काठमाडौँ,१७ भदौ । सुडानको पश्चिमी क्षेत्रमा पहिरो जाँदा कम्तीमा एकहजार जनाको मृत्यु भएको छ। पहिरो जाँदा सो सँख्यामा मृत्यु भएको त्यहाँको विद्रोही संगठन सुडान लिबरेशन मुभमेन्ट आर्मी०ले जनाएको छ ।

बीबीसीका अनुसार, यो घटना पश्चिमी सुडानको मर्रा पर्वतस्थित टाढाको क्षेत्रमा भएको हो।

संगठनका अनुसार लगातार धेरै दिनसम्म परेको भारी वर्षाका कारण ३१ अगस्टमा पहिरो गएको हो। यसमा तारासिन गाउँको ठूलो हिस्सा विनाश भएको छ ।

‘प्रारम्भिक विवरणअनुसार गाउँका सबै बासिन्दाको मृत्यु भएको छ, जसको संख्या १,००० भन्दा बढी हुने अनुमान छ। केवल एक जना मात्र जीवित छन्,’ समूहले जारी गरेको विज्ञप्तिमा उल्लेख छ।

विद्रोहीहरूले संयुक्त राष्ट्रसंघ र अन्तर्राष्ट्रिय सहायता निकायहरूसँग पीडितहरूको शव उद्धार तथा राहतका लागि सहयोग गर्न अपिल गरेका छन्। मृतकमध्ये बालबालिका पनि रहेका छन्।

सुडानमा तीन वर्षदेखि चलिरहेको गृहयुद्धले देशलाई विश्वकै भीषणतम मानवीय संकटमध्ये एकमा धकेलेकै बेला यो प्राकृतिक विपत्ति थपिएको हो ।

सञ्चार संस्था अल जजिराका अनुसार, दारफुरका केही भागमा भने पहिले नै भोकमरी घोषणा भइसकेको छ। समाचार संस्था रोयटर्सका अनुसार, उक्त क्षेत्रमा खाद्यान्न र औषधि अभाव भएको छ ।

सुडान लिबरेशन मुभमेन्टरआर्मीको नियन्त्रणमा रहेको क्षेत्रमा पहिरो गएको हो । यो संगठन सुडानको सेनासँगै मिलेर अर्धसैनिक र्‍यापिड सपोर्ट फोर्सेस ९आरएसएफ० विरुद्ध लडिरहेको छ।

उक्त युद्धकै कारण उत्तर दारफुर राज्यका धेरै बासिन्दाले मर्रा पर्वत क्षेत्रमा शरण लिएका थिए।

अप्रिल २०२३ मा सुडानको सेना र आरएसएफबीच सुरु भएको गृहयुद्धले देशलाई भोकमरीतिर धकेलिरहेको छ । पश्चिमी दारफुर क्षेत्रमा जातीय संहारका घटना भइरहेका आरोपहरू लागिरहेका छन्।

गृहयुद्धमा मारिएका मानिसहरूको संख्या फरक–फरक बताइन्छ। तर एक अमेरिकी अधिकारीले गत वर्ष करिब १।५ लाख मानिसको मृत्यु भइसकेको आकलन गरेका थिए । युद्धका कारण करिब १।२ करोड मानिस आफ्नो घर छोड्न बाध्य भएका छन्।

काठमाडौँ,१७ भदौ । नेपालका प्रधानमन्त्री केपी शर्मा ओली र रुसी राष्ट्रपति भ्लादिमीर पुटिनबीच भेटवार्ता भएको छ । शाङ्घाई सहयोग सङ्गठन (एससीओ) शिखर सम्मेलनका लागि चीनको थियानजिनमा रहेका प्रधानमन्त्री ओली र रुसी राष्ट्रपति पुटिनबीच भेटवार्ता भएको हो । हिजो अबेर भएको भेटवार्ताको शुरुमा सञ्चारकर्मीसहितको उपस्थितिमा केहीबेर दुई नेताबीच छलफल भएको थियो ।

