काठमाडौं,३१ असोज ।नेपालले ओमानमा जारी आइसीसी टी–२० विश्वकप एसिया तथा पूर्वी एसिया प्यासिफिक क्षेत्र छनोटको उपाधि जितेको छ। आज सम्पन्न सुपर सिक्सको अन्तिम खेलमा सामोआलाई १२४ रनले पराजित गर्दै नेपालले ११ वर्षपछि पहिलोपटक आईसीसीको कुनै प्रतियोगिताको उपाधि जितेर इतिहास रचेको हो।

२१२ रनको लक्ष्य पछ्याउन मैदानमा उत्रिएको सामोआ २० ओभरमा ७ विकेट गुमाउँदै केवल ८७ रनमै सीमित भयो।

त्यसअघि ओमानको अल अमेरात क्रिकेट मैदानमा टस हारेर पहिले ब्याटिङ गरेको नेपालले २० ओभरमा ४ विकेटको क्षतिमा २११ रन बनायो।
नेपालका ओपनर आसिफ शेख र अलराउन्डर दीपेन्द्रसिंह ऐरी ले अर्धशतक प्रहार गर्दै उत्कृष्ट प्रदर्शन गरे।

विकेटकिपर आसिफले ४१ बलमा ७ चौका र ४ छक्काको मद्दतमा ६९ रन बनाए भने ऐरीले ३३ बलमा २ चौका र ४ छक्का प्रहार गर्दै ५३ रनको योगदान दिए।

इन्निङ्सको अन्त्यतिर लोकेश बम ले केवल १२ बलमा २ चौका र ४ छक्का सहित ३९ रनको विस्फोटक इनिङ्स खेले। कप्तान रोहित पौडेल ले १२ बलमा २१ रन बनाएर साथ दिएका थिए।

सामोआका बलरहरू मध्ये ड्यानियल बर्गेस, साउमानी टिली, डेरियस भासर र नोआ मीड ले एक–एक विकेट हात पारे।

काठमाडौ,३१ असोज । ओमान क्रिकेट एकेडेमीमा जारी खेलमा नेपालले सामोआलाई २१२ रनको लक्ष्य दिएको छ। टस जितेर सामोआले फिल्डिङ रोजेपछि पहिले ब्याटिङ गरेको नेपालले ४ विकेटको क्षतिमा २११ रन जोड्यो।

नेपालका लागि ओपनर आसिफ शेख र दीपेन्द्रसिंह ऐरी ले अर्धशतक प्रहार गर्दै शानदार प्रदर्शन गरे। आसिफले ४१ बलमा ७ चौका र १ छक्काको मद्दतमा ६९ रन बनाए भने दीपेन्द्रले ३३ बलमा २ चौका र ४ छक्का सहित ५३ रनको योगदान दिए।

ओपनर कुशल भुर्तेल १५ बलमा १७ रन बनाए भने आरिफ शेख ९ रनमा आउट भए। कप्तान रोहित पौडेल १२ बलमा १ चौका र १ छक्का प्रहार गर्दै नटआउट २१ रनमा रहे।

आक्रामक ब्याटिङ गरेका लोकेश बम ले १२ बलमा नटआउट ३९ रन प्रहार गरे। उनले २ चौका र ४ छक्का हानेका थिए।

आजको खेलका लागि अघिल्ला खेलमा मौका नपाएका केही खेलाडीलाई टोलीमा समावेश गरिएको छ। आरिफ शेखसँगै करण केसीले पनि आज खेल्ने मौका पाएका छन्। ललित राजवंशी टोलीमा फर्किएका छन् भने लोकेश बम दोस्रो खेलमा मैदान उत्रिएका हुन्।

यसअघि सोमपाल कामी, कुशल मल्ल, सन्दीप जोरा र आदिल अन्सारी आजको टोलीमा परेका छैनन्।

नेपालको टोलीमा आसिफ शेख, कुशल भुर्तेल, रोहित पौडेल (कप्तान), दीपेन्द्रसिंह ऐरी, आरिफ शेख, गुल्सन झा, लोकेश बम, करण केसी, नन्दन यादव, सन्दीप लामिछाने, ललित राजवंशी रहेका छन् ।

