दाङ,२ असार । स्थानीय कथावस्तु र कलाकारलाई प्राथमिकता दिँदै दाङ र रोल्पामा छायांकन गरिएका दुई नेपाली चलचित्र दाङमै प्रदर्शन हुने भएका छन्। यसलाई स्थानीय फिल्म उद्योगको प्रवर्द्धनतर्फको सकारात्मक कदमका रूपमा हेरिएको छ।

ब्ल्याक सुल्पा प्रोडक्सन प्रालिले निर्माण गरेका ‘इहिरी द हन्टर’ र ‘द रिच्युअल’ नामक चलचित्रहरू असार ५ गतेदेखि १२ गतेसम्म घोराहीस्थित होटल डोकोको माइक्रो सिनेमामा प्रदर्शन गरिने निर्माता तथा निर्देशक उज्वल अधिकारीले जानकारी दिएका हुन् । दुवै चलचित्र दैनिक बेलुका ५ बजेदेखि ७ बजेसम्म प्रदर्शन गरिनेछ।

मंगलबार तुलसीपुरमा आयोजित पत्रकार भेटघाट कार्यक्रममा निर्देशक अधिकारीले स्थानीय परिवेश, संस्कृति र कथालाई केन्द्रमा राखेर चलचित्र निर्माण गरिएको बताउनुभयो। उनका अनुसार, चलचित्रमार्फत स्थानीय स्रोत, साधन र प्रतिभालाई उजागर गर्ने प्रयास गरिएको छ।

चलचित्रमा अभिनय गर्न इच्छुक स्थानीय कलाकारलाई अवसर दिइएको उल्लेख गर्दै उनले यसले नयाँ प्रतिभा उत्पादनमा सहयोग पुग्ने विश्वास व्यक्त गरे। “स्थानीय कथा र कलाकारलाई प्राथमिकता दिनु नै हाम्रो मुख्य उद्देश्य हो,” उनले भने।

चलचित्र पत्रकार संघ दाङ शाखाका अध्यक्ष निरला अर्यालले चलचित्रले मनोरञ्जनसँगै भाषा, कला र संस्कृतिको संरक्षणमा महत्वपूर्ण भूमिका खेल्ने बताईन। उनले स्थानीय स्तरमै चलचित्र निर्माण र प्रदर्शन हुनु सकारात्मक संकेत भएको उल्लेख गरिन ।

त्यस्तै, नेपाल पत्रकार महासंघ दाङका उपाध्यक्ष ओपेन्द्र बस्नेतले स्थानीय रीतिरिवाज र संस्कारले समाजलाई अनुशासित बनाउने बताउँदै त्यस्ता विषयवस्तु चलचित्रमा समेटिनु आवश्यक रहेको बताएका थिए।

कार्यक्रममा पत्रकार तथा सञ्चारकर्मीहरूले चलचित्रको कथावस्तु र छायांकन स्थलका विषयमा जिज्ञासा राखेका थिए। कलाकार विशाल रोका मगर र निशा घर्ती मगरले दर्शकलाई चलचित्र हेर्न आग्रह गरेका छन् ।

संघका सल्लाहकार शरद रेग्मीको स्वागत मन्तव्यबाट सुरु भएको कार्यक्रमको सहजीकरण सदस्य रुपा थापाले गरेकी थिईन।

✍️दर्शन आचार्य। दैनिक व्यस्तता, कामको चाप र एकै ठाउँको जीवनशैलीबाट केही समय टाढा जान मन थियो। प्रकृतिसँग नजिक हुने, नयाँ ठाउँ देख्ने र जीवनमा नयाँ अनुभव बटुल्ने चाहना धेरै दिनदेखि मनमा थियो। त्यसै क्रममा साथीहरूसँगको कुराकानीमा अचानक रारा जाने योजना बन्यो। सुरुमा केवल सामान्य घुमघामको सोच थियो, तर विस्तारै त्यो योजना रोमाञ्चक यात्रामा परिणत भयो। सबैको समय मिलाउँदै, आवश्यक तयारी गरेर अन्ततः हामीले रारासम्मको अविस्मरणीय यात्राको यात्रा सुरु गर्यौं।
यस यात्रामा हामी न्याय तथा अन्य सेवा पाँच जनाको टिम थियो । बसन्तराज जोशी, नीलकण्ठ ढकाल, समिला अर्याल, हेमा सिंह र म, दर्शन आचार्य।

