दाङ, २२ फागुन – दाङको दंगीशरण गाउँपालिका र बबई गाउँपालिकामा कपडा बैंक स्थापना गरिएको छ।

क्लोथ एण्ड फुड बैंक नेपालले बुधबार कपडा बैंक स्थापना गरेको हो। “हुनेले दिने, नहुनेले लिने” सिद्धान्तअनुसार पालिकाका कार्यालयहरूमा कपडा बैंक स्थापना गरिएको बैंकका केन्द्रीय अध्यक्ष कमल जीसीले जानकारी दिए।

यसका लागि दंगीशरण गाउँपालिकाले रु. २.५ लाख सहयोग गरेको छ भने बबई गाउँपालिकाले पनि आर्थिक सहयोग प्रदान गरेको छ। जीसीका अनुसार दुवै पालिकाको सहमतिमा कपडा बैंक स्थापना गरिएको हो, र अब नियमित रूपमा सञ्चालन गरिनेछ। बैंकको चाबी पालिकालाई हस्तान्तरण गरिएको छ।

अब पुराना कपडाहरू बैंकमा राख्न सकिनेछ, जसलाई सफा गरी आवश्यक व्यक्तिहरूलाई हस्तान्तरण गरिनेछ। साथै, कमजोर आर्थिक अवस्थाका परिवारहरूलाई केही कपडा समेत प्रदान गरिएको छ।

क्लोथ एण्ड फुड बैंक नेपालले अहिलेसम्म १६४ पालिकामा कपडा बैंक स्थापना गरिसकेको छ। एक लाखभन्दा बढी व्यक्तिलाई कपडा हस्तान्तरण गरिसकेको संस्थाको दाबी छ।

दंगीशरण गाउँपालिकाका अध्यक्ष शम्भु गिरीले कपडा बैंकले जाडोमा गरिब परिवारलाई राहत दिने बताए। बबई गाउँपालिकाका अध्यक्ष कुलबहादुर खत्री क्षेत्रीले यस्ता कार्यक्रमले समाजमा सकारात्मक सन्देश दिने र वर्गीय विभाजन अन्त्य गर्न सहयोग पुग्ने बताए।

कार्यक्रममा दंगीशरण गाउँपालिकाकी उपाध्यक्ष पीमा कुमारी खड्का, बबई गाउँपालिकाकी उपाध्यक्ष बम कुमारी खड्का, दंगीशरणका प्रमुख प्रशासकीय अधिकृत कर्णबहादुर नेपाली, बबईका प्रमुख प्रशासकीय अधिकृत चेत नारायण कडेँल, प्रेस सेन्टर दाङका सचिव दिपक बोहरालगायतले समाज रुपान्तरणका लागि कपडा बैंक महत्वपूर्ण हुने धारणा राखेका थिए।कार्यक्रमको सहजीकरण पत्रकार सागर सुवेदीले गरेका थिए।

कास्की,२२ फागुन । बेपत्ता भएको पाँच दिनपछि महेश सुवेदी मृत फेला परेका छन्। तनहुँको भीमाद नगरपालिका वडा नम्बर २ धरमपानीबाट बेपत्ता भएका ३६ वर्षीय सुवेदी पाँच दिनपछि मृत फेला परेका हुन् ।

फागुन १७ गते बिहान घरबाट बेपत्ता भएका सुवेदीको खोजीका लागि परिवारले प्रहरीमा निवेदन दिएका थिए। तनहुँको भीमादसहित स्याङ्जा क्षेत्रमा व्यापक खोजी भए पनि उनी फागुन २२ गते भीमाद वडा नम्बर २ को सालिमे पुछार र स्याङ्जाको हरिनास गाउँपालिकाको सीमामा रहेको कुलुङखोला किनारमा मृत अवस्थामा भेटिए।