अन्तिम खेलअघि नेपालको ८ अंक छ भने दोस्रो स्थानमा रहेको घरेलु टोली ओमानको पनि ८ अंक नै छ। तर रनरेटमा नेपाल अघि छ — नेपालको रनरेट ०.७४५ रहेको छ भने ओमानको ०.४५६ मात्र छ।

आज ओमान विजयी भएसँगै युएई ६ अंकमा झरेर तेस्रो स्थानमा पुगेको छ। नेपाल, ओमान र युएई — यी तीन टोलीले अर्को वर्ष भारत र श्रीलंकामा हुने टी–२० विश्वकपमा स्थान सुरक्षित गरिसकेका छन्।

अब छनोट अन्तर्गतको अन्तिम खेल नेपाल र सामोआबीच हुनेछ। यो खेलको नतिजासँगै च्याम्पियन टिमको टुंगो लाग्नेछ।
नेपालले जित निकाल्न सकेमा च्याम्पियन बन्नेछ, तर झिनो अन्तरले हार्दा पनि नेपाल रनरेटको आधारमा च्याम्पियन हुने सम्भावना बलियो रहेको छ।

काठमाडौ,३१ असोज । पाकिस्तानको उत्तरी वजीरिस्तानस्थित मिर अलीमा रहेको सैन्य शिविरमा शुक्रबार भयानक आत्मघाती आक्रमण भएको छ। उक्त आक्रमणमा परेर सात जना पाकिस्तानी सैनिकको मृत्यु भएको पाकिस्तानी अधिकारीहरूले जनाएका छन्।

तहरीक–ए–तालिबान पाकिस्तान (टीटीपी) का लडाकुहरूले आक्रमणको जिम्मेवारी लिएका छन्। फाटा क्षेत्रमा अलकायदा लडाकुहरूका विरुद्ध पाकिस्तानी सेनाले कारबाही थालेपछि विभिन्न लडाकु समूहहरू मिलेर सन् २००७ मा टीटीपी गठन भएको थियो।

आत्मघाती बमसहित आएका आक्रमणकारीले सैन्य शिविरभित्र गाडी ठोक्दै ठूलो विस्फोट गराएका थिए। विस्फोटपछि घटनास्थल वरिपरि बाक्लो धूवाँको मुस्लो उडेको बताइएको छ।

पाकिस्तानमा लामो समयदेखि भइरहेका हिंसात्मक गतिविधिका कारण इस्लामाबाद र छिमेकी अफगानिस्तानबीचको सम्बन्ध चिसिएको छ। इस्लामाबादले अफगानिस्तानको तालिबान सरकारसँग टीटीपीमाथि नियन्त्रण गर्न आग्रह गर्दै आएको भए पनि उसले खासै प्रतिक्रिया नदिएको पाकिस्तानको आरोप छ।

यही विषयमा दुवै देशबीच सीमाक्षेत्रमा सशस्त्र झडप समेत भएको थियो। अहिले दुबै पक्षबीच युद्धविरामको स्थिति रहेको बताइन्छ।

काठमाडौ,३१ असोज । जापानका पूर्वप्रधानमन्त्री तोमिची मुरयामाको १०१ वर्षको उमेरमा शुक्रबार निधन भएको जापानी अधिकारीहरूले जनाएका छन्।

दोस्रो विश्वयुद्धका बेला जापानले एसियाली देशहरूमा गरेका अत्याचारबारे ‘गहिरो पश्चाताप’ व्यक्त गर्ने ऐतिहासिक वक्तव्यका कारण मुरयामा विशेष रूपमा चिनिएका थिए।

सोसल डेमोक्रेटिक पार्टीकी नेत्री मिजुहो फुकुसिमाले एक्समार्फत जानकारी दिँदै लेखिन्, “जापानी राजनीतिको पिता मुरयामा तोमिचीको आज बिहान ११ः२८ बजे ओइटा सिटीस्थित अस्पतालमा १०१ वर्षको उमेरमा निधन भएको छ।”

उनको गृहनगर ओइटाका सोसल डेमोक्रेटिक पार्टीका महासचिव हिरोयुकी टाकानोले मुरयामाको बुढ्यौलीका कारण निधन भएको पुष्टि गरे।

