काठमाडौँ,८ फागुन। प्रहरीले स्रोत नखुलेको रकमसहित एकजनालाई पक्राउ गरेको छ । महोत्तरीको मनरा शिसवा नगरपालिका–३ सोनौल बजारबाट स्रोत नखुलेको नगद ११ लाख ५१ हजार ३ सय रुपैयाँसहित एक जनालाई पक्राउ गरेको हो ।
जिल्ला प्रहरी कार्यालय महोत्तरी र प्रहरी चौकी इटहर्वाटकट्टीबाट खटिएको प्रहरी टोलीले सम्सी गाउँपालिका–७ बस्ने गौतम साहलाई बिहीबार दिउँसो नियन्त्रणमा लिएको हो।

पोखरभिण्डाबाट सोनौल बजारतर्फ जाँदै गरेको म।प्र।०२–००९ प १५१७ नम्बरको मोटरसाइकलमा सवार उनलाई जाँच गर्ने क्रममा उक्त रकम फेला परेको प्रहरीले जनाएको छ।

घटनाबारे आवश्यक अनुसन्धान भइरहेको प्रहरीले जानकारी दिएको छ।

दाङ,८ फागुन। नेपाल कम्युनिष्ट पार्टी (एमाले) जिल्ला कमिटी दाङले तुलसीपुर बजार क्षेत्रमा बिहीबार सूर्य चिह्न अंकित झण्डा जलाउँदै गरिएको नाराबाजीप्रति गम्भीर ध्यानाकर्षण भएको जनाएको छ।

जिल्ला अध्यक्ष शिवकुमार आचार्यका अनुसार राष्ट्रिय स्वतन्त्र पार्टीसम्बद्ध व्यक्तिहरूले एमाले अध्यक्ष तथा पूर्वप्रधानमन्त्री केपी शर्मा ओली विरुद्ध अशोभनीय नारा लगाउँदै पार्टीको झण्डा जलाएका हुन्।

एमालेले उक्त गतिविधिलाई लोकतान्त्रिक संस्कार, राजनीतिक शिष्टाचार र विधिको शासनमाथिको प्रहारका रूपमा टिप्पणी गरेको छ। अध्यक्ष आचार्यले अभिव्यक्ति स्वतन्त्रताको अधिकार अराजकता र विद्वेषपूर्ण आचरणका लागि प्रयोग गर्न नमिल्ने स्पष्ट पारेका छन्।

राजनीतिक असहमति विचार, बहस र जनमतमार्फत व्यक्त गर्नुपर्नेमा जोड दिँदै झण्डा जलाउने कार्यले असहिष्णुता र लोकतान्त्रिक मूल्यप्रतिको अनादर झल्काउने दाबी गरिएको छ।

एमालेले आफू राष्ट्रियता, लोकतन्त्र र सामाजिक न्यायका पक्षमा निरन्तर अग्रणी भूमिका निर्वाह गर्दै आएको जनआधारित पार्टी भएको उल्लेख गरेको छ। साथै, राष्ट्रिय स्वतन्त्र पार्टीलाई जिम्मेवार राजनीतिक शक्तिका रूपमा प्रस्तुत हुन आग्रह गर्दै उग्र तथा उत्तेजनात्मक गतिविधिबाट टाढा रहन चेतावनी दिएको छ।

पार्टीले राष्ट्रिय अखण्डता, सार्वभौमिकता, शान्ति–सुरक्षा र सामाजिक सद्भावमा खलल पुग्ने गतिविधिमाथि निगरानी बढाई कानुनी दायरामा ल्याउन सम्बन्धित निकायसँग माग गरेको छ।

काठमाडौं,८ फागुन। नेपाली बजारमा आज सुनको मूल्य स्थिर रहेको छ भने चाँदीको मूल्य सामान्य घटेको छ।

नेपाल सुनचाँदी व्यवसायी महासङ्घका अनुसार शुक्रबार छापावाल सुन तोलाको ३ लाख ४ हजार ७ सय रुपैयाँमा कारोबार भइरहेको छ। उक्त मूल्य बिहीबार पनि कायम रहेको थियो।

यता चाँदीको मूल्य भने तोलामा १० रुपैयाँले घटेको छ। महासङ्घका अनुसार शुक्रबार चाँदी तोलाको ५ हजार ५० रुपैयाँमा कारोबार भइरहेको छ। बिहीबार चाँदी तोलाको ५ हजार ६० रुपैयाँमा कारोबार भएको थियो।

