दर्शन आचार्य दाङ ४ असोज। दाङको तुलसीपुरमा रहेको दाङ टेक्निकल प्रालिले विद्यार्थीहरुको स्वागत तथा विदाई कार्यक्रम गरेको छ। कलेजमा नयाँ भर्ना भएका विद्यार्थीहरूको स्वागत र तेस्रो वर्षबाट स्नातक हुने विद्यार्थीहरूको विदाई कार्यक्रम एकैसाथ सम्पन्न गरेको हो।

कलेजका अध्यक्ष दोर्णबहादुर ओलीको अध्यक्षता तथा प्राविधिक शिक्षा तथा व्यवसायिक तालिम परिषद् लुम्बिनी प्रदेशका उपनिर्देशक यादवप्रसाद सुवेदीको प्रमुख आतिथ्यतामा कार्यक्रम गरिएको हो।

प्रमुख अतिथि यादव प्रसाद सुवेदीले दाङ टेक्निकल प्रा.ली.ले दाङ जिल्ला तथा लुम्बिनी प्रदेशमा प्राविधिक शिक्षा विस्तारमा योगदान पुर्याएको र दक्ष स्वास्थ्य जनशक्ति उत्पादन गर्दै नेपालको स्वास्थ्य क्षेत्रमा टेवा पुर्याइरहेको बताए।

स्वास्थ्य कार्यालय दाङका प्रमुख टिबि गुरुङले विद्यार्थीहरूले आफ्नो कर्मभूमिमा गएर नेपालको स्वास्थ्य प्रणालीमा योगदान पुर्याउने विश्वास व्यक्त गरे।

राप्ती प्रादेशिक अस्पतालका मेसु पदम प्रसाद अधिकारीले सकारात्मक सोच, लगनशीलता र मेहनतकै माध्यमबाट सफलता प्राप्त हुने भन्दै विद्यार्थीहरूलाई शुभकामना व्यक्त गरे।

समाजसेवी तथा कलेज संचालक विमल रिजालले शिक्षा र मित्रतामा ठूलो शक्ति हुने भएकाले विद्यार्थीहरूले आफ्नो कार्यक्षेत्रमा त्यसलाई व्यवहारमा उतार्नुपर्ने बताए।

तुलसिपुर उद्योग वाणिज्य संघका अध्यक्ष विनिल केसीले विद्यार्थीहरूले अब प्राविधिक क्षेत्रमा प्रवेश गर्दै धैर्य, लगनशीलता र परिवारको सपना पुरा गर्ने जिम्मेवारी भएको बताए।

पत्रकार दिपक बोहराले व्यवसायिक ज्ञानले जीवन उपयोगी हुने हुँदा कलेजले तुलसिपुर क्षेत्रको शैक्षिक पाईलाको रूपमा भूमिका खेलेको बताए।

कार्यक्रममा २०० भन्दा बढी विद्यार्थीको सहभागिता रहेको थियो। नवप्रवेशी विद्यार्थीलाई स्वागत गर्दै तेस्रो वर्षका स्नातक विद्यार्थीहरूलाई विदाई गरिएको थियो।

विद्यार्थीहरूले कार्यक्रममा यसलाई केवल विदाई नभएर नयाँ जीवनको सुरुवातको अवसर भएको बताउँदै कलेजले किताबका पृष्ठ मात्र नभई जीवनका पाठ पनि सिकाएको प्रतिक्रिया दिएका थिए।

कार्यक्रमका सभापति तथा कलेजका अध्यक्ष दोर्ण बहादुर वलीले दाङ टेक्निकललाई प्राविधिक तथा व्यवसायिक शिक्षामा उत्कृष्ट कलेजको रूपमा स्थापित गर्न निरन्तर प्रयासरत रहेको उल्लेख गर्दै विद्यार्थी, प्रशिक्षक र समाजको सहकार्य अपरिहार्य रहेको बताए।

