काठमाडौँ, १६ पुस । नेपाल आयल निगमले पेट्रोलियम पदार्थको मूल्य समायोजन गरेको छ। निगमले आज राति १२ बजेदेखि लागू हुने गरी पेट्रोल, डिजेल/मट्टितेल र हवाई इन्धनको मूल्य घटाएको हो।

नयाँ मूल्यअनुसार पेट्रोलमा प्रतिलिटर ४ रुपैयाँ, डिजेल तथा मट्टितेलमा ५ रुपैयाँ र आन्तरिक हवाई इन्धनमा प्रतिलिटर ६ रुपैयाँले मूल्य घटाइएको छ। तर खाना पकाउने एलपी ग्यासको मूल्य भने यथावत् राखिएको निगमले जनाएको छ।

निगमका अनुसार इण्डियन आयल कर्पोरेशनबाट बुधबार प्राप्त नयाँ खरिद मूल्यमा पेट्रोल प्रतिलिटर ४ रुपैयाँ १९ पैसा, डिजेल ५ रुपैयाँ ०६ पैसा र हवाई इन्धन प्रतिलिटर ८ रुपैयाँ १५ पैसा सस्तो भएर आएको छ। यद्यपि, एलपी ग्यास भने प्रतिसिलिण्डर १०० रुपैयाँ ३५ पैसाले महँगो परेको छ।

नयाँ मूल्यसूचीअनुसार पहिलो वर्गका क्षेत्रमा पेट्रोल प्रतिलिटर १५६ रुपैयाँ ५० पैसा र डिजेल/मट्टितेल १३४ रुपैयाँ ५० पैसा कायम गरिएको छ। दोस्रो वर्गमा पेट्रोल १५८ रुपैयाँ र डिजेल/मट्टितेल १३६ रुपैयाँ तथा तेस्रो वर्गमा पेट्रोल १५९ रुपैयाँ र डिजेल/मट्टितेल १३७ रुपैयाँ कायम भएको छ।

त्यसैगरी, आन्तरिक हवाई इन्धनको मूल्य प्रतिलिटर १२८ रुपैयाँ निर्धारण गरिएको छ। अन्तर्राष्ट्रिय उडानतर्फ काठमाडौँ, पोखरा र भैरहवाका लागि हवाई इन्धनको मूल्य क्रमशः अमेरिकी डलर ९७३, ७७१ र ७५९ प्रति किलो लिटर तोकिएको छ।

एलपी ग्यासमा घाटा रहेकाले उपभोक्ताको हितलाई ध्यानमा राख्दै मूल्य नबढाइएको निगमले स्पष्ट पारेको छ।

दाङ,१६ पुस । बिजौरी–१९ पकर्याका ठाकुर चौधरी तुलसीपुरमा जारी महोत्सवको स्थलभित्र भेटिन्छन्। नेपाल घरेलु तथा साना उद्योग महासङ्घ तुलसीपुरले स्थानीय किसानहरूलाई निःशुल्क रुपमा स्टल उपलब्ध गराएपछि हस्तकलाका सामग्री बिक्री वितरणका लागि त्यहाँ पुगेका हुन्।

महोत्सवको मातृ जोनको २३ नम्बरमा उनको स्टल छ। एक सानो स्टलमा केवल सामग्री मात्र होइन, मेहनत, समय र सीपको कथा पनि सजिएको छ।

डेलवा, हटकेस, पेन होल्डर, टोकरीलगायतका विभिन्न हस्तकला सामग्रीले सजिएको चौधरीको स्टलमा सामानको मूल्य ४ सय रुपैयाँदेखि ५ हजार रुपैयाँसम्म पर्छ। सामान्य देखिने यी सामग्री बनाउन भने लामो समय, धैर्य र निरन्तर मेहनत लाग्ने गर्छ।

“हस्तकला सजिलो काम होइन,” चौधरी भन्छन्, “एक–एक सामान बनाउन धेरै समय र मेहनत जान्छ। त्यसैले मूल्य अलि महँगो हुन्छ।”

स्थानीय सीप र उत्पादनलाई बजारसँग जोड्ने उद्देश्यले आयोजकले निःशुल्क स्टल उपलब्ध गराउँदा त्यसको प्रत्यक्ष फाइदा उनलाइ पुगेको हो । महोत्सव मूल आयोजक समितिले महोत्सवमा स्थानीय कृषि र घरेलु उद्योग प्रवर्द्धनका लागि निःशुल्क स्टल व्यवस्था गरिएपछि चौधरीले हस्तनिर्मित सामग्री बिक्री गर्ने अवसर पाएका हुन्।

