको मृत्यु भएको हो ।

स्थानीय ४० वर्षीय रामबाबु मुखिया आफ्नै खेतमा सिँचाइका लागि मोटरबाट पानी हाल्ने क्रममा करेन्ट लागेर गम्भीर घाइते भएका थिए। घाइते मुखियाकाे प्रादेशिक अस्पताल गौरमा उपचारकै क्रममा मृत्यु भएको इलाका प्रहरी कार्यालय गरुडाका प्रमुख राजन कार्कीले बताए ।

त्यसैगरी जिल्लाको कटहरिया नगरपालिका–२ जमुनियाका ४२ वर्षीया मोक्तार देवानको करेन्ट लागेर मृत्यु भएको थियो। खेतमा सिँचाइका लागि मोटरबाट पानी हाल्ने क्रममा करेन्ट लागेर गम्भीर घाइते देवनकाे उपचारको क्रममा मृत्यु भएको प्रहरीले जनाएको छ l

दाङ,६ साउन। दाङको ऐतिहासिक स्थल सुकौराकोट दरबारको संरक्षण, सम्भाव्यता र संरचना विकासका विषयमा छलफल भएको छ।

थारु अगुवा, जनप्रतिनिधि, संस्कृत विद , योजना विज्ञ लगायतका सरोकारवालाहरूको उपस्थितिमा समष्टिगत छलफल भएको हो।

तुलसीपुर उद्योग वाणिज्य संघ र थारु कल्याणकारीणी सभा क्षेत्र नं. ३ दाङको संयुक्त आयोजनामा आयोजित कार्यक्रममा इतिहास, संस्कृति, पर्यटन र प्रशासनका पक्ष समेट्दै दिगो रणनीति बनाउनु आवश्यक रहेको सहभागीहरूले औल्याएका छन्।

कार्यक्रमका प्रमुख अतिथि लुम्बिनी प्रदेशका पूर्व मुख्यमन्त्री डिल्ली बहादुर चौधरीले सुकौराकोट दरबार थारु समुदायको इतिहास, पहिचान र गौरवसँग जोडिएको भन्दै यसलाई राजनीतिक पहुँचभन्दा बाहिर राखी समन्वित ढंगले संरक्षण गर्नुपर्ने बताए। उनका अनुसार, चालु आर्थिक वर्षमा केन्द्र र प्रदेश सरकारबाट गरी तीन करोड रुपैयाँ बजेट विनियोजन भइसकेको छ।

सुकौराकोट केवल भौतिक संरचना पुनर्निर्माणको विषय होइन; यसले समुदायको सांस्कृतिक निरन्तरता, पर्यटकीय सम्भाव्यता र स्थानीय शिक्षा प्रणालीमा समेत प्रभाव पार्ने उनको भनाई रहेको थियो।

थारु संस्कृतिविद् अशोक थारुले सुकौराकोटको संरक्षणसँगै पुरातात्त्विक अनुसन्धान, प्रमाण संकलन र अध्ययन अनिवार्य भएको औल्याए। उनले संरचना बनाउनुभन्दा पहिले तथ्य संकलन र वातावरण व्यवस्थापनको खाँचो रहेको बताए।

लुम्बिनी योजना आयोगका पूर्व उपाध्यक्ष नहकुल केसी ,योजना आयोगका सदस्य र सरोकारवालाहरूले दीर्घकालीन संरचना विकासका लागि स्पष्ट कार्यविधि, भोगाधिकारको समस्या समाधान र स्थानीय तहसँगको समन्वय अपरिहार्य रहेको उल्लेख गरेका थिए।

उनीहरूलेकार्यक्रममा बजेटको कार्यान्वयन, जिम्मेवारीको स्पष्टता र संस्थागत समन्वय नहुनु मुख्य चुनौती रहेको बताएका थिए

दंगिशरण गाउँपालिका वडा नं ३ का अध्यक्ष सुकलाल चौधरीले अघिल्लो वर्ष विनियोजित ६ करोड रुपैयाँको उपयोगबारे प्रश्न उठाउँदै पारदर्शिताको माग गरे।
दङ्गेश्वर गाउँपालिकाका पूर्व अध्यक्ष भागीराम चौधरीले आपसी असमझदारीका कारण योजना अघि नबढेको स्वीकार गरे।

