काठमाडौ,६ वैशाख । गृह मन्त्रालयले देशभरका जिल्ला प्रशासन कार्यालयमा डिजिटल तथा आवाजसहितको नागरिक बडापत्र राख्न निर्देशन दिएको छ। मन्त्रालयले हालै जारी गरेको नौ बुँदे निर्देशनमार्फत यस्तो व्यवस्था लागू गर्न आग्रह गरेको हो।

निर्देशनमा सम्भव भएसम्म डिजिटल तथा आवाजसहितको नागरिक बडापत्र राख्न, नभए सेवा प्रक्रियाका सबै चरण स्पष्ट उल्लेख गरी सबैले देख्ने स्थानमा पढ्न मिल्ने ढंगले बडापत्र राख्न भनिएको छ। साथै सेवा प्रवाहलाई प्रभावकारी बनाउन प्रमुख जिल्ला अधिकारी, सहायक प्रमुख जिल्ला अधिकारी, प्रशासकीय अधिकृत र वडाध्यक्ष तहसम्मको ह्वाट्सएप समूह बनाएर नियमित समन्वय गर्न पनि निर्देशन दिइएको छ।

मन्त्रालयका प्रशासन महाशाखा प्रमुख सहसचिव कालीप्रसाद पराजुलीले सेवा प्रवाह छिटो र सहज बनाउन यस्तो नीति ल्याइएको बताए। उनका अनुसार सबै जिल्ला प्रशासन कार्यालयले एकद्वार प्रणाली अपनाएर सेवाग्राहीमैत्री सेवा दिनुपर्नेछ।

निर्देशनअनुसार नागरिकता, राहदानी, राष्ट्रिय परिचयपत्र लगायत सेवाका लागि छुट्टै सेवाकक्ष व्यवस्थापन गर्नुपर्नेछ। सेवाग्राहीको चापअनुसार टोकन प्रणाली लागू गर्ने, सहायता कक्ष स्थापना गर्ने र बिहान ९ बजेदेखि हेल्प डेस्क सञ्चालन गर्ने व्यवस्था गर्न पनि भनिएको छ।

ज्येष्ठ नागरिक, अशक्त, अपाङ्गता भएका व्यक्ति तथा सानो बच्चासहित आएका सेवाग्राहीलाई प्राथमिकता दिनुपर्ने उल्लेख छ। साथै गुनासो सुनुवाइका लागि छुट्टै व्यवस्था गरी तत्काल सम्बोधन गर्न निर्देशन दिइएको छ।

विचौलियाको प्रवेशमा कडाइ गर्न, सेवा अनलाइनमार्फत उपलब्ध गराउन, सिसिटिभी जडान, वेबसाइट अद्यावधिक र मासिक प्रगति प्रतिवेदन मन्त्रालयमा पठाउन पनि निर्देशनमा उल्लेख गरिएको छ।

सल्यान, ६ वैशाख। सल्यानमा निःशुल्क आँखा शिविरमार्फत ८३ जनाको आँखाको ज्योति फर्किएको छ। जिल्लाको शारदा नगरपालिकाको श्रीनगरस्थित आँखा उपचार केन्द्रमा दुई दिनसम्म सञ्चालन भएको शिविरमा मोतिबिन्दुका बिरामीको सफल शल्यक्रिया गरिएको हो।

शारदा नगरपालिकाको आयोजना तथा नेपाल नेत्रज्योति संघको प्राविधिक सहयोगमा सञ्चालन गरिएको उक्त शिविरमा कुल ३६९ जनाको आँखाको परीक्षण गरिएको थियो। परीक्षण गरिएका मध्ये १३७ पुरुष र २३२ महिला रहेका छन्।

परीक्षणका क्रममा मोतिबिन्दु भएका ८३ जना बिरामी पहिचान गरी उनीहरूको निःशुल्क शल्यक्रिया गरिएको नगरपालिकाले जनाएको छ। शल्यक्रिया गरिएका मध्ये ४१ पुरुष र ४२ महिला रहेका छन्।

शिविर सञ्चालनअघि नै नगरपालिकाले विभिन्न वडामा छनोट शिविर सञ्चालन गरी मोतिबिन्दुका बिरामी पहिचान गरेको थियो। सोही आधारमा छनोट गरिएका बिरामीलाई मुख्य शिविरमार्फत उपचार गरिएको हो। वडास्तरबाटै गरिएको पहिचानले वास्तविक बिरामीलाई समयमै उपचारमा ल्याउन सहज भएको जनाइएको छ।