काठमाडौँबाट आउनुभएका नीलकण्ठ ढकाल, समिला अर्याल र हेमा सिंहसँग मेरो भेट कोहलपुरमा भयो। बिहानै दाङबाट निस्किएर म कोहलपुर पुगेँ र त्यहीँ उहारूलाई कुरेँ। केही समयपछि उहाहरू आइपुगेपछि हामी सबै एउटै गाडीमा सवार भई सुर्खेततर्फ लाग्यौं।
सुर्खेत पुगेपछि हामी सर बसन्तराज जोशीज्यूको निवासमा गयौं। त्यहाँ आत्मीय स्वागतसँगै सँगै बसेर खाना खायौं। त्यसपछि केही आराम, आवश्यक तयारी र यात्राको सल्लाह–परामर्श गर्दै अन्ततः हाम्रो रारा यात्राको औपचारिक सुरुवात भयो।
पहिलो दिन: दाङबाट सुर्खेत हुँदै कालिकोट
बिहान ठीक ५ बजे म दाङबाट कोहलपुरतर्फ यात्रा सुरु गरें। कोहलपुर पुगेर काठमाडौंबाट आउँदै गरेका तीन जना साथीहरूलाई भेटि  उहाँहरू आएको गाडीमै कोहलपुरबाट चढेर सँगै सुर्खेततर्फ लाग्यौं। सुर्खेत पुगेर वसन्त जोशी सरको अपार्टमेन्टमा गयौं र त्यहाँ स्वादिलो खाना खायौं।
दिउँसो करिब २ बजे केही फलफूल र ड्राइ फुड किनेर रारा यात्राको औपचारिक सुरुवात गरियो। सुर्खेतबाट दैलेख हुँदै कालिकोटतर्फ लाग्दा बाटो निकै रोमाञ्चक र चुनौतीपूर्ण थियो। राति करिब १० बजे माङ्मा बजारमा खाना खायौं र त्यसपछि नाङ्मा बजार पुगेर बास बस्यौं।
दोस्रो दिन: कालिकोटदेखि रारा ताल:-
बिहान उठेर चिया पिएपछि यात्रा पुनः सुरु भयो। खस सभ्यताको उद्गमस्थल सिँजा उपत्यका को मनमोहक दृश्य अवलोकन गर्दै मुगुको रारातर्फ लाग्यौं। दिउँसो करिब २ बजे रारा राष्ट्रिय निकुञ्ज को चेकपोस्टमा पुगेर गाडी पार्क गर्यौं र पैदल यात्रा सुरु गरियो।
हिउँले ढाकिएको चौर, जंगल र घुमाउरो बाटो हुँदै करिब ४५ मिनेटको रमाइलो हिँडाइपछि रारा ताल पुग्यौं। करिब ३ बजे पुगेका हामीले २ घण्टा ताल वरिपरि बितायौं। नीलो, स्वच्छ पानीले भरिएको विशाल ताल देख्दा मन अत्यन्तै प्रफुल्लित भयो।

राराबाट मुर्माटपको रोमाञ्चक यात्रा
साँझपख हामीले मुर्माटपमा बास बस्ने निर्णय गर्यौं। तालको दक्षिण किनार हुँदै पश्चिमतर्फ लाग्यौं। करिब १ घण्टाको हिँडाइपछि रारा लेकसाइड रिसोर्ट (रारा इको रिसोर्ट) पुग्यौं। त्यहाँ चिया–नास्ता गरेर झोलाहरू घोडामार्फत पठाइयो र हामी पदयात्रा गर्दै अगाडि बढ्यौं।
साँझ करिब ६ बजे सुरु भएको यात्रा बिस्तारै अँध्यारोमा परिणत भयो। जंगलको बीचबाट जाने बाटो, कतै पातलो बस्ती, मोबाइलको मधुरो फ्ल्यासलाइटको उज्यालो—सबै कुरा एकदमै रोमाञ्चक तर डर लाग्दो पनि थियो। स्याल कराएको आवाज, कतै हिउँ जमेर चिप्लो भएको बाटो, उकालो–ओरालो पार गर्दै करिब ९ बजे हामी मुर्माटप नजिकको रिसोर्टमा पुग्यौं (करिब ३८०० मिटर उचाइ)।
त्यहाँ तातो पानीले स्वागत गरियो। केही बेरपछि मार्सीको भात, सिमीको दाल र सागको तरकारीसहितको स्वादिलो खाना खायौं। खाना खाएपछि केही बेर राराको रात्री दृश्य हेरेर सुत्यौं।
मुर्माटपको त्यो कठोर  रात:-
मुर्माटप मा बिताएको रात निकै कठिन रह्यो। करिब ४००० मिटर उचाइमा भएको कारण सास फेर्न अलि गाह्रो भयो, चिसो झन् सहनै नसक्ने खालको थियो। रातभरि हावाको सुइँसुइँ आवाज र चिसोले राम्ररी निद्रा पनि परेन।
तेस्रो दिन: मुर्माटपबाट सुन्दर बिहान र अद्भुत दृश्य:-
बिहान उठ्दा झन् अचम्म लाग्यो—बाहिर राखिएको पानी सबै जमेर बरफ भइसकेको थियो। हात धुन त परै जाओस्, अनुहार धुन पनि सम्भव थिएन। चिसोले शरीर कडा भएको महसुस भइरहेको थियो। त्यो बिहानले जीवनमा पहिलो पटक यति कठोर हिमाली चिसोको वास्तविक अनुभव गरायो।
तर यति कठिनाइका बीच पनि जब वरिपरि हेरेँ—हिउँले छोएका डाँडाहरू, चिसो हावासँगै सुनौलो घाम उदाउँदै गरेको दृश्य अनि त्यहाँबाट रारा ताल हेर्दा हल्का जमेको जस्तो देखिने मनमोहक दृश्य देखियो। उदाउँदै गरेको घामले ताल झन् सुन्दर देखिन्थ्यो।
त्यसपछि हामी उकालो चढेर करिब ४००० मिटर उचाइमा रहेको रेडियो नेपाल एफएम रिले स्टेशन मुर्माटप पुग्यौं। त्यहाँबाट हेर्दा रारा तालले मनलाई यहीँ बस्न भनिरहेको जस्तो लाग्थ्यो। टाढा देखिने सैपाल हिमाल लगायत अन्य हिमश्रृंखलाको दृश्यले मन मोहित बनायो।
रारामा रमाइलो र फर्कने यात्रा:-
मुर्माटपबाट फर्केर रिसोर्टमा चिया पिएपछि हामी रारा ताल मा डुंगा सयर गर्यौं। करिब ४५ मिनेटको यात्रामा तालको बीचबाट वारपार गर्दा स्वच्छ र निर्मल पानीको सौन्दर्यले मन लोभ्यायो।
केही समय घोडा चढ्यौं, घुम्यौं, फोटो खिच्यौं र त्यसपछि फर्किने निर्णय गर्यौं। फर्किने क्रममा जुम्लाको तातोपानी मा बेलुकाको खाना खायौं र सदरमुकाम खलंगामा बास बस्यौं।
चौथो दिन: जुम्लाबाट सुर्खेत:-
बिहान उठेर जुम्लाको चन्दननाथ मन्दिरको दर्शन गर्यौं। बजार घुमेर फर्किंदै दैलेखमा पेट्रोलियम उत्खनन भइरहेको स्थान अवलोकन गर्यौं। त्यसपछि ज्वालामाई मन्दिर को दर्शन गरी सुर्खेत फर्कियौं।
पाँचौं दिन: सुर्खेत घुमघाम र घर फर्किने यात्रा
अन्तिम दिन सुर्खेतका प्रमुख धार्मिक तथा पर्यटकीय स्थलहरू देउती बजै मन्दिर, लाटीकोइली मन्दिर, बुलबुले ताल, काक्रेविहार अवलोकन गरियो। दिउँसो खाना खाएर मनमा अविस्मरणीय सम्झनाहरू बोकेर घरतर्फ फर्कियौं।

