दाङ, १७ वैशाख । स्थानीय तहबाटै नापी तथा मालपोत सेवा प्रवाह गर्ने सरकारको योजनामा देशभरका २०७ स्थानीय तहले रुचि देखाएका छन्।

भूमि व्यवस्था, सहकारी तथा गरिबी नि वारण मन्त्रालयले एक साताअघि इच्छुक पालिकालाई आवेदन दिन आह्वान गरेको थियो। सोहीअनुसार बिहीबारसम्म २०७ पालिकाले निवेदन पेश गरेका हुन्।

निवेदन दिने पालिकामध्ये धरान, घोराही र धनगढी उपमहानगरपालिका रहेका छन् भने हुम्लाको सर्केगाड, इलामको चुलाचुली, सर्लाहीको चक्रघट्टा र कञ्चनपुरको बेलडाँडी गाउँपालिका पनि सहभागी छन्।

यस्तै भरतपुर र पोखरा महानगरपालिकाले समेत आफ्नै क्षेत्रबाट सेवा दिन तयार रहेको जानकारी मन्त्रालयलाई गराएका छन्।

मन्त्रालयले प्राप्त निवेदनमाथि अध्ययन सुरु गरिसकेको जनाएको छ। चरणबद्ध रूपमा सेवा हस्तान्तरण गर्ने योजनाअनुसार पहिलो चरणमा केही पालिका छनोट गरिनेछ।

पालिका छनोट गर्दा सेवाग्राहीको चाप, भौगोलिक पहुँच र व्यवस्थापन क्षमता मुख्य आधार बनाइने मन्त्रालयले जनाएको छ। विशेषगरी दुर्गम तथा बढी भिडभाड हुने क्षेत्रलाई प्राथमिकता दिइनेछ।

मन्त्रालयले सम्बन्धित जिल्लाका नापी तथा मालपोत कार्यालयलाई स्थलगत अनुगमन गरी प्रतिवेदन बुझाउन निर्देशन दिएको छ। प्रतिवेदनपछि आवश्यक उपकरण र जनशक्ति व्यवस्थापन गरिनेछ।

आउँदो एक साताभित्र पहिलो चरणका पालिकामा सेवा हस्तान्तरण गर्ने तयारी भइरहेको मन्त्रालयले जनाएको छ। यसले सेवाग्राहीलाई जिल्ला सदरमुकाम धाउनुपर्ने बाध्यता अन्त्य हुने विश्वास गरिएको छ।

दाङ,१७ वैशाख । रोल्पाको जलजला क्षेत्रमा तीर्थयात्री बोकेको जिप दुर्घटनामा परेको छ। वैशाखे पूर्णिमाको अवसरमा पूजा गर्न रुकुमपूर्वबाट गएको जिप थवाङ गाउँपालिकाअन्तर्गत जलजला क्षेत्रमा दुर्घटनामा परेको हो।

जिपमा १८ जना सवार रहेको इलाका प्रहरी कार्यालय थवाङले जनाएको छ। दुर्घटनास्थलमा भारी वर्षा भइरहेका कारण उद्धार कार्यमा कठिनाइ भइरहेको प्रहरीले जनाएको छ।

जिप भिरबाट तल खसेको र घटनास्थलसम्म प्रहरी तथा उद्धार टोली अझै पुग्न नसकेको जानकारी दिइएको छ।

दाङ,१७ वैशाख । अखिल नेपाल सुकुमबासी संघले चरणबद्ध संघर्ष कार्यक्रम सार्वजनिक गर्दै अन्ततः देशव्यापी आम हड्तालसम्म जाने घोषणा गरेको हो।

संघका अध्यक्ष अमर परियारका अनुसार सुकुम्बासीलाई लालपुर्जा उपलब्ध गराउने र जबरजस्ती उठिवास रोक्ने मुख्य माग रहेका छन्। साथै, प्रधानमन्त्री बालेन्द्र शाहलाई पदबाट हटाउने मागसमेत अघि सारिएको छ।

पहिलो चरणमा वैशाख २० गतेसम्म राजनीतिक दल र जनप्रतिनिधिलाई ज्ञापनपत्र, फोन तथा सन्देशमार्फत दबाब दिने कार्यक्रम रहेको छ। दोस्रो चरणमा वैशाख २० देखि ३० सम्म देशभर संगठन विस्तार र विरोध कार्यक्रम गरिनेछ।

वैशाख ३१ गते काठमाडौंमा पत्रकार सम्मेलन गर्दै ‘राइट टु रिकल’को आह्वानसहित मेची–महाकाली राजमार्गमा चक्काजाम गर्ने घोषणा गरिएको छ।

यस्तै, जेठ १ देखि ७ गतेसम्म हस्ताक्षर संकलन अभियान चलाइनेछ भने जेठ ७ गतेबाट देशभर अनिश्चितकालीन आम हड्ताल सुरु गर्ने चेतावनी दिइएको छ। संघले सुकुम्बासीको अधिकार सुनिश्चित नभएसम्म आन्दोलन जारी रहने जनाएको छ।

