काठमाडौ,४ मंसिर । बाराको सिमरामा जेनजी युवामाथि कुटपिट गरेको अभियोगमा दुई जना वडाध्यक्ष पक्राउ परेका छन्। पक्राउ पर्नेहरूमा जितपुर–सिमरा उपमहानगरपालिका–२ का वडाध्यक्ष धनबहादुर श्रेष्ठ र वडा–६ का वडाध्यक्ष कैमोदिन अन्सारी रहेको जिल्ला प्रहरी कार्यालय बाराले जनाएको छ।

दुवै एमालेबाट निर्वाचित वडाध्यक्ष रहेका उनीहरूले हिजो सिमरामा भएको विवादका क्रममा जेनजी युवामाथि कुटपिट गरेको आरोप लागेको छ।

यस सम्बन्धमा जेनजी अगुवा सम्राट उपाध्यायले श्रेष्ठ, अन्सारीसहित ६ जनाविरुद्ध किटानी जाहेरी दर्ता गराएका थिए।

दाङ,४ मंसिर ।जेनजी आन्दोलनपछि बनेको अन्तरिम सरकारले संघीय र प्रदेश तहमा अनुत्पादक खर्च घटाउन निर्देश दिएपछि लुम्बिनी प्रदेशमा सचिवालय कटौतीको प्रक्रिया असमानरूपमा अघि बढेको देखिएको छ।

प्रदेशसभाका सभामुख तुलाराम घर्ती मगरले भने आफ्नै पाँच सदस्यीय सचिवालय मंसिर १ गतेदेखि लागू हुनेगरी विघटन गरेका छन्। स्वकीय सचिव, प्रेस संयोजक, स्वकीय सहायक, सवारी चालक र कार्यालय सहयोगी गरी पाँचै पद तत्कालका लागि रोक्का गरेका हुन्। सभामुखको सचिव र प्रेस संयोजकले क्रमशः उपसचिव र अधिकृत बराबरको तलब–भत्ता पाउँदै आएका थिए।

तर सचिवालय विघटनपछि सभामुखको सवारी चालकको व्यवस्था कसरी गर्ने भन्ने चुनौती प्रदेशसभामै बाँकी छ। प्रदेशमा स्थायी कर्मचारीको संख्या ५० प्रतिशत मात्र रहेकाले यो झनै जटिल विषय बनेको छ। सभामुखलाई पीएसओ भने प्रहरीबाटै उपलब्ध गराइएको छ।

संघीय सरकारले सचिवालय कटौती अनिवार्य भनेको थिएन, तर खर्च कटौतीको भावना अनुरूप सभामुखले स्वेच्छाले यस्तो निर्णय गरेको उनका निकटस्थहरूको भनाइ छ।

उता, मुख्यमन्त्री चेतनारायण आचार्यले पनि सचिवालय कटौतीको घोषणा गरे पनि प्रक्रिया अपूरै छ। १३ सदस्यीय सचिवालयबाट ६ जना सल्लाहकार हटाइए पनि सचिवालयलाई तीन सदस्यमा सीमित गर्ने निर्णय अझै गरिएको छैन। सचिवालय संरचना स्पष्ट नभएपछि तलब भत्ता नै रोकिएको मुख्यमन्त्री कार्यालयले जनाएको छ।

प्रदेश प्रमुख कृष्णबहादुर घर्ती मगरको १२ सदस्यीय सचिवालयमा भने कुनै कटौती नभएको सचिवालय स्रोतको दाबी छ।

संघीय सरकारले असोज ५ गते जारी गरेकाे परिपत्रअनुसार मुख्यमन्त्री र प्रदेश प्रमुखले बढीमा तीन सदस्यीय सचिवालय राख्न पाउने व्यवस्था भए पनि लुम्बिनीमा यसको कार्यान्वयन ढिलो भएको छ। संघीय परिपत्र लागू भएपछि लुम्बिनीका सांसदहरूको स्वकीय सचिवको तलब भत्ता असोजदेखि नै रोकिएको छ, तर कार्यकारी पदाधिकारीको सचिवालय जस्ताको त्यस्तै रहँदा ‘द्वैध व्यवहार’ भएको भन्दै आलोचना बढेको छ।

