काठमाडौँ,२ फागुन। प्रतिनिधिसभा सदस्य चुनावका लागि मतपत्र छपाइको काम अन्तिम चरणमा पुगेको छ। निर्वाचन आयोगका अनुसार अब काठमाडौँ उपत्यकासहित आसपासका जिल्लाका निर्वाचन क्षेत्रको मतपत्र छपाइको काम मात्रै बाँकी रहेको छ।

भक्तपुरस्थित जनक शिक्षा सामग्री केन्द्रमा नियमित रूपमा मतपत्र छपाइ भइरहेको छ। आयोगका अनुसार हालसम्म ६३ जिल्लाका १ सय ३३ निर्वाचन क्षेत्रका लागि मतपत्र छपाइ सम्पन्न भइसकेको छ।

आयोगका सहायक प्रवक्ता प्रकाश न्यौपानेका अनुसार एक करोड ७१ लाख ६३ हजार मतपत्र छपाइ सकिएको छ। छापिएका जिल्लाका मतपत्र प्याकिङसमेत भइसकेको छ। हालसम्म १५ हजार ३ सय ७१ बाकस मतपत्र प्याकिङ सम्पन्न भएको जानकारी दिइएको छ।

दैनिक एक हजार बाकस मतपत्र प्याकिङ हुँदै आएको छ भने ११ देखि १५ लाखसम्म मतपत्र छपाइ भइरहेको आयोगले जनाएको छ। प्रत्यक्षतर्फ कुल दुई करोड तीन लाख २३ हजार मतपत्र छाप्नुपर्ने आयोगको तयारी रहेको छ।

काठमाडौँ,२ फागुन। हाल देशमा पश्चिमी वायुको सामान्य प्रभाव रहेको मौसमविद्हरूले बताएका छन्। जल तथा मौसम पूर्वानुमान महाशाखाका अनुसार अहिले देशभर आंशिक बदली रहेको छ।

आज बिहान तराईका केही स्थानमा हुस्सु तथा कुहिरो लागेको छ। ती क्षेत्रमा दिउँसोसम्म हुस्सुरकुहिरो कायमै रहने अनुमान गरिएको छ, जसका कारण दैनिक जनजीवन र यातायात प्रभावित हुन सक्ने महाशाखाले जनाएको छ।

कोशी, बागमती, गण्डकी र कर्णाली प्रदेशका उच्च पहाडी तथा हिमाली क्षेत्रमा सामान्य बदली रहनेछ भने बाँकी पहाडी तथा हिमाली क्षेत्रमा आंशिक बदली रहने पूर्वानुमान छ। कोशी, बागमती र गण्डकी प्रदेशका उच्च पहाडी तथा हिमाली भेगका एक–दुई स्थानमा हल्का वर्षा तथा हिमपातको सम्भावना रहेको छ।

काठमाडौँ,२ फागुन। मिनी ट्रक दुर्घटना हुँदा चार जनाको ज्यान गएको छ।ललितपुरको महाङ्काल र कोन्ज्योसोम गाउँपालिकाको सिमाना चौघरे बाउनडाँडामा उक्त दुर्घटना भएको हो ।

लेलेबाट कालेश्वर मन्दिरमा त्रिशूल चढाउन जाँदै गरेको बागमती प्रदेश–०१–००४ क ६२२८ नम्बरको मिनी ट्रक गएराति करिब ९ बजे दुर्घटनामा परेको हो।

दुर्घटनामा ट्रक चालक गोदावरी नगरपालिका–६ का ५२ वर्षीय गणेश खड्का र सोही स्थानका गाडीधनी ४२ वर्षीय गणेश थापाको घटनास्थलमै मृत्यु भएको प्रहरीले जनाएको छ।

त्यस्तै, घाइते भएका अन्य दुई पुरुषको उपचारका क्रममा पाटन अस्पतालमा ज्यान गएको छ। अस्पतालमा मृत्यु हुने दुवै जनाको परिचय खुल्न बाँकी रहेको छ।