तुलसीपुर उपमहानगरपालिका वडा नं ११ का अध्यक्ष मानबहादुर रावतले संरचना बनाउन स्थानीय सरकार तत्पर भए पनि भोगाधिकार अभावको समस्या जटिल बन्दै गएको बताए।

थारु कल्याणकारी सभाका केन्द्रीय कोषाध्यक्ष चुर्ण चौधरी, इतिहासविद् जर्मन चौधरी, रोहित थारुलगायत वक्ताहरूले सुकौराकोटको संरक्षणले थारु समुदायको सांस्कृतिक पुनर्जागरण मात्र होइन, दाङ जिल्लाको पर्यटन र स्थानीय अर्थतन्त्रमा पनि सकारात्मक प्रभाव पार्ने विश्वास व्यक्त गरे।

यसै क्रममा, सुकौराकोट दरबार संरक्षण तथा विकास समिति गठन गरिएको छ। वडा अध्यक्ष रावतको संरक्षकत्वमा गठित समितिको अध्यक्ष जनकुलाल चौधरी रहेका छन्। अन्य सदस्यमा थारु समुदायका सक्रिय प्रतिनिधि र निजी क्षेत्रका प्रतिनिधि समावेश गरिएको छ।

कार्यक्रम तुलसीपुर उद्योग वाणिज्य संघका अध्यक्ष बिनील केसीको अध्यक्षतामा भएको थियो भने कार्यक्रमको सहजीकरण प्रेस सल्लाहकार शरद रेग्मीले गरेका थिए।

काठमाडौं ,६ साउन । सरकारको सचिवस्तरीय बैठकले मापदण्ड विपरीत प्रयोगमा आएका सरकारी सवारी साधनहरू तत्काल फिर्ता गराउने निर्णय गरेको छ। सोमबार मुख्य सचिवको नेतृत्वमा बसेको सचिवहरूको बैठकले सरकारी गाडीको दुरुपयोग रोक्न कडाइ गर्ने निर्णय गरेको हो।

बैठकमा यदि कुनै पदाधिकारी वा कर्मचारीले प्रचलित मापदण्ड विपरीत सरकारी सवारी प्रयोग गरेको पाइएमा तत्काल फिर्ता गरिने व्यवस्था मिलाउने निर्णय गरिएको छ। साथै, सबै मन्त्रालय, आयोग, सचिवालय, विभाग, बोर्ड, संस्थान र प्राधिकरणहरूलगायतका निकायहरूलाई आफ्ना सवारी साधन र प्रयोगकर्ताको विवरण प्रधानमन्त्री तथा मन्त्रिपरिषद्को कार्यालयमा पठाउन निर्देशन दिइएको छ।

‘यदि कुनै पदाधिकारी वा कर्मचारीले मापदण्ड विपरीत सवारी प्रयोग गरेको पाइएमा तुरुन्त फिर्ता गराउने,’ सचिव बैठकको निर्णयमा उल्लेख छ।

यसका साथै, सरकारी सम्पत्ति पारदर्शी र व्यवस्थीत बनाउन प्रत्येक मन्त्रालयमा रहेका सवारी साधनको विवरण पब्लिक एसेट म्यानेजमेन्ट सिस्टम (PAMS) मा अनिवार्य रूपमा प्रविष्ट गरिने व्यवस्था मिलाउने निर्णय पनि बैठकले गरेको छ।

महालेखा नियन्त्रक कार्यालयद्वारा सञ्चालित PAMS प्रणाली वेब आधारित हो जसमा सरकारी सम्पत्ति जस्तै घरजग्गा, भवन, सवारी साधन, फर्निचर र मेसिनहरूको विवरण राखिन्छ। यस प्रणालीमा सम्पूर्ण विवरण अद्यावधिक गरिएपछि सरकारी सवारी साधनहरूको वास्तविक अवस्था, प्रयोगकर्ता र प्रयोगको उद्देश्यबारे सहजै जानकारी लिन सकिने सरकारको विश्वास छ।

