दाङ,१८ फागुन । निर्वाचन आयोगले देशभर सञ्चालन गरेको मतदाता शिक्षा कार्यक्रम सम्पन्न भएको छ । मतदानको महत्व र मतदान प्रक्रियाबारे आम जनतालाई जानकारी गराउने तथा बदर मत घटाउने उद्देश्यले मतदाता शिक्षा कार्यक्रम सन्चालन गरिएको हो।

आयोगका अनुसार देशभरका ६ हजार ७ सय ४३ वटै वडामा एकैपटक मतदाता शिक्षा कार्यक्रम सञ्चालन गरिएको थियो । फागुन ३ गतेदेखि शुरू भएको यो कार्यक्रम देशभरका ७ सय ५३ पालिकाका सबै वडामा सकिएको छ ।

हरेक वडामा मतदाता शिक्षा कार्यक्रमका लागि मतदाता शिक्षा स्वयंसेवक परिचालन गरिएको थियो । निर्वाचन आयुक्त जानकीकुमारी तुलाधरले मतदाताको घरदैलोमा पुगेर आम नागरिकसँग प्रत्यक्ष सम्पर्क राख्न सक्ने इमान्दार स्वयंसेवकका कारण कार्यक्रम भव्य रूपमा सम्पन्न भएको बताइन् ।

उनले महिला स्वास्थ्य स्वयंसेविकाको योगदानको पनि प्रशंसा गर्दै लक्षित कार्यक्रम सफल भएको उल्लेख गरिन । स्वास्थ्य स्वयंसेविकाले २०७९ को चुनावदेखि मतदाता शिक्षा प्रदान गर्न जिम्मेवारी लिएका थिए ।

मतदाता शिक्षा कार्यक्रम अन्तर्गत स्वयंसेवकहरूले आम मतदाताको बस्ती र घरदैलोमा पुगेर नमूना मतपत्रको माध्यमबाट चुनावको महत्त्व र मतदान प्रक्रियाबारे जानकारी दिएका थिए ।

काठमाडौ,१७ फागुन । इरानबाट प्रक्षेपण गरिएका ड्रोन र मिसाइल आक्रमणका क्रममा एक नेपालीसहित तीन विदेशी नागरिकको मृत्यु भएको छ। आइतबार संयुक्त अरब इमिरेट्स (यूएई) मा भएको उक्त आक्रमणमा अन्य ५८ जना घाइते भएका छन्।

गल्फ न्युज ले यूएईको रक्षा मन्त्रालयलाई उद्धृत गर्दै जनाएअनुसार शनिबारदेखि सुरु भएको आक्रमणयता वायुसेना तथा हवाई प्रतिरक्षा प्रणालीले १६५ ब्यालिस्टिक मिसाइल, दुई क्रुज मिसाइल र ५४१ ड्रोनको सामना गरिसकेको छ।

मन्त्रालयका अनुसार आइतबार बिहान मात्र २० ब्यालिस्टिक मिसाइल नष्ट गरिएको छ, जसमध्ये आठवटा समुद्रमा खसेका थिए। त्यस्तै दुई क्रुज मिसाइल र ३११ ड्रोन नष्ट गरिएको दाबी गरिएको छ।

इरानबाट प्रक्षेपण गरिएका १६५ ब्यालिस्टिक मिसाइलमध्ये १५२ अवरोध गरी नष्ट गरिएका र १३ समुद्रमा खसेका मन्त्रालयले जनाएको छ। ५४१ ड्रोनमध्ये ५०६ नष्ट गरिएका छन् भने ३५ ड्रोन बस्ती क्षेत्रमा खसेका कारण भौतिक क्षति भएको उल्लेख छ।

मृत्यु हुनेमा पाकिस्तानी, नेपाली र बंगलादेशी नागरिक रहेका छन्। मृतकहरूको नाम र विस्तृत विवरण सार्वजनिक गरिएको छैन।

घाइते ५८ जनामध्ये यूएईसहित इजिप्ट, इथियोपिया, फिलिपिन्स, पाकिस्तान, इरान, भारत, बंगलादेश, श्रीलंका, अजरबैजान, यमन, युगान्डा, एरिट्रिया, लेबनान र अफगानिस्तानका नागरिक रहेका छन्।

काठमाडौँ,१७ फागुन । फागुन २१ गते हुने प्रतिनिधि सभा सदस्य निर्वाचनका लागि आवश्यक सम्पूर्ण सामग्री देशभर पुगिसकेको निर्वाचन आयोगले जानकारी गराएको छ । आइतबार एक कार्यक्रममा बोल्दै निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले यस्तो जानकारी दिएका हुन् ।