सन् १९९५ मा जापानको आत्मसमर्पणको ५०औँ वार्षिकोत्सवका अवसरमा जारी गरिएको आफ्नो प्रसिद्ध वक्तव्यमा मुरयामाले भनेका थिए, “जापानले औपनिवेशिक शासन र आक्रामक नीतिहरूका माध्यमबाट धेरै देशका, विशेष गरी एसियाली मुलुकका नागरिकहरूलाई ठूलो क्षति र पीडा पुर्‍यायो। भविष्यमा यस्ता गल्तीहरू दोहोरिन नदिनका लागि म गहिरो नम्रता र पश्चातापका साथ यी इतिहासका अकाट्य सत्यहरूलाई सम्मान गर्दछु र हार्दिक माफी प्रकट गर्दछु।”

यो वक्तव्य जापानले दोस्रो विश्वयुद्धमा गरेका अपराधबारे माफी माग्ने क्रममा अपनाइने स्थायी मापदण्ड बन्यो। त्यसपछि आएका प्रधानमन्त्रीहरूले पनि युद्धका ६०औँ र ७०औँ वार्षिकोत्सवमा ‘गहिरो पश्चाताप’ र ‘हार्दिक माफी’ जस्ता शब्दहरू प्रयोग गर्दै मुरयामाको भावना दोहोर्‍याएका थिए।

घना आँखीभौँका कारण चिनिने मुरयामाले जापानको युद्धपछिको प्रमुख राजनीतिक शक्ति लिबरल डेमोक्रेटिक पार्टीसमेत समावेश भएको गठबन्धन सरकारको नेतृत्व गरेका थिए। उनी सन् १९९४ देखि १९९६ सम्म प्रधानमन्त्री रहे।

उनको कार्यकाल जापानका लागि अत्यन्त चुनौतीपूर्ण रह्यो। सन् १९९५ मा पश्चिमी जापानमा विनाशकारी भूकम्प आएको थियो भने त्यही वर्ष टोकियोको सबवेमा भएको सारिन ग्यास आक्रमणमा दर्जनौँ नागरिकको मृत्यु र करिब ५ हजार ८०० जना घाइते भएका थिए।

मुरयामाले आफ्नो जीवनको आरम्भिक चरणमै जापानको इतिहाससँग प्रत्यक्ष सम्बन्ध राखेका थिए। सन् १९४४ मा विश्वविद्यालयमा अध्ययनरत रहँदै उनी जापानी शाही सेनामा भर्ती भएका थिए।

सन् २०१५ मा जापानको सार्वजनिक प्रसारक एनएचकेसँगको अन्तर्वार्तामा उनले सेनामा बिताएको समय स्मरण गर्दै भनेका थिए, “सेना भनेको डरलाग्दो कुरा थियो। त्यहाँ विद्रोह वा तर्क गर्न पूर्ण रूपमा निषेध गरिएको थियो।”

उनले युद्धको अन्त्यतिरको कठिन अवस्थाको पनि स्मरण गरेका थिए, “त्यो समयसम्म खाना निकै अभावमा थियो, हतियारहरू पनि समाप्तप्रायः भइसकेका थिए। बाँसबाट बनेका हतियार मात्र बाँकी थिए। यस्तो अवस्थामा हामी कसरी युद्ध गर्न सक्थ्यौँ भनेर सोच्दा अहिले पनि डर लाग्छ।”

जापानको राजनीतिक इतिहासमा तोमिची मुरयामा नम्रता, आत्मआलोचना र मानवताको पक्षमा दृढ रहने नेता मानिन्छन्। उनको निधनले जापानी राजनीतिको एउटा युगको अन्त्य भएको रूपमा लिइएको छ।

काठमाडौ,३० असोज । पश्चिमी भारतको राजस्थान राज्यमा एक यात्रुबाहक बसमा भीषण आगलागी हुँदा कम्तीमा २० जनाको मृत्यु भएको भारतीय अधिकारीहरूले जनाएका छन्।

राजधानी जयपुरदेखि करिब ५ सय ५० किलोमिटर टाढा जैसलमेर जिल्लाको थैयत गाउँ नजिकै गुडिरहेको बसमा अचानक आगलागी भएको थियो। बसमा ५७ जना यात्रु सवार थिए।

