काठमाडौं ,९ भदौ । युक्रेनले हालै गरेको ड्रोन आक्रमणमा रूसका विभिन्न महत्वपूर्ण संरचनामा क्षति पुगेको अन्तर्राष्ट्रिय समाचार संस्था रोयटर्सले जनाएको छ।

रिपोर्टअनुसार, युक्रेनले एकैपटक ९५ वटा ड्रोन खसालेको छ। तीमध्ये एक ड्रोन सीमाबाट करिब ६० किलोमिटर टाढा रहेको कुर्स्क परमाणु केन्द्रमा खसेर सहायक ट्रान्सफर्मरमा क्षति पुर्‍याएको हो। आक्रमणपछि परमाणु भट्टीको उत्पादन क्षमता ५० प्रतिशतले घटेको जनाइएको छ। प्लान्टले भने विकिरण स्तर सामान्य रहेको र मानवीय क्षति नभएको स्पष्ट पारेको छ।

यस्तै, लेनिनग्राद क्षेत्रको फिनल्याण्ड खाडी किनारस्थित उस्ट–लुगा बन्दरगाहमा पनि कम्तीमा १० वटा ड्रोन खसालिएको छ। नोभाटेक कम्पनीद्वारा सञ्चालित इन्धन टर्मिनलमा टुक्रा परेर भीषण आगलागी हुँदा आकाशमा बाक्लो कालो धुवाँ देखिएको बताइएको छ। सो टर्मिनलमार्फत चीन, सिंगापुर, ताइवान, मलेशिया लगायतका मुलुकमा नाफ्था, हवाई इन्धन तथा अन्य पेट्रोलियम पदार्थ आपूर्ति हुने गर्दछ।

त्यस्तै, दक्षिणी रूसी शहर सिजरानमा भएको अर्को आक्रमणमा एक बालक घाइते भएको स्थानीय अधिकारीहरूले जनाएका छन्। यसअघि यही क्षेत्रमा रहेको रोसनेफ्ट तेल प्रशोधन कारखाना युक्रेनी आक्रमणपछि बन्द गर्नुपरेको थियो।

संयुक्त राष्ट्रसंघीय आणविक ऊर्जा एजेन्सी (आईएईए) ले कुर्स्क परमाणु केन्द्रमा भएको घटनाप्रति चिन्ता व्यक्त गर्दै युद्धबीचमा पनि परमाणु संरचनाहरू सुरक्षित हुनुपर्नेमा जोड दिएको छ।

युद्धको समाधानका लागि शान्ति वार्ता गर्ने चर्चा भइरहे पनि युक्रेन–रूसबीचको द्वन्द्व अझै तीव्र बन्दै गएको छ। अब आक्रमण मोर्चासँगै दुबै मुलुकका भित्री भागसम्म फैलिएको देखिन्छ।

अमेरिकी राष्ट्रपति डोनाल्ड ट्रम्पले हालै रूसी राष्ट्रपति भ्लादिमिर पुटिनसँग अलास्कामा भेटवार्ता गरी युद्ध अन्त्यका उपायबारे छलफल गरेका थिए। यद्यपि, रूसले युक्रेनी राष्ट्रपति भोलोदिमिर जेलेन्स्कीसँग प्रत्यक्ष वार्ता गर्ने चासो देखाएको छैन। ट्रम्पले पुटिनलाई दुई साताभित्र वार्ता टेबलमा बस्न अल्टिमेटम दिएका छन्।

काठमाडौँ ,८ भदौ । कृषि परियोजनामा बैंक तथा वित्तीय संस्थाले प्रवाह गर्ने कर्जामा ब्याजदर घट्ने भएको छ।

नेपाल राष्ट्र बैंकले मंगलबार जारी गरेको परिपत्र अनुसार नेपाल कृषि अनुसन्धान परिषद् (नार्क) ले सिफारिस गरेका जातका कृषि उपजहरूको उत्पादन बढाउने परियोजनामा कर्जा प्रवाह गर्दा आधार दरमा बढीमा १.५ प्रतिशतसम्म मात्र प्रिमियम थप गर्न पाइने व्यवस्था गरिएको छ।