निष्कर्ष
यो यात्रा केवल दाङदेखि रारा पुग्ने यात्रा मात्र होइन, प्रकृतिसँगको गहिरो सम्बन्ध, साहस, चुनौती र आनन्दको संगम थियो। मुर्माटप को कठोर चिसोदेखि रारा ताल को शान्त सौन्दर्यसम्म – हरेक क्षण जीवनभर सम्झन लायक बन्यो।
यस यात्राले एउटा कुरा सिकायो—जीवनको वास्तविक आनन्द सुविधा होइन, अनुभवमा लुकेको हुन्छ। कहिलेकाहीँ कठिन बाटो हिँड्नुपर्छ, तर त्यही बाटोले सबैभन्दा सुन्दर गन्तव्य देखाउँछ।

रुकुम पूर्व,२२ फागुन । पुष्पकमल दाहाल प्रतिनिधि सभा सदस्यमा रुकुम पूर्वबाट विजयी भएका छन् । नेपाल कम्युनिस्ट पार्टी का संयोजक दाहालले १० हजार २ सय ४० मत प्राप्त गर्दै जीत हासिल गरेका हुन् ।

उनका निकटतम प्रतिद्वन्द्वी लिलामणी गौतम ले ३ हजार ४ सय ६२ मत प्राप्त गरेका छन् भने नेपाली कांग्रेस की उम्मेदवार कुशुमदेवी थापाले ३ हजार ८१ मत प्राप्त गरेकी छन् ।

त्यसैगरी राष्ट्रिय स्वतन्त्र पार्टी का लखन कुमार थापाले ८१९ मत प्राप्त गरेका छन् । प्रगतिशील लोकतान्त्रिक पार्टीका सन्दीप पुन ले २०३ मत प्राप्त गरेका छन् ।

यसैगरी नेपाल कम्युनिस्ट पार्टी (माओवादी केन्द्र) का जुद्धबहादुर बुढाले १९१ मत ल्याउँदा जनमोर्चाका चन्द्रबहादुर शाहीले ३२ मत प्राप्त गरेका छन् ।

पूर्वप्रधानमन्त्रीसमेत रहेका दाहाल माओवादी द्वन्द्वको आधार इलाका मानिने रुकुममा जित सुनिश्चित गर्न चुनावी अभियानका क्रममा यहाँ सक्रिय रहेका थिए । २०६४ साल यता उनले रोल्पा, काठमाडौं, सिराहा, चितवन र गोरखाबाट चुनाव लडिसकेका छन् ।
रुकुम पूर्वमा कुल ३४ हजार ७ सय ७२ मतदाता रहेकामा ५५.१८ प्रतिशत अर्थात् १९ हजार १ सय ८८ मत खसेको थियो । जसमा ९ हजार २४ पुरुष र १० हजार १ सय ६४ महिलाले मतदान गरेका थिए । तीन गाउँपालिका र ३१ वडा रहेको रुकुम पूर्वमा यसपटकको निर्वाचन सम्पन्न भएको हो ।

दाङ,९ माघ। आगामी फागुन १ गते देखि देशब्यापी प्रदर्शनमा आउन थालेको नेपाली चलचित्र ‘विगुल’ को प्रमोशनका लागि निर्माण पक्ष देशदौडाहमा छ ।