अधिकारीहरूका अनुसार, बसको पछाडिको भागबाट धुवाँ निस्कन थालेपछि चालकले तुरुन्तै बस रोके पनि केही मिनेटमै आगोले सम्पूर्ण बसलाई जलाएको थियो। दुर्घटनामा परेकामध्ये केहीको अवस्था गम्भीर रहेको र घाइतेहरूलाई अस्पताल लगिएको प्रहरीले जनाएको छ।

आगलागीको कारण स्पष्ट नभए पनि सर्ट सर्किटका कारण आगो लागेको हुनसक्ने अनुमान गरिएको छ।

काठमाडौ,२७ असोज । प्यालेस्टिनी सशस्त्र समूह हमासले करिब दुई वर्षदेखि आफ्नो नियन्त्रणमा रहेका नेपाली विद्यार्थी विपिन जोशीको मृत्यु भएको पुष्टि गरेको छ।

७३८ दिनदेखि बन्धक बनाइएका जोशीको शव हमासले आजै (सोमबार) इजरायललाई हस्तान्तरण गर्ने जनाएको छ। यसअघि उनको अवस्था अज्ञात मानिँदै आएको थियो।

संघर्षविराम सम्झौताअन्तर्गत सोमबार २० जना जीवित बन्धकलाई मुक्त गरेपछि हमासको सैन्य शाखाले जोशीसहित चार जनाको शव हस्तान्तरण गर्न लागेको हो।

हमासले सार्वजनिक गरेको सूचीमा विपिन जोशीसँगै इजरायली नागरिक गाइ इलोज, योसी शराबी र सैनिक अधिकारी क्याप्टेन डेनियल पेरेजको नाम रहेको अन्तर्राष्ट्रिय सञ्चारमाध्यमहरूले जनाएका छन्।

इजरायलस्थित नेपाली राजदूत धनप्रसाद पण्डितका अनुसार, इजरायली सेनाले हस्तान्तरण गर्न लागिएका चार शवमध्ये जोशीको पनि हुन सक्ने प्रारम्भिक जानकारी प्राप्त भएको छ।

बीबीसी र टाइम्स अफ इजरायलका अनुसार, रेडक्रसको टोलीले गाजाबाट शवहरू संकलन गरी इजरायली सेनालाई बुझाउने प्रक्रिया सुरु गरेको छ। इजरायली सेनाले शव बुझेपछि सैन्य सम्मानका साथ तेल अविवस्थित अबु कबिर फरेन्सिक इन्स्टिच्युटमा लैजाने र पहिचान प्रक्रिया दुई दिनभित्र सम्पन्न गर्ने जनाएको छ।

यसैबीच, सम्झौताअनुसार २८ जनाको शव फिर्ता गर्नुपर्नेमा हमासले केवल चार जनाको मात्रै शव दिन लागेको भन्दै इजरायलमा बन्धक तथा बेपत्ता परिवार मञ्चले गम्भीर आपत्ति जनाएका छन्। उनीहरूले यसलाई सम्झौताको ठाडो उल्लंघन भन्दै सबै शव फिर्ता नभएसम्म इजरायलले पनि आफ्नो तर्फको सम्झौता रोक्नुपर्ने माग गरेका छन्।

हमासले भने गाजामा भएको व्यापक विनाशका कारण केही शवहरूको अवस्था र स्थानबारे आफूहरूलाई जानकारी नभएको दाबी गरेको छ।

सुदूरपश्चिम विश्वविद्यालयमा कृषि विज्ञान अध्ययनरत जोशी ‘लर्न एन्ड अर्न’ कार्यक्रमअन्तर्गत इजरायलको दक्षिणी क्षेत्रमा रहेको किबुज अलुमिममा कार्यरत थिए। सन् २०२३ अक्टोबर ७ मा हमासले आक्रमण गर्दा उनीसहित १० नेपाली विद्यार्थीको मृत्यु भएको थियो भने जोशीलाई बन्धक बनाइएको थियो।