राति परिवारसँग सुतेका सुवेदी बिहान बेपत्ता भएपछि परिवारले खोजी थालेका थिए। खोजीका क्रममा बिहान सवा ५ बजे उनले परिवारसँग सम्पर्क गरेका थिए। त्यतिबेला उनले आफू कहाँ छु भन्ने थाहा नभएको बताएका थिए। त्यसपछि उनको मोबाइल अफ भएको थियो।

उनको शव फेला परेपछि घटनास्थलमा इलाका प्रहरी कार्यालय बेलचौताराका इन्स्पेक्टर पोषण केसी नेतृत्वको प्रहरी टोली पुगेको थियो। सुवेदीको शव पोस्टमार्टमका लागि दमौली जिल्ला अस्पताल तनहुँमा पठाइएको छ।

पोस्टमार्टम रिपोर्टपछि मात्र मृत्युको कारण खुल्ने प्रहरीले जनाएको छ।

महेश हाल कावासोती नगरपालिका वडा नम्बर ३, मध्यविन्दु टोलमा बस्दै आएका थिए। भतिजहरूको व्रतबन्धका लागि उनी धरमपानी गएका थिए।

उनकी श्रीमती स्वास्थ्यकर्मी हुन्, जो सानी छोरीसहित लमजुङमा बस्दै आएकी छन्, भने सुवेदी ठूली छोरीसहित कावासोतीमा बस्दै आएका थिए।

काठमाडौं, २२फागुन । सरकारले करिब ३४ दिनपछि राष्ट्रिय सभामा पाँच वटा अध्यादेश निर्णयार्थ प्रस्तुत गर्न लागेको छ। संविधानअनुसार अध्यादेश पेस भएको दुई महिनाभित्र निर्णयार्थ प्रस्तुत नभए स्वतः निष्क्रिय हुने व्यवस्था रहेकाले सरकारले ती अध्यादेश निर्णयार्थ पेस गर्न लागेको हो।

माघ १८ गतेको राष्ट्रिय सभाको बैठकमा सरकारले छ वटा अध्यादेश पेस गरेको थियो, तर भूमिसम्बन्धी केही नेपाल ऐनलाई संशोधन गर्ने अध्यादेशबाहेकका पाँच वटा अध्यादेश मात्र निर्णयार्थ प्रस्तुत गरिने भएको छ।

सङ्घीय संसद् सचिवालयका सहायक प्रवक्ता अनन्तप्रसाद कोइरालाले दलका नेता तथा सचेतकहरूसँगको छलफलका आधारमा राष्ट्रिय सभाको बैठकका लागि कार्यसूची तयार पारिएको जानकारी दिएका छन् ।

राष्ट्रिय सभाको बैठक बिहीबार दिउँसो १ बजे बस्नेछ। बैठकमा सुशासन प्रवर्धन तथा सार्वजनिक सेवा प्रवाह, आर्थिक कार्यविधि तथा वित्तीय उत्तरदायित्व, निजीकरण, आर्थिक तथा व्यावसायिक वातावरण सुधार तथा सहकारीसम्बन्धी कानुनलाई संशोधन गर्न बनेका अध्यादेशहरू निर्णयार्थ प्रस्तुत गरिनेछ।

राष्ट्रिय सभामा अध्यादेश पारित गर्न ३० जना सदस्यको बहुमत आवश्यक रहे पनि हाल अध्यादेशको पक्षमा अधिकतम २८ जना मात्र रहेका छन्। सरकारलाई समर्थन गरेको जनता समाजवादी पार्टी (जसपा), नेपालले भूमिसम्बन्धी अध्यादेशलाई अस्वीकार गर्ने अडान लिएपछि सहमति जुटाउन सरकारलाई समय लागेको थियो।

राष्ट्रिय सभामा जसपाका तीन जना सदस्य रहेका छन् भने लोकतान्त्रिक समाजवादी पार्टी (लोसपा), नेपालले समेत भूमिसम्बन्धी अध्यादेश अस्वीकार गर्ने जनाएपछि सरकारले सो अध्यादेशलाई अलग गर्दै अन्य पाँच वटा अध्यादेश मात्र अघि बढाउने निर्णय गरेको हो।

