दाङ,२९ फागुन । स्थानीय तह र प्रदेशसभामा ३० भन्दा बढी जनप्रतिनिधिको पद रिक्त भएका छन्। प्रतिनिधिसभा सदस्यको निर्वाचन लड्न स्थानीय तह तथा प्रदेशसभा सदस्यहरूले पद त्याग गरेपछि ती पदहरू खाली भएका हुन्।

रिक्त पदमा उपनिर्वाचन हुने वा नहुने विषयमा भने अहिलेसम्म स्पष्ट निर्णय भएको छैन। स्थानीय तह निर्वाचन ऐनको दफा ३ को उपदफा २ अनुसार पदावधि एक वर्षभन्दा बढी बाँकी रहँदा कार्यकारी पद रिक्त भए उपनिर्वाचन गर्न सकिने व्यवस्था छ।

स्थानीय तहको निर्वाचन २०७९ साल वैशाखमा र प्रदेशसभा सदस्यको निर्वाचन सोही वर्ष मंसिरमा भएको थियो। यस आधारमा दुवै तहका जनप्रतिनिधिको कार्यकाल अझै एक वर्षभन्दा बढी बाँकी रहेको देखिन्छ।

निर्वाचन आयोग का सूचना अधिकारी सुमन घिमिरे का अनुसार उपनिर्वाचनबारे निर्णय आयोग र सरकारबीचको परामर्शपछि हुनेछ। उनले भने, “निर्वाचन आयोग र सरकारको सल्लाहअनुसार उपनिर्वाचनबारे निर्णय हुन्छ। निर्वाचन गर्नुपर्ने भए आगामी चैत महिनाभित्र मिति घोषणा गरिए सहज हुन्छ।”

हाल काठमाडौं महानगरपालिका को प्रमुख पदसहित विभिन्न पद रिक्त रहेका छन्।

काठमाडौ,२८ फागुन । १२ वर्षीया बालिकामाथि सामूहिक बलात्कार गरेको आरोपमा दुई जना पक्राउ परेका छन्।

जिल्ला प्रहरी कार्यालय कञ्चनपुर का अनुसार भीमदत्त नगरपालिका–१० का ४७ र ४० वर्षीय दुई पुरुषलाई बुधबार पक्राउ गरिएको हो।

उनीहरूले भीमदत्त नगरपालिका–१० स्थित बैजनाथ सामुदायिक वन क्षेत्रमा लगेर बालिकामाथि जबरजस्ती करणी गरेको भन्दै प्रहरीमा उजुरी परेको थियो।
सोही उजुरीका आधारमा दुवै जनालाई पक्राउ गरिएको प्रहरीले जनाएको छ।

घटनाबारे थप अनुसन्धान भइरहेको प्रहरीले जनाएको छ।

काठमाडौँ,२५ फागुन । समानुपातिक तर्फको मतगणना अन्तिम चरणतर्फ पुगेको छ । अहिलेसम्म ९० लाख ११ हजार मत गनिसक्दा राष्ट्रिय स्वतन्त्र पार्टीले सबैभन्दा धेरै ४३ लाख ६५ हजार मत प्राप्त गरेको छ, जुन कुल मतको करिब ४८ प्रतिशत हो ।

त्यसपछि दोस्रोमा नेपाली कांग्रेसले १४ लाख ५५ हजार, तेस्रोमा एमालेले १२ लाख २१ हजार, चौथोमा नेकपाले ६ लाख ४५ हजार र पाँचौंमा श्रमसंस्कृती पार्टीले ३ लाख १० हजार मत पाएको छ ।

चार महिना अघि मात्रै गठन भएको श्रमसंस्कृती पार्टीले प्रत्यक्ष निर्वाचनमा तीन सीट जितेको छ भने समानुपातिक मतमा तीन प्रतिशतको थ्रेसहोल्ड पूरा गरेर राष्ट्रिय दलको मान्यता पाउने सम्भावना नजिक पुगेको छ ।

विशेषगरी ३ लाख १६ हजार हाराहारी मत पाएमा थ्रेसहोल्ड कट्ने अनुमान गरिएको छ । धरान उपमहानगरपालिकाका पूर्व मेयर हर्क साम्पाङद्वारा गठन गरिएको श्रमसंस्कृती पार्टीले अहिले करिब ६ हजार मत थप पाएमा राष्ट्रिय दल बन्ने सम्भावना रहेको छ ।

