काठमाडौं,२२ फागुन । प्रतिनिधिसभा सदस्य निर्वाचनअन्तर्गत झापाका पाँचवटै निर्वाचन क्षेत्रमा राष्ट्रिय स्वतन्त्र पार्टी (रास्वपा)का उम्मेदवारले सुरुवाती मतगणनामा अग्रता लिएका छन् ।

निर्वाचन क्षेत्र नं. ५ मा रास्वपाका उम्मेदवार बालेन शाहले ५ हजार २५४ मत प्राप्त गर्दै अग्रता कायम गरेका छन् । उनका निकटतम प्रतिस्पर्धी नेकपा (एमाले)का केपी शर्मा ओलीले १ हजार ५७९ मत प्राप्त गरेका छन् ।
क्षेत्र नं. ४ मा रास्वपाका शम्भुप्रसाद ढकाल १ हजार ७७५ मतसहित अगाडि छन् भने नेकपा (एमाले)का लालप्रसाद साँवा लिम्बूले ३०० मत प्राप्त गर्दै पछ्याइरहेका छन् ।

यसैगरी क्षेत्र नं. ३ मा रास्वपाका प्रकाश पाठकले २ हजार २८१ मतसहित सुरुवाती अग्रता लिएका छन् । राष्ट्रिय प्रजातन्त्र पार्टीका उम्मेदवार राजेन्द्रप्रसाद लिङ्देन १ हजार ६१० मतसहित दोस्रो स्थानमा छन् ।
क्षेत्र नं. २ मा रास्वपाकी इन्दिरा रानामगरले ४ हजार ५८० मत प्राप्त गर्दै अग्रता लिएकी छन् । उनलाई नेकपा (एमाले)का देवराज घिमिरेले ७१६ मतसहित पछ्याइरहेका छन् ।

यसैगरी क्षेत्र नं. १ मा रास्वपाकी निशा डाँगी ३ हजार १७० मतसहित अग्रस्थानमा रहेकी छन् । उनलाई श्रम संस्कृति पार्टीका केबल राईले १ हजार ३२० मतसहित पछ्याइरहेका छन् । मतगणना जारी रहेकाले अन्तिम नतिजाका लागि भने थप मत गणना हुन बाँकी रहेको छ ।

दाङ,२२ फागुन । प्रतिनिधिसभा सदस्य निर्वाचनअन्तर्गत दाङ निर्वाचन क्षेत्र नम्बर ३ मा मतगणना जारी रहेको छ । प्रारम्भिक ३ हजार ८४ मत गणना हुँदा राष्ट्रिय स्वतन्त्र पार्टी ९रास्वपा० का उम्मेदवार कमल सुवेदी फराकिलो अग्रतालाई कायम राखेका छन् ।

यस समाचार तयार पार्दासम्म सुवेदीले १ हजार ५४० मत प्राप्त गरेका छन् भने उनका निकटतम प्रतिस्पर्धी नेपाली कांग्रेसका दिपक गिरीले ८८१ मत पाएका छन् । यसअनुसार सुवेदी र गिरीको मतान्तर ६५९ रहेको छ ।

यस्तै, नेपाल कम्युनिष्ट पार्टी ९एमाले० का घनश्याम पाण्डेले ३८५ मत, नेकपा का धनबहादुर मास्कीले ११९ मत प्राप्त गरेका छन् ।

साना उम्मेदवारहरूमध्ये राप्रपाका दामोदर भण्डारीले ३६, नेकपा माओवादीका बलबहादुर ओलीले ७, जनमोर्चाका कमला जीसीले २ र श्रम संस्कृति पार्टीका टोपबहादुर महतराले ५ मत प्राप्त गरेका छन् ।

लुम्बिनी प्रदेश निर्वाचन कार्यालय दाङका सूचना अधिकारी गेहेन्द्र बहादुर कभरका अनुसार ३ हजार ८४ मत गणना गर्दा ९८ मत बदर भएका छन् ।

दाङ,२२ फागुन । प्रतिनिधिसभा सदस्य निर्वाचनअन्तर्गत दाङ निर्वाचन क्षेत्र नम्बर ३ मा मतगणना सुरु भएको छ । बिहीबार सम्पन्न निर्वाचनको मतगणना सुरु भएसँगै प्राप्त प्रारम्भिक परिणाममा घण्टी चुनाव चिन्हले अग्रता लिएको छ । हालसम्म गनिएको मतअनुसार घण्टी चिन्हले ५२ मत प्राप्त गरेको छ ।