कार्यक्रम सामान्य चिकित्सा शास्त्र तेस्रो वर्षमा अध्ययनरत छात्रा कमला बोहरा र छात्र बलराम डाँगीको स्वागत मन्तव्यबाट सुरु भएको थियो। कार्यक्रममा विद्यार्थीहरूले नृत्य, गजल, मुक्तक र सांगीतिक प्रस्तुति दिएका थिए। कार्यक्रम कलेजका प्रिन्सिपल अशोक कुमार यादव र दोस्रो वर्षकी विद्यार्थी इन्द्रा वलीले सहजीकरण गरेका थिए ।

सोही अवसरमा तेस्रो वर्षका विद्यार्थी किरण केसी (बि) लाई ‘जेहेन्दार विद्यार्थी छात्रवृत्ति’ स्वरुप १ लाख २१ हजार दुई सय रुपैयाँ प्रदान गरिएको कलेजले जनाएको छ।

कार्यक्रममा तुलसिपुर सिटी हस्पिटलका निर्देशक हेमराज बस्नेत, प्रशिक्षक डा. शिशिर पोखरेल, पत्रकार दिपक वोहरा, दर्शन आचार्य, चेतन वली लगायतका उपस्थित थिए।

दाङ, ३ असोज । निजी तथा आवासीय विद्यालय अर्गनाइजेसन नेपाल (प्याब्सन) दाङले शिक्षा, समानता र समृद्धि निर्माणमा सबैलाई हातेमालो गर्न आह्वान गरेको छ।

संविधान दिवस २०८२ को अवसरमा आज शुक्रबार शुभकामना सन्देश जारी गर्दै अध्यक्ष निर्मल न्यौपाने र सचिव आदिम केसीले हस्ताक्षर गरेका संयुक्त सन्देशमार्फत संविधान दिवसलाई राष्ट्रिय गौरवको दिनका रूपमा स्मरण गरिएको छ।

सन्देशमा भनिएको छ, “संविधानले हामी सबैलाई समान अधिकार, अवसर र सामाजिक न्यायको ग्यारेन्टी दिएको छ। यसको प्रभावकारी कार्यान्वयन हाम्रो साझा जिम्मेवारी हो।”

शिक्षामा गुणस्तर वृद्धि गर्दै समान पहुँच सुनिश्चित गर्न प्रतिबद्धता व्यक्त गरिएको छ। साथै, विद्यार्थीलाई राष्ट्रिय एकता र सामाजिक सद्भावको अभियन्ता बनाउन शिक्षालयहरूले विशेष ध्यान दिनुपर्नेमा जोड दिइएको छ।

“हाम्रो मुलुकको समृद्ध भविष्य शिक्षामा निहित छ। संविधानले दिएको अधिकारलाई व्यवहारमा उतार्दै शिक्षा, शान्ति र विकासतर्फ एकजुट भई अघि बढ्नुपर्ने आवश्यकता अझ बढेको छ,” सन्देशमा उल्लेख छ।

संविधान दिवसलाई राष्ट्रिय एकता, सहकार्य र सकारात्मक सोचका साथ मनाउनुपर्ने भन्दै आगामी दिनमा संविधानले मार्गदर्शन गर्ने मूल्य–मान्यताहरू आत्मसात् गर्दै नेपाललाई शैक्षिक, सामाजिक र आर्थिक दृष्टिले समृद्ध बनाउन सबैलाई हातेमालो गर्न आह्वान गरिएको छ।

दाङ, २६ भदौ । घोराही उपमहानगरपालिकाले पालिकाभित्र रहेका सम्पूर्ण विद्यालयमा पठनपाठन अनिश्चित कालका लागि स्थगित गरिएको बताएको छ।

मुलुकमा उत्पन्न विषम परिस्थितिका कारण घोराही उपमहानगरपालिकाभित्रका सबै सामुदायिक तथा संस्थागत विद्यालयमा पठनपाठन अनिश्चितकालका लागि स्थगित गरिएको हो।