आइतवार आयोजित एक कार्यक्रममा बोल्दै उनले उच्च पहाडी तथा हिमाली जिल्लासहित सबै स्थानमा निर्वाचन सामग्री ढुवानी भइसकेको बताए।

उनका अनुसार प्रत्येक निर्वाचन क्षेत्रमा जनशक्ति, मतदान कागजात र अन्य आवश्यक सामग्री पुगेरनपुगेको सुनिश्चित गर्न छुट्टै समितिबाट यकिन गरिएको छ।

सबै स्थानमा सामग्री पुगेपछि मात्र आधिकारिक जानकारी सार्वजनिक गरिएको उल्लेख गर्दै उनले निर्वाचन व्यवस्थापनका लागि आवश्यक सम्पूर्ण तयारी पूरा भएको दाबी गरे।

निर्वाचन आयोग का कार्यवाहक प्रमुख निर्वाचन आयुक्त भण्डारीले तोकिएको मितिमा निर्वाचन शान्तिपूर्ण रूपमा सम्पन्न गर्न आयोग प्रतिबद्ध रहेको पनि बताएका छन्।

मुस्ताङ, १७ फागुन। कोरला नाका तीन दिनका लागि बन्द गरिने भएको छ। लोमान्थाङ गाउँपालिकास्थित नेपाल–चीन सीमा क्षेत्रको २४ नम्बर नाका तीन दिनका लागि बन्द गरिने भएको हो ।

फागुन २१ गते हुने प्रतिनिधिसभा सदस्य निर्वाचनका लागि कोरला नाका फागुन १८ गते राति १२ बजेदेखि २१ गते राति १२ बजेसम्म बन्द रहने जनाइएको छ। उक्त अवधिमा अत्यावश्यक सेवाबाहेक सबै प्रकारका आवागमन निषेध गरिने जिल्ला प्रशासन कार्यालय मुस्ताङले जनाएको छ।

समुद्री सतहदेखि ४ हजार ६५० मिटर उचाइमा अवस्थित कोरला नाका क्षेत्रका स्थानीयलाई समेत सो अवधिमा बस्तीमै बस्न अनुरोध गरिएको छ।

त्यसैगरी जोमसोम–कोरला ११० किलोमिटर सडकखण्ड पनि फागुन २० गते राति १२ बजेदेखि मतदान सम्पन्न नभएसम्म बन्द गरिने जनाइएको छ।

काठमाडौं,१६ फागुन। राष्ट्रिय प्राकृतिक स्रोत तथा वित्त आयोगले प्रदेश र स्थानीय तहमा जाने वित्तीय समानीकरण अनुदान कटौती नगर्न केन्द्र सरकारको ध्यानाकर्षण गराएको छ। आयोगको बैठकले यस्तो निर्णय गरेको हो।

चालु आर्थिक वर्षको प्रथम छ महिनामा सरकारले लक्ष्यअनुसार राजस्व सङ्कलन गर्न नसकेपछि केन्द्रले वित्तीय समानीकरण अनुदान कटौती गर्ने निर्णय गरेको थियो। गत माघ २७ गते महालेखा नियन्त्रक कार्यालयले सबै कोष तथा लेखा नियन्त्रक कार्यालयलाई परिपत्र गर्दै तेस्रो किस्तावापतको रकम कटौती गर्न निर्देशन दिएको थियो।

आयोगले वित्तीय समानीकरण अनुदानको परिमाण निर्धारण गर्ने संवैधानिक अधिकार आफूमा निहीत रहेको स्पष्ट पारेको छ। निर्णयमा भनिएको छ, “आर्थिक वर्ष २०८२र८३ का लागि सङ्घीय सञ्चित कोषबाट प्रदेश र स्थानीय तहलाई हस्तान्तरण गरिने अनुदान आयोगको सिफारिस अनुसार नै उपलब्ध गराउनुपर्नेछ।”

नेपालको संविधानको धारा ६० को उपधारा ९३० र धारा २५१ को उपधारा ९१० ले पनि वित्तीय हस्तान्तरणको सिफारिस गर्ने अधिकार आयोगलाई दिएको छ। आयोगले भने अनुसारको अनुदान कार्यान्वयन गर्न सरकारको ध्यानाकर्षण गराइएको छ।

