काठमाडौ,२ वैशाख । नेपाल दूरसञ्चार प्राधिकरणले १० हजारभन्दा बढी एप्लिकेसन र वेबसाइट बन्द गराएको छ। प्राधिकरणका अनुसार इन्टरनेट सेवा प्रदायकसँगको समन्वयमा सञ्चालनमा रहेका सट्टेबाजीसम्बन्धी प्लेटफर्म पहिचान गरी बन्द गरिएको हो। उपनिर्देशक सूर्यप्रसाद लामिछानेका अनुसार हालसम्म अधिकांश सेवा प्रदायकले १० हजारभन्दा बढी यस्ता एप तथा वेबसाइट बन्द गरिसकेका छन् भने नेपाल टेलिकमले मात्रै २१ हजारभन्दा बढी प्लेटफर्म बन्द गरेको जानकारी दिएको छ।

सरकारको शासकीय सुधारसम्बन्धी निर्णय कार्यान्वयनका क्रममा यो कदम चालिएको हो। मन्त्रिपरिषद्को चैत १३ गतेको बैठकबाट स्वीकृत १०० कार्यसूचीअन्तर्गत सट्टेबाजीसम्बन्धी एप तथा वेबसाइट २४ घण्टाभित्र बन्द गर्ने व्यवस्था गरिएको थियो। सोही निर्णयअनुसार सञ्चार तथा सूचना प्रविधि मन्त्रालयले चैत १५ गते प्राधिकरणलाई आवश्यक निर्देशन दिएको थियो। त्यसपछि प्राधिकरणले इन्टरनेट सेवा प्रदायकसँग सहकार्य गर्दै यस्ता अवैध डिजिटल प्लेटफर्म पहिचान गरी बन्द गर्ने अभियान तीव्र बनाएको जनाएको छ।

कानुनी रूपमा पनि नेपालमा सट्टेबाजी निषेधित छ। मुलुकी अपराध संहिता, २०७४ अनुसार सट्टेबाजी गर्न वा गराउन पाइँदैन र उल्लंघन गरेमा रकम जफतसहित एक वर्षसम्म कैद तथा १० हजार रुपैयाँसम्म जरिवाना हुनसक्छ। त्यस्तै विज्ञापन ९नियमन गर्ने० ऐन, २०६६ ले समेत जुवा वा सट्टेबाजी प्रवर्द्धन गर्ने विज्ञापनमा रोक लगाएको छ।

प्राधिकरणले नागरिकलाई यस्ता अवैध गतिविधिबाट टाढा रहन आग्रह गरेको छ। सरकारले पनि सट्टेबाजी एप वा वेबसाइट सञ्चालन तथा प्रयोग नगर्न चेतावनी दिँदै उल्लंघन भए कडा कानुनी कारबाही हुने जनाएको छ। साथै, शंकास्पद डिजिटल प्लेटफर्मबारे सम्बन्धित निकायमा जानकारी गराउन सर्वसाधारणलाई अनुरोध गरिएको छ।

काठमाडौं,३० चैत । प्रेस काउन्सिल नेपालले चुनावलाई असर पार्ने र मतदातालाई दिग्भ्रमित गर्ने सामग्री नप्रसारण गर्न आग्रह गरेको छ।

काउन्सिलको बैठकले दल, उम्मेदवार र मतदान प्रक्रियामा असर पर्ने खालका समाचार तथा विश्लेषण प्रकाशन–प्रसारण नगर्न सञ्चारमाध्यमलाई सचेत गराएको हो।

विदेशी सञ्चारमाध्यम, विशेषगरी बिबिसीबाट आउने सामग्री काउन्सिलको क्षेत्राधिकार बाहिर पर्ने भएकाले कूटनीतिक माध्यमबाट समाधान खोज्न नेपाल सरकार र निर्वाचन आयोग लाई अनुरोध गरिएको छ।

