दाङ २७ जेठ । दाङको तुलसीपुर स्थित नयाँ बसपार्क परिसरमा एक पुरुष मृत फेला परेका छन्। तुलसीपुर उपमहानगरपालिका–५ स्थित बसपार्कको प्रतिक्षालयमा मृत अवस्थामा फेला परेको इलाका प्रहरी कार्यालय तुलसीपुरले जनाएको छ।

प्रहरीका अनुसार जेठ २४ गते बिहान बसपार्कको बस काउन्टरको दक्षिणतर्फ रहेको प्रतिक्षालयमा अन्दाजी ४२ वर्षीय पुरुषको शव फेला परेको हो। तर हालसम्म पनि उनको पहिचान हुन नसकेको प्रहरीले बताएको छ।

स्थानीयले दिएको जानकारीपछि इलाका प्रहरी पोष्ट बसपार्क, तुलसीपुरबाट प्रहरी नायब निरीक्षक उज्वल शाहको कमाण्डमा तीन जनाको प्रहरी टोली घटनास्थलमा पुगेको थियो।

प्रारम्भिक अनुसन्धान अनुसार मृतक व्यक्ति मागेरै जीविकोपार्जन गर्ने भएको र उनको नाम, थर तथा स्थायी ठेगाना नखुलेको प्रहरीले जनाएको छ। प्रहरीका अनुसार मृतकको पहिचान खुल्न नसकेकोले आवश्यक अनुसन्धान भइरहेको छ।

काठमाडौँ, २७ जेठ। राज्य व्यवस्था तथा सुशासन समितिले अब आमाको नामबाट पनि नागरिकता प्रदान गर्न सकिने व्यवस्था गरिएको नागरिकता विधेयक पारित गरेको छ। समितिको मंगलबार बसेको बैठकले नेपाल नागरिकता ऐन, २०६३ संशोधन गर्न बनेको विधेयक अनुमोदन गरेको हो।

समितिका सभापति रामहरि खतिवडाका अनुसार, नयाँ विधेयकमा अब नागरिकता आमा वा बाबु जुनसुकै अभिभावकको नामबाट पनि प्राप्त गर्न सकिने व्यवस्था गरिएको छ। यसअघि नागरिकता लिनका लागि बाबु र आमाको नाम अनिवार्य रूपमा प्रस्तुत गर्नुपर्ने प्रावधान थियो, जसका कारण धेरै नेपाली नागरिकताविहीन बन्न बाध्य थिए।

विधेयकले आमाको नामबाट नागरिकता लिँदा सम्बन्धित व्यक्तिले स्वघोषणा गर्नुपर्ने व्यवस्था गरेको छ। तर, उक्त स्वघोषणा गलत ठहरिएमा एक वर्षसम्म कैद र जरिवानाको सजायको व्यवस्था पनि विधेयकमा उल्लेख गरिएको छ।

सरकारले नागरिकता नपाएका हजारौं नेपालीलाई कानुनी रुपमा मान्यता दिने उद्देश्यले यो विधेयक अघि बढाएको हो। विधेयक पारित भएपछि नागरिकता वितरणको प्रक्रिया थप सरल र समावेशी हुने अपेक्षा गरिएको छ।

यसैगरी, नागरिकता वितरण प्रक्रियामा सुधार ल्याउँदै, अबदेखि नायब सुब्बा तहका नागरिकता कार्यालय प्रमुखले पनि नागरिकता दिन सक्ने व्यवस्था विधेयकमा समावेश गरिएको छ। राज्य व्यवस्था तथा सुशासन समितिका सचिव सुरज दुराका अनुसार, विधेयक ऐनका रूपमा कार्यान्वयनमा आएपछि नायब सुब्बाले आधिकारिक रूपमा नागरिकता वितरण गर्न सक्नेछन्।

यो विधेयक संसदबाट पारित भएपछि कार्यान्वयनमा आउनेछ।

काठमाडौँ,२७ जेठ ।
नेपाल टेलिकमले रवीन्द्र मानन्धरलाई प्रवक्ता तोकेको छ ।

केन्द्रीय कार्यालयस्थित प्रमुख व्यावसायिक अधिकृतको कार्यालयमा कार्यरत उनलाई प्रवक्ताको जिम्मेवारी तोकिएको हो ।

काठमाडौँ,२७ जेठ । काठमाडौंको टोखामा गोली चलेको छ ।

टोखाको ग्राण्डी अस्पताल नजिकै गोली हानेर प्रहरीले दुई जना लागुऔषध कारोबारीलाई नियन्त्रणमा लिएको छ । गोली चल्दा दुई जना प्रहरी पनि घाइते भएका छन् ।

