दाङ,२७ साउन । अन्तर्राष्ट्रिय युवा दिवसको अवसर पारेर तुलसीपुर नगर जेसीजले वित्तीय सचेतना कार्यक्रम गरेको छ। आर्थिक समृद्धिका लागि हाम्रो पहल भन्ने मूल नाराका साथ’ protect your money’शीर्षकमा वित्तीय सचेतना दिएको हो।

नगर जेसीज वर्ष २०२५ का अध्यक्ष सन्दिप भुसालको अध्यक्षता तथा राप्ती बबै क्याम्पस तुलसीपुरका क्याम्पस प्रमुख गणेश पार्देको प्रमुख अतिथितामा उक्त कार्यक्रम भएको हो।

कार्यक्रममा हिमाल एकाडेमी र ग्रेट अरनीको विद्यालयका विद्यार्थीहरूको सहभागिता रहेको थियो।

कार्यक्रममा एनआइसी एसिया बैंक तुलसीपुरका शाखा प्रमुख राजीव ओलीले ‘बचत कसरी गर्ने’ भन्ने विषयमा प्रशिक्षण दिएका थिए।

ओलीले बैंक कर्मचारीको दृष्टिकोणबाट सेफ मनीको सिद्धान्त व्याख्या गर्दै नियमित बचतको आवश्यकता, आम्दानी र खर्चको सन्तुलन, जोखिम व्यवस्थापन, डिजिटल बैंकिङ प्रयोग गर्दा अपनाउनुपर्ने सावधानी, र ठगी वा साइबर अपराधबाट जोगिने उपायबारे विद्यार्थीलाई जानकारी गराए। उनले बचतलाई केवल पैसा जम्मा गर्ने कार्य नभई आर्थिक सुरक्षा र भविष्य निर्माणको आधारका रूपमा लिनुपर्नेमा जोड दिए।

कार्यक्रममा नगर जेसीजका पूर्व अध्यक्ष सूर्य शर्माले नेपालमा उत्पादनलाई टिकाउने वातावरणको कमी रहेको उल्लेख गर्दै बाल्यकालदेखि नै विद्यार्थीमा उद्यमशील सोच र सीप विकास गर्नुपर्नेमा जोड दिए। उनले सार सीप सिकाउन र उद्यमशीलता प्रवर्द्धन गर्न नसके अबको शिक्षा असफल हुने धारणा व्यक्त गरेका थिए।

जेसीजका निवर्तमान अध्यक्ष पूर्णविक्रम डाँगी कार्यक्रमको स्वागत मन्तव्य व्यक्त गरेका थिए भने पूर्व महासचिव कमल प्रकाश शर्माले जेसिस आस्था पाठ गरेका थिए । कार्यक्रमको सहजीकरण महासचिव बुद्धिराज सापकोटाले गरेका थिए।

दाङ,२५ साउन। तुलसीपुर उपमहानगरपालिकाको मूल गेटमा राहत शिक्षकहरू धर्नामा बसेका छन्। माग पूरा नभएको भन्दै नेपाल राहत शिक्षक स्थानीय कार्यसमिति तुलसीपुरको अगुवाइमा धर्ना कार्यक्रम गरिएको हो।

नेपाल राहत शिक्षक स्थानीय कार्यसमिति तुलसीपुरका सचिव प्रकाश शर्माका अनुसार, गत वर्ष शिक्षक महासंघले काठमाडौंमा गरेको २९ दिन लामो आन्दोलनपछि भएका सहमति तथा प्रतिबद्धता अहिलेसम्म कार्यान्वयन नभएकाले देशभर एकैसाथ धर्ना गर्न बाध्य भएको बताए।

“पछिल्लो सहमतिअनुसार सबै राहत शिक्षकको स्थायी व्यवस्थापनको प्रक्रिया अघि बढाउनुपर्नेमा शिक्षा समिति तयार देखिएन,” उनले भने, “त्यही निराशाजनक स्थितिका कारण आज दाङलगायत देशका ७५३ वटै स्थानीय तहमा एकसाथ धर्ना कार्यक्रम गरिएको हो।”

