काठमाडौँ ,२६ माघ । आगामी फागुन २१ गते हुने प्रतिनिधिसभा सदस्य निर्वाचनका लागि ४४ जिल्लाका १०० निर्वाचन क्षेत्रको मतपत्र छपाइ सम्पन्न भएको निर्वाचन आयोगले जनाएको छ।

निर्वाचन आयोगका सहायक प्रवक्ता कुलबहादुर जिसीका अनुसार सोमबारसम्म एक करोड २२ लाख ५६ हजार मतपत्र छपाइ भइसकेको छ।

छपाइ सम्पन्न भएका जिल्लामा डोल्पा, मुगु, जुम्ला, कालीकोट, हुम्ला, जाजरकोट, दैलेख, रुकुम (पश्चिम), सल्यान, सुर्खेत, बाजुरा, अछाम, बझाङ, डोटी, डडेल्धुरा, दार्चुला, बैतडी, कैलाली, कञ्चनपुर, पाँचथर, इलाम, तेह्रथुम, भोजपुर, ओखलढुङ्गा, सुनसरी, ताप्लेजुङ, सङ्खुवासभा, सोलुखुम्बु, खोटाङ, धनकुटा, बागलुङ, गुल्मी, झापा, गोरखा, म्याग्दी, पर्वत, बर्दघाट सुस्ता पश्चिम (नवलपरासी), मोरङ, उदयपुर, मुस्ताङ, लमजुङ, तनहुँ, स्याङ्जा र बर्दिया रहेका छन्।

यी जिल्लाका मतपत्रको प्याकिङसमेत पूरा भइसकेको आयोगले जनाएको छ। हालसम्म १० हजार ७५९ बाकस मतपत्र प्याकिङ भइसकेको सहायक प्रवक्ता जिसीले जानकारी दिए।

प्रतिनिधिसभा सदस्य निर्वाचनका लागि जनक शिक्षा सामग्री केन्द्र लिमिटेड, सानोठिमीमा समानुपातिक तथा प्रत्यक्ष निर्वाचन प्रणालीअन्तर्गतका मतपत्र छपाइ भइरहेको छ। आयोगका अनुसार मतपत्र छपाइ कार्य गत पुस २२ गतेदेखि सुरु भएको हो। पहिलो चरणमा १० लाख ९८ हजार २०० नमूना मतपत्र छपाइ गरी विभिन्न जिल्लामा पठाइसकिएको छ।

समानुपातिक निर्वाचन प्रणालीतर्फ गत पुस २६ गतेदेखि मतपत्र छपाइ सुरु भई माघ १३ गतेसम्म दुई करोड आठ लाख ३० हजार मतपत्र छपाइ सम्पन्न गरी प्याकिङ तथा रुजु गरी ढुवानीका लागि तयारी अवस्थामा राखिएको आयोगले जनाएको छ।

प्रत्यक्ष निर्वाचन प्रणालीतर्फ दुई करोड तीन लाख २३ हजार मतपत्र छपाइ गर्नुपर्ने आयोगको योजना रहेको छ। माघ १६ गते बिहानदेखि प्रत्यक्षतर्फको मतपत्र छपाइ सुरु भइसकेको आयोगले जनाएको छ।

काठमाडौं,२६ माघ । एक अवैध गोदाममा सशस्त्र प्रहरीले छापा हान्ने क्रममा तस्कर समूहको आक्रमणबाट तीन जना सशस्त्र प्रहरी घाइते भएका छन्। वीरगञ्ज महानगरपालिका–१० मा रहेको गोदाममा छापा हान्ने क्रममा उनीहरूमाथि आक्रमण भएको हो।

आदर्शनगरस्थित मदनप्रसाद गुप्ताको घरमा अवैध रूपमा गोदाम गरी राखिएको कपडा बरामद गर्ने क्रममा झडप भएको सशस्त्र प्रहरी बल नेपालका सहप्रवक्ता शैलेन्द्र थापाले जानकारी दिए।

सशस्त्र प्रहरी बल नेपाल नं. १३ गण पर्सा, सीमा सुरक्षा गुल्म वीरगञ्ज तथा वीरगञ्ज भन्सार कार्यालयको संयुक्त टोलीले सोमबार बिहान गोदाममा छापा मारी अवैध रूपमा भण्डारण गरिएको करिब ७ लाख रुपैयाँ मूल्य बराबरको कपडा बरामद गरेको हो।

