जुम्ला,१६ चैत । जातीय विभेद गरेको आरोपमा एक जना महिला पक्राउ परेकी छन्।

जिल्ला प्रहरीका अनुसार कविता बुढालाई पक्राउ गरिएको हो। उनी गुठीचौर गाउँपालिका–३ निवासी हुन्।
उनीमाथि राजबहादुर सुनारमाथि जातीय विभेद गरेको आरोप लागेको प्रहरीले जनाएको छ।

आइतबार जुम्ला सदरमुकाम कालेखोलीस्थित एक होटलमा सुनारमाथि अपशब्द प्रयोग गरी गालीगलौज गरेको भिडियो सामाजिक सञ्जालमा सार्वजनिक भएपछि प्रहरीले उनलाई नियन्त्रणमा लिएर अनुसन्धान अघि बढाएको जनाएको छ।

प्रहरीका अनुसार घटनाबारे पीडित पक्षबाट अहिलेसम्म जाहेरी भने आएको छैन।

काठमाडौं,१६ चैत । हर्क साम्पाङले प्रधानमन्त्रीले सिंहदरबारमा बोलाएको बैठकमा सहभागी नहुने बताएका छन्।

श्रम, संस्कृति पार्टीका अध्यक्ष तथा सांसद समेत रहेका उनले प्रतिनिधिसभाको बैठक बोलाउनुपर्ने माग गर्दै कोठे बैठकमा आफ्ना पार्टीका सांसदहरू नजाने बताएका हुन्।

प्रधानमन्त्रीले कोशी प्रदेशका प्रतिनिधिसभा सदस्यहरूसँग छलफलका लागि सिंहदरबारमा बैठक बोलाएका छन्। यसका लागि प्रधानमन्त्रीको सचिवालयले उक्त पार्टीका सांसदहरूलाई पनि निम्तो दिएको छ।

‘प्रधानमन्त्रीले सदन बोलाउनतिर पहल नगरी कोठे बैठकमा बोलाउनुको कारण थाहा भएन। हामी कोठे बैठकमा आउँदैनौँ,’ साम्पाङले भनेका छन्, ‘सदनको बैठक बोलाउनुपर्छ। हप्तामा कम्तीमा एक पटक बैठक बस्नुपर्छ। जनताका प्रश्नबाट भाग्न पाइँदैन।’

काठमाडौं,१६ चैत । पक्राउ परेका पूर्वमन्त्री तथा नेपाली कांग्रेसका नेता दीपक खड्का अस्पताल भर्ना भएका छन्।

आइतबार पक्राउ परेका खड्कालाई अदालतले ७ दिन थुनामा राखेर अनुसन्धान गर्न अनुमति दिएको छ।

काठमाडौं,१६ चैत । एक महिना सात दिनदेखि सम्पर्कविहीन रहेका एक व्यक्ति मृत अवस्थामा फेला परेका छन्। जिल्ला प्रहरी कार्यालय ताप्लेजुङका प्रवक्ता तथा सूचना अधिकारी जटाशंकर यादवका अनुसार यमराज लिम्बू मृत फेला परेका हुन्।

तेह्रथुमको म्याङलुङ नगरपालिका–१ गैरी गाउँ घर भएका ४० वर्षीय लिम्बू अपर तमोर जलविद्युत आयोजनामा कार्यरत थिए। उनको शव चैत १५ गते फक्ताङलुङ गाउँपालिका–२ खेजेनिमस्थित मेथेन खोलामा फेला परेको प्रहरीले जनाएको छ।

प्रहरीका अनुसार उनी फागुन ८ गते फक्ताङलुङ–५ तापेथोकस्थित आयोजनाबाट घर जान्छु भनी हिँडेका थिए। लामो समयसम्म सम्पर्कमा नआएपछि चैत १ गते परिवारले जिल्ला प्रहरी कार्यालयमा खोजतलासका लागि निवेदन दिएका थिए।

निवेदनपछि प्रहरीले खोजी कार्य सुरु गरेको थियो। चैत १५ गते मेथेन खोलामा बेवारिसे शव भेटिएको सूचनापछि प्रहरी निरीक्षकको नेतृत्वमा खटिएको टोलीले हुलियाका आधारमा शवको पहिचान यमराज लिम्बूकै भएको पुष्टि गरेको जनाएको छ।