यसअघि यस्तो कर्जामा २ प्रतिशतसम्म प्रिमियम थप्ने व्यवस्था थियो।

राष्ट्र बैंकले यस्ता कर्जामा ग्रेस अवधि प्रदान गरेको पहिलो वर्ष असल कर्जाका लागि कर्जा नोक्सानी व्यवस्था ०.२५ प्रतिशत र दोस्रो वर्ष ०.५ प्रतिशत कायम गर्न सकिने प्रावधान गरेको छ।

त्यस्तै, आवश्यक परे यस्ता कर्जामा ग्रेस अवधि उपलब्ध गराउन वा ब्याज पुँजीकरण गर्ने सुविधा समेत दिने व्यवस्था गरिएको छ।

काठमाडौँ,८ भाडा । अशोक राई नेतृत्वको जनता समाजवादी पार्टी (जसपा) ले सरकारमा रहेका आफ्ना दुई मन्त्रीलाई फिर्ता बोलाउने निर्णय गरेको छ। पार्टीको यसअघि बसेको बैठकले सो निर्णय गर्दै प्रधानमन्त्री कार्यालयलाई समेत जानकारी गराइसकेको उपाध्यक्ष परशुराम बस्नेतले जानकारी दिएका छन्।

उनका अनुसार मन्त्री रहेका प्रदीप यादव र नवलकिशोर साहलाई फिर्ता बोलाई डा. वीरेन्द्र महतो र रञ्जु झालाई मन्त्रीमा पठाउने निर्णय भएको छ। बस्नेतले भने, “सरकारमा हाम्रो पार्टीबाट रहेका दुवै मन्त्रीले भदौ ११ गतेभित्र राजीनामा दिनुहुनेछ, त्यसपछि नयाँ मन्त्रीहरूले जिम्मेवारी सम्हाल्नुहुनेछ।”

जसपाले यादव र साहलाई एक वर्षका लागि सरकारमा पठाएको थियो। उनीहरू एक वर्षभन्दा बढी समयदेखि सरकारमा जिम्मेवारी सम्हालिरहेका छन्।

उपेन्द्र यादव नेतृत्वको जसपा नेपालबाट अलग भई नयाँ जसपा गठन भएपछि रञ्जु झाको नाम पनि विना विभागीय मन्त्रीमा सिफारिस भएको थियो। तर, उनले सो पद नस्वीकार्दै एक वर्ष कुर्ने निर्णय गरेकी थिइन्।

त्यस्तै, यसअघि जसपा नेपाल सरकारमा सहभागी हुँदा डा. वीरेन्द्र महतो वनमन्त्रीसमेत भइसकेका छन्।

दाङ,८भदौ । पश्चिम तराइका थारू समुदायले आज आफ्नो महत्त्वपूर्ण पर्व अटवारी उल्लासपूर्वक मनाउँदैछन् । यो पर्व दर खाने, व्रत बस्ने, रोटी–भात पकाई देवतालाई चढाउने परम्परासहित मनाइन्छ ।

दाङको घोराही–१७ की थारू अगुवा सरस्वती चौधरीका अनुसार अटवारीमा बेलुकी पकाइएका रोटी, दही र फलफूल अग्नि देवतालाई चढाइन्छ र दिदीबहिनीका लागि छुट्टै परिकार तयार गरिन्छ । दाजुभाइले आफ्ना दिदीबहिनीलाई फलफूल, रोटी तथा अन्य परिकार घरमै पुर्‍याउने प्रचलन रहेको उनले बताइन् । दिदीबहिनीका घरमा कोसेली पु¥याएपछि मात्र पर्व सम्पन्न हुने मान्यता छ ।

पौराणिक कथाअनुसार भीमको पूजा गरेर अटवारी पर्व मनाउने परम्परा पनि छ । थारू संस्कृतिविद् अशोक चौधरीका अनुसार थारू समुदायले सूर्यलाई उज्यालोको प्रतीकका रूपमा मान्दै आएको छ, र यस पर्वले दाजुभाइ–दिदीबहिनीबीचको सम्बन्ध अझ प्रगाढ बनाउने विश्वास गरिन्छ ।