जसपा, नेपालका संसदीय दलका नेता मृगेन्द्रसिंह यादवले आफ्नो पार्टीले ती पाँच वटा अध्यादेशलाई स्वीकार गर्ने पक्षमा मतदान गर्ने बताएका छन्। तर, निर्णयार्थ प्रस्तुत हुन लागेका अध्यादेशहरूका विपक्षमा १२ वटा अस्वीकार प्रस्ताव दर्ता भइसकेका छन्।

सङ्घीय संसद् सचिवालयका अनुसार आर्थिक कार्यविधि तथा वित्तीय उत्तरदायित्व ऐन संशोधन गर्ने अध्यादेशविरुद्ध चार वटा, सुशासन प्रवर्धन तथा सार्वजनिक सेवा प्रवाह अध्यादेशविरुद्ध दुई वटा, निजीकरण अध्यादेशविरुद्ध दुई वटा तथा आर्थिक तथा व्यावसायिक वातावरण सुधार अध्यादेशविरुद्ध दुई वटा अस्वीकार प्रस्ताव दर्ता भएका छन्।

राष्ट्रिय सभा नियमावलीअनुसार, अध्यादेश अस्वीकार गर्ने प्रस्ताव दर्ता गराएका सदस्यहरूले आफ्नो प्रस्ताव सभामा पेस गर्नेछन्। सो प्रस्तावमाथि छलफल गरिनेछ, जस क्रममा सदस्यहरूले आफ्ना धारणा राख्नेछन्।

छलफलपछि सम्बन्धित मन्त्रीले उठेका प्रश्नहरूको जवाफ दिनेछन्। त्यसपछि अस्वीकार प्रस्ताव निर्णयार्थ प्रस्तुत गरिनेछ। अस्वीकार प्रस्ताव पारित नभएमा मात्र अध्यादेश पारित गर्ने प्रस्ताव पेस गरिने नियमावलीमा उल्लेख छ।

दाङ,२१ फागुन ।प्रधानमन्त्री केपी शर्मा ओलीलाई ‘हिटलर’ भनेर प्रश्न सोधेका दुई पत्रकारको संसद भवन प्रवेश पास निलम्बन गरिएपछि राष्ट्रिय स्वतन्त्र पार्टीकी सांसद सोविता गौतमले त्यसको कडा आलोचना गरेकी छन्। उनले फेसबुकमा लेख्दै प्रश्न गर्ने अधिकारको रक्षा गर्नुपर्ने बताएकी छन्।

गौतमले आफ्नो स्टाटसमा लेखेकी छन्, “एक समय थियो, जब मिडियामा देखिन नेताहरू आफैं माइक खोज्थे। तर अब जनताले आफैं प्रश्न गर्न थालेका छन्, सत्ता बोल्न बाध्य पार्दैछन्। संसद जनताको आवाज उठ्ने थलो हो, सत्ता चलाउनेको अहंकारको महल होइन!”

गत फागुन ४ गते ‘सुनौलो नेपाल’ युट्युब च्यानलका प्रकाश ओली र ‘युवा मन नेपाल’ च्यानलका किशोरकुमार श्रेष्ठले संसद भवन परिसरमा प्रधानमन्त्री ओलीलाई ‘हिटलर’ र ‘तानाशाह’ भनेर प्रश्न गरेका थिए। त्यसपछि संसदीय मर्यादा उल्लंघन भएको भन्दै संसद सचिवालयले उनीहरूको पास एक महिनाका लागि निलम्बन गरेको हो।

सांसद गौतमले पत्रकारहरूको निलम्बन फुकुवा गर्न माग गर्दै लेखेकी छन्, “प्रश्नहरू टर्टा लाग्नु स्वाभाविक हो, तर यदि देशको अवस्था मिठो हुन्थ्यो भने, प्रश्नहरू पनि मिठा आउँथे। प्रश्नलाई दबाउनु सट्टा सबैले समेट्ने गरी काम गर्नुस्। खुशीले जोडेर लैजानुस । संख्याको शक्ति त कुनै बेला भत्किन सक्छ ।प्रकाश ओली र किशोरकुमार श्रेष्ठको निलम्बन फुकुवा गर्नुस ।”