प्रहरी इन्स्पेक्टर राकेश यादवको टोलीले गोली चलाएर दुई जनालाई नियन्त्रणमा लिएको हो ।

उनीहरूको साथबाट १ सय ५० ग्रामभन्दा बढी ब्राउन सुगर पनि बरामद गरेको छ ।

नेपाल प्रहरीका एसएसपी कृष्ण कोइरालाका अनुसार घाइते हुने प्रहरीमा रवीन्द्र केसी र नवराज घिसिङ रहेका छन् ।

काठमाडौं,२६ जेठ । आइसीसी क्रिकेट विश्वकप लिग २ अन्तर्गत नेदरल्यान्ड्ससँगको खेलमार्फत नन्दन यादवले एकदिवसीय अन्तर्राष्ट्रियमा डेब्यु गरेका छन्।

खेलअघि सोमपाल कामी घाइते हुँदा नन्दनले टिममा अवसर पाएका हुन्। उनले हङकङसँगको चारदेशीय सिरिजमा नेपालको लागि टी२० अन्तर्राष्ट्रियमा डेब्यु गरेका थिए।

जाजरकोट,२७ जेठ । भेरी नदीमा बगरे बेपत्ता भएका तीनैजना बालालिकाको शव फेला परेको छ । जाजरकोटको नलगाड नगरपालिका–८ मन्मैमा भेरी नदीमा पौडी खेल्ने क्रममा उनीहरू शुक्रबार बेपत्ता भएका थिए ।

शुक्रबार दिउँसो नदीमा नुहाउन गएका उनीहरू बेपत्ता भएका थिए। प्रहरीका अनुसार उनीहरूको शव विभिन्न समयमा फेला परेको हो। प्रहरीका अनुसार १२ वर्षीया आशा कुसारीको शव सोमबार साँझ ६ बजेतिर घटनास्थलदेखि करिब ४ किलोमिटर दक्षिण चापाखोला नजिक फेला परेको थियो ।

यसअघि नै १६ वर्षीया भगवती नेपाली र १० वर्षीय महेश कुसारीको शव फेला परिसकेको जिल्ला प्रहरी कार्यालय जाजरकोटका प्रमुख डिएसपी वसन्तकुमार शर्माले जानकारी दिए। भगवती नेपाली टेकबहादुर नेपालीकी छोरी हुन् भने महेश र आशा सुरेन्द्र कुसारीका सन्तान हुन् ।

तीनै जना शुक्रबार दिउँसो विद्यालयबाट फर्किएपछि भेरी नदीमा नुहाउन गएका थिए। उनीहरू नियमित रूपमा नदीमा पौडी खेल्ने गर्दथे । सोही दिन पनि उनीहरू पौडी खेल्नेक्रममा बेपत्ता भएका थिए ।

डिएसपी शर्माका अनुसार, सुरूमा महेश बगेपछि उनलाई बचाउन आशा र भगवती पनि नदीमा पसेका थिए। अन्ततः तीनै जना बगेर बेपत्ता भए।

उनीहरू बेपत्ता भएलगत्तै रूकुम पश्चिमको इलाका प्रहरी कार्यालय आठबिसकोटबाट प्रहरी निरीक्षक गणेश खनालको नेतृत्वमा ९ जनाको प्रहरी टोली उद्धारका लागि खटिएको थियो। भगवतीलाई अचेत अवस्थामा उद्धार गरी आठबिस नगर अस्पताल र्पुयाइएको थियो तर चिकित्सकले उनलाई मृत घोषणा गरेका थिए । महेशको शव घटनास्थलभन्दा करिब ९ सय मिटर तल शुक्रबार साँझ ४ बजे फेला परेको थियो।

दाङ,२७ जेठ । दाङको तुलसीपुर उपमहानगरपालिकालाई ‘पूर्ण खोप सुनिश्चितता दिगोपना पालिका’ पालिका घोषाणा गरिएको छ । तुलसीपुर उपमहानगरपालिका नगर कार्यपालिका, , नगरस्तरीय खोप समन्वय समिति तथा जनस्वास्थ्य प्रवद्र्धन शाखा तुलसीपुरको संयुक्त आयोजनामा मङ्गलबार एक कार्यक्रमका बीच पालिकालाई पूर्ण खोप सुनिश्चितता पालिका घोषणा गरिएको हो । नगरस्तरीय खोप समन्वय समितिका संयोजक टिकाराम खड्काको अध्यक्षता तथा जिल्ला समन्वय समितिका प्रमुख नित्यानन्द शर्माको प्रमुख आतिथ्यतामा उक्त घोषणा गरिएको हो ।