काठमाडौँ ,५ साउन। राष्ट्रिय परिचयपत्र तथा पञ्जीकरण विभागले राष्ट्रिय परिचयपत्रसम्बन्धी सेवा आंशिक रूपमा अवरुद्ध भएको जनाएको छ। विभागले आइतबारदेखि सेवा अवरुद्ध भएको जानकारी दिँदै मर्मत सम्पन्न नहुञ्जेलसम्म केही सेवा सञ्चालनमा नआउने स्पष्ट पारेको छ।

विभागका सूचना अधिकारी शिवराज सेढाइँका अनुसार राष्ट्रिय परिचय व्यवस्थापन सूचना प्रणालीको नियमित मर्मत सम्भार तथा क्षमता विस्तार कार्य भइरहेकाले अनलाइनमार्फत उपलब्ध सेवा अवरुद्ध भएको हो।

सेढाइँका अनुसार अनलाइनमार्फत सञ्चालन हुने राष्ट्रिय परिचयपत्र विवरण सङ्कलन तथा कार्ड वितरण, विवरण संशोधन, जन्मदर्ता गर्दा प्रदान हुने राष्ट्रिय परिचय नम्बर, सामाजिक सुरक्षा भत्ता लाभग्राहीहरूको नाम दर्ता तथा नवीकरणसम्बन्धी जैविक प्रमाणीकरण सेवा लगायतका कार्यहरू हाल रोकिएका छन्।

यसैबीच, विभागले सार्वजनिक सूचना प्रकाशित गरी सेवा पुनः सुचारु हुनेबित्तिकै जानकारी गराउने जनाएको छ। साथै, अफलाइनमार्फत विवरण सङ्कलन गर्ने व्यवस्था मिलाइएको जानकारी दिँदै सबै राष्ट्रिय परिचयपत्र सेवा इकाइलाई आवश्यक तयारी गर्न निर्देशन दिएको छ।

अफलाइनमार्फत दर्ता गराइएका सेवाग्राहीलाई भने अनलाइन सेवा पुनः सुरु भएपछि राष्ट्रिय परिचय नम्बर एसएमएसमार्फत उपलब्ध गराइने सेढाइँले जानकारी दिएका छन्। विभागले सेवा लिने सर्वसाधारण र सरोकारवालामा आवश्यक सहयोगका लागि आग्रह समेत गरेको छ।

दाङ,३२ असार । अमेरिकामा हालै भएको कार दुर्घटनामा मृत्यु भएका दुई नेपाली विद्यार्थीमध्ये एक जना दाङका रहेको खुलेको छ।

जुलाई १३ तारिख शनिबार राति स्थानीय समयअनुसार ९ बजेतिर लुइसियाना राज्यको राजमार्ग ५०७ नजिक अमेरिकी राजमार्ग ८० मा कार दुर्घटना हुँदा नेपाली नागरिकद्वय २२ वर्षीय राजन यादव र २० वर्षीय रोजिन ओलीको मृत्यु भएको हो।

दुर्घटनामा ज्यान गुमाउने ओली दाङको तुलसीपुर उपमहानगरपालिका–४ रक्षाचौरका हुन्। उनका काका पोषण ओलीका अनुसार डाक्टर बन्ने ठूलो सपना बोकेर रोजिन १० महिना अघि मात्रै अध्ययनका लागि अमेरिका गएका थिए।

“घरमा बुवा–आमा र एक जना दाइ मात्रै छन्। भतिजाले भविष्य बनाउने लक्ष्यसहित अमेरिका पुगेको केही समयमै यस्तो दुःखद घटना हुन पुग्यो,” काका ओलीले दुखेसो पोखे।

रोजन र यादव दुवै लुइसियाना टेक युनिभर्सिटीमा अध्ययनरत थिए। दुर्घटनामा उनीहरूको घटनास्थलमै मृत्यु भएको हो।

अन्तर्राष्ट्रिय सञ्चारमाध्यमका अनुसार हुरीबतास र ठूलो वर्षाका बीच उनीहरू सवार कार सडकबाट चिप्लिँदै रुखमा ठोक्किएर दुर्घटना भएको बताइएको छ।