शर्माका अनुसार तुलसीपुर उपमहानगरपालिकाको मूल गेटमा जारी धर्नाले पालिकाको दैनिक कामकाजमा अवरोध नगरेको छ। धर्ना आज साँझ ५ बजेसम्म चल्नेछ। त्यसपछि केन्द्रीय समिति बैठक बसेर अगाडि थप आन्दोलनका कार्यक्रमहरू तय गरिने उनले जानकारी दिए।

काठमाडौं ,२४ साउन । पर्वतका ३१ सामुदायिक विद्यालय विद्यार्थीविहीन भएका छन् । बढ्दो बसाइँसराइ र गुणस्तरीय शिक्षाको खोजीमा गाउँ रित्तिँदै जाँदा ती सामुदायिक विद्यालय विद्यार्थीविहीन भएका हुन् । जिल्लाका सातै पालिकामा रहेका यी विद्यालयमध्ये अधिकांश आधारभूत र प्राथमिक तहका हुन्।

जिल्ला शिक्षा समन्वय एकाइका अनुसार विहादी गाउँपालिकामा २, मोदी गाउँपालिकामा ९, फलेवास नगरपालिकामा ६, कुश्मा नगरपालिकामा ८, जलजला गाउँपालिकामा ४ र पैयूँ गाउँपालिकामा २ विद्यालयमा विद्यार्थी सङ्ख्या शून्य छ। यीमध्ये फलेवास–५ को ध्रुवनमुना माध्यमिक विद्यालयसमेत छन्।

विद्यार्थी नभए पनि विद्यालय समायोजनको प्रक्रिया सुरु भएको छैन। स्थानीय तहहरूले शिक्षकलाई विद्यार्थी भएको विद्यालयमा खटाउने कार्य नगरेको एकाइका प्रमुख मतिलाल चपाईले बताए। यसले राज्यको बजेट दुरुपयोग भएको स्थानीयहरूले आरोप लगाएका छन्।

फलेवासका वडाध्यक्ष गङ्गानारायण श्रेष्ठका अनुसार विद्यार्थी नभए पनि भविष्यमा विद्यार्थी आउन सक्ने भन्दै विद्यालय समायोजन नगरेको बुझिएको छ। कतिपय जनप्रतिनिधिले राजनीतिक संरक्षणका कारण र करार, राहत शिक्षक र कार्यालय सहयोगीको रोजगारी जाने डरले पनि विद्यालय समायोजनमा चासो नदेखाएको जनाएका छन्।

काठमाडौँ, २२ साउन। विद्यालय शिक्षा विधेयकसम्बन्धी छलफलमा प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिले शिक्षक महासंघको सदस्यता र शिक्षक बढुवा प्रणालीसम्बन्धी महत्त्वपूर्ण प्रस्तावहरू पारित गरेको छ।

समितिको बिहीबार बसेको बैठकले परामर्श उपसमितिबाट सहमति जुटाइएको संशोधन प्रस्ताव पारित गर्दै अबदेखि शिक्षक महासंघको सदस्य रहेका शिक्षक प्रधानाध्यापकमा नियुक्त भएलगत्तै सदस्यता स्वतः निष्क्रिय हुने व्यवस्था गरेको हो।

नयाँ प्रावधानअनुसार प्रधानाध्यापकको पदमा रहँदासम्म उनीहरूले महासंघको कुनै पनि गतिविधिमा संलग्न हुन पाउने छैनन्। यद्यपि, सदस्यता निष्क्रिय हुँदा पनि शिक्षकले पाउने सेवा, सुविधा र जिम्मेवारीमा भने कुनै कटौती नहुने प्रस्टाइएको छ।

महासंघका पदाधिकारीहरूलाई दिइने काजसम्बन्धी व्यवस्थाको लागि भने छुट्टै प्रस्ताव विधेयकमा समावेश गरिएको छ।

तीन आधारमा बढुवा
समितिको बैठकले शिक्षकको बढुवा प्रणालीलाई सुधार गर्दै अब तीनवटा स्पष्ट आधार अपनाउने निर्णय पनि गरेको छ। नयाँ व्यवस्था अनुसार आन्तरिक प्रतियोगिता, जेष्ठता र कार्यसम्पादन मूल्याङ्कन तथा कार्यक्षमताको मूल्याङ्कन लाई बढुवाको आधार बनाइनेछ।

यसअघि कायम रहेको आन्तरिक प्रतियोगिता र समय अनुसार स्वतः बढुवा हुने प्रणालीलाई संशोधन गर्दै मूल्यांकनलाई मुख्य मानक बनाउने सहमति बनेको हो।