चलचित्रका निर्माता तथा लेखक दिनेश कोइराला, निर्देशक रमेश कोइराला लगाएत कलाकार सहितको टोली प्रमोशनका लागि देशदौडाहमा निस्कीएको हो । पूर्व मोरङ देखि प्रमोशन यात्रा तय गरेको चलचित्रको टोली शुक्रबार दाङ आइपुगेको छ ।

अहिले सम्म  दर्जन बढि शहरहरुमा यसको प्रमोशन गरिसकिएको छ । शुक्रबार निर्माणपक्षले दाङमा चलचित्रका बारेमा औपचारिक कार्यक्रम गरेर जानकारी गराएको छ । चलचित्र निर्माणपक्षले यो चलचित्रलाई गत भदौ २३ गते भएको जेनजी आन्दोलन प्रति समर्पित चलचित्र भनेको छ ।

कार्यक्रममा बोल्दै निर्माता कोइरालाले भने ‘यसको कथा वस्तु देश परिवर्तनका लागि हरेक पक्षबाट खेलिनु पर्ने भूमिकालाई सुक्ष्म रुपमा देखाइएको छ, मूलतः यो चलचित्रको कथावस्तु गत भदौ २३ को जेनजी आन्दोलनको मर्म र म्याण्डेटसंग मिलेको छ, फलतः हामीले यो चलचित्रलाई जेनजी आन्दोलन प्रति समर्पित चलचित्र भनेका छौँ ।’

उनका अनुुसार चलचित्रले राजनीति वा राज्यका शाशकका कारण परिवार, समाज तथा सिंगो देशमा पारिरहेको प्रभावलाई उजागर गरिदिएको छ । राज्यका शाशकले गल्ती गर्दा परिवार, समाज तथा सिंगो देशमा परिरहेको नकारात्मक प्रभावलाइ चलचित्रका माध्यमबाट सुक्ष्म रुपमा देखाउन खोजिएको निर्माता कोइरालाले जानकारी दिए ।

साथै यस्तो नकारात्मक प्रभावबाट मुलुकलाई जोगाउनका लागि युवाहरुको भूमिका कस्तो हुनुपर्छ भन्ने सन्देश समेत चलचित्रका माध्यमबाट आफूले दोखाउन खोजेको कोइरालाले जानकारी दिए ।

‘राज्यले गल्ती गर्दा मुलुकले बेहोर्नु पर्ने असर कस्तो हुन्छ ? भनेर हामीले चलचित्रको कथा मार्फत प्रस्तुत गर्न खोजेका छौँ,’ निर्माता कोइरालाले भने ‘साथै यसको समाधानका लागि युवा, महिलाहरुको भूमिका कस्तो हुनुपर्छ भन्ने सन्देश समेत चलचित्रले दिएको छ ।’

नायक नरेन्द्र खड्का र नायिका बेनिशा हमालको मूख्य भूमिका रहेको यो चलचित्रमा निर शाह, विनोद न्यौपाने,रमेश बुढाथोकी, सरोज खनाल,हेमन्त बुढाथोकी,शिशिर वाङ्देल लगाएतका कलाकारहरुको भूमिका रहेको छ ।

रमेश कोइरालाद्धारा निर्देशित यो चलचित्रमा मिरा पण्डित र मानु श्री शर्माले डेब्यू गरेका छन् । चलचित्रको कथा निर्माता दिनेश कोइरालाले लेखेका हुन् । गत वैशाख र जेठ महिनामा छायांकन गरिएको यो चलचित्रले बाबु छोरीको कथाबाट सुरु भएको विगुल राष्ट्रिय हीतका लागि सन्देश दिएर टुंगिने निर्देशक रमेश कोइरालाले जानकारी दिए ।

प्रमोशन कार्यक्रममा बोल्दै प्रमुख अतिथी नेपाल पत्रकार महासंघका निवर्तमान केन्द्रीय अध्यक्ष विपुल पोख्रेलले दिनेश कोइरालाको ब्यक्तिगत पृष्ठभूमि बारे आफू जानकार भएको र उनले चलचित्रको कथा लेखन वास्तवीकतामा आधारित भएको बिश्वास व्यक्त गरे ।

समाज सुधार तथा राजनीतिक सुधारका निम्ती कोइरालाले खेलेको भूमिका बारे आफू जानकार रहेको भन्दै पोख्रेलले कोइरालाको त्यहि चाहना र भूमिका चलचित्रमा देख्न पाइनेमा आफू बिश्वस्त रहेको वताए ।

कार्यक्रम त्रिभुवननगर जेसिजको समन्वयमा भएको थियो । विभिन्न विधाका जानकारहरुको सहभागीतामा गरिएको प्रमोशन कार्यक्रममा निर्माता दिनेश कोइराला, निर्देशन रमेश कोइराला, नायक नरेन्द्र खड्का लगाएत सहभागी थिए । 