घटनाबारे थप अनुसन्धान भइरहेको जिल्ला प्रहरी परिसर ललितपुरले जनाएको छ।

काठमाडौँ,२ फागुन । विभिन्न निर्माण कम्पनी सरकारको कालोसूचीम परेका छन् । प्रधानमन्त्री तथा मन्त्रिपरिषद्को कार्यालय मातहत रहेको सार्वजनिक खरिद अनुगमन कार्यालयले २० वटा निर्माण कम्पनीलाई कालोसूचीमा राखेको छ। कार्यालयले शनिवार सूचना जारी गर्दै विभिन्न सरकारी निकायको सिफारिसका आधारमा ती कम्पनीलाई कालोसूचीमा समावेश गरिएको जनाएको हो।

कार्यालयका अनुसार जिम्मा लिएको निर्माण कार्य समयमै सम्पन्न नगरेको पाइएपछि सार्वजनिक खरिद ऐन, २०६३ को दफा ६३ को उपदफा ९९० बमोजिम कारबाही गरिएको हो।

कालोसूचीमा परेका कम्पनीहरू एक वर्षसम्म कुनै पनि सार्वजनिक खरिद प्रक्रियामा सहभागी हुन नपाउने कार्यालयले स्पष्ट पारेको छ।

सूची यस्तो छः

✍️ बिवेक देवकोटा। प्रेम मानव जीवनको सबैभन्दा कोमल, सबैभन्दा गहिरो र सबैभन्दा आवश्यक अनुभूति हो। प्रेम बिना सम्बन्धहरू केवल औपचारिकता बन्न सक्छन्, जीवन केवल दैनिकी। यही प्रेम, आत्मीयता र मानवीय सम्बन्धको मूल्य सम्झाउने दिनका रूपमा प्रत्येक वर्ष फेब्रुअरी १४ मा संसारभर भ्यालेन्टाइन दिवस मनाइन्छ। आज यो दिवसलाई धेरैले गुलाब, कार्ड, चकलेट र उपहारसँग जोडेर हेर्ने गरेका छन्, तर यसको सार केवल यति होइन। यो दिनले मानिसलाई आफ्ना सम्बन्धहरू सम्झन, भावनाहरू व्यक्त गर्न र आत्मीयताको महत्व बुझ्न प्रेरित गर्छ।

भ्यालेन्टाइन दिवसको इतिहासबारे कुरा गर्दा एउटा सत्य स्वीकार गर्न आवश्यक छ—यस दिवससँग जोडिएका धेरै लोकप्रिय कथाहरू ऐतिहासिक रूपमा पूर्ण रूपमा प्रमाणित छैनन्। इतिहासकारहरूका अनुसार तेस्रो शताब्दीको रोमन साम्राज्यमा “Valentinus” नाम भएका केही ख्रीष्टियन धर्मगुरु तथा शहीदहरू थिए, जसलाई धार्मिक कारणले मृत्युदण्ड दिइएको मानिन्छ।

तर आज प्रचलित “गोप्य विवाह गराइदिने” वा “जेलबाट प्रेमपत्र लेख्ने” जस्ता कथाहरू पछि विकसित भएका किंवदन्ती हुन्। वास्तवमा भ्यालेन्टाइन दिवसलाई प्रेमसँग जोडेर व्यापक रूपमा मनाउने परम्परा मध्ययुगीन युरोपमा विस्तार भएको पाइन्छ। विशेषगरी कवि Geoffrey Chaucer ले प्रेम र वसन्तसँग जोडेर लेखेपछि यस दिवसको सांस्कृतिक लोकप्रियता बढ्दै गएको मानिन्छ। यसर्थ, भ्यालेन्टाइन दिवसको ऐतिहासिक आधारभन्दा पनि यसको आजको सामाजिक अर्थ बढी महत्वपूर्ण बनेको छ—प्रेमलाई सम्झने, सम्बन्धलाई सम्मान गर्ने र आत्मीयता बाँड्ने अवसर।