उपमहानगरपालिकाका प्रमुख प्रशासकीय अधिकृत ऋषिराम के.सी.ले शुक्रबार सूचना जारी गर्दै २०८२ भदौ २७ गतेदेखि लागू हुने गरी अर्को सूचना प्रकाशित नभएसम्मका लागि कक्षाहरु बन्द गरिएको जानकारी गराएका हुन्।

यस निर्णयसँगै घोराहीका सम्पूर्ण विद्यालयमा शिक्षण गतिविधि रोकिएको छ।

काठमाडौँ,२५ भदौ । पूर्वाञ्चल विश्वविद्यालयले स्नातक र स्नातकोत्तर तहका सम्पूर्ण परीक्षा स्थगित गर्ने निर्णय गरेको छ ।

विश्वविद्यालयको परीक्षा व्यवस्थापन कार्यालयले एक सूचना प्रकाशित गर्दै देशमा उत्पन विषम परिस्थितिका कारण स्नातक र स्नातकोत्तर तहका सबै परीक्षा अर्को सूचना नभएसम्मका लागि स्थगित गरिएको जानकारी दिएको छ ।

दाङ,२१ भदौ । दाङको तुलसीपुरमा रहेको ज्योति एजुकेशन फाउण्डेसनले कक्षा ११ मा नयाँ भर्ना भएका विद्यार्थीहरूलाई स्वागत गरेको छ। विद्यालयका कक्षा १२ मा अध्ययनरत विद्यार्थीहरूको आयोजनामा शनिबार आयोजना गरिएको कार्यक्रममार्फत नयाँ विद्यार्थीहरूलाई स्वागत गरिएको हो।

कार्यक्रमका प्रमुख अतिथि तथा राष्ट्रिय परीक्षा बोर्ड, दाङका प्रमुख कमल प्रकाश अर्यालले ज्ञान ज्योति कलेज जिल्लाको गौरव गर्ने शैक्षिक संस्था भएको भन्दै प्रशंसा गरे। उनले यस वर्ष जिल्लामा ६४ प्रतिशतभन्दा बढी विद्यार्थीले परीक्षा उर्तिण गरेको र त्यसमध्ये ज्ञान ज्योति कलेज पनि सफल भएको बताए।

‘पढाई केवल अंक ल्याउने साधन मात्र होइन, जीवनलाई अनुशासनमा ल्याउने अभ्यास र सफलताका लागि अर्को अवसर हो। उनले भने–‘ शिक्षा कुनै पनि समाजको मेरुदण्ड हो। शिक्षाबिना समृद्ध राष्ट्रको परिकल्पना गर्न सकिन्न।’

कार्यक्रममा नयाँ भर्ना भएकी कक्षा ११ की प्रेजिना रावतले कलेजको संस्कृति र परम्परामा आफूलाई पनि समेटिन पाउँदा आभारी भएको बताइन्। उनले शिक्षक–शिक्षिकाहरू र अग्रज विद्यार्थीहरूले आगामी दिनमा शिक्षा कस्तो दिने भन्नेमा महत्वपूर्ण भूमिका खेल्ने बताइन्।

तुलसीपुर उपमहानगरपालिका शिक्षा शाखा अधिकृत मनबहादुर खड्काले भने, विद्यार्थीले रोज्ने वातावरण र संगतले भविष्य निर्धारण गर्ने भएकाले सिपयुक्त र संस्कारयुक्त शिक्षा ग्रहण गर्नुपर्नेमा जोड दिए।

कार्यक्रममा तुलसीपुर–६ का वडाध्यक्ष दुजमान भण्डारी, नेपाल पत्रकार महासंघ दाङका उपाध्यक्ष ओपेन्द्र बस्नेत लगायतले फाउण्डेसनका शैक्षिक गतिविधिको प्रशंसा गरेका थिए। साथै, कक्षा १२ मा नेपाल प्रथम, जिल्ला प्रथम र विभिन्न विश्वविद्यालय छात्रवृत्तिधारी विद्यार्थीका रूपमा नगदसहित सम्मान गरिएको थियो।