दाङ, २१ चैत । दाङको तुलसीपुरमा तुलसीपुर मोबाइल तथा इलेक्ट्रोनिक्स समितिको साधारणसभा सम्पन्न भएको छ। समितिका अध्यक्ष थमन विश्वकर्मा सितलको अध्यक्षता तथा तुलसीपुर चेम्बर अफ कमर्सका अध्यक्ष ऋषिराज भण्डारीको प्रमुख आतिथ्यता र तुलसीपुर उद्योग वाणिज्य संघका महासचिव केशवराज केसीको विशिष्ट आतिथ्यतामा कार्यक्रम सम्पन्न भएको हो।
कार्यक्रममा बोल्दै प्रमुख अतिथि ऋषिराज भण्डारीले प्रविधिमैत्री वातावरणका कारण मोबाइल व्यवसायको व्यावसायिकीकरण बढ्दै गएको र व्यवसायमा सहजता आएको बताए। तर, अझै पनि विभिन्न चुनौतीहरू रहेको उल्लेख गर्दै त्यसबाट जोगिन व्यवसायीहरू सचेत हुनुपर्नेमा जोड दिए। उनले व्यवसायिक हितका लागि एकता आवश्यक रहेको उल्लेख गर्दै एकरूपता कायम गर्न र अस्वस्थ प्रतिस्पर्धाबाट टाढा रहन आग्रह गरे।
विशिष्ट अतिथि केशवराज केसीले व्यवसाय क्षेत्रमा विभिन्न जटिलताहरू रहेको भन्दै ती चुनौतीहरूलाई सहज बनाउँदै अगाडि बढ्नुपर्ने बताए। उनले उद्योग वाणिज्य संघ व्यवसायीहरूसँगै रहेको पनि स्पष्ट पारे।
समितिका महासचिव नवीन ओलीको सहजीकरणमा सम्पन्न कार्यक्रममा ज्योति प्रकाश दाहालले स्वागत मन्तव्य राखेका थिए। कार्यक्रममा नारायण भण्डारी तथा समितिका निवर्तमान अध्यक्ष सुरज भण्डारीले तुलसीपुर मोबाइल तथा इलेक्ट्रोनिक्स समिति एकै छातामुनि आवद्ध भएको उल्लेख गर्दै व्यवसाय प्रवर्द्धनका लागि विभिन्न व्यावसायिक संस्थाहरूको साथ र सहयोग प्राप्त भएको बताए। उनीहरूले व्यवसायिक सुधार र संरक्षणका लागि सरकारसँग अपेक्षा रहेको पनि व्यक्त गरे।
कार्यक्रममा कोषाध्यक्ष रामु बस्नेतले आर्थिक प्रतिवेदन प्रस्तुत गरेका थिए भने महासचिव नवीन ओलीले प्रगति प्रतिवेदन प्रस्तुत गरेका थिए।
नयाँ समिति गठन
साधारणसभाबाट तुलसीपुर मोबाइल तथा इलेक्ट्रोनिक्स समितिको नयाँ नेतृत्व चयन गरिएको छ। समितिको अध्यक्षमा रामबहादुर बस्नेत, उपाध्यक्षमा प्रदीप घिमिरे, महासचिवमा नवीन ओली, कोषाध्यक्षमा मीनज ओली चयन भएका छन्। सदस्यहरूमा विनोद केसी र तिलक बस्नेत लगायत रहेका छन्। निर्वाचन समितिका संयोजक तथा निवर्तमान अध्यक्ष सुरज भण्डारीले उक्त जानकारी गराएका हुन्।

दाङ, १९ चैत । सरकारी निकायले अबदेखि विज्ञापन तथा सूचना सरकारी सञ्चारमाध्यममार्फत मात्रै प्रकाशन तथा प्रसारण गर्नुपर्ने भएको छ।

प्रधानमन्त्री तथा मन्त्रिपरिषद् कार्यालयले सङ्घ, प्रदेश र स्थानीय तहलाई बुधबार परिपत्र जारी गर्दै आगामी दिनमा सरकारी स्वामित्वका सञ्चारमाध्यममै सूचना र विज्ञापन प्रकाशन/प्रसारण गर्न निर्देशन दिएको हो।

परिपत्रमा सार्वजनिक खर्चमा मितव्ययिता कायम गर्न, सूचना तथा विज्ञापन प्रणालीमा एकरूपता र पारदर्शिता ल्याउन तथा सरकारी सञ्चारमाध्यमको प्रवर्द्धन गर्ने उद्देश्य उल्लेख गरिएको छ।

त्यसका लागि आफू तथा मातहतका निकायले सोहीअनुसार कार्यान्वयन गर्न २०८२ चैत १८ गते सचिवस्तरको निर्णयअनुसार परिपत्र गरिएको जनाइएको छ।