दाङ,१७ वैशाख । जिल्ला प्रशासन कार्यालय दाङले अतिक्रमण गरी बनाइएका घरटहरा २१ दिनभित्र हटाउन आग्रह गरेको छ।

प्रमुख जिल्ला अधिकारी विश्वप्रकाश अर्यालद्वारा जारी सूचनामा घोराही उपमहानगरपालिका १४ र १६ स्थित सरकारी जग्गामा अनधिकृत रूपमा निर्माण गरी बसेका व्यक्ति तथा संस्थालाई तोकिएको समयभित्र संरचना हटाई स्थान खाली गर्न भनिएको छ।

उक्त जग्गा ७ ख कित्ता नं. ६५२ मा पर्ने करिब १३-१४-३-० क्षेत्रफल (९२,८३५.८० वर्गमिटर) रहेको सूचनामा उल्लेख छ।तोकिएको समयभित्र घरटहरा नहटाएमा प्रशासन आफैंले हटाउने चेतावनी दिइएको छ।

साथै, वास्तविक भूमिहीन तथा सुकुमवासीहरूको हकमा वैकल्पिक व्यवस्थापन गरिने भएकाले सम्बन्धितलाई १० दिनभित्र कार्यालयमा निवेदन दिन आग्रह गरिएको छ।

काठमाडौ,१७ वैशाख ।अख्तियार दुरुपयोग अनुसन्धान आयोगले किर्ते हस्ताक्षरसहित उजुरी दर्ता गरी सर्वसाधारणलाई दुःख दिएको आरोपमा वैदेशिक रोजगार विभागका अधिकृतहरूमाथि छानबिन सुरु गरेको छ।

विभागका कर्मचारी, प्रहरी र बिचौलियाबीच मिलेमतो गरी वास्तविक दोषीलाई जोगाउने र निर्दोषमाथि दबाब सिर्जना गरेर रकम असुल्ने काम भइरहेको गुनासोपछि अख्तियार सक्रिय भएको हो।

स्रोतका अनुसार बिचौलियाको प्रभावमा परेर कर्मचारीहरूले जबरजस्ती पक्राउ पुर्जी तयार पार्ने, तर्साउने र रकम असुल्ने कार्य भइरहेको भेटिएपछि सम्बन्धित कर्मचारीलाई बयानका लागि बोलाइएको छ।

अख्तियारले निरकुमार विश्वकर्मा, युवराज शर्मा लगायतका कर्मचारीसँग बयान लिइरहेको जनाएको छ। विभागमै नक्कली हस्ताक्षर जुटाएर उजुरी गराउने र निर्दोषलाई फसाउने प्रवृत्ति बढेपछि छानबिन अघि बढाइएको हो।

यसैबीच वैदेशिक रोजगार न्यायाधिकरणले समेत पक्राउ अनुमति दिने विषयमा थप अध्ययन गर्न निर्देशन दिँदै आएको छ।

अस्ट्रेलियामा बसेर नेपाली युवालाई ठगी गरेको आरोप लागेका अनिल दनैसम्बन्धी मुद्दामा पनि विभागले वास्तविक दोषीलाई जोगाएको गुनासो पुगेपछि अख्तियारले अनुसन्धान अघि बढाएको हो।

काठमाडौ,१७ वैशाख । राजस्व अनुसन्धान विभागले विदेशी विनिमय अपचलन र सम्पत्ति शुद्धीकरण मुद्दामा विकल पौडेल र उनकी पत्नी एलिना बस्नेतविरुद्ध काठमाडौं जिल्ला अदालतमा मुद्दा दायर गरेको छ।

विभागले उनीहरूमाथि ६८ करोड ९४ लाख रुपैयाँभन्दा बढी बिगो कायम गर्दै कारबाहीको माग गरेको छ।
अनुसन्धानअनुसार दम्पतीले विदेशी विनिमय ऐन विपरीत गैरकानुनी कारोबार गरी अवैध सम्पत्ति आर्जन गरेको आरोप छ।

सम्पत्ति शुद्धीकरण निवारण ऐन, २०६४ अन्तर्गत गरिएको थप अनुसन्धानमा पद र शक्तिको दुरुपयोग गरेर सम्पत्ति आर्जन गरेको पुष्टि भएको दाबी गरिएको छ।
अभियोगपत्रअनुसार विकल पौडेलतर्फ ६१ करोड १३ लाख रुपैयाँ र एलिना बस्नेततर्फ ७ करोड ८१ लाख रुपैयाँ बिगो कायम गरिएको छ।

विभागले बिगोको दोब्बर जरिवाना, कैद सजाय र अवैध सम्पत्ति जफत गर्न मागदाबी गरेको छ। यसअघि पनि विदेशी विनिमय अपचलनसम्बन्धी मुद्दा दर्ता भइसकेको थियो।

साथै, विशेष अदालतले सुरक्षण मुद्रण उपकरण खरिद प्रकरणमा भ्रष्टाचार मुद्दामा पौडेललाई दोषी ठहर गर्दै कैद र जरिवाना सजाय सुनाइसकेको छ।