नेपालमा भ्यालेन्टाइन दिवस पछिल्ला वर्षहरूमा निकै चर्चित हुँदै गएको छ। विशेषगरी युवा पुस्तामा यसलाई “प्रेम दिवस” का रूपमा उत्साहका साथ मनाउने चलन बढेको छ।

फेब्रुअरी महिनाको सुरुआतदेखि नै सामाजिक सञ्जालमा Rose Day, Promise Day, Teddy Day जस्ता दिनहरू चर्चामा आउँछन्। फेसबुक, इन्स्टाग्राम र टिकटकमा प्रेमका सन्देशहरू, तस्वीरहरू र शुभकामनाहरू साझा गरिन्छन्। बजार क्षेत्रमा गुलाबको माग बढ्छ, कार्ड र उपहारको व्यापार बढ्छ र युवाहरूले यो दिनलाई विशेष रूपमा मनाउन खोज्छन्।

यो परिवर्तन आफैंमा नकारात्मक होइन। भावना व्यक्त गर्नु, सम्बन्धलाई समय दिनु र आत्मीयता बाँड्नु सकारात्मक कुरा हो। तर समस्या तब सुरु हुन्छ, जब प्रेमलाई केवल देखावटी बनाइन्छ, उपभोगवादसँग जोडिन्छ, वा प्रेमको अर्थ केवल प्रेमी–प्रेमिकामा सीमित गरिन्छ।

प्रेम कुनै विदेशी संस्कार होइन। प्रेम त जीवनको आधार हो। नेपाली समाजमा प्रेमका अनेक रूप छन्—आमाले सन्तानका लागि गर्ने त्याग, बाबुले मौन रूपमा बोक्ने जिम्मेवारी, गुरुको निःस्वार्थ मार्गदर्शन, साथीको कठिन समयमा दिने साथ र समाजप्रतिको करुणा। यी सबै प्रेमकै रूप हुन्। त्यसैले भ्यालेन्टाइन दिवसलाई केवल रोमान्टिक सम्बन्धको पर्व भनेर बुझ्नु प्रेमप्रतिको संकुचित दृष्टि हो।

साँचो प्रेम त्यही हो जसले सम्बन्धलाई बलियो बनाउँछ, मनलाई शान्त बनाउँछ र जीवनलाई अर्थ दिन्छ। प्रेम महँगो उपहारमा होइन, समय र सम्मानमा हुन्छ। प्रेम प्रदर्शनमा होइन, व्यवहारमा हुन्छ। प्रेम शब्दमा होइन, जिम्मेवारीमा हुन्छ।

भ्यालेन्टाइन दिवसलाई सकारात्मक रूपमा मनाउने हो भने यो दिनले हाम्रो समाजमा आत्मीयता र सद्भाव बढाउन सक्छ। यो दिनलाई अभिभावकप्रति कृतज्ञता व्यक्त गर्ने अवसर बनाऔँ। आफ्नो साथीलाई धन्यवाद भन्न सकिने दिन बनाऔँ। जीवनमा साथ दिने शिक्षक, सहकर्मी र शुभेच्छुकलाई सम्झने दिन बनाऔँ। प्रेम केवल “I love you” भन्नु होइन; प्रेम त “म तिमीलाई बुझ्छु”, “म तिमीलाई सम्मान गर्छु”, “म तिमीको साथमा छु” भन्ने अनुभूति हो।

आजको समाजमा मानिसहरू व्यस्त छन्, सम्बन्धहरू टाढिँदै छन्, संवाद घट्दै गएको छ। यस्तो समयमा प्रेम र आत्मीयताको सन्देश झनै आवश्यक छ। भ्यालेन्टाइन दिवसले यही अवसर दिन्छ—आफ्ना प्रियजनसँग नजिक हुने, सम्बन्धमा नयाँ ऊर्जा भर्ने र जीवनलाई अझ मानवीय बनाउने।

