दाङ, १७ असार । केही दिनदेखि आन्दोलनरत सुनचाँदी व्यवसायीहरूको आन्दोलनमा तुलसीपुरमा रहेका व्यवसायिक संगठनहरुले ऐक्यबद्धता जारी गरेका छन् ।

तुलसीपुर चेम्बर अफ कमर्सले आन्दोलनरत सुनचाँदी व्यावसायि संग अन्तरक्रिया गरेर आन्दोलनप्रति ऐक्यबद्धता जनाएको हो। बिगत पाँच दिन देखि सुनचाँदी ब्यबसायिहरु आन्दोलित रहेका छ्न ।

मंगलबार आयोजित अन्तर्क्रिया तथा छलफलमा बोल्दै तुलसीपुर चेम्बर अफ कमर्सका अध्यक्ष ऋषिराज भण्डारीले आन्दोलनमा ऐक्यबद्धता जनाएका हुन ।

भण्डारीले ब्यबसायिहरुलाई राज्यले करको बहानामा कस्न नहुने बताए । उन्ले प्रोत्साहन गर्ने बेला निरुत्साहित गरेको प्रति टिप्पणी गरे ।

सुनचाँदी व्यवसायी समिति तुलसीपुरका कोषाध्यक्ष लोकेन्द्र ओलीले व्यावसायिक संघसंस्थाहरूबाट सुनचाँदी व्यवसायहरूको आन्दोलनप्रति पूर्ण रुपमा ऐक्यबद्धता आउने क्रम जारी रहेको बताए।

उनले राज्यले लिएको नीति नफेरिदासम्म व्यवसायीहरु आन्दोलन निरन्तर रहने बताए ।

उमा भण्डारी, दाङ । ‘साँचै भन्नुपर्दा, धनभन्दा ठुलो सम्पत्ति सिप रहेछ। कुनैबेला ऋण खोजेर गुजारा चलाएको दिन पनि थियो, तर आज म आफै आत्मनिर्भर बनेर अरुलाई सिप सिकाउँदै छु। सिपले मलाई स्वाभिमानका साथ बाँच्न सिकाएको छ, आत्मनिर्भर बनाएको छ मेरो जीवन नै परिवर्तन गराएको छ ।’–तुलसीपुर उपमहानगरपालिका–८ बटवलपुर निवासी उर्मिला चौधरी ।

उमेरले ४० वर्ष कटिसकेकी उर्मीलाको जीवन कुनैबेला एकदमै कठिनाइले भरिएको थियो। सानो परिवार चलाउन पनि धौ–धौ पर्दथ्यो । दैनिक खर्चदेखि लिएर छोराछोरीको पढाइ, लालनपालन र अन्य आवश्यकताहरू पूरा गर्न श्रीमान सँग पैसाको माग गर्नुपर्ने अवस्था थियो। आर्थिक चाप यति धेरै थियो कि घर चलाउनका लागि लाखौँ ऋणको थुप्रो लागिसकेको थियो। मासिकाको पढाइ भएकी उर्मीला कहिलेकाहीं खोप लगाउने काम गर्थिन्, जसबाट आउने केही पैसाले आफ्नो सानो–तिनो खर्च धान्थिन्।

तर २०७८ सालमा आएको एउटा अवसरले उनको जीवनको मोड नै फेरिदियो। लुम्बिनी प्रदेश सरकारको गरिबी निवारण कार्यक्रम अन्तर्गत उनले ४५ दिने ढकिया बुनाइ तालिममा सहभागिता जनाइन्। यद्यपि, कोभिड महामारीको कारण तालिम २५ दिनमै रोकियो, । तर उर्मिलाको लगनशीलता भने रोकिएन। उनले त्यही अधुरो तालिमबाट आफूभित्रको सीप र आत्मविश्वासको ढोका खोलिन्।

तालिम सकेपछि उर्मीला घरमै बसेर ढकिया बनाउने र बिक्री गर्ने कार्यमा लागिन्। सुरूवातमा दिनमा केहि कठिनाई त थियो । तर हिम्मत त लगनशिलताले उनको जागँरलाई मर्न दिएन । मासिक २–३ हजारले जसोतसो घर चलाएकी एकदिन उर्मिलालाई दंगिशरण गाउँपालिका–२ मा १० दिने ढकिया बुन्ने तालिममा प्रशिक्षकको रुपमा जाने अवसर आयो । उनी त्यस तालिममा पहिलोपटकप्रशिक्षकको रुपमा सहभागि भइन् । त्यसबाट ३५ हजार रुपैयाँ पारिश्रमिक प्राप्त गरीन् । त्यसपछि उनी प्रशिक्षकका रुपमा विभिन्न ठाउँमा पुग्ने गरेकी छन् ।

कहिले कारागार, कहिले विद्यालय, कहिले गाउँपालिका, नगरपालिकाले आयोजना गर्ने महिला उद्यमशीलता तालिममा प्रशिक्षकको रूपमा व्यस्त छिन्। अहिले उनी महिला उद्यमीहरूका लागि प्रेरणाको स्रोत बनेकी छन्। एक तालिममा सहभागिता जनाएवापत उनी न्यूनतम ४० हजार रुपैयाँसम्म कमउने गरेको उनी बताउँछिन् ।