त्यस्तै रुख चिन्हले ३२, सूर्य चिन्हले १२, तारा चिन्हले ३ मत प्राप्त गरेका छन् । जातो र क्यामरा चिन्हले समान १–१ मत पाएका छन् भने गुलाब चिन्हले हालसम्म मत प्राप्त गर्न सकेको छैन ।

यस निर्वाचन क्षेत्रमा प्रत्यक्षतर्फ २३ जना उम्मेदवार प्रतिस्पर्धामा रहेका छन् ।

दाङ फागुन २१। दाङ क्षेत्र नं. ३ अन्तर्गत दंगिशरण गाउँपालिका–४ स्थित रात्री आधारभूत विद्यालय, वैवाङ मतदान केन्द्रमा प्रमुख राजनीतिक दलका उम्मेदवारहरूले मतदान गरेका छन्।

प्रतिनिधि सभा सदस्यका लागि नेपाली कांग्रेसका उम्मेदवार दीपक गिरी र राष्ट्रिय स्वतन्त्र पार्टीका उम्मेदवार कमल सुवेदीले सो मतदान केन्द्रमा मतदान गरेका छन।
मतदान केन्द्रमा नेपाली कांग्रेसका उम्मेदवार दीपक गिरीले पहिलो मत खसालेका थिए भने राष्ट्रिय स्वतन्त्र पार्टीका उम्मेदवार कमल सुवेदीले दोस्रो मत खसाले ।
दाङमा निर्वाचन शान्तिपूर्ण रूपमा सञ्चालन भइरहेको र मतदाताहरू उत्साहका साथ मतदान प्रक्रियामा सहभागी भइरहेको निर्वाचन अधिकृतको कार्यालयले जनाएको छ।
उक्त मतदान केन्द्रमा कुल २,२११ जना मतदाता रहेका छन्। मतदान प्रक्रिया शान्तिपूर्ण रूपमा सञ्चालन भइरहेको छ भने मतदाताहरू उत्साहपूर्वक मतदानमा सहभागी भइरहेका छन्।

दाङ ,२१ फागुन । प्रतिनिधिसभा सदस्य निर्वाचनअन्तर्गत दाङ निर्वाचन क्षेत्र नम्बर ३ मा रहेको तुलसीपुर–५ स्थित तुलसी बोर्डिङ विद्यालय मतदान केन्द्रमा मतदान सुरु भएको छ ।

निर्धारित समयअनुसार बिहान ७ बजेदेखि मतदान प्रक्रिया सुरु भएको हो । बिहानैदेखि मतदाताहरू मतदान केन्द्र परिसरमा लामबद्ध भएर लाइनमा बसेका थिए ।

मतदान सुरु भएसँगै प्रतिनिधि र समानुपातिक दुवैतर्फ सुरुवाती मत खस्न थालेको छ । बिहानको सुरुवाती समयमा नै मतदाताको उल्लेखनीय सहभागिता देखिएको छ ।मतदान केन्द्र प्रमुख नवराज भण्डारीका अनुसार हालसम्म ६० जनाले प्रतिनिधिसभा र ६० जनाले समानुपातिकतर्फ मतदान गरेका छन् ।

मतदान शान्तिपूर्ण र व्यवस्थित बनाउन सुरक्षाकर्मी परिचालन गरिएको छ भने केन्द्रमा आवश्यक व्यवस्थापन मिलाइएको छ । मतदान बेलुका ५ बजेसम्म सञ्चालन हुने जनाइएको छ ।

निर्वाचनका कारण जिल्लाका प्रमुख बजार क्षेत्र तुलसीपुर, घोराही र लमही बन्द रहेका छन् । अत्यावश्यक सेवाबाहेकका सवारीसाधन सञ्चालनमा रोक लगाइएको छ भने अनुमति प्राप्त सवारीसाधन मात्र सञ्चालनमा छन् ।

दाङ,२० फागुन । घोराहीमा भ्यान दुर्घटना हुँदा चालक दम्पती घाइते भएका छन् । घाइते हुनेमा घोराही उपमहानगरपालिका–५ बसन्तपुरका २१ वर्षीय प्रविन नेपाली र उनकी श्रीमती रहेका छन् ।

जिल्ला प्रहरी कार्यालय दाङका अनुसार चालकको अवस्था सामान्य रहेको छ भने उनकी श्रीमतीको निधार र बायाँ खुट्टामा चोट लागेको छ ।

प्रहरी प्रवक्ता डीएसपी रेशम बोहोराका अनुसार दुवै जनाको राप्ती स्वास्थ्य विज्ञान प्रतिष्ठानमा उपचार भइरहेको छ ।