ग्रीन फाउन्डेसनमार्फत तालिम प्राप्त प्रशिक्षार्थी र प्रशिक्षकबाट बनाइएका डेलवा, हटकेस, पेन होल्डर, टोकरीलगायतका सामग्री उक्त स्थलमा राखिएका छन्।

“हस्तकलाको मूल्य बुझ्ने ग्राहक भेटिन थालेका छन्,” उनी भन्छन्, “तर अझै पनि मेहनतभन्दा सस्तो खोज्ने सोच चुनौती बनेको छ।”

निःशुल्क स्टल उपलब्ध गराउँदा साना हस्तकर्मीलाई जोखिम बिना बजार परीक्षण गर्ने अवसर मिल्ने चौधरीको अनुभव छ। चौधरी मात्र होइन अहिले महोत्सवका कयौं स्थलहरू स्थानीय कृषि प्रवर्द्धनका लागि निःशुल्क रूपमा उपलब्ध गराइएका छन्।

महोत्सव मनोरञ्जन गर्ने स्थान मात्र नभई राष्ट्रिय तथा स्थानीय कलाकारहरूको पहिचान सँगै दाङको स्थानीय उत्पादन, संस्कृति र पर्यटन प्रवर्द्धन गर्ने अवसर पनि भएको मूल आयोजक समितिका संयोजक लालबहादुर केसीले बताए।

महोत्सवस्थलमा निर्माण गरिएको लण्डन ब्रिजको नमूना र जलपरी आकर्षणका केन्द्र बनेका छन्। ती संरचना हेर्न युवापुस्ता र बालबालिकाको लामो लाइन देखिएको थियो। सल्यानबाट आएकी सीता साहुले यसपटकको व्यवस्थापन र आकर्षणले महोत्सव झनै रमाइलो बनेको बताइन्।

महोत्सवमा राखिएका स्टलहरूमा पनि शनिबार राम्रो चहलपहल देखिएको थियो। स्थानीय कृषि उपज, हस्तकला र होटल व्यवसायमा राम्रो कारोबार भएको व्यवसायीहरूले बताएका छन्।

नेपाल घरेलु तथा साना उद्योग महासंघ तुलसीपुरको आयोजनामा सञ्चालन भइरहेको यो महोत्सवले दाङको पर्यटन प्रवर्द्धन र स्थानीय व्यापारलाई चलायमान बनाउने विश्वास गरिएको छ। महोत्सव पुस १९ गतेसम्म सञ्चालन हुनेछ।

दाङ,१५ पुस । तुलसीपुर नगर जेसीजको वर्ष २०२६ का लागि नयाँ कार्यसमिति चयन गरिएको छ। कमल प्रकाश शर्माको अध्यक्षतामा नयाँ नेतृत्व सर्वसम्मत रूपमा चयन गरिएको हो।

नवगठित कार्यसमितिमा शिव न्यौपाने र सागर न्यौपाने कार्यकारिणी उपाध्यक्ष चयन भएका छन्।

त्यसैगरी उपाध्यक्षमा पारस न्यौपाने, छबिन रावत, नितेश सोनी र सागर चौधरी चयन भएका छन्।

यस्तै, सह–सचिवमा सजित रावत चयन भएका छन्।
नयाँ नेतृत्वले युवाको नेतृत्व विकास, सामाजिक उत्तरदायित्व तथा संस्थागत सुदृढीकरणलाई प्राथमिकतामा राख्दै संस्थालाई अझ सशक्त, प्रभावकारी र उदाहरणीय संस्थाका रूपमा अघि बढाउने अपेक्षा जेसीजका पुर्व पदाधिकारीहरुको रहेको छ।

काठमाडौं,१५ पुस । आसन्न प्रतिनिधिसभा निर्वाचनका लागि ६४ राजनीतिक दलले समानुपातिक प्रणालीतर्फको बन्दसूची बुझाएका छन्।

निर्वाचन आयोगका अनुसार समानुपातिक प्रणालीअन्तर्गत बन्दसूची बुझाउने कार्यतालिका पुस १३ र १४ गतेका लागि तय गरिएको थियो।

सोहीअनुसार सोमबार राति अबेरदेखि आज बिहानसम्म गरी ६४ राजनीतिक दलले बन्दसूची बुझाएको आयोगका प्रवक्ता नारायणप्रसाद भट्टराईले जानकारी दिए।
समानुपातिक प्रणालीतर्फ ११० सिटका लागि ६४ दलबाट तीन हजार ४२४ जना उम्मेदवारको नाम बन्दसूचीमा समावेश गरिएको छ।