दाङ ,१६ चैत । घोराही–लमही सडकखण्ड फराकिलो बनाउने काम सुरु भएको छ। हाल मोड तथा साँघुरा स्थानहरू खुला गर्ने काम भइरहे पनि सडकलाई चारलेनका रूपमा विकास गर्ने योजना रहेको सडक डिभिजन कार्यालयले जनाएको छ।

कार्यालय प्रमुख दीपेन्द्र विष्टका अनुसार चालु आर्थिक वर्षमै सडक विस्तार सम्पन्न गर्ने लक्ष्यसहित काम भइरहेको छ।

साँघुरो सडकका कारण विगतमा धेरै सवारी दुर्घटना हुने गरेको भन्दै मोड सुधार र सडक फराकिलो बनाएपछि यातायात सञ्चालन सहज हुने अपेक्षा गरिएको छ।
लमही–घोराही सडकखण्डका जोखिमपूर्ण मोडहरू कटान गरी दुवैतर्फको दृश्य देखिने बनाउने काम भइरहेको उनले बताए।

साँघुरा स्थानमा चौडाइ बढाउने, माटो कटिङ गर्ने तथा आवश्यक स्थानमा पर्खाल निर्माण गरेर सडक विस्तार भइरहेको छ।

घोराही उपमहानगरपालिका–३ कुइरेपानीदेखि लमही नगरपालिका–६ अर्जुनखोलासम्म करिब १७ किलोमिटर सडकखण्डमा विस्तारको काम भइरहेको जनाइएको छ।
सडक सुधार कार्यक्रमअन्तर्गत विभिन्न मोड सुधार, कटिङ तथा पर्खाल निर्माणका काम अघि बढाइएको छ।

लमहीको अर्जुनखोलादेखि घोराहीको चौपट्टा मन्दिरसम्म करिब २० करोड १३ लाख रुपैयाँ बराबरका तीन ठेक्का सम्झौता गरी काम भइरहेको प्रमुख विष्टले जानकारी दिएका छन्।

कुइरेपानीदेखि मसोटखोलासम्मको खण्ड श्री मुनाल–केवी–सुनिल एन्ड विजय जेभीसँग करिब १३ करोड ४६ लाख रुपैयाँमा र मसोटखोलादेखि अर्जुनखोलासम्मको खण्ड श्री इजी–अलकापुरी जेभीसँग करिब ६ करोड ८० लाख रुपैयाँमा सम्झौता गरी काम भइरहेको छ।

चालु आर्थिक वर्षमै सडक सुधार सम्पन्न गर्ने लक्ष्यका साथ काम तीव्र रूपमा अघि बढाइएको जनाइएको छ।

दाङ,१६ चैत । लुम्बिनी प्रदेशसभा सदस्य रेखा शर्मा पक्राउ परेकी छन्। काठमाडौं उपत्यका अपराध अनुसन्धान कार्यालयको टोलीले उनलाई काठमाडौंको धुम्बाराहीबाट शनिबार पक्राउ गरेको हो।

उनीमाथि एक बालिकालाई घरमा राखेर बालश्रम गराएको आरोप लागेको छ।

यसअघि मुद्दा नचलाउने रायसहितको फाइल जिल्ला सरकारी वकिलको कार्यालय काठमाडौंबाट हुँदै उच्च सरकारी वकिलको कार्यालयमार्फत महान्यायाधिवक्ताको कार्यालयमा पुगेको थियो।

बालिकाको उद्धारका क्रममा काठमाडौं महानगरपालिकाको नगरप्रहरी, वडाका प्रतिनिधि तथा प्रहरी टोली घटनास्थलमा पुगेर मुचुल्का तयार पारेका थिए।

दाङ,१६ चैत । कपिलवस्तुको शुद्धोधन गाउँपालिकाका अध्यक्ष कमलेशरण चौधरीसहित तीन जनाविरुद्ध सामूहिक बलात्कारको आरोपमा मुद्दा दर्ता भएको छ।

