काठमाडौ,२४ असोज । दक्षिण अमेरिकी राष्ट्र पेरुमा फैलिएको तीव्र अपराध लहरबीच राष्ट्रपति दिना बोलुआर्तेलाई पदबाट हटाउने निर्णय गर्दै पेरु संसद्ले बिहीबार राति महाभियोगको पक्षमा मतदान गरेको छ।

सरकार अपराध नियन्त्रणमा असफल भएको आरोप लगाउँदै सांसदहरूले बोलुआर्तेलाई पदमुक्त गर्न प्रस्तुत चारवटा अलग–अलग प्रस्ताव अनुमोदन गरेका थिए। एकसदनीय १३० सदस्यीय संसद्मा प्रत्येक प्रस्तावले आवश्यक ५६ भन्दा बढी मत प्राप्त गरेपछि महाभियोग प्रक्रियाको बाटो खुलेको हो। अन्ततः १२४ सांसदले राष्ट्रपति हटाउने पक्षमा मतदान गरे।

यो निर्णय राजधानी लिमामा भएको एक लोकप्रिय कन्सर्टमा गोलीकाण्ड हुँदा पाँच जना घाइते भएपछि आएको हो। उक्त घटनापछि अपराध नियन्त्रणमा सरकारको अक्षमताप्रति जनआक्रोश तीव्र बनेको थियो। यसअघि बोलुआर्तेलाई हटाउन गरिएका आठ प्रयास असफल भएका थिए, तर यसपटक अधिकांश दलले महाभियोगको पक्षमा समर्थन जनाए।

संविधानअनुसार राष्ट्रपति हटाउन ८७ मत आवश्यक पर्छ। यही प्रावधान प्रयोग गरेर सन् २०२२ डिसेम्बरमा उनका पूर्ववर्तीलाई पनि संसद्ले पदच्युत गरेको थियो।

राष्ट्रपति बोलुआर्ते पछिल्ला महिनाहरूमा बढ्दो हत्या र जबरजस्ती असुलीका घटनाबीच नियन्त्रण कायम गर्न संघर्षरत थिइन्। बुधबार मात्रै उनले अवैध आप्रवासनलाई अपराध वृद्धिको मुख्य कारण बताएकी थिइन्।

आधिकारिक तथ्याङ्कअनुसार, जनवरीदेखि अगस्टसम्म ६ हजार ४१ जनाको मृत्यु भएको छ, जुन सन् २०१७ पछि सोही अवधिको सबैभन्दा उच्च सङ्ख्या हो। त्यस्तै, जनवरीदेखि जुलाईसम्म १५ हजार ९८९ जबरजस्ती असुलीका उजुरी दर्ता भएका छन्, जुन अघिल्लो वर्षको तुलनामा २८ प्रतिशतले बढी हो।

प्रधानमन्त्री एडुआर्डो अरानाले संसद्मा बोलुआर्तेलाई जोगाउने प्रयास गरे पनि सफल हुन सकेनन्। उनले भने, “महाभियोग समाधान होइन, तर हामी सुरुदेखि नै तयार थियौं — हाम्रो पहिलो दिन नै अन्तिम दिन हुन सक्छ।”

विश्लेषकहरूका अनुसार बोलुआर्तेलाई सत्ताबाट हटाउने यो कदमले पेरुमा राजनीतिक अस्थिरता फेरि एकपटक गहिरो बनाएको छ। अपराध नियन्त्रण, आप्रवासन नीति र शासन क्षमताप्रतिको विवादले देशलाई नयाँ अनिश्चिततामा धकेलेको टिप्पणी गरिएको छ।

काठमाडौ,२१ असोज । मलेसियामा जारी टि–२० सिरिज अन्तर्गत चौथो खेलमा नेपाल विजयी भएको छ। मंगलबार भएको खेलमा कप्तान इन्दु बर्माको अविजित ४८ रनको पारीसहित नेपालले मलेसियालाई ६ विकेटले हराएको हो।

यो जितसँगै पाँच खेलको सिरिज २–२ को बराबरीमा पुगेको छ। अब बुधबार हुने अन्तिम खेलले सिरिजको विजेता तय गर्नेछ।

मलेसियाले टस जितेर ब्याटिङ गर्दै २० ओभरमा पाँच विकेट गुमाउँदै १११ रन बनाएको थियो। मलेसियाकी मास एलिसाले ५६ रन योगदान दिइन्। नेपालका कविता कुँवरले तीन विकेट लिई उत्कृष्ट बलिङ गरिन्।