कपडा बरामद गरेपछि तस्कर समूह आक्रमणमा उत्रिएको र ढुंगामुढा प्रहार गर्दा सशस्त्र प्रहरी बल नेपालको एउटा वानटन र एउटा स्कार्पियो गाडीमा समेत क्षति पुगेको सहप्रवक्ता थापाले बताए ।
घाइते सशस्त्र प्रहरीको अवस्था सामान्य रहेको र घटनाबारे थप अनुसन्धान भइरहेको जनाइएको छ।

बहुसूचक सर्वेक्षण २०८१/८२ को पूर्ण नतिजा सार्वजनिक

काठमाडौँ,२६ माघ । राष्ट्रिय तथ्याङ्क कार्यालयले नेपाल बहुसूचक सर्वेक्षण २०८१/८२ को पूर्ण नतिजा प्रतिवेदन सार्वजनिक गरेको छ। सोमबार सार्वजनिक गरिएको प्रतिवेदनअनुसार नेपालमा प्रति १ हजार जीवित जन्ममा २७ शिशुले एक वर्ष नपुग्दै ज्यान गुमाउने गरेका छन्।

प्रदेशगत तथ्याङ्कअनुसार नवजात शिशु तथा बाल मृत्युदर सुदूरपश्चिम प्रदेशमा सबैभन्दा धेरै देखिएको छ। सुदूरपश्चिममा प्रति १ हजार जन्ममा २६ बाल मृत्यु हुने गरेको छ भने सबैभन्दा कम बाग्मती प्रदेशमा १० रहेको छ।

शिशु मृत्युदर पनि सुदूरपश्चिम प्रदेशमा सबैभन्दा धेरै ३८ र बाग्मती प्रदेशमा सबैभन्दा कम १७ रहेको प्रतिवेदनमा उल्लेख छ। पाँच वर्षमुनिका बालबालिकाको मृत्युदर सुदूरपश्चिममा ४८ रहेको छ भने सबैभन्दा कम गण्डकी प्रदेशमा २० रहेको छ।

सर्वेक्षणअनुसार नेपालको कुल प्रजनन दर प्रतिमहिला १.९ मा झरेको छ। यद्यपि १५ देखि १९ वर्ष उमेर समूहका किशोरीमध्ये प्रति १ हजारमा ४८ जनाले जीवित बच्चा जन्माएको पाइएको छ, जसले किशोरी गर्भधारण अझै चुनौतीको रूपमा रहेको देखाएको छ।
पाँच वर्षमुनिका बालबालिकामध्ये ३१.५ प्रतिशत पुड्कोपन र २४.३ प्रतिशत तौल कमी (लिखुरेपन) को समस्यामा रहेका छन्। मधेश प्रदेशमा तौल कमी भएका बालबालिकाको प्रतिशत सबैभन्दा धेरै ३३.२ रहेको छ भने बाग्मती प्रदेशमा सबैभन्दा कम ९.६ प्रतिशत रहेको छ।

यस्तै ६ महिनासम्म आमाको दूध मात्र खुवाउने दर ६९.७ प्रतिशत रहेको छ। १२ देखि २३ महिनाका बालबालिकामध्ये ८०.७ प्रतिशतले मात्र सबै खोप पूरा गरेका छन्। आधारभूत विद्यालय (कक्षा १–५) अन्तर्गत कक्षा १ मा प्रवेश गर्ने उमेरका बालबालिका ४१.२ प्रतिशत मात्र रहेका छन्। पाँच वर्षमुनिका ८५.४ प्रतिशत बालबालिकाको जन्मदर्ता भएको तथ्याङ्कमा उल्लेख छ।
घरपरिवारको अवस्थातर्फ ९६.७ प्रतिशत घरधुरीमा विद्युत् सेवाको पहुँच पुगेको छ। प्रदेशगत रूपमा गण्डकी प्रदेशमा पहुँच सबैभन्दा धेरै ९९.५ प्रतिशत र कर्णाली प्रदेशमा सबैभन्दा कम ८०.८ प्रतिशत रहेको छ। टेलिफोन सेवामा ९५.५ प्रतिशत घरपरिवारको पहुँच छ भने इन्टरनेट सुविधा भएको उपकरण प्रयोग गर्ने घरपरिवार ८२ प्रतिशत पुगेका छन्।

१५ देखि ४९ वर्ष उमेर समूहका महिलामध्ये १७.८ प्रतिशत र पुरुषमध्ये १९.६ प्रतिशतले मात्र स्वास्थ्य बीमा गरेको सर्वेक्षणले देखाएको छ।

