दाङ,२० चैत । दाङमा कुटपिटबाट एकजनाको ज्यान गएको छ। एकजना घाइते भएका छन् । सामाजिक संजाल फेसबुक मार्फत बोलाएर भेट्न् गएका उनीहरू माथि कुटपिट भएको थियो।

कुटपिटबाट राप्ती गाउँपालिका–२ बह्राखुट्टीका १७ वर्षीय स्मिथ प्रधान मृत फेला परेका हुन्। उनीसँगै रहेका राप्ती गाउँपालिका–१ पाँखापानीका १६ वर्षीय आयुशमान थापा मगर घाइते भएका छन्।

प्रारम्भिक अनुसन्धानअनुसार उनीहरूलाई फेसबुक मेसेन्जरमार्फत ‘देबीसरा गाहा’ र ‘स्वस्तिका रानामगर’ नामका आइडीबाट भेट्न बोलाइएको थियो। त्यसपछि दुवै जना घरबाट निस्किएका थिए।

प्रहरीका अनुसार उनीहरू राप्ती गाउँपालिका–४ मौरीघाट क्षेत्रमा पुगेपछि दुई महिला र दुई पुरुष अपरिचित व्यक्तिहरूले कुटपिट गरेका थिए। कुटपिटबाट आयुशमानको शरीरका विभिन्न भागमा चोट लागेको छ भने स्मिथको ज्यान गएको हो।

घटनापछि आयुशमान राति करिब ३ बजे आफन्तको घर पुगेका थिए। उनलाई उपचारका लागि राप्ती आधारभूत अस्पताल सिसहनिया लगिएको छ र अवस्था मध्यम रहेको प्रहरीले जनाएको छ।

इलाका प्रहरी कार्यालय सिसहनियामा बिहान जानकारी पुगेपछि प्रहरी टोली खटिएको थियो। खोजतलासका क्रममा घटनास्थलदेखि करिब १.५ किलोमिटर पूर्वतर्फ दोलई खोलाको सुख्खा नालामा टाउकोमा चोट लागेको अवस्थामा स्मिथको शव फेला परेको हो।

घटनामा संलग्नहरू फरार रहेका छन् र उनीहरूको खोजी तथा घटनाबारे थप अनुसन्धान भइरहेको प्रहरीले जनाएको छ।

काठमाडौँ,२० चैत । निर्वाचन आयोगले चुनावसँग सम्बन्धित जिज्ञासा सम्बोधन गर्न सञ्चालनमा ल्याएको ‘कल सेन्टर’मा चार हजारभन्दा बढी प्रश्नको उत्तर दिइएको जनाएको छ।

आयोगका अनुसार गत माघ ५ गतेदेखि सञ्चालनमा आएको उक्त सेवामार्फत बिहीबारसम्म टेलिफोन र भ्वाइस मेल गरी कुल ४ हजार ३८ जिज्ञासा सम्बोधन गरिएको छ। प्रवक्ता नारायणप्रसाद भट्टराईका अनुसार तीमध्ये मतदाता नामावलीसँग सम्बन्धित १ हजार ९ सय ५८, निर्वाचन आचारसंहितासम्बन्धी ३ सय ८६, मतदाता शिक्षासम्बन्धी १ सय ५७ र अन्य १ हजार १ सय ११ जिज्ञासा रहेका छन्। कुल जिज्ञासामध्ये ४ सय २६ ‘भ्वाइस मेल’ रहेका छन्।

आयोगले मतदाता शिक्षालाई प्रभावकारी बनाउन फागुन ३ गतेदेखि १७ गतेसम्म देशभरका सबै वडामा स्वयंसेवक परिचालन गरी घरदैलोमै पुगेर मतदान प्रक्रिया र मताधिकारको महत्वबारे जानकारी दिइरहेको जनाएको छ।