दाङ,८ फागुन । तुलसीपुर को वीरेन्द्र चोक बिहीबार साँझ असामान्य रूपमा व्यस्त देखियो। कारण थियो, राष्ट्रिय स्वतन्त्र पार्टी (रास्वपा) का वरिष्ठ नेता बालेन शाह पहिलो पटक दाङ आउने चर्चा।

झुसमुसे साँझदेखि नै समर्थक र सर्वसाधारण चोक क्षेत्रमा भेला हुन थालेका थिए। बालेन सुर्खेतबाट सल्यानको कालीमाटी हुँदै तुलसीपुर आइपुग्ने सूचनापछि विभिन्न स्थानमा स्वागतको तयारीसमेत गरिएको थियो। पश्चिम दाङको हापुरे बजारसम्म समर्थकहरू प्रतीक्षामा बसेका थिए।

तर लामो प्रतीक्षापछि पनि बालेन नआएपछि भीड निराश हुँदै फर्कियो। पार्टीका अन्य शीर्ष नेताहरू भने तुलसीपुर पुगेका थिए। बालेन अस्वस्थ भई सुर्खेतबाट हवाईमार्ग हुँदै काठमाडौं फर्किएको जानकारी पार्टी स्रोतले दिएको छ।

यसअघि रास्वपाले सुर्खेत मा कर्णाली केन्द्रित सय बुँदे वाचापत्र सार्वजनिक गरेको थियो, जहाँ बालेनले सम्बोधन गरेका थिए।

शुक्रबार घोराही मा लुम्बिनी प्रदेशस्तरीय निर्वाचन लक्षित कार्यक्रम तय गरिएको छ। सो कार्यक्रममा पार्टी सभापति रवि लामिछाने सँगै बालेनको उपस्थिति रहने भनिए पनि उनको सहभागिता अनिश्चित बनेको छ। पार्टीका एक नेताका अनुसार दिउँसोसम्म आइपुग्ने सम्भावना रहे पनि औपचारिक पुष्टि भएको छैन।

यता, वीरेन्द्र चोकमा भेला भएका केही कार्यकर्ताले केपी शर्मा ओली विरुद्ध नाराबाजी गरेका थिए। एमाले पक्षले भने आफ्नो चुनाव चिन्ह अंकित झन्डा जलाइएको आरोप लगाउँदै विरोध जनाएको छ।

बालेनको अनुपस्थितिले तुलसीपुरको राजनीतिक माहोल केही समय उत्साह र प्रतीक्षामै सीमित रह्यो। अब सबैको नजर घोराही कार्यक्रममा उनको उपस्थितिमाथि केन्द्रित भएको छ।

दाङ,७ फागुन। तुलसीपुरमा रहेको सप्तरंगी इंगलिस मिडियम स्कुल (सक्सेस)ले सक्सेस एक्पो तथा विद्यालयको वार्षिकोत्सव कार्यक्रम गरेको छ । विद्यालय व्यवस्थापन समितिका अध्यक्ष ललितजंग शाहको अध्यक्षता तथा वडा नं. ९ का वडा अध्यक्ष घनश्याम ढकालको प्रमुख आतिथ्यतामा कार्यक्रम भएको हो ।

कार्यक्रममा वडा अध्यक्ष ढकालले शिक्षा नीति एउटै नभएसम्म मुलुकको समग्र विकास सम्भव नहुने बताए । विद्यालयप्रति राज्यको दृष्टिकोण नै विभेदपूर्ण रहेको उल्लेख गर्दै उनले सरकारी र निजी विद्यालयबीच फरक व्यवहार गरिँदा शिक्षा क्षेत्रमा असमानता बढेको धारणा राखे ।

सरकारी विद्यालयले राज्यबाट विभिन्न सेवा–सुविधा पाइरहँदा पनि सोचेअनुसारको शैक्षिक उपलब्धि दिन नसकेको अवस्थामा निजी विद्यालयले भने अब्बल शिक्षा दिँदै आएको बताए ।

राज्य उदार बन्ने हो भने सबै विद्यालयलाई समान व्यवहार गर्नुपर्ने उनको भनाइ थियो । उनले निजी विद्यालयले पनि विपन्न परिवारका बालबालिकालाई सहज रूपमा निःशुल्क गुणस्तरीय शिक्षा दिनुपर्ने बताए ।

