दाङ,११ माघ ।नेपाल लेखापढी कानुन व्यवसायी इकाई समिति तुलसीपुरको १०औं वार्षिक साधारण सभा सम्पन्न भएको छ। कार्यक्रममा अध्यक्ष शोभाखर न्यौपानेको अध्यक्षता र नेपाल लेखापढी कानुन व्यवसायी केन्द्रिय उपाध्यक्ष तथा लुम्बिनी प्रदेश संयोजक अर्जुन केसीको प्रमुख आतिथ्य रहेको थियो।

साधारण सभामा प्रमुख अतिथि केसीले लेखापढी कानुन व्यवसायीहरूलाई ‘बिचौलिया’को रूपमा हेरिएकोप्रति चिन्ता व्यक्त गर्दै व्यवसायीहरूको गरिमा रक्षा गर्न सरकार गम्भीर हुनुपर्ने बताए। उनले लेखापढी व्यवसायीहरूले कालो कोट लगाउन पाउने सर्वोच्च अदालतको निर्णयको कार्यान्वयन गर्न आग्रह गरे।

मालपोत कार्यालय तुलसीपुरका प्रमुख खिम बहादुर खड्काले मालपोत कार्यालयका कामलाई सहज बनाउन लेखापढी व्यवसायीहरूले सहजीकरण गर्नुपर्नेमा जोड दिए। उनले सरकारका कानूनबमोजिम मालपोत कार्यालयले सेवा प्रदान गरिरहेको बताए।

कार्यक्रममा इकाई समितिका ज्येष्ठ सदस्य शेवकराम आचार्यलाई सम्मान गरिएको थियो। त्यस्तै, इकाई समिति घोराहीका अध्यक्ष पर्शुराम डाँगी, इकाई समिति लमहीका अध्यक्ष धुप नारायण चौधरी, केन्द्र प्रचार विभाग प्रमुख नेप बहादुर वली, र केन्द्रिय लेखा संयोजक दोर्ण प्रसाद आचार्यलगायतले शुभकामना व्यक्त गरेका थिए।

कार्यक्रमको सहजीकरण इकाई समिति तुलसीपुरका सचिव कालिबहादुर चौधरीले गरेका थिए। सभाको बन्द सत्रले सांगठनिक तथा आर्थिक प्रतिवेदन सर्वसम्मत पारित गरेको छ। नयाँ कार्यसमिति चयनका लागि निर्वाचन गरिने जानकारी सभाले दिएको छ।

दाङ ,११ माघ। पूर्व प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहालले दाङको दंगीशरण ३ चखौरामा रहेको ऐतिहासिक थारु संग्राहलयको अवलोकन गरेका छन् । शुक्रवार उनले थारुहरुको अध्ययन तथा अनुसन्धान थलोको रुपमा रहेको थारु संग्रालयको अवलोकन गरेका हुन ।

थारु संग्राहलयको अवलोकन गदै पूर्व प्रधानमन्त्री दाहालले दक्षिण एशीयाकै राम्रो र महत्वपूर्ण संग्रालय रहेको बताए । उनले संग्राहलयले पर्यटन प्रबद्र्धन, थारु संस्कृतिको संरक्षण,इतिहासको संरक्षण र प्रबद्र्धनमा ठूलो योगदान र भूमिका खेल्ने बताए । दाङमा स्थापना भएको ऐतिहासिक थारु संग्रालय बन्नु राम्रो र लुम्बिनीकै लागि महत्वपूर्ण पर्यटकीय गन्तब्य रहेको बताए ।

पूर्व प्रधानमन्त्री दाहालले सामुदायिक क्षेत्रको पहलमा यति व्यवस्थित र ठूलो संग्राहलय स्थापना र सञ्चालन हुनु देशले गौरव गर्न लायक रहेको बताए । विभिन्न जातजातीहरुको इतिहास देखिने गरि यि र यस्तै संग्राहलयहरु स्थापना भएमा इतिहास जीवित रहने उनको भनाई थियो ।