कार्यक्रमको मुख्य आकर्षणका रुपमा नेपाली संगीत जगतका चर्चित गायक निशान भट्टराई थिए। उनले आफ्नो प्रस्तुति मार्फत विद्यार्थीलाई मनोरञ्जन गराए र लोकप्रिय गीतहरू प्रस्तुत गर्दै कार्यक्रममा उर्जा थपेका थिए । ।

यसैगरी, विद्यार्थीहरूले विभिन्न जातजाति, भाषा र संस्कृतिलाई झल्काउने सांस्कृतिक प्रस्तुतिहरू पनि कार्यक्रममा राखेका थिए।

कार्यक्रम कक्षा १२ का विद्यार्थी विविद्व सेजवालको अध्यक्षतामा भएको थियो । कक्षा १२ की समीक्षा चन्दो स्वागत मन्तव्यबाट सुरु भएको कार्यक्रमको सहजीकरण शिक्षक सन्तोष केसी र सोमराज बस्नेतले गरेका थिए।

दाङ, २० भदौ । नेपाल टेलिकमले आइसिटी ल्याबका लागि विद्यालयमा उपकरणहरू प्रदान गरेको छ। डिजिटल नेपाल फ्रेमवर्क २०७६ अन्तर्गत नेपाल टेलिकम शाखा कार्यालय तुल्सीपुर, दाङले प्यूठानको श्री गणेश माध्यमिक विद्यालय, माण्डवी गाउँपालिका–१ तिराममा ICT ल्याब स्थापना गर्न कम्प्युटरसहितका उपकरणहरू प्रदान गरेको हो।
सामाजिक उत्तरदायित्व (CSR) कार्यक्रमअन्तर्गत विद्यालयलाई १२ थान कम्प्युटर, १२ थान UPS र १ थान प्रिन्टर उपलब्ध गराइएको नेपाल टेलिकम तुलसीपुर कार्यालयले जनाएको छ।
सामग्री हस्तान्तरण कार्यक्रमम्मा  नेपाल टेलिकम शाखा कार्यालय तुल्सीपुर दाङका प्रमुख ब.ई. प्रवीण कुमार चौधरीले विद्यालयहरूमा सूचना–प्रविधिको पहुँच विस्तार गर्नु नै यस कार्यक्रमको मुख्य उद्देश्य भएको बताए। उनले कम्प्युटर र इन्टरनेटको प्रयोगले विद्यार्थीहरूलाई नयाँ ज्ञान तथा सीप सिक्न सहयोग पुग्नेछ बिश्वास ब्यक्त गरे । प्रविधिको उचित प्रयोगले उनीहरूको भविष्य निर्माणमा टेवा पुर्‍याउने बताए ।
विद्यालयका प्रधानाध्यापक बालाराम पुन मगरले ICT ल्याब स्थापना विद्यालयका लागि ठूलो अवसर भएको भन्दै खुशी व्यक्त गरे। “यसले विद्यार्थी मात्र नभई शिक्षकहरूलाई पनि प्रविधिमैत्री बनाएको छ। सिकाउन–पढाउन सजिलो भएको छ,” उनले भने।
सन् २०३० भित्र दिगो विकास लक्ष्य हासिल गर्दै ‘समृद्ध नेपाल, सुखी नेपाली’ को परिकल्पनालाई मूर्त रूप दिन डिजिटल नेपाल फ्रेमवर्क २०७६ अन्तर्गत यस्ता कार्यक्रमहरू सञ्चालन भइरहेको नेपाल टेलिकमले जनाएको छ। फ्रेमवर्कले शिक्षा, स्वास्थ्य, कृषि, ऊर्जा, पर्यटन, वित्त, सहरी पूर्वाधार र डिजिटल फाउन्डेसनजस्ता क्षेत्रलाई प्राथमिकतामा राखी डिजिटल नेपाल निर्माणको अभियानलाई अघि बढाइरहेको छ।