तालिम दिनकै लागि उनको माग बढ्दो छ। उनी अहिले सयौं महिलालाई आत्मनिर्भर बन्न, आफ्नै सीपबाट कमाउने बाटो पहिल्याउन सघाउँदै आएकी छन्। यतिमात्र होइन उनले घरको ऋण समेत आफ्नै सिपले कमाएको रकमबाट तिर्दै आएकी छन् ।

तालिमपछिको बाँकी समय उनले ढकिया, पेन होल्डर, डेल्वा जस्ता सामग्री बनाउने र बेच्ने गर्दछिन्। उनले एउटा डेल्वालाई रु १० हजारमुल्यमा बेच्ने गरेको बताइन् । सिपले मान्छेलाई भोकै बस्न दिदैन भन्ने महसुश आफूले गरेको उनको अनुभव छ ।

रोल्पा घर भई हाल दाङमा बस्दै आएकी धनमाया केसी श्रृङगारसम्वन्धी सामग्री बनाउन सिकाउछिन् । उनले विभिन्न ठाउँमा पुगेर चुरा, पोते, गुडिया लगायतका सामग्रीहरु बनाउनसिकाउने र त्यहाँबाट उत्पादन भएका बस्तुहरु पसलमा राखेर बिक्रि गर्ने गर्दछिन् । एकातिर सिप बेचेर आम्दानी गरेकी छन् भने अर्कातिर प्रशिक्षार्थीले उत्पादन गरेका साम्रगीहरु बिक्रि गरेर उनीहरुको अर्थोपार्जनमा सघाइरहेकी छन् । सिपका माध्यमबाट व्यवसाय सञ्चालन गर्दा आफूलाई थप सहज भएको उनको अनुभव छ ।

‘सिप सिकेपछि धेरै फाइदा भएको छ , सिकाउने पनि गर्छु , त्यहाँबाट उत्पादन भएका सामग्रीहरु आफ्नै पसलमा लगेर बिक्रि गर्छु ,एकातिर सिप बिकेको छ अर्कोतिर व्यापारका लागि ठुलो सञ्जाल जोडिएको छ मलाई दोहोरो फाइदा भएको छ, उनले भनिन्–‘ इच्छाशक्ति र जाँगर भयो भने आफ्ना उत्पादित सामग्रीहरु कहाँ बेच्ने, कसरी बेच्ने भन्ने समस्या नहुने रहेछ ।’

उनी वि.सं. २०७९ सालमा प्रदेश सरकारको सहयोगमा सञ्चालन भएको चुरापोते बनाउने तालिममा सहभागि भएकी थिइन्। त्यसबाट उनले विभिन्न डिजाइनमा साम्रगी बनाउन सिकिन् । अहिले आफैले व्यवसाय समेत सञ्चालन गरेकी छन् । जिल्लामा कच्चा पदार्थ उपलव्ध नहुँदा सुलभ र सहजरुपमा साम्रगी उत्पादन गर्न कठिनाई हुँदै आएको उनले बताइन् ।

‘पहिले हातमा सिप थिएन, काम पनि थिएन, घरमै बस्ने, खर्च चाहिए श्रीमानसंग रोएर पैसा माग्नुपर्ने अवस्था थियो । अहिले आफ्नो कमाईले घर चलाउन पाउँदा एकदमै खुशी लाग्छ ।’– पार्वती चौधरी ।

२५ दिने ढकिया बनाउने तालिममा सहभागि भएपछि आफ्नो दैनिकी फेरिएको उनी सुनाउँछिन् । आफु र परिवारको लागि खर्च जुटाउन अहिले उनलाई कुनै समस्या छैन । धेरैजसो त उनी विभिन्न ठाउँमा सञ्चालन हुने तालिममै हुन्छिन् । बाँकी समय घरमै ढकिया, पेन होल्डर, पुजाथाली लगायत सामग्री बनाउने र बिक्रि गर्ने गर्दछिन् ।

शुशिला चौधरी, शुशिला थापा पनि तालिममै सिकेको सिपलाई व्यवसायीक बनाउन सफल भएका छन् । उनीहरु महिला उद्यमशिलता तालिमहरुमा प्रशिक्षकको रुपमा सहभागि भइ अरुलाई आत्मनिर्भर बनाउन प्रेरणा बाँड्दै आएका छन् । प्रदेश सरकारको सहयोगमा सञ्चालन भएका तालिमले उनीहरुका लागि आत्मनिर्भरको बाटो बनेको छ ।

उनीहरु उदाहरणका पात्र मात्रै हुन् । हुमा हमाल चन्द , विमला न्यौपाने, डिला कुमारी गौतम, तेज कुमारी बिक पनि अवसर पाएमा आफूले सिकेको ज्ञान सिप अरुलाई दिन सक्ने बताउँछन् । सामाजिक विकास डिभिजन कार्यालय दाङले सञ्चालन गरेको १५ दिने अचार बनाउने तालिममा सहभागी भएका उनीहरु अहिले समुह बनाएर व्यवसायीक रुपमा अचार उत्पादन र विक्रि वितरणको तयारी गरिरहेका छन्।

