दाङ,१५ फागुन । दाङमा मदिरा बिक्री वितरण र सेवनमा  रोक लगाइएको छ।  जिल्ला प्रशासन कार्यालय  दाङले प्रतिनिधिसभा निर्वाचनलाई लक्षित गर्दै उक्त कार्यमा रोक लगाएको हो।

शुक्रबार सहाय प्रमुख जिल्ला अधिकारी सावित्रा पुनले एक सूचना जारी गर्दै  प्रतिनिधिसभा सदस्य निर्वाचनलाई   स्वच्छ, निष्पक्ष, भयरहित र शान्तिपूर्ण वातावरणमा सम्पन्न गर्न जिल्लाभर मदिराजन्य पदार्थ बिक्री–वितरण तथा सेवनमा रोक लगाइएको जानकारी गराएकी हुन् ।

उक्त सूचनामा फागुन  २१ गते हुने निर्वाचनलाई लक्षित गर्दै  आज (फागुन १५) गतेदेखि अन्तिम मतपरिणाम घोषणा नभएसम्म दाङ जिल्ला भित्र सबै प्रकारका मादक पदार्थ बिक्री–वितरण तथा सेवन गर्न निषेध गरिएको जारी  सूचनामा उल्लेख छ।

प्रशासनले उक्त निर्णयको पूर्ण पालना गर्न सम्बन्धित सबै सरोकारवालासँग अनुरोध गरेको छ।

काठमाडौँ,१५ फागुन । फागुन २१ गते हुने प्रतिनिधिसभा सदस्य निर्वाचनका लागि देशभरका १६५ निर्वाचन क्षेत्रमा दुई लाख २१ हजार कर्मचारी खटिने भएका छन्।

निर्वाचन आयोग का अनुसार ७७ जिल्लाका १६५ निर्वाचन क्षेत्रका २३ हजार ११२ मतदान केन्द्र र समानुपातिकतर्फ मात्र मतदान हुने १४३ अस्थायी केन्द्रमा कर्मचारी परिचालन गरिनेछ।

आयोगका सहायक प्रवक्ता प्रकाश न्यौपानेका अनुसार पाँच सयभन्दा बढी मतदाता भएका केन्द्रमा नौ जना र पाँच सयभन्दा कम मतदाता भएका केन्द्रमा आठ जना कर्मचारी खटाइने व्यवस्था गरिएको छ। मतदान अधिकृत र सहायक मतदान अधिकृतलाई प्रशिक्षण दिइसकेपछि अन्य कर्मचारीलाई सम्बन्धित केन्द्रमै प्रशिक्षण दिने तयारी गरिएको छ।

निर्वाचनका लागि आवश्यक सामग्री र मतपत्र बिहीबारसम्म देशभरका १६५ वटै निर्वाचन क्षेत्रमा पुगिसकेको आयोगले जनाएको छ।

दाङ,१५ फागुन । अख्तियार दुरुपयोग अनुसन्धान आयोग ले बाँकेको यातायात व्यवस्था कार्यालय नेपालगन्जका तत्कालीन प्रमुखसहित ३३ जनाविरुद्ध भ्रष्टाचार अभियोगमा विशेष अदालत मा मुद्दा दायर गरेको छ।

सवारी चालक अनुमतिपत्र (लाइसेन्स) परीक्षामा अनियमितता गरी आर्थिक लेनदेनका आधारमा अनुत्तीर्ण परीक्षार्थीलाई उत्तीर्ण गराएको आरोपमा बिहीबार मुद्दा दायर गरिएको हो।

आयोगका अनुसार तत्कालीन कार्यालय प्रमुख लोकबहादुर सुनार र रमेशबहादुर बुढाथोकी, निमित्त प्रमुख दिनेशसिंह ठाकुर र रविन्द्र केसीसहित विभिन्न कर्मचारीलाई प्रतिवादी बनाइएको छ।

यस्तै, जिल्ला ट्राफिक प्रहरी कार्यालय बाँकेका तत्कालीन प्रहरी निरीक्षक पुष्करराज पन्तसहित अन्य प्रहरी कर्मचारीसमेत मुद्दामा तानिएका छन्।