संग्राहलयहरुले इतिहास मात्रै जिवित नराख्ने भन्दै पर्यटकीय गन्तब्य निर्माण गर्ने र पर्यटन प्रबद्र्धनमा टेवा पु¥याउने उल्लेख गरे । थारु संग्राहलयले पनि यो काम गरेको उनको भनाई थियो । उनले संग्राहलयको महत्व र स्थानीय भूमिका र सरकारको सहभागिताको विषयमा समेत जिज्ञासा राखेका थिए ।

संग्राहलयको महत्व र स्थापनाको विषयमा लुम्बिनी प्रदेशका पूर्व मुख्यमन्त्री डिल्ली बहादुर चौधरीले जानकारी गराएका थिए । चौधरीले थारुहरुको इतिहास जिवन्त राख्न संग्राहलयको परिकल्पना गरिएको बताए ।

संग्राहलयको अवलोकन पछि पूर्व मन्त्री रेखा शर्माले थारुको इतिहास र संस्कृति, चालचलन, रहनशहन रितिरिवाज दर्साएको बताइन । उनले अझै यसलाई विस्तार र विकास गर्न आबश्यक रहेको बताइन ।

शर्माले संग्राहलाई वाह्य पर्यटन प्रबद्र्धनसंग जोडन जरुरी रहेको बताइन । उनले लुम्विनी र बर्दियामा आउने विदेशी पर्यटकलाई पनि यहाँ सम्म ल्याउन सकियो भने यहाँको ऐतिहासिक धरोहरको थप प्रचार प्रसार हुने बताइन ।

डा तोसिमा कार्कीले थारु सास्कृति संग्राहलय परम्पारगत कुराहरु रहेको बताइन । उनले जीवन कला संग्राहलयमा देखिएको बताइन । यसलाई वल्डवाइट बनाउनु पर्ने बताइन ।

उनले जुनसुकै समुदायको व्यक्तिहहरु पनि एक पटक थारु संग्राहलयमा आउन आग्रह गरिन । यहाँ संस्कृति छ, इतिहास छ, कला छ, यहाँ हाम्रो कथा छ, यहा दैनिकी जिवन छ , तसर्थ पनि एक पटक सबै आएर हेनुपर्ने थलो थारु संग्राहल हो जस्तो लाग्यो उनले भनिन । यसलाई राष्ट्रिय सम्पदाको रुपमा सूचिकृत भएर अगाडी बढ्नु पर्छ, वल्ड हेरिटेजमा पनि सुचीकृत गर्नु पर्ने बताइन ।

उनले आन्तरिक र बाह्य पर्टकहरुको गन्तब्य बन्नुपर्ने बताइन । संघीय सदनका शिक्षा समिति सभापति अमर बहादुर थापाले थारु संग्राहलयमा थारुको इतिहास देखेको बताए । पहिचान र इतिहास देखाएको र संरक्षण भएको बताए ।

उनले इतिहासलाई संक्षण गर्नु राज्यको दायित्व भए पनि यहाँ समुदायले गरेको उल्लेख गरे ।
पछिल्लो समय थारु संग्राहलयमा राजनीतिक व्यक्तिहरुको अध्ययन र अनुगमनको थलो बनेको छ ।

कास्की,११ माघ । गण्डकी प्रदेश सभाले हिउँदे अधिवेशनको आह्वान गरेको छ। प्रदेशसभाको अधिवेशन माघ २१ गते दिउँसो २ बजेबाट सुरु हुने भएको छ ।

गण्डकीका प्रदेश प्रमुख डिल्लाराज भट्टले नेपालको संविधानको धारा १८३ को उपधारा ९१० बमोजिम शुक्रबार प्रदेशसभाको अधिवेशन आह्वान गरेका हुन् ।

मङ्गलबारको मन्त्रिपरिषद् बैठकले माघ २१ गतेबाट हिउँदे अधिवेशन बोलाउने निर्णय गरी प्रदेश प्रमुख कार्यालयलाई पत्रचार गरेको थियो । अहिले गण्डकी प्रदेशसभाका विषयगत समितिहरुमा तीन विधेयक छलफलका क्रममा छन् ।