काठमाडौ, २५ फागुन । नेपाली कम्युनिष्ट पार्टी (नेकपा)ले कुनै पनि राजनीतिक दबाबमा नपरी निष्पक्ष ढङ्गले काम गर्न निर्वाचन आयोगलाई आग्रह गरेको छ ।

पार्टीका संयोजक पुष्पकमल दाहालको सचिवालयले आज विज्ञप्ति जारी गर्दै धनुषा जिल्ला निर्वाचन क्षेत्र नम्बर १ मा प्रतिनिधिसभा सदस्यका लागि पार्टीका उम्मेदवार मातृकाप्रसाद यादव विजयी भएको मत परिणाम सार्वजनिक भइसके पनि आयोगले निर्वाचित भएको प्रमाणपत्र हस्तान्तरण नगरेकामा ध्यानाकर्षण गराएको हो ।

विज्ञप्तिमा भनिएको छ, “हाम्रो पार्टी निर्वाचन आयोगजस्तो संवैधानिक निकायलाई विधिको शासन पालना गर्न र कुनै पनि राजनीतिक दबाबमा नपरी निष्पक्ष ढङ्गले काम गर्न आग्रह गर्दछ, साथै न्यायालयले पनि कानुन र विधिसम्मत ढङ्गले सही निर्णय गर्नेछ भन्ने विश्वास व्यक्त गर्दछ।”

पार्टीका अनुसार निर्वाचन आयोगको २०८२ फागुन १८ गते सम्पन्न बैठकले रास्वपाका उम्मेदवार किशोरी साह कमलको उम्मेदवारी निर्वाचन ऐन, २०७४ बमोजिम खारेज गरिसकेको अवस्थामा शान्तिपूर्ण रूपमा मतदान सम्पन्न भई मतगणना सकिँदासमेत विजयी उम्मेदवारलाई प्रमाणपत्र प्रदान नगरिनु गम्भीर सरोकारको विषय भएको जनाएको छ ।

“निर्वाचन आयोग स्वयंले फागुन २२ गते मतगणना गरी परिणाम घोषणा गर्न दिएको निर्देशन बमोजिम सबै उम्मेदवारका प्रतिनिधिहरूको उपस्थितिमा मतगणना भई पार्टीका उम्मेदवार यादव विजयी भइसक्दा पनि प्रमाणपत्र दिन आलटाल गर्नुका साथै निर्वाचन प्रक्रिया र स्थापित विधि विपरीतका कार्य हुनु चिन्ताजनक विषय हो,” विज्ञप्तिमा उल्लेख गरिएको छ ।

काठमाडौं ,२४ फागुन। गत भदौ २३ र २४ गते भएको ‘जेनजी विद्रोह’ घटनाबारे छानबिन गर्न गठित न्यायिक आयोगले आफ्नो प्रतिवेदन सरकारलाई बुझाएको छ।

आयोगका अध्यक्ष गौरीबहादुर कार्कीले आइतबार प्रधानमन्त्री सुशीला कार्की लाई प्रतिवेदन बुझाएका हुन्। प्रतिवेदन बुझाएपछि सञ्चारकर्मीसँग कुरा गर्दै अध्यक्ष कार्कीले घटनाका जिम्मेवार व्यक्तिहरूमाथि कानुनी कारबाही गर्न सिफारिस गरिएको जानकारी दिए।

उनले भने, “२३ गतेको घटनामा जो–जो दोषी छन् र जसका कारण हाम्रा किशोरहरूको मृत्यु भयो तथा उनीहरू सहिद बने, ती सबैमाथि कानुनी कारबाही गर्न सिफारिस गरेका छौँ। सिफारिसमा गोली हान्ने, हान्न लगाउने र गोली नरोक्ने सबै समेटिएका छन्।”

पत्रकारले “ठ्याक्कै कति जनालाई कारबाही सिफारिस गरिएको होरु” भनी सोध्दा अध्यक्ष कार्कीले स्पष्ट संख्या भने खुलाउन चाहेनन्।

त्यसैगरी “तत्कालीन प्रधानमन्त्री केपी शर्मा ओली र तत्कालीन गृहमन्त्रीलाई पनि कारबाही सिफारिस गरिएको हो ?” भन्ने प्रश्नमा उनले प्रत्यक्ष नाम नलिँदै भने, “हामीले जो–जो जिम्मेवार छन्, उनीहरूलाई कारबाही गर्न सिफारिस गरेका छौँ। को–को छन् भन्ने कुरा अब सरकारले सार्वजनिक गर्छ।”