जवाफमा नेपालले इन्दु बर्मा र रुविना क्षेत्रीको अविजित साझेदारीमा लक्ष्य सजिलै पुरा गर्दै जित हात पारेको हो।

काठमाडौ,१४ असोज । अस्ट्रेलियाली क्रिकेटर ग्लेन म्याक्सवेलको हात भाँचिएको छ। नेट्स ट्रेनिङका क्रममा ब्याट्सम्यान मिचेल ओवेनले प्रहार गरेको बल उनको हातमा लाग्दा यो चोट लागेको हो।

३६ वर्षीय म्याक्सवेल अघिल्लो वर्षहरूमा पनि चोटपटकका कारण मैदानबाहिर बस्नुपरेको थियो। सन् २०२२ मा उनको खुट्टा भाँचिएको थियो भने २०२३ मा गोल्फ कार्टबाट खस्दा उनी बेहोस भएका थिए।

पछिल्लो चोटका कारण म्याक्सवेल न्युजिल्यान्डविरुद्धको तीन खेलको टी–२० श्रृंखलाबाट बाहिरिएका छन्। उनको स्थानमा विकेटकिपर ब्याट्सम्यान जोश फिलिप्पेलाई टोलीमा समावेश गरिएको छ।

काठमाडौं,१० असोज । अमेरिकी राष्ट्रपति डोनाल्ड ट्रम्पले आउँदो अक्टोबर १ देखि लागू हुने गरी आयातित औषधि, किचन क्याबिनेट, बाथरुम भ्यानिटी, गद्देदार फर्निचर र मालवाहक ट्रकलगायत वस्तुमा नयाँ आयात कर ९ट्यारिफ० लगाउने घोषणा गरेका छन्।

उनका अनुसार औषधिमा १०० प्रतिशत, किचन क्याबिनेट र बाथरुम भ्यानिटीमा ५० प्रतिशत, फर्निचरमा ३० प्रतिशत र ट्रकमा २५ प्रतिशत आयात कर लागू हुनेछ। ट्रम्पले बिहीबार आफ्नै सामाजिक सञ्जाल ट्रुथ सोसियल मार्फत यसबारे जानकारी दिएका हुन्।

ट्रम्पले औषधिमा लगाइने नयाँ कर अमेरिकामा उत्पादन प्लान्ट निर्माण गरिरहेका वा निर्माण सुरु गरिसकेका कम्पनीलाई भने लागू नहुने स्पष्ट पारेका छन्। तर, पहिले नै अमेरिकामा कारखाना सञ्चालन गरिरहेका कम्पनीलाई छुट दिने वा नदिनेबारे अझै स्पष्टता छैन।

अमेरिकी जनगणना ब्युरोका अनुसार, सन् २०२४ मा मात्रै अमेरिकाले करिब २३३ अर्ब डलरबराबरका औषधि तथा औषधीय उत्पादन आयात गरेको थियो। १०० प्रतिशत आयात कर लागू हुँदा औषधिको मूल्य दोब्बर हुने अनुमान गरिएको छ, जसले सर्वसाधारणको स्वास्थ्य खर्च बढाउने मात्र होइन, मेडिकेयर र मेडिकेड योजनामाथि समेत थप दबाब पार्ने बताइएको छ।

फेडरल रिजर्भका अध्यक्ष जेरोम पावेलले पनि बढ्दो मूल्यवृद्धिले महँगीलाई थप चुल्याइरहेको चेतावनी दिएका थिए। ट्रम्पले भने आयात करले बजेट घाटा कम गर्ने र घरेलु उद्योगलाई प्रोत्साहन गर्ने दाबी गरेका छन्। तर, विज्ञहरूले भने यसले महँगी झन् बढाउने र आर्थिक वृद्धिमा नकारात्मक असर पार्ने चेतावनी दिएका छन्।

ट्रम्पको निर्णय विशेषगरी भारतको औषधि उद्योगमा प्रत्यक्ष असर गर्ने अनुमान गरिएको छ। अमेरिका भारतका औषधि उत्पादकका लागि सबैभन्दा ठूलो बजार हो। सन् २०२४ मा भारतले ३१ हजार ६२६ करोड भारुबराबरका औषधि अमेरिका निर्यात गरेको थियो भने सन् २०२५ को पहिलो ६ महिनामै यो आँकडा ३२ हजार ५०५ करोड भारु पुगेको छ।