सुन्दा र हेर्दा सजिलो भएपनि खाद्य स्वच्छता, गुणस्तर, प्याकेजिङका लागि तालिम उपयोगी बनेको र यसबाट आफूहरु आत्नर्भिर बन्नका लागि व्यवसायीक रुपमा अघि बढ्ने तयारीमा जुटेको उनीहरु बताउँछन् ।

महिला तथा सिमान्तकृत समुदाय लक्षित कार्यक्रममा ९३ लाख बजेट खर्च
लुम्बिनी प्रदेश सरकारले प्रदेशका विभिन्न जिल्लाहरुमा महिला, बालबालिका तथा सीमान्तकृत समुदायका लागि विभिन्न सिप विकास तथा सचेतनामूलक कार्यक्रमहरु गर्दै आएको छ ।

प्रदेश सरकारले सामाजिक विकास डिभिजन कार्यालयमार्फत दाङ, रुकुम पूर्व, बर्दिया, बाँके, रूपन्देही लगायतका जिल्लामा आर्थिक वर्ष २०८१÷८२ मा ९३ लाख रुपैयाँ लगानीमा विभिन्न कायर् क्रम सम्पन्न गरेको छ । महिला, किशोरी, बालबालिका, अपाङ्गता भएका व्यक्ति तथा दलित तथा सिमान्तकृत समुदायलाई लक्षित गरी सिप विकास, आत्मरक्षा र सचेतनामूलक कार्यक्रमहरू सञ्चालन गरेको हो ।

दाङको तुलसीपुर उपमहानगरपालिकामा २६ जना महिलालाई लक्षित गर्दै दुई महिनाको व्युटी पार्लर तालिम सञ्चालन गरिएको थियो, जसमा ५ लाख रुपैयाँ खर्च गरिएको थियो। त्यस्तै, घरेलु उद्योगतर्फ महिलालाई आकर्षित गर्न ७० महिलालाई दुई समूहमा विभाजन गरी १५ दिने अचार बनाउने तालिम दिइएको छ, जसमा पनि ५ लाख रुपैयाँ बजेट छुट्याइएको थियो।

शहरी गरिबी निवारण कार्यक्रमअन्तर्गत वडा नं. ५, ६, ७ र ९ मा सेवा प्रतिष्ठानको साझेदारीमा सिप विकास तालिम सञ्चालन गरिएको थियो, जसअन्तर्गत २० जनाले अचार बनाउने, ५३ जनाले दुई महिने मन्टेश्वरी तालिम र २५ जनाले दुई महिने कम्प्युटर (एआई) तालिम लिएका थिए। यसका लागि प्रदेश सरकारले १५ लाख रुपैयाँको बजेट उपलब्ध गराएको थियो।

गढवा गाउँपालिकामा विपन्न महिलालाई लक्षित गर्दै ७० जनालाई दुई समूहमा विभाजन गरी १५ दिने कुसन बनाउने तालिम दिइएको थियो, जसमा ५ लाख रुपैयाँ खर्च गरिएको थियो। त्यस्तै, घोराही उपमहानगरपालिकामा दलित तथा सिमान्तकृत वादी महिलाहरूलाई लक्षित गर्दै ६० जनालाई डल बनाउने तालिम दिइएको थियो। दैनिक प्रयोगमा आउने डल निर्माण गर्ने सीप सिकाउने तालिम सञ्चालनका लागि पनि ५ लाख रुपैयाँ छुट्याइएको थियो।

यसैगरी, मुक्त कमलहरी महिलालाई लक्षित गर्दै तुलसीपुरमा ड्राइभिङ तालिम सञ्चालन गरिएको छ, जसमा ५ लाख रुपैयाँ खर्च गरिएको हो। पुथा उत्तरगंगा गाउँपालिका, रुकुम पूर्वमा किशोरी, बालबालिका तथा महिलाहरूलाई आत्मरक्षा तालिम दिइएको छ, जसका लागि १० लाख रुपैयाँको बजेट विनियोजन गरिएको थियो। महिला तथा बालबालिकालाई उद्यमतर्फ प्रोत्साहित गर्न राजपुर गाउँपालिकामा पनि ५ लाख रुपैयाँको सीपमूलक तालिम सञ्चालन गरिएको छ।

बाल अधिकार सम्बन्धी कार्यक्रम तुलसीपुरमा, भौतिक अपाङ्गता भएका बालबालिकाका लागि क्षमता विकास कार्यक्रम, जेष्ठ नागरिक मिलन व्यवस्थापन तथा किशोर–किशोरी आत्मरक्षा तालिम राप्ती गाउँपालिकामा, बालहिंसा तथा यौन दुव्र्यवहार विरुद्धको कार्यक्रम लमहीमा सञ्चालन गरिएको थियो। यस्ता प्रत्येक कार्यक्रममा ५ लाख रुपैयाँ बजेट छुट्याइएको थियो।