जिल्ला सरकारी वकिल कार्यालय रुपन्देहीले ‘भैरहवा–१५’ बस्ने एक युवतीमाथि भएको भनिएको बलात्कार प्रकरणमा उनीहरूमाथि अभियोग दर्ता गरेको हो।

यस प्रकरणमा कमलेशरण चौधरीसँगै राजेश्वर चौधरी र सन्तकुमार यादवविरुद्ध पनि मुद्दा चलाइएको छ। यादव हाल थुनछेकका लागि रुपन्देही कारागारमा रहेका छन्।

पीडितका अनुसार २०८१ असोज ६ गते भएको घटनामा उनीहरूको संलग्नता रहेको भन्दै किटानी जाहेरी दर्ता गरिएको थियो।

यसअघि पूरक जाहेरीका आधारमा इलाका प्रहरी कार्यालय बुटवलले मुद्दा अघि नबढाएपछि पीडितले अदालतमा रिट दायर गरेकी थिइन्। त्यसपछि अदालतको आदेशअनुसार अनुसन्धान प्रक्रिया अघि बढाइएको हो।

उता, अध्यक्ष चौधरीले भने आफू निर्दोष रहेको दाबी गर्दै कानुनी प्रक्रियामार्फत सत्य बाहिर आउने बताएका छन्।
एक पारिवारिक विवादका कारण आफूलाई योजनाबद्ध रूपमा फसाइएको दाबी गर्दै उनले चरित्रहत्या र ज्यानको जोखिमसमेत रहेको गुनासो गरेका छन्।

‘दोषी ठहरिए सजाय भोग्न तयार छु, तर निर्दोष भए फसाउनेलाई कारबाही हुनुपर्छ,’ उनले भने।

दाङ,१६ चैत । नेपाली बजारमा सोमबार सुनको मूल्य घटेको छ।

नेपाल सुनचाँदी व्यवसायी महासंघका अनुसार सुन प्रतितोला २ हजार ५ सय रुपैयाँले घटेर २ लाख ८३ हजार ५ सय रुपैयाँ कायम भएको छ। अघिल्लो दिन सुन २ लाख ८६ हजार रुपैयाँमा कारोबार भएको थियो।

त्यस्तै, चाँदीको मूल्य पनि घटेको छ। आइतबार प्रतितोला ४ हजार ७२० रुपैयाँ रहेको चाँदी आज ४ हजार ७०० रुपैयाँ कायम गरिएको महासंघले जनाएको छ।

काठमाडौं,१५ चैत । पूर्वप्रधानमन्त्री तथा नेकपा (एमाले)का अध्यक्ष केपी शर्मा ओलीको पक्राउको विरोधमा उत्रिएका प्रदर्शनकारी र प्रहरीबीच बबरमहलमा झडप भएको छ।

काठमाडौं जिल्ला अदालतअगाडि प्रदर्शनकारी र सुरक्षाकर्मीबीच तनाव उत्पन्न भएको हो।

ओलीको पक्राउको विरोध गर्दै अदालतअगाडि जम्मा भएका प्रदर्शनकारीले प्रहरीमाथि ढुंगामुढा प्रहार गरेपछि झडपको स्थिति बनेको प्रहरीले जनाएको छ।
तनाव नियन्त्रणमा लिन प्रहरीले ९ जना प्रदर्शनकारीलाई नियन्त्रणमा लिएको छ भने एक जना घाइते भएका छन्।

घाइतेको अवस्था गम्भीर नरहेको प्रहरीले जनाएको छ।
अदालत क्षेत्रमा थप अप्रिय घटना हुन नदिन सुरक्षा व्यवस्था कडा पारिएको छ।

काठमाडौं,१५ चैत । गृहमन्त्री सुधन गुरुङ निरीक्षणका लागि राष्ट्रिय विपद् जोखिम न्यूनीकरण तथा व्यवस्थापन प्राधिकरण पुगेका छन्।

शुक्रबार पद तथा गोपनीयताको शपथ लिएका गुरुङले गृहमन्त्रालयसँग सम्बन्धित निकायहरू तथा प्रहरी कार्यालयहरूसँग समन्वय बढाउने उद्देश्यले निरीक्षण सुरु गरेका हुन्।