प्रदेश सभामा उपसचिव प्रेम सुवेदीले “गण्डकी प्रदेशमा साझेदारी फर्मको नियमन तथा व्यवस्थापन गर्न बनेको विधेयक”, “गण्डकी प्रदेशमा सार्वजनिक सडक निर्माण, विस्तार तथा मर्मत सम्भार गर्ने सम्बन्धमा व्यवस्था गर्न बनेको विधेयक” र “जीवनाशक विषादी व्यवस्थापन सम्बन्धमा व्यवस्था गर्न बनेको विधेयक” छलफलका क्रममा रहेको जानकारी दिए । प्रदेश सभाको बर्खे अधिवेशन असोज ७ गते अन्त्य भएको थियो ।

दाङ,११ माघ । तुलसीपुर चेम्बर अफ कमर्सले पूर्व प्रधानमन्त्री पुष्पकमल दाहाल ‘प्रचण्ड’लाई ज्ञापनपत्र बुझाएको छ। उद्योगी तथा व्यवसायीहरूको साझा समस्यालाई उजागर गर्दै पूर्व प्रधानमन्त्री प्रचण्डलाई ज्ञापन पत्र बुझाएको हो। ज्ञापन पत्रमा स्थानीय व्यवसायको सुरक्षादेखि पूर्वाधार विकाससम्मका विविध विषयहरू समेटिएका छन्।

चेम्बरका प्रतिनिधिहरूले व्यवसायिक सुरक्षाको प्रत्याभूति, ठूला उद्योगहरूद्वारा गरिने अस्वाभाविक मूल्यवृद्धिको नियन्त्रण, र कर प्रणालीलाई व्यवसायमैत्री बनाउने माग गरेका छन्।

साथै, तुलसीपुरको ऐतिहासिक टरिगाउँ विमानस्थलको नियमित सञ्चालन र स्तरवृद्धि, विगत ५–६ वर्षदेखि रोकिएको तुलसीपुर–घोराही सडक खण्डको निर्माण कार्यलाई शीघ्र सम्पन्न गराउन, र दाङ–सल्यान–रुकुम सडक खण्डको स्तरवृद्धिको आवश्यकता पनि जोडदार रूपमा प्रस्तुत गरिएको छ।

चेम्बर अफ कमर्स तुलसीपुरका अध्यक्ष ऋषिराज भण्डारी र महासचिव दुर्गाप्रसाद शर्माको संयुक्त हस्ताक्षरित ज्ञापनपत्र मार्फत इबैंकिङ प्रणालीमा देखिएको समस्या र यसमा लगाइएको कर खारेज गर्न, साथै बैंकिङ प्रणालीलाई सहज बनाउन माग गरिएको छ।

ज्ञापनपत्र बुझाउँदै चेम्बरका पदाधिकारीहरूले भने -‘स्थानीय व्यवसायीहरू असुरक्षाको अनुभूति गरिरहेका छन्। ठूला उद्योगहरूद्वारा गरिने मूल्यवृद्धिले साना व्यवसायी र उपभोक्ता दुवै मारमा परेका छन्। साथै, स्थानीय पूर्वाधार विकासको कार्यमा भइरहेको ढिलाइले यस क्षेत्रको समग्र आर्थिक विकासमा बाधा पुर्‍याएको छ।’

चेम्बर अफ कमर्सका अध्यक्ष भण्डारीको स्वास्थ्यको कारण बरिस्ठ अध्यक्ष सन्तोष खड्काको नेतृत्वमा गएको टोलीले ज्ञापनपत्र बुझाएको जसमा केन्द्रीय सदस्य तथा संस्थापक अध्यक्ष टोपबहादुर घर्ती प्रदेश सदस्य प्रदेश सदस्य निर्मल पौडेल कोषाध्यक्ष लोकेन्द्र ओली महासचिव दुर्गा शर्मा, सल्लाहकार प्रेम प्रकाश गिरी,दरीभान ओलीको सहभागिता रहेको थियो ।