यसैबीच, लुम्बिनी प्रदेश सरकारले थारू समुदायको बर्का अटवारी पर्वको अवसरमा आज सार्वजनिक बिदा दिएको छ । प्रदेश सरकारको निर्णयअनुसार दाङ, बाँके, बर्दिया, रूपन्देही, कपिलवस्तु र पश्चिम नवलपरासीमा सार्वजनिक बिदा दिइएको छ ।

दाङ, भदौ ७ । थारू समुदायको अट्वारी पर्वको अवसरमा दाङसहित विभिन्न जिल्लामा सार्वजनिक बिदा घोषणा गरिएको छ। यस वर्ष अट्वारी पर्व भदौ ८ र ९ गते मनाइँदैछ।

लुम्बिनी प्रदेश सरकारले थारू बहुल जिल्ला दाङ, बाँके, बर्दिया, कपिलवस्तु, रुपन्देही र पश्चिम नवलपरासीमा भदौ ८ गतेका लागि सार्वजनिक बिदा दिएको छ। त्यस्तै, दाङका विभिन्न स्थानीय तहहरूले भदौ ९ गते समेत बिदा घोषणा गरेका छन्।

घोराही उपमहानगरपालिकाले कार्यपालिकाको १७७औँ बैठकको निर्णयअनुसार भदौ ९ गते अट्वारी र तीज दुबै पर्वका अवसरमा सार्वजनिक बिदा दिएको जानकारी प्रमुख प्रशासकीय अधिकृत ऋषिराम केसीले दिएका छन्।

दंगीशरण गाउँपालिकाले पनि भदौ ९ गते अट्वारी बिदा दिने निर्णय गरेको अध्यक्ष सम्भु गिरीले जानकारी गराएका छन्। त्यस्तै, राजपुर गाउँपालिकाले प्रमुख प्रशासकीय अधिकृत दशरथ बुढामार्फत सूचना जारी गर्दै भदौ ९ गते सार्वजनिक बिदा हुने जनाएको छ।

लमही नगरपालिकाले भने यस वर्ष भदौ १५ र १६ गते अट्वारी बिदा दिने घोषणा गरेको नगर प्रमुख जोखराज चौधरीले बताएका छन्।

हरेक वर्ष कृष्ण जन्माअष्टमी (अष्टिम्की) पछिको दोस्रो आइतबार, अर्थात् कुशे औँसीपछिको पहिलो आइतबार, थारू समुदायले अट्वारी पर्व मनाउँदै आएको परम्परा छ।

काठमाडौं,७ भदौ । नेपाली समाजमा भाद्र कृष्ण औँसी अर्थात् कुशे औँसी अथवा बुबाको मुख हेर्ने दिन विशेष पर्वका रूपमा मनाइन्छ। यो दिनले जीवित पिताप्रति आदर, सम्मान र कृतज्ञता प्रकट गर्ने अवसर प्रदान गर्नुका साथै दिवङ्गत पिताको स्मरण गर्दै पिण्डदान र श्राद्ध गर्ने धार्मिक तथा सांस्कृतिक अभ्यासलाई निरन्तरता दिइँदै आएको छ।

यस पर्वमा छोराछोरीले आफ्ना बाबुलाई उपहार, मिठाई, कपडा वा मनपर्ने पकवान अर्पण गर्ने परम्परा छ भने दिवङ्गत पितृको सम्झनामा गोकर्णेश्वर, बाग्मती किनार लगायत तीर्थस्थलमा पुगेर पिण्डदान गर्ने चलन रहेको छ। विशेषगरी काठमाडौंको गोकर्णेश्वर महादेव परिसरमा यस दिन ठूलो मेला लाग्ने परम्परा छ, जसले समुदायबीच एकता र सामाजिक सम्बन्धलाई मजबुत बनाउने काम गर्दछ।