त्यसैगरी, विद्युतीय माध्यमबाट मतदाता शिक्षा प्रवर्द्धन गर्न आयोगले ४ सय ७० वटा सामग्री तयार गरी आधिकारिक सामाजिक सञ्जालमार्फत सार्वजनिक गरेको छ। यस्ता सामग्रीले चुनावबारे सही सूचना प्रवाह गर्न तथा भ्रमपूर्ण जानकारी न्यूनीकरण गर्न सहयोग पुग्ने विश्वास आयोगले लिएको छ।

आयोगका अनुसार चुनावका लागि आवश्यक मतपत्र तथा सामग्री सातै प्रदेशका सबै जिल्लामा पुर्‍याइसकिएको छ। साथै, १ लाख ८६ हजार ७४ अस्थायी मतदाता कायम गरिएको र उनीहरूका लागि देशभर १ सय ४३ अस्थायी मतदान केन्द्र तोकिएको छ।

दाङ,२० चैत। लुम्बिनी प्रदेशका मुख्यमन्त्री चेतनारायण आचार्यले सहकारी क्षेत्रलाई भरोसायोग्य बनाउन जरुरी रहेको बताएका छन्। राप्ती उपत्यकामा आयोजित ६९ औँ राष्ट्रिय सहकारी दिवसको अवसरमा उनलेे यस्तो बताएका हुन् ।

कृषि, भूमि व्यवस्था तथा सहकारी मन्त्रालयले शुक्रबार आयोजना गरेको उत्कृष्ट सहकारी संस्था पुरस्कार वितरण कार्यक्रममा बोल्दै उनले केही सहकारी संस्थाहरूको खराब नियतका कारण समग्र सहकारी क्षेत्र बदनाम भइरहेको उल्लेख गरे। त्यस्ता संस्थामाथि नियमन कडाइका साथ भइरहेको उनले स्पष्ट पारे।

मुख्यमन्त्री आचार्यले सहकारीहरू सर्वसाधारण नागरिकका लागि महत्वपूर्ण आर्थिक सहारा बनेको उल्लेख गर्दै साना–तिना आर्थिक आवश्यकता सहकारीमार्फत सहज रूपमा पूरा भइरहेको बताए। साथै प्रदेश सरकारले ल्याउने बजेट बराबरकै पुँजी सहकारीमार्फत परिचालन भइरहेको भन्दै प्रदेशको समृद्धिमा सहकारीको योगदान उल्लेखनीय रहेको बताए।

कार्यक्रममा कृषि, भूमि व्यवस्था तथा सहकारी मन्त्री दिनेश पन्थीले सहकारी क्षेत्रलाई व्यवस्थित बनाउन प्रोत्साहन र नियमन दुवै पक्षमा काम भइरहेको जानकारी दिए। प्रमुख सचिव कृष्णप्रसाद काप्रीले असल अभ्यासलाई आत्मसात गर्दै समस्या आउन नदिन एकीकृत रूपमा काम गर्नुपर्ने धारणा राखे।

मन्त्रालयका अनुसार प्रदेशमा हाल ८ सय ४८ सहकारी संस्था रहेका छन्। तीमध्ये ३३ वटा सहकारीविरुद्ध उजुरी परेको छ भने ८ वटाविरुद्ध अदालतमा मुद्दा दायर भइसकेको छ। १२ वटा सहकारीमाथि थप अनुसन्धानका लागि प्रहरीमा पठाइएको छ भने केही सहकारीसँग बचत फिर्ताका लागि सम्झौता गरिएको छ।

पाँच सहकारी पुरस्कृत
यसै अवसरमा विभिन्न चार विधामा पाँच सहकारी संस्थालाई जनही २५ हजार रुपैयाँ र प्रमाणपत्रसहित पुरस्कृत गरिएको छ। बचत तथा ऋणतर्फ किसान कमैया कल्याण र राप्ती विश्वासी, बहुउद्देश्यीयतर्फ पश्चिम नेपाल यातायात, उत्पादकतर्फ उत्कृष्ट साना किसान कृषि तथा उपभोक्तातर्फ तुलसी उपभोक्ता सहकारी संस्था पुरस्कृत भएका छन्।