यता, प्रदेश मामिला तथा कानुन समितिले संघीय निर्देशनलाई प्रदेशको अधिकारक्षेत्रमा हस्तक्षेप भएको भन्दै सरकारलाई सचिवालय तथा पदाधिकारीको सेवा–सुविधा कटौती नगर्न सिफारिस गरेको छ। समितिका सभापति दिलकुमारी बुढाका अनुसार संविधानका धारा १८७ र १९६ अनुसार पदाधिकारीको सुविधा प्रदेशमै तोक्ने अधिकार भएकाले संघीय निर्देशन पूर्ण रूपमा लागू नहुन सक्ने बताइयो।

यसैबीच, संघीय निर्णयपछि दुई महिनादेखि स्वकीय सचिवहरूको सेवासुविधा रोकिएको छ। अब सचिवालय कटौती कार्यान्वयन प्रदेश सरकारले गर्ने निर्णयमा निर्भर रहने समितिको भनाइ छ।

समितिले लुम्बिनी प्रदेशलाई संघीयताको मर्मअनुसार अघि बढ्न, आवश्यक कानुनी स्पष्टता गर्न र प्रदेशको अधिकारक्षेत्रभित्र परेका सेवामा बाधा नपुग्ने व्यवस्था गर्न आग्रह गरेको छ।

सल्यान ,४ मंसिर ।सल्यानमा भएको ट्याक्टर दुर्घटनामा एक युवकको ज्यान गएको छ। छत्रेश्वरी–६ गोदेका २५ वर्षीय ट्याक्टर चालक देवेन्द्र सिंह रावतको मृत्यु भएको जिल्ला प्रहरी कार्यालय सल्यानले जनाएको छ।

प्रहरीका अनुसार रा १ त २४३८ नम्बरको ट्याक्टर छत्रेश्वरी गाउँपालिका–५ लेखपोखराबाट लान्तीतर्फ जादै गर्दा बुधबार राति करीब सवा ८ बजे ढोरलाचौर नजिकै दुर्घटनामा परेको थियो।

अनियन्त्रित बनेर सडकबाट करीब १५ मिटर तल खसेको ट्याक्टरको पछाडिको टायरले च्यापिँदा चालक रावतको घटनास्थलमै मृत्यु भएको डीएसपी हेमबहादुर केसीले जानकारी दिए।

घटनापछि प्रहरी टोलीले अनुसन्धान अगाडि बढाइरहेको बताइएको छ। शव पोष्टमार्टमका लागि जिल्ला अस्पताल सल्यान पठाइएको जिल्ला प्रहरी कार्यालयले जनाएको छ।

काठमाडौ,३ मंसिर ।सुनसरीको रामधुनी मन्दिरमा लागेको बालाचतुर्दशी मेलामा सतबिउ छर्न पुगेका एक पुरुषको नुहाउने क्रममा मृत्यु भएको छ।

मोरङ सुन्दरहरैँचा–३ का देवेन्द्र भट्टराई बुधबार बिहान सतबिउ छर्ने क्रममा मन्दिर नजिकैको सुनसरी खोलामा नुहाउन जाँदा बेपत्ता भएका थिए।

इलाका प्रहरी कार्यालय पकलीका प्रहरी निरीक्षक सञ्जिव ओलीका अनुसार देवेन्द्रसहित तीन जना खोलामा पसेका थिए। एक जनालाई तत्कालै उद्धार गरिएको भए पनि देवेन्द्र खोलाको गहिराइका कारण बेपत्ता भएका थिए। सशस्त्र प्रहरीको गोताखोर टोलीले उनको शव फेला पारेको हो।

यस्तै , केही दिनदेखि बेपत्ता इटहरी–२ की ३५ वर्षीया मन्जु पौडेल निरौलाको शव धरानको सर्दु जलाधार खोल्सामा फेला परेको छ। कार्तिक २४ गते बिहान घरबाट निस्किएका उनी नफर्केपछि आफन्तले खोजीका लागि उजुरी दिएका थिए।

खोजीका क्रममा कार्तिक २७ गते बौद्ध विहारनजिक उनीसंग सम्बन्धित पोसाक र सामान फेला परेपछि प्रहरीले खोजी तीव्र बनाएको थियो। अन्ततः सर्दु जलाधार क्षेत्रमा उनको शव भेटिएको प्रहरीले जनाएको छ।

काठमाडौ,३ मंसिर । अख्तियार दुरुपयोग अनुसन्धान आयोगले रौतहटस्थित जय किसान माध्यमिक विद्यालयका प्रधानाध्यापक संजय प्रसाद र अरविन्द प्रकाश शाहविरुद्ध विशेष अदालत काठमाडौंमा आरोपपत्र दायर गरेको छ।