लुम्बिनी प्रदेशको विभिन्न स्थानीय तहमा लैङ्गिक हिंसा र विभेदविरुद्धका सचेतनामूलक कार्यक्रमहरू समेत सञ्चालन गरिएको छ। मधुवन नगरपालिका बर्दियामा सामाजिक विकृति अन्त्यका लागि २१ हजार नौँसय ५० रुपैयाँ, बाँकेको खजुरा गाउँपालिकामा २ लाख १० हजार नौँसय ५० रुपैयाँ, तिलत्तोमा नगरपालिका रूपन्देहीमा २ लाख ७८ हजार चारसय रुपैयाँ, प्रतापपुर गाउँपालिकामा २ लाख ७१ हजार ६०० रुपैयाँ, र लमही नगरपालिकामा १ लाख ३० हजार रुपैयाँ खर्च गरिएको हो।

त्यस्तै, घोराहीमा पोषण संयन्त्रमा छलफल कार्यक्रम अन्तर्गत ५४ हजार एकसय १९ रुपैयाँ, ठाकुरबाबा बर्दियामा महिला प्रहरी सेलका कर्मचारीलाई संयन्त्र तथा तथ्याङ्क व्यवस्थापन तालिम सञ्चालन गर्न ४ लाख १६ हजार दुइसय ८० रुपैयाँ र सेवा केन्द्रका कर्मचारीहरूको क्षमता विकासका लागि १ लाख ७८ हजार नौँसय २७ रुपैयाँ खर्च गरिएको मन्त्रालयले जनाएको छ ।
यसैगरी, बहिरा व्यक्तिहरूका लागि तुलसीपुरमा सांकेतिक भाषा तालिम सञ्चालन गरिएको छ, जसका लागि ५ लाख रुपैयाँ विनियोजन गरिएको हो। बाँके र पाल्पामा लैङ्गिक समानता र समावेशीकरण कार्यक्रम सञ्चालन गर्न १० लाख रुपैयाँ खर्च गरिएको छ।
सामाजिक विकास डिभिजन कार्यालयका अनुसार महिलाहरू, बालबालिका, अपाङ्गता भएका व्यक्ति तथा सीमान्तकृत समुदायलाई आत्मनिर्भर बनाउन सिप विकास र सचेतना कार्यक्रमहरू प्रभावकारी हुने अपेक्षा गरिएको छ।
प्रदेश सरकारका यस किसिमका कार्यक्रमले सामाजिक रूपान्तरण र आर्थिक सशक्तिकरणतर्फको यात्रा बलियो बनाउँछ, तर निरन्तरता, गुणस्तर, र मूल्यांकनको संयोजन हुन जरुरी छ। प्रदेश सरकार र स्थानीय तहबीचको सहकार्य अझै सुदृढ हुँदा, यस्ता प्रयासहरू दीर्घकालीन र आत्मनिर्भर भविष्य निर्माणतर्फ सार्थक बन्न सक्छन्।

दाङ,१६ असार । जिल्ला प्रशासन कार्यालय दाङले सबै स्थानीय तह र नागरिकलाई उच्च सतर्कता अपनाउन आग्रह गरेको छ। सक्रिय मनसुनका कारण दाङमा बाढी, पहिरो र चट्याङको जोखिम बढेको भन्दै जिल्ला प्रशासन कार्यालयले सबैलाई उच्च सतर्कता अपनाउन आग्रह गरेको हो ।

जिल्ला प्रशासनले मिति २०८२ असार १६ गते जारी गरेको विपद् व्यवस्थापन सम्बन्धी जरुरी सूचनामा मौसम विज्ञान विभागले आगामी दिनमा भारी वर्षाको सम्भावना जनाएको उल्लेख गरिएको छ। यस्तो अवस्थामा जोखिमयुक्त क्षेत्रमा बसोबास गर्ने नागरिकलाई विपद्को समयमा विशेष सावधानी अपनाउन अनुरोध गरिएको छ।

साथै, स्थानीय तहहरुलाई आ–आफ्नो भूगोलमा मनसुनजन्य पूर्वतयारी र प्रतिकार्य योजना कार्यान्वयन गर्न र स्थानीय सुरक्षा निकायहरूसँग समन्वय गरी तत्काल उद्धार तथा राहतका लागि तयारी अवस्थामा रहन भनिएको छ।

जिल्ला विपद् व्यवस्थापन समिति, रेडक्रस, विभिन्न सरकारी तथा गैरसरकारी संस्था, नागरिक समाज र अन्य सरोकारवाला निकायलाई विपद् प्रतिकार्यमा सक्रिय हुन तथा जिल्लामा रहेका साधनस्रोतको समन्वित उपयोग गर्न प्रशासनले आग्रह गरेको छ।

सञ्चारमाध्यमहरुलाई विपद् सम्बन्धी जानकारीको प्रचारप्रसारमा सहयोग गर्न र विपद् घटनाको तत्काल सूचना आदानप्रदान गर्न समेत अनुरोध गरिएको छ।

जिल्ला विपद् व्यवस्थापन समितिका अध्यक्ष तथा प्रमुख जिल्ला अधिकारी कृष्णप्रसाद लम्सालले सबै पक्षलाई जिम्मेवारी निर्वाह गरी आपत्कालीन व्यवस्थापनमा जुट्न अपील गरेका छन्।