हिन्दू परम्पराअनुसार कुशलाई भगवान विष्णुको प्रतीक मानिन्छ। यसैकारण यस दिन घर–घरमा पवित्र कुश भित्र्याइन्छ। धार्मिक विश्वासअनुसार, औँसीको दिन पितृदेवताहरू पृथ्वीमा अवतरित हुने भएकाले तर्पण, दान र श्रद्धा मार्फत तिनीहरूलाई सन्तुष्ट पारिन्छ भन्ने मान्यता छ।

कुशे औँसीले पारिवारिक सम्बन्धलाई प्रगाढ बनाउनुका साथै सामाजिक, सांस्कृतिक र धार्मिक मूल्यलाई निरन्तरता दिने काम गर्दछ। पिता–सन्तानबीचको आत्मीयता, आपसी विश्वास र संस्कारको हस्तान्तरण यस पर्वको मूल भावनासँग जोडिएको छ।

अन्तर्राष्ट्रिय सन्दर्भमा ‘फादर्स डे’ प्रायः जून महिनामा उपहार र समय बिताएर मनाइन्छ भने नेपालमा कुशे औँसी धार्मिक, सांस्कृतिक र सामाजिक मूल्यसँग गहिरो रूपमा गाँसिएको पर्वका रूपमा विशिष्ट मानिन्छ।

यसरी, बुबाको मुख हेर्ने दिन केवल भावनात्मक पर्व मात्र नभई धार्मिक आस्था, सामाजिक शिक्षा र सांस्कृतिक निरन्तरताको अद्वितीय संयोजनका रूपमा नेपाली समाजमा स्थापित भएको छ।

काठमाडौं,५ भदौ । प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिले विद्यालय शिक्षा विधेयक, २०८० पारित गरेको छ।

बिहीबार सिंहदरबारमा बसेको बैठकले विधेयक सम्बन्धी समितिको प्रतिवेदनमाथि छलफल गर्दै पारित गरेको हो। तर, केही दफामा माओवादी केन्द्र, रास्वपा र राप्रपाका सांसदहरूले फरक मत राखेका छन्।

माओवादी सांसदहरूले हाल कार्यरत बालविकास सहयोगीलाई उमेरको हद नलाग्ने गरी शिक्षक प्रतिस्पर्धामा सहभागी गराउनुपर्ने माग गरेका छन्। साथै, शहीद, बेपत्ता, घाइते र विपन्न परिवारका विद्यार्थीलाई आवास तथा पोसाकको व्यवस्था सरकारकै जिम्मेवारीमा गर्नुपर्ने उनीहरूको धारणा छ।

यसैगरी, सांसदहरू देवेन्द्र पौडेल, रेखा शर्मा, महिन्द्र राय यादव, ज्ञानु बस्नेत, सुमना श्रेष्ठ र विना जैसवालले बालविकास र छात्रवृत्तिबारे फरक मत राखेको समिति सभापति अम्मर बहादुर थापाले जानकारी दिए।

थापाले मन्त्रालयले स्वीकार गरेका विषय र भाषा मिलाउन समिति सचिवालयलाई निर्देशन दिँदै विधेयकसम्बन्धी प्रतिवेदन आगामी संसद बैठकमा प्रस्तुत हुने बताए।

दाङ, २ भदौ । नेपाल टेलिकम दाङको तुलसीपुर कार्यालयले कार्यालय समय बढाएर बिहान ७ बजेदेखि बेलुका ७ बजेसम्म सेवा दिने व्यवस्था गरेको छ। यसअघि १० बजेदेखि ५ बजेसम्म मात्र सेवा दिँदै आएकोमा अब दुई सिफ्टमा कर्मचारी परिचालन गरी दिनभर १२ घण्टा सेवा उपलब्ध गराइएको हो।

