बैतडी,१३ कार्तिक । बैतडीमा भिरबाट लडेर तीनजनाको मृत्यु भएको छ । जिल्लाको मेलौली नगरपालिका९७ पचकोराका ५५ वर्षीय भीमसिंह रावत, शिवनाथ गाउँपालिका९५ बारुलोजनीका ६१ वर्षीय इन्द्रसिंह साउद र डिलासैनी गाउँपालिका९७ ढाँणकी ५८ वर्षीया हरुली कार्कीको भिरबाट लडेर मृत्यु भएको हो ।

बुधबार शिवनाथ धाममा जात्रा हेर्न गएका भीमसिंह घर नफर्केपछि प्रहरीले खोजतलास गर्दै जाँदा आज दिउँसो भिरमा मृत अवस्थामा फेला परेका जिल्ला प्रहरी कार्यालयका प्रहरी प्रवक्ता एवं प्रहरी निरीक्षक बलदेव बडूले जानकारी दिए। उनका अनुसार  शिवनाथ–६ ओल्या भिरभन्दा करिब ५०० मिटर तल भीमको शव फेला परेको हो । 

इन्द्रसिंहको पनि शिवनाथ जात्राबाट फर्किने क्रममा भिरबाट लडेर मृत्यु भएको प्रहरीले जनाएको छ । त्यस्तै, बुधबारदेखि हराइरहेकी कार्कीको खोजी गर्दा भिरबाट करिब एक मिटर तल लडेको अवस्थामा शव फेला परेको प्रहरी निरीक्षक बडूले जानकारी दिए। न्यौटे भन्ने ठाउँमा खर काट्ने क्रममा उनको भिरबाट लडेर मृत्यु भएको जनाइएको छ ।

तीन वटै घटनाबारे थप अनुसन्धान भइरहेको जिल्ला प्रहरी कार्यालय बैतडीले जनाएको छ ।

काठमाडौ,१३ कार्तिक । सहकारी ठगी र संगठित अपराधको अभियोगमा थुनामा रहेका राष्ट्रिय स्वतन्त्र पार्टी (रास्वपा)का सभापति रवि लामिछाने र तत्कालीन गोर्खा मिडियाका सञ्चालक छविलाल जोशीको मुद्दाको सुनुवाइ आज पनि स्थगित भएको छ।

उनीहरू दुवैको मुद्दा उच्च अदालत तुल्सीपुर बुटवल इजलासका न्यायाधीश ओमप्रकाश अर्याल र तेजनारायण पौडेलको इजलासमा सुनुवाइ हुने कार्यसूची प्रकाशित भएको थियो। तर, जोशीका तर्फबाट आजको सुनुवाइ स्थगित गरिपाउने निवेदन परेकाले कार्यसूची स्थगित भएको अदालतका सूचना अधिकारी रामबहादुर कुँवरले जानकारी दिए।

‘अब अर्को बिहीबार साप्ताहिक पेशी पर्छ, रवि र छविलाल दुवैका तर्फबाट स्थगितको निवेदन नआए सुनुवाइ हुनेछ,’ कुँवरले भने।

यसअघि न्यायाधीशद्वय मिलनकुमार राई र ओमप्रकाश अर्यालको इजलासले लामिछाने र जोशीको मुद्दा एउटै प्रकृतिको भएकाले दुवै मुद्दा एकैसाथ राख्न आदेश दिएको थियो।

लामिछानेले बिगोबमोजिमको रकम बुझाई थुनामुक्त भई मुद्दा लड्न अनुमति मागेका थिए। सो सम्बन्धमा उच्च अदालतले रविसँगै जोशीको समेत फाइल पेश गर्न आदेश दिएको थियो।

यसअघि उच्च अदालत बुटवलले लामिछानेको मुद्दामा कैफियत प्रतिवेदन माग गर्ने आदेश दिएको थियो। सुप्रिम सहकारी ठगी प्रकरणमा पुर्पक्षका लागि थुनामा रहेका लामिछानेले आफ्नो भागको बिगो रकम बुझाए पनि जिल्ला अदालत रुपन्देहीले रिहा नगरेपछि उनले भदौ ९ गते उच्च अदालतमा निवेदन दर्ता गरेका थिए।