नगर उपप्रमुख सुस्मिता सापकोटाले ग्रामीण तथा दुर्गम क्षेत्रका नागरिकलाई विशेषज्ञ आँखा सेवा सहज रूपमा उपलब्ध गराउन यस्ता कार्यक्रम प्रभावकारी हुने बताइन्। उनका अनुसार समयमै रोग पहिचान र उपचारले दृष्टि जोगाउन महत्वपूर्ण भूमिका खेल्छ।

नगरपालिकाले शिविरमा सहभागी बिरामीहरूको यातायात खर्चसमेत व्यहोरेको जनाएको छ। स्थानीय स्तरमै सेवा पाउँदा आफूहरूलाई सहज भएको सहभागीहरूले बताएका छन्।

तस्बीरः शंकर केसी

दाङ, ६ वैशाख। दाङमा संजीवनी टिचिङ हस्पिटलले ‘सुपर–स्पेशियालिटी’ स्वास्थ्य सेवा सुरु गर्ने भएको छ। घोराही उपमहानगरपालिका–३ बर्गदुवास्थित टिचिङ हस्पिटलले आगामी एक महिनाभित्र ‘सुपर–स्पेशियालिटी’ स्वास्थ्य सेवा सुरु गर्ने भएको हो। अस्पतालले न्यूरोलोजी, कार्डियोलोजी र युरोलोजी सेवा विस्तार गर्न लागेको जनाएको छ।

अस्पतालका प्रमुख कार्यकारी अधिकृत दीपक रोकाका अनुसार सेवा विस्तारपछि जटिल रोगका बिरामीले उपचारका लागि जिल्ला बाहिर जानुपर्ने बाध्यता घट्नेछ। हालसम्म साबिक राप्ती क्षेत्रका बिरामीहरू यस्ता सेवाका लागि बाँके र रुपन्देही पुग्नुपर्ने अवस्था थियो।

पत्रकारहरुसंगको छलफलमा उनले चार अर्ब रुपैयाँ लगानीमा निर्माण भएको अस्पताल हाल ३०० शैयामा सञ्चालनमा रहेको जानकारी गराए। उनका अनुसकार जनरल अस्पतालमा फिजिसियन, हाडजोर्नी, स्त्री तथा प्रसूति, बालरोग, मुटुरोग, मानसिक स्वास्थ्य, ग्यास्ट्रोलोजी, दन्त, आँखा लगायतका विशेषज्ञ सेवा उपलब्ध छन्। साथै आइसियु, सिसियु, एनआइसियु जस्ता क्रिटिकल केयर सेवा पनि सञ्चालनमा छन्।

अस्पतालले अत्याधुनिक प्रविधिसहित १.५ टेस्ला क्षमताको एमआरआई र १९२ स्लाइस क्षमताको सिटी स्क्यान सेवा प्रदान गरिरहेको छ। डिजिटल एक्स–रे, म्यामोग्राफी, इको लगायतका परीक्षण सेवा पनि उपलब्ध छन्।

बिरामीको पहुँच सहज बनाउन अस्पतालले दाङका विभिन्न स्थानबाट निःशुल्क बस सेवा सञ्चालन गरिरहेको छ। तुलसीपुर, दंगिशरण, भालुवाङ, गढवा र लमही क्षेत्रबाट दैनिक बस सेवा सञ्चालनमा रहेको अस्पतालले जनाएको छ।

अस्पतालले आगामी तीन वर्षभित्र शैया संख्या ५०० पुर्‍याउने योजना बनाएको छ। साथै नर्सिङ, पारामेडिक्स र एमबीबीएस, बीडीएस जस्ता शैक्षिक कार्यक्रम सञ्चालन गर्ने तयारी पनि गरेको छ।

दाङ, ६ वैशाख। सल्यानमा जन्ती बोकेको गाडी दुर्घटना हुँदा चार जनाको मृत्यु भएको छ भने १४ जना घाइते भएका छन्।जिल्लाको बनगाड कुपिण्डे नगरपालिका–१० धाइरेमा शनिबार साँझ लुम्बिनी प्रदेश ०१००१ ज ०२७१ नम्बरको बोलेरो गाडी सडकबाट करिब ८४ मिटर तल खस्दा दुर्घटना भएको हो।