प्रतिवेदन बुझाउन ढिलाइ भएको विषयमा भने उनले निर्वाचन परिणामसँग कुनै सम्बन्ध नरहेको स्पष्ट पारे। अध्यक्ष कार्कीका अनुसार केही काम बाँकी रहेका कारण प्रतिवेदन बुझाउन ढिलाइ भएको हो।

“निर्वाचनअघि प्रतिवेदन सार्वजनिक गर्दा त्यसले चुनावमा असर पार्न सक्छ भन्ने कुरा पनि उठेको थियो,” उनले भने।

काठमाडौं,२४ फागुन। सरकारले विपन्न समुदायका करिब पाँच हजार घरमा फुसको छानो हटाएर जस्ताको छानो लगाउने तथा एक हजार नयाँ घर निर्माण गर्ने भएको छ ।

सहरी विकास तथा भवन निर्माण विभाग मार्फत सञ्चालन हुने यो कार्यक्रमका लागि सरकारले करिब ७५ करोड रुपैयाँ खर्च गर्ने भएको हो । यसअन्तर्गत जनता आवास कार्यक्रम मार्फत एक हजार घर निर्माण गरिनेछ भने सुरक्षित नागरिक आवास कार्यक्रम अन्तर्गत पाँच हजार घरको फुसको छानो विस्थापन गरिनेछ ।

विभागका उपमहानिर्देशक रोशन श्रेष्ठ का अनुसार खर वा फुसको छानो भएका घरलाई जस्ताले छाउने कार्यक्रम हरेक वर्ष सञ्चालन हुँदै आएको छ । उनले भने, “खरको छानो विस्थापित गरेर जस्ताले छाउने कार्यक्रम हो, यो कार्यक्रम प्रत्येक वर्ष सञ्चालन हुँदै आएको छ।”

सरकारले विपन्न तथा आवासविहीन नागरिकलाई सुरक्षित आवास उपलब्ध गराउने उद्देश्यले चालु आर्थिक वर्ष २०८२र८३ मा पनि जनता आवास कार्यक्रमलाई निरन्तरता दिएको छ । कार्यक्रम मुख्यतः झुपडी वा असुरक्षित घरमा बसिरहेका दलित, सीमान्तकृत तथा अत्यन्त विपन्न परिवारलाई लक्षित गरी सञ्चालन हुँदै आएको छ ।

विभागका अनुसार मधेश, लुम्बिनी, सुदूरपश्चिम र कर्णाली प्रदेशका अत्यन्त विपन्न समुदाय बढी बसोबास गर्ने जिल्लामा कार्यक्रम केन्द्रित गरिएको छ । मधेश प्रदेशका सप्तरी जिल्ला, सिरहा जिल्ला, धनुषा जिल्ला, महोत्तरी जिल्ला, सर्लाही जिल्ला, रौतहट जिल्ला, बारा जिल्ला र पर्सा जिल्ला मा कार्यक्रमलाई प्राथमिकता दिइएको छ ।

त्यसैगरी लुम्बिनी प्रदेशका कपिलवस्तु जिल्ला, रुपन्देही जिल्ला र दाङ जिल्ला तथा सुदूरपश्चिमका कैलाली जिल्ला, कञ्चनपुर जिल्ला र कर्णाली प्रदेशका सुर्खेत जिल्ला, दैलेख जिल्ला र जाजरकोट जिल्ला लगायत जिल्लामा पनि घर निर्माण गरिने भएको छ ।

सरकारका अनुसार स्थानीय तहसँग समन्वय गरेर वास्तविक लाभग्राही छनोट गरी घर निर्माण प्रक्रिया अघि बढाइएको छ । लाभग्राही छनोट गर्दा स्थानीय तहको सिफारिस, आर्थिक अवस्था, जमिनको उपलब्धता तथा सामाजिक अवस्थालाई आधार बनाइने गरिएको छ ।

कार्यक्रमअन्तर्गत लाभग्राही परिवारलाई पक्की घर निर्माणका लागि अनुदान उपलब्ध गराइने व्यवस्था छ । कतिपय स्थानमा तीन कोठे घर निर्माणका लागि करिब ३ लाख ३० हजार रुपैयाँसम्म अनुदान उपलब्ध गराइने गरिएको छ ।