शिक्षकको जागिर मिलाइदिने भन्दै दुवैले साढे ४ लाख रुपैयाँ घुस लिएको अवस्थामा पक्राउ परिएका थिए। अनुगमन तथा अनुसन्धानपछि उनीहरूले घुस रकम लिएको प्रमाणित भएको आयोगले जनाएको छ।

अख्तियारले दुवैलाई जनही साढे ४ लाख रुपैयाँ बिगो तोकेर प्रचलित कानुनअनुसार सजाय माग्दै मुद्दा दायर गरेको हो।

दाङ,३ मंसिर । कपिलवस्तुमा ८ दिने आधारभूत मेलमिलाप तालिम सम्पन्न भएको छ। बुद्धभूमि नगरपालिका कपिलवस्तु र जनहित संरक्षण मञ्च (प्रो पब्लिक) को संयुक्त आयोजनामा “हाम्रो समस्या, हाम्रै समाधान : मेलमिलाप” भन्ने नारासहित उक्त तालिम सम्पन्न भएको हो

नागरिक शान्ति सेवा कार्यक्रमअन्तर्गत प्रो पब्लिकले विगत तीन वर्षदेखि स्थानीय तहमा उत्पन्न विवादहरूलाई समूदायकै सहभागितामा दीगो रूपमा समाधान गर्ने उद्देश्यका साथ विभिन्न तालिमहरू संचालन गर्दै आएको छ। यसै क्रमलाई निरन्तरता दिँदै, नगरपालिका अन्तर्गत १० वटै वडामा स्थापना भएका मेलमिलाप केन्द्रहरूमा निष्पक्ष, विधिसम्मत र प्रभावकारी ढंगले विवाद समाधान गर्न सक्षम मेलमिलापकर्ता तयार गर्ने लक्ष्यसहित दोस्रो चरणको यो तालिम आयोजना गरिएको कार्यक्रम संयोजक झबिन्द्र अधिकारीले जानकारी दिए।

मेलमिलाप परिषद्मा सूचीकृत र आधिकारिक तालिम प्रदान गर्ने स्वीकृति प्राप्त संस्था प्रो पब्लिकका प्रशिक्षक अधिवक्ता कविता पाँडे र झबिन्द्र प्रसाद अधिकारीले संयुक्त रूपमा तालिम सञ्चालन गरेका थिए।

तालिममा मेलमिलापसम्बन्धी कानुनी प्रावधान, सञ्चार तथा सहजिकरण सीप, मेलमिलापकर्ताको गुण तथा भूमिका, चरणगत मेलमिलाप प्रक्रिया, मानव अधिकार, मनोसामाजिक पक्ष तथा प्रशंसनीय दृष्टिकोणलगायत विषयमा सैद्धान्तिक र व्यवहारिक प्रशिक्षण प्रदान गरिएको थियो।

कार्तिक २७ गतेदेखि मंसिर २ गतेसम्म सञ्चालन भएको तालिमबाट ३० जना स्थानीय अगुवाहरू मेलमिलापकर्ताका रूपमा तयार भएका छन्।

समापन कार्यक्रममा सहभागीहरूले तालिमले व्यक्तिगत व्यवहारमा सकारात्मक परिवर्तन ल्याएको, स्वयम्‌सेवा गर्ने भावना जागृत भएको र विवाद समाधान गर्ने आत्मविश्वास बढेको अनुभव साझा गरे।

नगर प्रवक्ता तथा वडाध्यक्षका प्रतिनिधि तेज ब. बस्नेत (तिलक) ले वडाले सक्षम व्यक्तिहरूलाई तालिमका लागि सिफारिस गरेको बताउँदै, फौजदारी प्रकृतिका विवाद तथा वडाको अधिकारक्षेत्रबाहिर पर्ने विवाद स्थानीय मेलमिलापकर्ताले हेर्न नहुने कुरा स्पष्ट गरे।

त्यसैगरी प्रमुख प्रशासकीय अधिकृत बासुदेव भट्टराईले मेलमिलाप प्रवर्द्धनका लागि आवश्यक भौतिक तथा बजेट व्यवस्थापन नगरपालिकाले गर्दै आएको र यसलाई निरन्तरता दिने प्रतिबद्धता व्यक्त गरे।