काठमाडौं,२७ असोज । इजरायली अधिकारीहरूले नेपाली विद्यार्थी विपिन जोशी जीवित नरहेको जानकारी दिएका छन्। सोमबार इजरायली प्रधानमन्त्री कार्यालयका अधिकारी र त्यहाँको सेनाले यो जानकारी इजरायलस्थित नेपाली राजदूतावासलाई औपचारिक रूपमा गराएको हुन्।

परराष्ट्र मन्त्रालय स्रोतका अनुसार, इजरायलस्थित नेपाली दूतावासले उक्त जानकारी मन्त्रालयलाई अनौपचारिक रूपमा पठाएको छ।

हमासले २०८० असोज २३ गते किबुट्ज अलुमिमबाट जोशीलाई अपहरण गरेको थियो। केही समयअघि जोशीको जीवित अवस्थाको भिडियो सार्वजनिक भएको थियो।

सोमबार हमासले आफ्नो कब्जामा रहेका २० जनालाई रेडक्रसका अधिकारीमार्फत् इजरायलतर्फ हस्तान्तरण गर्दैछ।

विपिन आक्रमण हुनुभन्दा एक महिनाअघि मात्र कृषि अध्ययनका लागि विद्यार्थी आदानप्रदान कार्यक्रमअन्तर्गत नेपालबाट इजरायल पुगेका थिए।

गाजाको सीमामा अवस्थित किबुट्ज अलुमिममा कार्यरत १७ नेपाली विद्यार्थीमध्ये १० जनाको हमासको आक्रमणका क्रममा मृत्यु भएको थियो। उनीहरू बम आश्रयस्थलमा लुकेका थिए। हमलाका क्रममा फ्याँकिएका ग्रेनेडका कारण विपिन घाइते भएका र पछि हमासले उनलाई अपहरण गरेको बताइएको छ।

काठमाडौँ,२७ असोज । पहिलो बन्धकलाई १५ मिनेटभित्र रिहा गरिने इजरायली सुरक्षा अधिकारीले पुष्टि गरेका छन्। इजरायली सेनाले (आईडीएफ) सम्झौताको कार्यान्वयनको भागस्वरूप बन्धकहरूलाई स्थानान्तरण र फिर्ता गर्ने तयारी गरिरहेको जनाएको छ।

अधिकारीका अनुसार उत्तरी गाजा पट्टीमा स्थानीय समयअनुसार बिहान ८ बजेबाट बन्दी रिहाइ प्रक्रिया सुरु हुने छ। “समय परिवर्तन हुनसक्छ, जानकारी उपलब्ध हुनेबित्तिकै अपडेट दिइनेछ,” उनले भने।

इजरायली वायुसेनाले माइक्रोब्लगिङ साइट एक्स (X) मार्फत जानकारी दिँदै बन्धकहरूलाई घर ल्याउन दुई हेलिकप्टर तयारी अवस्थामा रहेको जनाएको छ।

काठमाडौं,२६ असोज । गाजामा हमासको नियन्त्रणमा रहेका नेपाली बिपिन जोशी जीवित रहेको नयाँ सूची सार्वजनिक भएको छ।

यसअघि उनको अवस्था अज्ञात रहेको समाचार सीएनएनले प्रकाशित गरेको थियो। तर अहिले टाइम्स अफ इजरायल र एपीसहितका अन्तर्राष्ट्रिय सञ्चारमाध्यमले जारी गरेको २२ जना जीवित बन्धकहरूको सूचीमा बिपिन जोशीको नाम पनि समावेश गरिएको छ।

शुक्रबारदेखि सुरु भएको युद्धविरामले अक्टोबर ७, २०२३ मा सुरु भएको दुई वर्ष लामो विनाशकारी युद्ध अन्त्य हुने संकेत देखिएको छ। उक्त आक्रमणमा करिब १,२०० जना मारिएका थिए भने २५१ जना अपहरणमा परेका थिए।

गाजाको स्वास्थ्य मन्त्रालयका अनुसार युद्धमा हालसम्म ६७ हजार प्यालेस्टिनीको ज्यान गइसकेको छ, जसमा आधाभन्दा बढी महिला र बालबालिका छन्। गाजाको २० लाख जनसंख्याको करिब ९० प्रतिशत विस्थापित भइसकेका छन्।