कार्यक्रममा बोल्दै मुख्यसचिव सुमनराज अर्यालले बहुसूचक सर्वेक्षणबाट प्राप्त ताजा तथ्याङ्कले दिगो विकास लक्ष्य (एसडीजी) को अनुगमन, नीति निर्माण तथा १६औँ योजनाको मध्यावधि समीक्षामा महत्त्वपूर्ण आधार प्रदान गर्ने बताए।

उनले १६औँ योजनाको कार्यान्वयन र अनुगमनमा यस्ता तथ्याङ्क अपरिहार्य हुने उल्लेख गरे। मुख्यसचिव अर्यालले आगामी दिनमा नयाँ प्रविधि र विधि प्रयोग गरी तथ्याङ्क सङ्कलन गर्न सुझावसमेत दिए।

काठमाडौं,२६माघ । नेपाली बजारमा सोमबार पनि सुनको भाउ बढेको छ। आइतबार तोलामा ९ हजार ५ सय रुपैयाँले बढेको सुन आज थप ४ हजार १ सय रुपैयाँले बढेको हो।

नेपाल सुनचाँदी व्यवसायी महासंघका अनुसार सोमबार सुनको भाउ तोलामा ३ लाख ४ हजार ६ सय रुपैयाँ कायम भएको छ। आइतबार सुनको मूल्य तोलामा ३ लाख ५ सय रुपैयाँ थियो।

यसअघि शुक्रबार सुन तोलामा २ लाख ९१ हजार रुपैयाँमा कारोबार भएको थियो भने बिहीबार २ लाख ९५ हजार २ सय रुपैयाँमा कारोबार भएको महासंघले जनाएको छ।

यसैबीच, सोमबार चाँदीको भाउ पनि बढेको छ। आज चाँदी तोलामा २ सय ४० रुपैयाँले बढेर प्रतितोला ५ हजार २ सय ५० रुपैयाँ पुगेको छ।
आइतबार चाँदी प्रतितोला ५ हजार १० रुपैयाँमा किनबेच भएको थियो।

दाङ, २६ माघ । दाङमा मोटरसाइकल दुर्घटना हुँदा दुई जनाको मृत्यु भएको छ। सोमबार बिहान करिब ९ बजे घोराही उपमहानगरपालिका–१६ सेवाखोलामा घोराहीबाट तुलसीपुरतर्फ जाँदै गरेको लु.प्र. ०२–००१ प ११०२ नम्बरको मोटरसाइकल दुर्घटनामा परेको हो।

जिल्ला प्रहरी कार्यालय दाङका सूचना अधिकारी तथा प्रहरी नायब उपरीक्षक रेशम बोहराका अनुसार मोटरसाइकल अनियन्त्रित भई सेवारखोलास्थित निर्माणाधीन पुलबाट खसेको थियो।

दुर्घटनामा मोटरसाइकल चालक रोल्पा त्रिवेणी गाउँपालिका–७ का २८ वर्षीय ज्ञानेन्द्र बुढाथोकी र पछाडि सवार दाङको तुलसीपुर उपमहानगरपालिका–१७ झिँगेका ३९ वर्षीय कमल वलीको मृत्यु भएको हो।

घाइते अवस्थामै उद्धार गरी उनीहरूलाई उपचारका लागि घोराहीस्थित राप्ती स्वास्थ्य विज्ञान प्रतिष्ठान लगिएकोमा चिकित्सकले उपचारका क्रममा मृत घोषणा गरेका थिए।
दुर्घटनाबारे थप अनुसन्धान भइरहेको प्रहरीले जनाएको छ।

दाङ,२६ माघ । दाङमा मोटरसाइकल दुर्घटना हुँदा दुई जना युवक गम्भीर घाइते भएका छन्।

घोराही उपमहानगरपालिका–१६ सेवारखोलामा आज बिहान करिब ९ बजे घोराहीबाट तुलसीपुरतर्फ जाँदै गरेको लु प्र ०२–००१ प ११०२ नम्बरको मोटरसाइकल दुर्घटनामा परेको हो।

दुर्घटनामा घाइते भएका दुवै जनाको अवस्था गम्भीर रहेको जिल्ला प्रहरी कार्यालय दाङका प्रवक्ता तथा प्रहरी नायब उपरीक्षक चक्रबहादुर शाहले जानकारी दिए। घाइतेहरूको पहिचान हालसम्म खुल्न नसकेको उनले बताए।

घाइतेहरूको उपचार घोराहीस्थित राप्ती स्वास्थ्य विज्ञान प्रतिष्ठानमा भइरहेको छ। दुर्घटनाको कारणबारे अनुसन्धान भइरहेको प्रहरीले जनाएको छ।