ढकालले स्थानीय सरकार सरकारी विद्यालयको अवस्थाप्रति पूर्ण रूपमा सन्तुष्ट नरहेको संकेत गर्दै निजी विद्यालयको शिक्षण सिकाइ पद्धति गौरवको विषय बनेको बताए । निजी विद्यालयको सफलताले सरकारी विद्यालयको कमजोरी ढाकिएको उनको भनाइ छ । विद्यालयमा राजनीतिक हस्तक्षेप बढ्दा शिक्षा क्षेत्र धरासायी बन्दै गएको र विद्यालयहरू राजनीतिक अखडा बन्न थालेकोप्रति उनले चिन्ता व्यक्त गरे ।

कार्यक्रममा वक्ताहरूले सक्सेस स्कुलले बालमैत्री शिक्षण विधि अपनाउँदै बालबालिकाको सिप र ज्ञानलाई प्राथमिकतामा राखेको बताएका थिए । किताबी ज्ञानभन्दा व्यवहारिक शिक्षामा जोड दिँदै आएको भन्दै विद्यालयको प्रशंसा गरिएको थियो ।

मावि दोघरेकी प्रधानाध्यापक सुनिता यादवले बालबालिकाको सिर्जनशीलताले विद्यालयको शिक्षण उत्कृष्ट रहेको प्रमाणित गरेको बताइन् । शिक्षक महासंघ बबई गाउँपालिकाका अध्यक्ष मानबहादुर बस्नेतले शिक्षकको मेहनत र अभिभावकको भूमिकाले नै विद्यार्थीको सिर्जनशीलता उजागर हुने बताए ।

विद्यालयले विभिन्न अतिरिक्त क्रियाकलापमार्फत शिक्षा क्षेत्रमा योगदान पुर्‍याउँदै आएको कार्यक्रमका सहभागीहरूको धारणा थियो । कार्यक्रम विद्यालयका सहायक प्रिन्सीपल गोपाल गिरीले सहजीकरण गरेका थिए।

काठमाडौं,७ फागुन। नेपाली कांग्रेसका सभापति गगनकुमार थापाले आगामी पाँच वर्षभित्र मुलुकलाई भ्रष्टाचारमुक्त बनाउने प्रतिबद्धता व्यक्त गरेका छन्। काठमाडौँस्थित राष्ट्रिय सभागृहमा आयोजित ‘हाम्रो प्रतिज्ञा, तपाईँको प्रश्न’ कार्यक्रममार्फत प्रतिज्ञापत्र सार्वजनिक गर्दै सभापति थापाले भ्रष्टाचारमा संलग्न जोसुकैलाई पनि कानुनी दायरामा ल्याइने स्पष्ट पारे।

‘ग्रेसले भ्रष्टाचारविरुद्ध बोल्दा व्यक्तिको नाता, पद वा हैसियत हेर्दैन। उनले भने–‘ सभापति होस् वा कुनै पनि सार्वजनिक पदमा बसेको व्यक्ति यदि भ्रष्टाचार गरेको प्रमाणित भयो भने उसलाई सार्वजनिक पदमा बस्ने अधिकार छैन ।’

थापाले २०४७ सालपछि जुनसुकै दलसँग सम्बन्धित नेतामाथि पनि निष्पक्ष छानबिन गरिने बताए। उनले अबको शासन प्रणाली कार्यालय केन्द्रित नभई नागरिक केन्द्रित हुनुपर्नेमा जोड दिँदै सेवा प्रवाहलाई समयबद्ध बनाउनुपर्ने धारणा राखे।

उनका अनुसार नागरिकले पाउने सेवा कति समयमा सम्पन्न हुन्छ भन्ने स्पष्ट मापदण्ड तोकिनुका साथै तोकिएको समयभित्र सेवा नदिइए क्षतिपूर्ति दिने व्यवस्था गरिनुपर्छ। उनले भने–‘सार्वजनिक सेवामा एक दिनमा काम हुन्छ भनियो भने त्यो एकै दिनमा हुनुपर्छ ।’

सभापति थापाले डिजिटल प्रविधिमा आधारित सार्वजनिक सेवा सातै दिन २४सै घण्टा उपलब्ध गराउने योजना कांग्रेसले अघि सारेको उल्लेख गर्दै ढिलासुस्ती भए नागरिकलाई क्षतिपूर्तिको व्यवस्था गरिने प्रतिबद्धता दोहोर्‍याए।