बन्दसूची बुझाउने दलमध्ये ५४ दलले आफ्नै निर्वाचन चिह्नमा र १० दलले साझा निर्वाचन चिह्नमा उम्मेदवारी दिएका छन्।

कतिपय राजनीतिक दलबीच एकता र सहकार्यको सहमति भएकाले बन्दसूची बुझाउने क्रम राति अबेरसम्म जारी रहेको आयोगले जनाएको छ। यस प्रणालीअन्तर्गत उम्मेदवारी दिन ९३ राजनीतिक दलले आवेदन दिएका थिए।

आयोगले प्राप्त बन्दसूचीको पुस १५ देखि २० गतेसम्म छानबिन गर्ने कार्यतालिका बनाएको छ। छानबिनका क्रममा सच्याउनुपर्ने विवरण वा अपुग कागजात भएमा पुस २१ देखि २७ गतेसम्म दललाई समय दिइनेछ।
त्यसपछि पुस २८ देखि माघ ३ गतेसम्म सच्याइएको बन्दसूची पुनः जाँच गरिने आयोगले जनाएको छ। समानुपातिक प्रणालीतर्फको अन्तिम सूची माघ २० गते प्रकाशन हुने बताइएको छ।

दाङ, १५ पुस । लुम्बिनी प्रदेशका मुख्यमन्त्री चेतनारायण आचार्यले तमु ल्होसार पर्वले आपसी भाइचारा, सद्भाव र बन्धुत्वको भावना बलियो बनाउँदै मौलिक भाषा, संस्कृति र पहिचानको संरक्षण तथा सम्बर्द्धनमा महत्वपूर्ण भूमिका खेल्दै आएको बताएका छन्।

गुरुङ समुदायको महान् पर्व तमु ल्होसारको अवसरमा शुभकामना सन्देश जारी गर्दै मुख्यमन्त्री आचार्यले यस्ता मौलिक पर्वहरूले ‘विविधतामा एकता’ भन्ने नेपाली समाजको साझा मूल्यलाई अझ सुदृढ बनाउने विश्वास व्यक्त गरेका छन्।

शुभकामना सन्देशमा उनले लुम्बिनी प्रदेश भूगोल मात्र नभई भाषा, संस्कृति, कला र सभ्यताका दृष्टिले पनि विविधतायुक्त रहेको उल्लेख गरेका छन्। बहुजातीय, बहुभाषिक र बहुसांस्कृतिक समाजमा मनाइने तमु ल्होसारजस्ता पर्वहरूले सहिष्णुता, आपसी सम्मान र सामाजिक एकतालाई बलियो बनाउने उनको भनाइ छ।

मुख्यमन्त्री आचार्यले प्रदेश सरकारले भाषा, संस्कृति, सभ्यता र लिपिहरूको संरक्षण तथा प्रबर्द्धनलाई उच्च प्राथमिकतामा राख्दै आएको जानकारी दिएका छन्। प्रदेशभित्र रहेका सबै भाषा र सांस्कृतिक पहिचानको संरक्षणका लागि आवश्यक नीतिगत व्यवस्था गर्न भाषा ऐन निर्माणसम्बन्धी छलफल अगाडि बढाइएको पनि उनले स्पष्ट पारे।

सबै धर्म, संस्कृति, परम्परा र सांस्कृतिक अभ्यासलाई समान दृष्टिकोणका साथ सम्मान गर्ने नीति प्रदेश सरकारको स्पष्ट प्रतिबद्धता रहेको उल्लेख गर्दै उनले मौलिक संस्कृति संरक्षणसँगै पर्यटन प्रवर्द्धनमार्फत आर्थिक तथा सामाजिक रूपमा समृद्ध प्रदेश निर्माण गर्न सकिने विश्वास व्यक्त गरेका छन्।

प्रदेश सरकारले अघि सारेको ‘समृद्ध लुम्बिनी, खुसी नागरिक’ को लक्ष्य हासिल गर्न तमु ल्होसार पर्वले सबैमा नयाँ उत्साह, ऊर्जा र प्रेरणा प्रदान गरोस् भन्ने कामना गर्दै मुख्यमन्त्री आचार्यले तमु समुदायसहित सम्पूर्ण प्रदेशवासीको सुख, शान्ति, समृद्धि र निरन्तर प्रगतिको शुभकामना व्यक्त गरेका छन्।

काठमाडौँ,१४ पुस । काठमाडौँ महानगरपालिकाका मेयर बालेन्द्र शाह (बालेन), राष्ट्रिय स्वतन्त्र पार्टीका सभापति रवि लामिछाने र ऊर्जामन्त्री कुलमान घिसिङ एउटै राजनीतिक सहमतिमा पुगेका छन्।