दाङ,२० फागुन । निर्वाचनको संवेदनशीलतालाई ध्यानमा राख्दै जिम्मेवार र सन्तुलित ढंगले समाचार सम्प्रेषण गर्न पत्रकारहरूलाई आग्रह गरिएको छ । नेपाल पत्रकार महासंघ दाङ शाखाको आयोजनामा सम्पन्न निर्वाचन केन्द्रित रिपोर्टिङ विषयक छलफलमा यस्तो आग्रह गरिएको हो।

छलफलमा मुख्य निर्वाचन अधिकृत चन्द्रबहादुर सिन्जाली मगरले निर्वाचन अवधिमा सञ्चारमाध्यमको भूमिका महत्वपूर्ण हुने भन्दै सत्यतथ्य समाचार तथा सूचनाको सम्प्रेषण गर्न आग्रह गरे ।

उनले मतदानका दिन परिचयपत्र अनिवार्य रूपमा साथमा राख्न, मतदाताको गोपनीयता सम्मान गर्न र निर्वाचन आचारसंहिता कडाइका साथ पालना गर्न आग्रह गरे । आधिकारिक सूचना सम्बन्धित निर्वाचन कार्यालय वा तोकिएका अधिकारीमार्फत मात्रै लिनुपर्नेमा उनले जोड दिए ।

सिन्जालीले निर्वाचन प्रक्रिया पारदर्शी र व्यवस्थित ढंगले सम्पन्न गर्ने तयारी पूरा भएको जानकारी दिँदै मतपेटिका सुरक्षा, मतगणना व्यवस्थापन र सूचना प्रवाहलाई व्यवस्थित बनाइएको बताए ।

निर्वाचन केन्द्रित रहेर मतदान स्थलको रिपोर्टिङ कसरी गर्ने भन्ने विषयमा नेपाल पत्रकार महासंघका पूर्व अध्यक्ष बिपुल पोखरेलले जानकारी गराएका थिए । उनले पत्रकार आचारसंहिता र निर्वाचन आचार संहितालाई प्राथमिकतामा राखेर सूचना तथा समाचार सम्प्रेषण गर्न आग्रह गरेका हुन्।

उनके पुष्टि नभएको सूचना नप्रसारण गर्न, सामाजिक सञ्जालमा फैलिने अफवाहबाट सावधान रहन र सत्यतथ्यमा आधारित समाचार मात्रै सार्वजनिक गर्न सुझाव दिएका थिए ।

नेपाल पत्रकार महासंघ दाङ शाखाका अध्यक्ष सन्तोष सुवेदीको अध्यक्षतामा भएको कार्यक्रममा महासंघ दाङ शाखाका पूर्व अध्यक्ष सुदिप गौतमले निर्वाचनको संवेदनशीलतालाई ख्यालमा राखेर सत्यतथ्य समाचार बाहिर ल्याउन सबैमा आग्रह गरेका थिए। कुनै पनि दल वा व्यक्तिप्रति

पत्रकार महासंघ दाङ शाखा उपाध्यक्ष नारायणी रजौरेको विषय प्रवेशबाट सुरु भएको कार्यक्रमको सहजीकरण सचिव जीएन सागरले गरेका थिए।

दाङ, १५ फागुन । दाङमा निर्वाचनको मतपरिणामलाई डिजिटल प्रणालीबाट सार्वजनिक गर्ने तयारी थालिएको छ।लुम्बिनी प्रदेश निर्वाचन कार्यालय दाङले फागुन २१ गते हुने निर्वाचनको मतपरिणाम डिजिटल सञ्चार माध्यमबाट सार्वजनिक गर्ने तयारी गरेको जनाएको हो ।

शुक्रबार घोराहीमा सञ्चारकर्मीसँग आयोजित ‘निर्वाचन र आमसञ्चार’ विषयक छलफल कार्यक्रममा निर्वाचनका क्रममा रिपोर्टिङ कार्यलाई सहज बनाउँदै लुम्बिनी प्रदेशभरकै नतिजा डिजिटल माध्यमबाट उपलब्ध गराउने व्यवस्था मिलाइँदै गरिएको जानकारी गराइएको हो।

निर्वाचनको सुरक्षा संवेदनशीलता कायम राख्दै नागरिकको गोप्य मतदान अधिकार सुरक्षित हुने गरी रिपोर्टिङको वातावरण बनाइने बताइएको छ।