कार्यक्रममा सहकारी क्षेत्रलाई पारदर्शी र व्यवस्थित बनाउन ऐन–कानुन समयानुकूल संशोधन गर्नुपर्नेमा समेत जोड दिइएको थियो।

काठमाडौँ,२० चैत । चालू आर्थिक वर्षको फागुन मसान्तसम्म विदेशमा रहेका नेपालीहरूले १४ खर्ब ४९ अर्ब ६५ करोड रुपैयाँ बराबरको रेमिट्यान्स स्वदेश पठाएका छन्।

नेपाल राष्ट्र बैंकका अनुसार समीक्षा अवधिमा रेमिट्यान्स आप्रवाह ३७.७ प्रतिशतले वृद्धि भएको हो। अघिल्लो वर्षको सोही अवधिमा यस्तो वृद्धि ९.५ प्रतिशत मात्र थियो।

केन्द्रीय बैंकका अनुसार गएको फागुन महिनामा मात्रै १ खर्ब ८८ अर्ब ६४ करोड रुपैयाँ रेमिट्यान्स भित्रिएको छ। अघिल्लो वर्षको यही महिनामा भने १ खर्ब ५१ अर्ब १९ करोड रुपैयाँ बराबर रेमिट्यान्स आएको थियो।
यस अवधिमा वैदेशिक रोजगारीका लागि अन्तिम श्रम स्वीकृति (नयाँ) लिने नेपालीको संख्या २ लाख ७३ हजार ५३६ पुगेको छ भने पुनः श्रम स्वीकृति लिनेको संख्या २ लाख ५१ हजार ९८५ रहेको छ।

दाङ,२० चैत । दाङमा एक महिलामाथि खुकुरी प्रहार भएको छ। दाङको शान्तिनगर गाउँपालिका–४ बैसामा एक महिलामाथि खुकुरी प्रहार भएको हो। घटनामा २८ वर्षीया आशा खड्का गम्भीर घाइते भएकी छन्।

प्रहरीका अनुसार बिहीबार छिमेकी ४५ वर्षीय तिलकराम घर्तीले खुकुरी प्रहार गरेका हुन्। आन्तरिक विवाद (आलीसाँधी) का कारण भएको उक्त घटनामा खड्काको टाउकोसहित शरीरका विभिन्न भागमा चोट लागेको छ।

गम्भीर घाइते खड्कालाई राप्ती प्रादेशिक अस्पतालमा प्रारम्भिक उपचारपछि थप उपचारका लागि नेपालगञ्ज पठाइएको प्रहरीले जनाएको छ।

यसै घटनामा खड्काकी ७ वर्षीया छोरी आयुसा र २२ वर्षीया देउरानी समीक्षा पनि घाइते भएका छन्। उनीहरूको राप्ती प्रादेशिक अस्पतालमै उपचार भइरहेको छ।

खुकुरी प्रहार गर्ने घर्ती फरार रहेको र उनको खोजी कार्य जारी रहेको प्रहरीले जनाएको छ। स्थानीयका अनुसार घर्ती पूर्व सुरक्षाकर्मी समेत रहेको बताइएको छ।

दाङ,१९ चैत । नेपाल विद्युत प्राधिकरणअन्तर्गत तुलसीपुर वितरण केन्द्रले देशभर मिटर रिडिङ प्रणालीमा समस्या देखिएको जनाएको छ।

वितरण केन्द्रका अनुसार समस्या देखिएसँगै मिटर रिडिङ कार्य प्रभावित भएको छ भने बिलिङ प्रक्रियामा समेत ढिलाइ हुन सक्ने बताइएको छ।

प्राधिकरणले समस्या समाधान नहुँदासम्मका लागि ग्राहकहरूलाई वैकल्पिक रूपमा सहकार्य गर्न आग्रह गरेको छ।