जिल्ला प्रहरी कार्यालयका अनुसार दुर्घटनामा बनगाड कुपिण्डे नगरपालिका–८ थाराका ५० वर्षीय टोपबहादुर थापा, ५० वर्षीय ठगे घर्ती, २९ वर्षीय कर्णबहादुर पुन र ३० वर्षीय मनबहादुर थापाको मृत्यु भएको हो। घाइतेमध्ये सात जनाको अवस्था गम्भीर र सात जनाको अवस्था मध्यम रहेको प्रहरीले जनाएको छ।

प्रहरी निरीक्षक देवराज भट्टराईका अनुसार तीन जनालाई जिल्ला अस्पताल सल्यानमा चिकित्सकले शनिबार राति मृत घोषणा गरेका थिए भने एक जनाको मेहलकुना अस्पतालमा उपचारका क्रममा निधन भएको हो।

घाइतेमध्ये केहीको जिल्ला अस्पताल सल्यानमा उपचार भइरहेको छ भने अन्यलाई थप उपचारका लागि सुर्खेत पठाइएको छ। भौगोलिक विकटताका कारण दुर्घटनापछि करिब चार घण्टापछि मात्रै सबै घाइतेको उद्धार सम्भव भएको प्रहरीले जनाएको छ।

बनगाड कुपिण्डे नगरपालिका–८ थाराबाट कालिमाटी गाउँपालिका–१ लक्ष्मीपुरतर्फ जन्ती लिएर जाँदै गरेको गाडी दुर्घटनामा परेको हो। स्थानीय वडाध्यक्ष कुलबहादुर पुरीका अनुसार माइती मान्न (ढोग खुलाउन) जाने क्रममा तीनवटा गाडी रिजर्भ गरिएको थियो, जसमध्ये १८ जना सवार रहेको एक गाडी दुर्घटनामा परेको हो।

दुलाहा,दुलही सवार गाडी भने सुरक्षित रहेको जनाइएको छ। प्रहरीले दुर्घटनाको कारणबारे थप अनुसन्धान भइरहेको जनाएको छ ।

दाङ, ५ वैशाख। तुलसीपुर उपमहानगरपालिकाले बहुवर्षीय आय ठेक्का नवीकरण नगर्ने ठेकेदार कम्पनीहरूको नाममा १५ दिने सार्वजनिक सूचना जारी गरेको छ।

कार्यालयले गत बुधबार जारी सूचनामा ठेक्का सम्झौताअनुसार नवीकरण नगरे ठेक्का रद्द गरी कारबाही प्रक्रिया अघि बढाइने चेतावनी दिएको छ। पटकपटक पत्राचार गर्दा पनि सम्बन्धित कम्पनीहरू सम्पर्कमा नआएपछि नगरको ४५औँ बैठकको निर्णयअनुसार यस्तो कदम चालिएको जनाइएको छ।

कार्यालयका अनुसार सडक बत्ती तथा ट्राफिक बुथ सम्बन्धी ठेक्का अपटेक सिस प्रालि ले १५ वर्षका लागि २०७७ मंसिर १९ गते सम्झौता गरेको थियो, जसका तर्फबाट गेहेन्द्र शाह प्रतिनिधि रहेका छन्।

यस्तै, विज्ञापन कर असुलीको ठेक्का बैभव कन्स्ट्रक्सन ले ३ वर्षका लागि २०८० असोज १७ गते लिएको थियो, जसका प्रतिनिधि विक्रान्त योगी रहेका छन्।

त्यसैगरी, बसपार्क पूर्वाधार शुल्कको ठेक्का बुढाथोकी ट्रेड एण्ड सप्लायर्स ले २०७८/११/२० गते २० वर्षका लागि सम्झौता गरेको भए पनि नवीकरण नगरेको उल्लेख छ। उक्त कम्पनीका व्यवसायी भिमबहादुर बुढाथोकी रहेका छन्।

उपमहानगरपालिकाले सडक बत्ती, विज्ञापन कर र बसपार्क पूर्वाधार शुल्कलाई महत्वपूर्ण राजस्व स्रोत माने पनि अपेक्षाअनुसार संकलन हुन नसकेको जनाएको छ।