ज्ञापन पत्रलाई सम्बोधन गर्दै पूर्व प्रधानमन्त्री पुष्पकमल दाहालले व्यवसायीहरूको समस्यालाई गम्भीरतापूर्वक लिई सम्बन्धित पक्षसँग समन्वय गरी समाधानका लागि पहल गर्ने प्रतिबद्धता व्यक्त गरेका छन्।

यो ज्ञापन पत्रले तुलसीपुर क्षेत्रमा व्यवसायिक वातावरण सुधार्न र विकासका नयाँ सम्भावनाहरूलाई अघि बढाउन महत्त्वपूर्ण भूमिका खेल्ने उनले बताएका छन् । प्रचण्ड नेकपा माओवादी केन्द्रको तुलसीपुर नगर कमिटीको अधिवेशन उद्घाटन गर्न दाङ आएका हुन् ।

यस्तो छ ज्ञापन पत्र:

मुस्ताङ, ११माघ। हिमाली जिल्ला मुस्ताङमा लगातार २४ घण्टादेखि बेजोडको हावाहुरी चल्दा जनजीवन अस्तव्यस्त बनेको छ। हावाहुरीका कारण जोमसोमस्थित सरकारी कार्यालयदेखि स्थानीय संरचना र सेवामा ठूलो असर परेको छ।

जोमसोमस्थित पर्यटन तथा उद्योग कार्यालयको जस्ताको छानो हावाहुरीले उडाएपछि नेपाल प्रहरी, सशस्त्र प्रहरी, र नेपाली सेनाको टोलीले डोरीको सहायताले छानो पुनःस्थापना गरेका छन्। जिल्ला प्रहरी कार्यालय मुस्ताङका प्रहरी प्रमुख डीएसपी सूर्यबहादुर बोगटीका अनुसार, “सरकारी कार्यालयको छानो उडाए पनि कुनै महत्वपूर्ण अभिलेख वा भौतिक सम्पत्तिमा क्षति पुगेको छैन।”

हावाहुरीले घरपझोङ-३ पुथाङ एयरपोर्टको एक होटल र यात्रु प्रतिक्षालयमा पनि आंशिक क्षति पुऱ्याएको छ। यसका साथै, हावाहुरीको असरले विद्युत् र इन्टरनेट सेवा समेत अवरुद्ध भएको डीएसपी बोगटीले जानकारी दिए।

स्थानीयहरू घर बाहिर निस्कन नसक्ने अवस्थामा पुगेका छन्। ढुंगा र माटोले बनेका घरहरूको छानो हावाहुरीले उडाउने जोखिम बढेको छ। “हिउँदयाममा हावाहुरीले मानवीय र भौतिक जोखिम बढाएको छ। स्थानीयलाई सतर्क रहन सूचित गरिएको छ,” डीएसपी बोगटीले भने।

यसवर्ष हिमपात नहुँदा कृषि र पर्यटनमा नकारात्मक असर देखिएको छ। स्थानीय किसानहरू अन्नबाली सप्रिने आशा गर्दै हिमपातको प्रतीक्षा गरिरहेका छन्। तर, उत्तरी हावाहुरीले हिमपात हुने प्रक्रिया नै अवरुद्ध गरेको छ।

जिल्ला प्रहरी कार्यालयले स्थानीयलाई विपद् घटना भएमा तुरुन्तै नजिकको प्रहरी इकाइमा जानकारी गराउन आग्रह गरेको छ। हावाहुरीका कारण आगलागीको जोखिमसमेत रहेकाले थप सतर्कता अपनाउन अनुरोध गरिएको छ।

तस्बिर सौजन्य: निरज थकाली (ठिनी)

सुलीकोट,११ माघ। उत्तरी गोरखामा ३ घर जलेर नष्ट भएको छ।जिल्लाको चुमनुब्री गाउँपालिका – ६ ताजुस्थित कुन्साङमा लामाको जस्ताले छाएको २ वटा कच्ची घर र भुकम्प पश्चात् निर्माण भएको एक घर जलेर पूर्ण रूपमा नष्ट भएको जिल्ला प्रहरी कार्यालय गोरखका सूचना अधिकारी प्रहरी निरीक्षक धुव्रप्रसाद शर्माले जानकारी दिए।