२५१ मध्ये गाजामा अहिले ४८ बन्धक छन् भने २६ जनाको मृत्यु भइसकेको छ। मृतकमध्ये सन् २०१४ मा मारिएका एक इजरायली सैनिकको शव पनि समावेश छ। शुक्रबार भएको युद्धविरामसँगै सोमबारदेखि मंगलबारसम्म बन्धक रिहा हुने अपेक्षा गरिएको छ। इजरायलले दुई हजार प्यालेस्टिनी कैदी रिहा गर्ने तयारी गरेको छ। जीवित ठानिएका २२ बन्धकमध्ये बिपिन जोशी फिर्ता हुने आशा नेपालले पालेको छ।

जोशी इजरायल पुग्नुअघि एक महिना अघि मात्र नेपालबाट गएका थिए। उनी गाजामा जीवित रहेका एकमात्र गैर–इजरायली बन्धक हुन्। गाजा सीमाको किबुट्ज अलुमिममा उनी काम र कृषि अध्ययनका लागि पुगेका थिए। सो क्रममा १७ नेपाली विद्यार्थीमध्ये १० जनाको हमासको आक्रमणमा मृत्यु भएको थियो।

आक्रमणको बेला बिपिनले बम आश्रयबाट ग्रेनेड फ्याँकेर धेरै साथीहरूलाई बचाएका थिए तर उनी आफैं घाइते भएर अपहरणमा परेका थिए।

हालै इजरायली सेनाले प्राप्त गरेको भिडियोमा बिपिनले आफूलाई परिचय दिँदै भनेका छन्,

“मेरो नाम बिपिन जोशी हो, म नेपालबाट आएको हुँ। म यहाँ सिक्न र कमाउन कार्यक्रमअन्तर्गत कृषि फार्ममा काम गर्दैछु।”

यो भिडियो सन् २०२३ नोभेम्बरमा खिचिएको अनुमान गरिएको छ। यसले उनी जीवित रहेको प्रमाण दिएको परिवारले दाबी गरेको छ।

बिपिनकी आमा पद्मा जोशी र बहिनी पुष्पा जोशीले उनको रिहाइका लागि इजरायल पुगेर अपिल गरेका थिए। उनीहरूले अमेरिकासम्म पुगेर अन्तर्राष्ट्रिय समुदायसँग पनि सहयोग मागेका थिए।

बिपिनसँगै जीवित ठानिएकामा गाली बर्मन, जिभ बर्मन, एलकाना बोहबोट, रोम ब्रास्लाभस्की, निमरोड कोहेन, एरियल क्युनियो, डेभिड क्युनियो, एभ्याटर डेभिड, गाय गिल्बोआ-दलाल, म्याक्सिम हार्किन, इटान हर्न, सेगेभ काल्फोन, बार कुपर्श्टाइन, मातान आङ्ग्रेस्ट, ओम्री मिरान, इटान मोर, तामिर निम्रोदी, योसेफ-चाइम ओहाना, एलोन ओहेल, अविनाटन ओर, र मातान जंगाउकर छन्।

काठमाडौ,२४ असोज । नेपालले आज जापानसंग प्रतिस्पर्धा गर्दैछ । आईसीसी टी–२० विश्वकप एशिया तथा इस्ट–एशिया प्यासिफिक छनोट अन्तर्गत नेपाल आज जापानसँग प्रतिस्पर्धा गर्न लागेको । खेल ओमानमा नेपाली समयअनुसार दिउँसो सवा चार बजे सुरु हुनेछ। नेपालले एक खेल अगावै नै सुपर–६ चरणमा स्थान सुरक्षित गरिसकेको छ। हिजो जापानले कुवेतलाई पाँच विकेटले पराजित गरेसँगै नेपालले सुपर–६ मा पुग्ने बाटो सुनिश्चित भएको हो।

समूह ‘बी’ को पहिलो खेलमा नेपालले कुवेतलाई ५८ रनले हराएको थियो। हाल नेपाल नेट रनरेटको आधारमा समूहको शीर्ष स्थानमा रहेको छ भने जापान दोस्रो स्थानमा छ। दुवै टोली सुपर–६ मा पुगेका छन्, भने लगातार दुई हार बेहोरेको कुवेत प्रतियोगिताबाट बाहिरिएको छ।