दाङ,१६ असार । भारी वर्षा र बाढीको जोखिमका कारण दाङका दुई पालिकाले विद्यालयहरूमा सार्वजनिक बिदा दिएका छन्।

लुम्बिनी प्रदेशको राजधानी नजिकै रहेका राप्ती गाउँपालिका र गढवा गाउँपालिकाले सम्भावित प्राकृतिक जोखिमलाई मध्यनजर गर्दै यस्तो निर्णय गरेका हुन्।

राप्ती गाउँपालिकाले असार १५ र १६ गते ९सोमबार र मंगलबार० दुई दिनका लागि सम्पूर्ण विद्यालय बन्द गर्ने निर्णय गरेको छ। गढवा गाउँपालिकाले भने असार १५ गतेदेखि २० गतेसम्म पाँच दिन सार्वजनिक बिदा दिएको छ।

राष्ट्रिय विपद् जोखिम न्यूनिकरण तथा व्यवस्थापन प्राधिकरणले असार १४ गते दाङमा भारी वर्षा हुन सक्ने पूर्वसूचना जारी गरेको थियो। सोही सूचनाका आधारमा आइतबार दुवै पालिकाले बिदा घोषणा गरेका हुन्।

राप्ती गाउँपालिकाका वरिष्ठ शिक्षा अधिकृत विश्वास विकले जारी गरेको सूचनामा बिदा बर्षे बिदाबाट कट्टी हुने गरी दिइएको उल्लेख छ। साथै, बिदाको अवधिमा बालबालिकालाई नदी, इनार, पोखरी जस्ता जलस्रोतबाट टाढा राख्न, अत्यावश्यक कामबाहेक ती क्षेत्रतर्फ जान नदिन र मौसमसम्बन्धी अद्यावधिक जानकारीका आधारमा मात्र गतिविधि सञ्चालन गर्न अनुरोध गरिएको छ।

त्यस्तै, गढवा गाउँपालिकाका शिक्षा शाखाका अधिकृत श्यामबहादुर विकद्वारा जारी सूचनामा अहिले खेतीपातीको समय भएकाले विद्यालयमा शिक्षक र विद्यार्थीको उपस्थिति न्यून हुन गएको जनाइएको छ। त्यसैले असार १५ देखि २० गतेसम्म सार्वजनिक बिदा दिइएको बताइएको छ। यद्यपि सूचनामा पाँच दिन मात्र बिदा भनिए पनि विद्यालय नियमित रूपमा असार २६ गतेबाट सञ्चालन हुने उल्लेख छ।

यी दुवै पालिका राप्ती नदीको तटीय क्षेत्रका हुन्। राप्तीमा ठूलो बाढी आउँदा नदी आसपासका बस्तीहरू डुबानमा पर्ने भएकाले सावधानीस्वरूप विद्यालय बन्द गरिएको हो। राप्ती नदीको बाढीले राप्ती, गढवा र लमही नगरपालिकाका विभिन्न क्षेत्रमा जलमग्नता निम्त्याउने गरेको छ।

काठमाडौ,१६ असार । संघीय संसद अन्तर्गतका ४ वटा समितिको बैठक बस्दैछ। संघीय संसद सचिवालय, सिंहदरवारमा उक्त बैठक बस्नेछन्।

जसअनुसार राज्य व्यवस्था तथा सुशासन समितिको बैठक बिहान ११ बजे बोलाइएको छ। जुन बैठकमा नेपाल प्रहरी सम्बन्धी कानूनलाई संशोधन तथा एकीकरण गर्न बनेको विधेयकमाथि संशोधन प्रस्ताव दर्ता गराउने सांसदहरूसँग छलफल गरिनेछ।

शिक्षा, स्वास्थ्य तथा सूचना प्रविधि समितिको बैठकमा भने विद्यालय शिक्षा विधेयक उपसमितिको प्रतिवेदन माथि छलफल हुनेछ। जुन बैठक बिहान साढे ८ बजेबाट सुरू हुनेछ।

विधायन व्यवस्थापन समितिको बैठकमा पुरानै अजेन्डा भन्सार विधेयक, २०८० माथि दफावार छलफल हुनेछ। जुन बैठक बिहान ११ बजे बोलाइएको छ भने संसदीय सुनुवाइ समितिमा सुनुवाइ हुन बाँकी सर्वोच्च अदालतका प्रस्तावित न्यायाधीश र न्याय परिषदका सदस्यको सुनुवाइ गरिनेछ। जुन बैठक बिहान ८ बजेबाट सुरू हुनेछ

दाङ १४ असार । किवानिस क्लब अफ दाङ तुलसीपुरको नयाँ नेतृत्व चयन भएको छ। नयाँ नेतृत्व चयन भएसँगै शनिबार एक कार्यक्रमका बीच पद हस्तान्तरण गरिएको छ।

किवानिस क्लब अफ दाङ तुलसीपुरका वर्ष २०२४ का अध्यक्ष बिमलकुमार पौडेलको अध्यक्षता तथा केवानिस क्लब अफ डिभिजन ५ का लेफ्टिनेन्ट गभर्नर भूपाल रावतको प्रमुख आतिथ्यतामा नयाँ कार्यसमितिलाई पद हस्तान्तरण गरिएको हो।