कार्यक्रमको अध्यक्षता उपप्रमुख तथा न्यायिक समिति संयोजक मिरा थारुले न्यायिक समितिको कार्यमा मेलमिलापकर्ताले दिन सक्ने सहयोगप्रति विश्वास व्यक्त गर्दै सहभागी, आयोजक तथा प्रशिक्षकप्रति धन्यवाद दिँदै तालिम समापन गरे।

काठमाडौ,३ मंसिर । तुलसीपुरस्थित आन्तरिक राजस्व कार्यालयले चालु आर्थिक वर्षका पहिलो चार महिनामा ७२ करोड १६ लाख ३७ हजार रुपैयाँ राजस्व संकलन गरेको छ। साउनदेखि कात्तिक मसान्तसम्म ८९ करोड ९१ लाख ६१ हजार रुपैयाँ संकलन गर्ने लक्ष्य रहेकामा ८०.२५ प्रतिशत मात्र संकलन भएको कर अधिकृत उपेन्द्र पुन मगरले जानकारी दिए।

गत वर्षको यही अवधिमा कार्यालयले ७० करोड ३८ लाख ५८ हजार रुपैयाँ संकलन गरेको थियो। यस वर्ष लक्ष्य अनुपातमा राजस्व घट्नुका कारणबारे प्रमुख कर अधिकृत श्रीधर टण्डनले आयकर विवरण नपेश गर्ने करदाताको संख्या बढ्नु, जेन-जी आन्दोलनका कारण कार्यालयमा क्षति हुँदा सेवा प्रभावित हुनु, मालपोत कार्यालयमा पुँजीगत लाभकर कमी हुनु लगायत कारण छन्।

टण्डनका अनुसार पुँजीगत खर्चमा कमी, ब्याजदर घट्दा ब्याज कर घट्नु, आन्दोलनपछि कार्यालय व्यवस्थापनमा ध्यान दिनुपर्ने भएकाले प्रवर्द्धनात्मक तथा निरोधात्मक गतिविधि तीव्रता दिन नसकिएको पनि राजस्व घट्नामागि रहेको छ।

गत आर्थिक वर्ष २०८१–८२ मा कार्यालयले तीन अर्ब १४ करोड ८६ लाखको लक्ष्यमध्ये दुई अर्ब ९४ करोड २४ लाख राजस्व संकलन गरेको थियो, जुन अघिल्लो वर्षको तुलनामा ५४ करोड ६० लाख बढी हो।

चालु वर्षमा बाँकी अवधिमा प्रभावकारी करदाता शिक्षा, आर्थिक ऐन २०८२ मा प्रदान गरिएका छुट सुविधाको प्रचार–प्रसार, कर छली नियन्त्रण, बक्यौता असुली लगायतका कार्यलाई तीव्र बनाउँदै वार्षिक लक्ष्य पूरा गर्ने प्रतिबद्धता टण्डनले व्यक्त गरे।

आर्थिक ऐन २०८२ ले भ्याट, अन्तशुल्क तथा आयकरका विभिन्न श्रेणीका करदातालाई पुस मसान्तसम्म छुट सुविधा उपलब्ध गराएको कार्यालयले जनाएको छ। करदातालाई समयमै सुविधा उपयोग गर्न कार्यालयले आग्रह गरेको छ।

सञ्चारमाध्यम, उद्योग वाणिज्य संघलगायतसँग समन्वय गरी छुट सम्बन्धी प्रचार–प्रसार गर्न अनुरोध गरिएको छ। कार्यालयका सेवा सरल, सहज र गुणस्तरीय बनाउन अनलाइन प्रणालीमार्फत कर भुक्तानी, कर विवरण, करचुक्ता प्रमाणपत्र लगायत सेवा उपलब्ध गराइएको जानकारी पनि टण्डनले दिए।

सेवाग्राहीलाई सहजीकरण गर्न उद्योग वाणिज्य संघको सहकार्यमा करदाता सहायता कक्ष सञ्चालनमा छ भने राजस्व बुझाउन ग्लोबल आइएमई बैंकको काउण्टर कार्यालयमै सञ्चालन गरिएको छ।

लुम्बिनी प्रदेशअन्तर्गत दाङ, पूर्वी रुकुम, रोल्पा र प्युठानमा ४३ हजार ३९ व्यावसायिक, एक लाख २४ हजार ६९८ व्यक्तिगत तथा ७६६ संस्थागत स्थायी लेखा नम्बर (PAN) दर्ता गरिएका छन्।

