दाङ,१४ वैशाख । कपिलवस्तुमा मोटरसाइकलको ठक्करबाट बाबुछोराको मृत्युका भएको छ। कपिलवस्तु नगरपालिका–८ मैनीहवामा आइतबार राति लु ३१ प ७५०० नम्बरको मोटरसाइकलले ठक्कर दिँदा ३५ वर्षीय गिरजेश कुर्मी र उनका ३ वर्षीय छोरा आयांश कुर्मीको मृत्यु भएको हो।

गम्भीर घाइते भएका दुवै जनाको कपिलवस्तु अस्पतालमा उपचारका क्रममा मृत्यु भएको जिल्ला ट्राफिक कार्यालयका प्रहरी निरीक्षक राजन ढकालले जानकारी दिए।

दुर्घटनामा गम्भीर घाइते भएका २२ वर्षीय सोनु कोरीलाई थप उपचारका लागि भैरहवा पठाइएको छ।

काठमाडौ,१४ वैशाख । जंगली बँदेलको आक्रमणबाट एक पुरुषको मृत्यु भएको छ। सर्लाहीको लालबन्दी नगरपालिका–१५ पिडखोल्साका ३२ वर्षीय प्रेमबहादुर थिङ (दावा)को जंगली बँदेलको आक्रमणबाट मृत्यु भएको हो।

आक्रमणबाट गम्भीर घाइते भएका थिङलाई उपचारका लागि महेन्द्र राजमार्गस्थित लालबन्दीतर्फ लैजाँदै गर्दा बाटोमै मृत्यु भएको जिल्ला प्रहरी कार्यालय सर्लाहीका प्रवक्ता सरोज राईले जानकारी दिए।

प्रहरीले मध्यराति नै घटनास्थलको मुचुल्का तयार गरी शव परीक्षणका लागि प्रादेशिक अस्पताल मलंगवा पठाएको छ।

जंगली बँदेलले मकै बालीमा क्षति गरेपछि थिङ केही दिनदेखि खेतमै बसेर रेखदेख गर्दै आएका थिए।

दाङ,१४ वैशाख। निजामती क्षेत्रमा आवद्ध विभिन्न ट्रेड युनियनहरूले संघीय निजामती विधेयकमा ट्रेड युनियन अधिकार कटौती नगर्न सरकारसँग आग्रह गरेका छन्।
संयुक्त विज्ञप्ति जारी गर्दै उनीहरूले अन्तर्राष्ट्रिय श्रम संगठनका अभिसन्धि र नेपालको संविधानअनुसार सबै पेसाकर्मीलाई संगठित हुने र रोजेको संगठनमा आवद्ध हुने अधिकार सुनिश्चित गर्नुपर्ने बताएका छन्।

सार्वजनिक सेवामा कार्यरत कर्मचारीको हकहित संरक्षण, सहभागिता र सामूहिक सौदाबाजीको अधिकारलाई कानुनी रूपमा मजबुत बनाउन पनि उनीहरूको माग छ।

नेपाल निजामती कर्मचारी संगठन, नेपाल निजामती कर्मचारी युनियन लगायतका विभिन्न संगठनहरूले संयुक्त रूपमा यस्तो माग गरेका हुन्।

संघीय मामिला तथा सामान्य प्रशासन मन्त्रालयले वैशाख ११ गते सार्वजनिक गरेको संघीय निजामती सेवासम्बन्धी विधेयकको मस्यौदामा ट्रेड युनियन अधिकार कटौती गर्ने प्रयासप्रति गम्भीर ध्यानाकर्षण भएको उनीहरूले बताएका छन्।

संविधानले प्रत्येक नागरिकलाई संगठन खोल्ने र श्रमिकलाई ट्रेड युनियनमा आवद्ध भई सामूहिक सौदाबाजी गर्ने अधिकार सुनिश्चित गरेको स्मरण गराउँदै उक्त अधिकार कमजोर नबनाउन आग्रह गरिएको छ।

दाङ,१४ वैशाख । सुनचाँदीको मुल्य वृद्धि भएको छ । सोमबार बजारमा सुनको मुल्य प्रतितोला १३ सय रुपैयाँले बढेको हो।

नेपाल सुनचाँदी व्यवसायी महासंघका अनुसार छापावाल सुन प्रतितोला ३ लाख ५०० रुपैयाँमा कारोबार भइरहेको छ। आइतबार भने सुन २ लाख ९९ हजार २०० रुपैयाँमा कारोबार भएको थियो।

त्यस्तै चाँदीको मूल्य पनि वृद्धि भएको छ। आइतबार ४ हजार ९९५ रुपैयाँ रहेको चाँदी सोमबार ५० रुपैयाँ बढेर ५ हजार ४५ रुपैयाँ पुगेको महासंघले जनाएको छ।