काठमाडौं ,२१ फागुन । काठमाडौं विश्वविद्यालय (केयू)ले विश्वभरका विद्यार्थीलाई क्रेडिट ट्रान्सफरमार्फत शैक्षिक कार्यक्रम पूरा गर्न दिने भएको छ ।

विभिन्न कारणले विदेशी विश्वविद्यालयमा अध्ययन पूरा गर्न नसकेका विद्यार्थीलाई लक्षित गरी यस्तो निर्णय गरिएको केयूले जनाएको छ ।

विद्यमान क्रेडिट अकुमुलेसन फ्रेमवर्क भित्र रहेर अध्यापन गराइने केयूका प्रवक्ता एक्कुमाया पुनले जानकारी दिइन् ।

क्रेडिट ट्रन्सफरका निम्ति केयूले आशयपत्रका लागि आह्वान गरेको छ।

दाङ,२१ फागुन । गाउँपालिकाका अध्यक्षकै संलग्नतामा लागुऔषध कारोबारको घटना सार्वजनिक भएको छ। नवलपरासीको पाल्हीनन्दन गाउँपालिकाका अध्यक्ष बैजुप्रसाद गुप्ता (दीपक) लागुऔषध मुद्दामा दोषी ठहर भएका छन्।

जिल्ला अदालत नवलपरासीका न्यायाधीश केशवप्रसाद अधिकारीको इजलासले अध्यक्ष गुप्तासहित गाउँपालिकाका नगर प्रहरी रघुनाथ प्रसाद धोबीलाई मंगलबार दोषी ठहर गरेको हो।

निर्दोषलाई फसाउने खेलमा अध्यक्ष

२०७९ असार २२ गते रामग्राम नगरपालिका–१७ पिपरिहयामा अध्यक्ष गुप्ताको निर्देशनमा भारतीय नागरिक रामा गुप्ता (रामा साह) र जीतेन्द्र पासवानलाई फसाउने प्रयास भएको थियो। अध्यक्षकै योजनामा नगर प्रहरी धोबी र फरार अभियुक्त विवेकप्रसाद पाण्डे (मेन्टु)ले साह र पासवान चढेको मोटरसाइकल नजिक लागुऔषधको झोला फ्याँकेर फसाउन खोजेको आरोप लागेको थियो।

घटनापछि सदरमुकाम परासीमा व्यापक विरोध प्रदर्शन भएको थियो। प्रहरीकै मिलेमतोमा निर्दोषलाई फसाएको भन्दै आलोचना भएपछि प्रहरी प्रधान कार्यालय र लुम्बिनी प्रदेश प्रहरी कार्यालयले छुट्टाछुट्टै छानबिन टोली गठन गरेका थिए।

नवलपरासी अदालतले अध्यक्ष गुप्तालाई लागुऔषध मुद्दामा अप्रत्यक्ष संलग्न रहेको ठहर गरेको छ। गाउँपालिकाका नगर प्रहरी रघुनाथ प्रसाद धोबी पनि दोषी ठहर भएका छन्। फरार अभियुक्त विवेकप्रसाद पाण्डे अझै पक्राउ परेका छैनन्।

अदालतले दोषी ठहर गरे पनि सजाय निर्धारण फागुन २९ गते हुनेछ। लागुऔषध मुद्दामा २ वर्षदेखि १० वर्षसम्म कैद तथा १ लाखदेखि २० लाख रुपैयाँसम्म जरिवाना हुने कानुनी प्रावधान छ। अध्यक्ष गुप्तालाई भने आधा सजाय हुने व्यवस्था गरिएको अदालतका सूचना अधिकारी भेषराज खनालले जानकारी दिए।

