दाङ,६ पुस। नीतिगत स्पष्टता र प्रभावकारी कार्यान्वयनको अभावका कारण स्थानीय अर्थतन्त्र गम्भीर सङ्कटतर्फ धकेलिँदै गएको सरोकारवालाहरूले बताएका छन्। स्थानीय तहमा युवालाई अर्थतन्त्रसँग जोड्ने स्पष्ट नीति, सिपयुक्त कार्यक्रम र परिणाममुखी योजना नहुँदा बेरोजगारी समस्या जटिल बन्दै गएको उनीहरूको भनाइ छ ।

तुलसीपुर उद्योग वाणिज्य संघ र सेवा प्रतिष्ठान नेपालको आयोजना तथा तुलसीपुर उपमहानगरपालिकाको सहकार्यमा आयोजित स्थानीय अर्थतन्त्रको सवलीकरणका लागि युवा सहभागिता विषयक नीति संवाद तथा कार्यशाला गोष्ठीमा वक्ताहरूले यस्तो बताएका हुन्। उनीहरुले नीति बनाउने भन्दा पनि त्यसको कार्यान्वयन पक्ष कमजोर हुँदा अपेक्षित उपलब्धि नआएको बताए ।

कार्यक्रममा तुलसीपुर उपमहानगरपालिकाका नगरप्रमुख टिकाराम खड्काले माटो सुहाउँदो उद्यमशीलता बिना अर्थतन्त्र सुधार सम्भव नहुने स्पष्ट पारे । “स्थानीय स्रोत र कृषि उत्पादनमा आधारित उद्यम प्रवर्द्धन गर्न सके रोजगारी सिर्जना हुन्छ,” उनले भने । विदेशीने मानसिकताका कारण युवाहरु कृषि र स्थानीय उद्यममा उपेक्षित हुँदा बेरोजगारी बढेको उनको भनाइ थियो ।

तुलसीपुर उद्योग वाणिज्य संघका अध्यक्ष विनिल केसीले स्थानीय तहमा युवाको वास्तविक अवस्था, सिप र दक्षतासम्बन्धी तथ्यांक नहुँदा नीति प्रभावकारी हुन नसकेको बताए । “तालिम दिएर मात्र हुँदैन, त्यसको निरन्तरता, बजारसँगको सम्बन्ध र ट्रेसर स्टडी अनिवार्य छ,” उनले भने । डिजिटल प्रणाली बिना रोजगारदाता र जनशक्तिबीचको दूरी घटाउन कठिन हुने उनको भनाइ थियो ।

उद्योग वाणिज्य संघका पूर्व अध्यक्ष विमल रिजालले बेरोजगारी अन्त्यमा सरकार र निजी क्षेत्रसँगै परिवारको पनि भूमिका महत्त्वपूर्ण हुने उल्लेख गरे । कम ब्याजदरमा ऋण, जिम्मेवारीपूर्ण सोच र अवसरको सदुपयोग गर्न सके स्थानीय स्तरमै सम्भावना प्रशस्त रहेको उनले बताए ।

योजना विद् डा। नहकुल केसीले लुम्बिनी प्रदेशमा अझै ११ प्रतिशत युवा पूर्ण बेरोजगार रहेको उल्लेख गर्दै राष्ट्रिय युवा नीति लागू भए पनि स्थानीय तहमा त्यसको प्रभाव नदेखिएको बताए । युवाको आवश्यकता, चाहना र रोजगारी सिर्जनासम्बन्धी तथ्यांक संकलन, विश्लेषण र त्यसअनुसार बजेट तथा कार्यक्रम ल्याउन स्थानीय सरकार गम्भीर हुनुपर्ने उनको जोड थियो ।

कार्यक्रमले स्पष्ट नीति, स्थानीय तहको नेतृत्व, युवामैत्री बजेट र प्रभावकारी कार्यान्वयन बिना स्थानीय अर्थतन्त्र सवलीकरण सम्भव हुने सहभागीहरुको भनाई थियो। कार्यक्रमको सहजीकरण उद्योग वाणिज्य संघका कर्मचारी पारेश्वर भट्टराईले गरेका थिए।

