सल्यान ,१८ मंसिर । सल्यानमा आफ्नै छोरीलाई जबरजस्ती करणी गरेको आरोपमा एक ३८ वर्षीय बाबु पक्राउ परेका छन्। १४ वर्षीया छोरीमाथि बलात्कार गरेको आरोपमा उनलाई घरबाटै पक्राउ गरिएको जिल्ला प्रहरी कार्यालय सल्यानले जनाएको छ।

पक्राउ परेका व्यक्तिलाई जिल्ला प्रहरी कार्यालय सल्यानको हिरासतमा राखिएको सूचना अधिकारी प्रहरी निरीक्षक पूर्ण केसीले जानकारी दिए। उनले जिल्ला अदालत सल्यानबाट म्याद थप भई घटनाको थप अनुसन्धान भइरहेको बताए।

प्रहरीका अनुसार ३८ वर्षीय उक्त बाबुले गत असोज २६ गते छोरीमाथि बलात्कार गरेका थिए। त्यसपछि केही दिनपछि फेरि कोही नभएको मौका छोपी बलात्कार गर्न प्रयास गर्दा आमाले देखेपछि घटना बाहिर आएको प्रहरीले जनाएको छ।

दाङ,१८ मंसिर । अपांगता भएका व्यक्तिहरूको ३४औं अन्तर्राष्ट्रिय दिवसको अवसरमा गुरुजजुर माध्यमिक विद्यालयमा हाजिरी जवाफ प्रतियोगिता सम्पन्न गरिएको छ।
तुलसीपुर उपमहानगरपालिका महिला, बालबालिका तथा सामाजिक विकास शाखाको आयोजना तथा विभिन्न विद्यालयको समन्वयमा उक्त कार्यक्रम सम्पन्न भएको हो।

कार्यक्रम यज्ञबहादुर विकको अध्यक्षता तथा उपमहानगरपालिकाका उपप्रमुख स्यानी चौधरीको प्रमुख आतिथ्यतामा सम्पन्न भएको हो। प्रतियोगितामा गुरुजजुर मावि, कालाखोला मावि र अश्वारा माविका गरी तीन विद्यालयका १८ जना अपांगता भएका विद्यार्थीहरूको सहभागिता थियो।

कार्यक्रमको बारेमा जानकारी गराउदै तुलसीपुर उपमहानगरपालिका महिला, बालबालिका तथा सामाजिक विकास शाखा प्रमुख माया श्रेष्ठले अपांगता भएका व्यक्तिहरूलाई सम्मानजनक वातावरणमा जीवनयापन गर्न सक्ने अवस्था बनाउन समाज सबैको भूमिका महत्वपूर्ण रहने बताइन्। विगतमा परिवारले घरमै सीमित राख्दै आएका अपांगता भएका व्यक्तिहरू अहिले आफ्नै दक्षता र सीपका आधारमा समाजमा सक्रिय भूमिकामा अघि बढ्न थालेको उल्लेख गर्दै उनले यस्ता कार्यक्रमले सामाजिक सचेतना र सकारात्मक परिवर्तनमा ठूलो योगदान पुर्‍याउने उनको भनाइ थियो ।

प्रतियोगितामा वविन्द्र ओली, सरोज विक र सुजन चौधरीको समूह प्रथम भएका छन्। त्यसैगरी, निरुता घर्ती, वीरेन्द्र ओली र राजकुमार विकको समूह दोस्रो तथा मनकुमारी खड्का, दिलकुमार खड्का र पविता ओलीको समूह तेस्रो भए। चित्रबहादुर ओली, मोनिका शाह र लक्ष्मी विक सुनाहारको समूहलाई सान्त्वना पुरस्कार प्रदान गरिएको थियो।

रुकुम पूर्व,१७ मंसिर । रुकुम पूर्वको सिस्ने गाउँपालिका–६ द्धारेखोला नजिकको जंगलबाट दुई थान भरुवा बन्दुक बरामद गरिएको छ।

राष्ट्रिय निकुञ्ज क्षेत्र नजिकै लुकाइ–छिपाइ राखिएको अवस्थामा प्रहरीले मंगलबार दिउँसो दुई थान भरुवा बन्दुक र एउटा नाल फेला पारी नियन्त्रणमा लिएको हो।