दर्शन आचार्य । दाङ । देशभर आजकाल सांस्कृतिक, व्यापारिक तथा प्रविधि, कृषि महोत्सव र रमाइलो मेला को संख्या उल्लेख्य रूपमा बढेको छ। उद्देश्यका रूपमा संस्कृति संरक्षण, कृषि प्रवर्द्धन, प्रविधि हस्तान्तरण र मनोरञ्जनको नाम लिइन्छ। तर यथार्थमा यी महोत्सवहरू क्रमशः ठेकेदार–केन्द्रित, नाफामुखी र उद्देश्यविहीन बन्दै गएका छन्।
कागजमा मूल आयोजक समिति देखिन्छ, तर व्यवहारमा मेला लगाउनेदेखि स्टल बिक्री, टिकट उठाउने, कलाकार छान्ने र कार्यक्रम निर्धारण गर्ने अधिकार ठेकेदारको हातमा पुगेको छ। मूल समिति उद्घाटन–समापनमा सीमित हुँदा, लाखौँ–करोडौँको कारोबार हुने महोत्सवको हिसाब–किताब आफैं गर्न नसक्ने अवस्था गम्भीर प्रश्न बनेको छ। आम्दानी कति भयो, कहाँ खर्च भयो भन्ने कुरा अस्पष्ट रहँदा उत्तरदायित्व कसले लिने भन्ने प्रश्न स्वाभाविक रूपमा उठ्छ।
यस्तै, उद्देश्यभन्दा आम्दानी हाबी हुँदा महोत्सवको स्वरूप पनि विकृत बन्दै गएको छ। कृषि महोत्सवमा किसानभन्दा व्यापारी हाबी, विज्ञान तथा प्रविधि महोत्सवमा प्रयोगात्मक ज्ञानभन्दा ब्रान्ड प्रचार प्रमुख, र सांस्कृतिक महोत्सवमा मौलिक लोककला भन्दा स्टेज शो र सेलिब्रिटी प्रदर्शन केन्द्रमा पुगेको देखिन्छ। रमाइलो मेला त झनै शुद्ध मनोरञ्जन र नाफाको थलोमा सीमित हुँदै गएको छ।
यसै क्रममा सबैभन्दा चिन्ताजनक पक्ष भनेको मनोरञ्जनको नाममा बढ्दो छाडापन हो। जलपरी, माछा–माछाको भड्किलो पहिरनमा महिलालाई एक्वेरियमजस्तो संरचनाभित्र राखेर नचाइने, उत्ताउला हाउभाउ र उच्छृङ्खल प्रस्तुति दिने कलाकारलाई मुख्य स्टेजमा उतारिने क्रम सामान्य जस्तै बन्न थालेको छ। यसलाई आधुनिकता र कला भनेर ढाकछोप गरिए पनि यो हाम्रो लोकसंस्कृति र सामाजिक मर्यादामाथिको गम्भीर आघात हो।
लोकगीत, लोकनृत्य र परम्परागत पहिचान बोकेका कार्यक्रम हुनुपर्ने महोत्सवहरूमा आज अर्धनग्नता, उत्तेजक नृत्य र भड्किलो प्रदर्शन नै आकर्षणको केन्द्र बन्न थालेको छ। संस्कृति संरक्षणका नाममा आयोजना गरिने महोत्सवमै संस्कृति विकृत रूपमा प्रस्तुत हुनु विडम्बना मात्र होइन, चिन्ताको विषय पनि हो। सार्वजनिक स्थानमा आयोजना हुने यस्ता कार्यक्रम परिवार, बालबालिका र विद्यार्थीका लागि हेर्न नमिल्ने अवस्थामा पुग्नु सामाजिक रूपमा खतरनाक संकेत हो।
यसले केवल सांस्कृतिक मूल्यलाई कमजोर बनाएको छैन, मानव शरीरलाई वस्तुकरण गर्ने प्रवृत्तिलाई पनि प्रोत्साहन गरिरहेको छ। भीड तान्ने नाममा छाडापन बेच्ने सोचले समाजमा गलत सन्देश फैलाउँदैछ।
अब प्रश्न उठ्नैपर्ने समय आइसकेको छ :- के यही हो हाम्रो संस्कृति? के यही हो कृषि, व्यापारिक ज्ञान विज्ञा विज्ञान र सांस्कृतिक महोत्सवको उद्देश्य?
महोत्सव आफैंमा गलत होइनन्। मनोरञ्जन आवश्यक छ, आधुनिकता पनि आवश्यक छ। तर त्यो मर्यादा, पहिचान र सामाजिक उत्तरदायित्वभित्र हुनुपर्छ। ठेकेदारको नाफा र भीडको लोभमा यदि मूल उद्देश्य नै बिर्सिइयो भने, महोत्सव विकास र चेतनाको माध्यम होइन, विकृतिको प्रदर्शनस्थल बन्नेछ।
अब मूल आयोजक समिति, स्थानीय सरकार र समाज सबैले यसको जिम्मेवारी लिनैपर्छ। हिसाब–किताब सार्वजनिक हुनुपर्छ।
स्थानीय कलाकार, किसान र नवप्रवर्तनलाई प्राथमिकता दिनुपर्छ। र सबैभन्दा महत्त्वपूर्ण कुरा संस्कृति जोगाउने नाममा संस्कृति नबेचियोस्। महोत्सव विकासको साधन हुनुपर्छ, छाडापन र ठेक्काको व्यापार होइन।

दाङ ,१७ पुस । प्रथम तुलसीपुर महोत्सव–२०८२ अन्तर्गत आज नेपाली चलचित्र क्षेत्रका चर्चित अभिनेता पल शाहको विशेष प्रस्तुति रहने भएको छ।