कार्यक्रममा बोल्दै प्रमुख अतिथि शर्माले खोप सुनिश्चितताको उद्देश्य कोही कसैलाई रोग नलागोस् भन्ने रहेको स्पष्ट पारे। रोग लागेपछि उपचार गर्नुभन्दा अगाडि नै जोगाउने उपायको रूपमा खोपलाई लिइनुपर्ने उल्लेख गर्दै उनले खोप र आधारभूत स्वास्थ्य सेवा सबै नागरिकको मौलिक अधिकार भएको बताए। बालबालिकाले खोप पाउनु अधिकार हो भने सेवा उपलब्ध गराउनु सम्बन्धित निकायको जिम्मेवारी भएको उनको भनाइ थियो।

उनले संघ र प्रदेश सरकारले ठूला योजना र पूर्वाधार निर्माण गर्ने भएकाले स्थानीय सरकारहरू सुत्केरी सेवा जस्ता आधारभूत र संस्थागत कार्यक्रमप्रति गम्भीर हुनुपर्ने धारणा राखे। मातृ मृत्युदर र शिशु मृत्युदर घटाउन स्थानीय पालिकाहरूको भूमिका निर्णायक हुने बताए । ‘मातृशिशु मृत्युदर घटाउन प्रदेश सरकारले प्ररणादायी परियोजना ल्याएको छ, यसमा रहेर स्थानीय सरकारले काम गर्नूपर्छ, उनले भने–‘ पूर्ण संस्थागत सुत्केरी सेवालाई ध्यान दिनुहोला, प्रभावकारी ढंगले कार्यान्वयन गर्नुहोला ।’

तुलसीपुर उपमहानगरपालिकाका नगरप्रमुख टिकाराम खड्काले स्वास्थ्य क्षेत्रमा राम्रो परिणाम देखाउन नसकिएसम्म समाजमा वास्तविक सुधार आउन नसक्ने बताए। तथ्यांक र विश्लेषणका आधारमा पालिकाले पूर्ण खोप सुनिश्चितता हासिल गरेको उल्लेख गर्दै उनले यो उपलब्धिलाई दीर्घकालीन रूपमा कायम राख्न सबै पक्ष एकजुट भएर लाग्नुपर्नेमा जोड दिए। उनले परिणाममुखी कामलाई प्राथमिकतामा राख्दै जनताको विश्वास जित्ने खालका सेवा प्रवाह गर्नुपर्ने बताए।

त्यसैगरी उपप्रमुख स्यानी चौधरीले जनताको सेवाभावलाई आत्मसाथ गरेर काम गर्नुपर्ने बताइन् । स्वास्थ्य क्षेत्र सेवा क्षेत्र भएकाले कुनैपनि पूर्वाग्रह नराख्न अनुरोध गरिन् । सबै आफ्नो ठाउँमा पदीय जिम्मेवार अनुसार प्रतिवद्ध भएर काम रे पालिकालाई सुन्दर र स्वस्थ बनाउन सकिने उनले बताइन् ।

जिल्ला जनस्वास्थ्य कार्यालय दाङका प्रमुख किशोर आचार्यले खोप कार्यक्रम सरकारको प्राथमिकतामा परेको र जनताले अत्यन्तै रुचाएको कार्यक्रम भएको उल्लेख गरे। उनले खोपमार्फत १३ प्रकारका प्राणघातक रोगहरूबाट बालबालिकालाई जोगाउन सकिने बताउँदै बार्है महिना निरन्तर सेवा दिइरहेको बताए ।

खोप कार्यक्रमलाई थप प्रभावकारी बनाउन घर–घरमा पुगेर अनुगमन गरिएकाले नै सबै बालबालिकाले खोप सेवा प्राप्त गर्न सफल भएको जानकारी दिए। तुलसीपुरमा ६४ भन्दा बढी खोप केन्द्रहरूबाट सेवा दिइँदै आएको उनले बताए। खोप मात्र हैन, अभिभावकलाई आवश्यक परामर्श सेवा दिनु पनि उत्तिकै जरुरी रहेको उनको भनाइ थियो।

घोषणा कार्यक्रममार्फत तुलसीपुर उपमहानगरपालिकामा १६ देखि २३ महिनासम्मका २८१९ बालबालिका, २४ देखि ५८ महिनासम्मका ६९८१ बालबालिका गरी जम्मा ९८०० बालबालिकाले पूर्ण खोप प्राप्त गरिसकेको जानकारी दिइएको थियो। खोप कार्ड लिएका बालबालिकाको संख्या ९७२२ रहेको जनस्वास्थ्य प्रवद्र्धन शाखाको तथ्यांकमा उल्लेख छ ।
जनस्वास्थ्य प्रवद्र्धन शाखाकी राधिका गौतमको स्वागत मन्तव्यबाट सुरु भएको कार्यक्रमको सहजीकरण जनस्वस्थ्य निरीक्षक एवम् खोप फोकल पर्सन बिमल केसीले गरेका थिए।