दाङ, १९ भदौ । नेपाल रेडक्रस सोसाइटीको ६३औँ स्थापना दिवसको अवसरमा रक्त समूह परिक्षण गरिएको छ । स्थापना दिवसको अवसरमा बिहिबार विद्यालयमा पुगेर नेपाल रेडक्रस सोसाइटी दाङले रक्त समूह परीक्षण कार्यक्रम सम्पन्न गरेको हो । रेडक्रस दाङको प्राविधिक सहयोग र जुनियर रेडक्रस सर्कल माध्यमिक विद्यालय कालाखोलाको आयोजनामा उक्त कार्यक्रम भएको हो।

जुनियर रेडक्रस सर्कलकी अध्यक्ष रितु आचार्यको अध्यक्षता तथा विद्यालयका प्रधानाध्यापक राजीव ओझाको प्रमुख आतिथ्यमा सम्पन्न कार्यक्रममा रेडक्रस दाङका सदस्य भीमलाल मरासिनी र जुनियर सदस्य होमबहादुर दाङीले रेडक्रसको महत्वबारे प्रकाश पारेका थिए।

सो अवसरमा दुईसय ३० जनाले रक्त समूह परीक्षण गराएका थिए। कार्यक्रम सहायक प्रधानाध्यापक छवि न्यौपानेको स्वागत मन्तव्यबाट सुरु भएको थियो भने सञ्चालन भूपेन्द्र न्यौपानेले गरेका थिए।

काठमाडौं,१७ भदौ । विद्यालय शिक्षा विधेयकका प्रावधानलाई निजी विद्यालय नियमनका नाममा अन्त्यतर्फ लैजाने प्रयास भएको भन्दै राष्ट्रिय निजी तथा आवासीय विद्यालय एसोसिएसन नेपाल (नेसनल प्याब्सन)ले आपत्ति जनाएको छ। लामो समयपछि आएको विद्यालय शिक्षा ऐन अहिले संसद्मा विधेयकका रूपमा छलफलमा रहेको छ।

नेसनल प्याब्सनले सोमबार पत्रकार सम्मेलन गर्दै प्रस्तावित विधेयकमा उल्लेख भएका निजी विद्यालयलाई गैरनाफामूलक बनाउने, पूर्ण छात्रवृत्ति, सामाजिक सुरक्षा कोषलगायतका प्रावधानप्रति असन्तुष्टि जनाएको हो। अन्य निजी विद्यालय संगठनहरूले आन्दोलनको घोषणा गरिरहेका बेला एनप्याब्सन केन्द्रीय समितिले भने माग सार्वजनिक गर्दै विरोध जनाएको छ।

एनप्याब्सनका वरिष्ठ उपाध्यक्ष सुवोधकुमार डाँगीले विधेयकले निजी लगानीका विद्यालयलाई नियमनको नाममा अन्त्य गर्न खोजिएको आरोप लगाए। उनले निजी विद्यालयहरूले राज्यलाई कर बुझाउँदै आएको र सबै विद्यालयहरूले प्रदान गर्दै आएको १० प्रतिशत छात्रवृत्ति यथावत् राख्न आग्रह गरे।

केन्द्रीय समिति अध्यक्ष गीता क्षेत्री राणाले ‘पूर्ण छात्रवृत्ति’ को व्यवस्था व्यावहारिक नभएको बताइन्। उनका अनुसार पूर्ण छात्रवृत्तिमा अध्ययन गर्ने विद्यार्थीलाई पोसाक, पुस्तक, स्टेशनरी, आवास, भोजन, यातायातसमेत उपलब्ध गराउँदा शुल्क बढ्ने र त्यसको भार अभिभावकमा पर्ने भएकाले “पूर्ण” भन्ने शब्द हटाउनुपर्ने माग राखिएको हो।

राणाले विद्यालयलाई क्रमशः गैरनाफामूलक बनाउनुपर्ने भनाइ पनि अव्यावहारिक रहेको उल्लेख गरिन्। उनका अनुसार कुनै पनि व्यवसाय नाफारहित हुन नसक्ने भएकाले विद्यालयलाई नाफारहित बनाउन खोज्नुले शैक्षिक र भौतिक विकासमा अवरोध पुर्‍याउँछ। शुल्क निर्धारणको मापदण्ड विधेयकमा नै तोकिएको अवस्थामा “गैरनाफामूलक” भन्ने शब्दावली आवश्यक नरहेको उनको भनाइ छ।