यादवको स्थायी घर सर्लाहीतिर रहेको अनुमान गरिए पनि ठेगाना यकिन हुन नसकेको काका ओलीले जानकारी दिए।

काठमाडौँ, ३२ असार। भारतको उत्तराखण्ड प्रदेशमा हुन गइरहेको पञ्चायत निर्वाचनलाई मध्यनजर गर्दै नेपाल–भारत सीमाका दुई प्रमुख नाका बन्द हुने भएका छन्। बैतडी र दार्चुला जिल्लाका सीमा नाका निर्वाचन अवधिमा अस्थायी रूपमा बन्द गरिने भएको हो।

भारतको उत्तराखण्ड प्रदेशमा यही जुलाई २४ र २८ (आगामी साउन ८ र १२ गते) पञ्चायत निर्वाचन हुँदैछ। निर्वाचनको सुरक्षालाई ध्यानमा राख्दै सीमावर्ती क्षेत्रबाट हुने आवत–जावत रोक्न निर्णय गरिएको बैतडीका प्रमुख जिल्ला अधिकारी पुण्यविक्रम पौडेलले जानकारी दिनुभयो।

उनका अनुसार दार्चुलाको पुलघाट नाका आगामी साउन ५ गते (जुलाई २१) बेलुकादेखि साउन ८ गते (जुलाई २४) बिहानसम्म बन्द रहनेछ। त्यसैगरी, बैतडीको झुलाघाट नाका साउन ९ गतेदेखि १२ गतेसम्म बन्द गरिने जनाइएको छ।

प्रजिअ पौडेलका अनुसार, आपत्कालीन अवस्था आएमा दुवै देशको आपसी सहमतिमा नाका खोल्न सकिने व्यवस्था गरिएको छ। निर्वाचनलाई शान्तिपूर्ण र व्यवस्थित रूपमा सम्पन्न गर्नका लागि यस्तो निर्णय गरिएको हो।

प्युठान, ३१ असार। प्युठानमा आफ्नै पूर्व श्रीमतीलाई चक्कु प्रहार गरी हत्या गरेको अभियोगमा एक पुरुष पक्राउ परेका छन्। सरुमारानी गाउँपालिका–३ गोठेरीकी २८ वर्षीया रुक्मणी बरालको मंगलबार बिहान हत्या भएको जिल्ला प्रहरी कार्यालय प्युठानले जनाएको छ।

हत्या अभियोगमा ऐरावती गाउँपालिका–२ कात्तिकेका ३० वर्षीय लिलबहादुर बराललाई घटनास्थलबाटै प्रहरीले नियन्त्रणमा लिएको प्रहरी नायब उपरीक्षक (डीएसपी) दिपेश बस्यालले जानकारी दिए।

रुक्मणी आफ्नी जेठानी डिला परियारको घरमा बस्दै आएकी थिइन्। डिलाका अनुसार लिलबहादुरले रुक्मणीलाई फोन गरी बोलाएपका थिए। फोन गरेर बोलाएलगत्तै उनी घरभित्र पसेपछी लिलबहादुरले चक्कु प्रहार गरेका थिए।

“मैले कराएँ, नहानू भनें, तर सुनेन। आँखै अगाडि छुरा प्रहार गरेर मारे,” डिला परियारले भनिन्।

इजरायलमा रोजगारी गर्दै आएका लिलबहादुर असार २४ गते मात्र घर फर्केका थिए। रुक्मणीले गत वैशाखमा दिपक परियारसँग पुनः विवाह गरेकी थिइन्। दिपक १५ दिनअघि कामका लागि संखुवासभा गएका थिए।

रुक्मणी र लिलबहादुरका एक छोरा र एक छोरी रहेका छन्। आमाको हत्या र बाबुको गिरफ्तारीपछि उनीहरू विचल्लीमा परेका छन्।

घटनाको जानकारी पाउनेबित्तिकै बड्डाडा प्रहरी चौकीबाट प्रहरी सहायक निरीक्षक कुलबहादुर खत्रीको टोली घटनास्थल पुगेर लिलबहादुरलाई पक्राउ गरेको थियो।