वर्ष २०२४ का अध्यक्ष बिमलकुमार पौडेलले वर्ष २०२५ का अध्यक्ष शैलेन्द्रकुमार ओलीलाई पद हस्तान्तरण गरेका हुन्।

अध्यक्षमा ओली सँगै निवर्तमान अध्यक्ष बिमलकुमार पौडेल, उपाध्यक्ष मनिष शाह , सचिव सन्दिप भुसाल र कोषाध्यक्ष केशवराज न्यौपाने रहेको नयाँ कार्यसमिति बनाइएको छ।

पद हस्तान्तरण कार्यक्रममा सहभागी वक्ताहरूले संस्थागत एकता, समन्वय र दीर्घकालीन असर पार्ने सेवामूलक कार्यक्रमलाई प्राथमिकता दिनुपर्नेमा जोड दिएका थिए।

कार्यक्रममा इभरेष्ट क्लब अफ किवानिसकी सुस्मा लामिछाने गिरी र लर्ड बुद्ध क्लबकी नारायणी राजौरेले क्लबहरूबीच समन्वयको कमी महसुस भएको बताउँदै एकता बलियो बनाउन सुझाव दिए।

किवानिस क्लब अफ मेट्रोका अध्यक्ष हेमराज डाँगीले पनि शुभकामना मन्तव्य व्यक्त गरेका थिए।

पूर्वअध्यक्ष बिमल कुमार पौडेलले कानुनी जटिलताबीच पनि योजना र कार्यक्रम सञ्चालन गर्न सके कोष सङ्कलनमा सहज रहेको बताए ।

उनले आफ्नै क्षेत्रका बालबालिकाको हितमा काम गर्न सके त्यसले राष्ट्रिय तहमा समेत सकारात्मक प्रभाव पार्ने धारणा राखे। उनले क्लब मर्ज गर्ने सुझावसमेत दिए।

राप्ती बबी क्याम्पसका उपप्राध्यापक सूर्य शर्माले बालबालिकासँग सम्बन्धित काममा सोचाइ परिवर्तन जरुरी भएको बताए।

उनले श्रम र पेशाप्रतिको सम्मानका संस्कार बालबालिकामा विकास गर्न र समाजमा रहेको ग्याप पहिचान गरी दीर्घकालीन असर पर्ने काम गर्नुपर्नेमा जोड दिए।

अप्टिमिष्ट क्लब डिभिजन ५ का मानबहादुर बस्नेतले सहकार्यलाई बलियो बनाउँदै प्रभावकारी कार्यक्रम सञ्चालन गर्न अनुरोध गरे। सल्लाहकार सुरेश हमालले एक वर्ष एउटै क्षेत्रमा लक्षित भएर योजना अघि बढाउन सुझाव दिए।

किवानिस क्लब डिभिजन ५ का चिल्ड्रेन फन्ड निर्देशक दमदार भण्डारीले क्लब मानवीय सेवाका लागि स्थापना भएको बताउँदै बालबालिकाको हितलाई केन्द्रमा राखेर काम गर्नुपर्ने धारणा राखे ।

कार्यक्रममा नयाँ कार्यसमितिका पदाधिकारीलाई प्रमाणपत्र वितरण गरिएको थियो।

काठमाडौं, १३असार ।जल तथा मौसम विज्ञान विभाग, मौसम पूर्वानुमान महाशाखाले मनसुनी रेखा नेपालतर्फ सर्दै गरेकाले सतर्क रहन सबैलाई आग्रह गरेको छ।

विशेष गरी कर्णाली, सुदूरपश्चिम र लुम्बिनी प्रदेशमा भारीदेखि धेरै भारी वर्षा हुने सम्भावना रहेकाले बाढी, पहिरो, डुबान र भूक्षयको जोखिम रहेको महाशाखाले जनाएको छ।

शुक्रबार राति ८ बजे जारी गरिएको मनसुन विशेष मौसम बुलेटिनअनुसार शनिबार साँझदेखि मनसुनको न्यूनचापीय रेखा पश्चिम नेपाल नजिक सर्ने सम्भावना छ।

बुलेटिनमा भनिएको छ, “हाल मनसुनको न्यूनचापीय रेखा पूर्वमा सरदर स्थानमा र पश्चिममा सरदर स्थानको दक्षिणमा अवस्थित छ। शनिबार साँझदेखि यो रेखा पश्चिम नेपाल नजिक उत्तरतर्फ सर्ने देखिएको छ।”

यस प्रणालीको प्रभावले असार १४ गते शनिबार साँझदेखि असार १६ गते सोमबार बिहानसम्म कर्णाली, सुदूरपश्चिम र लुम्बिनी प्रदेशका पहाडी तथा तराई भूभागमा व्यापक रूपमा मनसुन सक्रिय हुने देखिएको छ।

महाशाखाका अनुसार बंगालको खाडी र अरब सागरबाट प्रवाह हुने जलवाष्पयुक्त हावा र न्यूनचापीय प्रणालीको प्रभावका कारण ती क्षेत्रहरूमा ठूलो वर्षाको सम्भावना छ। अन्य प्रदेशका केही पहाडी भूभागहरूमा पनि भारीदेखि धेरै भारी वर्षा हुनसक्ने जनाइएको छ।