त्यसपछि झन्डै आधा घण्टा उनीहरुबीच एक्लाएक्लै छलफल भएको थियो । छलफलको अन्तिममा प्रतिनिधिमण्डलका सहभागी सदस्यलाई राष्ट्रपति पुटिनले भेट गरेका हुन् । भेटमा रुसी राष्ट्रपति पुटिनले नेपाल र रूसबीचको द्विपक्षीय सम्बन्धतत्कालीन सोभियत सङ्घ हुँदा सन् १९५६ जुन ५ देखि जुलाई ९ तारिखसम्म स्थापित भएको स्मरण गर्दै नेपाल र रुसबीचको सम्बन्धमा कुनै समस्या नरहेको बताए ।

भेटमा प्रधानमन्त्री ओलीले रुसमा पढेर स्वदेश फर्किएकाहरूले चिकित्सा क्षेत्रसहित नेपालका विभिन्न क्षेत्रमा सेवागरिरहेका उल्लेख गर्दै रुसको शैक्षिक अवस्था गुणस्तरीय रहेकामा प्रशंसा गरे।

उनीहरुबीच उच्चस्तरीय भ्रमणको आदान प्रदान तथा शैक्षिक, सांस्कृतिक, पर्यटकीय, सूचना प्रविधि, लगानीलगायत क्षेत्रमा सहकार्य अभिवृद्धि गर्ने सम्बन्धमा छलफल भएको प्रधानमन्त्रीको सचिवालयले जनाएको छ । यसअघि प्रधानमन्त्री ओली र चीनका राष्ट्रपति सी चीनपिङ लगायत विभिन्न देशका राष्ट्र प्रमुख तथा सरकार प्रमुखसँग भेटवार्ता भएको थियो ।

काठमाडौं , १६ भदौ । अफगानिस्तानमा गएको शक्तिशाली भूकम्पका कारण मृत्यु हुनेको सङ्ख्या ८१२ पुगेको छ भने तीन हजारभन्दा बढी व्यक्ति घाइते भएका छन्। पूर्वी प्रान्त कुनार र नंगरहार केन्द्रबिन्दु भएकाे भूकम्प ६ म्याग्निच्युड मापन गरिएको हो। भूकम्पपछि अहिलेसम्म ९ वटा परकम्पहरू महसूस गरिएका छन्।

तालिबान सरकारको स्वास्थ्य मन्त्रालयका प्रवक्ता शराफत जमानले भूकम्पले सिर्जना गरेको मानवीय संकटका लागि अन्तर्राष्ट्रिय सहयोगको आह्वान गरेका छन्। समाचार संस्था रोयटर्ससँग कुरा गर्दै उनले भने, “हामीलाई सहयोग आवश्यक छ, किनभने यहाँ धेरै मानिसहरूले ज्यान गुमाएका छन् र घरहरू भत्किएका छन्।”

तर अहिलेसम्म कुनै पनि देश वा अन्तर्राष्ट्रिय संस्थाले उद्धार वा राहत सहयोगको प्रस्ताव नगरेको अफगानिस्तानको विदेश मन्त्रालयले जनाएको छ। हाल उद्धारकार्य जारी रहेको र ३० जना चिकित्सक प्रभावित क्षेत्रमा परिचालित गरिएको मन्त्रालयले जनाएको छ।

अल जजीराका अनुसार ८ सय किलोभन्दा बढी स्वास्थ्य सामग्री कुनार पठाइएको छ। भूकम्पबाट विशेषगरी दुर्गम हिमाली गाउँहरूमा माटो र ढुंगाबाट बनेका घरहरू ध्वस्त भएका छन्। तालिबानका प्रवक्ता जबीहुल्लाह मुजाहिदले ती क्षेत्रमा मोबाइल सञ्जालसमेत अवरुद्ध भएकाले उद्धारमा कठिनाइ भइरहेको बताएका छन्।

संयुक्त राष्ट्रसंघका महासचिव एन्टोनियो गुटेरेसले सामाजिक सञ्जाल ‘एक्स’ मा लेख्दै अफगानिस्तानस्थित राष्ट्रसंघीय कार्यालयले पीडितलाई सहायता गर्न तयारी गरिरहेको जनाएका छन्। राष्ट्रसंघका अनुसार अफगानिस्तानको आधाभन्दा बढी जनसंख्यालाई तत्काल मानवीय सहायता आवश्यक छ।

भारत, चीन, पाकिस्तान, टर्की, अजरबैजानलगायत देशहरूले भूकम्पबाट भएको क्षतिप्रति दुःख व्यक्त गरेका छन्। तीमध्ये चीनले अफगानिस्तानको आवश्यकता अनुसार र आफ्नो क्षमताभित्र सहयोग गर्न तयार रहेको बताएको छ।