अनुसन्धानका क्रममा बिचौलिया र ड्राइभिङ सेन्टर सञ्चालकसँग मिलेमतो गरी कानुनी प्रक्रिया विपरीत काम गरिएको पाइएको आयोगले जनाएको छ। नक्कली परीक्षार्थी खडा गर्ने, अनुत्तीर्णलाई उत्तीर्ण गराउन डिजिटल अभिलेखमा फेरबदल गर्ने, रकम संकलन गरी बाँडफाँट गर्ने जस्ता कार्य भएको आरोप छ।

डिजिटल फरेन्सिक परीक्षण, बैंक स्टेटमेन्ट र ह्वाट्सएप संवादलाई प्रमाणका रूपमा लिइएको जनाइएको छ।
आरोपपत्रअनुसार शक्ति ठाकुरसँग सबैभन्दा बढी ५ करोड ४७ लाख ८६ हजार २४३ रुपैयाँ बिगो मागदाबी गरिएको छ।

त्यस्तै, रमेशबहादुर बुढाथोकीसँग ३ करोड ७८ लाख २ हजार ६१७ रुपैयाँ माग गरिएको छ। मामा भान्जा मोटर ड्राइभिङ ट्रेनिङ सेन्टरका सञ्चालक शरदकुमार गोराथोकी र न्यू स्वर्गद्वारी ड्राइभिङ सेन्टरका सञ्चालक चिरञ्जीवी पोख्रेललाई मतियारको रूपमा मुद्दा दायर गरिएको छ।

भ्रष्टाचार निवारण ऐन, २०५९ अनुसार सजाय, जरिबाना र बिगो जफतको माग गर्दै आयोगले आरोपपत्र पेश गरेको हो।

काठमाडौँ, १४ फागुन । नेपाल प्रहरीले आगामी चुनावको सुरक्षा सुनिश्चित गर्न सातै प्रदेशमा प्रहरी अतिरिक्त महानिरीक्षक (एआईजी) खटाएको छ।

प्रहरी प्रधान कार्यालय र विभिन्न विभागमा कार्यरत सात एआईजीलाई प्रदेश कमाण्डमा खटाइएको छ। उनीहरूले प्रदेशमै रहेर मातहतका जिल्लाहरूको सुरक्षा कमाण्ड गर्नेछन्।

चुनावको सुरक्षाबारे छलफल गर्न हिजो प्रहरी प्रधान कार्यालयमा पूर्वआईजीपी, निर्वाचन आयुक्तलगायतलाई बोलाएर बैठक गरिएको थियो।

सुरक्षा निकायहरूले आगामी निर्वाचन विथोल्ने कुनै ठूलो सुरक्षा थ्रेट नदेखिएको निष्कर्ष निकालेको छ। मतदानस्थललाई सामान्य, संवेदनशील र अतिसंवेदनशील गरी तीन भागमा वर्गीकरण गरिएको छ।

सुरक्षा निकायले भने, चुनाव विथोल्ने ठूला खतरा नभए पनि हुन सक्ने साना झडप र असामञ्जस्यका घटनासँग सचेत भएर सुरक्षा व्यवस्था मिलाइएको छ।

काठमाडौँ,१४ फागुन । विदेशी पुरुषसँग विवाह गरेका महिला उम्मेदवारहरूको विवरण सार्वजनिक गर्न माग गर्दै दायर रिटमा सर्वोच्च अदालतले निर्वाचन आयोगसँग लिखित जवाफ माग्ने आदेश दिएको छ।

अधिवक्ता राजकुमार सुवालले दायर गरेको रिटमाथि सुनुवाइ गर्दै न्यायाधीश अब्दुल अजिज मुसलमानको एकल इजलासले प्रत्यक्ष र समानुपातिक दुवैतर्फका यस्ता उम्मेदवारहरूको सूची सार्वजनिक नगर्नुको कारण पेस गर्न आयोगलाई निर्देशन दिएको हो।

कानुनअनुसार कुनै उम्मेदवारले झुटो विवरण दिएर नाम दर्ता गरेको पाइएमा त्यसविरुद्ध उजुरी दिन सकिने व्यवस्था छ। तर विवरण सार्वजनिक नभए उजुरी गर्ने अधिकार प्रभावित हुने दाबी रिटमा गरिएको छ।