जसअनुसार ग्राहकहरूले आफ्नै मिटरमा देखिएको अंक स्पष्ट देखिने गरी फोटो वा भिडियो खिची कार्यालयमा बुझाउन तथा ग्राहक परिचय खुल्ने कागजात (बिल वा ग्राहक आईडी) सहित सम्पर्क गर्न अनुरोध गरिएको छ।

काठमाडौं ,१९ चैत । स्वतन्त्र सांसद महावीर पुनले विश्वविद्यालयहरूलाई राजनीतिक प्रभावबाट मुक्त गरी शैक्षिक गुणस्तर सुधारमा केन्द्रित गर्नुपर्नेमा जोड दिएका छन्।

प्रतिनिधिसभाको आजको बैठकमा बोल्दै उनले देशभर सञ्चालनमा रहेका १८ वटा विश्वविद्यालयलाई राजनीतिबाट टाढा राख्न आवश्यक रहेको बताए।

उनले विज्ञान तथा प्रविधिको प्रवर्द्धनलाई प्राथमिकता दिँदै युवालाई स्वदेशमै रोजगारी सिर्जना गर्नुपर्ने धारणा राखे। “विज्ञान र प्रविधिको विकासविना देश आर्थिक रूपमा अघि बढ्न सक्दैन,” उनले भने।

सांसद पुनले विद्यालय शिक्षामा देखिएका विकृति सुधार गर्न शिक्षा नियमावलीमा परिवर्तन आवश्यक रहेको उल्लेख गर्दै विद्यालय व्यवस्थापन समितिमा बढ्दो राजनीतिक प्रभावप्रति चिन्ता व्यक्त गरे।

यसैगरी, प्राविधिक शिक्षा तथा व्यावसायिक तालिम परिषद् (सीटीईभीटी) मा भइरहेको राजनीतिक हस्तक्षेप अन्त्य गर्नुपर्नेमा पनि उनले जोड दिएका छन्।

काठमाडौं, १९ चैत । प्रतिनिधिसभाको आजको बैठकमा गृहमन्त्री सुधन गुरुङले तीन वटा अध्यादेश पेस गरेका छन्।

सभाको पहिलो अधिवेशनको पहिलो बैठकमा दलीय आधारमा सदस्यहरूले मन्तव्य राखेपछि नियमित कार्यसूचीअन्तर्गत उनले ‘नागरिकता सम्बन्धी (पहिलो संशोधन) अध्यादेश, २०८२’, ‘प्रतिनिधिसभा सदस्य निर्वाचन (पहिलो संशोधन) अध्यादेश, २०८२’ र ‘नेपाल विशेष सेवा (तेस्रो संशोधन) अध्यादेश, २०८२’ पेस गरेका हुन्।

संविधानको धारा ८४ को उपधारा (२) बमोजिम समानुपातिक बन्द सूचीमा जनसङ्ख्याको आरक्षण सुनिश्चित गर्न अध्यादेशमार्फत कानुन संशोधन गरिएको जानकारी दिइएको छ।

त्यसैगरी, आगामी प्रतिनिधिसभा निर्वाचनका लागि मतदाता नामावली अध्यावधिक गर्ने उद्देश्यले अघिल्लो सरकारले ‘प्रतिनिधिसभा सदस्य निर्वाचन (पहिलो संशोधन) अध्यादेश’ ल्याएको थियो।

गृहमन्त्री गुरुङले ‘नेपाल विशेष सेवा (तेस्रो संशोधन) अध्यादेश’मार्फत राष्ट्रिय अनुसन्धान विभागलाई प्रधानमन्त्री तथा मन्त्रिपरिषद्को कार्यालयबाट गृह मन्त्रालयअन्तर्गत ल्याइएको जानकारी गराए।