बिहीबार साँझ करिब साँढे आठ बजेको समयमा खाना बनाउन लाग्दा ग्याँस चुलोमा बालेको आगो बलोमा सल्किएर आगलागी भएको उनले बताए। आगलागीबाट आठ वटा गाई र तीन वटा गोरु जलेर मरेको छन्।

त्यही घरमा लागेको आगो फैलिएर नजिकै रहेको दुई घरमा समेत जलेर नष्ट भए शर्माले बताए।

घट्नाको जानकारी पाए लगत्तै चुम्चेत प्रहरी चौकीबाट प्रहरी टोली घटनास्थल पुगेपछि स्थानीयको सहयोगमा आगो नियन्त्रणमा लिइएको थियो।

दाङ , ९ माघ । चेम्बर अफ कमर्स तुलसीपुरका कार्यसमिति सदस्य दोर्ण आचार्यमाथि भएको सांघातिक आक्रमणप्रति तुलसीपुर चेम्बर अफ कमर्सलले घोर भर्त्सना गरेको छ ।

चेम्बर अफ कमर्सका अध्यक्ष ऋषिराज भण्डारी र महासचिव दुर्गा शर्मापले प्रेस विज्ञप्ति जारी गर्दै सदस्य आचार्य माथी भएको साङ्घातिआक्रमण निन्दनीय र भर्त्सना युक्त भएको बताएका छन ।

चेम्बरका सदस्य आचार्य होटेल व्यवसायी हुन । आचार्य माथि आफ्नै हाेटेलमा बसिराखेकाे अबस्थामा आयका हतियारधारी व्यक्तिहरुले आक्रामन गरेको घटनाले व्यावसायिक सुरक्षा तथा शान्ती सुरक्षामा लापरबाही भएको महसुस गराएको छ ।

चेम्बरको प्रेस विज्ञप्तिमा भनिएको छ । विज्ञप्तिमा दोषीलाई कानुनी दाएरामा ल्याएर कडा भन्दा कडा कारबाहीको माग समेत गरिएको छ ।

उद्योगी ब्यवसायीहरुलाई शान्ती सुरक्षाको प्रत्याभूती दिलाउन प्रहरी, प्रशासनसंग जोड्दार माग गर्दछौ भनिएको छ । साथै उपचाररत सदस्य आचार्यको शीघ्र स्वास्थ लाभको कामना गरिएको छ । घाइते आचार्यको नेपालगंज उपचार भइरहेको छ ।

दाङ,९ माघ । तुलसीपुर उपमहानगरपालिका वडा नं. १२ कचिला राम जानकी टोलमा आगलागी भएको छ। विद्युत् तार सर्ट हुँदा गोल्ची चौधरीको दुई तले कच्ची घरमा आगलागि भएको हो। आगलागीबाट करिब ५ लाख बराबरको क्षति भएको छ।

उक्त घटनामा करिब खाद्यान्न लत्ता कपडा र अन्य जिन्सी सामग्री गरी ४ लाख र घरमा रहेको नगद १ लाख गरी ५ लाख बढीको क्षति भएको छ। उक्त घटनाबाट मानवीय क्षति भने नभएको वडा अध्यक्ष खुसीराम चौधरीले जानकारी दिए।

बुधबार आज बिहान ७ बजेतिर लागेको थियो। टिनले छाएको उक्त घरमा भएको नगद एक लाखभन्दा बढी, लत्ताकपडा, र अन्य जिन्सी सामान जलेर नष्ट भएको छ। घरमा गोल्ची चौधरीसहित दुई छोरा, एक छोरी, नातिनी, र बुहारी गरी ६ जनाको परिवार रहेको छ।