स्थानीय मानव अधिकारकर्मीका अनुसार दुई वर्षअघि हेरात सहरमा गएको भूकम्पपछि धेरै गाउँमा अझै अस्थायी टहरामा बसोबास भइरहेको छ। यसपटकको भूकम्पले ती क्षेत्रहरूलाई पुनः संकटमा पारेको छ।

हिन्दुकुश पर्वतश्रृंखलामा पर्ने अफगानिस्तान भारतीय र युरेसियन टेक्टोनिक प्लेटको सङ्घर्षस्थल भएकाले भूकम्पको उच्च जोखिममा पर्दछ। सन् २०२२ मा ६.१ म्याग्निच्युडको भूकम्प जाँदा झन्डै १ हजार जनाको मृत्यु भएको थियो। गएराति गएको भूकम्प त्यसयताकै सबैभन्दा शक्तिशाली मानिएको छ।

गृहयुद्धपछि पुनर्निर्माणको प्रयासमा रहेको अफगानिस्तान अहिले मानवीय संकटसँग जुधिरहेको छ। तालिबानको महिलासम्बन्धी नीतिप्रति असन्तुष्टि जनाउँदै विभिन्न अन्तर्राष्ट्रिय दातृ संस्थाहरूले सहायता कटौती गरेपछि देश झनै संकटमा परेको छ।

काबुल, १६भदौ । अफगानिस्तानमा आइतबार राति गएको ६.३ म्याग्निच्युडको शक्तिशाली भूकम्पका कारण कम्तिमा २५० जनाको मृत्यु भएको छ भने ५०० भन्दा बढी व्यक्ति घाइते भएका छन्। अमेरिकी भूगर्भ सर्वेक्षणका अनुसार भूकम्पको केन्द्र जलालाबाद शहरबाट लगभग १७ माइल टाढा रहेको थियो।

जलालाबाद करिब २ लाख जनसंख्या भएको शहर हो, जुन राजधानी काबुलबाट सडकमार्गमार्फत १०० माइलभन्दा कम दूरीमा अवस्थित छ। रातभर उक्त क्षेत्रमा शक्तिशाली धक्का महसुस गरिएको स्थानीयवासीहरूले जनाएका छन्।

भूकम्पबाट सर्वाधिक क्षति कुनार प्रान्तमा: द न्यु योर्क टाइम्सको रिपोर्टअनुसार अधिकांश मृत्युहरू अफगानिस्तानको पूर्वी छिमेकी कुनार प्रान्तमा भएको छन्। सरकारी प्रवक्ता जबिहुल्लाह मुजाहिदले सामाजिक सञ्जालमार्फत भूकम्पले केही पूर्वी प्रान्तहरूमा गम्भीर जनधनको क्षति पुर्‍याएको पुष्टि गरेका छन्। यद्यपि, विस्तृत विवरण भने उनले सार्वजनिक गरेका छैनन्।

अल जजीराका अनुसार भूकम्पको प्रभाव अफगानिस्तान मात्र नभई छिमेकी पाकिस्तानको खैबर पख्तुनख्वा र पञ्जाब प्रान्तसम्म पनि महसुस गरिएको थियो। ती क्षेत्रहरूमा पनि भूकम्पका कारण त्रास फैलिएको बताइएको छ।

अधिकारीहरूले मृतकको संख्या अझै बढ्न सक्ने अनुमान गरेका छन्, किनभने धेरै स्थानमा उद्धार कार्य जारी छ र क्षतिको पूर्ण विवरण आउन बाँकी रहेको बताइएको छ।

स्थानीय तथा अन्तर्राष्ट्रिय उद्धार टोलीहरूलाई तयारी अवस्थामा राखिएको छ भने घाइतेहरूको उपचारका लागि अस्थायी अस्पतालहरू समेत स्थापना गरिएको छ।

एजेन्सी । मिनियापोलिसस्थित एननसिएसन क्याथोलिक विद्यालयमा भएको गोलीकाण्डमा दुई बालबालिकाको मृत्यु भएको छ। १७ जना घाइते भएका छन्। मृत्यु हुने बालबालिकाको उमेर ८ र १० वर्षको रहेको प्रहरीले पुष्टि गरेको छ।