अध्यक्ष गुप्ताको कबाडी व्यवसाय रहेको छ। उनी र भारतीय नागरिक साह तथा पासवानबीच करिब १ करोड ३५ लाख रुपैयाँ बराबरको कबाडी सामानको लेनदेनको विवाद रहेको खुलेको छ। सोही विवादका कारण अध्यक्ष गुप्ताले साह र पासवानलाई फसाएको आरोप लागेको थियो।

काठमाडौं, २१ फागुन। अमेरिका पुग्ने सपना बोकेर अवैध बाटोबाट महिनौंसम्म जंगल, खोला, समुद्र पार गर्दै यात्रा गरेका आठ नेपालीको यात्रा अन्ततः अमेरिकाबाट डिपोर्ट भएपछि सकिएको छ।

बुधबार अमेरिकाले चार्टर्ड विमानमार्फत काठमाडौं फर्काएका उनीहरु मध्यपूर्व, युरोप, दक्षिण अमेरिका हुँदै उत्तरी अमेरिकासम्म पुगेका थिए। तर, त्यहाँ पुगेको केही समयमै पक्राउ परेपछि उनीहरु फर्किन बाध्य भए।

प्रहरीको मानवबेचबिखन तथा अनुसन्धान ब्यूरोले गरेको प्रारम्भिक सोधपुछ अनुसार, यी नेपाली नागरिकमध्ये एक जना डोटीका, बाँकी दाङ र रुकुमका छन्। अमेरिका जानका लागि ५० देखि ९० लाख रुपैयाँसम्म बुझाएको खुलासा भएको छ।

‘उनीहरु केही महिनाअघि मात्र अमेरिका पुगेका थिए, तर चाँडै पक्राउ परे। कसैलाई धरौटीमा छाडियो भने कसैलाई त्यत्तिकै डिपोर्ट गरियो,’ अनुसन्धानमा संलग्न एक अधिकृतले बताए।

डंकी रुट अर्थात् अवैध बाटो प्रयोग गरी अमेरिका प्रवेश गर्ने क्रम रोकिएको छैन। अमेरिका पुगेपछि कानुनी संकटमा परेका यी नेपाली फेरि पनि अवसरको खोजीमा बाहिरिने योजना बुन्दैछन्। ‘ट्रम्पको कार्यकाल सकिएपछि फेरि जानेछौं,’ उनीहरुको भनाइ उद्धृत गर्दै स्रोतले जनाएको छ।

दाङ,२१ फागुन ।तुलसीपुर खानेपानी उपभोक्ता तथा सरसफाई संस्थाको नयाँ नेतृत्व चयनका लागि चुनावी माहोल तातेको छ। आगामी चैत २ गते हुने निर्वाचनका लागि आज मनोनयन दर्ताको समय तोकिएको छ। बिहान १० बजेदेखि दिउँसो १ बजेसम्म उम्मेदवारहरूले आफ्नो नाम दर्ता गर्न सक्नेछन्।

संस्थाको नयाँ नेतृत्वका लागि नेकपा माओवादी केन्द्रसहित सात दलबीच उम्मेदवारको भागवण्डा लगभग टुंगिएको छ। माओवादी केन्द्रका अनुसार गठबन्धनबाट अध्यक्ष पदमा बहालवाला उपाध्यक्ष सीताराम शर्मालाई अघि सार्ने निर्णय यसअघि नै भइसकेको छ। माओवादीसहित राष्ट्रिय जनमोर्चा, राष्ट्रिय स्वतन्त्र पार्टी, एकीकृत समाजवादी, नेकपा विप्लव, नेकपा क्रान्तिकारी र नेसपा मिलेर साझा उम्मेदवारी दिने तयारीमा छन्।