दाङ,१७ वैशाख । बुधबार बेलुका आएको हावाहुरीका कारण दाङमा चार जना घाइते भएका छन्।
घाइते हुनेमा लमही नगरपालिका–४ अर्नवाका प्रजा चौधरी, शान्तिनगरका जगतबहादुर थापा, वडा–३ वनगाउँका कमल खनाल र वडा–२ श्रीगाउँका बिक्रम चौधरी रहेका छन्।

हावाहुरीका क्रममा जस्तापाताले काट्दा थापाको हातमा गम्भीर चोट लागेको छ भने खनालको हात भाँचिएको छ। यस्तै, रुखको हाँगा भाँचिँदा बिक्रम चौधरीको आँखामा चोट लागेको छ। घाइते चारै जनाको लमही अस्पतालमा उपचार गरिएको छ।

स्थानीय प्रशासनका अनुसार हावाहुरीका कारण विभिन्न स्थानमा रुख ढल्नुका साथै संरचनामा क्षति पुगेको प्रारम्भिक विवरण प्राप्त भएको छ।

दाङ,१६ वैशाख । रुपन्देहीमा माइक्रोबस र ईभी माइक्रो आपसमा ठोक्किदा दुईजनाको मृत्यु भएको छ। २७ जना घाइते भएका छन् ।

पूर्व–पश्चिम राजमार्गअन्तर्गत देवदहको गणेशनगर नजिक माइक्रो बस र ईभी माइक्रो एकआपसमा ठोक्किँदा दुर्घटना भएको इलाका प्रहरी कार्यालय बुटवलले जनाएको छ।

बुटवलबाट बर्दघाटतर्फ जाँदै गरेको लु१ख ७२८५ नम्बरको माइक्रो बस र नारायणगढबाट बुटवलतर्फ आउँदै गरेको बागमती प्रदेश ००ख ८९२८ नम्बरको ईभी माइक्रो आपसमा जुधेका थिए।

दुर्घटनामा घाइतेमध्ये दुई जनाको देवदह मेडिकल कलेजमा उपचारका क्रममा मृत्यु भएको प्रहरीले जनाएको छ। अन्य घाइतेहरूको सोही अस्पतालमा उपचार भइरहेको छ भने मृतकको सनाखत हुन बाँकी रहेको प्रहरीले जानकारी दिएको छ।

दाङ,१६ वैशाख ।दाङको घोराहीस्थित राप्ती स्वास्थ्य विज्ञान प्रतिष्ठानको जग्गा अतिक्रमण गरेर बसेका सुकुमवासीहरूको व्यवस्थापनका लागि पहल सुरु गरिएको छ। यसका लागि प्रतिष्ठान र नवलपुर बहुउद्देश्यीय सरोकार समितिबीच बुधबार पूरक सम्झौता भएको छ।

सम्झौताअनुसार कटुवा खोलासँगै रहेको प्रतिष्ठानको जग्गामा बसोबास गर्दै आएका करिब १५० घरधुरीमध्ये वास्तविक भूमिहीन सुकुमवासी पहिचान गरी उनीहरूलाई अम्बापुर जग्गा एकीकरण आयोजनाअन्तर्गत प्रत्येक घरधुरीलाई ५/५ धुरका दरले घडेरी उपलब्ध गराइनेछ।

यस्तै, उक्त स्थानमा बाटो, बिजुली र खानेपानीजस्ता आधारभूत सुविधा उपलब्ध गराउन घोराही उपमहानगरपालिका, प्रदेश तथा संघ सरकारसँग समन्वय गर्ने उल्लेख गरिएको छ।

सम्झौतापत्रमा प्रतिष्ठानका निमित्त उपकुलपति तथा रजिस्ट्रार प्रा. श्याम लम्साल र समितिका अध्यक्ष बलिभद्र रानाले हस्ताक्षर गरेका छन्। यसअघि पनि समितिकै पहलमा नवलपुर क्षेत्रको जग्गा प्रतिष्ठान मातहत ल्याउने प्रक्रिया अघि बढाइएको थियो।

काठमाडौ,१६ वैशाख । नेपाली कांग्रेसले राष्ट्रिय सभा संसदीय दलको नेताबाट कृष्ण प्रसाद सिटौलालाई हटाएको छ। उनको स्थानमा कमला पन्तलाई नयाँ नेता मनोनित गरेको छ ।

भीष्मराज आङदेम्बे नेतृत्वको संसदीय दलले उक्त निर्णय गरेको जनाएको छ। यसअघि शेर बहादुर देउवाले सिटौलालाई राष्ट्रिय सभा दलको नेता बनाएका थिए। पछिल्लो समय सिटौला पूर्णबहादुर खड्का समूहसँग नजिक देखिँदै आएका थिए भने पन्त गगन थापा समूहसँग आबद्ध मानिन्छिन्। यस निर्णयसँगै कांग्रेसभित्रको आन्तरिक विवाद थप सतहमा आएको छ।