दाङ, २०साउन। लुम्बिनी प्रदेश सरकारका सामाजिक विकास मन्त्री जन्मजय तिमिल्सिनाले कक्षा १२ को परीक्षामा उत्तीर्ण भएका विद्यार्थीलाई बधाई ज्ञापन गरेका छन्।

राष्ट्रिय परीक्षा बोर्डद्वारा साउन १९ गते प्रकाशित नतिजामा लुम्बिनी प्रदेश सहित देशभरका वर्गीकृत विद्यार्थीहरूलाई बधाई ज्ञापन गरेका हुन्।

मंगलबार एक विज्ञप्ति जारी गर्दै उनले कक्षा १२ मा उत्तीर्ण अर्थात् वर्गीकृत भएका सम्पूर्ण विद्यार्थीलाई बधाई ज्ञापन गरेका हुन्।

राष्ट्रिय परीक्षा बोर्डका अनुसार देशभरबाट सहभागी ३ लाख ९६ हजार ३४७ मध्ये २ लाख ४२ हजार ४६५ जना परीक्षार्थी वर्गीकृत भएका छन्।

राष्ट्रिय तथ्यांकअनुसार ६१.१७ प्रतिशत विद्यार्थी वर्गीकृत भएका छन् भने लुम्बिनी प्रदेशमा नियमित परीक्षार्थी ६६ हजार ८६ जना मध्ये ३६ हजार ७६३ जना (५५.६३ प्रतिशत) विद्यार्थी वर्गीकृत भएका छन्।

तीमध्ये ३.६१ जिपिए देखि ४ जिपिएसम्म १ हजार ५४३ जना, ३.२१ देखि ३.६० जिपिएसम्म ८ हजार ९९ जना, २.८१ देखि ३.२० जिपिएसम्म १४ हजार ४४७ जना रहेका छन्।

अवर्गीकृत परीक्षार्थीको सङ्ख्या लुम्बिनीमा २९ हजार ३२३ रहेको छ। मन्त्री तिमिल्सिनाले अवर्गीकृत विद्यार्थीहरूलाई आगामी परीक्षामा उत्कृष्ट प्रदर्शनका लागि शुभकामना व्यक्त गर्दै, आफूहरू सधैं विद्यार्थी हितमा काम गर्ने प्रतिबद्धता जनाए।

परीक्षा व्यवस्थापनमा संलग्न शिक्षक, अभिभावक, राष्ट्रिय परीक्षा बोर्ड, प्रदेश तथा जिल्ला परीक्षा समिति, सुरक्षा निकाय, सञ्चारमाध्यम र अन्य सरोकारवालाहरूलाई समेत उनले आभार व्यक्त गरे

हेर्नुहोस् विज्ञप्ति

दाङ, २० साउन । दाङको तुलसीपुरस्थित ज्ञान ज्योति माध्यमिक विद्यालयले कक्षा १२ को परीक्षामा ऐतिहासिक सफलता हासिल गरेको छ । विद्यालयले जिल्लामात्र होइन, देशभरकै ध्यान खिच्न सफल भएको छ।

राष्ट्रिय परीक्षा बोर्डले सोमबार सार्वजनिक गरेको नतिजाअनुसार विज्ञान संकायतर्फ विद्यालयका छात्र कृष्ण गिरीले ३.९६ GPA हासिल गरी नेपालभरि प्रथम स्थान प्राप्त गरेका छन्। यो सफलता ज्ञान ज्योतिमात्र होइन, दाङ र लुम्बिनी प्रदेशका लागि गर्वको विषय बनेको छ।

त्यस्तै, व्यवस्थापन संकायतर्फ सन्दीप वलीले ३.९० GPA ल्याउँदै दाङ जिल्लामै शीर्ष स्थान हात पार्न सफल भएका छन्।

विद्यालयका भाइस प्रिन्सिपल मनोज कुमार केसीका अनुसार, यो उल्लेखनीय सफलता विद्यालयको शैक्षिक उत्कृष्टता र विद्यार्थीहरूको कडा मेहनतको प्रतिफल हो।

