दाङ,१४ भदौ । देशका विभिन्न भागमा बाढीपहिरोले आठवटा सडक पूर्ण रुपमा अवरुद्ध भएका छन् । प्रहरी प्रधान कार्यालयका अनुसार सङ्खुवासभाको भोटखोलामा रहेको कोशी राजमार्ग, रसुवाको पासाङल्हामु राजमार्ग, सिन्धुपाल्चोकको अरनिको राजमार्ग पूर्ण रुपमा अवरुद्ध भएका हुन् ।

यस्तै बागलुङको कालीगण्डकी करिडोर, म्याग्दीको बेनी–दरबाङ सडक, रुकुमपश्चिमको जाजरकोट-डोल्पा भेरी करिडोर र दार्चुलाको गोकुलेश्वर–दार्चुला सडक पूर्ण रुपमा अवरुद्ध भएका छन् । तेह्रथुमको मध्यपहाडी लोकमार्ग, रसुवाको उत्तरगया, पासाङल्हामु राजमार्ग र पृथ्वी राजमार्ग अन्तर्गत धादिङको बेनिघाटमा सडक एकतर्फी सञ्चालन भएका छन् ।

नवलपरासी पूर्वको कालीगण्डकी करिडोर, तनहुँको पृथ्वी राजमार्ग, दाङको राप्ती राजमार्ग र अर्घाखाँचीको सालझण्डी ढोरपाटन सडकखण्ड एकतर्फी सञ्चालन भएका प्रहरीले जनाएको छ । 

काठमाडौं,१४ भदौ । उखु किसानले भदौ २५ गतेदेखि अनिश्चितकालीन रूपमा राजमार्ग अवरुद्ध गर्ने घोषणा गरेका छन्। शनिबार उखु उत्पादक महासंघ र उखु उत्पादन हुने जिल्लास्तरीय संघहरूको संयुक्त बैठकले माग सम्बोधन नभएको भन्दै सशक्त आन्दोलनमा जाने निर्णय गरेको हो।

बैठकपछि जारी विज्ञप्तिमा भनिएको छ, “माग सम्बोधन गराउन थप निर्णायक आन्दोलन अपरिहार्य भएकाले सशक्त आन्दोलनका लागि सबै जिल्लाका उखु किसानहरूको सक्रिय सहभागितामा सर्लाहीको हरिवनमा २५ गते बुधबारबाट अनिश्चितकालीन राष्ट्रिय राजमार्ग अवरुद्ध गर्ने सर्वसम्मत निर्णय गरिएको छ। सो क्रममा उत्पन्न हुने प्रतिकूल वातावरणको जिम्मेवारी नेपाल सरकार, अर्थ मन्त्रालय र प्रधानमन्त्री तथा मन्त्रिपरिषद्को हुनेछ।”

किसानहरूले सरकारले बाँकी अनुदान रकम बिनासर्त तत्काल भुक्तानी गर्नुपर्ने माग गरेका छन्। साथै, आगामी दिनमा उखुको मूल्य तोक्दा किसान प्रतिनिधिको सहभागिता सुनिश्चित गर्नुपर्ने, र आन्दोलनरत किसानलाई सडकबाट घर–खेत फर्किने वातावरण बनाउनुपर्ने उनीहरूको अडान छ।

काठमाडौं,१४ भदौ । सरकारले कालापानी, लिपुलेक र लिम्पियाधुरासहितको अद्यावधिक नक्सा संयुक्त राष्ट्रसंघमा पठाएको खुलेको छ।

सन् २०२५ को जनवरीमै नेपालले संयुक्त राष्ट्रसंघलाई पठाएको ‘कमन कोर डकुमेन्ट अफ नेपाल’ नामक दस्तावेजसँगै नक्सा पनि समावेश गरिएको स्रोतले जनाएको छ।

उक्त दस्तावेज प्रधानमन्त्री तथा मन्त्रिपरिषद्को कार्यालयले तयार पारेको हो। त्यतिबेला केपी शर्मा ओली प्रधानमन्त्री र आरजु राणा देउवा परराष्ट्रमन्त्री रहेका बेला परराष्ट्र मन्त्रालयमार्फत नक्सा पठाइएको हो। यसअघि नेपालले संयुक्त राष्ट्रसंघमा २०५१ साल जेठमा यस्तै दस्तावेज पठाएको थियो। करिब ३० वर्षपछि नेपालले फेरि अद्यावधिक दस्तावेज पठाएको हो।