अन्ततः भ्यालेन्टाइन दिवस केवल एक दिनको उत्सव होइन। यो प्रेमलाई सम्झने एउटा बहाना हो, आत्मीयता बाँड्ने एउटा अवसर हो र सम्बन्धलाई सम्मान गर्ने सन्देश हो। यदि हामीले यसलाई देखावटी उपहार र सतही प्रदर्शनभन्दा माथि उठाएर प्रेम, करुणा, सम्मान र सद्भावको संस्कारसँग जोड्न सक्यौँ भने यो दिवस हाम्रो समाजका लागि साँच्चिकै सकारात्मक बन्न सक्छ।

प्रेम दिवस होइन—प्रेम संस्कार बनोस्।
प्रेम केवल उत्सव होइन—जीवनको आधार बनोस्।
यही नै भ्यालेन्टाइन दिवसको सबैभन्दा सुन्दर सार हो।

काठमाडौँ,१ फागुन । फागुन २१ गते हुने प्रतिनिधिसभा सदस्य निर्वाचनका लागि मतपत्र छपाइ कार्य अन्तिम चरणमा पुगेको छ। मतपत्र छपाइको जिम्मा पाएको जनक शिक्षा सामग्री केन्द्र लिमिटेडले काम तीव्र गतिमा अघि बढाएको जनाएको छ।

केन्द्रका प्रबन्ध निर्देशक यदुनाथ पौडेलका अनुसार दैनिक १२ देखि १५ लाखसम्म मतपत्र छापिँदै आएको छ। कुल २ करोड ३ लाख मतपत्र छपाइ गर्नुपर्नेमा हालसम्म १ करोड ७३ लाख मतपत्र छपाइ सम्पन्न भइसकेको छ। बाँकी ३० लाख मतपत्र आइतबारसम्म छपाइ सकिने उनले जानकारी दिए।

उनका अनुसार छपाइ सम्पन्न भएका जिल्लाका मतपत्रहरू नेपाली सेनामार्फत ढुवानी सुरु गरिएको छ। हालसम्म ५८ जिल्लाअन्तर्गत १ सय २४ निर्वाचन क्षेत्रको मतपत्र छपाइ सम्पन्न भई सम्बन्धित जिल्लातर्फ पठाउने कार्य जारी रहेको छ।

काठमाडौं,१ फागुन । जनता समाजवादी पार्टी नेपालका अध्यक्ष उपेन्द्र यादवले मुलुकमा विद्यमान राजनीतिक समस्याको समाधानका लागि संविधान संशोधन अपरिहार्य रहेको बताएका छन्।

शुक्रबार पार्टीको चुनावी घोषणापत्र सार्वजनिक गर्ने कार्यक्रममा बोल्दै उनले वर्तमान संविधान पुनरावलोकन नगरेसम्म संघीयता सुदृढ हुन नसक्ने दाबी गरे। प्रदेश र स्थानीय तहका अधिकार संकुचित गरिएकाले संघीय संरचना कमजोर बनेको उनको भनाइ थियो।

अध्यक्ष यादवका अनुसार संघीयताको मर्मअनुसार प्रदेश र स्थानीय तहका अधिकारको सूची अधुरो, अपुरो र कतिपय अवस्थामा विरोधाभासपूर्ण छ। प्रदेशहरूको पुनर्संरचना आफ्नो पार्टीको मुख्य एजेन्डा रहेको उल्लेख गर्दै उनले सबै क्षेत्रमा समावेशी सहभागिता अझै सुनिश्चित हुन नसकेको बताए।

राज्यका निकायहरूमा आंशिक समावेशिता देखिए पनि जनसंख्याको आधारमा प्रतिनिधित्व हुन नसकेको उनको तर्क छ। उनले नेपालको संसदीय प्रणाली असफल भइसकेको जिकिर गर्दै वर्तमान निर्वाचन प्रणाली अत्यधिक खर्चिलो भएको टिप्पणी गरे।

“संविधान संशोधनको आवश्यकता हामी संविधान बनेदेखि नै उठाउँदै आएका छौँ। वर्तमान राजनीतिक समस्याहरूको समाधानका लागि संविधान पुनरावलोकन आवश्यक छ,” अध्यक्ष यादवले भने।