मंगलबार पौने १२ बजेतिर सौडियारबाट घोराहीतर्फ जाँदै गरेको लु.प्र.०२–००१ च ०४५६ नम्बरको भ्यान घोराही–७ सौडियार स्कुल नजिक सिमेन्टको बिजुली पोलमा ठोक्किएर दुर्घटना भएको प्रहरीले जनाएको छ ।

दाङ,२० फागुन । निर्वाचनको संवेदनशीलतालाई ध्यानमा राख्दै जिम्मेवार र सन्तुलित ढंगले समाचार सम्प्रेषण गर्न पत्रकारहरूलाई आग्रह गरिएको छ । नेपाल पत्रकार महासंघ दाङ शाखाको आयोजनामा सम्पन्न निर्वाचन केन्द्रित रिपोर्टिङ विषयक छलफलमा यस्तो आग्रह गरिएको हो।

छलफलमा मुख्य निर्वाचन अधिकृत चन्द्रबहादुर सिन्जाली मगरले निर्वाचन अवधिमा सञ्चारमाध्यमको भूमिका महत्वपूर्ण हुने भन्दै सत्यतथ्य समाचार तथा सूचनाको सम्प्रेषण गर्न आग्रह गरे ।

उनले मतदानका दिन परिचयपत्र अनिवार्य रूपमा साथमा राख्न, मतदाताको गोपनीयता सम्मान गर्न र निर्वाचन आचारसंहिता कडाइका साथ पालना गर्न आग्रह गरे । आधिकारिक सूचना सम्बन्धित निर्वाचन कार्यालय वा तोकिएका अधिकारीमार्फत मात्रै लिनुपर्नेमा उनले जोड दिए ।

सिन्जालीले निर्वाचन प्रक्रिया पारदर्शी र व्यवस्थित ढंगले सम्पन्न गर्ने तयारी पूरा भएको जानकारी दिँदै मतपेटिका सुरक्षा, मतगणना व्यवस्थापन र सूचना प्रवाहलाई व्यवस्थित बनाइएको बताए ।

निर्वाचन केन्द्रित रहेर मतदान स्थलको रिपोर्टिङ कसरी गर्ने भन्ने विषयमा नेपाल पत्रकार महासंघका पूर्व अध्यक्ष बिपुल पोखरेलले जानकारी गराएका थिए । उनले पत्रकार आचारसंहिता र निर्वाचन आचार संहितालाई प्राथमिकतामा राखेर सूचना तथा समाचार सम्प्रेषण गर्न आग्रह गरेका हुन्।

उनके पुष्टि नभएको सूचना नप्रसारण गर्न, सामाजिक सञ्जालमा फैलिने अफवाहबाट सावधान रहन र सत्यतथ्यमा आधारित समाचार मात्रै सार्वजनिक गर्न सुझाव दिएका थिए ।

नेपाल पत्रकार महासंघ दाङ शाखाका अध्यक्ष सन्तोष सुवेदीको अध्यक्षतामा भएको कार्यक्रममा महासंघ दाङ शाखाका पूर्व अध्यक्ष सुदिप गौतमले निर्वाचनको संवेदनशीलतालाई ख्यालमा राखेर सत्यतथ्य समाचार बाहिर ल्याउन सबैमा आग्रह गरेका थिए। कुनै पनि दल वा व्यक्तिप्रति

पत्रकार महासंघ दाङ शाखा उपाध्यक्ष नारायणी रजौरेको विषय प्रवेशबाट सुरु भएको कार्यक्रमको सहजीकरण सचिव जीएन सागरले गरेका थिए।

दाङ,२० फागुन। प्रतिनिधिसभा सदस्य निर्वाचनका लागि दाङमा ५ हजार ५ सय ११ सुरक्षाकर्मी परिचालन गरिएको छ । नेपाली सेना, सशस्त्र प्रहरी बल नेपाल, नेपाल प्रहरी र राष्ट्रिय अनुसन्धान विभागका सुरक्षाकर्मी परिचालन गरिएको प्रमुख जिल्ला अधिकारी विश्वप्रकाश अर्यालले जानकारी दिए ।

उनका अनुसार मतदान सामग्री ढुवानीदेखि मतगणना सम्पन्न नभएसम्म सोही संख्यामा सुरक्षाकर्मी परिचालन गरिनेछ । एउटा मतदान स्थलमा तीन जना प्रहरी र पाँच जना निर्वाचन प्रहरी खटाइएको छ भने प्रत्येक मतदान केन्द्रमा एक जना नेपाल प्रहरी र दुई जना निर्वाचन प्रहरी परिचालन गरिएको छ ।