जिल्ला अदालतका न्यायाधीश नारायण सापकोटाको इजलासले साउन २६ गते सुनुवाइ गर्दै लामिछानेको रिहा गर्ने माग अस्वीकार गरेको थियो।

सुप्रिम सहकारी ठगी प्रकरणमा रवि लामिछानेसहितका प्रतिवादीहरूविरुद्ध १० करोड ९९ लाख ३६ हजार रुपैयाँ सामूहिक बिगो कायम गरी अभियोगपत्र दायर गरिएको छ। लामिछानेले त्यसको चार भागमध्ये आफ्नो भागबराबर २ करोड ७४ लाख ८४ हजार रुपैयाँ बिगो दाखिला गरी बैंक जमानतसहित निवेदन दिएका थिए।

जोशीले पनि सोही रकमबराबरको जमानत पेश गरेका थिए। तर दुवैजनाको भागमा कति बिगो कायम हुने भन्ने स्पष्ट नभएकाले अदालतले उनीहरूलाई रिहा गर्न नमिल्ने आदेश जारी गरेको थियो।

हाल पुर्पक्षका लागि दुवै जना कारागारमा छन्। भैरहवा कारागारमा रहेका लामिछानेलाई हालै ललितपुरको नख्खु कारागारमा सारिएको छ भने जोशी भने भैरहवा कारागारमै रहेका छन्।

दाङ,१३ कार्तिक । धर्ना कार्यक्रममा भाषण गर्दागर्दै ढलेका नेपाल ट्रेड युनियन महासङ्घ (जिफन्ट)का उपाध्यक्ष कमल गौतमको मृत्यु भएको छ।

नेपाल विद्युत् प्राधिकरण भैरहवा वितरण केन्द्र अगाडि धर्ना कार्यक्रमको भाषण गर्दा गर्दै ढलेका गौतमको मृत्यु भएको हो ।

उद्योगहरूमा विद्युत कटौती गरेको विरोधमा आयोजित कार्यक्रमलाई सम्बोधन गर्ने क्रममा गौतमको मृत्यु भएको हो। भाषण गर्दा गर्दै ढलेपछि उनलाई उपचारका लागि क्रिमसन अस्पताल पुर्‍याइएको थियो।

ट्रंक र डेडिकेटेड लाइनको विवादमा रुपन्देहीका उद्योगीहरूले आन्दोलनको घोषणा गरेका थिए।

काठमाडौ, १३ कार्तिक । प्रहरीले काठमाडौँको तारकेश्वर नगरपालिका–५ गोलढुङ्गा फूलबारी गेट नजिक धारिलो हतियार देखाई लुटपाट गरेको आरोपमा दुई जनालाई पक्राउ गरेको छ।

पक्राउ पर्नेहरूमा मकवानपुर भीमफेदी गाउँपालिका–५ घर भई हाल काठमाडौँ बूढानीलकण्ठ बस्ने २६ वर्षीय सूर्यबहादुर घलान र सिन्धुलीको दूधौली नगरपालिका–१० घर भई हाल बूढानीलकण्ठमै बस्ने २३ वर्षीय मनोज चौधरी रहेका छन्। काठमाडौँ उपत्यका प्रहरी कार्यालय रानीपोखरीका प्रमुख दानबहादुर कार्कीका अनुसार उनीहरूलाई गएराति पक्राउ गरिएको हो।

प्रहरीका अनुसार गोकर्णेश्वर नगरपालिका–५ बस्ने १९ वर्षीय श्रवण तामाङ तारकेश्वर–५ गोलढुङ्गा फूलबारी गेट नजिक बा.प्र.०२–०५० प.१६०२ नम्बरको मोटरसाइकल खोलाकिनारमा रोकेर बसेका बेला बा.४२ प.४०६९ नम्बरको मोटरसाइकलमा आएका दुई जनाले धारिलो हतियार देखाई कालो झोला लुटी फरार भएका थिए।

घटनापछि प्रहरी वृत्त बालाजुबाट पीडितसँग समन्वय गर्दै खोजतलास सुरु गरिएको थियो। पीडितले दिएको हुलियाका आधारमा अस्थायी प्रहरी चौकी तीनपिप्लेबाट खटिएको टोलीले लुटपाटमा संलग्न दुवै जनालाई लुटिएको झोलासहित नियन्त्रणमा लिन सफल भएको प्रहरीको भनाइ छ।