‘मतदाता नामावली ऐन, २०७३’ मा झुटो विवरण दिएर नाम समावेश गरेको पाइएमा जोसुकैले पनि उजुरी दिन सक्ने प्रावधान रहेको उल्लेख गर्दै रिटमा उम्मेदवारहरूको पारिवारिक तथा व्यक्तिगत विवरण पारदर्शी बनाउन माग गरिएको छ।

‘राष्ट्रियता, लोकतन्त्र र समाजवाद नेपाली कांग्रेसको चुनावी अभियान’

दाङ, १४ फागुन । दाङ क्षेत्र नम्बर ३ मा आगामी आमनिर्वाचनका लागि नेपाली कांग्रेसको तर्फबाट प्रतिनिधि सभा सदस्य उम्मेदवार दीपक गिरीले आमजनतामा अपिल गरेका छन्। उनले देशलाई राजनीतिक अस्थिरता र सस्तो लोकप्रियताबाट जोगाउनुपर्ने जिम्मेवारीसहित नव युवा पुस्ता र सम्पूर्ण देशवासीका चाहना र आकांक्षालाई सम्बोधन गर्न निर्वाचनमा सहभागिता जनाउन आह्वान गरेका छन्।

गिरीले आफ्नो सम्बोधनमा उल्लेख गरेका छन् कि “मुटुमा दाङ र देशप्रति माया बोकेर यही माटोमा जन्मिएर हुर्किएको र विभिन्न जिम्मेवारी कुशलतापूर्वक निर्वाह गरेको अनुभवसहित यहाँको समग्र विकासमा योगदान पुर्‍याउन उपस्थित छु। दाङको आवाज संसद्मा सशक्त रूपमा उठाउने र जनताका मौलिक अधिकारको रक्षा गर्ने मेरो प्रतिबद्धता अडिग छ।”

नेपाली कांग्रेस दाङ क्षेत्र नम्बर ३ ले प्रस्तुत गरेको प्रतिज्ञापत्र-२०८२ अन्तर्गत विभिन्न क्षेत्रमा विकास र समृद्धिका कार्यक्रम समावेश छन्।
भिजनःमिसन समृद्ध दाङ
किसानमुखी अर्थतन्त्र
.कृषिमा आधुनिकीकरण र व्यवसायीकरण,
.सिँचाई, मल र बीउको सहज उपलब्धता,
.कृषि उपजको उचित मूल्य सुनिश्चितता,
.किसानलाई सहुलियत ऋण र निःशुल्क बीमा कार्यक्रम,
.शीत भण्डार र पशु मोबाइल हस्पिटल कार्यक्रम,

युवा भविष्य र रोजगारी

.नीय उद्योग, कृषि प्रशोधन र पर्यटन प्रवर्द्धन,
.सीपमूलक तालिम सहित स्वरोजगार कार्यक्रम,
.वैदेशिक रोजगारीका लागि सुरक्षित र लगानी सुरक्षासहित योजना,
.उद्यम, व्यवसायमा युवा तथा महिला संलग्नताको सुनिश्चितता,

गुणस्तरीय शिक्षा
.राप्ती बबई क्याम्पसको प्रविधिमैत्री रूपान्तरण,
.सामुदायिक विद्यालय सुधार तथा प्रविधियुक्त शिक्षाको सुनिश्चितता,
.गरिब, दलित र जेहेन्दार विद्यार्थीलाई उच्चशिक्षा छात्रवृत्ति,
.अन्तर्राष्ट्रिय शैक्षिक साझेदारी र सिकाई आदान प्रदान,

सुलभ स्वास्थ्य सेवा
.राप्ती प्रादेशिक अस्पतालको स्तरवृद्धि र विशेषज्ञ सेवा विस्तार,
.आधारभूत स्वास्थ्य सेवा निःशुल्क,
.स्वास्थ्य चौकी सुदृढीकरण र विशेष ध्यान सहितको मातृ–शिशु स्वास्थ्य योजना,

दिगो पूर्वाधार
.प्राथमिकताका आधारमा सडक, मोटरेवल पुल, झोलुङ्गे पुल र खानेपानी, सिँचाई, विद्युत विस्तारl

सञ्चार र प्रविधि
.सूचना र सञ्चार सेवाको आधुनिकीकरण,
.ग्रामीण क्षेत्रमा आधुनिक सञ्चार र निःशुल्क इन्टरनेट सुविधा,

