काठमाडौ,२२ असार । सुडानमा जारी गृहयुद्धका कारण पछिल्लो ६ महिनामै ३०० भन्दा बढी बालबालिकाको मृत्यु भएको छ। युनिसेफका अनुसार तीमध्ये अधिकांश बालबालिकाको ज्यान ड्रोन आक्रमणमा गएको हो। युद्ध तीव्र बन्दै जाँदा बालबालिका हिंसा, विस्थापन र मानवीय सङ्कटको सबैभन्दा ठूलो मारमा परिरहेका छन्।

सन् २०२३ अप्रिलदेखि सुडानी सेना र द्रुत समर्थन बल (आरएसएफ)बीच द्वन्द्व जारी छ। अहिले यो लडाइँ मुख्यतः कोर्डोफान, डार्फर र ब्लू नाइल क्षेत्रमा केन्द्रित छ।

युनिसेफका अनुसार पछिल्ला महिनामा ड्रोन युद्ध तीव्र भएको छ र कुल हताहतमध्ये करिब ६० प्रतिशत घटना ड्रोन आक्रमणसँग सम्बन्धित छन्।
रणनीतिक रूपमा महत्त्वपूर्ण उत्तर कोर्डोफानको एल ओबिड सहरका लागि भइरहेको लडाइँका क्रममा सम्भावित युद्ध अपराध र मानवअधिकार उल्लङ्घनबारे संयुक्त राष्ट्रसङ्घ, अमेरिका र बेलायतले चिन्ता व्यक्त गरेका छन्।

हालसम्म यस युद्धमा कम्तीमा ५९ हजार मानिसको मृत्यु भइसकेको छ भने करिब १ करोड ३० लाख नागरिक विस्थापित भएका छन्। करिब ३ करोडभन्दा बढी मानिस मानवीय सहायतामा निर्भर छन्।

ड्रोन आक्रमण र गोलाबारीका क्रममा विद्यालय, बजार, इन्धन भण्डारण केन्द्र र खानेपानीका संरचनासमेत निशाना बनाइएकाले पाँच लाखभन्दा बढी नागरिक प्रत्यक्ष जोखिममा परेका छन्। धेरै क्षेत्रमा सर्वसाधारणले एक वर्षभन्दा बढी समयदेखि कठिन अवस्था भोगिरहेका छन्।

सुडानका लागि युनिसेफका प्रतिनिधि शेल्डन येटले बालबालिका हिंसा र अभावको अन्तहीन चक्रमा फसेको भन्दै तत्काल सुरक्षा सुनिश्चित गर्न आग्रह गरेका छन्।

संयुक्त राष्ट्रसङ्घले पनि द्वन्द्वरत पक्षहरूलाई नागरिक तथा पूर्वाधारको संरक्षण गर्न, मानवीय सहायता सहज रूपमा पुर्‍याउन र बालबालिकालाई जोगाउन सबै उपाय अपनाउन आह्वान गरेको छ।

दाङ,२१ असार । भारतको उत्तर प्रदेशस्थित बलरामपुर जिल्लामा भारत र नेपाल दुवै देशका नागरिकता तथा परिचयसम्बन्धी कागजात राखेको आरोपमा २७ जनाविरुद्ध मुद्दा दर्ता गरिएको छ।

सीमावर्ती जरवा थाना क्षेत्रका ती व्यक्तिहरूले भारतीय सरकारी योजनाको समेत लाभ लिएको आरोप रहेको प्रहरीले जनाएको छ। बलरामपुरका प्रहरी प्रमुख (एसपी) विकास कुमारका अनुसार जिल्ला अधिकारी (डीएम) को उजुरीपछि घटनाबारे अनुसन्धान सुरु गरिएको थियो।

जिल्ला प्रशासनको पत्रका आधारमा गरिएको छानबिन प्रतिवेदनपछि उनीहरूमाथि कानुनी कारबाही अघि बढाइएको हो।

अनुसन्धानका क्रममा नेपालको दाङ जिल्लाको कोइलाबास क्षेत्रका केही व्यक्तिले आफूलाई बलरामपुरको विभिन्न स्थानका बासिन्दा देखाउँदै आधार कार्ड, मतदाता परिचयपत्रलगायत अन्य भारतीय कागजात बनाएको पाइएको प्रहरीले जनाएको छ।

भारतीय सञ्चारमाध्यम इन्डियाटिभीका अनुसार ती व्यक्तिहरूको नाम भारत र नेपाल दुवै देशको मतदाता नामावलीमा समेत भेटिएको छ। अनुसन्धानका क्रममा केही व्यक्तिहरू सम्बन्धित स्थानमा नबस्ने र मृत्यु भइसकेका व्यक्तिहरूको नामसमेत सरकारी अभिलेखमा कायम रहेको तथ्य खुलेको छ।