यस्तो अवस्थामा १०० प्रतिशत कर लाग्दा भारतबाट निर्यात हुने सस्ता जेनेरिक औषधि समेत अमेरिकामा महँगो हुनेछन्। यसले डा। रेड्डीज, सन फार्मा, लुपिनलगायत प्रमुख कम्पनीलाई बढी असर गर्ने अनुमान गरिएको छ। ट्रम्पको नीतिले विशेषगरी ब्रान्डेड र पेटेन्ट गरिएका औषधिमा बढी प्रभाव पार्ने देखिएको छ भने जेनेरिक औषधि सम्बन्धी नीति अझै स्पष्ट छैन।

स्रोत: हिन्दुस्तान टाइम्स

काठमाडौं ,२ असोज ।भारतका प्रधानमन्त्री नरेन्द्र मोदीले नेपालकी अन्तरिम प्रधानमन्त्री सुशीला कार्कीसँग टेलिफोनमार्फत कुराकानी गरेका छन्।

सामाजिक सञ्जाल ‘एक्स’मार्फत जानकारी दिँदै मोदीले हालै भएको दुखद घटनाप्रति समवेदना प्रकट गर्दै नेपालमा शान्ति र स्थिरता कायम गर्ने कार्कीको प्रयासप्रति भारतको दृढ समर्थन रहने बताएका छन्।

उनले भने, “नेपालको अन्तरिम सरकारकी प्रधानमन्त्री सुशीला कार्कीसँग न्यानो कुराकानी भयो। हालै भएको दु:खद मृत्युप्रति हार्दिक समवेदना व्यक्त गर्दै शान्ति र स्थिरता पुनर्स्थापित गर्ने उनको प्रयासलाई भारतले पूर्ण समर्थन गर्दछ।”

मोदीले कार्कीलाई आगामी राष्ट्रिय दिवस तथा संविधान दिवसको शुभकामना पनि दिएका छन्। साथै, जेन–जी आन्दोलनका क्रममा भएको जनधनको क्षति विषयमा समेत दुवैबीच चर्चा भएको जनाइएको छ।

यसअघि मोदीले सामाजिक सञ्जाल र मणिपुरमा आयोजित कार्यक्रममा पनि कार्कीलाई बधाई दिएका थिए।

काठमाडौँ,३१ भदौ । गाजा शहरमा इजरायलले भारी बमबारी गरेको छ । मिडिया रिपोर्टहरूले इजरायली सेनाले सम्पूर्ण शहर कब्जा गर्न स्थलगत कारबाही सुरु गरेको दाबी गरेका छन् ।

मध्य गाजाबाट पनि इजरायली आक्रमणको रिपोर्ट आएको छ । यी आक्रमणहरू त्यही दिशामा भएका छन् जहाँ हजारौं मानिसहरू भागिरहेका छन् । प्यालेस्टिनी अधिकारीहरूले मृतक र घाइतेहरूको संख्या निरन्तर बढिरहेको बताएका छन् ।

यी आक्रमणहरू सोमबार अमेरिकी विदेशमन्त्री मार्को रुबियोले जेरुसेलमको भ्रमणको क्रममा इजरायली प्रधानमन्त्री बेन्जामिन नेतान्याहूलाई अमेरिकाको ‘अटल समर्थन’ को आश्वासन दिएका बेला भएका छन् ।

मंगलबार बिहान इजरायली रक्षामन्त्री इजरायल काट्जले एक्समा लेखे, ुगाजा जलिरहेको छ ।स उनले चेतावनी दिए कि इजरायल ुमिशन पूरा नभएसम्म पछि हट्ने छैन ।ु

गाजाका स्थानीय पत्रकारहरूले इजरायली हवाई आक्रमण र गोलाबारी जारी रहेको बताएका छन् । घरहरूको भग्नावशेषमुनि मानिसहरू दबिएको पनि रिपोर्ट आएको छ । इजरायली सेनाद्वारा नयाँ स्थलगत आक्रमणको कुनै आधिकारिक पुष्टि भएको छैन ।

काठमाडौं,२८ भदौ। भारतका प्रधानमन्त्री नरेन्द्र मोदीले नेपालको समृद्धिप्रति भारत प्रतिबद्ध रहेको दोहोर्‍याउँदै अन्तरिम सरकारकी प्रधानमन्त्री सुशीला कार्कीलाई बधाई तथा शुभकामना व्यक्त गरेका छन्।

सामाजिक सञ्जाल ‘एक्स’ मार्फत मोदीले कार्कीले प्रधानमन्त्रीको पदभार ग्रहण गरेको अवसरमा शुभकामना दिँदै भनेका छन्, “नेपालको अन्तरिम सरकारको प्रधानमन्त्रीका रूपमा पदभार ग्रहण गर्नुभएकामा सम्माननीय श्रीमती सुशीला कार्कीज्यूलाई हार्दिक शुभकामना । नेपालका दाजुभाइ तथा दिदीबहिनीहरूको शान्ति, प्रगति र समृद्धिप्रति भारत पूर्ण रूपमा प्रतिबद्ध छ ।”