सरकारले भने लक्षित राजस्व सङ्कलन नभएकाले अनुदान कटौती गर्नुपरेको जनाएको छ। पुस मसान्तसम्म १५ खर्ब ३३ अर्ब ४४ करोड ६९ लाख रुपैयाँ लक्ष्यमध्ये करिब पाँच खर्ब ८८ अर्ब ५१ करोड ४२ लाख ९३८।३८५० मात्र सङ्कलन भएको थियो।

गत आर्थिक वर्षमा पनि अनुदान कटौती हुँदा प्रदेश र स्थानीय तहले ठेक्का लागिसकेका तथा कार्यान्वयन भइसकेका योजना–कार्यक्रमको बजेट कटौती भएको भन्दै असन्तुष्टि जनाएका थिए। विरोधपछि महालेखा नियन्त्रक कार्यालयले तेस्रो किस्तामा केही रकम निकासा गरेको थियो। चौथो किस्तामा पनि कटौती हुँदा कुल वार्षिक बजेटको ९१।७६५ मात्र प्राप्त भएको थियो।

काठमाडौँ,१६ फागुन। इरानको राजधानी तेहरानको मध्य भागमा तीनवटा शक्तिशाली विस्फोटका आवाज सुनिएका छन्। तेहरानको रिपब्लिक स्क्वायर क्षेत्रमा कैयौँ क्षेप्यास्त्र प्रहार भएको र आकाशमा धुवाँको मुस्लो उठेको तस्बिरहरू सार्वजनिक भएका छन्।

इरानको राज्य समर्थित फार्स न्यूज एजेन्सीले उत्तरी र पूर्वी भागमा समेत थप विस्फोटका आवाज सुनिएको जनाएको छ। घटनासँगै इजरायलले इरानमाथि ‘प्रि-एम्प्टिभ’ (अग्रिम) आक्रमण सुरु गरेको घोषणा गरेको छ।

इजरायली रक्षामन्त्री इस्रायल काट्जले राष्ट्रविरुद्धको खतरालाई निस्तेज पार्न यो कदम चालिएको बताए। आक्रमणसँगै इजरायलभर ‘विशेष र स्थायी आपतकालीन अवस्था’ लागू गरिएको छ।

इरानले पनि जवाफी क्षेप्यास्त्र प्रहार गर्न सक्ने चेतावनी दिइसकेको छ। यो सैन्य टकराव अमेरिका र इरानबीच कूटनीतिक वार्ताका प्रयासकै बीच भएको बीबीसीले जनाएको छ।

इजरायली प्रधानमन्त्री बेन्जामिन नेतन्याहुले इरानको ब्यालेस्टिक क्षेप्यास्त्र कार्यक्रम आफ्नो देशका लागि ठूलो खतरा रहेको भन्दै कुनै पनि सम्झौता स्वीकार नगर्ने चेतावनी दिइसकेका छन्।

गत जुन महिनामा पनि इजरायलले इरानमाथि आक्रमण गर्दा ‘१२ दिने युद्ध’ सुरु भएको थियो। अहिले फेरि सुरु भएको आक्रमणले मध्यपूर्वमा ठूलो युद्धको खतरा बढाएको विश्लेषकहरूले जनाएका छन्।

दाङ,१६ फागुन । सिरहाको बरियारपट्टी गाउँपालिका–२ श्रीपुरका सत्यनारायण साफीले संघर्षपूर्ण यात्रापछि सेतो एप्रोन लगाएका छन् ।  सत्यनारायणले पुर्ण छात्रवृत्तिमा नाम निकालेपछि उनको सेतो एप्रोन लगाएर  पढ्ने चाहाउने इच्छा पुरा भएको हो।

दैनिक मजदुरी गर्दै तयारी गरेका उनले चिकित्सा शिक्षा आयोगको प्रवेश परीक्षामा पूर्ण छात्रवृत्तिमा नाम निकाल्दै राप्ती स्वास्थ्य विज्ञान प्रतिष्ठान दाङमा भर्ना भएका हुन्।
प्रतिष्ठानले दोस्रो वर्षका ५० विद्यार्थीका लागि आयोजना गरेको ‘ह्वाइट कोट सेरेमनी’ कार्यक्रममा सत्यनारायणसहित विद्यार्थीहरूलाई औपचारिक रूपमा सेतो कोट प्रदान गरिएको थियो।

कार्यक्रममा निमित्त उपकुलपति प्रा. श्याम लम्साल, निमित्त डिन प्राडा. रमेश कडेल र निमित्त अस्पताल निर्देशक प्राडा. जनार्दन पन्थीले सेतो एप्रोन प्रदान गर्दै चिकित्सा पेशाको मर्यादा, अनुशासन र नैतिकताबारे विद्यार्थीलाई मार्गदर्शन दिएका थिए।