दाङ,२६ माघ । अण्डाको मूल्यमा भारी गिरावट आएको छ। नेपाल लेयर्स कुखुरा पालक सङ्घले सोमबारदेखि लागू हुने गरी तोकेको नयाँ समर्थन मूल्यअनुसार ठूलो अण्डाको मूल्य प्रतिक्रेट ३७५ रुपैयाँ र मध्यम अण्डाको ३३५ रुपैयाँ कायम गरिएको छ।

यसअघि गत मंसिर महिनामा अण्डाको मूल्य हालसम्मकै उच्च प्रतिक्रेट ५६५ रुपैयाँ पुगेको थियो। सङ्घका अनुसार देशभित्र अण्डा उत्पादन बढ्नु र भारतबाट सस्तो सेतो अण्डा आयात हुनुका कारण मूल्य घटेको हो।

हाल अण्डा उत्पादनको लागत प्रतिक्रेट करिब ५७४ रुपैयाँ पर्ने भए पनि लागतभन्दा निकै कम मूल्यमा बिक्री गर्नुपर्दा किसानहरू निराश बनेका छन्। सङ्घले भारतीय अण्डाको आयात रोक्न सरकारसँग माग गरेको छ।

किसानको लागत सुरक्षित हुने नीति नहुँदा कुखुरा पालक व्यवसाय संकटमा पर्दै गएको सङ्घको भनाइ छ।

दाङ,२५ माघ । आइसिसी टी–२० विश्वकप क्रिकेटको पहिलो खेलमा नेपाल इङ्ल्याण्डसँग ४ रनले पराजित भएको छ।मुम्बईस्थित वाङ्खेडे क्रिकेट मैदानमा टस जितेर पहिले ब्याटिङ गरेको इङ्ल्याण्डले दिएको १८५ रनको लक्ष्य पछ्याएको नेपालले निर्धारित २० ओभरमा ६ विकेट गुमाउँदै १८० रन मात्र बनाउन सक्यो।

नेपालका लागि कुशल भुर्तेलले २९ रन बनाउँदै राम्रो सुरुवात दिलाएका थिए भने आसिफ शेख ७ रनमा आउट भए। दीपेन्द्रसिंह ऐरीले ४४ रनको योगदान दिँदा कप्तान रोहित पौडेलले ३९ रन बनाए। आरिफ शेखले १० रन जोड्दा लोकेश बमले २० बलमा ४ चौका र २ छक्कासहित ३९ रनको आक्रामक इनिङ्स खेले। करन केसी १ रनमा अविजित रहे।

जित नजिक पुगेको नेपालले अन्तिम ओभरमा गुलसन झाको विकेट गुमाएपछि खेल हातबाट फुस्किएको हो।

यसअघि इङ्ल्याण्डका लागि ह्यारी ब्रुकले ५३ रन र ज्याकब बेथेलले ५५ रन बनाए। बलिङतर्फ नेपालका दीपेन्द्रसिंह ऐरी र नन्दन यादवले समान २–२ विकेट लिए भने शेर मल्ल र सन्दीप लामिछानेले १–१ विकेट झारे।

छोराछोरीले बनाएको परिकार चाख्न अभिभावकको उत्साहपूर्ण सहभागिता

दाङ,२५ माघ । तुलसीपुर–९ बेलुवामा रहेको सगरमाथा स्कूल दाङले ‘फुड फेस्टिवल–२०८२’ सम्पन्न गरेको छ। विद्यालयको शैक्षिक गुणस्तर बढाउनुका साथै विद्यार्थीहरूमा व्यवहारिक सीप, उद्यमशीलता र आत्मनिर्भरता विकास गर्ने उद्देश्यले कार्यक्रम आयोजना गरिएको हो।

फुड फेस्टिवलमा विद्यार्थी, अभिभावक तथा स्थानीय समुदायको उल्लेखनीय सहभागिता रहेको थियो। विद्यार्थीहरूले सेलरोटी, सुख्खा रोटी, पकौडा, आलुचप, चना, अण्डा, दही–चिउरा, सागसब्जी लगायतका परिकार आफैं तयार गरी प्रदर्शनी तथा बिक्री गरेका थिए। आफ्ना छोराछोरीले बनाएको परिकार चाख्न अभिभावकहरू सहभागी भएका थिए।

कार्यक्रममा बोल्दै पत्रकार बसन्त पौडेलले यस्ता कार्यक्रमले बालबालिकामा व्यवहारिक सीप, सिर्जनशीलता र आत्मविश्वास विकास गर्न सहयोग पुग्ने बताउँदै कार्यक्रम सफल भएकोमा विद्यालयलाई बधाई दिए।