सरोकारवालाहरूले समयमै ठेक्का नवीकरण र प्रभावकारी अनुगमन नहुँदा राजस्व व्यवस्थापनमा समस्या देखिएको बताएका छन्। उनीहरूले पारदर्शी प्रक्रिया र कडाइका साथ कार्यान्वयन गर्नुपर्ने आवश्यकता औंल्याएका छन्।

काठमाडौ,५ वैशाख । इरानले महत्वपूर्ण समुद्री मार्ग होर्मुज स्ट्रेट पुनः बन्द गरेको घोषणा गरेको छ। इरानले अमेरिकी नाकाबन्दी जारी रहेको र वार्ताका सर्तहरू उल्लंघन भएको आरोप लगाउँदै उक्त जलमार्गमा सैन्य नियन्त्रण कायम गरेको हो।

इस्लामिक रिभोल्युसनरी गार्ड कोर्प्सले जारी गरेको विज्ञप्तिअनुसार अब होर्मुज स्ट्रेट पूर्ण रूपमा इरानी सेनाको नियन्त्रणमा रहनेछ र जहाजहरूको आवतजावत रोकिएको छ।

इरानी पक्षका अनुसार अमेरिकाले आफ्ना बन्दरगाहमा नाकाबन्दी जारी राख्दै सहमतिविपरीत जहाजहरू रोकेको आरोप छ। केही समयका लागि जलमार्ग खुला गरिए पनि प्रतिबन्ध नहटेपछि इरानले पुनः कडा कदम चालेको जनाएको छ।

इरानले अमेरिकाले लगाएको प्रतिबन्ध नहटाएसम्म कुनै पनि जहाजलाई होर्मुज स्ट्रेटबाट आवतजावत गर्न नदिने स्पष्ट पारेको छ। विश्व व्यापारका लागि अत्यन्त संवेदनशील मानिने यो मार्ग बन्द हुँदा अन्तर्राष्ट्रिय आपूर्ति श्रृंखला प्रभावित हुन सक्ने चिन्ता बढेको छ।

यता डोनाल्ड ट्रम्पले इरानमाथिको नाकाबन्दी तत्काल नहट्ने अडान दोहोर्‍याएका छन्। उनले इरानसँग नयाँ सम्झौता नभएसम्म प्रतिबन्ध कायम रहने बताउँदै ‘इनरिच्ड युरेनियम’ सम्बन्धी विषयमा कडा चेतावनी दिएका छन्।

अन्तर्राष्ट्रिय समुदायले दुवै पक्षलाई संयम अपनाउन आग्रह गरिरहेको छ भने विश्लेषकहरूले बढ्दो तनावले क्षेत्रीय सुरक्षा र विश्व अर्थतन्त्रमा गम्भीर असर पार्न सक्ने बताएका छन्।

दाङ,५ वैशाख। दाङको तुलसीपुरमा प्रहरी हवलदारले चलाएको मोटरसाइकलको ठक्करबाट एक विद्यार्थी गम्भीर घाइते भएकी छन्। शुक्रबार बिहान करिब ११ बजे नेपाल प्रहरीमा कार्यरत प्रहरी हवलदार भरत थारुले चलाएको मोटरसाइकलले तुलसीपुर स्थित गुल्मचोकस्थित जेब्राक्रसमा ठक्कर दिएको हो।

प्रहरीका अनुसार मोटरसाइकल ठक्करबाट सल्यान घर भई हाल तुलसीपुर–८ दुधेना बस्दै आएकी १९ वर्षीया मुना बुढाथोकी घाइते भएकी छन्। उनको देब्रे खुट्टा भाँचिएको र टाउकोमा चोट लागेको छ।

घाइते बुढाथोकीको कोहलपुर मेडिकल कलेज मा उपचार भइरहेको छ। उनी कक्षा १२ मा अध्ययनरत हिमाल एकाडेमी की विद्यार्थी हुन् र यही १४ गतेदेखि परीक्षा सुरु हुने तयारीमा थिइन्।

मोटरसाइकल चालक ४१ वर्षीय भरत थारु पनि सामान्य घाइते भएका छन्। दुर्घटनाबारे थप अनुसन्धान भइरहेको प्रहरीले जनाएको छ।