सुशासन र सामाजिक न्याय
.भ्रष्टाचारविरुद्ध शून्य सहनशीलता,
.आदिवासी, महिला, दलित र पछि पारिएका समुदायको समानुपातिक सहभागिता

वातावरण र विपद् व्यवस्थापन
.वन, वातावरण संरक्षण,
.बाढी, पहिरो, डुवान नियन्त्रण योजना,
.सुरक्षित बस्ती विकासका लागि तटबन्ध कार्यक्रम।

उद्योग व्यवसाय
.लगानीमैत्री वातावरण, नयाँ उद्योग स्थापना, स्थानीय रोजगारी प्रवर्द्धन,
.आधुनिक कृषि प्रविधि र बजारीकरण सुनिश्चितता।

पर्यटन
.थारु कला, संस्कृति संरक्षण तथा दंगीशरण दरबार क्षेत्रको प्रवर्द्धन,
.इको-टुरिज्म र धार्मिक पर्यटन विकास,
.टरिगाउँ एयरपोर्ट स्तरोन्नति।

प्रमुख उपलब्धिहरू
नेपाली कांग्रेस दाङ क्षेत्र नम्बर ३ ले सिँचाई, सडक, पुल, खानेपानी, शिक्षा, स्वास्थ्य र सांस्कृतिक संरचनाको क्षेत्रमा महत्वपूर्ण कामहरू गरेका छन्। झोलुङ्गे पुल र मोटरेवल पुलहरू निर्माण, नदि तटबन्ध, खानेपानी योजना, शैक्षिक संस्था आधुनिकीकरण तथा सांस्कृतिक धरोहर संरक्षणका कार्यक्रमहरू सञ्चालन गरिएको छ।

दीपक गिरीको राजनीतिक यात्रा
गिरीले आफ्नो राजनीतिक यात्रा स्कुल जीवनमा पञ्चायतविरुद्ध आवाज उठाउँदै शुरू गरेका थिए। उनले कांग्रेसको सक्रिय सदस्यता, क्षेत्रीय सभापति, नेविसंघ सदस्य, जनमत संग्रह नेतृत्व, प्रजातान्त्रिक आन्दोलनमा जेल जीवन, संविधान सभा सदस्य पद तथा विभिन्न मन्त्री पदहरू सम्हालेका छन्। गिरीले आम निर्वाचनमा नागरिकहरूलाई नेपाली कांग्रेसको ‘रुख’ चुनाव चिन्हमा मतदान गर्न आह्वान गर्दै पश्चिम दाङको उज्ज्वल भविष्य सुनिश्चित गर्न आफ्नो प्रतिबद्धता व्यक्त गरेका छन्।

दाङ १३ फागुन। दाङको तुलसीपुरस्थित राप्ती बबई क्याम्पसमा दुई दिने अनुसन्धानमूलक बृहत राष्ट्रिय सम्मेलन सञ्चालन हुने भएको छ। शैक्षिक वातावरणलाई अनुसन्धानमुखी बनाउने उद्देश्यले क्याम्पसले आगामी चैत ६ र ७ गते उक्त सम्मेलन सञ्चालन गर्न लागेको हो। दुई दिन सञ्चालन हुने उक्त सम्मेलनको बुधबार पत्रकार सम्मेलन गरी जानकारी गराइएको हो।

पत्रकारहरुसंग कुराकानी गर्दै क्याम्पस प्रमुख गणेश पार्धेले दाङ र आसपासमा अनुसन्धानको क्षेत्रमा अपेक्षित उपलब्धि हुन नसकेको अवस्थामा शैक्षिक वातावरणलाई अनुसन्धानमुखी बनाउन सम्मेलन आयोजना गरिएको बताए। उनका अनुसार सम्मेलनमा काठमाडौं, पोखरा र मध्यपश्चिम विश्वविद्यालयका उपकुलपतिसहित अमेरिका र भारतका प्रतिष्ठित प्राज्ञिक वक्ताको सहभागिता रहनेछ।

क्याम्पसका उपप्राध्यापक तथा सह–संयोजक सूर्यप्रसाद शर्माले एमफिल र पिएचडी गर्न इच्छुक तथा अनुसन्धानात्मक लेखनमा रुचि राख्नेहरूका लागि सम्मेलन महत्वपूर्ण हुने बताए। शिक्षा, विज्ञान तथा प्रविधि, नेपाली र अंग्रेजी भाषा लगायतका विषयमा कार्यपत्र प्रस्तुत हुने सम्मेलनमा १ सयभन्दा बढी सहभागी रहने अपेक्षा गरिएको छ।