जिल्ला प्रहरी कार्यालय रुकुम पूर्व र अस्थायी प्रहरी पोस्ट खोपीचौरबाट खटिएको टोलीले गस्तीका क्रममा शंकास्पद वस्तु देखेपछि खोजतलास गर्दा बन्दुकहरू भेटिएको जनाएको छ।

प्रहरीका अनुसार घटनाबारे थप अनुसन्धान भइरहेको छ र बन्दुक कसले, किन राखेको भन्नेबारे अनुसन्धान अघि बढाइएको छ।

काठमाडौ,१७ मंसिर । बाराको जीतपुरसिमरा उपमहानगरपालिका–१ स्थित सिमरा पार्कमा राखिएका छवटा हरिणमध्ये तीन वटा बुधबार बिहान मृत अवस्थामा फेला परेका छन्।

तारजालीले घेरेर संरक्षण गरिएका हरिणमध्ये तीनको तिघ्राको मासु लुछिएको अवस्थामा अवस्थामा भेटिएपछि पार्कका कर्मचारीले डिभिजन वन कार्यालय र प्रहरीले घटनास्थलमा जानकारी गराएका थिए।

पार्क सञ्चालक थानीमाई वन उपभोक्ता समूहका कोषाध्यक्ष श्याम सुवेदीका अनुसार चितुवा वा बाघ जस्तो वन्यजन्तुले तारघेरा नाघेर आक्रमण गरेको हुनसक्ने देखिएको छ। उनले भने, “कसले आक्रमण गर्‍यो भनेर ठ्याक्कै थाहा भइसकेको छैन, तर जनावरले मासु लुछेको प्रष्ट छ।”

आक्रमणपछि बाँकी तीन हरिण तारघेरा नाघेर पार्क वरपरका क्षेत्रमा भाग्न सफल भएको बताइएको छ। डिभिजन वन कार्यालय र इलाका प्रहरी कार्यालय सिमराको टोलीले घटनास्थल मुचुल्का गरेर मारिएका हरिणलाई खाल्डो खनेर पुरेको छ। घटना सार्वजनिक भएपछि बाँकी तीन हरिणलाई सुरक्षित राख्ने विषयमा थप चुनौती बढेको पार्क व्यवस्थापनले जनाएको छ।

काठमाडौं,१७ मंसिर । बैंकिङ प्रणालीमा अत्यधिक तरलता जमेपछि नेपाल राष्ट्र बैंकले एकै दिन ६० अर्ब रुपैयाँ खिच्न ‘निक्षेप संकलन उपकरण’ प्रयोग गर्ने भएको छ। राष्ट्र बैंकले २८ दिने अवधीको उक्त निक्षेप आगामी २०८२ पुस १६ गते साँवा तथा ब्याजसहित भुक्तानी गरिने जनाएको छ।

यो निक्षेप संकलन बोलकबोल प्रक्रियामार्फत हुनेछ र ब्याजदर पनि यही माध्यमबाट नै निर्धारण गरिनेछ। राष्ट्र बैंकका अनुसार बैंक तथा वित्तीय संस्थाहरूले यसमा सहभागी हुन न्यूनतम १० करोड रुपैयाँदेखि अधिकतम ५ करोडले भाग जाने गरी कुल आह्वान रकमभित्र बोलकबोल गर्न सक्नेछन्। आज दिउँसो २ बजे बोलकबोल प्रक्रिया सञ्चालन हुनेछ।

निक्षेप संकलन उपकरणमा ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउने व्यवस्था गरिएको छ। यसरी संकलित निक्षेप राष्ट्र बैंक बाहेक अन्य बैंक तथा वित्तीय संस्थामा धितोका रूपमा प्रयोग गर्न सकिनेछ। तरलता व्यवस्थापनका लागि केन्द्रीय बैंकले लिएको यो कदम पछिल्ला दिनमा बैंकहरूमा अत्यधिक चलखेल रकम संकलन भएपछि आएको हो।

काठमाडौं ,१७ मंसिर । विश्वासको मत लिने कार्यसूची रहेको मधेस प्रदेशसभा बैठक मुख्यमन्त्री सरोजकुमार यादव अनुपस्थित भएपछि स्थगित गरिएको छ।