मोदीले आफ्नो सन्देशमार्फत दुवै मुलुकबीचको मित्रता र सहकार्यलाई अझ सुदृढ बनाउँदै लैजाने विश्वास पनि व्यक्त गरेका छन्।

काठमाडौँ,२८ भदौ । रूसको कामचट्का क्षेत्रको पूर्वी तट नजिकै ७.१ रेक्टर स्केलको भूकम्प गएको छ ।

समाचार एजेन्सी रोयटर्सले जर्मन रिसर्च सेन्टर फर जियोसाइन्सेसलाई उद्धृत गर्दै यो जानकारी दिएको छ । भूकम्पको गहिराइ १० किलोमिटर रहेको बताएको छ । साथै, अमेरिकी भूगर्भ सर्वेक्षणले भूकम्प ७.४ रेक्टर स्केल र गहिराइ ३९.५ किलोमिटर रहेको बताएको छ ।

यो भूकम्पपछि, प्रशान्त सुनामी चेतावनी प्रणालीले सम्भावित सुनामीको चेतावनी दिएको छ । गत महिनाको अन्त्यमा, कामचट्का नजिकै ८.८ म्याग्निच्युडको शक्तिशाली भूकम्प गएको थियो । त्यसपछि यस क्षेत्रमा धेरै ठाउँमा सुनामी आएको थियो । यो भूकम्पको प्रभाव जापानसम्म पुगेको बताइएको छ ।

काठमाडौँ,२६ भदौ । फ्रान्समा सरकारविरुद्ध विरोध प्रदर्शन शुरू भएको छ। राष्ट्रपति इमानुएल म्याक्रोनविरुद्ध फ्रान्सका जनता सडकमा निस्किएको अन्तर्राष्ट्रिय सञ्चार माध्यमहरूले जनाएका छन् ।

समाचारअनुसार फ्रान्सको राजधानी पेरिसमा धेरै ठाउँमा आगजनी भइरहेको छ र मानिसहरूले प्रहरीमाथि ढुङ्गा प्रहार गरिरहेका छन् ।

फ्रान्सका जनता राष्ट्रपति इमानुएल म्याक्रोनको नीतिविरुद्ध सडकमा विरोध प्रदर्शन गरिरहेका छन् ।

म्याक्रोन सरकारले जनताको जीवनस्तर सुधार गर्न सक्ने एउटा पनि काम नगरेको उनीहरूको आरोप छ ।

फ्रान्सभरि लगभग ८० हजार सुरक्षा बल तैनाथ गरिएको समाचारमा उल्लेख छ ।

काठमाडौँ,२० भदौ । अफगानिस्तानमा गएको भूकम्पमा परी मृत्यु हुनेको सँख्या २२ सय बढी पुगेको छ । गत आइतबार मध्येरातमा पाकिस्तानसँग सिमा जोडिएको नांगरहार प्रान्तको जलालवाद सहरबाट १७ किलोमिटर उत्तरपूर्वी भूभागलाई केन्द्रबिन्दु बनाएर ६ म्याग्नेच्युडको भूकम्प गएको थियो।

बिहीबारसम्म मृत्यु हुनेको संख्या २ हजार २०५ पुगेको तालिबानी सरकारी अधिकारीलाई उद्धृत गर्दै अन्तर्राष्ट्रिय समाचार संस्था रोयटर्सले लेखेको छ। घाइतेहरूको संख्या ३ हजार ५ सय नाघेको छ। तीमध्ये धेरै जना गम्भीर घाइते भएकाले मृतकको संख्या बढ्न सक्ने भनिएको छ।

६ म्याग्निच्युडको भूकम्पपछि पनि पराकम्पनहरू आइरहेका छन्। दुईपटकसम्म ५ म्याग्निच्यूडभन्दा बढी तीव्रताका भूकम्प गइसकेको छ।

बिहीबार राति ८:५६ बजे ५.६ म्याग्निच्युडको भूकम्प गएको छ। सो पराकम्पनबाट थप मानिसको मृत्यु भएको रिपोर्ट आएको छैन। यद्यपि कुनार र नांगरहर क्षेत्रका मानिसहरू सेल्टरबाट बाहिर निस्किएका थिए।

यसअघि मंगलबार पनि ५.५ म्याग्निच्युडको पराकम्प आएको थियो। उक्त पराकम्पनले राहत र उद्धार कार्य प्रभावित भएको थियो।