कार्यालय प्रमुख प्रविण कुमार चौधरीका अनुसार बिहान ७ बजेदेखि दिउँसो २ बजेसम्म पहिलो सिफ्ट र दिउँसो १२ बजेदेखि बेलुका ७ बजेसम्म दोस्रो सिफ्टका कर्मचारीले सेवा दिने व्यवस्था मिलाइएको छ। उनले नयाँ व्यवस्थाले सेवाग्राहीलाई थप सहजता हुने, गुनासो व्यवस्थापन छिटो हुने र सेवा प्रवाहमा प्रभावकारिता बढ्ने बताएका छन्।

चौधरीले कार्यालयले तोकेको समयअनुसार खाजा तथा खाना खर्च पनि उपलब्ध गराउँदै आएको र यसबाट कर्मचारीको कार्यसम्पादन ऊर्जाशील बनेको बताए। उनका अनुसार, यस नयाँ अभ्यासले सेवाग्राहीको गुनासो तत्काल सम्बोधन गर्न सहज भएको छ।

यसअघि कार्यालयमा आएको गुनासोमध्ये करिब ४५ प्रतिशत मात्र पहिलो दिनमै समाधान हुने गरेकोमा अहिले ९४ प्रतिशत गुनासो त्यही दिनमै सम्बोधन भइरहेको छ। सेवाग्राहीले पनि कार्यालयको सेवा छिटो, छरितो र जिम्मेवारपूर्ण भएको भन्दै सकारात्मक प्रतिक्रिया दिएका छन्।

तुलसीपुरका स्थानीय विश्राम कार्कीले पहिले सामान्य सेवा लिन दिनभर कुर्नुपर्ने भए पनि अहिले छिनभरमै काम सम्पन्न हुने गरेको बताए। त्यस्तै, सेवाग्राही गिरिशा शर्माले बेलुका ४ बजे कार्यालय पुगेर इन्टरनेट र टेलिफोन जोड्ने अनुरोध गरेपछि एक घण्टामै आफ्नो घरमा दुवै सेवा पाएको अनुभव सुनाइन्।

गत वैशाखदेखि ट्रायलको रूपमा सुरु गरिएको यो अभ्यास परिणामसहित प्रभावकारी देखिएपछि निरन्तरता दिइएको कार्यालयले जनाएको छ। तुलसीपुर कार्यालयबाट दाङसहित रुकुमपूर्व, रोल्पा र प्युठानका करिब १० हजार सेवाग्राही लाभान्वित हुँदै आएका छन्।

दाङ, २७ साउन । नेपालको समग्र विकासमा युवा उद्यमशीलता महत्वपूर्ण पक्षका रूपमा स्थापित हुँदै गएको छ। मुलुकको करिब ७० प्रतिशत विकास निजी क्षेत्रको माध्यमबाट हुँदै आएको सन्दर्भमा युवाहरूको उद्यमशील भूमिका झनै महत्वपूर्ण छ। कुल जनसङ्ख्याको ४२ प्रतिशतभन्दा बढी हिस्सा युवाको रहेको तथ्यांक छ, तर करिब २० प्रतिशत युवा बेरोजगार छन्। साथै, युवाहरूको विदेश पलायन दर पनि उच्च छ।

देशमै पर्याप्त सम्भावना हुँदाहुँदै पनि राजनीतिक अस्थिरता, नीति निर्माणमा देखिएको असंगठितता, तथा नेतृत्व तहमा देखिएको कमजोरीका कारण युवाहरू निराश भइरहेका छन्। यस्तो अवस्थामा उद्यमी बन्ने चाहना हुँदाहुँदै पनि धेरै युवाहरूमा नैराश्यता देखिएको छ।

यिनै विषयमा बहस गर्न दाङको तुलसीपुरमा नगर युवा सञ्जालको आयोजनामा “युवा र उद्यमशीलता” शीर्षकमा कार्यक्रम सम्पन्न भएको छ। कार्यक्रममा स्थानीय विद्यार्थी, शिक्षक, उद्यमी तथा विभिन्न क्षेत्रका प्रतिनिधिहरूको सक्रिय सहभागिता रहेको थियो। २६ औँ अन्र्तराष्ट्रिय युवा दिवसको अवसरमा उक्त कार्यक्रम गरिएको हो ।