पूर्वप्राथमिक शिक्षा सम्बन्धमा पनि नेसनल प्याब्सनले आपत्ति जनाएको छ। अभिभावकले शुल्क तिरेर ३ वर्षको पूर्वप्राथमिक कक्षा लिइरहेका बेला त्यसलाई कानुनले रोक्नु व्यावहारिक नहुने उसले प्रष्ट पारेको छ। यस्तै, विद्यालयलाई प्रत्येक वर्ष एक–एक कक्षा थप्ने स्वीकृति दिने व्यवस्थाभन्दा तहगत अनुमति दिने प्रावधान व्यावहारिक हुने सुझाव दिइएको छ।

शिक्षक तथा कर्मचारीको तलबभत्ताबारे नेसनल प्याब्सनले हाल प्रचलित ६०/४० को व्यवस्था (६० प्रतिशत तलबभत्ता र ४० प्रतिशत सञ्चालन, घरभाडा, ब्याज र छात्रवृत्तिमा खर्च) लागू गर्नुपर्ने आग्रह गरेको छ। विद्यार्थी संख्या र शुल्क कम भएका विद्यालयमा सरकारले तोकेको तलब दिन नसक्ने भएकाले विद्यालय वर्गीकरण आवश्यक रहेको उसले स्पष्ट पारेको छ।

सामाजिक सुरक्षा कोषसम्बन्धमा एनप्याब्सनका सचिव तेन्जिङ भुटियाले कोष सरकारी आधारभूत तलबमा आधारित हुने भएकाले धेरै विद्यालयमा व्यावहारिक नहुने बताए। उनका अनुसार यसलाई सबै विद्यालयमा अनिवार्य गर्दा विद्यालय बन्द हुने, शिक्षक–कर्मचारी बेरोजगार हुने अवस्था आउन सक्ने भएकाले ‘क’ श्रेणीबाहेक अन्य विद्यालयका लागि स्वेच्छिक बनाउनुपर्ने माग गरिएको छ।

त्यस्तै, उच्च शिक्षा छात्रवृत्तिमा सामुदायिक विद्यालयमा मात्र अध्ययन गरेका विद्यार्थीलाई अवसर दिने प्रावधान हटाउनुपर्ने माग पनि गरिएको छ। निजी विद्यालयमा अध्ययनरत जेहेनदार विद्यार्थीलाई अन्याय गर्ने यस्तो व्यवस्थाले विभेद सिर्जना गर्ने भन्दै पुनर्विचार गर्न नेसनल प्याब्सनले सरकारको ध्यानाकर्षण गराएको छ।

दाङ, १२ भदौ । विद्यालय शिक्षा विधेयकको विरोधमा निजी तथा आवासीय विद्यालय अर्गनाइजेसन नेपाल (प्याब्सन) ले आज देशभरका प्रमुख जिल्ला अधिकारीमार्फत प्रधानमन्त्रीलाई ज्ञापनपत्र बुझाएको छ। विधेयकमा रहेका त्रुटि सच्याउन माग गर्दै प्याब्सनले चरणबद्ध आन्दोलन सुरु गरेको हो।

दाङमा पनि जिल्ला प्रशासन कार्यालय अगाडि कोणसभा आयोजना गरी ज्ञापनपत्र बुझाइएको छ। कोणसभाका वक्ताहरूले विधेयक निजी विद्यालयलाई धरासायी बनाउन ल्याइएको भन्दै कडा आपत्ति जनाए।

प्याब्सनका पूर्व केन्द्रीय सल्लाहकार नारायण अधिकारीले निजी विद्यालयहरूले ३४ प्रतिशत शैक्षिक भार बोकेर राज्यलाई सघाइरहेका बेला सरकारले उल्टै प्रहार गरेको आरोप लगाए। उनले सामुदायिक विद्यालयको गुणस्तरमा ध्यान दिन नसकेको राज्यले निजी शिक्षामा आघात पुर्‍याउन खोज्नु अस्वीकार्य भएको बताए। शिक्षा विधेयक संशोधन नभए विद्यालय बन्द गरेर साँचो राज्यलाई बुझाउने चेतावनी समेत दिए।