तुलसीपुर उपमहानगरपालिकाका शिक्षा शाखा प्रमुख चक्रबहादुर भण्डारीले यसलाई शिक्षा क्षेत्रमा नयाँ अभ्यासको रूपमा लिँदै अनुसन्धानको संस्कृतिलाई प्रोत्साहन गर्ने अवसर भएको बताए।

क्याम्पस सञ्चालक समितिका अध्यक्ष श्यामकुमार रेग्मीले क्षेत्रमै उच्च अध्ययन र अनुसन्धानको वातावरण बनाउन सम्मेलन सहयोगी हुने धारणा राखे।

क्याम्पस संचालक समितिका कोषाध्यक्ष बिनिल केसीले अनुसन्धान गरेर केहि सिक्न चाहनेका लागि यस कार्यक्रमले महत्वपूर्ण भूमिका खेल्ने बताए । सम्मेलनलाई सफल बनाउनका लागि नीजि क्षेत्र सहकार्य गर्न तयार रहेको पनि उनको भनाई छ ।

सम्मेलनको उद्घाटन विश्वविद्यालय अनुदान आयोगका अध्यक्ष प्राध्यापक डा.देवराज अधिकारीले गर्नेछन् । सम्मेलनका संयोजक डा. प्रेम योगीको विषय प्रवेशबाट शुरु भएको पत्रकार सम्मेलनको सहजीकरण कर्मचारी भीमार्जुन रेग्मीले गरेका हुन् ।आयोजकका अनुसार हालसम्म तयारी करिब ७० प्रतिशत पूरा भइसकेको छ।

दाङ,१३ फागुन । आसन्न प्रतिनिधिसभा निर्वाचनलाई लक्षित गर्दै सरकारले सुरक्षाकर्मीहरुका लागि एक निर्णय गरेको छ । सरकारले निर्वाचनका क्रममा खटिएका सुरक्षाकर्मी तथा निर्वाचन प्रहरी घाइते भएमा उनीहरूको सम्पूर्ण उपचार खर्च व्यहोर्ने निर्णय गरेको हो।

मंगलवारको मन्त्रिपरिषद् बैठकले यस्तो निर्णय गरेको हो। बैठकपछि सञ्चारकर्मीसँग कुरा गर्दै सरकारका प्रवक्ता तथा ओमप्रकाश अर्यालले निर्वाचनमा कर्तव्य निर्वाह गर्दा घाइते भएका सुरक्षाकर्मीले उपचारमा कुनै आर्थिक भार नबोक्ने स्पष्ट पारे।

सरकारले उपचार खर्च मात्र नभई, सो अवधिमा कुनै सुरक्षाकर्मीको ज्यान गुमेमा उनका परिवारलाई आर्थिक सहायता उपलब्ध गराउने निर्णयसमेत गरेको छ। मन्त्रिपरिषद्को निर्णयअनुसार पीडित परिवारलाई सहयोग प्रदान गरिनेछ।

निर्वाचनलाई सुरक्षित र व्यवस्थित रूपमा सम्पन्न गर्न सुरक्षाकर्मीको भूमिका महत्वपूर्ण रहेको र त्यसलाई ध्यानमा राख्दै सरकारले यस्तो व्यवस्था गरेको बताइएको छ।

दाङ,१३ फागुन। दाङको घोराहीस्थित भरतपुरमा त्रिभुवन विश्वविद्यालय अन्तर्गतको इन्जिनियरिङ अध्ययन संस्थानको भवन निर्माण कार्य सुरु भएको छ।

घोराहीको महेन्द्र बहुमुखी क्याम्पस परिसरमा संस्थानको पाँच तले, २० कोठे भवन निर्माण थालिएको हो। करिब २० करोड ८७ लाख ४० हजार २२१ रुपैयाँ लागतमा निर्माण हुन लागेको उक्त भवनका लागि झन्डै २१ करोड रुपैयाँको लगानी रहने जनाइएको छ।