बुलेटिनमा सम्भावित जोखिमबारे सतर्क गराउँदै भनिएको छ, “वर्षाका कारण भूक्षय, बाढी, पहिरो, गेग्रान बहाव र तराई क्षेत्रमा डुबानको जोखिम रहन सक्ने भएकाले ठूला तथा साना नदी-नालामा पानीको सतह बढ्न सक्नेछ।

दैनिक जनजीवन, कृषि, पर्यटन, निर्माण कार्य, सडक तथा हवाई यातायात प्रभावित हुन सक्ने भएकाले सबैले आवश्यक सतर्कता तथा पूर्वतयारी अपनाउन अनुरोध गरिन्छ।”

मौसम महाशाखाले सम्भावित जोखिम क्षेत्रका स्थानीय प्रशासन, सम्बन्धित निकाय र सर्वसाधारणलाई सचेत रहन र पूर्व तयारीमा जुट्न आग्रह गरेको छ।

बुलेटिन हेर्नुहोस:-

दाङ,१३ असार । दाङको तुलसीपुरमा अपाङ्गता भएका व्यक्तिहरूको सशक्तिकरणका लागि अभिमुखीकरण कार्यक्रम सम्पन्न भएको छ।

तुलसीपुर उपमहानगरपालिका–१ मा अपाङ्गता भएका व्यक्तिहरुको सशक्तिकरण तथा अधिकार प्रवर्द्धनका लागि एक दिने अभिमुखीकरण कार्यक्रम सम्पन्न भएको हो ।

आर्थिक वर्ष २०८१/०८२ को लक्षित कार्यक्रम अन्तर्गत अपाङ्गता भएका व्यक्तिहरुको क्षमता विकासमा योगदान पुगोस् भन्ने उद्देश्यका साथ कार्यक्रम सञ्चालन गरिएको हो।

अपाङ्ग सेवा संघ दाङको आयोजनामा र मनकामना अपाङ्गता समावेशी स्वावलम्बन समूह, तुलसीपुर–१ को सहआयोजनामा तथा वडा नं.१ को आर्थिक सहयोगमा कार्यक्रम सम्पन्न भएको हो।

मनकामना अपाङ्गता समावेशी स्वावलम्बन समूहका अध्यक्ष जमलाल आचार्यको अध्यक्षता तथा तुलसीपुर उपमहानगरपालिका वडा नम्बर १ का वडा अध्यक्ष ओमकान्त सापकोटाको प्रमुख आतिथ्यतामा कार्यक्रम भएको थियो।

कार्यक्रममा प्रमुख अतिथि समेत रहेका वडा अध्यक्ष सापकोटाले अपाङ्गता भएका व्यक्तिको सशक्तिकरण आजको मुख्य आवश्यकता भएको उल्लेख गरे। अभिमुखीकरण कार्यक्रमले उनीहरूलाई सशक्त र सचेत बनाउन मद्दत पुग्ने विश्वास व्यक्त गरे।

उनले आगामी वर्षको बजेट तथा योजनामा पनि अपाङ्गता भएका व्यक्तिहरुको आयआर्जन र आत्मनिर्भरतालाई प्राथमिकतामा राखेर कार्यक्रम सञ्चालन गरिने प्रतिबद्धता जनाए।

कार्यक्रमका प्रशिक्षक अपाङ्ग सेवा संघ दाङका अध्यक्ष तथा समावेशी जीविकोपार्जन परियोजनाका वरिष्ठ सहजकर्ता देवा डाँगीले अपाङ्गता भएका व्यक्तिका सवाललाई राज्य र स्थानीय सरकारको एजेन्डामा गम्भीरतापूर्वक राख्नुपर्नेमा जोड दिइन्।

वडाले बनाउने योजनामा अपाङ्गता भएका व्यक्तिहरुको अर्थपूर्ण सहभागिता अनिवार्य हुनुपर्ने बताउँदै उनले अभिमुखीकरणका लागि बजेट विनियोजन गरेकोमा वडालाई धन्यवाद दिएकी थिइन। यसैगरी प्रशिक्षकको रूपमा बसन्ती ओली पनि रहेकी थिइन्।

समूहकी उपाध्यक्ष भूमिका पाण्डेको स्वागत मन्तव्यबाट सुरु भएको कार्यक्रममा वडा नम्बर १ – वडा सदस्य मेघराज सेन, शालिकराम खराल, गौरी नेपाली, ओबी वली केसीलगायतले मन्तव्य व्यक्त गरेका थिए।

कार्यक्रमको सहजीकरण समूहकी कोषाध्यक्ष रमिता वलीले गरेकी थिइन्।कार्यक्रममा ४६ जना अपाङ्गता भएका व्यक्तिहरुको सहभागिता रहेको आयोजकले जनाएको छ।