कार्यक्रममा जवाफदेहि पक्षका रुपमा तुलसीपुर उपमहानगरपालिकाका पूर्व नगरप्रमुख घनश्याम पाण्डे, उपमहानगरको आर्थिक विकास समितिका संयोजक माधव वली, तुलसीपुर उद्योग वाणिज्य संघका अध्यक्ष विनिल केसी तथा नेपाल यातायात व्यवसायी महासंघका केन्द्रीय सल्लाहकारहरू सहभागी थिए।

कार्यक्रममा युवाहरूलाई उद्यमशीलता तर्फ कसरी आकर्षित गर्ने, यस क्षेत्रमा रहेका चुनौती र सम्भावनाबारे व्यापक छलफल तथा प्रश्नोत्तर गरिएको थियो।

हिमाल एकेडेमी कक्षा १२ की मुना बुढाथोकीले गरेको पूँजी नभएको व्यक्तिले उद्यम गर्न सक्दैन भन्ने धारणा कति सही वा गलत हो भन्ने प्रश्नमा उद्योग वाणिज्य संघका अध्यक्ष केसीले उद्यमशीलता केवल पूँजीको कुरा होइन, सीप, सिर्जना र सही सोच आवश्यक पर्छ। युवाले आफूमा विश्वास गरेर अगाडि बढ्नुपर्ने जवाफ दिएका थिए ।

कार्यक्रममा कान्ति भट्टराईले परिवारको आलोचना र मानसिक दबाबका कारण उद्यम सुरू गर्न कठिनाइ भएको अनुभव सुनाउँदै युवाहरूको मनोबल बढाउने उपायबारे सुझाव मागिन्।

तुलसीपुर बहुमुखी क्याम्पसका सहायक प्रमुख सूर्य प्रसाद शर्माले युवा उद्यमशीलताको विकासका लागि मानसिकता परिवर्तन गर्न आवश्यक रहेको बताए । विद्यालय तहबाटै उद्यमशीलताको अवधारणा सिकाउनुपर्ने र स्कुलस्तरमै उद्यमशीलता केन्द्रहरू स्थापना गर्नुपर्ने बेला आएको उल्लेख गरे ।

विद्यार्थी केबि ओलीले सरकार युवालाई कसरी उद्यमशीलतामा जोड्न सक्छ भन्ने जिज्ञासा राखेका थिए ।
कार्यक्रममा उपमहानगरका आर्थिक विकास समिति संयोजक माधव ओलीले युवालाई हतोत्साहित नगरी नयाँ सोच र दृष्टिकोण विकास गर्नुपर्ने सुझाव दिए ।
यातायात व्यवसायी सुरेश हमालले यातायात क्षेत्रमा काम गरिरहेका युवाप्रति सकारात्मक दृष्टिकोण आवश्यक रहेको बताए।

कार्यक्रमले उद्यमशीलता क्षेत्रमा युवाको सहभागिता बढाउन सोच, व्यवहार र नीति तहमा परिवर्तन आवश्यक रहेको बताइएको थियो ।
बहस कार्यक्रमको सहजकर्ताका रुपमा नेपाल पत्रकार महासंघका निर्वतमान अध्यक्ष दुर्गलाल केसी रहेका थिए । कार्यक्रमको सहजीकरण तुलसीपुर नगर युवा सञ्जालका गणेश भण्डारीले गरेका थिए ।

हाल नेपालमा युवाको संख्या ४२ प्रतिशतभन्दा बढी भए पनि १९.८ प्रतिशत युवा पूर्ण बेरोजगारीको अवस्थामा छन्। यस्तो अवस्थामा युवा उद्यमशीलतालाई राष्ट्रिय प्राथमिकतामा राख्नु समयको माग हो।

काठमाडौँ,२७ साउन । उपचारका क्रमममा कैदीको मृत्यु भएपछि उनका परिवार र आफन्तले अस्पताल अगाडि प्रदर्शन गरेका छन् । पर्साको वीरगन्जस्थित नारायणी अस्पतालमा मंगलबार बिहान एक कैदीको उपचारका क्रममा मृत्यु भएपछि मृतकका परिवारजन र आफन्तले अस्पताल अगाडि प्रदर्शन गरेका हुन् ।