काठमाडौं,६ पुस । शिक्षामन्त्री महावीर पुनले विद्यालय सुधारका लागि अभिभावकलाई सक्रिय भूमिका खेल्न आह्वान गरेका छन्। उनले देशका धेरै विद्यालयमा बेथिति, भ्रष्टाचार र अत्यधिक राजनीतीकरण बढ्दै गएको उल्लेख गर्दै त्यसविरुद्ध स्थानीय स्तरमै एकजुट भएर आवाज उठाउन आग्रह गरेका हुन्।

विद्यालयमा देखिएको मनपरी र राजनीतिक हस्तक्षेप अन्त्यका लागि अभिभावकको दबाब आवश्यक रहेको भन्दै मन्त्री पुनले सुधारका लागि आन्दोलन अपरिहार्य भएको बताए।

“स्थानीय अभिभावकहरू एकजुट भएर कडा चेतावनी र दबाब नदिएसम्म विद्यालयको अवस्था सुधारिन गाह्रो छ,” उनले स्पष्ट पारे।

शिक्षामन्त्री पुनले संविधानले नै अभिभावकलाई आफ्नो सन्तानको शिक्षासम्बन्धी सवालमा आवाज उठाउने पूर्ण अधिकार दिएको उल्लेख गरे। केन्द्रबाट मात्रै निर्देशन दिएर समस्या समाधान नहुने अनुभव भएको बताउँदै उनले स्थानीय स्तरको सक्रिय सहभागिता अनिवार्य रहेको धारणा राखे।

“अब काठमाडौंबाट मात्रै निर्देशन दिएर पुग्ने अवस्था छैन,” उनले भने, “आफ्ना छोराछोरीको भविष्य सुरक्षित गर्न अभिभावक स्वयं जाग्नुपर्छ।”

दाङ,६ पुस । दाङको तुलसीपुर उपमहानगरपालिकालाई सहयोगापेक्षी सडक आश्रित मानवमुक्त नगर घोषणा गरिएको छ । दाङको तुलसीपुर उपमहानगरपालिकाले सडकमा आश्रित भएर जीवन बिताइरहेका व्यक्तिको उद्धार र सम्मानजनक जीवनको सुनिश्चितताका लागि ऐतिहासिक कदम चालेको हो।

मानवसेवा आश्रमसँगको सहकार्यमा तुलसीपुरलाई ‘सहयोगापेक्षी सडक आश्रित मानवमुक्त’ उपमहानगरपालिका घोषणा गरिएको हो। आइतबार आयोजित कार्यक्रममा जिल्ला समन्वय समिति प्रमुख नित्यानन्द शर्मा, राजनीतिक दलका प्रतिनिधि, संघ–संस्था तथा सरोकारवालाको उपस्थितिमा नगरप्रमुख टिकाराम खड्काले उक्त घोषणा गरेका हुन्। यस अवसरमा घोषणापत्र मानवसेवा आश्रमका केन्द्रीय अध्यक्ष रामजी अधिकारीलाई हस्तान्तरण गरिएको थियो।

कार्यक्रममा बोल्दै जिल्ला समन्वय समिति प्रमुख शर्माले सडक जीवन कुनै व्यक्तिको रोजाइ नभई परिस्थितिको उपज हुने उल्लेख गर्दै पीडितलाई हेर्ने दृष्टिकोण बदल्नुपर्नेमा जोड दिए। मानवीय सेवाभन्दा ठूलो धर्म अरू नहुने उनको भनाइ थियो।

नगरप्रमुख खड्काले यो अभियान औपचारिकतामा सीमित नराखी व्यवहारमै लागू गरिने प्रतिबद्धता जनाए। लुम्बिनी प्रदेशमै पहिलो पटक यस्तो घोषणा गर्न पाउँदा गर्व महसुस भएको भन्दै उनले उपमहानगरवासीलाई सडकमा आश्रित व्यक्तिलाई देखे तत्काल मानवसेवा आश्रमसम्म पुर्‍याउन सहयोग गर्न आग्रह गरे।