प्रदेश निर्वाचन कार्यालय दाङका सूचना अधिकारी गेहेन्द्र कवँरले दाङका तीनवटै निर्वाचन क्षेत्रसहित लुम्बिनी प्रदेशका १२ वटै जिल्लाको मतपरिणाम यथासक्य छिटो सार्वजनिक गर्ने तयारी भइरहेको जानकारी दिए।

कार्यक्रममा प्रमुख जिल्ला अधिकारी विश्वप्रकाश अर्यालले निर्वाचनका क्रममा मिलाइएको सुरक्षा व्यवस्थाबारे जानकारी गराएका थिए।

त्यसैगरी कार्यालय प्रमुख लालसिंह खड्का र सूचना अधिकारी कवँरले फागुन २१ गते हुने निर्वाचनको समग्र तयारीबारे प्रकाश पारेका थिए।

छलफलमा नेपाल पत्रकार महासंघ का निवर्तमान केन्द्रीय अध्यक्ष बिपुल पोख्रेल, दाङ शाखा अध्यक्ष सन्तोष सुवेदी, पूर्व अध्यक्ष प्रताप रेग्मी लगायतले निर्वाचनका क्रममा सहज रिपोर्टिङको व्यवस्था मिलाउँदै गोप्य मतदानको सुनिश्चितता हुने गरी मतदान स्थल व्यवस्थापन गर्नुपर्नेमा जोड दिएका थिए।

कार्यक्रमको सहजीकरण सूचना अधिकारी गेहेन्द्र कवँरले गरेका थिए।

काठमाडौं ,१५ फागुन । निर्वाचन आयोग ले जेन–जी आन्दोलनसम्बन्धी भिडियो डकुमेन्ट्री हटाउन प्रेस काउन्सिल नेपाल लाई पत्राचार गरेको छ।
बिबिसी वर्ड सर्भिसले तयार पारेको ‘सट लाइक द इनिमिजः इन्साइड नेपाल्स जेन–जी अपराइजिङ’ शीर्षकको वृत्तचित्रमा भदौ २३ र २४ गतेको आन्दोलन दबाउने क्रममा तत्कालीन प्रहरी महानिरीक्षक चन्द्रकुवेर खापुङले गोली चलाउने आदेश दिएको दाबी गरिएको छ।

कार्यवाहक प्रमुख निर्वाचन आयुक्त रामप्रसाद भण्डारीले बिहीबार काउन्सिललाई पत्र पठाउँदै उक्त डकुमेन्ट्री हटाउने प्रक्रिया अघि बढाउन आग्रह गरेका छन्। डकुमेन्ट्री नहटाए कारबाही गर्ने चेतावनीसमेत दिइएको छ। ४१ मिनेट ३० सेकेन्ड लामो भिडियोमा सुरक्षाकर्मीले अमानवीय बल प्रयोग गरेको उल्लेख छ।

निर्वाचनको पूर्वसन्ध्यामा मतदातालाई प्रभावित पार्ने उद्देश्यले भिडियो सार्वजनिक गरिएको आशंका आयोगले जनाएको छ। यस विषयमा नेपाल प्रहरी का प्रवक्ता प्रहरी नायब महानिरीक्षक अविनारायण काफ्ले ले डकुमेन्ट्रीमा उल्लेख गरिएको कागजात आधिकारिक नभएको बताएका छन्। उनले उक्त भिडियोलाई प्रहरीले गम्भीर रूपमा नलिएको र सार्वजनिक टिप्पणी गर्न आवश्यक नठानेको बताए।

दाङ,१ फागुन । सामाजिक सञ्जाल प्लेटफर्म TikTok ले आजदेखि नेपालमा ‘इलेक्सन सेन्टर’ सञ्चालनमा ल्याएको घोषणा गरेको छ। एपभित्र उपलब्ध यो विशेष केन्द्रमार्फत आगामी आम निर्वाचनअघि प्रयोगकर्तालाई सही, भरपर्दो र आधिकारिक जानकारी सहज रूपमा उपलब्ध गराउने लक्ष्य राखिएको कम्पनीले जनाएको छ।