तीनै नेताबीचको समझदारीअनुसार कुलमान घिसिङलाई राष्ट्रिय स्वतन्त्र पार्टी (रास्वपा)मा दोस्रो वरीयतासहित उपसभापति पद दिइने भएको छ।

यसअघि नै रास्वपामा आवद्ध भइसकेका मेयर बालेन्द्र शाहको उपस्थितिमा भएको सहमतिमा कुलमान घिसिङलाई सभापति रवि लामिछानेपछि पार्टीको दोस्रो वरीयतामा राखिएको हो। यसले बालेन, रवि र कुलमानबीच राजनीतिक सहकार्य र एउटै दिशामा अघि बढ्ने स्पष्ट सन्देश दिएको छ।

सहमति सार्वजनिक भएपछि मेयर बालेन्द्र शाहले सामाजिक सञ्जाल फेसबुकमार्फत ‘म नेपाल हाँसेको हेर्न चाहन्छु’ भन्ने सन्देश लेख्दै तीन नेताबीचको साझा उद्देश्य र दृष्टिकोण संकेत गरेका छन्।

सहमतिको चौथो बुँदामा राष्ट्रिय स्वतन्त्र पार्टीको केन्द्रीय सभापति रवि लामिछाने रहने तथा उपसभापतिमा कुलमान घिसिङ, डीपी अर्याल र स्वर्णिम वाग्ले रहने उल्लेख गरिएको छ।

काठमाडौँ,१४ पुस। नेपाली कांग्रेसले अनुशासनको कारबाहीमा परेकाहरूलाई माफी दिए पनि उनीहरूले पार्टीभित्र पाउँदै आएको बहाल पद भने कायम नरहने स्पष्ट गरेको छ।

पार्टीले आइतबार मातहतका सबै कार्यसमितिलाई पठाएको परिपत्रमार्फत कारबाही माफीरमिनाहा भए पनि सम्बन्धित व्यक्तिहरूको पार्टीको बहाल पद समाप्त हुने उल्लेख गरेको हो। परिपत्रमा क्रियाशील सदस्यताको निरन्तरता भने कायम राखिने र सदस्यता नवीकरण गर्न सकिने निर्णय गरिएको छ।

यसअघि शनिबार बसेको केन्द्रीय कार्यसम्पादन समितिको बैठकले अनुशासनविपरीतका गतिविधिमा संलग्न भएकाहरूको निलम्बन, निष्कासन तथा विधानअनुसार स्वतः लागेका कारबाहीको बाँकी अवधि माफ गर्ने निर्णय गरेको थियो। तर, त्यस बैठकपछि जारी विज्ञप्तिमा कारबाही अवधिमा गुमेको पदबारे कुनै स्पष्ट उल्लेख गरिएको थिएन।

शनिबारको निर्णयले विगतको निर्वाचनमा पार्टीका आधिकारिक उम्मेदवार वा समर्थन प्राप्त उम्मेदवारविरुद्ध उम्मेदवारी दिएका, तिनका प्रस्तावक समर्थक तथा असहयोग गर्नेहरूलाई राहत दिएको थियो। यही निर्णयपछि पार्टीभित्र पद पनि पुनःस्थापना हुने अपेक्षा बढेको थियो।

काठमाडौँ,१३ पुस। विघटित प्रतिनिधिसभाको सबैभन्दा ठूलो दल नेपाली कांग्रेसले निर्वाचन आयोगले तोकेको समानुपातिक निर्वाचनतर्फको बन्दसूची बुझाउने समय परिमार्जन गर्न आग्रह गरेको छ।

प्रधानमन्त्री सुशीला कार्कीले शनिबार तीन दलका शीर्ष नेतासँग बैठक गर्दा कांग्रेस सभापति शेरबहादुर देउवाले यस माग राखेका हुन्। यसअघि गत सोमबार प्रधानमन्त्री कार्कीले बोलाएको सर्वदलीय बैठकमा कांग्रेस सहमहामन्त्री महेंद्र यादवले पनि समानुपातिक बन्दसूची बुझाउने म्याद परिमार्जन गर्न आग्रह गरेका थिए।

सरकारले फागुन २१ गते प्रतिनिधिसभा निर्वाचन गर्ने कार्यतालिकासहित दलहरूले बन्दसूची बुझाउने मिति पुस १३–१४ गते तोकेको छ। कांग्रेसले संसदीय समिति नबन्ने अवस्था र गुटगत सूची एकीकृत गर्ने समयको कमीका कारण परिमार्जनको माग गरेको बताइएको छ।