आर्थिक वर्ष २०६६र६७ देखि सुरु भएको जनता आवास कार्यक्रममार्फत हालसम्म देशभर २० हजारभन्दा बढी परिवारले सुरक्षित आवास प्राप्त गरिसकेको सरकारी तथ्यांक छ । यद्यपि योजना कार्यान्वयनमा ढिलाइ, निर्माण गुणस्तर कमजोर हुनु तथा आधारभूत पूर्वाधार अभाव जस्ता समस्या भने विभिन्न स्थानमा देखिँदै आएका छन् ।

यस्ता चुनौतीका बाबजुद पनि सरकारले जनता आवास कार्यक्रमलाई विपन्न नागरिकको जीवनस्तर सुधार्ने महत्वपूर्ण सामाजिक सुरक्षा योजनाका रूपमा अघि बढाइरहेको जनाएको छ ।

दाङ,२२ फागुन । प्रतिनिधिसभा सदस्य निर्वाचनअन्तर्गत दाङका तीनवटै निर्वाचन क्षेत्रमा मतगणना जारी रहँदा बदर मतको संख्या १ हजार नाघेको छ ।

लुम्बिनी प्रदेश निर्वाचन कार्यालयका अनुसार हालसम्म २४ हजार ४ सय ५३ मत गणना भएको छ । त्यसमध्ये १ हजार ११ मत बदर भएका छन् भने २३ हजार ४ सय ४२ मत सदर भएको सूचना अधिकारी गेहेन्द्र बहादुर कवरले जानकारी दिए ।

निर्वाचन क्षेत्र नम्बर १ मा सबैभन्दा बढी १४ हजार ८ सय ७१ मत गणना भएको छ । त्यसमध्ये ६ सय १९ मत बदर भएका छन् भने १४ हजार २ सय ५२ मत सदर भएका छन् ।

त्यसैगरी क्षेत्र नम्बर २ मा ३ हजार ९ सय १५ मत गणना भएको छ । त्यसमध्ये २ सय १ मत बदर भएका छन् भने ३ हजार ७ सय १४ मत सदर भएका छन् ।

यस्तै क्षेत्र नम्बर ३ मा ५ हजार ६ सय ६७ मत गणना हुँदा १ सय ९१ मत बदर भएका छन् । यहाँ ५ हजार ४ सय ७६ मत सदर भएका छन् ।

दाङ,२२ फागुन । प्रतिनिधिसभा सदस्य निर्वाचनअन्तर्गत दाङ निर्वाचन क्षेत्र नम्बर ३ मा मतगणना जारी रहेको छ । प्रारम्भिक ३ हजार ८४ मत गणना हुँदा राष्ट्रिय स्वतन्त्र पार्टी ९रास्वपा० का उम्मेदवार कमल सुवेदी फराकिलो अग्रतालाई कायम राखेका छन् ।

यस समाचार तयार पार्दासम्म सुवेदीले १ हजार ५४० मत प्राप्त गरेका छन् भने उनका निकटतम प्रतिस्पर्धी नेपाली कांग्रेसका दिपक गिरीले ८८१ मत पाएका छन् । यसअनुसार सुवेदी र गिरीको मतान्तर ६५९ रहेको छ ।

यस्तै, नेपाल कम्युनिष्ट पार्टी ९एमाले० का घनश्याम पाण्डेले ३८५ मत, नेकपा का धनबहादुर मास्कीले ११९ मत प्राप्त गरेका छन् ।

साना उम्मेदवारहरूमध्ये राप्रपाका दामोदर भण्डारीले ३६, नेकपा माओवादीका बलबहादुर ओलीले ७, जनमोर्चाका कमला जीसीले २ र श्रम संस्कृति पार्टीका टोपबहादुर महतराले ५ मत प्राप्त गरेका छन् ।

लुम्बिनी प्रदेश निर्वाचन कार्यालय दाङका सूचना अधिकारी गेहेन्द्र बहादुर कभरका अनुसार ३ हजार ८४ मत गणना गर्दा ९८ मत बदर भएका छन् ।

दाङ ,२१ फागुन । प्रतिनिधिसभा सदस्य निर्वाचनअन्तर्गत दाङ निर्वाचन क्षेत्र नम्बर ३ मा रहेको तुलसीपुर–५ स्थित तुलसी बोर्डिङ विद्यालय मतदान केन्द्रमा मतदान सुरु भएको छ ।