पुस ४ गतेदेखि सञ्चालन हुँदै आएको महोत्सवमा आज पल शाहको आगमनसँगै दर्शकको उल्लेख्य सहभागिता रहने अपेक्षा आयोजकले गरेका छन्। नेपाली चलचित्र क्षेत्रमा लोकप्रिय अभिनेता पल शाह आज साँझ मुख्य आकर्षणका रूपमा मञ्चमा उत्रिने कार्यक्रम तय भएको छ।

महोत्सव अवधिभर सञ्चालन भइरहेका सांस्कृतिक कार्यक्रम, लाइभ कन्सर्ट, लोकदोहोरी, नृत्य तथा मोडलिङ प्रस्तुतिहरूले दर्शकलाई निरन्तर मनोरञ्जन प्रदान गर्दै आएका छन्।

आजको कार्यक्रममा गायिका सम्झना भण्डारी, गायक टंक खड्का र प्रकाश रेग्मी लगायतका कलाकारहरूको पनि प्रस्तुति रहने आयोजकले जनाएको छ।

यस्तै, मोडल नारायणी खत्री र आशा वि.क.को विशेष प्रस्तुति रहनेछ भने कार्यक्रम सञ्चालन दिपु मगर र सात्तराम सेन्चुरीले गर्नेछन्।

नेपाल घरेलु तथा साना उद्योग महासङ्घ तुलसीपुर, दाङको आयोजनामा सञ्चालन भइरहेको महोत्सवमा स्थानीय उत्पादनको प्रवर्द्धन, उद्योग व्यवसायको विकास तथा सांस्कृतिक पहिचानलाई प्राथमिकता दिइएको छ।

महोत्सव पुस १९ गतेसम्म चल्नेछ। महोत्सव स्थल तुलसीपुर–६ घोराही रोडस्थित खुल्ला मैदानमा रहेको छ। आयोजकले आजको कार्यक्रम सफल बनाउन दर्शक तथा शुभेच्छुकलाई आग्रह गरेका छन्।

दाङ,१६ पुस । यतिबेला दाङको तुलसीपुरमा प्रथम तुलसीपुर महोत्सव २०८२ जारी रहेको छ। स्थानीय उत्पादनको प्रवर्द्धन, घरेलु तथा साना उद्योगको विकास तथा औद्योगिक वातावरणको सुधार गर्दै दिगो अर्थतन्त्रको आधार निर्माण गर्ने उद्देश्यका साथ सञ्चालन भइरहेको महोत्सवमा प्रत्येक दिन सांस्कृतिक तथा मनोरञ्जनात्मक कार्यक्रमहरू सञ्चालन हुँदै आइरहेका छन्। दैनिक जसो राष्ट्रिय तथा स्थानीय कलाकारहरूको प्रस्तुति रहँदै आएको छ । सोही अन्तर्गत आज पनि राष्ट्रिय तथा स्थानीय कलाकारहरूको बेजोट प्रस्तुति रहने मूल आयोजक समितिले जनाएको छ।

आयोजकका अनुसार आजको कार्यक्रमको मुख्य आकर्षणका रूपमा चर्चित गायिका ज्योति मगर र सम्झना रणपालको विशेष सांगीतिक प्रस्तुति रहनेछ। यस्तै, गायक कमल बि.सी. (माल्दाइ) ले आफ्ना लोकप्रिय लोक तथा आधुनिक गीतहरू प्रस्तुत गर्दै दर्शकलाई झुमाउनेछन्।

कार्यक्रममा कलाकार आरूषी मगर, चाहना झाँक्री र चिरञ्जीवी डाँगीको आकर्षक प्रस्तुति रहनेछ।

नृत्यतर्फ सोनी डान्स ग्रुप सहित प्राकृतिक कला केन्द्र, दोभान कला केन्द्र, The Dance Hub, Kaizan Dance Academy र RN Dance Studioका नृत्य समूहहरूले सामूहिक नृत्य प्रस्तुत गर्दै महोत्सवको मञ्चलाई थप रंगीन बनाउने आयोजकले जनाएको छ साथै कार्यक्रमको उद्घोषण सान्तराम सेन्चुरीले गर्नेछन्।

महोत्सवमा लोकदोहोरी, सामूहिक लोकनृत्य प्रतियोगिता तथा स्थानीय कलाकारहरूको निरन्तर प्रस्तुति भइरहेको छ। साथै बालबालिकाका लागि मनोरञ्जनात्मक खेलहरू, लण्डन गेट, जलपरी, चर्खे पिङ, ढुंगा पिङ लगायतका थुप्रै संरचनाले पनि दर्शकको ध्यान तानेका छन्।

महोत्सव मूल आयोजक समितिका संयोजक लाल बहादुर केसीले भने- “महोत्सवले स्थानीय उद्यम, घरेलु तथा साना उद्योगको प्रवर्द्धनसँगै कला र संस्कृतिको संरक्षणमा महत्वपूर्ण भूमिका खेलेको छ। दर्शकको उल्लेख्य सहभागिताले हामी थप उत्साहित भएका छौँ।”

त्यसैगरी, महोत्सव मूल आयोजक समितिका सदस्य सचिव भद्र बहादुर वलीले कलाकारहरूको प्रस्तुतिका कारण चिसो मौसमका बाबजुद दर्शकको उपस्थिति उल्लेख्य रहेको बताए।उनले भने- “दर्शकको उत्साह र व्यापारीको सक्रियताले महोत्सवले तुलसीपुरको आर्थिक गतिविधिलाई थप चलायमान बनाएको छ।”