प्रहरीका अनुसार यो प्रकरण पहिचान लुकाउने, सरकारी कागजातको दुरुपयोग गर्ने तथा गलत विवरण दर्ता गराउनेसँग सम्बन्धित छ। जरवा प्रहरीले सम्बन्धित कानुनी धाराअन्तर्गत मुद्दा दर्ता गरी विस्तृत अनुसन्धान अघि बढाएको छ।

प्रहरीले सबै कागजातको प्रमाणीकरण गर्दै सम्बन्धित निकायसँग विवरण मिलाएर थप अनुसन्धान गरिरहेको जनाएको छ। अनुसन्धानबाट प्राप्त तथ्यका आधारमा आवश्यक कानुनी कारबाही गरिने प्रहरीको भनाइ छ।

काठमाडौ,२० असार। इरानले दिवङ्गत सर्वोच्च नेता आयतोल्लाह अली खामेनीको सार्वजनिक अन्त्येष्टि समारोहको औपचारिक सुरुआत गरेको छ।

सरकारी टेलिभिजनका अनुसार अन्त्येष्टिअघि ६ दिनसम्म सार्वजनिक श्रद्धाञ्जलि कार्यक्रम सञ्चालन गरिनेछ। खामेनीको शव राखिएको बाकस समारोह स्थलमा ल्याइनुअघि नै तेहरानस्थित ग्रान्ड मोसाल्ला प्राङ्गणमा हजारौँ नागरिक भेला भएका थिए।

श्रद्धाञ्जलि कार्यक्रममा सहभागीहरूले अमेरिकाविरुद्ध नाराबाजी गर्नुका साथै बदलाको प्रतीक मानिने रातो ब्यानर प्रदर्शन गरेका थिए। इरानी सरकारी सञ्चारमाध्यमका अनुसार अन्त्येष्टि कार्यक्रम जुलाई ९ मा खामेनीको गृह नगर मशहदमा पुगेर समापन हुनेछ।

गत फेब्रुअरी २८ मा इजरायल र अमेरिकाले इरानमाथि गरेको हवाई आक्रमणमा ८६ वर्षीय खामेनीको मृत्यु भएको थियो। उक्त आक्रमणमा उनकी श्रीमतीसहित परिवारका अन्य सदस्यको पनि ज्यान गएको थियो भने उनका छोरा मोज्तबा घाइते भएका थिए।

हाल मोज्तबा खामेनी इरानको नयाँ सर्वोच्च नेताका रूपमा स्थापित भएका छन्। खामेनीले ३६ वर्षसम्म इरानको नेतृत्व गर्दै देशलाई अमेरिका विरोधी शक्तिका रूपमा स्थापित गरेका थिए र क्षेत्रीय प्रभाव विस्तारमा महत्वपूर्ण भूमिका खेलेका थिए।

काठमाडौ,८ असार । कतारको रास लाफान औद्योगिक सहरस्थित एक ग्यास प्लान्टमा विस्फोट हुँदा ५४ जना घाइते भएका छन् भने १८ जना बेपत्ता भएका छन्।

कतार प्रशासनका अनुसार विस्फोटपछि औद्योगिक क्षेत्रमा व्यापक आगलागी भएको थियो। घटनालगत्तै आपत्कालीन उद्धार टोली परिचालन गरिएको र केही समयमै आगो नियन्त्रणमा लिइएको जनाइएको छ।

कतारको गृह मन्त्रालयले जारी गरेको विज्ञप्तिअनुसार घाइतेहरूको उपचार भइरहेको छ भने बेपत्ता व्यक्तिहरूको खोजी कार्य जारी रहेको छ। मन्त्रालयले विस्फोट प्राविधिक कारणले भएको प्रारम्भिक निष्कर्ष निकालेको छ।

घटनापछि ग्यास चुहावट भएको पुष्टि भए पनि त्यसले सर्वसाधारणको सुरक्षामा कुनै जोखिम नपुगेको मन्त्रालयले स्पष्ट पारेको छ।

“कतार अन्तर्राष्ट्रिय खोज तथा उद्धार समूह नागरिक सुरक्षा टोलीसँग मिलेर बेपत्ता व्यक्तिहरूको खोजीमा जुटेको छ,” मन्त्रालयको भनाइ उद्धृत गर्दै जनाइएको छ।

विस्फोटबाट घरेलु बजारमा ग्यास आपूर्ति गर्ने उक्त प्लान्टमा कति क्षति पुगेको छ भन्नेबारे भने अझै विस्तृत विवरण सार्वजनिक गरिएको छैन।