मानवसेवा आश्रमका केन्द्रीय अध्यक्ष अधिकारीले २०८२ सालभित्र देशभरका स्थानीय तह तथा सातै प्रदेशलाई ‘सहयोगापेक्षी सडक आश्रित मानवमुक्त’ बनाउने लक्ष्य रहेको जानकारी दिए। चालु वर्षको अन्त्यसम्म नेपाललाई नै यस्तो घोषणा गर्ने तयारी भइरहेको उनको भनाइ थियो।

घोषणासँगै तुलसीपुरमा मनोसामाजिक समस्या भएका, खुला आकाशमुनि बस्न बाध्य, खाने–बस्ने व्यवस्था नभएका ज्येष्ठ नागरिक, अनाथ, अपाङ्गता भएका, मनोरोगी तथा जीवन संकटमा परेका व्यक्तिको उद्धार, संरक्षण र व्यवस्थापन मानवसेवा आश्रमले उपमहानगरपालिकाको आर्थिक सहयोगमा गर्नेछ।

उपमहानगरपालिकाकी उपप्रमुख स्यानी चौधरीको स्वागत मन्तव्यबाट सुरु भएको कार्यक्रमको सहजीकरण महिला विकास शाखा प्रमुख माया श्रेष्ठले गरेकी थिइन्।

दाङ, ५ पुस । दाङको तुलसीपुरमा जारी प्रथम तुलसीपुर महोत्सव दोस्रो दिन शनिबार ‘हाउसफुल’ बनेको छ। चर्चित कलाकारहरूको प्रस्तुति हेर्न दर्शकको अत्यधिक भीड लागेपछि महोत्सवस्थल पूरै भरिभराउ देखिएको थियो।

महोत्सवको मुख्य आकर्षणका रूपमा चर्चित लोकदोहोरी गायक रामजी खाँड र गायिका भूमिका गिरीले प्रस्तुति दिएसँगै दर्शकको उत्साह बढेको थियो।

गायक रामजी खाँडले ‘तिम्रो त बोलिमा मन्त्र मोहनी’, ‘डाली नुह्यो चरीले टेकेर’, ‘मन परेको मान्छेको नाम दिलमै लेखिन्छ’, ‘अमिलो रसैले’ लगायतका चर्चित गीत प्रस्तुत गर्दा दर्शक छमछम नाचेका थिए। उनका सदाबहार लोकदोहोरी गीतमा दर्शकले ताली र हुटिङ गर्दै साथ दिएका थिए।

यस्तै, गायिका भूमिका गिरीले ‘सरर आउ माया’, ‘मिनी बसमा चढेर जाउ माया’, ‘चिसोमा चिसो बतासै सरर’, ‘चोली मैलो भो’ र ‘तारासँगै जुन’ जस्ता लोकप्रिय गीत गाएर दर्शकलाई झुमाएकी थिइन्। मञ्च अगाडि ठूलो जनसागर नाचगानमा रमाएको थियो।

शनिबारको कार्यक्रममा गायक गायिकासँगै रचना चौधरी, राजमान खत्री लगायत स्थानीय कलाकारहरूको पनि प्रस्तुति रहेको थियो। कलाकारहरूले गीतसंगीतसँगै दाङको स्थानीय उत्पादन, संस्कृति र पर्यटन प्रवर्द्धनमा महोत्सवको भूमिकाबारे पनि धारणा राखेका थिए।

महोत्सव अवलोकन गर्न रुकुम पश्चिम, सल्यानलगायत टाढा–टाढाबाट दर्शक आएका थिए। रुकुम पश्चिमबाट आएकी टिका वलीले सय रुपैयाँको टिकटमा धेरै मनोरञ्जन लिन पाएको बताइन्। “पहिलाको भन्दा यो पटकको महोत्सव सबै हिसाबले राम्रो लाग्यो,” उनले भनिन्।