स्थानीय बासिन्दा, प्रहरी, र दमकलको सहायतामा आगो नियन्त्रणमा लिइएको थियो। आगो नियन्त्रण गर्नका लागि विद्युत् कार्यालय तुलसीपुर वितरण केन्द्रलाई सम्पर्क गरी लाइन काटेपछि नियन्त्रणमा सहज भएको वडा अध्यक्ष चौधरीले बताए।

दाङ,९ माघ। लुम्बिनी प्रदेश प्रहरी कार्यालयका प्रमुख दानबहादुर कार्कीले प्रहरी प्रमुखहरूलाई समय सापेक्ष निर्देशन दिएका छन्। प्रदेश प्रहरी कार्यालय मातहतका प्रहरी प्रमुखहरूलाई भिडियो कन्फ्रेन्स मार्फत निर्देशन दिएका हुन्।

कन्फेरेन्समा लुम्बिनी प्रदेश मातहतका जिल्ला प्रहरी कार्यालय, प्रदेश प्रहरी तालिम केन्द्र, नेपाल प्रहरी विशेष सुरक्षा गण सुनवल, र लुम्बिनी प्रदेश प्रहरी गण खजुरा बाँकेका प्रमुखहरूको उपस्थिति रहेको थियो।

कार्यालय प्रमुख कार्कीले शान्ति सुरक्षा, अपराध अनुसन्धान, लागू औषध दुव्र्यसन नियन्त्रण, दुर्घटना न्यूनीकरण, भन्सार छली तथा तस्करी नियन्त्रणजस्ता महत्त्वपूर्ण मुद्दामा प्रहरीको सक्रियता र प्रतिबद्धता आवश्यक रहेको बताए।

उनले अपराध न्यूनीकरणका लागि सामुदायिक प्रहरी साझेदारीलाई थप प्रभावकारी बनाउने, लागू औषध नियन्त्रणमा विशेष ध्यान दिने, र सीमा क्षेत्रमा भन्सार छली तथा तस्करी रोक्न सघन अनुगमनको आवश्यकता रहेकोमा जोड दिएका थिए।

प्रहरी कार्यालयहरूले आ–आफ्नो क्षेत्रको शान्ति सुरक्षा सुनिश्चित गर्न प्रभावकारी योजनाहरू अवलम्बन गर्नुपर्ने र नागरिकको विश्वास जित्ने कार्यलाई प्राथमिकतामा राख्नुपर्ने उनको निर्देशन रहेको थियो।

एजेन्सी ।टर्कीको एक होटलमा आगलागी हुँदा ७६ जनाको मृत्यु भएको छ । मृतक सबैको पहिचान पुष्टि हुन बाँकी छ ।

आगलागीमा घाइते भएका ५१ मध्ये १७ जना भने उपचारपश्चात डिस्चार्ज भएका स्वास्थ्य मन्त्री केमाल मेमिसोग्लुले बताए। आगलागी होटलको भान्साबाट शुरु भएको अनुमान गरिएको छ । २३४ जना बसेको ग्राण्ड कार्टल होटलमा स्थानीय समयअनुसार मंगलबार बिहान साढे ३ बजेको समयमा आगलागी भएको थियो ।

उक्त पर्यटकीय होटल चिसो र हिउँ जमेको स्थानमा भएकाले दमकल पुग्न एक घण्टाभन्दा बढी समय लागेको लागेको थियो । दमकल पुगेपछि पनि आगो निभाउन झण्डै १२ घण्टा लागेका अधिकारीहरुलाई उद्धृत गर्दै बीबीसीले जनाएको छ । घटनापछि प्रहरीले होटलका मालिकसहित ९ जनालाई नियन्त्रणमा लिएको छ ।

राष्ट्रपति रेसेप तैयप एर्दोगानले घटनामा लापरबाही गर्ने व्यक्तिलाई कडाभन्दा कडा कारबाही गर्ने बताएका छन्। मृतकहरुको सम्झनामा टर्कीमा आज राष्ट्रिय शोकको घोषणा गरिएको छ भने राष्ट्रिय झण्डा आधा झुकाइने भएको छ।