विद्यालयका सिइओ सुरेन्द्र जिसीले सफलताको श्रेय विद्यालयको दृढ नेतृत्व, कुशल व्यवस्थापन, अनुभवी शिक्षकहरूको समर्पण, साथै अनुशासित र प्रतिभाशाली विद्यार्थीहरूको निरन्तर प्रयासलाई दिएका छन्।

ज्ञान ज्योति माविले कक्षा ११–१२ पछि उच्च शिक्षा तहमा समेत BBA, BSc CSIT, BCA, BSc, BBS, BA लगायतका कार्यक्रमहरू अत्याधुनिक सुविधासहित सञ्चालन गर्दै आएको छ।

लुम्बिनी प्रदेशसहित पश्चिम नेपालकै एक अग्रणी शैक्षिक संस्थाका रूपमा परिचित ज्ञान ज्योति माविले विगत वर्षहरूमा पनि विभिन्न संकाय र तहमा उल्लेखनीय नतिजा ल्याउँदै आएको छ।

काठमाडौँ,१९ साउन । राष्ट्रिय परीक्षा बोर्डले कक्षा १२ को नतिजा सार्वजनिक गरेको छ। सार्वजनिक नतिजा अनुसार ६१.१७ प्रतिशत विद्यार्थी उत्तीर्ण भएका छन् भने ३८.८३ प्रतिशत विद्यार्थी ननग्रेड भएका छन्।

निर्धारित तालिका अनुसार परीक्षा ११ वैशाखमा हुने तय भएको थियो, तर आन्दोलनका कारण परीक्षा २१ वैशाखदेखि सुरु भएको थियो। यस वर्षको परीक्षामा देशभरबाट ५ लाख ११ हजार ५ सय २५ जना परीक्षार्थी सहभागी भएका थिए।

बोर्डले नतिजा वेबसाइट, एसएमएस र मोबाइल एपमार्फत हेर्न सकिने व्यवस्था गरेको छ।

काठमाडौँ,१९ साउन । राष्ट्रिय परीक्षा बोर्डको बैठक बसिरहेको छ । कक्षा १२ को नतिजा सार्वजनिकको तयारीका लागि बोर्डको बैठक बसिरहेको छ ।

नतिजा सार्वजनिक गर्नुअघि आइतबार बोर्डले नतिजाको डेमो प्रदर्शन समेत गरेको थियो ।

बोर्डको क्यालेन्डर अनुसार १५ साउनभित्र १२ कक्षाको नतिजा सार्वजनि हुनुपर्ने हो । तर, गत २० चैतदेखि २९ दिन लामो शिक्षकहरूले आन्दोलन गरेका कारण नतिजा सार्वजनिकमा ढिलाइ भएको हो । गत ११ वैशाखका लागि तय भएको परीक्षा आन्दोलनका कारण २१ वैशाखदेखि भएको थियो ।परीक्षामा ५ लाख ११ हजार ५ सय २५ परीक्षार्थी सहभागी भएका थिए ।

दाङ,१९ साउन । राप्ती गाउँपालिकामा १३ हजारभन्दा बढी विद्यार्थीको मुटु परीक्षण कार्यक्रम सुरु गरिएको छ। राप्ती गाउँपालिका, रोटरी क्लब चन्द्रागिरी र रोटरी क्लब राप्तीको संयुक्त आयोजनामा तथा नेपाल हृदयरोग निवारण प्रतिष्ठान (केन्द्रीय कार्यालय ललितपुर, लुम्बिनी प्रदेश समिति र दाङ जिल्ला शाखा) को प्राविधिक सहयोगमा कार्यक्रम सुरु गरिएको हो।

कार्यक्रमअन्तर्गत पालिकाभित्रका सबै सामुदायिक तथा संस्थागत विद्यालयमा अध्ययनरत १३ हजार ७ सय १८ जना विद्यार्थीको जन्मजात मुटुरोग तथा बाथ मुटुरोगसम्बन्धी निःशुल्क परीक्षण गरिनेछ।

गाउँपालिकाका अध्यक्ष प्रकाश विष्टले बालबालिकाको स्वास्थ्यलाई पालिकाको उच्च प्राथमिकतामा राख्दै कार्यक्रम सुरु गरिएको जानकारी दिए । ‘हाम्रो लक्ष्य शैक्षिक गुणस्तरसँगै विद्यार्थीहरूको समग्र स्वास्थ्यमा सुधार ल्याउनु हो। उनले भने–‘मुटुरोगजस्ता संवेदनशील विषयमा सचेतना र समयमै परीक्षण अत्यन्त आवश्यक भएकाले यस्तो अभियान सञ्चालनमा ल्याइएको हो।’