दाङ,१३ असार । दाङको तुलसीपुरमा वन पैदावारमा आधारित साना उद्यमीका लागि अभिमुखीकरण कार्यक्रम गरिएको छ । वन पैदावार मार्फत स्थानीय स्तरमै आर्थिक सशक्तिकरण गर्नका लागि उक्त दुई दिने अभिमुखीकरण कार्यक्रम गरिएको हो ।
तुलसीपुर उपमहानगरपालिकाको वन वातावरण तथा हरियाली प्रवद्र्धन शाखाको आयोजनामा भएको कार्यक्रममा सामुदायिक वन उपभोक्ता समूहका पदाधिकारी, स्थानीय उद्यमी, तथा सरोकारवालाहरूको सहभागिता रहेको थियो।

कार्यक्रममा सहभागीहरूले काँस, थाकल, माटो लगायतका गैर काष्ठ वनपैदावारको उपयोगमार्फत ग्रामीण समुदायमा स्वरोजगार र आम्दानीको सम्भावना बढेको उल्लेख गरेका थिए।

कार्यक्रममा अनुभव बाँड्दै पावर्ती चौधरी, गोपाल कुमाल र नमा केसीले आफूले वन पैदावारको उपयोग गरेर स्थानीय स्तरमै उद्यम सञ्चालन गरेको र त्यसबाट नियमित आम्दानी गर्न सफल भएको जानकारी दिए।

पावर्ती चौधरीले काँसबाट ढकिया, पेन होल्डर जस्ता सामग्री बनाएर बेच्ने गरेकी छन् भने गोपाल कुमाल माटोका गमला, मूर्ति, पाला बनाउन सिकाउने र सामग्री बेच्ने काम पनि गर्दछन् ।
सहभागीहरुको घरवरपर भएका वन पैदावारलाई आम्दानीको श्रोत बनाएको बताएका थिए ।

कार्यक्रमका प्रशिक्षक समेत रहेका तुलसीपुरका पूर्व नगरप्रमुख तथा सामुदायिक वन महासंघका पूर्व अध्यक्ष घनश्याम पाण्डेले सामुदायिक वनलाई केवल स्रोतको रूपमा नभई आर्थिक विकासको इन्जिन को रूपमा प्रयोग गर्नुपर्ने आवश्यकता औंल्याए।

लुम्बिनी प्रदेश सामुदायिक वन महासंघका महासचिव शोभाकर सापकोटाले वन अधिकारको प्रयोग र कृषि वन उद्यमबीचको सम्बन्धलाई अझ मजबुत बनाउन स्थानीय साना उद्यमहरू स्थापना गर्नुपर्ने बताए।
ग्रीन फाउन्डेसन दाङका अध्यक्ष विष्णु बहादुर केसीले वनले वातावरणीय सन्तुलन मात्र नभई ग्रामीण रोजगारी सिर्जना र सशक्तिकरणमा पनि टेवा पु¥याउने धारणा व्यक्त गरे।
कार्यक्रमको सहजीकरण वन वातावरण तथा हरियाली प्रवद्र्धन शाखाका प्रमुख रमा खड्काले गरेकी थिइन् भने समापन सत्रको अध्यक्षता तुलसीपुर उपमहानगरपालिकाकी वन वातावरण तथा विपद् शाखाकी सदस्य यमुना परियारले गरेकी थिइन्।

समापनमा सहभागीहरूले वन पैदावारमा आधारित साना उद्यमलाई प्रवद्र्धन गर्न तालिम, लगानी, बजार पहुँच र नीति समन्वय आवश्यक रहेको सुझाव दिएका थिए।

दाङ, १३ असार। दाङमा आजदेखि सुनचाँदीका पसलहरू अनिश्चितकालका लागि बन्द भएका छन्।

सरकारले आगामी आर्थिक वर्ष २०८२/८३ को बजेटमार्फत सुन तथा बहुधातुमा २ प्रतिशत विलासिता कर र हिरामा १३ प्रतिशत मूल्य अभिवृद्धि कर (भ्याट) लगाएको विरोधमा व्यवसायीहरूले शुक्रबारदेखि आन्दोलनलाई थप कडा बनाउँदै पसल बन्द गरेका हुन्।

नेपाल सुनचाँदी व्यवसायी महासंघ र नेपाल सुनचाँदी रत्न तथा आभूषण महासंघको संयुक्त आह्वानमा देशभरका सुनचाँदी पसलहरू एकैसाथ बन्द भएका छन्। सोही अनुसार तुलसीपुरमा पनि बिहानैदेखि सबै पसलका शटर बन्द भएका छन्।

तुलसीपुर दाङ सुनचाँदी व्यवसाय संघका अध्यक्ष हरिकृष्ण विकका अनुसार अहिले व्यवसायीहरू पसल बन्द गरेर बैठकमा बसेर विरोध कार्यक्रमको तयारी गर्दै छन्।

“हामी पसल बन्द गरेर छलफलमा छौं,” उनले भने, “अव्यवहारिक कर फिर्ता लिन पटक–पटक सरकारलाई ध्यानाकर्षण गरायौं तर सुनुवाइ भएन। अब अझै सशक्त र व्यवस्थित दबाबमूलक कार्यक्रम अघि बढाउँछौं।”

व्यवसायीहरूले करका कारण ग्राहक र व्यवसाय दुवै प्रभावित हुने भन्दै चाँडै करका व्यवस्था संशोधन गर्न सरकारलाई चेतावनी दिएका छन्।