काठमाडौँ, ७ फागुन । नेपाल कम्युनिष्ट पार्टी (एमाले) ले आगामी निर्वाचनलाई लक्षित गर्दै आफ्नो चुनावी घोषणापत्र सार्वजनिक गरेको छ। काठमाडौँमा आयोजित कार्यक्रममा पार्टी अध्यक्ष केपी शर्मा ओलीले ‘समृद्ध नेपाल, सुखी नेपाली’ को राष्ट्रिय आकांक्षा पूरा गर्ने लक्ष्यसहित ‘एमालेले बनाउँछ’ भन्ने मूल नारामा घोषणापत्र सार्वजनिक गरेका हुन्।

घोषणापत्रमा आगामी पाँच वर्षभित्र मुलुकको अर्थतन्त्रको आकार एक सय खर्ब रुपैयाँ र दस वर्षभित्र दुई सय खर्ब रुपैयाँ पुर्‍याउने महत्वाकांक्षी लक्ष्य उल्लेख गरिएको छ। साथै पाँच वर्षमै प्रतिव्यक्ति आय तीन हजार अमेरिकी डलरसम्म पुर्‍याउने प्रतिबद्धता गरिएको छ।

सरकार गठनलगत्तै कार्यान्वयनमा ल्याइने ११ वटा ‘ग्यारेन्टी कार्यक्रम’ अघि सार्दै एमालेले १८ देखि २८ वर्ष उमेर समूहका युवालाई वार्षिक १० जीबी निःशुल्क डाटा उपलब्ध गराउने योजना सार्वजनिक गरेको छ। स्टार्टअप व्यवसाय सुरु गर्ने युवालाई १० हजार अमेरिकी डलर बराबरको ‘डलर कार्ड’ सुविधा दिने तथा उच्च शिक्षा अध्ययन गर्ने विद्यार्थीलाई २० लाख रुपैयाँसम्म निर्ब्याजी ऋण उपलब्ध गराउने प्रतिबद्धता पनि गरिएको छ।

त्यसैगरी न्यूनतम मासिक पारिश्रमिक २५ हजार रुपैयाँ पुर्‍याउने र वैदेशिक रोजगारीमा रहेका श्रमिकलाई वार्षिक पाँच हजार रुपैयाँ बोनस उपलब्ध गराउने योजना घोषणापत्रमा समेटिएको छ।

पूर्वाधार विकासतर्फ पूर्व–पश्चिम विद्युतीय रेलमार्ग निर्माण, विभिन्न सुरुङ मार्ग विस्तार तथा ठूला सहरमा मेट्रो र मोनोरेल सञ्चालन गर्ने कार्यक्रमलाई पुनः प्राथमिकतासहित अघि सारिएको छ।

घोषणापत्रमा राजनीतिक स्थिरता, सुशासन प्रवर्द्धन र असंलग्न परराष्ट्र नीतिलाई मुख्य प्राथमिकताका रूपमा उल्लेख गर्दै समृद्ध राष्ट्र निर्माणतर्फ केन्द्रित हुने प्रतिबद्धता व्यक्त गरिएको छ।

काठमाडौं,७ फागुन । दक्षिण कोरिया का पूर्वराष्ट्रपति युन सुक येओल लाई मार्सल ल घोषणा गरी संसद् परिसरमा सेना परिचालन गरेको प्रकरणमा अदालतले विद्रोहसम्बन्धी अभियोगमा दोषी ठहर गर्दै आजीवन कारावासको सजाय सुनाएको छ।

सियोल स्थित सियोल सेन्ट्रल डिस्ट्रिक्ट कोर्ट मा बिहीबार भएको सुनुवाइमा उक्त फैसला सुनाइएको हो। यस घटनाले देशको लोकतान्त्रिक व्यवस्थामाथि गम्भीर प्रश्न उठाएको विश्लेषण गरिएको छ।

सन् २०२४ डिसेम्बर ३ मा युनले मार्सल ल घोषणा गर्दै व्यवस्थापिकालाई घेरा हाल्न सेना पठाएका थिए। उक्त कदमलाई दशकौँयताकै सबैभन्दा गम्भीर राजनीतिक सङ्कटको सुरुआतका रूपमा हेरिएको छ। विशेष सरकारी वकिलले उनको कार्यले लोकतन्त्रलाई प्रत्यक्ष खतरा पुर्‍याएको दाबी गर्दै मृत्युदण्डसम्मको माग गरेका थिए।

यद्यपि, दक्षिण कोरियामा सन् १९९७ पछि मृत्युदण्ड कार्यान्वयन नभएकाले त्यसलाई व्यवहारतः स्थगनमा रहेको मानिन्छ।