“घटनास्थल सुरक्षित गरिएको छ र अभियुक्त प्रहरी नियन्त्रणमा छन्,” डीएसपी बस्यालले बताए। प्रारम्भिक अनुसन्धानअनुसार पूर्व वैवाहिक रिसइवीका कारण घटना भएको प्रहरीको अनुमान छ। हाल घटनाबारे थप अनुसन्धान भइरहेको प्रहरीले जनाएको छ।

काठमाडौं, ३१ असार। अविरल वर्षासँगै आएको बाढी र पहिरोका कारण अवरुद्ध भएको बीपी राजमार्ग सञ्चालनमा आएको छ।

राजमार्गका विभिन्न ८ स्थानमा बाढी र पहिरोले सडक अवरुद्ध गरेपछि सोमबार रातिदेखि यातायात ठप्प भएको थियो। इलाका प्रहरी कार्यालय मंगलटारका प्रमुख ईश्वर कार्कीका अनुसार रोशी गाउँपालिका–९ पिन्थलीबेशी, मंगलटार बिरुवाडाँडामा रहेको फेदीखोला र साङखोला, रोशी–११ कालढुंगा, माम्ती खोला, पिप्ले र पानीतारे नजिक झरेका पहिरो हटाइएका छन्।

सडक विभाग र एवन निर्माण सेवाको सहयोगमा लेदो र माटो पन्छाई सडक सुचारु गरिएको कार्कीले जानकारी दिए। काभ्रे र सिन्धुलीको सिमाना बर्खेखोलामा बाढीले बिगारेको सडक पनि मर्मत गरिएको छ।

राजमार्ग सोमबार राति ८ बजेदेखि अवरुद्ध हुँदा सवारी साधन काभ्रे र सिन्धुली प्रहरीले होल्ड गरेका थिए। लगातारको वर्षाले राजमार्गमा पटक–पटक बाढी र पहिरोको समस्या देखिन थालेपछि यात्रुहरूलाई आवतजावतमा सास्ती हुन थालेको छ।

यसअघि पनि बीपी राजमार्गका विभिन्न खण्डमा वर्षाको कारण सडक अबरुद्ध भएको थियो।

दाङ, ३१ असार। दाङमा एक महिलाको क्रुरतापूर्वक हत्या गरेको अभियोगमा जिल्ला अदालत दाङले एक व्यक्तिलाई आजीवन कारावासको सजाय सुनाएको छ।

तुलसीपुर उपमहानगरपालिका–११ बेलटाकुराका ३८ वर्षीय टेकबहादुर हमाललाई अदालतले ४२ वर्षीया रिता लामिछानेको हत्या गरेको प्रमाणित ठहर गर्दै सोमबार पाँच लाख रुपैयाँ जरिवानासहित आजीवन कारावासको फैसला सुनाएको हो।

जिल्ला न्यायाधीश राजेश्वर अर्यालको इजलासले हमालमाथि दोष सिद्ध भएको निर्णय सुनाएको अदालतका श्रेष्तेदार दामोदर घिमिरेले जानकारी दिनुभयो। अभियुक्त हमालले २०८० असोज ६ गते बिहान लामिछानेमाथि खुकुरी प्रहार गरेका थिए। घरमै काम गरिरहेकी लामिछानेको घटनास्थलमै मृत्यु भएको थियो।

त्यसै दिन हमालले सोही वडाकी ६५ वर्षीया कमला कुमारी हमालमाथि पनि खुकुरी प्रहार गरी घाइते बनाएका थिए। बारीमा काम गरिरहेकी कमलाको टाउकोमा गम्भीर चोट लागेको प्रहरीले जनाएको छ।

प्रहरीले हमाललाई घटनाको केही घण्टापछि घरबाटै पक्राउ गरेको थियो। कार्तिक १२ गते कर्तव्य ज्यानसम्बन्धी मुद्दा दर्ता भई अदालतमा सुनुवाइ सुरु भएको थियो। बहस र प्रमाणका आधारमा अदालतले उनलाई बाँकी जीवन कारागारमै बिताउनुपर्ने फैसला गरेको हो।

अदालतको निर्णयसँगै हमालले अब आजीवन कैद भोग्नुका साथै पाँच लाख रुपैयाँ जरिवाना पनि तिर्नुपर्नेछ।