बिहान ११ बजे विश्वासको मतको प्रक्रिया अघि बढ्ने तय गरिएको थियो, तर प्रस्तावक स्वयं उपस्थित नभएपछि उपसभामुख बबिता कुमारी राउत इसरले बैठक २ बजेसम्मका लागि स्थगित गर्ने घोषणा गरिन्।

प्रदेश प्रमुख सुमित्रा सुवेदी भण्डारीले संविधानको धारा १६८ (३) अनुसार कात्तिक २४ गते यादवलाई मुख्यमन्त्रीमा नियुक्त गरेकी थिइन्। तर उनलाई असंवैधानिक ढंगले नियुक्त गरेको भन्दै व्यापक आलोचना भएपछि प्रदेशसभा प्रमुख भण्डारीलाई सरकारकै निर्णयमा पदमुक्त गरिएको थियो।

काठमाडौँ ,१६ मंसिर । अख्तियार दुरुपयोग अनुसन्धान आयोगले रौतहटको कटहरिया नगरपालिकाका तत्कालीन निमित्त प्रमुख प्रशासकीय अधिकृत रामप्रकाश साहसहित सातजनाविरुद्ध विशेष अदालतमा भ्रष्टाचार मुद्दा दायर गरेको छ।

नगरसभाबाट बजेट स्वीकृत नगराएपछि सरिता फाउन्डेसन नामक गैरसरकारी संस्थालाई पाँच लाख रुपैयाँको चेक जारी गरी मिलेमतोमा नौ लाख ९८ हजार रुपैयाँभन्दा बढी रकम हिनामिना गरिएको आरोपमा मुद्दा दायर गरिएको हो।

मंगलबार (मंसिर १६) दायर गरिएको मुद्दामा तत्कालीन सहायक लेखापाल विवेककुमार सहनी, सहायकस्तर पाँचौंका रामनरेशप्रसाद यादव, सहायक कम्प्युटर अपरेटर उमेशकुमार दास तत्मा, खरिदार कौशलकिशोर चौधरी, खरिदार छोटेलाल मिश्र, सरिता फाउन्डेसन र संस्थाकी निर्देशक सरिताकुमारी साहसमेत प्रतिवादी छन्।

अख्तियारका अनुसार आर्थिक वर्ष २०७७/७८ मा नगरसभाबाट बजेट स्वीकृत नगरी सरिता फाउन्डेसनका नाममा चेक काटिएको विषयमा उजुरी आएपछि अनुसन्धान अघि बढाइएको थियो। अनुसन्धानपछि उनीहरूले मिलेमतोमा नौ लाख ९८ हजार ९२१ रुपैयाँ हिनामिना गरेको प्रमाणित भएको अख्तियारले जारी गरेको विज्ञप्तिमा उल्लेख छ। अदालतमा दायर मुद्दामा प्रतिवादीहरूसँग जनही नौ लाख ९८ हजार ९२१ रुपैयाँ बिगो मागदाबी गरिएको छ।

काठमाडौ,१६ मंसिर ।राष्ट्रिय स्वतन्त्र पार्टी (रास्वपा) ले आगामी प्रतिनिधिसभा निर्वाचनलाई लक्षित गर्दै आफ्नो पार्टीका नेता र कार्यकर्तालाई आफूखुशी उम्मेदवारी घोषणा नगर्न निर्देशन दिएको छ।

पार्टीको उम्मेदवार छनौट समितिले औपचारिक टुंगो नलागेसम्म कसैले पनि सार्वजनिक रूपमा उम्मेदवारी दाबी गर्ने, घोषणा गर्ने वा आकांक्षा व्यक्त गर्ने अभिव्यक्ति नदिन चेतावनी दिएको हो।

समितिका अनुसार हालसम्म पार्टीले रुपन्देही क्षेत्र नं–३ का लागि मात्रै उम्मेदवार औपचारिक रूपमा चयन गरेको छ। त्यसबाहेक अन्य कुनै क्षेत्रका लागि उम्मेदवार टुंगो नलागेको भन्दै स्पष्ट जानकारी गराइएको छ।