दलित समुदायका सत्यनारायणको परिवारसँग साढे चार धुर घडेरीबाहेक अन्य सम्पत्ति छैन। उनका बुबा मधुरी साफी मजदुरी गर्दै परिवार चलाउँदै आएका छन्। पाँच सन्तानमध्ये जेठा सत्यनारायणले २०७७ मा एसईई उत्तीर्ण गरेपछि २०७९ मा विराटनगरबाट कक्षा १२ विज्ञान विषयमा उत्तीर्ण गरेका थिए।

एमबीबीएस पढ्ने लक्ष्य राखेका उनले आर्थिक अभावका कारण काठमाडौंमा लामो समय तयारी गर्न सकेनन्। गाउँ फर्किएपछि निर्माण क्षेत्रमा मजदुरी गर्दै स्वाध्ययनमार्फत तयारी गरेका थिए। बिहान काम र बेलुका ६–७ घण्टा अध्ययन गर्ने नियमित अभ्यासले उनलाई दोस्रो प्रयासमा छात्रवृत्तिमा नाम निकाल्न सफल बनायो।

भर्नाका लागि उनकी आमाले छिमेकीसँग ८० हजार रुपैयाँ सापटी लिएपछि गत ८ पुसमा उनी प्रतिष्ठानमा भर्ना भएका हुन्। छात्रवृत्तिमा अध्ययनको अवसर पाए पनि बसोबास, खानपान, यातायात र अध्ययन सामग्रीमा ठूलो खर्च लाग्ने भएकाले परिवारमा आर्थिक चुनौती कायम रहेको छ।

सेतो कोट ग्रहण गरेपछि सत्यनारायणले स्वास्थ्य सेवा क्षेत्रमा समर्पित भएर अध्ययन र सेवा गर्ने प्रतिबद्धता व्यक्त गरेका छन्।

काठमाडौँ,१५फागुन। बीबीसीले प्रसारण गरेको जेनजी आन्दोलसम्बन्धी भिडियो हटाउने तयारी भएको छ । निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले निर्वाचनको मुखमा बीबीसीले प्रशारण गरेको भिडियो हटाउन कूटनीतिक पहल थालिएको बताएका छन्।

शुक्रबार पत्रकारसँग कुरा गर्दै उनले उक्त भिडियो नेपाली कानुनअनुसार प्रत्यक्ष कारबाहीको दायरामा नपर्ने भएकाले कूटनीतिक माध्यमबाट हटाउने प्रयास सुरु गरिएको जानकारी दिए। “नेपाली कानुनअनुसार सो सामग्रीमाथि कारबाही गर्न नमिल्ने अवस्था रहेकाले कूटनीतिक पहलमार्फत सम्भव भएसम्म छिट्टै हटाउने प्रक्रिया अघि बढाइएको छ,” उनले भने।

भण्डारीले निर्वाचन आचारसंहिता उल्लङ्घनसम्बन्धी उजुरीहरूमा पनि तीव्र रूपमा कारबाही भइरहेको बताए। उनका अनुसार देशभरका १६५ निर्वाचन क्षेत्रमा परेका करिब १ हजार उजुरीमध्ये अधिकांशमाथि कारबाही भइसकेको छ। फागुन २० गतेभित्र बाँकी उजुरीको टुंगो लगाउने तयारी रहेको उनले स्पष्ट पारे।

यस्तै, फागुन १४ गते मात्रै २५ वटा उजुरीमाथि कारबाही प्रक्रिया अघि बढाइएको जानकारी दिँदै उनले अन्य उजुरी परेमा विश्लेषण, छानबिन र आवश्यक कारबाही गरिने बताए। निर्वाचनलाई निष्पक्ष र मर्यादित बनाउन आयोग प्रतिबद्ध रहेको उनको भनाइ छ।

दाङ, १५ फागुन । दाङमा निर्वाचनको मतपरिणामलाई डिजिटल प्रणालीबाट सार्वजनिक गर्ने तयारी थालिएको छ।लुम्बिनी प्रदेश निर्वाचन कार्यालय दाङले फागुन २१ गते हुने निर्वाचनको मतपरिणाम डिजिटल सञ्चार माध्यमबाट सार्वजनिक गर्ने तयारी गरेको जनाएको हो ।