प्रहरीले उनीहरूको साथबाट लुटिएको झोलासँगै बा.प्र.०२–०५० प.१६०२ नम्बरको बिलबुक, मोबाइल चार्जर, घरको चाबी, रोलेक्स लेखिएको घडी, नगद रु ३,०००, खुकुरी, रेड्मी कम्पनीको मोबाइल, बोबो लेखिएको कालो झोला, ट्रामाडोल लेखिएको लागुऔषध ३० थान र बा.४२ प.४०६९ नम्बरको रातो–कालो मोटरसाइकल बरामद गरेको जनाएको छ।

घटनामा संलग्न व्यक्तिहरूमाथि प्रहरी वृत्त बालाजुमा राखी सोधपुछ भइरहेको र थप अनुसन्धान जारी रहेको प्रमुख कार्कीले जानकारी दिएका छन्।

काठमाडौ,१३ कार्तिक ।नेपाली राष्ट्रिय फुटबल टोलीका मुख्य प्रशिक्षक म्याट रसले राजीनामा दिएका छन्। पुरुष राष्ट्रिय टोलीको प्रशिक्षकमा नियुक्त भएको करिब आठ महिनामै उनले पद छोडेका हुन्।

गत फागुनमा एन्फा र अस्ट्रेलियाली प्रशिक्षक रसबीच एक वर्षका लागि सम्झौता भएको थियो। तर, करिब आठ महिनामै उनले पदबाट राजीनामा दिएको एन्फाका महासचिव किरण राईले जानकारी दिएका छन्। राईका अनुसार, रसले किन राजीनामा दिए भन्ने कारणबारे पछि जानकारी दिइनेछ।

रसको प्रशिक्षणमा नेपालले सात अन्तर्राष्ट्रिय खेल खेलेको थियो। तीमध्ये नेपालले एक खेलमा जित हासिल गरेको, दुई खेल बराबरी र चार खेलमा पराजित भएको थियो। रसको प्रशिक्षणमा खेलेको पहिलो खेलमै नेपालले सिङ्गापुरलाई पराजित गरेको थियो।

दाङ,१३ कार्तिक ।बंगालको खाडीमा विकसित भएको ‘मोन्था’ चक्रवातको असर नेपालमा पनि देखिन थालेको छ। मौसम विज्ञान विभागका अनुसार बिहीबार बिहानदेखि सुरु भएको यस चक्रवातको प्रभाव शनिबार बिहानसम्म रहनेछ।

वरिष्ठ मौसमविद् बिनु महर्जनका अनुसार चक्रवातको प्रभाव विशेषगरी कोशी, बागमती, गण्डकी र लुम्बिनी प्रदेशमा बढी देखिनेछ भने बाँकी प्रदेशहरूमा मध्यम वर्षाको सम्भावना रहेको छ। उनका अनुसार चक्रवातसँगै कर्णाली प्रदेशको उच्च पहाडी र हिमाली भूभागमा मध्यम हिमपात पनि हुन सक्छ।

महर्जनका अनुसार यो चक्रवातसँगै पश्चिमी वायु र अरब सागरको न्यूनचापीय क्षेत्रको आंशिक प्रभाव पनि नेपालमा परेको छ।

अर्का मौसमविद् उज्जवल उपाध्यायले बिहीबार बिहानदेखि सुरु भएको वर्षा शुक्रबार बिहानसम्म जारी रहने र शनिबारबाट मात्र मौसम सुधार हुने जानकारी दिए। उनका अनुसार बिहीबार बिहान काठमाडौँ उपत्यका लगायतका क्षेत्रमा भएको वर्षा पश्चिमी वायुको प्रभावका कारण भएको हो भने अपरान्हदेखि ‘मोन्था’ आँधीको प्रभाव पूर्ण रूपमा सक्रिय हुनेछ।

मौसम विभागले चक्रवातको जोखिमलाई मध्यनजर गर्दै बिहीबारदेखि अनावश्यक यात्रा नगर्न सर्वसाधारणलाई सावधानी अपनाउन अनुरोध गरेको छ।

दाङ,१३ कार्तिक । पूर्वपश्चिम राजमार्गअन्तर्गत नारायणघाट–बुटवल सडक खण्डको दाउन्ने भाग वर्षाका कारण अवरुद्ध भएको छ।