वीरगन्ज महानगरपालिका–२५ का २८ वर्षीय राहुल साह तुराहा कर्तव्य ज्यान मुद्दामा दोषी ठहर भई पछिल्लो पाँच वर्षदेखि वीरगन्ज कारागारमा कैद सजाय भुक्तान गर्दै आएका थिए।

प्रहरी र स्थानीय प्रशासनको लापरवाहीका कारण राहुलको मृत्यु भएको भन्दै उनका आफन्तले नारायणी अस्पताल अगाडिको सडकमा टायर बालेर प्रदर्शन गरेका छन्। उनीहरूले प्रहरी र प्रशासनविरुद्ध नाराबाजी गर्दै दोषीलाई कारबाही र उचित क्षतिपूर्तिको माग गरेका छन्।

नारायणी अस्पतालका सूचना अधिकारी डा। उदयनारायण सिंहका अनुसार मंगलबार बिहान ८स्३० बजे कारागार प्रहरीद्वारा अस्पताल ल्याइएका राहुलको मुखबाट रगतसहितको फिज निस्किरहेको थियो। अवस्था निकै जटिल रहेकाले उनलाई आइसीयूमा राखेर उपचार गर्नुपर्ने देखिएको थियो तर अस्पतालमा बेड खाली थिएन।

डा। सिंहका अनुसार त्यसपछि डाक्टरहरूले उनलाई अन्यत्र रेफर गर्ने निर्णय लिएर कागज बनाइदिए। तर अवस्था झन् बिग्रिएपछि पर्साका प्रमुख जिल्ला अधिकारी ९सीडीओ० गणेश अर्यालसँग समन्वय गरी नारायणी अस्पतालमै शैया व्यवस्थापन गरेर भर्ना गरियो। तर उपचारकै क्रममा उनको मृत्यु भयो। डा। सिंहका अनुसार मृत्युको कारण पल्मोनरी इडिमा ९फोक्सोमा पानी जम्ने० अर्थात् हार्ट फेलियर रहेको छ।

तर मृतकका आफन्तले प्रशासन र प्रहरीको लापरवाहीको आरोप लगाएका छन्। राहुलका काकाका छोरा जगदीश साह तुराहाका अनुसार डाक्टरले रिफर गरिसके पनि प्रहरी अधिकारीले सीडीओको आदेश भन्दै बिरामीलाई अन्यत्र लैजान रोके।

‘हामीले एम्बुलेन्स बोलाएर भाइलाई राखिसकेका थियौं। तर प्रहरी आएर भने– बाहिर लैजान पाइँदैन, सीडीओको आदेश छ। हामीले धेरै आग्रह गर्‍यौं तर कसैले नसुनेका कारण भाइले ज्यान गुमाउनु पर्‍यो,’ उनले भने।

उनले दोषीलाई कारबाही र परिवारलाई क्षतिपूर्ति नदिएसम्म शव नबुझ्ने चेतावनी दिएका छन्।

पर्साका प्रमुख जिल्ला अधिकारी गणेश अर्यालले भने बिरामीको अवस्था कारागारमै गम्भीर भएकाले समयमै अस्पताल पुर्‍याइएको र उपचारका लागि सबै सम्भव प्रयास गरिएको दाबी गरेका छन्।

‘बेड खाली थिएन। मैले नै फोन गरेर आइसीयूमा बेड व्यवस्थापन गरें। डाक्टरहरूले उपचार गरेकै हुन्। तर बिरामीको अवस्था अत्यन्त जटिल भएकाले जोगाउन सकिएन,’ अर्यालले भने।

घटनापछि नारायणी अस्पताल परिसरमा सुरक्षा व्यवस्था कडा पारिएको छ। मृतकका आफन्त र प्रशासनबीच संवाद भइरहेको प्रहरीले जनाएको छ।