अध्यक्ष विष्टले शिक्षा र स्वास्थ्य क्षेत्रमा गरिएको लगानीलाई दीर्घकालीन विकासको आधार भन्दै यस्ता जनस्वास्थ्य केन्द्रित कार्यक्रमलाई निरन्तरता दिने प्रतिबद्धता पनि व्यक्त गरे ।

मुटुरोग विशेषज्ञ डा। सुमन्त बन्जाडेका अनुसार, ३ देखि १५ वर्ष उमेर समूहका बालबालिकामा फोहोर वातावरण र अस्वस्थ खानपानका कारण घाँटीमा संक्रमण भई मुटुमा असर पुग्ने सम्भावना उच्च हुने भएकाले समयमै परीक्षण गर्नु आवश्यक हुन्छ।

‘यस उमेरका बालबालिकामा फोहोरमा खेल्ने, अस्वस्थ खाना खाने प्रवृत्ति धेरै हुन्छ, उनले भने–‘जसले घाँटीमा संक्रमण गराउँछ र पछि मुटुमा असर पुग्न सक्छ।’

डा. बन्जाडेका अनुसार, कोही बालबालिकामा जन्मजात मुटुरोग पनि देखिन सक्छ। गर्भावस्थामा आमाले अन्जानमा कडा औषधि सेवन गर्ने, धूम्रपान वा मध्यपान गर्ने, अत्यधिक तनावमा रहने जस्ता कारणले नवजात शिशुको मुटुको भल्भमा प्वाल पर्ने समस्या देखिएको छ।

उनले रोग लागेपछि उपचार गर्नुभन्दा समयमै परीक्षण र सचेतना फैलाउनु नै उत्तम उपाय भएको बताउँदै प्रत्येक व्यक्ति स्वयं जिम्मेवार बन्नुपर्नेमा जोड दिए ।

कार्यक्रमको शुभारम्भ सोमबार वडा नं. २ स्थित आदर्श माध्यमिक विद्यालय, लालमटीयाबाट गरिएको हो। आयोजकका अनुसार पालिकाभित्र रहेका सबै विद्यालयमा पुगेर विद्यार्थीहरूको मुटु परीक्षण गरिनेछ।

भिम मरासिनी ,दाङ। साथीका बाबुको असामयिक निधनको खबरले तुलसीपुरका एक समूह विद्यार्थीलाई मात्र होइन, सम्पूर्ण कक्षालाई स्तब्ध बनायो।

तुलसीपुर उपमहानगरपालिका–११ का आदित्य चौधरीका बाबु तुलसीराम चौधरीको दुबै मिर्गौला फेल भएर केही दिन अघि निधन भएपछि चौधरी परिवार गहिरो आर्थिक र मानसिक संकटमा परेको थियो।

कक्षा–१० मा अध्ययनरत आदित्यका सहपाठीहरूका लागि यो केवल दुःखद खबर मात्र थिएन, यो एक जिम्मेवारी पनि बन्यो। साथीको पीडामा मलम लगाउने उद्देश्यले माया ओलीको नेतृत्वमा उनीहरूले सानो सहयोग संकलन अभियान सुरु गरे।

कक्षामा अनुपस्थित भएका दिनहरूको बचत भएको खाजा खर्च, आफैंले ल्याएको खाजाको पैसा र शिक्षकहरूबाट प्राप्त सहयोग समेत समेटेर जम्मा गरिएको रकम रु ३०,०४५ पुग्यो। आज सो रकम विद्यार्थी टोलीले आदित्यको घरमै पुगेर उनकी आमा उर्मिला चौधरीलाई हस्तान्तरण गर्‍यो।

श्रीमानको उपचारमा ठूलो रकम खर्च भइसकेको बताउँदै उर्मिला चौधरीले यस कठिन घडीमा साथ दिएकोमा सबैप्रति आभार व्यक्त गरिन्। उनले यस्तो संकटको बेलामा सबैले एक अर्काको साथ दिन जरुरी रहेको धारणा पनि राखिन्।