पछिल्लो समय विभिन्न तहका नेता तथा सदस्यहरूले आफू उम्मेदवार हुने वा आकांक्षी रहेको भन्दै सार्वजनिक अभिव्यक्ति दिएका घटनाले समितिको ध्यानाकर्षण भएको र त्यसैले यो निर्देशन जारी गरिएको समितिले जनाएको छ।

रास्वपाले आफ्नो आधिकारिक नीति र निर्धारित विधिअनुसार मात्र उम्मेदवार चयन गरिने पुनः दोहोर्याउँदै, औपचारिक निर्णय नआएसम्म कुनै पनि क्षेत्रमा उम्मेदवारी तय भइसकेको जस्तो भ्रम नफैलाउन आग्रह गरेको छ।

काठमाडौँ १६ मंसिर । भदौ २३ र २४ गतेको जेनजी आन्दोलनपछि गठन भएको सुशीला कार्की नेतृत्वको अन्तरिम सरकारले गरेको दुई महत्त्वपूर्ण निर्णयमा सर्वोच्च अदालतले रोक लगाएको छ।

निर्वाचन गराउने उद्देश्यले बनेको सरकारले ११ जना राजदूत फिर्ता गर्ने निर्णय र भूमि समस्या समाधान आयोग खारेज गर्ने निर्णय गरेको थियो, तर दुवै कदमलाई सर्वोच्चले बदर गरेको हो।

सोमबार न्यायाधीश सारंगा सुवेदी र श्रीकान्त पौडेलको संयुक्त इजलासले मन्त्रिपरिषद्को असोज २३ गते बसेको बैठकले गरेको भूमि आयोग तथा जिल्ला समितिहरू खारेज गर्ने निर्णय खारेज गर्दै अन्तरिम सरकारको उद्देश्य र अधिकार सीमित भएको स्पष्ट पारेको छ।

यसअघि आयोगका अध्यक्ष हरिप्रसाद रिजालले दायर गरेको रिटमा अन्तरिम आदेश पनि जारी भएको थियो, र अब अदालतले पूरै स्पष्ट गर्दै अन्तरिम सरकारले दीर्घकालीन प्रभाव पार्ने निर्णय लिन नपाउने ठहर गरेको हो। सोही गरी, गत कात्तिक १६ गते सर्वोच्चले ११ राजदूत फिर्ता गर्ने सरकारको निर्णयमा अन्तरिम आदेश जारी गर्दै यस्तो निर्णय अन्तरिम सरकारको अधिकार क्षेत्रभन्दा बाहिर रहेको टिप्पणी गरेको थियो।

अदालतले प्रतिनिधिसभा विघटन भइसकेको बेला संसदीय सुनुवाइ सम्भव नहुने भएकाले राजदूत फिर्ताको औचित्य नै कमजोर रहेको बताएको छ।

साथै, अदालतले अन्तरिम सरकारलाई छ महिनाको अवधिमा निर्वाचन गराउने आफ्नो मुख्य दायित्व नबिर्सन चेतावनी दिंदै अनावश्यक विवाद र दीर्घकालीन असर पार्ने निर्णयमा नजाने स्पष्ट सन्देश दिएको छ।

काठमाडौं । नेपाली कांग्रेसको १५औं महाधिवेशन पुस २६ देखि २८ सम्म गर्ने निर्णय भएको छ । प्रवक्ता डा. प्रकाशशरण महतले महाधिवेशन मिति केन्द्रीय समितिको बैठकले सर्वसम्मत निर्णय गरेको जानकारी गराए ।

यो निर्णयसँगै लामो समय चलिरहेको कांग्रेस केन्द्रीय समिति बैठक आज समापन भयो ।

जेनजी आन्दोलनपछि कांग्रेसमा नेतृत्व परिर्वतको वहस सुरु भएको थियो । पार्टीको संस्थापन इतर पक्षले विशेष महाधिवेशनको माग गरेपछि कुरा मिल्न सकेको थिएन । यसले गर्दा केन्द्रीय समिति वैठक लम्बियो । अन्ततः नियमित अधिवेशन नै आमनिर्वाचनभन्दा अगाडि गर्न कांग्रेस नेतृत्व तयार भएको हो ।