दाङमा १५९ मतदान स्थल रहेका छन् । तीमध्ये १६ वटा अति संवेदनशील, १३४ वटा संवेदनशील र ९ वटा सामान्य रहेका छन् । अति संवेदनशील क्षेत्रमा विशेष सुरक्षा व्यवस्था मिलाइएको छ । उपसचिवस्तरको मोबाइल टोली तथा प्रहरीका मोबाइल टोलीहरू पनि सक्रिय रहने जनाइएको छ ।

निर्वाचन सुरक्षाका लागि १० टोलीमा २० सदस्यीय बम डिस्पोजल टोली परिचालन गरिएको छ । साथै प्रत्येक निर्वाचन क्षेत्र समेट्ने गरी लमही, घोराही र तुलसीपुरमा बख्तरबन्द गाडी तयारी अवस्थामा राखिएको छ । मतदान स्थलमा तीन घेरामा सुरक्षा व्यवस्था मिलाइनेछ ।

मतपेटिकाको सुरक्षाका लागि भित्री घेरामा हतियारसहित नेपाल प्रहरी र बाहिरी घेरामा नेपाली सेना तथा सशस्त्र प्रहरी परिचालन गरिनेछ । प्रत्येक निर्वाचन क्षेत्रमा १३ वटा नेपाली सेनाको बेस र १३ वटा सशस्त्र प्रहरीको स्ट्राइकिङ तथा मोबाइल टोली खटाइनेछ ।

मतदान सकिएपछि मतपेटिका ढुवानीका लागि ९८ सवारी साधन भाडामा लिइएको छ, जसमा १७ वटा जीप र ८१ वटा ठूला गाडी रहेका छन् । मतदान सम्पन्न भएपछि राति ९ बजेसम्म सबै मतपेटिका मतगणना स्थलमा पु¥याउने तयारी गरिएको प्रमुख जिल्ला अधिकारी अर्यालले बताए ।

दाङ,२० फागुन । दाङमा मोटरसाइकल दुर्घटनामा परी एक युवकको उपचारका क्रममा मृत्यु भएको छ भने अर्का एक जना गम्भीर घाइते भएका छन् ।

मृत्यु हुनेमा तुलसीपुर उपमहानगरपालिका–१९ थानगाउँका २२ वर्षीय दिपेन घर्ति मगर रहेका छन् । मोटरसाइकलमा पछाडि सवार सोही ठाउँका २१ वर्षीय सोनु सुनार गम्भीर घाइते भएका जिल्ला प्रहरी कार्यालय दाङका प्रवक्ता डीएसपी रेशम बोहोराले जानकारी दिए ।

दुर्घटनापछि गम्भीर घाइते भएका दुवै जनालाई राप्ती लाइफ केयर हस्पिटलमा सामान्य उपचारपछि थप उपचारका लागि राप्ती स्वास्थ्य विज्ञान प्रतिष्ठान घोराहीमा रेफर गरिएको थियो । उपचारकै क्रममा चालक दिपेनको हिजो साँझ ५ बजेर २० मिनेटमा मृत्यु भएको प्रहरीले जनाएको छ ।

घाइते सुनारको बाँया हात, ढाड तथा शरीरका विभिन्न भागमा चोट लागेको छ । मंगलबार अपराह्न साढे ४ बजेतिर बिजौरीबाट हाडीमे तर्फ जाँदै गरेको रा.४ प.४४८१ नम्बरको मोटरसाइकल आफैँ अनियन्त्रित भई तुलसीपुर–१९ हाडीमे भित्री सडकखण्डमा दुर्घटनामा परेको थियो । घटनाबारे थप अनुसन्धान भइरहेको प्रहरीले जनाएको छ ।

काठमाडौं,१९ फागुन । मध्यपूर्वमा बढेको तनावका कारण हवाई उडान प्रभावित हुँदा झन्डै आठ हजार यात्रु कतारको ट्रान्जिटमा रोकिएका छन् ।

कतारले विभिन्न गन्तव्यतर्फ जान हिँडेका यात्रुहरू उडान रद्द तथा ढिलाइ भएसँगै दोहामा अलपत्र परेको जनाएको छ ।

यसैबीच, कतारले हमाद अन्तर्राष्ट्रिय विमानस्थलमा हुन लागेका कयौँ आक्रमण प्रयासलाई विफल पारेको दाबी गरेको छ ।

कतारी अधिकारीहरूका अनुसार सुरक्षा संयन्त्रलाई उच्च सतर्कतामा राखिएको छ र सम्भावित खतरालाई समयमै नियन्त्रणमा लिइएको छ ।