फैसला सुनाउने दिन अदालत परिसरमा कडा सुरक्षा व्यवस्था गरिएको थियो। सयौँ प्रहरी परिचालन गरिएका थिए। जेल बसमार्फत अदालत ल्याइँदा उनका समर्थकहरूले नारा लगाएका थिए भने आलोचकहरूले कडा सजायको माग गर्दै प्रदर्शन गरेका थिए।

अदालतले पूर्वरक्षामन्त्री किम योङ ह्युन सहित सात जना पूर्वसैनिक तथा प्रहरी अधिकारीमाथि पनि समान प्रकृतिका अभियोगमा फैसला सुनाउने तयारी गरेको जनाएको छ। उनीहरूलाई मार्सल ल कार्यान्वयन प्रक्रियामा संलग्न रहेको आरोप लागेको छ।

रूढीवादी धारका नेता मानिने युनले आफ्नो निर्णयलाई ‘राज्यविरोधी शक्ति’ रोक्न आवश्यक कदम भएको जिकिर गरेका थिए। उनका अनुसार विपक्षी दलहरूले संसद्मा बहुमतको प्रयोग गर्दै उनको कार्ययोजनालाई अवरुद्ध गरिरहेका थिए। तर सांसदहरूको आवश्यक सङ्ख्याले सैनिक घेरा तोड्दै सर्वसम्मतिले आदेश खारेज गरेपछि मार्सल ल करिब छ घण्टामै समाप्त भएको थियो।

संसद्ले महाभियोग प्रस्ताव पारित गरेपछि उनलाई डिसेम्बर १४, २०२४ मा पदबाट निलम्बन गरिएको थियो। त्यसपछि अप्रिल २०२५ मा संवैधानिक अदालतले औपचारिक रूपमा पदमुक्त गरेको थियो।

रोल्पा,७ फागुन ।आगामी फागुन २१ गते हुने प्रतिनिधिसभा निर्वाचनका लागि रोल्पा मा १ हजार ६२२ जना कर्मचारी खटाइने भएका छन्।

मुख्य निर्वाचन अधिकृत विनोद खतिवडाका अनुसार जिल्लाका ८६ मतदान स्थल र १८२ मतदान केन्द्रमा उक्त संख्यामा कर्मचारी परिचालन गरिन लागेको हो। १९ फागुनसम्म सबै मतदान केन्द्रमा कर्मचारी पुगिसक्ने मुख्य निर्वाचन अधिकृतको कार्यालय, रोल्पा ले जनाएको छ।

१८० मतदान केन्द्रमा ९ जनाका दरले तथा अस्थायी मतदान केन्द्रमा २ जनाका दरले कर्मचारी खटाइनेछ। प्रत्येक मतदान केन्द्रमा एक जना मतदान अधिकृत, एक जना सहायक मतदान अधिकृत, ३ जना सहायक कर्मचारी, ३ जना स्वयंसेवक र एक जना कार्यालय सहयोगी रहने व्यवस्था गरिएको छ।

अस्थायी मतदान केन्द्रमा भने एक जना मतदान अधिकृत र एक जना सहायक मतदान अधिकृत गरी २ जना मात्र कर्मचारी रहने बताइएको छ। जिल्ला जनशक्ति व्यवस्थापन समितिबाट छनोट गरिएका १ हजार ६२२ कर्मचारीलाई मतदान केन्द्रमा खटाइने भएको हो।

कर्मचारी विवरणअनुसार २४ जना महिला मतदान अधिकृत र ३६ जना महिला सहायक मतदान अधिकृत रहेका छन्। त्यस्तै १९३ जना महिला सहायक कर्मचारी तथा ६८ जना महिला सहयोगी कर्मचारी छन्।
पुरुषतर्फ १५८ जना मतदान अधिकृत, १४६ जना सहायक मतदान अधिकृत, ३४७ जना सहायक कर्मचारी र ११४ जना सहयोगी कर्मचारी रहेका छन्।

महिला र पुरुष गरी मतदान अधिकृत १८२, सहायक मतदान अधिकृत १८२, सहायक कर्मचारी ५४०, सहयोगी कर्मचारी १८२ र स्वयंसेवक ५३८ जना गरी कुल १ हजार ६२२ जना परिचालन गरिने मुख्य निर्वाचन अधिकृत खतिवडाले जानकारी दिए।