दाङ,१४ वैशाख । प्यूठानमा चट्याङ लागेर बाबुछोराको मृत्यु भएको छ। चट्याङ लागेर चारजना घाइते भएका छन् । गौमुखी गाउँपालिका- ६ लिवाङमा चट्याङ लागेर ७० वर्षीय केदार बोहोरा क्षेत्री र उनका २६ वर्षीय छोरा रामु बोहोरा क्षेत्रीको ज्यान गएको जिल्ला प्रहरी कार्यालय प्यूठानले जनाएको छ।

दुवैजनाको शव जिल्ला अस्पतालमा राखिएको छ भने
चट्याङकै कारण सोही गाउँपालिकाका अन्य दुई जना घाइते भएका छन्। वडा नम्बर ४ की २४ वर्षीया सिर्जना न्यौपाने र वडा नम्बर ६ की ५४ वर्षीया गमी बोहोराको जिल्ला अस्पताल विजुवारमा उपचार भइरहेको छ।

यसैबीच, शनिबार माण्डवी गाउँपालिका–२ रातापानीमा पनि चट्याङ लागेर दुई दिदीबहिनी घाइते भएका छन्। २० वर्षीया कल्पना अधिकारी र १६ वर्षीया सपना अधिकारीको समेत जिल्ला अस्पताल विजुवारमा उपचार भइरहेको प्रहरीले जनाएको छ।

काठमाडौ,१३ वैशाख । स्विस अन्तर्राष्ट्रिय विमान सेवाको विमानको इन्जिनमा आगलागी हुँदा ६ जना घाइते भएका छन्। भारतीय सञ्चार माध्यमका अनुसार उडान भर्न लागेको विमान इन्दिरा गान्धी अन्तर्राष्ट्रिय विमानस्थलको धावनमार्गमै रहेका बेला इन्जिनमा आगलागी भएपछि उडान स्थगित गरिएको थियो।

दिल्लीबाट जुरिख जान लागेको उक्त विमानमा ४ शिशुसहित चालकदलका सदस्य र यात्रु गरी २३२ जना सवार थिए। आगलागी लगत्तै सबै यात्रुलाई सुरक्षित रूपमा बाहिर निकालिएको थियो।

घाइतेहरूलाई स्थानीय निजी अस्पतालमा भर्ना गरिएको जनाइएको छ।विमानस्थल प्रशासनका अनुसार घटनापछि पूर्ण आपतकाल घोषणा गरिएको थियो।

विमान सेवाका अनुसार चालकले सावधानी अपनाउँदै उडान रोकेर यात्रुहरूलाई बाहिर निकाल्ने निर्णय गरेका थिए। घटनाको थप अनुसन्धान भइरहेको जनाइएको छ।

काठमाडौ,१३ वौख । अखिल नेपाल फुटबल संघ (एन्फा)का २० भन्दा बढी पदाधिकारीलाई कालोसूचीमा परेका छन् । अध्यागमन विभागले उनीहरुलाई कालोसूचीमा राखेको हो ।

विभागका प्रवक्ता टीकाराम ढकालका अनुसार युवा तथा खेलकुद मन्त्रालयमार्फत गृह मन्त्रालयबाट आएको सिफारिसका आधारमा उनीहरूलाई कालोसूचीमा राखिएको हो। यद्यपि, सम्बन्धित पदाधिकारीहरूको नाम सार्वजनिक गरिएको छैन।

राष्ट्रिय खेलकुद परिषद् (राखेप)को सिफारिसपछि गृह मन्त्रालय हुँदै अध्यागमन विभागले गएको बिहीबार र शुक्रबार दुई दिनमा पदाधिकारीहरूलाई कालोसूचीमा राखेको जनाएको छ। कालोसूचीमा परेकाहरूले नाम फुकुवा नभएसम्म विदेश यात्रा गर्न पाउने छैनन्।

पछिल्लो समय राष्ट्रिय खेलकुद परिषद् (राखेप) र एन्फाबीच ‘अर्ली इलेक्सन’को विषयमा विवाद चर्किएको छ। राखेपले खेलकुद विकास ऐन २०७९ विपरीत हुने भन्दै एन्फालाई तीन महिनाका लागि निलम्बन गरिसकेको छ।

एन्फाले भने यस कदमलाई तेस्रो पक्षीय हस्तक्षेप भन्दै विरोध गर्दै आएको छ। फिफा र एएफसीले समेत राखेपको निर्णयलाई हस्तक्षेप ठहर गर्दै एन्फालाई निलम्बनका लागि सिफारिस गर्ने चेतावनी दिएका छन्।

काठमाडौ,१३ वैशाख । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले राप्रपा राजाको पार्टी नभई राजसंस्था मान्नेहरूको पार्टी भएको बताएका छन्।