महोत्सवस्थलमा निर्माण गरिएको लण्डन ब्रिजको नमूना र जलपरी आकर्षणका केन्द्र बनेका छन्। ती संरचना हेर्न युवापुस्ता र बालबालिकाको लामो लाइन देखिएको थियो। सल्यानबाट आएकी सीता साहुले यसपटकको व्यवस्थापन र आकर्षणले महोत्सव झनै रमाइलो बनेको बताइन्।

महोत्सवमा राखिएका स्टलहरूमा पनि शनिबार राम्रो चहलपहल देखिएको थियो। स्थानीय कृषि उपज, हस्तकला र होटल व्यवसायमा राम्रो कारोबार भएको व्यवसायीहरूले बताएका छन्।

महोत्सव मूल आयोजक समितिका संयोजक लालबहादुर केसीले शनिबार दर्शकको अत्यधिक उपस्थिति रहेको जानकारी दिए। उनका शुक्रबार औपचारिक उद्घाटन भएपछि शनिबारदेखि मनोरञ्जनात्मक कार्यक्रम सुरु भएका हुन्।

नेपाल घरेलु तथा साना उद्योग महासंघ तुलसीपुरको आयोजनामा सञ्चालन भइरहेको यो महोत्सवले दाङको पर्यटन प्रवर्द्धन र स्थानीय व्यापारलाई चलायमान बनाउने विश्वास गरिएको छ। महोत्सव पुस १९ गतेसम्म सञ्चालन हुनेछ।

महोत्सवका महासचिव भद्रबहादुर वलीका अनुसार आइतबार पनि राष्ट्रिय तथा स्थानीयस्तरका कलाकारहरूको प्रस्तुति रहनेछ। आइतबार चर्चित गायक कुलेन्द्र विश्वकर्मा, प्रेम शर्मा र गायिका सीता थापा लगायत कलाकारहरूले प्रस्तुति दिने कार्यक्रम रहेको छ।

काठमाडौं,५ पुस। नेपाली कांग्रेसका नेता श्याम घिमिरे र नेकपा एमालेका नेता महेश बर्तौलाबीच संसद् पुनःस्थापनासहित समसामयिक राजनीतिक विषयमा छलफल भएको छ ।

शनिबार दिउँसो कांग्रेस संसदीय दलको कार्यालय, सिंहदरबारमा भएको भेटघाटमा दुबै नेताले पछिल्लो राजनीतिक अवस्थाबारे विचार विमर्श गरेका हुन् । कांग्रेस संसदीय दलको कार्यालयमा भएको छलफल समसामयिक विषयमा केन्द्रित रहेको एमाले नेता बर्तौलाले जानकारी दिए ।

बर्तौला विघटित प्रतिनिधिसभामा नेकपा एमाले संसदीय दलका मुख्य सचेतक हुन् भने घिमिरे नेपाली कांग्रेस संसदीय दलका प्रमुख सचेतक हुन् । छलफलका क्रममा संसद् पुनःस्थापना र त्यसपछिको राजनीतिक प्रक्रियाबारे विशेष ध्यान दिइएको बताइएको छ ।

यसअघि शनिबार बिहान मात्रै नेता बर्तौलाले प्रतिनिधिसभा पुनःस्थापना गरी संसद्को बैठक आव्हान गर्न राष्ट्रपति रामचन्द्र पौडेलसमक्ष आग्रह गरेका थिए ।

काठमाडौं,५ पुस।। सरकारले वैदेशिक रोजगारीमा जाने श्रमिकको स्वास्थ्य परीक्षण र शुल्कसम्बन्धी हालै लागू गरिएको नयाँ मापदण्ड खारेज गरेको छ । नवनियुक्त श्रम, रोजगार तथा सामाजिक सुरक्षामन्त्री राजेन्द्रसिंह भण्डारीले शुक्रबार मन्त्रीस्तरीय निर्णयमार्फत उक्त मापदण्ड खारेज गरेका हुन् ।