यसैबीच, एक प्रत्यक्षदर्शीले समाचार संस्था रोयटर्ससँग कुरा गर्दै विस्फोटको ठूलो आवाज राजधानी दोहासम्म सुनिएको बताएका छन्।

काठमाडौ,२८जेठ । अमेरिका, बेलायत र अस्ट्रेलियासहित २२ देशले इरानलाई विदेशी भूमिमा हुने आक्रमण, अपहरण र डरत्रासका गतिविधि तत्काल रोक्न संयुक्त चेतावनी दिएका छन्।

संयुक्त विज्ञप्तिमा ती देशहरूले इरानसँग सम्बद्ध सुरक्षा तथा गुप्तचर निकायहरू विदेशी भूमिमा असन्तुष्ट, पत्रकार तथा यहुदी र इजरायली समुदायलाई लक्षित गर्ने गतिविधिमा संलग्न रहेको आरोप लगाएका छन्।

उनीहरूले यस्ता गतिविधिले राष्ट्रिय सार्वभौमिकता र अन्तर्राष्ट्रिय कानुनी व्यवस्थामाथि चुनौती खडा गरेको भन्दै तुरुन्त अन्त्य गर्न आग्रह गरेका छन्।

विज्ञप्तिमा इस्लामिक रिभोलुसनरी गार्ड कर्प्स (आईआरजीसी) र त्यसअन्तर्गतको कुद्स फोर्सले विभिन्न देशमा दुर्भावनापूर्ण गतिविधि सञ्चालन गरेको आरोप पनि उल्लेख गरिएको छ।

यसैबीच, युरोपका केही स्थानमा भएको आगजनी घटनामा इरानसँग सम्बन्धित समूहको संलग्नता रहेको दाबी गरिएको छ। इरानले भने यसबारे कुनै प्रतिक्रिया दिएको छैन।

काठमाडौ,२० जेठ । भारतको राजधानी नयाँदिल्लीमा एक होटलमा भएको भीषण आगलागीमा कम्तीमा २१ जनाको मृत्यु भएको छ भने दर्जनौँ घाइते भएका छन्।

दक्षिणी दिल्लीको भीडभाड भएको क्षेत्रमा रहेको ‘फ्लोरिस स्टे’ होटलमा बुधबार बिहान आगलागी भएको हो। आगो छिटो फैलिँदा भित्र रहेका पाहुना र कर्मचारी फसेका थिए।

प्रहरीका अनुसार ४० भन्दा बढी घाइतेलाई उपचारका लागि अस्पतालमा भर्ना गरिएको छ। आठ वटा दमकलको सहयोगमा लामो प्रयासपछि आगो नियन्त्रणमा लिइएको हो। अधिकारीहरूले २१ जनाको मृत्यु भएको पुष्टि गरेका छन्। घटनास्थलमा अझै पनि खोज तथा उद्धार कार्य जारी रहेको छ।

स्थानीय सञ्चारमाध्यमका अनुसार मृतकमध्ये धेरै अफ्रिकी देशका नागरिक हुनसक्ने अनुमान गरिएको छ। तर यसको आधिकारिक पुष्टि भएको छैन।

प्रधानमन्त्री नरेन्द्र मोदीले घटनाप्रति दुःख व्यक्त गर्दै मृतकका परिवारप्रति समवेदना जनाएका छन् ।
आगलागीको कारण खुलेको छैन। तर भारतमा यस्ता घटनाहरू प्रायः विद्युत् सर्ट सर्किट, पुरानो तार र सुरक्षा कमजोरीका कारण हुने गरेका छन्।

काठमाडौ,२० जेठ । रुसले युक्रेनका विभिन्न शहरमा गरेको व्यापक हवाई आक्रमणमा कम्तीमा २२ जनाको ज्यान गएको छ भने १३८ जना घाइते भएका छन्।

समाचार संस्था एपीका अनुसार सयौँ ड्रोन र दर्जनौँ क्षेप्यास्त्र प्रयोग गरी गरिएको आक्रमणले राजधानी किएभसहित मध्य र पूर्वी युक्रेनका धेरै शहरमा ठूलो क्षति पुर्‍याएको हो।

युक्रेनी अधिकारीहरूका अनुसार डिनिप्रोमा १६ जना र राजधानी किएभमा ६ जनाको मृत्यु भएको छ। विस्फोटका कारण अपार्टमेन्ट भवनहरू क्षतिग्रस्त भएका छन् भने धेरै स्थानमा खोज तथा उद्धार कार्य जारी छ।

युक्रेनी वायु सेनाका अनुसार रुसले ७३ वटा क्षेप्यास्त्र र ६५६ वटा ड्रोन प्रहार गरेको थियो। तीमध्ये ४० वटा क्षेप्यास्त्र र ६०२ वटा ड्रोन नष्ट वा निष्क्रिय पारिएको दाबी युक्रेनले गरेको छ।