बैठकमा संविधानसभा सदस्य तथा पूर्वसदस्य ऋषिकेश गौतम, मोहम्मद अफ्ताव आलम, कृष्णकुमारी श्रेष्ठ, आमोदप्रसाद उपाध्याय, होमनाथ दाहाल तथा संविधानसभा र राष्ट्रियसभाका सदस्य बलदेव बोहराको निधनप्रति शोक प्रस्ताव पारित गरिएको छ।
प्रतिनिधिसभाको अर्को बैठक चैत २२ गते आइतबार बिहान ११ बजे बस्नेछ।

काठमाडौं, १९ चैत । राष्ट्रिय प्रजातन्त्र पार्टी (राप्रपा) संसदीय दलका नेता ज्ञानेन्द्र शाहीले प्रदेश संरचना खारेज गर्न सरकारले पहल गरे आफ्नो दलले पूर्ण समर्थन गर्ने बताएका छन्।

बिहीबार बसेको प्रतिनिधिसभा बैठकमा बोल्दै उनले प्रदेश खारेजीका लागि आवश्यक दुई तिहाइ बहुमत पुर्‍याउन राप्रपा तयार रहेको बताए। देशमा ८८४ जना सांसद रहेको उल्लेख गर्दै उनले प्रदेश संरचना सञ्चालनमा मात्र वार्षिक करिब १ खर्ब रुपैयाँ खर्च भइरहेको दाबी गरे।

प्रदेश संरचना राजनीतिक दलका कार्यकर्ता व्यवस्थापनका लागि मात्रै ल्याइएको आरोप लगाउँदै उनले सरकारले खारेजी प्रक्रिया अघि बढाए राप्रपाले बहुमत जुटाउन सहयोग गर्ने बताए।

‘यही संसदबाट यही सरकारले खारेज गर्छ भने दुई तिहाइका लागि १८४ संख्या चाहिन्छ, हामी पुर्‍याउँछौं,’ उनले संसदमा भने।

यसैबीच, शाहीले भदौ २३ र २४ गते भएको जेनजी आन्दोलनको निष्पक्ष छानबिन गरी दोषीमाथि कारबाही गर्न माग गरेका छन्।

उनले देशको सार्वभौमसत्ता र राष्ट्रिय एकताका लागि संवैधानिक राजसंस्था र हिन्दु राष्ट्र पुनर्स्थापना गर्नुपर्ने धारणा पनि राख्दै यस विषयमा गम्भीर बहस आवश्यक रहेको बताए।

सल्यान, १९ चैत । सल्यानको कपुरकोट गाउँपालिका–४ किमुचौर नजिक अटो दुर्घटना हुँदा पाँच जना घाइते भएका छन्। तीमध्ये दुई जनाको अवस्था गम्भीर रहेको प्रहरीले जनाएको छ।

बिहीबार बिहान करिब साढे ११ बजे किमुचौरबाट मुलपानीतर्फ जाँदै गरेको म.प्र.०३००३ स ४०१५ नम्बरको अटो अनियन्त्रित भई सडकबाट करिब १५० मिटर तल भिरमा खसेर दुर्घटना भएको हो।

दुर्घटनामा चालक ३८ वर्षीय टिकाराम राना, ७२ वर्षीय डिलबहादुर सुनार, ३८ वर्षीय सागर एरी, ४४ वर्षीय टोपबहादुर ऐरी र भारत उत्तर प्रदेश घर भई भाँडा बेच्दै हिँड्ने करिब ५२ वर्षीय सफि अहमद घाइते भएका छन्।

प्रहरीका अनुसार सुनार र अहमदको अवस्था गम्भीर छ भने अन्यको अवस्था मध्यम रहेको छ। प्रहरी र स्थानीयको सहयोगमा घाइतेहरूको उद्धार गरी कपुरकोट आधारभूत अस्पताल पुर्‍याइएको थियो।

घाइतेमध्ये चार जनालाई थप उपचारका लागि नेपालगञ्ज रिफर गरिएको छ। घटनाबारे थप अनुसन्धान भइरहेको प्रहरीले जनाएको छ।