यसपटक पठाइएको दस्तावेजमा नेपालको कुल क्षेत्रफल १ लाख ४८ हजार ७ वर्ग किलोमिटर उल्लेख गरिएको छ। यसअघि पठाइएको दस्तावेजमा भने १ लाख ३७ हजार १८१ वर्ग किलोमिटर मात्र क्षेत्रफल उल्लेख गरिएको थियो।

२०७७ जेठ ५ गते सरकारले कालापानी, लिपुलेक र लिम्पियाधुरासहितको भूभाग समेटेर नयाँ नक्सा मन्त्रिपरिषद्बाट पारित गरेको थियो। त्यही नक्सा जेठ ७ गते सार्वजनिक गरिएको थियो। त्यसपछि संविधान संशोधन विधेयक संसद्मा दर्ता गरी २०७७ जेठ ३१ गते सर्वसम्मतिले अनुमोदन गरिएको थियो।

भूमि व्यवस्था मन्त्रालयका एक उच्च कर्मचारीका अनुसार त्यसबेलै नयाँ नक्सालाई परराष्ट्र मन्त्रालयमार्फत संयुक्त राष्ट्रसंघ तथा नेपालस्थित विभिन्न देशका कूटनीतिक नियोगहरूमा पठाउने निर्णय गरिएको थियो। त्यसका लागि अंग्रेजी संस्करणमा समेत नयाँ नक्सा छापिएको थियो।

बांके,१३ भदौ । बाँके जिल्लाका सात स्थानीय तहमा पशु चौपायामा ‘लम्पी स्किन’ रोगको सङ्क्रमण फैलिएको छ। भेटेरिनरी अस्पताल तथा पशु सेवा विज्ञ केन्द्रका योजना अधिकृत तथा सूचना अधिकारी भोजबहादुर रावलका अनुसार जिल्लाभर एक महिनादेखि नै सङ्क्रमण देखिन थालेको हो।

हाल राप्तीसोनारी, जानकी गाउँपालिका, कोहलपुर नगरपालिका, नरैनापुर गाउँपालिका, खजुरा गाउँपालिका, बैजनाथ गाउँपालिका र डुडुवाका विभिन्न क्षेत्रमा सङ्क्रमण पुष्टि भएको छ। तर नेपालगञ्ज उपमहानगरपालिका क्षेत्रमा भने अहिलेसम्म रोग देखिएको छैन।

सूचना अधिकारी रावलले सङ्क्रमण बढ्दो अवस्थामा रहे पनि स्थानीय तहले तदारुकताका साथ उपचार गरिरहेको बताए। उनका अनुसार सबैभन्दा बढी गाई र गोरुमा समस्या देखिएको छ भने सङ्क्रमित पशुको यकिन सङ्ख्या अझै बढ्ने अनुमान गरिएको छ।

जानकी गाउँपालिकाका पशु सेवा शाखा प्रमुख दिलबहादुर खड्काले किसानलाई अनुदानमा औषधि उपलब्ध गराइएको जानकारी दिए। “नेपालमै नपाइने कतिपय औषधि भारतको रुपैडिहाबाट ल्याएर आपूर्ति गरिएको छ,” उनले बताए।

त्यस्तै, राप्तीसोनारी गाउँपालिकाका पशु सेवा विभाग प्रमुख जयबहादुर कार्कीले वडा नम्बर १, २ र ६ मा सङ्क्रमण देखिएको उल्लेख गर्दै ‘भ्याक्सिन’का लागि विज्ञ केन्द्रसँग पत्राचार गरिएको जानकारी दिए।

बर्दिया,१३ भदौ । कर्णाली नदीमा जलस्तर बढेपछि राजापुर नगरपालिका–४ स्थित दलैघाट क्षेत्रमा कटान भएको छ। सिँचाइ तथा जलस्रोत व्यवस्थापन आयोजना (साबिक कर्णाली नदी व्यवस्थापन आयोजना) का अनुसार करिब २ सय मिटर क्षेत्र नदीले कटान गरिसकेको छ।