युक्रेनी राष्ट्रपति भोलोदिमिर जेलेन्स्कीले अन्तर्राष्ट्रिय समुदायसँग थप सहयोगको अपिल गरेका छन् ।

काठमाडौ,१९ जेठ। लेबनानमा इजरायलको बढ्दो सैन्य आक्रमणको विरोध गर्दै इरानले अमेरिकासँगको उच्चस्तरीय वार्ता स्थगित गरेको छ।

तीन महिनादेखि जारी युद्ध अन्त्य गर्ने प्रयास भइरहेका बेला इरानको यो निर्णयले स्थिति थप जटिल बनेको छ। ‘तस्निम’ समाचार संस्थाका अनुसार इरानी टोलीले मध्यस्थकर्तामार्फत हुने वार्ता रोक्ने निर्णय गरेको हो।

इरानी संसदका सभामुख मोहम्मद बागेर गालिबाफले लेबनानमा आक्रमण जारी रहे इरानले जवाफी कदम चाल्न सक्ने चेतावनी दिएका छन्।

उनले इजरायली आक्रमण रोक्न प्रयास भइरहेको तर जारी रहेमा वार्ता मात्र होइन, प्रतिकार पनि गरिने बताएका छन्।

उनका अनुसार यदि इरान र अमेरिकाबीच सहमति भयो भने लेबनानसहित सबै क्षेत्रमा आक्रमण रोक्ने विषय समेटिनेछ।

इरानको विदेश मन्त्रालयले अमेरिका नै युद्धविराम उल्लंघनका लागि जिम्मेवार रहेको आरोप लगाएको छ।

यसैबीच, अमेरिकी राष्ट्रपति डोनाल्ड ट्रम्पले आफूले इजरायली प्रधानमन्त्री र हिजबुल्लाहका प्रतिनिधिसँग कुरा गरेको र अब बेरुततर्फ सेना नपठाइने बताएका छन्।

काठमाडौ,१६ जेठ । द्वन्द्वग्रस्त दक्षिण सुडानमा ७२ लाखभन्दा बढी मानिसलाई तत्काल खाद्य सहायता आवश्यक भएको संयुक्त राष्ट्रसङ्घले जनाएको छ।

दक्षिण सुडानका लागि विश्व खाद्य कार्यक्रम (डब्लुएफपी) का देश निर्देशक मुटिन्ता चिमुकाका अनुसार ती नागरिकलाई तत्काल खाद्यान्न सहयोग आवश्यक छ। उनले स्थिति निकै गम्भीर रहेको र मानिसको ज्यान बचाउन तुरुन्त सहयोग आवश्यक भएको बताए।

संयुक्त राष्ट्रसङ्घका मानवीय सहायता प्रमुख टम फ्लेचरले पनि गएको महिना दक्षिण सुडान भोकमरीको ठूलो जोखिममा रहेको चेतावनी दिएका थिए।

दक्षिण सुडानले सन् २०११ मा सुडानबाट स्वतन्त्रता पाए पनि त्यसपछि गृहयुद्धमा फसेको थियो। त्यहाँ गरिबी, भ्रष्टाचार र असुरक्षा अझै बढ्दो अवस्थामा छन्।

काठमाडौ,१४ जेठ । केन्याको गिलगिलस्थित एक बोर्डिङ स्कुलमा आगलागी हुँदा १६ जना विद्यार्थीको ज्यान गएको छ भने ७४ जना घाइते भएका छन्। प्रहरीका अनुसार बिहीबार बिहान उतुमिसी गर्ल्स स्कुलको होस्टलमा विद्यार्थीहरू सुतिरहेको बेला आगलागी भएको हो।

घाइते सबै विद्यार्थीको अस्पतालमा उपचार भइरहेको जनाइएको छ। केन्या रेडक्रस र प्रहरी टोलीले घटनास्थलमा पुगेर उद्धार तथा राहत कार्य जारी राखेका छन्। आगलागीको कारण भने अहिलेसम्म खुल्न सकेको छैन।

प्रहरी कमाण्डर मसुद म्विनीले घटनालाई अत्यन्त दुःखद भन्दै पीडित परिवारप्रति समवेदना व्यक्त गरेका छन्।

केन्यामा पछिल्ला वर्षहरूमा विद्यालयमा यस्ता दुर्घटना दोहोरिँदै आएका छन्। होस्टलमा धेरै विद्यार्थीको चाप र सुरक्षा मापदण्डको कमीलाई यस्ता घटनाको मुख्य कारण मानिँदै आएको छ।