प्याब्सनका निवर्तमान केन्द्रीय सचिव यादव गिरीले ८ हजारभन्दा बढी निजी विद्यालयमाथि कुठाराघात गर्ने गरी ल्याइएको विधेयकले मुलुकलाई शैक्षिक दृष्टिले परनिर्भर बनाउन खोजेको टिप्पणी गरे।

केन्द्रीय सदस्य महेन्द्र अधिकारीले घरजग्गा बन्धकी राखेर सञ्चालनमा आएका विद्यालयलाई नाफारहित कम्पनीमा दर्ता गर्नुपर्ने प्रावधान विरोधाभाषपूर्ण भएको बताए। उनले शिक्षा विकासमा निजी क्षेत्रको योगदानलाई बेवास्ता गरिएको भन्दै असन्तुष्टि व्यक्त गरे।

लुम्बिनी प्रदेश सल्लाहकार केशव थापाले शैक्षिक विकासलाई पछाडि धकेल्ने खालको विधेयकप्रति पुनर्विचार गर्न सरकारलाई आग्रह गरे।

प्याब्सन दाङ जिल्ला अध्यक्ष निर्मल न्यौपानेले निजी विद्यालयलाई धरापमा पार्ने नियत स्पष्ट भएकाले आन्दोलन मर्यादित तरिकाले अघि बढाइने बताए।

उनको अध्यक्षतामा भएको कोणसभामा आन्दोलन परिचालन समितिका संयोजक तथा वरिष्ठ उपाध्यक्ष बिरेन्द्र चन्दले आन्दोलनबारे प्रकाश पारेका थिए। कार्यक्रमको सहजीकरण सचिव आदिम केसीले गरेका थिए।

कोणसभापछि प्याब्सन दाङले प्रमुख जिल्ला अधिकारी विश्वप्रकाश अर्याललाई ज्ञापनपत्र बुझाएको थियो। ज्ञापनपत्र बुझ्दै प्रजिअ अर्यालले माग सरकारसम्म पुर्‍याइने प्रतिबद्धता व्यक्त गरे।

काठमाडौं,५ भदौ । प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिले विद्यालय शिक्षा विधेयक, २०८० पारित गरेको छ।

बिहीबार सिंहदरबारमा बसेको बैठकले विधेयक सम्बन्धी समितिको प्रतिवेदनमाथि छलफल गर्दै पारित गरेको हो। तर, केही दफामा माओवादी केन्द्र, रास्वपा र राप्रपाका सांसदहरूले फरक मत राखेका छन्।

माओवादी सांसदहरूले हाल कार्यरत बालविकास सहयोगीलाई उमेरको हद नलाग्ने गरी शिक्षक प्रतिस्पर्धामा सहभागी गराउनुपर्ने माग गरेका छन्। साथै, शहीद, बेपत्ता, घाइते र विपन्न परिवारका विद्यार्थीलाई आवास तथा पोसाकको व्यवस्था सरकारकै जिम्मेवारीमा गर्नुपर्ने उनीहरूको धारणा छ।

यसैगरी, सांसदहरू देवेन्द्र पौडेल, रेखा शर्मा, महिन्द्र राय यादव, ज्ञानु बस्नेत, सुमना श्रेष्ठ र विना जैसवालले बालविकास र छात्रवृत्तिबारे फरक मत राखेको समिति सभापति अम्मर बहादुर थापाले जानकारी दिए।

थापाले मन्त्रालयले स्वीकार गरेका विषय र भाषा मिलाउन समिति सचिवालयलाई निर्देशन दिँदै विधेयकसम्बन्धी प्रतिवेदन आगामी संसद बैठकमा प्रस्तुत हुने बताए।