जलमापन केन्द्रका अनुसार शुक्रबार बिहान कर्णाली नदीमा ७ मिटर पानी बढेको छ। नदीको जलस्तर १० मिटरभन्दा माथि पुगेमा बाढीको खतरा मानिने बताइएको छ।

कटान रोक्न आयोजना र स्थानीयवासीले श्रमदानमार्फत अस्थायी तटबन्ध निर्माण गरेका छन्। कटानका कारण राजापुर बजार उच्च जोखिममा परेको छ। ठूलो बाढी आए यस क्षेत्र डुबानमा पर्न सक्ने इन्जिनियर नवीन जोशीले बताए।

वर्षायाम सुरु भएयता हालसम्म करिब २ सय मिटर क्षेत्र नदीले कटान गरिसकेको छ। अस्थायी रूपमा बोल्डर र बालुवा भरिएका बोराहरू राखी तटबन्ध बनाइएको छ। यसैबीच, नदी कटानका कारण राजापुर र कैलाली जोड्ने सत्तीघाट पुल समेत जोखिममा परेको जनाएको छ।

अछाम ,१३ भदौ । अछाममा छाउगोठमा सुतेका बेला भीरबाट खसेको ढुंगाले किच्दा दुईजनाको मृत्यु भएको छ । घटनामा एकजना घाइते भएकी छन्।

पञ्चदेवल विनायक नगरपालिका–८, सेलापानीस्थित चुरखोली टोलकी ३५ वर्षीया निम खनाल र मंगलसेन नगरपालिका–६ की सात वर्षीया कविता भण्डारीको शुक्रबार (भदौ १३) बिहान घटनास्थलमै मृत्यु भएको जिल्ला प्रहरी कार्यालय अछामका प्रमुख ओमप्रकाश खनालले जानकारी दिए।

उक्त घटनामा कविताकी आमा घाइते भएकी छन्। उनलाई उपचारका लागि स्थानीय स्वास्थ्यचौकीमा लगिएको प्रहरीले जनाएको छ।

प्रहरीका अनुसार घटनास्थलतर्फ प्रहरी निरीक्षक टेकबहादुर देउवा नेतृत्वको टोली प्रस्थान गरेको छ।

काठमाडौं ,११ भदौ ।रौतहटमा रुबी कुमारी साहको हत्या आरोपमा पक्राउ परेका लक्ष्मण पासवानको किर्तिपुर बर्न अस्पतालमा निधन भएको छ।

गत शनिबार राति पेट्रोल खन्याएर आत्मदाहको प्रयास गरेका पासवानलाई प्रहरीले उद्धार गरी उपचारका लागि अस्पताल पुर्‍याएको थियो। साढे पाँच बजे उनको मृत्यु भएको पुष्टि भएको छ।

३० वर्षीय लक्ष्मण पासवानले रुबी कुमारी साहलाई आफ्नो कोठामा हत्या गरेको स्वीकार गरेका थिए। बुधबार बिहान उनले हिन्दी भाषामा ९ मिनेट ३० सेकेन्ड लामो भिडियो सन्देशमार्फत गौर ५ मा आफ्नै डेरामा हत्या गरी शव सुटकेटमा हालेर अटो रिक्सामा पठाएको स्वीकार गरेका थिए।

पासवान र रुबी दुवैको जन्मस्थान र घर माधोपुर, माधवनारायण नगरपालिका-६ र उनीहरू सानैदेखि साथी र कक्षाका सहपाठी थिए। कक्षा १० मा दुवैले भारतको सीतामढीमा भागेर विवाह गरेका थिए, तर रुबीकी आमाले विवाह स्वीकार नगरेको बताएका थिए।

काठमाडौं,११ भदौ । तीजको रमझम गाउँदेखि सहरसम्म चलेको थियो। चेलीबेटीहरू नाचगानमा रमाइरहेका थिए। तर, त्यही दिन १६ वर्षीया रिना विक र १३ वर्षीया रोशनी थापा भने घर जान खोज्ने योजनासहित हराएझैँ बनेका छन्।