विद्यालयका प्रधानाध्यापक छवि ओलीले फुड फेस्टिवल शैक्षिक तथा सीपमूलक सिकाइको प्रभावकारी माध्यम भएको बताए। यस कार्यक्रममार्फत विद्यार्थीहरूले परिकार बनाउन लाग्ने लागत निर्धारण, मूल्य तोक्ने तरिका, बिक्री–वितरण प्रक्रिया र मुनाफा निकाल्ने जस्ता व्यवहारिक तथा गणितीय ज्ञान हासिल गर्ने अवसर पाएको उनले बताए।

हरेक काम सफल बनाउन टिमवर्क आवश्यक हुने उल्लेख गर्दै उनले सगरमाथा स्कूलले सैद्धान्तिक ज्ञानसँगै व्यवहारिक र सीपमूलक शिक्षामा जोड दिँदै आएको जानकारी दिए।

विद्यालयका अनुसार फुड फेस्टिवलले विद्यार्थीहरूको सिकाइलाई व्यवहारमा उतार्ने, रमाइलो र सिर्जनात्मक वातावरणमा ज्ञान हासिल गर्ने अवसर प्रदान गरेको छ। कार्यक्रमको सहजीकरण विद्यालयका शिक्षक शरद शर्मा मजगैयाँलीले गरेका थिए।

दाङ ,२५ माघ । आइसिसी टी–२० विश्वकप २०२६ अन्तर्गत आफ्नो पहिलो खेलमा नेपाललाई जितका लागि इङ्ल्यान्डले १८५ रनको चुनौतीपूर्ण लक्ष्य दिएको छ।

मुम्बईस्थित वानखेडे स्टेडियममा टस जितेर पहिले ब्याटिङ गरेको इङ्ल्यान्डले निर्धारित २० ओभरमा सात विकेट गुमाउँदै १८४ रन बनायो।

इङ्ल्यान्डका लागि ज्याकोब वेथे र कप्तान ह्यारी ब्रुकले अर्धशतकीय इनिङ्स खेले। वेथेले ३५ बलमा चार चौका र चार छक्कासहित सर्वाधिक ५५ रन बनाए। यस्तै कप्तान ब्रुकले ३२ बलमा चार चौका र तीन छक्काको सहयोगमा ५३ रन जोडे।

ओपनर जोस बट्लरले २६ रन बनाउँदा विल ज्याक्सले अविजित ३९ रनको योगदान दिए। अर्का ओपनर फिल साल्टले एक रन मात्र बनाउन सके भने टोम ब्यान्टोम र स्याम करन दुई–दुई रनमै आउट भए। जोफ्रा आर्चर एक रनमा रनआउट भए।

बलिङतर्फ नेपालका दीपेन्द्रसिंह ऐरी र नन्दन यादवले दुई–दुई विकेट लिए भने सन्दीप लामिछाने र शेर मल्लले एक–एक विकेट झारे।

यस खेलसँगै शेर मल्लसहित आरिफ शेख, लोकेश बम र नन्दन यादवले टी–२० विश्वकपमा डेब्यु गरेका छन्। नेपालले टेस्ट राष्ट्र इङ्ल्यान्डसँग पहिलो पटक टी–२० अन्तर्राष्ट्रिय खेल खेलेको हो।

नेपाल आज इङ्ल्यान्डविरुद्ध चमत्कारिक जित निकाल्दै विश्वकपमा सुखद सुरुवात गर्ने लक्ष्यमा छ।

नेपाल समूह ‘सी’ मा रहेको छ। यस समूहमा इङ्ल्यान्ड, वेस्ट इन्डिज, इटाली र स्कटल्यान्ड छन्। भारतसँगको विवादका कारण बङ्गलादेशले विश्वकप नखेल्ने निर्णय गरेपछि आइसिसीले वरीयताका आधारमा स्कटल्यान्डलाई मौका दिएको हो। इटालीले भने पहिलो पटक क्रिकेट विश्वकप खेल्दैछ।

नेपालले समूह चरणको दोस्रो खेल माघ २९ गते इटालीसँग, फागुन ३ गते वेस्ट इन्डिजसँग र फागुन ५ गते स्कटल्यान्डसँग खेल्नेछ। समूह चरणका सबै खेल नेपालले मुम्बईस्थित वानखेडे स्टेडियममै खेल्नेछ।

नेपालले समग्रमा तेस्रो तथा लगातार दोस्रो पटक टी–२० विश्वकप खेल्न लागेको हो। यसअघि नेपालले सन् २०१४ र सन् २०२४ को संस्करणमा सहभागिता जनाएको थियो।