दलहरूबीच उपाध्यक्ष पद राष्ट्रिय जनमोर्चालाई दिने सहमति भएको छ तर जनमोर्चाले उम्मेदवारको टुंगो लगाएको छैन। सचिव पद नेकपा विप्लवलाई दिने सहमति भएको छ भने कोषाध्यक्ष पद माओवादी केन्द्र र राष्ट्रिय स्वतन्त्र पार्टीबीच दाबी भइरहेकाले अन्तिम टुंगो लाग्न बाँकी रहेको माओवादी नेताहरूले बताएका छन्। गठबन्धनको सहमतिअनुसार माओवादीले अध्यक्षसहित दुई सदस्य, राष्ट्रिय जनमोर्चाले उपाध्यक्ष, नेकपा विप्लवले सचिव, राष्ट्रिय स्वतन्त्र पार्टीले कोषाध्यक्ष, एकीकृत समाजवादीले दुई सदस्य, र नेकपा क्रान्तिकारीले एक सदस्य पाउने भएका छन्।

यसैबीच, नेपाली कांग्रेसले भने आफ्ना उम्मेदवारहरूको टुंगो लगाइसकेको छ। कांग्रेसले हालका अध्यक्ष यमकान्त भण्डारीलाई पुनः अध्यक्ष पदमा अघि सारेको छ। उपाध्यक्षमा नारायण शर्मा, सचिवमा रन्जन गौतम, र कोषाध्यक्षमा भोला थापालाई उम्मेदवार बनाउने निर्णय गरेको छ। हालका कोषाध्यक्ष रहेका थापा यसअघि स्वतन्त्र उम्मेदवारका रूपमा निर्वाचित भएका थिए।

नेकपा एमालेले पनि आफ्नो उम्मेदवार घोषणा गरिसकेको छ। पार्टीले अध्यक्ष पदका लागि मनोज लामिछानेलाई उम्मेदवार बनाउने निर्णय गरेको छ। यसअघि सो पदका लागि हालका सचिव सेवकराम भण्डारी र पूर्व सचिव लामिछानेबीच दौड चलिरहेको थियो। अन्ततः एमालेले लामिछानेलाई अघि सार्ने निर्णय गरेको हो।

काठमाडौं ,१९ फागुन। दाङको हिमाल एकेडेमीको वेबसाईट ‘मोजकोज’ (mozkoz) नाम गरेका ह्याकरले ह्याक गरेको दाबी गरेका छन । ह्याकर्ले ब्रिच फोरममा फेब्रुअरी २८ मा पोस्ट गर्दै विद्यालयका संवेदनशील डेटा ह्याक गरेको दाबी गरेका छन ।

ह्याकरले आफूसँग एड्मिन ईमेल, एड्मिन लग, सिभिल आईडी, फोन नम्बर, कन्ट्रोल प्यानल लगायतका डेटाको एक्सेस भएको दाबी गरेका छन् ।

सार्वजनिक भएको स्याम्पल डेटामा २३ जना शिक्षक शिक्षिकाको नाम, नम्बर, पद, पढाउने कक्षा लगायतको विवरण छ । ह्याकरले आफूसँग उक्त स्कुलमा विभिन्न समयमा अध्यापन गराएका १२३ शिक्षक शिक्षिकाको डेटा भएको दाबी गरेका छन् । 

त्यसैगरी ती ह्याकरले ४० विद्यार्थीको डेटा सार्वजनिक गरेका छन् । आफूसँग तीन हजार विद्यार्थीको डेटा भएको दाबी गरेका छन ।

ह्याकरले सार्वजनिक गरेको डेटामा विद्यार्थीको नाम, ठेगाना, कक्षा, लिङ्ग, जन्ममिति, बुवा आमाको नाम, बुवाआमाको सम्पर्क नम्बर रहेको देख्न सकिन्छ ।

हिमाल एकेडेमीका प्रधानाध्यापक मधुसूदन केसीले आफूलाई यस विषयबारे कुनै जानकारी नभएको बताएका छन् । उनले अहिले पनि वेबसाईट स्कूलकै नियन्त्रणमा रहेको बताए । “हामीलाई कतै कसैले पनि पनि डेटा लिक भएको छ भनेको छैन,” उनले भने, “यस विषयमा केही थाहै छैन । सबै हाम्रै नियन्त्रणमा छ ।