काठमाडौ,५ वैशाख। प्रहरीले प्रतिबन्धित लागु औषधसहित त्रिभुवन अन्तर्राष्ट्रिय विमानस्थलबाट एक अमेरिकी नागरिकलाई पक्राउ गरेको छ । विमानस्थलबाट भाङ र गाँजाको तेल जस्तो देखिने तरल पदार्थसहित नागरिक राहदानी नम्बर ए ८३४८८४८७ वाहक ४६ वर्षीय ओग्नियन पेट्रोभलाई पक्राउ गरिएको नेपाल प्रहरीले जनाएको छ । प्रहरीका अनुसार उनलाई १.२५ लिटरका पाँच थान बोतलसहित पक्राउ गरिएको हो।

विमानस्थल सुरक्षा कार्यालयका प्रहरी उपरीक्षक राजकुमार सिलवालका अनुसार एअर इण्डियाको उडान नम्बर एआइ २१८ को उडानमार्फत काठमाडौंबाट दिल्ली जाने क्रममा उनीमाथि लगेज चेकिङका क्रममा शंका लागेपछि जाँच गर्दा उक्त पदार्थ फेला परेको हो।पक्राउ परेका उनलाई थप अनुसन्धान तथा कारबाहीका लागि लागुऔषध नियन्त्रण ब्यूरोको जिम्मा लगाइएको प्रहरीले जनाएको छ।

काठमाडौ,५ वैशाख। सरकारले सरकारी अस्पतालमा पनि अब शनिबार र आइतबार दुई दिन सार्वजनिक बिदा लागू गर्ने भएको छ। स्वास्थ्य तथा जनसङ्ख्या मन्त्रालयका प्रवक्ता डा. प्रकाश बुढाथोकीले राजपत्रमा प्रकाशित सूचनाअनुसार यो व्यवस्था लागू गरिएको जानकारी दिएका छन्।

उनका अनुसार स्वास्थ्यकर्मीको मनोबल र हितलाई ध्यानमा राख्दै यो निर्णय गरिएको हो। बिदाका दिनमा बहिरङ्ग सेवा (ओपीडी) बन्द रहनेछ भने आकस्मिक र अन्तरङ्ग सेवा भने २४ घण्टा सञ्चालन हुने जनाइएको छ।

आइतबारका पूर्वनिर्धारित शल्यक्रिया तथा अन्य सेवाहरूलाई बिरामीको सहजताअनुसार पुनः तालिका मिलाइने पनि मन्त्रालयले जनाएको छ।

मन्त्रालयले बिदाका दिनमा पनि बिरामीले समस्या खेप्न नपरोस भन्दै आवश्यक सेवा उपलब्ध गराउन, अन्य अस्पतालमा सहज रेफर गर्न र एम्बुलेन्स तयारी अवस्थामा राख्न सबै अस्पताललाई निर्देशन दिएको छ।

यस्तै, बिदाका दिनमा उपलब्ध सेवाबारे जानकारी अस्पतालको वेबसाइट र सूचनापाटीमार्फत सार्वजनिक गर्न पनि मन्त्रालयले आग्रह गरेको छ।

काठमाडौ,५ वैशाख । नेपाली कांग्रेसका निवर्तमान कार्यबाहक सभापति पूर्णबहादुर खड्का सर्वोच्च अदालतको निर्णयपछि आन्तरिक परामर्शमा जुटेका छन्।

सर्वोच्च अदालतले पार्टी आधिकारिकता सम्बन्धी रिट खारेज गरेपछि उनले निकटस्थ नेताहरूसँग छलफल थालेका हुन्।

गोल्फुटारस्थित निवासमा भइरहेको छलफलमा इन्द्रबहादुर बानियाँ र केदार कार्की सहित अन्य नेताहरू सहभागी छन्।

स्रोतका अनुसार खड्काले निकटस्थसँग परामर्शपछि आफ्नो धारणा सार्वजनिक गर्ने तयारी गरेका छन्। सम्भवतः आइतबारसम्म औपचारिक वक्तव्य आउने जनाइएको छ।

उनी शीर्ष नेताहरूसँग पनि थप छलफल गर्ने तयारीमा रहेका छन्।