५०० भन्दा कम मतदाता भएका केन्द्रमा २ जना र ५०० भन्दा बढी मतदाता भएका केन्द्रमा ३ जना स्वयंसेवक नियुक्त गरिनेछ।

‘पारदर्शी हिसाबले कर्मचारी खटाइने काम हुनेछ,’ खतिवडाले भने, ‘निर्वाचनलाई मर्यादित र शान्तिपूर्ण वातावरणमा सम्पन्न गर्न आवश्यक निर्देशन जारी गरिनेछ।’

निर्वाचनमा खटिने कर्मचारीलाई एक–दुई दिनभित्र तालिम प्रदान गर्ने तयारी रहेको जनाइएको छ। कर्मचारीको विवरण जिल्ला प्रशासन कार्यालय, रोल्पा मा पठाइसकिएको प्रमुख जिल्ला अधिकारी गंगा बहादुर क्षेत्रीले बताए। कुन कर्मचारीलाई कहाँ खटाउने भन्ने विषयमा छलफल भइरहेको र तालिमपछि मात्र अन्तिम टुंगो लाग्ने उनले जानकारी दिए।

१८२ मतदान केन्द्रमध्ये समानुपातिक मतदानका लागि एक केन्द्र कारागार कार्यालय, लिवाङ रोल्पा र अर्को जिल्ला समन्वय समिति कार्यालय, लिवाङ रोल्पा मा रहने समेत जनाइएको छ।

काठमाडौ,७ फागुन । अमेरिकाको क्यालिफोर्निया राज्यस्थित सिएरा नेभाडा पर्वत शृंखलामा मंगलबार आएको हिमपहिरोमा १५ जनाको समूह फसेको छ। उक्त समूह ब्ल्याकबर्ड माउन्टेन गाइड्स कम्पनीसँग तीन दिने गाइडेड यात्रामा निस्किएको थियो। दिउँसो करिब ११ः३० बजे आएको हिमपहिरोले उनीहरूलाई चपेटामा पारेको हो।

अधिकारीहरूका अनुसार घटनामा ८ जनाको मृत्यु भएको छ भने १ जना अझै बेपत्ता रहेका छन्, जसलाई मृत मानिएको छ। नेभाडा काउन्टी शेरिफ कार्यालय का शेरिफ श्यानन मुनले बुधबार पत्रकार सम्मेलनमार्फत उक्त जानकारी दिएका हुन्। मृतकमध्ये कम्पनीका तीन जना गाइड पनि रहेका छन्। कुल मृत र बेपत्ता व्यक्तिमध्ये सात महिला र दुई पुरुष रहेका छन्।

मंगलबार साँझ ६ जनालाई सकुशल उद्धार गरिएको थियो। यो अमेरिका मा पछिल्लो ४५ वर्षयताकै सबैभन्दा घातक हिमपहिरो दुर्घटना मानिएको छ। यसअघि सन् १९८१ मा माउन्ट रेनियर (वाशिङ्टन) मा भएको हिमपहिरोमा ११ जनाको ज्यान गएको थियो।

दुर्घटनाका बेला क्षेत्रमा भारी हिमपात भइरहेको थियो। पछिल्लो ३६ घण्टामा २ देखि ३ फिटसम्म नयाँ हिउँ परेको थियो भने प्रतिघण्टा २–४ इन्चसम्म हिउँ झरिरहेको थियो। तीव्र हावाका कारण ‘ह्वाइटआउट’ अवस्था सिर्जना भएको थियो, जसका कारण हेलिकप्टर उडान सम्भव भएन र स्थलमार्गबाट उद्धार कार्यमा समेत कठिनाइ भएको थियो।

सिएरा एभालाञ्च सेन्टर ले यसअघि नै उच्च हिमपहिरो जोखिमको चेतावनी जारी गर्दै यात्रा नगर्न सल्लाह दिएको थियो। मृतकहरूको शव हिउँमुनि दबिएको अवस्थामा रहेको र मौसम खुलिएपछि निकालिने जनाइएको छ। पोस्टमार्टमपछि शव परिवारलाई जिम्मा लगाइनेछ।

शेरिफका अनुसार यति खतरनाक अवस्थामा समूहलाई किन पठाइयो भन्ने विषयमा कम्पनीको निर्णयमाथि अनुसन्धान भइरहेको छ। दुर्घटना डोनर पास नजिक, लेक ताहो को उत्तर–पश्चिम क्षेत्रमा भएको हो, जहाँ इन्टरस्टेट ८० राजमार्गसमेत बन्द गरिएको थियो।