उनले संघीय शासन प्रणाली लागू भए पनि न्याय प्रणाली अझै केन्द्रीकृत ढाँचामै सीमित रहेको बताए। त्यसका कारण प्रदेश र स्थानीय तह अधिकारविहीन बनेको उल्लेख गर्दै यी समस्याको समाधानका लागि संविधान संशोधन जरुरी रहेको उनको भनाइ थियो।

काठमाडौं,१ फागुन । जनता समाजवादी पार्टी नेपालले फागुन २१ गते हुने निर्वाचनका लागि चुनावी घोषणापत्र सार्वजनिक गरेको छ। शुक्रबार काठमाडौंको अनामनगरमा पत्रकार सम्मेलन गर्दै पार्टीले घोषणापत्र सार्वजनिक गरेको हो।

घोषणापत्रमा शासकीय स्वरूपमा परिवर्तन आवश्यक रहेको उल्लेख गर्दै राष्ट्रिय पहिचानका आधारमा संघीयता सुदृढ गर्ने र प्रादेशिक संरचना निर्माणलाई स्पष्ट रूप दिनुपर्ने प्रस्ताव गरिएको छ।

न्याय प्रणालीलाई संघीय संरचनाअनुसार पुनर्संरचना गर्नुपर्ने, संवैधानिक निकायहरूलाई थप सशक्त बनाउनुपर्ने तथा जनलोकपालजस्ता निकाय गठन गर्नुपर्ने आवश्यकता औंल्याइएको छ।

पार्टीले शासन प्रणाली सुधार, संस्थागत सुदृढीकरण र पारदर्शितामार्फत लोकतान्त्रिक अभ्यासलाई प्रभावकारी बनाउने प्रतिबद्धता जनाएको छ।

दैलेख,१ फागुन । दैलेखमा १६ वर्षीय किशोरको हत्या भएको छ। दैलेखको दुल्लू नगरपालिका–४ शान्तिबजारका प्रकाश खनालको चक्कु प्रहारबाट मृत्यु भएको हो ।

प्रहरीका अनुसार फुटबल खेलेर घर फर्किँदै गरेका खनाललाई पछाडिबाट पेटमा चक्कु प्रहार गरिएको थियो। गम्भीर घाइते भएका उनलाई उपचारका लागि दुल्लू अस्पताल लगिएकोमा उपचारकै क्रममा मृत्यु भएको हो।

एउटै किशोरीलाई मन पराउने विषयमा भएको विवादका कारण घटना भएको प्रारम्भिक अनुसन्धानबाट खुलेको प्रहरीले जनाएको छ। घटनामा संलग्न रहेको आरोपमा १९ वर्षीय मुकुन्द शाही र विभूषण शाहीलाई चामुण्डाको जंगल क्षेत्रबाट पक्राउ गरिएको छ।

जिल्ला प्रहरी कार्यालय दैलेखका डीएसपी गणेशबहादुर बरालले घटनाबारे थप अनुसन्धान भइरहेको जानकारी दिएका छन्।

काठमाडौं,१ फागुन । सुनको मूल्य शुक्रबार तोलामा ३ हजार रुपैयाँले घटेको छ।

नेपाल सुनचाँदी व्यवसायी महासङ्घका अनुसार बिहीबार १ सय रुपैयाँले मात्रै घटेको सुनको भाउ शुक्रबार भने उल्लेख्य रूपमा घटेर प्रति तोला ३ लाख ३ हजार ५ सय रुपैयाँमा कारोबार भइरहेको छ। बिहीबार सुनको मूल्य तोलाको ३ लाख ६ हजार ५ सय रुपैयाँ रहेको थियो।

यसैगरी चाँदीको मूल्य पनि घटेको छ। चाँदी तोलामा ३ सय ४० रुपैयाँले घटेर ५ हजार रुपैयाँमा कारोबार भइरहेको महासङ्घले जनाएको छ। बिहीबार चाँदीको मूल्य तोलाको ५ हजार ३ सय ४० रुपैयाँ थियो।