सन् २०२० यता विश्वभर २०० भन्दा बढी निर्वाचनमा सञ्चालन गरिएका निर्वाचन निष्पक्षता तथा नैतिकता सम्बन्धी प्रयासको निरन्तरता स्वरूप नेपालमा यो पहल सुरु गरिएको टिकटकले उल्लेख गरेको छ।

प्लेटफर्ममार्फत विश्वसनीय जानकारीसँग प्रयोगकर्तालाई जोड्ने र हानिकारक भ्रामक सामग्री नियन्त्रण गर्ने प्रतिबद्धता यसले झल्काउने कम्पनीको दाबी छ।
यसै क्रममा टिकटकले निर्वाचन आयोग, नेपाल सँग निर्वाचन निष्पक्षता र नैतिकता सुदृढ गर्न समझदारीपत्रमा हस्ताक्षर गरेको छ।

आयोग परिसरमै क्षमता अभिवृद्धि कार्यशाला आयोजना गरी जिम्मेवार डिजिटल सहभागिता, भ्रामक सूचनासँग जुध्ने उपाय तथा सरोकारवालाबीच निर्वाचन नैतिकता सम्बन्धी बुझाइ सुदृढ गर्ने विषयमा छलफल गरिएको जनाएको छ।

एपभित्रको ‘इलेक्सन सेन्टर’ आयोगसँगको सहकार्यमा विकास गरिएको हो। यस केन्द्रमा नेपालको निर्वाचन प्रक्रिया, कहाँ र कसरी मतदान गर्ने, भ्रामक सूचना कसरी पहिचान गर्ने भन्ने जानकारीका साथै आयोगका आधिकारिक स्रोतमा सिधै जोडिने लिंक उपलब्ध गराइएको छ। सम्बन्धित कन्टेन्ट र सर्चमा निर्वाचन ट्याग प्रयोग गरी प्रयोगकर्तालाई सो केन्द्रमा मार्गनिर्देशन गर्ने व्यवस्था मिलाइएको छ।

दक्षिण एसियाका लागि टिकटकका सार्वजनिक नीति तथा सरकारी सम्बन्ध प्रमुख फेर्दौस मोत्ताकिनले निर्वाचन लोकतन्त्रका लागि महत्वपूर्ण क्षण भएको उल्लेख गर्दै सुसूचित सहभागिता र सकारात्मक डिजिटल वातावरण प्रवर्द्धन गर्ने उद्देश्यले ‘इलेक्सन सेन्टर’ सुरु गरिएको बताए।

कम्पनीका अनुसार हानिकारक भ्रामक सूचना नियन्त्रणका लागि कडा नीति लागू गरिएको छ। अपुष्ट सामग्रीमा लेबल लगाउने, सिफारिसबाट हटाउने तथा सेयरअघि पुनर्विचार सुझाव दिने जस्ता उपाय अपनाइनेछ। साथै, विश्वभरका २० भन्दा बढी तथ्य जाँच गर्ने संस्थासँग सहकार्य भइरहेको जनाएको छ।

टिकटकले गोप्य प्रभाव सञ्चालन, नक्कली पहिचान र बोट नेटवर्कजस्ता कृत्रिम संलग्नता नियन्त्रण गर्ने नीति अवलम्बन गरेको छ। यस्ता गतिविधिविरुद्ध गरिएका कारबाहीहरू कम्पनीले आफ्नो ‘ट्रान्सपेरेन्सी सेन्टर’मार्फत सार्वजनिक गर्ने बताएको छ।

आगामी निर्वाचनलाई लक्षित गरी नेपालका लागि समर्पित ‘इलेक्सन टास्कफोर्स’ समेत परिचालन गरिएको टिकटकले जनाएको छ। निर्वाचन नैतिकतासम्बन्धी थप विवरण भने कम्पनीले आफ्नो ‘ग्लोबल इलेक्सन इन्टेग्रिटी हब’मार्फत सार्वजनिक गर्दै जाने बताइएको छ।

दाङ,२२ माघ । तुलसीपुर उपमहानगरपालिकामा महिलाहरूका लागि चारदिने फोटो पत्रकारिता तालिम सम्पन्न भएको छ। उपमहानगरपालिकाको आयोजनामा सञ्चारिका समूह दाङ र रोज डिजिटल फोटो प्रालिको समन्वयमा तालिम सञ्चालन गरिएको हो। तालिमको बुधबार एक कार्यक्रमबीच समापन गरिएको थियो।