दाङ, १९ फागुन । पत्रकार गोपाल शर्मा भट्टराई चैत २ गते हुने तुलसीपुर खानेपानी उपभोक्ता तथा सरसफाई संस्थाको सचिव पदमा आफ्नो दाबी रहेको बताएका छन् ।

उनले नेपाली काँग्रेसको तर्फ बाट चुनाव लड्ने गरि पार्टीका नेताहरु संग आफ्नो दाबी रहने कुरा अवगत गराउँदै आएको बताएका छन् ।

‘ म अघिल्लो निर्वाचनका क्रममा पनि खानेपानीमा उम्मेदवारी दिन चाहेको थिए,’ उनले भने ‘ त्यतिखेर नेताहरुले मलाई अर्कौ चुनावमा तपाँइलाई स्थान दिन्छौं भनेको हुँदा म अन्तिममा आइ रोकिएको थिए । त्यसैले यस पाली मैले सचिव पदमा मेरो उम्मेदी हुन्छ भन्ने कुरा अवगत गराइ सकेको छु ।’

नेपाल प्रेस युनियन दाङका उपाध्यक्षसमेत रहेका पत्रकार भट्टराई पढाइमा स्नातोक्तर छन् । उनी बिगतमा लुम्बिनी प्रदेशका पूर्व मुख्यमन्त्री डिल्लीबहादुर चौधरीको प्रेस संयोजकको भूमिका निर्वाह गरि सकेका ब्यक्ति हुन ।
तुलसीपुर चेम्बरअफ कमर्षका प्रेस सल्लाहाकार समेत रहेका पत्रकार भट्टराई लामो समयदेखि पत्रकारितामा क्रियासिल छन् । उनी अन्नपूर्ण दैनिकमा कार्यरत छन् ।

आँफु निर्वाचित भए तुलसीपुर खानेपानीको हालको अवस्थालाई सुधार गरि सवैका लागि सहज र सर्वसुलभ पानी वितरणको प्रणाली विकास गर्ने उनले वताएका छन् । खानेपानी संस्थाको सामाजिक, प्रशासनिक , कार्यालय ब्यब्स्थापनको क्षेत्रमा सुधार ल्याउने बताउछ्न ।

पार्टी भित्र प्यानलका हिसावले संस्थापक मानिन्छन् । काँग्रेस केन्द्रीय सदस्य गेहेन्द्र गिरी, पूर्व मुख्यमन्त्री चौधरी क्षेत्रीय सभापति जगत बहदुर खड्का , प्रदेश सभापति देवेन्द्र रिजाल, नगर सभापति सुरेश हमाल लगाएतका नेताहरुसंग खानेपानीको सचिव पदमा आफ्नो दाबी रहेको अवगत गराइ सकेको हुँदा आँफुले टिकट पाउने र सहजै निर्वाचित हुने विश्वास पत्रकार शर्माको छ ।

गत निर्वाचनमा काँग्रेसकै उम्मेदवार पवन बुढाथोकीको प्यानलवाट पत्रकार शर्माले उम्मेदवारी दिने चर्चा थियो ।

यसअघि रिपोटर्स क्लव नेपाल दाङ शाखाका अध्यक्षसमेत रहेका पत्रकार रेग्मीले पनि आँफु काँग्रेसको आधिकारिक टिमबाट कोषाध्यक्ष पदमा चुनाव लड्ने फरककोणलाई बताएका थिए ।

यो पाली नेतृत्व चुन्न्न तुलसीपुर खानेपानी संस्थामा कुल १० हजार ९ सय ७० जना उपभोक्ताले मताधिकार पाएका छन् । नयाँ उपभोक्ताका लागि बक्यौता शुल्क बुझाउन अन्तिम समय सीमा फागुन १५ गतेसम्म तोकिएको थियो । तीनै मतदाताले चैत २ गते तोकिएको निर्वाचनमा आगामी नेतृत्व चुन्ने छन् ।