भवन निर्माणको ठेक्का ‘खड्का निर्माण सेवा प्रालि’ले पाएको छ। निर्माण कम्पनीसँग फागुन ८ गते सम्झौता सम्पन्न भइसकेको छ र सम्झौताअनुसार २०८४ सालभित्र निर्माण कार्य सम्पन्न गर्नुपर्नेछ।

यसअघि गत वैशाख २३ गते भवन निर्माणका लागि ३० करोड रुपैयाँ बजेट स्रोत सुनिश्चित गरिएको थियो। त्यसपछि बोलपत्र आह्वान गरी निर्माण प्रक्रिया अघि बढाइएको हो। बजेट सुनिश्चिततामा शंकर पोखरेल ले विशेष पहल गरेको जनाइएको छ। हाल उनलाई नेकपा एमालेले दाङ क्षेत्र नं। २ बाट प्रतिनिधिसभा सदस्य पदका उम्मेदवारका रूपमा अघि सारेको छ।

फागुन २१ गते हुने निर्वाचनका कारण आचारसंहिता लागू भएकाले भवनको शिलान्यास कार्यक्रम भने हुन सकेको छैन। निर्वाचन सम्पन्न भएपछि मात्रै शिलान्यासको औपचारिक कार्यक्रम गरिने बताइएको छ।

निर्धारित समयमै निर्माण कार्य सम्पन्न भए दाङमै पहिलोपटक विश्वविद्यालय तहबाट सूचना प्रविधि विषयको अध्ययन–अध्यापन सुरु हुने अपेक्षा गरिएको छ। यस क्याम्पसले दाङलाई सूचना प्रविधिको केन्द्रका रूपमा स्थापित गर्न सहयोग पुग्ने विश्वास लिइएको छ।

घोराहीमा इन्जिनियरिङ क्याम्पस स्थापनाको पहल सफल बन्दै जाँदा जिल्लावासी उत्साहित बनेका छन्। भविष्यमा दाङलाई स्वास्थ्य तथा सूचना प्रविधिको हबका रूपमा विकास गर्ने लक्ष्यमा यसले टेवा पुग्ने अपेक्षा गरिएको छ।

काठमाडौँ,१२ फागुन । राष्ट्रिय मानव अधिकार आयोगले चुनावमा बालबालिकाको प्रयोग नगर्न आग्रह गरेको छ ।
आयोगले राजनीतिक दल, नागरिक समाज, विद्यालय, शिक्षक तथा अभिभावकलाई उक्त आग्रह गरेको हो।

आयोगका प्रवक्ता डा. टीकाराम पोखरेलद्वारा जारी विज्ञप्तिमा निर्वाचनलाई शान्तिपूर्ण, भयरहित र मानवअधिकारमैत्री वातावरणमा सम्पन्न गर्न सबै पक्षलाई धैर्य र संयमता अपनाउन आह्वान गरिएको छ।

शान्तिसुरक्षामा असर पार्ने गतिविधि बन्द गर्न, बालबालिकाको प्रयोग नगर्न/नगराउन र नागरिकको मानव अधिकारको सम्मान गर्न आयोगले नेपाल सरकारसहित सबै सम्बद्ध पक्षलाई अनुरोध गरेको छ।
निर्वाचन नजिकिँदै जाँदा विभिन्न स्थानमा देखिएका घटनाले शान्तिसुरक्षा र निर्वाचन वातावरणमा असर पार्न सक्ने भन्दै आयोगले गम्भीर ध्यानाकर्षण भएको जनाएको छ।

दाङ, रौतहट र पर्सालगायत जिल्लामा दलका कार्यकर्ताबीच भएका विवाद र झडपका कारण कतिपय स्थानमा निषेधाज्ञा जारी गर्नुपर्ने अवस्था सिर्जना भएको उल्लेख गरिएको छ।

आयोगले देशव्यापी निर्वाचन अनुगमनलाई तीव्र बनाएको जनाएको छ। राजनीतिक दलका नेता, उम्मेदवार तथा कार्यकर्ताबाट हुने अमर्यादित र घृणायुक्त अभिव्यक्तिले निर्वाचन वातावरण अस्वस्थ बनाउन सक्ने खतरा रहेको भन्दै सामाजिक तथा सांस्कृतिक सद्भाव विथोलिने सामग्री प्रकाशन–प्रसारण नगर्न पनि आग्रह गरेको छ।