सडक मर्मतका क्रममा एकतर्फी सञ्चालनमा रहेको यो सडक आज बिहानदेखि परेको लगातार वर्षाका कारण अवरुद्ध भएको जिल्ला प्रहरी कार्यालयका सूचना अधिकारी मधु नेपालले जानकारी दिए।

उनका अनुसार विनयी त्रिवेणी गाउँपालिका–२ स्थित विश्वकर्मा मन्दिर र घ्युखोला क्षेत्रमा बाटो हिलो र चिप्लो बनेपछि सवारी आवागमन रोकिएको हो।
सूचना अधिकारी नेपालले भने, “बिहानैदेखि परेको पानीका कारण बाटो अत्यधिक चिप्लो बनेको छ। जसका कारण सवारीसाधन पश्चिमतर्फ जान सकेका छैनन्। मालवाहक सवारी उकालो चढ्न नसकेपछि दाउन्ने खण्डमा जाम हुन नदिन प्रहरी परिचालन गरिएको छ।”

दाङ,१३ कार्तिक । पश्चिम दाङको शान्तिनगरमा बेबारिसे अबस्थामा बन्दुक फेला परेको छ । प्रहरी चौकी चिराघाटबाट गस्ती गएको टोलीले बन्दुक फेला पारेको हो ।

प्रहरी चौकी चिराघाटबाट प्रहरी सहायक निरिक्षक हिरालाल सेन्चुरीको नेतृत्वमा गएको गस्ती टोलीले शान्तिनगर ४ गब्दवाको सुन्दर सामुदायिक वनक्षेत्रमा बेवारिसे अबस्थामा रहेको बन्दुक फेला पारेको जिल्ला प्रहरी कार्यालय दाङले जनाएको छ ।

बेबारिसे अबस्थामा फेला परेको बन्दुक ईलाका प्रहरी कार्यालय खिलतपुरमा राखिएको छ । बन्दुक फेला परेको विषयमा थप अनुसन्धान भइरहेको जिल्ला प्रहरी कार्यालय दाङका प्रबक्ता प्रहरी नायब उपरिक्षक चक्रबहादुर शाहले जानकारी दिए।

दाङ,१२ कार्तिक । तुलसीपुरमा रहेको ज्ञान ज्योति फाउन्डेसनले मास्टर अफ बिजनेस एडमिनिस्ट्रेशन (एमबिए) कार्यक्रममा उत्कृष्ट नतिजा हासिल गरेको छ । विद्यालयले एमबी अध्ययन सञ्चालन गरेको पहिलो वर्षमै प्रथम सेमेस्टरका विद्यार्थीहरूले उत्कृष्ट नतिजा ल्याएका हुन् ।

मङ्गलबार सार्वजनिक भएको एमबिए प्रथम सेमेस्टरको नतिजामा ज्ञान ज्योति फाउन्डेसनका छात्रा वर्षा के.सी.ले ३.६७ जिपिए प्राप्त गरेकी छिन् भने अन्य सबै विद्यार्थीहरूले उत्कृट नतिजा ल्याउन सफल भएको विद्यालय प्रशासनले जानकारी दिएको छ ।

ज्ञान ज्योतिले देशमै प्रथम स्थान हासिल तथा प्रदेश लगायत पश्चिम नेपालमै निरन्तर अब्बल नतिजा ल्याउन सफल ज्ञान ज्योतिको सफलताको प्रमुख आधार बौद्धिक व्यक्तिहरुको कुशल नेतृत्व, सबल व्यवस्थापन, दक्ष तथा अनुभवी शिक्षक शिक्षिकाहरुको साथ र अनुशासित, लगनशील एवं क्षमतावान विद्यार्थीहरुको मेहनत रहेको विद्यालयका सिइओ सुरेन्द्र जिसीले बताए ।

यस विद्यालयले वि.वि.ए., वि.ए.सी.सीएसआईटि, वि.सी.ए, विएस्सी, वि.वि.एस. र वि.ए संकायमा अध्यापन गराउदै आएको छ । ज्ञान ज्योति फाउन्डेसन पश्चिम नेपालमै उच्च ब्यबस्थापनका साथ सञ्चालन भैरहेको विद्यालयको रुपमा परिचित छ । विद्यालयले विभिन्न समय र संकायमा निरन्तर उत्कृष्ट नतिजा ल्याउने गरेको छ ।