निर्धारित समयअनुसार बिहान ७ बजेदेखि मतदान प्रक्रिया सुरु भएको हो । बिहानैदेखि मतदाताहरू मतदान केन्द्र परिसरमा लामबद्ध भएर लाइनमा बसेका थिए ।

मतदान सुरु भएसँगै प्रतिनिधि र समानुपातिक दुवैतर्फ सुरुवाती मत खस्न थालेको छ । बिहानको सुरुवाती समयमा नै मतदाताको उल्लेखनीय सहभागिता देखिएको छ ।मतदान केन्द्र प्रमुख नवराज भण्डारीका अनुसार हालसम्म ६० जनाले प्रतिनिधिसभा र ६० जनाले समानुपातिकतर्फ मतदान गरेका छन् ।

मतदान शान्तिपूर्ण र व्यवस्थित बनाउन सुरक्षाकर्मी परिचालन गरिएको छ भने केन्द्रमा आवश्यक व्यवस्थापन मिलाइएको छ । मतदान बेलुका ५ बजेसम्म सञ्चालन हुने जनाइएको छ ।

निर्वाचनका कारण जिल्लाका प्रमुख बजार क्षेत्र तुलसीपुर, घोराही र लमही बन्द रहेका छन् । अत्यावश्यक सेवाबाहेकका सवारीसाधन सञ्चालनमा रोक लगाइएको छ भने अनुमति प्राप्त सवारीसाधन मात्र सञ्चालनमा छन् ।

दाङ,२० फागुन। प्रतिनिधिसभा सदस्य निर्वाचनका लागि दाङमा ५ हजार ५ सय ११ सुरक्षाकर्मी परिचालन गरिएको छ । नेपाली सेना, सशस्त्र प्रहरी बल नेपाल, नेपाल प्रहरी र राष्ट्रिय अनुसन्धान विभागका सुरक्षाकर्मी परिचालन गरिएको प्रमुख जिल्ला अधिकारी विश्वप्रकाश अर्यालले जानकारी दिए ।

उनका अनुसार मतदान सामग्री ढुवानीदेखि मतगणना सम्पन्न नभएसम्म सोही संख्यामा सुरक्षाकर्मी परिचालन गरिनेछ । एउटा मतदान स्थलमा तीन जना प्रहरी र पाँच जना निर्वाचन प्रहरी खटाइएको छ भने प्रत्येक मतदान केन्द्रमा एक जना नेपाल प्रहरी र दुई जना निर्वाचन प्रहरी परिचालन गरिएको छ ।

दाङमा १५९ मतदान स्थल रहेका छन् । तीमध्ये १६ वटा अति संवेदनशील, १३४ वटा संवेदनशील र ९ वटा सामान्य रहेका छन् । अति संवेदनशील क्षेत्रमा विशेष सुरक्षा व्यवस्था मिलाइएको छ । उपसचिवस्तरको मोबाइल टोली तथा प्रहरीका मोबाइल टोलीहरू पनि सक्रिय रहने जनाइएको छ ।

निर्वाचन सुरक्षाका लागि १० टोलीमा २० सदस्यीय बम डिस्पोजल टोली परिचालन गरिएको छ । साथै प्रत्येक निर्वाचन क्षेत्र समेट्ने गरी लमही, घोराही र तुलसीपुरमा बख्तरबन्द गाडी तयारी अवस्थामा राखिएको छ । मतदान स्थलमा तीन घेरामा सुरक्षा व्यवस्था मिलाइनेछ ।

मतपेटिकाको सुरक्षाका लागि भित्री घेरामा हतियारसहित नेपाल प्रहरी र बाहिरी घेरामा नेपाली सेना तथा सशस्त्र प्रहरी परिचालन गरिनेछ । प्रत्येक निर्वाचन क्षेत्रमा १३ वटा नेपाली सेनाको बेस र १३ वटा सशस्त्र प्रहरीको स्ट्राइकिङ तथा मोबाइल टोली खटाइनेछ ।

मतदान सकिएपछि मतपेटिका ढुवानीका लागि ९८ सवारी साधन भाडामा लिइएको छ, जसमा १७ वटा जीप र ८१ वटा ठूला गाडी रहेका छन् । मतदान सम्पन्न भएपछि राति ९ बजेसम्म सबै मतपेटिका मतगणना स्थलमा पु¥याउने तयारी गरिएको प्रमुख जिल्ला अधिकारी अर्यालले बताए ।