स्थानीय प्रहरी प्रमुख ब्रायन ओ’हाराले यस घटनालाई “बच्चा र भक्तहरू विरुद्ध सचेत रूपमा गरिएको हिंसा” भनेका छन्। उनका अनुसार बन्दुकधारीसँग राइफल, सटगन र पिस्तोल रहेका थिए। उनले चर्चको झ्यालमार्फत गोली प्रहार गरेका थिए।

प्रहरीका अनुसार गोली चलाएपछि बन्दुकधारीले आत्महत्या गरेका छन्।

घाइतेमध्ये १४ जना बालबालिका रहेका छन् भने दुईको अवस्था गम्भीर रहेको जनाइएको छ।

यस घटनाप्रति अमेरिकी राष्ट्रपति डोनाल्ड ट्रम्पले प्रतिक्रिया दिँदै ट्रुथ सोसलमार्फत लेखेका छन्, “ह्वाइट हाउसले यस भयानक घटनालाई निरन्तर निगरानी गरिरहेको छ।”

काठमाडौं ,९ भदौ । युक्रेनले हालै गरेको ड्रोन आक्रमणमा रूसका विभिन्न महत्वपूर्ण संरचनामा क्षति पुगेको अन्तर्राष्ट्रिय समाचार संस्था रोयटर्सले जनाएको छ।

रिपोर्टअनुसार, युक्रेनले एकैपटक ९५ वटा ड्रोन खसालेको छ। तीमध्ये एक ड्रोन सीमाबाट करिब ६० किलोमिटर टाढा रहेको कुर्स्क परमाणु केन्द्रमा खसेर सहायक ट्रान्सफर्मरमा क्षति पुर्‍याएको हो। आक्रमणपछि परमाणु भट्टीको उत्पादन क्षमता ५० प्रतिशतले घटेको जनाइएको छ। प्लान्टले भने विकिरण स्तर सामान्य रहेको र मानवीय क्षति नभएको स्पष्ट पारेको छ।

यस्तै, लेनिनग्राद क्षेत्रको फिनल्याण्ड खाडी किनारस्थित उस्ट–लुगा बन्दरगाहमा पनि कम्तीमा १० वटा ड्रोन खसालिएको छ। नोभाटेक कम्पनीद्वारा सञ्चालित इन्धन टर्मिनलमा टुक्रा परेर भीषण आगलागी हुँदा आकाशमा बाक्लो कालो धुवाँ देखिएको बताइएको छ। सो टर्मिनलमार्फत चीन, सिंगापुर, ताइवान, मलेशिया लगायतका मुलुकमा नाफ्था, हवाई इन्धन तथा अन्य पेट्रोलियम पदार्थ आपूर्ति हुने गर्दछ।

त्यस्तै, दक्षिणी रूसी शहर सिजरानमा भएको अर्को आक्रमणमा एक बालक घाइते भएको स्थानीय अधिकारीहरूले जनाएका छन्। यसअघि यही क्षेत्रमा रहेको रोसनेफ्ट तेल प्रशोधन कारखाना युक्रेनी आक्रमणपछि बन्द गर्नुपरेको थियो।

संयुक्त राष्ट्रसंघीय आणविक ऊर्जा एजेन्सी (आईएईए) ले कुर्स्क परमाणु केन्द्रमा भएको घटनाप्रति चिन्ता व्यक्त गर्दै युद्धबीचमा पनि परमाणु संरचनाहरू सुरक्षित हुनुपर्नेमा जोड दिएको छ।

युद्धको समाधानका लागि शान्ति वार्ता गर्ने चर्चा भइरहे पनि युक्रेन–रूसबीचको द्वन्द्व अझै तीव्र बन्दै गएको छ। अब आक्रमण मोर्चासँगै दुबै मुलुकका भित्री भागसम्म फैलिएको देखिन्छ।

अमेरिकी राष्ट्रपति डोनाल्ड ट्रम्पले हालै रूसी राष्ट्रपति भ्लादिमिर पुटिनसँग अलास्कामा भेटवार्ता गरी युद्ध अन्त्यका उपायबारे छलफल गरेका थिए। यद्यपि, रूसले युक्रेनी राष्ट्रपति भोलोदिमिर जेलेन्स्कीसँग प्रत्यक्ष वार्ता गर्ने चासो देखाएको छैन। ट्रम्पले पुटिनलाई दुई साताभित्र वार्ता टेबलमा बस्न अल्टिमेटम दिएका छन्।