चितवनमा बस्दै आएका दुवै दिदी–बहिनीका छोरी तीजका लागि सिन्धुलीको इन्द्रावती गाउँपालिका–७ सितापोखरी घर जाने सोचमा थिए। रोशनीले परिवारसँग घर जाने अनुमति मागेकी थिइन्। तर परिवारले ‘दसैँमा मात्र जाऊ’ भन्दै अनुमति नदिएपछि उनी सुत्न गएकी थिइन्।

‘बिहान उठ्दा दुवै घरमा थिएनन्,’ रोशनीकी फुपू तारा मकाजुले भनिन्, ‘तीजमा घर जाने भनेर योजना बनाएछन् तर दसैँमा जाऊ भन्दा उनीहरू चुप लागेर बिहानतिरै हिँडेछन्।’

कक्षा सातमा अध्ययनरत रोशनी २०७२ सालदेखि भरतपुर महानगरपालिका–११ नहर चोकमा आमासँग बस्दै आएकी थिइन्। रिना भने भरतपुर–२ क्षेत्रपुरमा बस्थिन्। दुवै किशोरी भदौ १० गते (मंगलबार) बिहानदेखि नै परिवारको सम्पर्कमा छैनन्।

सम्पर्कविहीन भएपछि रोशनीकी आमा जिल्ला प्रहरी कार्यालय चितवन पुगेर खोजीको निवेदन दिएकी छिन्। प्रहरीका अनुसार उनीहरूको मोबाइल फोन अन्तिम पटक काठमाडौंको बाफल क्षेत्रमा सक्रिय देखिएको छ।

‘पहिलो दिन दिउँसो १२:५६ मा मोबाइल अन्तिम पटक बाफल क्षेत्रमा लोकेसन देखिएको थियो। त्यसपछि बन्द भएको देखिन्छ। आज बिहान ८:३० बजेतिर पुनः खोलेका छन् र त्यही वरिपरिको लोकेसन देखाएको छ,’ प्रहरी निरीक्षक लक्ष्मण केसीले जानकारी दिए।

खोजीका लागि त्यही क्षेत्रमा प्रहरी परिचालन गरिएको छ। साथै काठमाडौं महिला सेलसँग पनि समन्वय गरिएको प्रहरीको भनाइ छ। दुवैको कल डिटेल निकाल्न अदालतमा अनुमति मागिएको छ।

प्रहरीले रिना र रोशनीलाई कतै देखेमा नजिकैको प्रहरी कार्यालयमा खबर गर्न सबैलाई आग्रह गरेको छ।

काठमाडौँ,११ भदौ । मुलुकमा सार्वजनिक ऋण चुलिँदै गएको छ । त्यस्तो ऋण चुलिँदै जाँदा मुलुकलाई व्ययभार चर्किंदै गएको छ ।

सार्वजनिक ऋण व्यवस्थापनको कार्यालयले उपलब्ध गराएको तथ्यांकअनुसार सार्वजनिक ऋण २७ खर्ब नजिक पुगेको छ । श्रावणमा मात्रै १४ अर्ब २ करोड ऋण थप भएको छ ।

योसँगै असारमा कूल सार्वजनिक ऋण २६ खर्ब ६९ अर्ब ५७ करोड रहेकोमा श्रावण मसान्तसम्ममा थप वृद्धि भई कुल सार्वजनिक ऋण दायित्व २६ खर्व ८३ अर्ब ६० करोड पुगेको कार्यालयले सार्वजनिक गरेको तथ्यांकले देखाएको हो । जुन कुल गार्हस्थ्य उत्पादनको ४३.९४ प्रतिशत हो ।

कुल सार्वजनिक ऋणमा श्रावण मसान्तसम्ममा वैदेशिक ऋणको हिस्सा ५२.२६ प्रतिशत तथा आन्तरिक ऋणको हिस्सा ४७.७४ प्रतिशत रहेको छ ।

चालु आर्थिक वर्षमा जम्मा ५ खर्ब ९५ अर्व सार्वजनिक ऋण परिचालन गर्ने लक्ष्य राखिएको छ । उक्त लक्ष्य मध्ये श्रावण मसान्तसम्ममा ४४ अर्ब ५७ करोड ऋण प्राप्ति भएको कार्यालयले सार्वजनिक गरेको तथ्यांकले देखाएको छ ।