यो भन्दा पहिलेका निर्वाचनहरु नियाल्दा खानेपानी संस्था सेवामुलक संस्था रहेपनि यस्को नेतृत्वका लागि दलहरुका बीचमा ब्यापक रुपमा राजनीतिक अस्तित्वको लडाइ हुने गरेको थियो । यस पटक पनि त्यही स्थिति दोहरिने संभावना प्रबल छ । तुलसीपुर खानेपानीमा सबै भन्दा बढी मतदाता नेपाली काँग्रेस निकटका उपभोक्ताहरु छन् ।

तर, काँग्रेस भित्र धेरै जना नेतृत्वको आकाँक्षी हुँदा तथा गुटगत राजनीतिक प्रभावका कारण आपसी टकराब हुँदै आएको छ । जस्को लाभ कतिपय समयमा अन्य दलसम्बन्ध उम्मेदवारले उठाउँदै आएको बिगत छ ।

यसअघि नेत्र बिक्रम चन्द्र बिप्लव निकट मानिने खेमराज वली पटक पटक निर्वाचित भएको बिगत छ ।
अब आउने निर्वाचनमा कुन दलबाट को–को उम्मेदवार बन्छन र कस्ले नेतृत्वमा बाजी मार्ला भन्ने सवाल यतिखेर चर्चाको बिषय बन्दै गएको छ । अहिले देखि नै बिभिन्न संभावित उम्मेदवार उपभोक्ताहरुलाई भेट्दै मत माग्ने अभियानमा जुटि सकेका छन् ।

नेतृत्वको लागि को – को छन आकाँक्षी ?

हालसम्म खानेपानीको नेतृत्वको लागि कसैले पनि औपचारिक रुपमा आफ्नो उम्मेदवारी घोषणा गरि सकेका छैनन् । तर, बिभिन्न राजनीतिक दल सम्बन्द्ध ब्यक्तिहरुको नाम चर्चामा छ ।

स्रोतका अनुसार अहिलेका अध्यक्ष यमकान्त भण्डारी फेरि दोस्रो कार्यकालको लागि दोहरिन काँग्रेसका नेताहरु संग भेटेर लबिङ गरि रहेका छन् । उनले आँफुले सुरु गरेका कामहरु पुरा गर्नका लागि एक कार्यकाल दोहरिन चाहेको बताउँदै आएका छन् ।

अघिल्लो निर्वाचनमा काँग्रेसकै पवनकुमार बुढाथोकी अध्यक्ष भण्डारीसंग झिनो मतान्तरले पराजित भएका थिए । यातायात ब्यबसायी तथा काँग्रेस नेता बुढाथोकी यो पटक फेरि पनि अध्यक्षको स्वभाविक उम्मेदवार मान्ने गरिएका छन् ।

त्यस्तै गत निर्वाचनमा बुढाथोकीको प्यानलवाटै निर्वाचन लडेर कोषाध्यक्ष बनेका भोला थापापनि यो पटक नेतृत्वको दाबी गरि रहेका छन । त्यस्तै नेपाली काँग्रेसका पूर्व तुलसीपुर इकाइ सभापति मदन धिताल लगाएतका नेताहरुको नामपनि उत्तिकै चर्चामा छ ।

त्यस्तै नेकपा एमालेको तर्फबाट अहिलेका खानेपानी सचिब शेबकराम भण्डारी र पूर्व सचिव मनोज लामिछानेको नाम चर्चामा छ ।

नेकपा माओबादी केन्द्रको तर्फबाट भने संस्थाका उपाध्यक्ष सिताराम शर्मा अध्यक्षमा भिड्ने निश्चित प्राय रहेको स्रोतले बताएको छ । शर्मा उपभोक्तालाई भेटेर प्रचार प्रशारमा जुटी सकेको बताउँछन् ।