काठमाण्डाै ,७ भदौ । नेपाल भ्रमणमा रहेकी समाजवादी गणतन्त्र भियतनामकी उपराष्ट्रपति भो थि आन सुआनसँग परराष्ट्रमन्त्री डा. आरजु राणा देउवाले आज काठमाण्डाैमा शिष्टाचार भेटवार्ता गरेकी छन् ।

राष्ट्रपति रामसहायप्रसाद यादवको निमन्त्रणामा तीन दिने औपचारिक भ्रमणका लागि नेपाल आएकी उपराष्ट्रपति भोसँग भएको भेटमा द्विपक्षीय हितका विषय, आपसी चासो र नेपाल–भियतनाम सम्बन्धका विभिन्न आयामबारे छलफल गरियो।

भेटमा मन्त्री राणाले भियतनामको तीव्र आर्थिक विकासप्रति शुभकामना दिंदै अन्य मुलुकले समेत भियतनामबाट सिक्न सक्ने धारणा राखिन।

उनले दुवै देशबीचको सांस्कृतिक सम्बन्ध बलियो पार्नुपर्नेमा जोड दिंदै गौतम बुद्धको जन्मस्थल लुम्बिनी भ्रमणमा आउने भियतनामी पर्यटकको प्रसंग उठाइन। साथै, सांस्कृतिक पर्यटन प्रवर्द्धनमा दुवै देशले सहकार्य गर्न सक्ने उल्लेख गरिन।

मन्त्री राणाले भियतनामलाई भैरहवा स्थित गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थलमा उडान सञ्चालनका लागि वातावरण बनाउन आग्रह गरिन।

त्यस्तै, सन् २०२६ पछि नेपाल अतिकम विकसित राष्ट्र (LDC) को सूचीबाट बाहिरिने तयारीमा रहेको भन्दै त्यसपछिको चरणमा भियतनामको सहयोग आवश्यक हुने बताइन।

नेपालले सन् २०२७–२०२९ का लागि मानव अधिकार परिषद् र २०२९–२०३१ का लागि आर्थिक तथा सामाजिक परिषद् सदस्यमा उम्मेदवारी दिएको प्रसंगमा राणाले भियतनामको समर्थन मागिन। यसमा उपराष्ट्रपति भोले नेपाललाई सहयोग गर्ने प्रतिबद्धता जनाइन्।

दुवै पक्षबीचको छलफलमा द्विपक्षीय तथा बहुपक्षीय सहयोग, दक्षिण–दक्षिण सहयोग, जलवायु परिवर्तन लगायतका विश्वव्यापी एजेन्डामा सहकार्य गर्दै अघि बढ्ने सहमति गरियो।

साथै, जी–७७ र नाम (Non-Aligned Movement) का सदस्यका रूपमा नेपाल र भियतनाम विकासशील मुलुकहरूको हितमा एकमत भएर काम गर्दै आएको पनि दुवै पक्षले स्मरण गरिन।

काठमाडौं, ७ भदौ । समाजवादी गणतन्त्र भियतनामकी उपराष्ट्रपति भो थि आन सुआन नेपाल औपचारिक भ्रमणमा आएकी छिन्।

तीनदिने भ्रमणका लागि शनिबार काठमाडौं आइपुगेकी उनलाई त्रिभुवन अन्तर्राष्ट्रिय विमानस्थलमा परराष्ट्रमन्त्री आरजु राणा तथा उच्च नेपाली अधिकारीहरूले स्वागत गरेका थिए।

यो भ्रमण उपराष्ट्रपति रामसहायप्रसाद यादवको निमन्त्रणामा भएको हो। भियतनामको तर्फबाट नेपालमा भएको यो पहिलो उच्चस्तरीय भ्रमण मानिएको छ।

वाशिङ्टन । अमेरिकी सरकारले हाल भिसा प्राप्त गरेका करिब ५ करोड ५० लाख विदेशीको छानबिन गर्ने भएको छ।

अमेरिकी विदेश मन्त्रालयले सार्वजनिक गरेको विज्ञप्तिमा भिसा अवधिभन्दा बढी बसेका, आतंकवाद वा आपराधिक गतिविधिमा संलग्न भएको आशंका लागेका विदेशीलाई पहिचान गरी देश निकाला गर्न कदम चालिने उल्लेख छ।