तालिममा १९ वटै वडाबाट प्रतिनिधित्व हुने गरी प्रशिक्षार्थीहरूको सहभागिता रहेको थियो। साथै पत्रकारिता क्षेत्रमा क्रियाशील महिला पत्रकारहरूलाई समेत तालिममा सहभागी गराइएको थियो।

समापन कार्यक्रममा प्रशिक्षार्थीहरूले फोटो पत्रकारितामार्फत आत्मनिर्भर बन्न सकिने आत्मविश्वास जागेको बताए। फोटोग्राफीको भविष्य फराकिलो रहेकाले ज्ञान, कला र सिपको माध्यमबाट अर्थोपार्जन गर्न सकिने विश्वास व्यक्त गरे। उनीहरूले यस्ता एडभान्स तालिमहरू निरन्तर सञ्चालन गर्नुपर्ने अपेक्षा समेत राखे।

कार्यक्रममा उपमहानगरपालिकाका नगर प्रमुख टिकाराम खड्काले फोटोग्राफीको माध्यमबाट महिलाहरूलाई आत्मनिर्भर तथा व्यावसायिक बनाउने उद्देश्यले तालिम आयोजना गरिएको जानकारी दिए। नगरप्रमुख खड्काले फोटो पत्रकारिता महत्वपूर्ण क्षेत्र भएकाले पालिकाले यसको आवश्यकता महसुस गरी तालिम आयोजना गरेको बताए। हरेक वडालाई फोटो पत्रकारितामार्फत अघि बढाउने उद्देश्य रहेको उल्लेख गर्दै व्यवसायिक क्षेत्रमा राम्रो अवसर भएकाले तालिममा सिकेका ज्ञान, सिप र कलालाई व्यवहारमा उतार्न आग्रह गरे।

प्रमुख प्रशासकीय अधिकृत केशवराज पार्धेले फोटो पत्रकारिता विश्व भाषाजस्तै भएको उल्लेख गर्दै यसको महत्व अत्यन्त ठूलो रहेको बताए। उनले तालिमबाट प्राप्त ज्ञानलाई व्यवहारमा लागू गर्न आग्रह गरे।

कार्यक्रममा पत्रकार नारायणी रजौरे, उमा भण्डारी, निता चौधरीलगायतले फोटो पत्रकारिताको क्षेत्र फराकिलो रहेको बताए। साथै फोटो पत्रकारिता संवेदनशील विषयसमेत भएकाले विशेष ध्यान दिन आवश्यक रहेको उनीहरूको भनाइ थियो।

तालिममा प्रमुख प्रशिक्षकका रूपमा फोटोग्राफर चन्द्रबहादुर गिरी रहेका थिए। रोज डिजिटल फोटो प्रालिका नारायण विक, दिलबहादुर बुढाथोकीलगायतले प्राविधिक सहयोग गरेका थिए। चार दिनसम्म सञ्चालन भएको तालिमको समापन कार्यक्रमको सहजीकरण तुलसीपुर उपमहानगरपालिका महिला, बालबालिका तथा सामाजिक विकास शाखा प्रमुख माया श्रेष्ठले गरेकी थिइन्। तालिममा ३० जना प्रशिक्षार्थीहरूको सहभागिता रहेको थियो।

दाङ । नेपाल दूर सञ्चार कम्पनी (नेपाल टेलिकम)को इन्टरनेट सेवा अवरुद्ध भएको छ। आज बिहान सवा ६ बजे देखि सेवा अबरुद्ध भएको हो ।  बुटवल गोरुसिंगे सडक निर्माणका क्रममा इन्टरनेटको सर्कुलर मेनलाइन काटिँदा पश्चिम नेपालका अधिकांश क्षेत्रको इन्टरनेट सेवा प्रभावित भएको नेपाल टेलिकम तुलसीपुर कार्यालयका प्रमुख प्रविण कुमार चौधरीले जानकारी दिए। उनका अनुसार गोरुसिंगे पश्चिम क्षेत्र चन्द्रौटा दाङ नेपालगञ्ज र धनगढीसम्मको सेवा प्रभावित भएको छ। मर्मत र सेवा सञ्चालनका लागि अझै दुई ढाई घण्टा लाग्ने जनाइएको छ । मोबाइल डाटा र फोन सेवामा भने कुनै समस्या न रहेको प्रमुख चौधरीको भनाइ छ ।