गण्डकी प्रदेशस्तरीय निर्वाचन समीक्षा कार्यक्रममा उनले राजा र राजसंस्था कुनै पनि दलसँग सम्बन्धित नहुने उल्लेख गरे। राजसंस्था सबै दल र विचारभन्दा माथि रहने उनको भनाइ थियो।

राप्रपालाई राजाको पार्टी भनेर प्रचार गर्नेहरू वास्तविक रूपमा राजसंस्थाका पक्षपाती नभएको उनले आरोप लगाए।

गणतन्त्र सरकारमा सहभागिताको विषयमा टिप्पणी गर्दै उनले सरकारमा नजाँदैमा पार्टी ठूलो नहुने बताए। उदाहरण दिँदै उनले नेमकिपा र राष्ट्रिय जनमोर्चाजस्ता पार्टी उल्लेख गरे।

पार्टीभित्रको विवादबारे बोल्दै अध्यक्ष लिङ्देनले चुनावअघि सबैलाई मिलाएर लैजाने प्रयास गर्दा अनुशासन उल्लंघन भएको भन्दै कारबाही प्रक्रिया अघि बढाइएको जानकारी दिए।

राप्रपाले हाल प्रदेशस्तरमा निर्वाचन समीक्षा कार्यक्रम सञ्चालन गरिरहेको छ। मधेश, कोशी र गण्डकी प्रदेशमा समीक्षा सम्पन्न भइसकेको छ भने लुम्बिनी, बागमती र सुदूरपश्चिम प्रदेशमा क्रमशः वैशाख १४, १५ र १७ गते बैठक तय गरिएको छ। कर्णाली प्रदेशको मिति भने अझै तय हुन बाँकी छ।

काठमाडौ,१३ वैशाख । नारायण सिंचाइ व्यवस्थापन कार्यालयले गण्डक नहर किनारमा अतिक्रमण गरी निर्माण गरिएका घरटहरा तथा अन्य संरचना हटाउन सुरु गरेको छ।

कार्यालयले आइतबार बिहानैदेखि नहरको जानकीटोला देखि गण्डकचोकसम्म फैलिएका अतिक्रमित संरचना हटाउने अभियान थालेको हो। नहरको डिलमा बनाइएका घरटहरा, पसल, माछापोखरी लगायत करिब ३०० भन्दा बढी संरचना हटाइँदै छन्।

नेपाल प्रहरी र सशस्त्र प्रहरीको सुरक्षामा चार वटा एस्काभेटर प्रयोग गरी संरचना हटाउने काम भइरहेको कार्यालयले जनाएको छ।

कार्यालय प्रमुख मनोजप्रसाद पटेलका अनुसार पर्सा जिल्लामा पर्ने करिब २६ किलोमिटर क्षेत्रमा अतिक्रमण हटाउने कार्य सुरु गरिएको हो। प्रतिकूल मौसमका बाबजुद पनि अभियान अघि बढाइएको उनले बताए।
नेपाल–भारतबीच सन् १९५६ मा भएको गण्डक सिंचाइ सम्झौताअनुसार निर्माण गरिएको यो नहरमार्फत पर्सा, बारा र रौतहटका दक्षिणी क्षेत्रमा सिंचाइ हुँदै आएको छ। करिब ३७ हजार ४०० हेक्टर क्षेत्रमा सिंचाइ गर्ने लक्ष्य रहे पनि हाल करिब २८ हजार हेक्टरमा मात्र पानी पुगिरहेको कार्यालयले जनाएको छ।

नहरमा बढ्दो अतिक्रमणका कारण सिंचाइ प्रणाली प्रभावित भएपछि संरचना हटाउने अभियान सुरु गरिएको कार्यालयको भनाइ छ।

दाङ,१३ वैशाख । कपिलवस्तुमा सवारी दुर्घटना हुँदा दुईजनाको मृत्यु भएको छ । जिल्लाको बहादुरगञ्ज–तौलिहवा हुलाकी सडक खण्डमा भएको दुर्घटनामा दुई जनाको ज्यान गएको छ भने तीन जना घाइते भएका छन्।

कपिलवस्तु नगरपालिका–१२ पिपरहवामा रोकिराखेको ट्रकमा जीप ठोक्किँदा दुर्घटना भएको हो। मृत्यु हुनेमा महाराजगञ्ज नगरपालिका–११ बनगाईका राधेश्याम कुर्मी र शिवराज नगरपालिका–६ धर्मनगरका चिन्नी कुर्मी रहेका छन्।

दुर्घटनामा घाइते भएका नन्दप्रसाद दुबे, मोतिलाल कुर्मी र सुरेश कुर्मीको तौलिहवामा उपचार भइरहेको प्रहरीले जनाएको छ।

युपी–३२ सिए ८३४३ नम्बरको जीप लु १ ख ९५४९ नम्बरको ट्रकमा ठोक्किएको थियो।