काठमाडौ,१२ कार्तिक । ऊर्जा, जलस्रोत तथा सिँचाइमन्त्री कुलमान घिसिङ र भारतका विद्युतमन्त्री मनोहरलाल खट्ठरबीच भेटवार्ता भएको छ।

अन्तर्राष्ट्रिय सौर्य गठबन्धन (ISA) को आठौँ महासभामा भाग लिन नयाँ दिल्ली पुगेका मन्त्री घिसिङले आज (बुधबार) भारतीय समकक्षी खट्ठरसँग भेटवार्ता गरेका हुन्।

भारतको विद्युत मन्त्रालयमा भएको उक्त भेटमा नेपाल–भारतबीचको ऊर्जासम्बन्धी सहकार्य, विद्युत व्यापार, प्रसारण लाइन विस्तार, भारतीय लगानीमा निर्माणाधीन जलविद्युत आयोजनाको प्रगति तथा दीर्घकालीन साझेदारीका विषयमा विस्तृत छलफल भएको ऊर्जा मन्त्रालयले जनाएको छ।

त्यसैबीच नेपाल र भारतबीच दुईवटा अन्तरदेशीय प्रसारण लाइन निर्माणका लागि संयुक्त उपक्रम (जेभी) तथा सेयरहोल्डर सम्झौतामा हस्ताक्षर भएको छ। इनरुवा–पूर्णिया र लम्की–दोधारा–बरेली ४०० केभी प्रसारण लाइन निर्माणका लागि सम्झौता गरिएको हो।

ऊर्जामन्त्री घिसिङ र भारतीय विद्युतमन्त्री खट्ठरको उपस्थितिमा नेपाल विद्युत प्राधिकरणका तर्फबाट उप–कार्यकारी निर्देशक सुभाषकुमार मिश्र र पावर ग्रिड कर्पोरेशन अफ इन्डिया लिमिटेडका प्रमुख सञ्चालन अधिकृत सञ्जयकुमार गुप्ताले सम्झौतापत्रमा हस्ताक्षर गरेका छन्। यस सम्झौतापछि प्राधिकरण र पावर ग्रिडको संयुक्त लगानीमा दुवै प्रसारण लाइन निर्माणका लागि कम्पनी स्थापनाको बाटो खुलेको मन्त्रालयले जनाएको छ।

मन्त्री घिसिङले थप दुईवटा ‘क्रस–बोर्डर’ प्रसारण लाइन निर्माण अघि बढ्नु नेपाल–भारतबीचको द्विपक्षीय तथा क्षेत्रीय विद्युत व्यापारका लागि महत्वपूर्ण उपलब्धि भएको बताए। उनले उक्त प्रसारण लाइनमार्फत नेपालमा उत्पादित विद्युत निर्यात गर्न सहज हुने र अन्तर्राष्ट्रिय ऊर्जा बजारमा नेपालको पहुँच विस्तार हुने विश्वास व्यक्त गरे।

त्यस्तै, उनले नेपालका जलविद्युत परियोजनामा स्वदेशी तथा विदेशी लगानी आकर्षित गर्न द्विपक्षीय सहकार्यले महत्वपूर्ण भूमिका खेल्ने बताउँदै लगानीका लागि आग्रह गरे।

भारतीय विद्युतमन्त्री खट्ठरले पनि थप दुई ‘क्रस–बोर्डर’ प्रसारण लाइन निर्माण सम्पन्न भएपछि नेपाल–भारतबीचको विद्युत विनिमय सहज हुने, क्षेत्रीय ऊर्जा सुरक्षामा सुधार आउने र दुवै देशको आर्थिक वृद्धिमा योगदान पुग्ने बताए।

यसअघि, मन्त्रिपरिषद्को ३० असोजको बैठकले नेपाल विद्युत प्राधिकरण र पावर ग्रिडबीच संयुक्त लगानीमा दुईवटा कम्पनी स्थापना गर्न तथा ती कम्पनीहरूमा स्वपुँजी (इक्विटी) लगानीका लागि स्वीकृति दिएको थियो।