कार्यालयले सार्वजनिक गरेको विवरणमा भनिएको छ– ‘वार्षिक लक्ष्यको तुलनामा कुल सार्वजनिक ऋण प्राप्ति ७.४८ प्रतिशत रहेको छ । जसमध्ये आन्तरिक र वाह्य ऋण प्राप्तिको प्रगति क्रमशः ११.०५ र १.९६ प्रतिशत रहेको छ । कुल सार्वजनिक ऋण प्राप्तिमध्ये आन्तरिक र वाह्य ऋणको हिस्सा क्रमशः ८९.७४ र १०.२६ प्रतिशत रहेको छ ।’

यस्तै चालु आर्थिक वर्ष २०८२÷८३ मा ऋण सेवा खर्चमा ४ खर्ब ११ अर्ब १ करोड बजेट विनियोजन भएको थियो । जसमा श्रावण मसान्तसम्म ३६ अर्ब ६८ करोड भुक्तानी भएको ऋण व्यवस्थापनको कार्यालयको प्रतिवेदनमा उल्लेख छ । यो वार्षिक बजेट विनियोजनको आधारमा ८.९३ प्रतिशत हो । कूल गार्हस्थ उत्पादनको आधारमा श्रावणसम्ममा कुल ऋण सेवा खर्च ०.६ प्रतिशत रहेको छ ।

श्रावणमा ऋण लिइसकेको सरकारले भदौ लागेयता पछि पनि ऋण लिन छाडेको छैन । आज (बुधवार) पनि विकास ऋणपत्र जारी गरेर १० अर्ब रुपैयाँ आन्तरिक ऋण उठाउने प्रक्रिया अघि बढाएको छ । विकास ऋणपत्र दुई वर्षभन्दा माथि अर्थात् मध्यम तथा दीर्घकालीन अवधिको आन्तरिक ऋण उठाउन प्रयोग गरिने सरकारी ऋणपत्र हो ।

अहिले नेपाल राष्ट्र बैंकबाट निष्कासन भएका विकास ऋणपत्र तीन वर्षदेखि १५ वर्ष अवधिसम्मका रहेका छन् । अहिले तीन वर्षका लागि विकास ऋणपत्र–२०८५ ‘ढ’ बोलकबोलमार्फत जारी गर्ने तयारी गरेको सार्वजनिक ऋण व्यवस्थापन कार्यालयले जानकारी दिएको छ ।

दाङ,९ भदौ । दाङ–रूपन्देही सम्पर्क समाज, परिवार बुटवलले आफ्नो दोस्रो साधारण सभा तथा तिजमिलन कार्यक्रम सम्पन्न गरेको छ।

बुटवल उपमहानगरपालिका वार्ड न.१ का वडा अध्यक्ष नरेन्द्र बस्नेतको प्रमुख आतिथ्यतामा कार्यक्रम भएको हो ।

कार्यक्रममा समाजका पदाधिकारी, आजिवन सदस्य, साधारण सदस्य, लगायतको सहभागिता रहेको थियो।

साथै, कार्यक्रममा समाजको अक्षय कोष स्थापना गरिएको छ। प्रमुख अतिथि बस्नेतले २५ हजार , समाजका आजिवन सदस्य तथा उद्योगपति कमल डागीले ५० हजार र समाजका वरिष्ठ सल्लाहकारले ५ हजार रुपैया कोषका सहयोग गरेका छन्। समाजले सहयोग गर्ने सबैप्रति धन्यवाद व्यक्त गरेको छ।

कार्यक्रममा बुटवल खानेपानी संस्थाका प्रशासन प्रमुख झग बहादुर डागी,नेपाल टेलिकम मङगलापुर शाखा प्रमुख शङ्कर बिक, समाजका सल्लाहकार माधब बस्नेत, प्रमोद अधिकारी, चक्रबहादुर बस्नेत, कानूनी सल्लाहकार बिमल गिरी , संस्थापक सल्लाहकार यमु थापा, बुटवल ईलाका कार्यरत वरिष्ठ सई खिमबहादुर खत्री लगायतको सहभागीता रहेको कार्यक्रम संयोजक रमा सुबेदीले जानकारी गराइन।

उक्त कार्यक्रम रेशम बहादुर महराको अध्यक्षतामा भएको थियो