शुक्रबार घोराहीमा सञ्चारकर्मीसँग आयोजित ‘निर्वाचन र आमसञ्चार’ विषयक छलफल कार्यक्रममा निर्वाचनका क्रममा रिपोर्टिङ कार्यलाई सहज बनाउँदै लुम्बिनी प्रदेशभरकै नतिजा डिजिटल माध्यमबाट उपलब्ध गराउने व्यवस्था मिलाइँदै गरिएको जानकारी गराइएको हो।

निर्वाचनको सुरक्षा संवेदनशीलता कायम राख्दै नागरिकको गोप्य मतदान अधिकार सुरक्षित हुने गरी रिपोर्टिङको वातावरण बनाइने बताइएको छ।

प्रदेश निर्वाचन कार्यालय दाङका सूचना अधिकारी गेहेन्द्र कवँरले दाङका तीनवटै निर्वाचन क्षेत्रसहित लुम्बिनी प्रदेशका १२ वटै जिल्लाको मतपरिणाम यथासक्य छिटो सार्वजनिक गर्ने तयारी भइरहेको जानकारी दिए।

कार्यक्रममा प्रमुख जिल्ला अधिकारी विश्वप्रकाश अर्यालले निर्वाचनका क्रममा मिलाइएको सुरक्षा व्यवस्थाबारे जानकारी गराएका थिए।

त्यसैगरी कार्यालय प्रमुख लालसिंह खड्का र सूचना अधिकारी कवँरले फागुन २१ गते हुने निर्वाचनको समग्र तयारीबारे प्रकाश पारेका थिए।

छलफलमा नेपाल पत्रकार महासंघ का निवर्तमान केन्द्रीय अध्यक्ष बिपुल पोख्रेल, दाङ शाखा अध्यक्ष सन्तोष सुवेदी, पूर्व अध्यक्ष प्रताप रेग्मी लगायतले निर्वाचनका क्रममा सहज रिपोर्टिङको व्यवस्था मिलाउँदै गोप्य मतदानको सुनिश्चितता हुने गरी मतदान स्थल व्यवस्थापन गर्नुपर्नेमा जोड दिएका थिए।

कार्यक्रमको सहजीकरण सूचना अधिकारी गेहेन्द्र कवँरले गरेका थिए।

दाङ,१५ फागुन। फागुन २१ गते हुने प्रतिनिधिसभा सदस्य निर्वाचनका लागि दाङमा कर्मचारी परिचालनको तयारी पूरा भएको छ। प्रदेश निर्वाचन कार्यालय दाङका अनुसार जिल्लाभरका ४ सय ८२ मतदान केन्द्रमा प्रत्येक केन्द्रमा ६ जनाका दरले २ हजार ८ सय ९८ जना कर्मचारी खटिनेछन्। त्यस्तै घोराही र तुलसीपुरस्थित कारागारमा स्थापना गरिएका दुई अस्थायी मतदान केन्द्रमा ३/३ जनाका दरले थप ६ जना कर्मचारी परिचालन गरिनेछ। यससँगै कुल २ हजार ८ सय ९८ कर्मचारी निर्वाचनमा सक्रिय रहनेछन्।

प्रत्येक मतदान केन्द्रमा एक जना मतदान अधिकृत, एक जना सहायक मतदान अधिकृत, तीन जना सहायक कर्मचारी र एक जना सहयोगी रहने व्यवस्था गरिएको छ। अस्थायी मतदान केन्द्रमा भने एक जना मतदान अधिकृत, एक जना सहायक मतदान अधिकृत र एक जना सहयोगी कर्मचारी खटाइनेछ।

निर्वाचनमा खटिने कर्मचारीलाई तालिम प्रदान गर्नुका साथै आवश्यक सामग्री वितरणको काम अन्तिम चरणमा पुगेको कार्यालयले जनाएको छ। जिल्लाका तीनवटै निर्वाचन क्षेत्रमा कर्मचारी व्यवस्थापन तथा मतदान केन्द्र निर्धारणको प्रक्रिया सम्पन्न भइसकेको छ।

निर्वाचनलाई शान्तिपूर्ण र व्यवस्थित बनाउन सुरक्षा सतर्कता पनि बढाइएको छ। जिल्ला सुरक्षा समितिका संयोजक तथा प्रमुख जिल्ला अधिकारी विश्वप्रकाश अर्यालका अनुसार नेपाली सेना, सशस्त्र प्रहरी, नेपाल प्रहरी र निर्वाचन प्रहरी परिचालन गरिएको छ। जिल्लाभर करिब साढे पाँच हजारभन्दा बढी सुरक्षाकर्मी परिचालन गरिएको छ।