काठमाडौँ, २७ जेठ । शोक राई नेतृत्वको जनता समाजवादी पार्टी (जसपा) परित्याग गर्दै कर्णाली प्रदेश अध्यक्ष देबीकृष्ण न्यौपानेसहितका नेताहरू नेकपा माओवादी केन्द्रमा प्रवेश गरेका छन्।

खुमलटारस्थित पार्टी अध्यक्ष पुष्पकमल दाहाल ‘प्रचण्ड’को निवासमा आयोजित विशेष कार्यक्रममा माओवादी केन्द्रका अध्यक्ष प्रचण्डले नयाँ प्रवेशकर्ताहरूलाई पार्टीमा स्वागत गरे।

कार्यक्रममा अध्यक्ष प्रचण्डले माओवादी केन्द्र सुशासन, सामाजिक न्याय र समृद्धिको अभियानमा समर्पित रहेको बताउँदै समाजवादी क्रान्तिलाई नयाँ चरणमा लैजान विगतका गल्ती र कमजोरी सच्याउँदै जनतासँग पुनः जोडिने अभियान चलाइरहेको जानकारी दिए।

उनले यस प्रकारको पार्टी प्रवेश र समायोजनले अभियानमा थप ऊर्जा र उत्साह थप्ने विश्वास व्यक्त गरे। माओवादी केन्द्रप्रति आकर्षण बढ्दै गइरहेको उल्लेख गर्दै उनले पार्टीमा समायोजन हुनेहरूलाई उचित जिम्मेवारी दिइने प्रतिबद्धता जनाए।

बर्दिया, २६ जेठ । बर्दियामा बालिका बलात्कार गरेको आरोपमा एक वृद्ध पक्राउ परेका छन्। ११ वर्षीय बालिकामाथि जबरजस्ती करणी गरेको आरोपमा ६६ वर्षीय वृद्ध पक्राउ परेका हुन्।

बारबर्दिया नगरपालिका–१० बैदीस्थित बनखेतवा नालामा बाख्रा चराउन गएकी बालिकामाथि जबरजस्ती करणी गरिएको प्रहरीले जनाएको छ। पक्राउ पर्नेमा जमिन अहमद जागा रहेका छन्।

पीडित बालिकाकी आमाले दिएको जाहेरीका आधारमा चौधीकर्तनिया प्रहरी चौकीबाट खटिएको टोलीले जागालाई पक्राउ गरेको जिल्ला प्रहरी कार्यालय बर्दियाका डीएसपी चक्रबहादुर डमरपालले जानकारी दिए।

डीएसपी डमरपालका अनुसार आरोपीमाथि जिल्ला अदालतबाट पाँच दिनको म्याद थप गराई अनुसन्धान भइरहेको छ।

दाङ, २६ जेठ। स्थानीय तहको नीति तथा कार्यक्रमको छलफलमा सञ्चारकर्मीहरूको उपस्थिति अनिवार्य गराइनुपर्ने माग गरिएको छ। घोराही उपमहानगर पालिकाको १७औं नगरसभा अधिवेशनमा नगरसभा सदस्य लेखनाथ बुढाथोकीले नीति तथा कार्यक्रमको छलफलमा सञ्चारकर्मीको सहभागिता सुनिश्चित गर्न माग गरेका हुन् ।

आगामी आर्थिक वर्ष २०८२/८३ को नीति तथा कार्यक्रम प्रस्तुत गर्दै गर्दा बुढाथोकीले छलफलका चरणमा पनि सञ्चारकर्मीलाई समावेश गरिनुपर्ने धारणा राखे।

वडा नं. १५ का सदस्य समेत रहेका बुढाथोकीले भने, “अहिले जसरी सञ्चारकर्मीको सहभागिता छ, त्यस्तै छलफलको चरणमा पनि उनीहरूको उपस्थिति हुनु आवश्यक छ।”

उनले जनप्रतिनिधिले विकास निर्माणका विषयमा के बोल्छन् भन्ने जनताले जान्न पाउने अधिकारको रक्षा गर्न सञ्चारकर्मीलाई छलफलमा सहभागी गराउनुपर्ने तर्क राखे।

उनको मागमा प्रतिक्रिया दिँदै नगर प्रमुख नरुलाल चौधरीले व्यक्तिगत चाहनाले मात्र सम्भव नहुने र नगरको नीति, नियम तथा कानुनअनुसार प्रक्रिया अघि बढ्ने स्पष्ट पारे। तर, नगर प्रमुखको जवाफ चित्त बुझ्दो नभएको भन्दै बुढाथोकीले नीति तथा कार्यक्रम प्रस्तुत भइरहेका बेला उभिएर विरोध जनाएका थिए।