कार्यवाहक प्रमुख निर्वाचन आयुक्त रामप्रसाद भण्डारीले औपचारिक रूपमा आयोगसँग कुनै आग्रह आएको छैन र म्याद परिमार्जन गर्न सुरु गरिए निर्वाचन निर्धारित मितिमा सम्भव नहुने स्पष्ट पारेका छन्। आयोगका अनुसार कार्यतालिका टाइट भएकाले परिमार्जन गर्न सकिँदैन।

शासनमा एक मन्त्रीका अनुसार दलहरूले आयोगलाई तालिका हेरफेर गर्न दबाब दिइरहेको भए पनि आयोगले “म्याद थप्न सम्भव छैन” भनेर स्पष्ट जानकारी गराएको छ।

कांग्रेसले औपचारिक वा अनौपचारिक रूपमा परिमार्जनका लागि आग्रह जारी राखेको छ, तर हालसम्म सरकार वा आयोगको स्पष्ट प्रतिक्रिया आएको छैन। कांग्रेस

काठमाडौँ,१३ पुस । आगामी फागुन २१ गते हुने प्रतिनिधिसभा निर्वाचनका सन्दर्भमा निर्वाचन आयोगमा उच्चस्तरीय सुरक्षा समितिको बैठक बसेको छ।

आयोगका सदस्य सगुन समशेर जबराको अध्यक्षतामा बसेको बैठकमा गृह सचिव रामेश्वर दङ्गाल र रक्षा सचिव केदारनाथ शर्मासहित सुरक्षा निकायका प्रमुख तथा प्रतिनिधिहरूको सहभागिता रहेको छ।

बैठकमा प्रहरी महानिरीक्षक दानबहादुर कार्की, सशस्त्र प्रहरी महानिरीक्षक राजु अर्याल, राष्ट्रिय अनुसन्धान विभागका निर्देशक तथा नेपाली सेनाका रथी सहभागी छन्।

बैठकमा आगामी निर्वाचनलाई शान्तिपूर्ण, सुरक्षित र निष्पक्ष रूपमा सम्पन्न गर्न आवश्यक सुरक्षा व्यवस्थाबारे छलफल भइरहेको निर्वाचन आयोगले जनाएको छ।

काठमाडौँ,१३ पुस । प्रतिनिधिसभा निर्वाचन २०८२ का लागि समानुपातिक निर्वाचन प्रणालीतर्फ राजनीतिक दलहरूको बन्द सूची संकलन प्रक्रिया आजदेखि सुरु भएको छ।

निर्वाचन आयोगका अनुसार यसका लागि आवश्यक सबै प्राविधिक तथा प्रशासनिक तयारी पूरा भइसकेको छ। आयोगको कार्यतालिकाअनुसार आज आइतबार र भोलि सोमबार दर्ता भएका राजनीतिक दलहरूले मात्र समानुपातिकतर्फका उम्मेदवारको बन्द सूची आयोगमा पेस गर्न पाउनेछन्।

आयोगका प्रवक्ता नारायणप्रसाद भट्टराईले बन्द सूची पेसदेखि अन्तिम प्रकाशनसम्मको सम्पूर्ण प्रक्रिया तोकिएको समयसीमाभित्रै सम्पन्न गरिने जानकारी दिए।
आयोगका अनुसार पेस गरिएका बन्द सूचीको पुस १५ देखि २० गतेसम्म छानबिन गरिनेछ। छानबिनका क्रममा कानुनअनुसार समावेशी मापदण्ड पूरा भए–नभएको, उम्मेदवारको योग्यता तथा सूचीको संरचना जाँच गरिनेछ।

छानबिनपछि पुस २१ देखि २७ गतेसम्म सम्बन्धित दलहरूलाई त्रुटि सच्याउने अवसर प्रदान गरिनेछ। त्यसपछि पुस २८ गतेदेखि माघ ३ गतेसम्म पुनः परीक्षण गरी माघ ४ गते प्रारम्भिक बन्द सूची सार्वजनिक गरिने आयोगले जनाएको छ। अन्तिम रूपमा माघ २० गते समानुपातिकतर्फको अन्तिम बन्द सूची प्रकाशन गरिनेछ।

यस निर्वाचनमा समानुपातिक प्रणालीमार्फत भाग लिन १०० वटा राजनीतिक दल दर्ता भएका छन्। ती दलहरूले ९३ वटा निर्वाचन चिह्न प्रयोग गरी निर्वाचनमा प्रतिस्पर्धा गर्नेछन्। आयोगले दर्ता भएका दलहरूलाई मात्र बन्द सूची पेस गर्न पाउने व्यवस्था लागू गरिएको स्पष्ट पारेको छ।