यस क्रममा प्रहरी प्रशासन, अध्यागमन अभिलेख तथा भिसा जारी गरेपछि सार्वजनिक भएका नयाँ विवरणहरूको समेत समीक्षा गरिने मन्त्रालयले जनाएको छ।

अवैध आप्रवासी मुद्दालाई प्रमुख एजेन्डा बनाएर दोस्रो कार्यकाल जितेका राष्ट्रपति डोनाल्ड ट्रम्पले अध्यागमनमाथि कठोर नीति अपनाउँदै आएका छन्। सुरुवाती चरणमा अवैध आप्रवासीलाई लक्षित गरिएको भए पनि हाल कानुनी रूपमा भिसा लिएर अमेरिकामा बसिरहेका विदेशीमाथि समेत निगरानी कडा पारिएको छ।

सन् २०२४ को आर्थिक वर्षमा मात्र अमेरिकाले स्थायी बसोबास (‘ग्रीन कार्ड’) बाहेक करिब १ करोड १० लाख विदेशीलाई अस्थायी भिसा जारी गरेको थियो। तीमध्ये झण्डै ७७ प्रतिशत व्यवसाय वा पर्यटन प्रयोजनका लागि, करिब सात प्रतिशत विद्यार्थी र शिक्षाविद् तथा उनीहरूका परिवारका लागि जारी गरिएको थियो।

कतिपय भिसा दीर्घकालीन हुने भएकाले सबैको छानबिन खर्चिलो र समय लाग्ने प्रक्रिया हुने अनुमान गरिएको छ। यसअघि नै ट्रम्प प्रशासनले भिसावाहकको सामाजिक सञ्जाल गतिविधि निगरानी गर्दै आएको र हालै मात्र करिब ६ हजार विद्यार्थीको भिसा म्याद नाघेको भन्दै रद्द गरिएको जनाएको छ।

यसैबीच, अमेरिकी विदेश मन्त्री मार्को रुबियोले व्यावसायिक ट्रक चालकका लागि नयाँ भिसा जारी नगर्ने घोषणा गरेलगत्तै सरकारले भिसावाहक विदेशीमाथि व्यापक छानबिन गर्ने निर्णय सार्वजनिक गरेको हो।

काठमाडौं,२९ साउन । इजरायलले गाजामा युद्ध विराम रोक्ने भएको छ । साथै युद्धको क्रममा बन्धक बनाइएकाहरुलाइ मुक्त गराउने भएको छ। इजरायलका प्रधानमन्त्री बेन्जामिन नेतन्याहुले गाजामा युद्ध रोक्ने प्रयास अब बाँकी रहेका सबै बन्धकहरूलाई एकैपटक मुक्त गराउने विषयमा केन्द्रित भएको बताएका छन्।

यसअघि प्रस्तावित योजनामा ६० दिनको युद्धविराम र केही जीवित इजरायली बन्धकको मात्र रिहाइको प्रावधान थियो। तर नयाँ संकेतसँगै वार्ताको प्राथमिकता सम्पूर्ण बन्धकको तत्काल रिहाइमा केन्द्रित भएको देखिन्छ।

हमासका अनुसार, उसका नेताहरूको प्रतिनिधिमण्डल इजिप्टका अधिकारीहरूसँग प्रारम्भिक वार्ताका लागि राजधानी कायरोमा पुगेको छ। रिपोर्टहरूअनुसार, मध्यस्थकर्ताहरूले आगामी हप्ताभित्र सम्झौता हुने आशा राखेका छन्।

गत महिना इजरायल र हमासबीचको अप्रत्यक्ष वार्ता असफल भएपछि इजरायलले आफ्नो सैन्य अभियानलाई विस्तार गर्दै सम्पूर्ण गाजा पट्टी कब्जा गर्ने विवादास्पद योजना घोषणा गरेको थियो। यस योजनामा करिब २० लाख प्यालेस्टिनी आश्रित रहेका क्षेत्रहरू समेत समावेश छन्।

बीबीसीले उल्लेख गरेअनुसार, नेतन्याहुको यो ताजा अभिव्यक्तिले युद्धविरामको सम्भावनालाई फेरि बल मिलाएको छ, यद्यपि अन्तिम नतिजा वार्ता प्रक्रियामा निर्भर रहनेछ।