जेन-जी आन्दोलनका क्रममा कार्यालयका तीनवटै भवन तथा सवारीसाधन जलेर नष्ट भएपछि केही दिन सेवा पूर्ण रूपमा बन्द भएको थियो। त्यसपछि अस्थायी रूपमा उद्योग वाणिज्य संघको कार्यकक्षबाट सेवा दिइएको र हाल त्रिसिद्धेश्वरी मन्दिरस्थित धर्मशालाबाट सेवा सञ्चालन भइरहेको कार्यालयले जनाएको छ।

काठमाडौ,३ मंसिर । बारामा असहज परिस्थिति सिर्जना भएपछि एमाले नेताहरू काठमाडौं फर्किएका छन्। बुधबार बिहान सिमरामा आयोजना गरिएको कार्यक्रममा सहभागी हुन महासचिव शंकर पोखरेल, नेता महेश बस्नेत र भानुभक्त ढकाललगायतका नेताहरू त्रिभुवन अन्तर्राष्ट्रिय विमानस्थलबाट सिमरातर्फ जान लागेका थिए।

तर उनीहरूको आगमनको जानकारी पाएपछि जेनजी युवाहरूले विमानस्थल परिसरमा प्रदर्शन गरेपछि स्थिति तनावग्रस्त बनेको थियो। अवस्था नियन्त्रण गर्न स्थानीय प्रशासनले सिमरा क्षेत्रमा कर्फ्यु आदेश जारी गरेसँगै विमानस्थल अस्थायी रूपमा बन्द गरिएको हो।

उडान रोकिएपछि आफूहरू फर्किएको एमाले नेता बस्नेतले बताएका छन्।

काठमाडौ,३मंसिर । स्वास्थ्य तथा जनसंख्या मन्त्रालय बिहीबारदेखि सिंहदरबार परिसरबाटै सेवा प्रवाह गर्न लागिएको छ।

मन्त्रालयका प्रवक्ता डा. प्रकाश बुढाथोकीका अनुसार सिंहदरबारको दक्षिण–पश्चिम भागमा रहेका नेपाली सेनाको नर्सिङ दल गणले आफ्नो कार्यालय उत्तरतर्फ सारेसँगै खाली भएको जग्गामा अस्थायी प्रिफ्याब भवन निर्माण गरिएको छ। विश्व स्वास्थ्य संगठन (WHO) को सहयोगमा तयार पारिएका ६ वटा प्रिफ्याब भवनमा बिहीबारदेखि औपचारिक रूपमा काम सुरु हुने बताइएको छ।

गत भदौ २४ मा ‘जेनजी’ आन्दोलनका क्रममा आगलागी हुँदा रामशाहपथस्थित स्वास्थ्य मन्त्रालयको भवन पूर्ण रूपमा जलेर नष्ट भएको थियो। हाल मन्त्रालय नेपाल स्वास्थ्य अनुसन्धान परिषद् (NHRC) को नयाँ भवनबाट कार्यरत छ।

प्रवक्ता बुढाथोकीका अनुसार जनसंख्या महाशाखा र स्वास्थ्य आपतकालीन केन्द्र बाहेकका सबै कार्य अब सिंहदरबारमै सञ्चालन हुनेछन्। उनले आवश्यक संरचनाहरूको थप व्यवस्थापन पूरा भएपछि केही दिनमै मन्त्रालय पूर्ण रूपमा सिंहदरबार सर्ने जानकारी दिए।

काठमाडौ,३ मंसिर । सिमरा विमानस्थलमा बुधबारका सबै उडान रद्द भएका छन्। बिहानैदेखि विमानस्थल क्षेत्रमा जेनजी युवाहरू र एमाले कार्यकर्ताबीच झडप भएको कारण वातावरण तनावग्रस्त बनेपछि उडान स्थगित गरिएको बुद्ध एयरलाइन्सले जनाएको छ।

बुद्ध एयरले काठमाडौं–सिमरा रुटमा दैनिक पाँच उडान भर्दै आएकोमा बुधबार बिहान ९ बजे भएको एक उडान बाहेक बाँकी चार उडान रद्द गरिएको कम्पनीले जानकारी दिएको छ।

विमानस्थलमा भएको झडपपछि सुरक्षा जोखिम बढेपछि जिल्ला प्रशासन कार्यालय बाराले विमानस्थल आसपासका क्षेत्रमा आज बेलुकी ८ बजेसम्म कर्फ्यू आदेश जारी गरेको छ।