महोत्सव अवलोकन गर्न पुगेका दर्शक  मेघराज आचार्य ले मेलाको आफ्नो अनुभव यसरी व्यक्त गरे,
“एकै ठाउँमा राम्रा कलाकारको प्रस्तुति, मनोरञ्जनात्मक खेल र स्थानीय उत्पादन हेर्न पाउँदा निकै रमाइलो लागेको छ। परिवारसहित घुम्न आउन लायक महोत्सव रहेछ। आज सहित म ५ औँ दिन मेलामा आईसके”

नेपाल घरेलु तथा साना उद्योग महासंघ तुलसीपुर, दाङको आयोजनामा तथा तुलसीपुर उपमहानगरपालिकाको संरक्षणमा सञ्चालन भइरहेको महोत्सव पुस ४ गतेदेखि पुस १९ गतेसम्म तुलसीपुर–६ घोराही रोडस्थित शान्ति सिनेमा हलको पूर्वतर्फको खुल्ला मैदानमा सञ्चालन भइरहेको छ।

आयोजकले बाँकी दिनहरूमा पनि राष्ट्रिय तथा स्थानीय कलाकारहरूको प्रस्तुति रहने जनाउँदै महोत्सव अवलोकनका लागि सर्वसाधारणलाई आग्रह गरेका छन्।

दाङ,१५ पुस । दाङको तुलसीपुरमा प्रथम तुलसीपुर महोत्सव २०८२ सञ्चालन भइरहेको छ। पुस ४ गतेदेखि सुरु भएको महोत्सवमा दैनिक राष्ट्रिय तथा स्थानीय कलाकारहरूको प्रस्तुति रहँदै आएको छ।

स्थानीय उत्पादनको प्रवर्द्धन, घरेलु तथा साना उद्योगको विकास तथा औद्योगिक वातावरण सुदृढ गर्दै दिगो अर्थतन्त्रको आधार निर्माण गर्ने उद्देश्यसहित सञ्चालन भइरहेको प्रथम तुलसीपुर महोत्सव–२०८२ अन्तर्गत आज पनि राष्ट्रिय तथा स्थानीय कलाकारहरूको सांगीतिक कार्यक्रम हुनेछ ।

आयोजकका अनुसार आजको कार्यक्रमको मुख्य आकर्षणका रूपमा चर्चित लोकगायक बद्री पंगेनी, गायिका टीका सानु, गायक एम.टी. महर तथा नृत्यतर्फ सन्ध्या मगरको विशेष प्रस्तुति रहनेछ। साथै हास्य कलाकार कमल गाउँलेले व्यङ्ग्यात्मक प्रस्तुति प्रस्तुत गर्नेछन् भने सोनी डान्स ग्रुपसहित विभिन्न नृत्य समूहले दर्शकलाई भरपूर मनोरञ्जन प्रदान गर्नेछन्। कार्यक्रमको उद्घोषण माधव जोन खत्रीले गर्नेछन्।

महोत्सवमा लोकदोहोरी, सामूहिक लोकनृत्य तथा आकर्षक नृत्य प्रस्तुतिसँगै सोनी डान्स ग्रुप, प्राकृतिक कला केन्द्र, दोभान कला केन्द्र, द डान्स हब, काइजन डान्स एकेडेमी, आरएन डान्स स्टुडियो तथा स्थानीय कलाकारहरूको निरन्तर प्रस्तुति भइरहेको छ।

साथै बालबालिकाका लागि मनोरञ्जनात्मक खेलहरू, लण्डन गेट, जलपरी, चर्खे पिङ, ढुंगा पिङलगायतका संरचनाले महोत्सवलाई थप आकर्षक बनाएको छ।
महोत्सव अवलोकन गर्न पुगेका दर्शक सौरभ गौतमले भने, “एकै ठाउँमा लोकगीत, हास्य, नृत्य र स्थानीय उत्पादन हेर्न पाउँदा निकै खुशी लागेको छ। परिवारसहित घुम्न आउनका लागि महोत्सव उत्कृष्ट बनेको छ।”

नेपाल घरेलु तथा साना उद्योग महासंघ तुलसीपुर, दाङको आयोजनामा तथा तुलसीपुर उपमहानगरपालिकाको संरक्षणमा सञ्चालन भइरहेको महोत्सव पुस ४ गतेदेखि पुस १९ गतेसम्म तुलसीपुर–६ घोराही रोडस्थित शान्ति सिनेमा हलको पूर्वतर्फको खुल्ला मैदानमा सञ्चालन हुनेछ।

आयोजकले महोत्सवले स्थानीय उद्यम, घरेलु उद्योग, कला–संस्कृति तथा पर्यटन प्रवर्द्धनमा महत्वपूर्ण योगदान पुर्‍याइरहेको उल्लेख गर्दै आजको कार्यक्रममा उपस्थित भई कलाकारहरूको प्रस्तुति अवलोकन गर्न सर्वसाधारणलाई आग्रह गरेका छन्।

दाङ,१४ पुस। दाङको तुलसीपुरमा जारी ‘प्रथम तुलसीपुर महोत्सव’ को ११औँ दिन आज पनि राष्ट्रिय तथा स्थानीय कलाकारहरूको आकर्षक प्रस्तुति रहने भएको छ। सांस्कृतिक संयोजक टिका जंग वलीका अनुसार आजको कार्यक्रममा चर्चित गायक पुस्कल शर्मा, लोकप्रिय गायिका प्रिति आले र हास्य कलाकार पुरुषोत्तम भण्डारी ‘पुर्खे बा’ लगायतको सांगीतिक तथा मनोरञ्जनात्मक प्रस्तुति रहनेछ।

महोत्सवमा आज पनि लोकदोहोरी, सामूहिक लोकनृत्य प्रतियोगिता तथा स्थानीय कलाकारहरूको विविध प्रस्तुति समावेश गरिने आयोजकले जनाएको छ। पुस ४ गतेदेखि सुरु भएको महोत्सवमा दिनप्रतिदिन दर्शकको चहलपहल बढ्दै गएको छ।
दर्शकहरूको उल्लेख्य उपस्थितिले आयोजकहरू उत्साहित भएका छन्। महोत्सव मूल आयोजक समितिका संयोजक लाल बहादुर केसी ले दैनिकजसो बढ्दो दर्शक सहभागिताले कार्यक्रमलाई थप ऊर्जा मिलेको बताए। उनले आज पनि दर्शकको सहभागिता अझै बढ्ने विश्वास व्यक्त गरे।

स्थानीय उत्पादनको बजारीकरण, औद्योगिक वातावरणको विकास तथा पर्यटकीय स्थलको प्रचारप्रसार गर्ने उद्देश्यले महोत्सव आयोजना गरिएको हो। नेपाल घरेलु तथा साना उद्योग महासंघ तुलसीपुर को आयोजनामा सञ्चालन भइरहेको महोत्सव पुस १९ गतेसम्म चल्नेछ। महोत्सव मूल आयोजक समितिका सदस्य सचिव भद्र बहादुर वली ले महोत्सवमा दैनिक कारोबारसमेत उत्साहजनक रहेको जानकारी दिए।

दाङ, १३ पुस । दाङको तुलसीपुरमा जारी ‘प्रथम तुलसीपुर महोत्सव’को दशौँ दिन पनि उल्लेख्य संख्यामा दर्शकको सहभागिता देखिएको छ। विशेषगरी चर्चित गायक प्रकाश दुतराजको सांगीतिक प्रस्तुति हेर्न दर्शकको बाक्लो उपस्थिति रहेको थियो। उनको प्रस्तुति हेर्नकै लागि महोत्सवस्थलमा विशेष चहलपहल देखिएको थियो।

गायक दुतराजले सालैजो, रेलिमै, घर कता हो बैनीको, छैन र माया, बैनी झ्यालैमा, जाम भो माइलीलगायत दर्जनौँ लोकप्रिय गीतहरू प्रस्तुत गरेका थिए। उनको सशक्त गायनसँगै दर्शकले हुटिङ गर्दै नाचगान गरेर भरपूर साथ दिएका थिए। प्रकाशको प्रस्तुति हेर्न छिमेकी जिल्ला सल्यानका विभिन्न स्थानबाटसमेत दर्शकहरू महोत्सवस्थलमा पुगेका थिए।

कार्यक्रममा प्रकाश दुतराजसँगै गायक कलावती केसी, थम्मन भण्डारीलगायत अन्य कलाकारहरूको पनि प्रस्तुति रहेको थियो।

पुस ४ गतेदेखि सुरु भएको महोत्सवमा दैनिक रूपमा दर्शक संख्या बढ्दै गएको छ। महोत्सव मूल आयोजक समितिका संयोजक लालबहादुर केसीका अनुसार दर्शकको उल्लेख्य सहभागितासँगै व्यापारिक कारोबारसमेत वृद्धि भएको छ।

‘स्थानीय उत्पादनलाई प्रवर्द्धन गरौँ, औद्योगिक वातावरणको सुधार गरौँ, दिगो अर्थतन्त्रको आधार बनाऔँ’ भन्ने मूल नारासहित सञ्चालन भइरहेको महोत्सव पुस १९ गतेसम्म चल्नेछ। नेपाल घरेलु तथा साना उद्योग महासंघ तुलसीपुरको आयोजनामा भइरहेको महोत्सव तुलसीपुर–घोराही सडकखण्डस्थित ओम शान्ति सिनेमा हलको पूर्वतर्फको खुला मैदानमा सञ्चालन भइरहेको छ।

महोत्सवस्थलमा बाल उद्यान, जलपरी, लण्डन ब्रिजलगायत संरचनाहरू दर्शकका प्रमुख आकर्षण बनेका छन्। दर्शक संख्या बढेसँगै महोत्सवमा सहभागी व्यवसायीहरू पनि उत्साहित देखिएका छन्। महोत्सव मूल आयोजक समितिका सदस्य सचिव भद्रबहादुर वलीका अनुसार रुकुम पश्चिमको सिस्नोदेखि दाङको ढिग्रीसम्मका स्थानीय उत्पादनहरूको माग अत्यधिक रहेको छ। पछिल्ला दिनहरूमा दर्शकको सहभागिता अझै बढ्दै गएको र त्यसले व्यवसायिक गतिविधिलाई थप गति दिएको उनले बताए।