गत ३० कात्तिकमा श्रम मन्त्रालयले वैदेशिक रोजगारीमा जाने श्रमिकको गुणस्तरीय स्वास्थ्य परीक्षण सुनिश्चित गर्ने उद्देश्यसहित स्वास्थ्य परीक्षणको दायरा विस्तार गर्दै ३४ प्रकारका परीक्षण अनिवार्य गरेको थियो । सोही निर्णयअनुसार स्वास्थ्य परीक्षण शुल्क ९ हजार ५ सय रुपैयाँ निर्धारण गरिएको थियो ।

तर उक्त निर्णयप्रति वैदेशिक रोजगारीमा जाने श्रमिक, वैदेशिक रोजगार व्यवसायी संघलगायत सरोकारवाला पक्षबाट शुल्क वृद्धि श्रमिक हितविपरीत भएको भन्दै गुनासो आएपछि प्रधानमन्त्री सुशीला कार्कीको निर्देशनमा मापदण्ड खारेज गरिएको श्रममन्त्री भण्डारीले जानकारी दिए ।

श्रम मन्त्रालयका प्रवक्ता पिताम्बर घिमिरेद्वारा जारी विज्ञप्तिमा ३० कात्तिकको निर्णयअनुसार बढाइएको स्वास्थ्य परीक्षण शुल्क श्रमिकमैत्री नभएको भन्दै सच्याउन प्रधानमन्त्रीबाट निर्देशन प्राप्त भएको उल्लेख छ । सोही निर्देशनका आधारमा मन्त्रीस्तरीय निर्णयबाट शुल्क वृद्धि खारेज गरिएको विज्ञप्तिमा जनाइएको छ ।

मन्त्रालयले अब वैदेशिक रोजगारीमा जाने श्रमिकको स्वास्थ्य परीक्षण गर्ने संस्थाले साविककै मापदण्डअनुसार परीक्षण र शुल्क लिने गरी कार्यान्वयन गर्न निर्देशन दिएको छ । यसअघि लागू रहेको स्वास्थ्य परीक्षण शुल्क ६ हजार ५ सय रुपैयाँ थियो ।

काठमाडौं,५ पुस। नेपाली कम्युनिस्ट पार्टी (नेकपा) ले उम्मेदवार छनोटमा नयाँ मापदण्ड लागू गरेको छ । आउँदो माघ ११ गते हुने राष्ट्रियसभा सदस्य निर्वाचन तथा फागुन २१ गतेका लागि तय प्रतिनिधिसभा सदस्य निर्वाचनका लागि उम्मेदवार छनोटमा मापदण्ड लागू गरेको हो।

पार्टीले जारी गरेको आन्तरिक परिपत्रअनुसार उम्मेदवार कानुनी, आर्थिक, सामाजिक र वैचारिक रूपमा पूर्ण रूपमा स्वच्छ हुनुपर्ने व्यवस्था गरिएको छ । प्रतिनिधिसभाका उम्मेदवार कम्तीमा २५ वर्ष र राष्ट्रियसभाका लागि ३५ वर्ष उमेर पूरा गरेको नेपाली नागरिक हुनुपर्नेछ । साथै, मतदाता नामावलीमा नाम दर्ता भएको र संविधान तथा कानुनले अयोग्य ठहर्‍याएको व्यक्ति हुन नहुने स्पष्ट गरिएको छ ।

बहालवाला राष्ट्रियसभा, प्रदेशसभा तथा स्थानीय तहका पदाधिकारीलाई उम्मेदवारी दिन नपाउने व्यवस्था गरिएको छ । आर्थिक पारदर्शितालाई विशेष महत्व दिँदै भ्रष्टाचार मुद्दामा अदालतबाट दोषी ठहरिएका व्यक्ति उम्मेदवार बन्न अयोग्य हुने उल्लेख छ । कर–राजस्व अद्यावधिक, कालोसूचीमा नाम नपरेको र सम्पत्ति तथा आयस्रोत खुला रूपमा घोषणा गर्न तयार हुनुपर्ने सर्त अनिवार्य गरिएको छ । पार्टीको आर्थिक अनुशासन उल्लंघन गर्नेहरू पनि उम्मेदवारीबाट बाहिरिनेछन् ।

सामाजिक आचरणका सवालमा पनि पार्टीले कडा नीति अवलम्बन गरेको छ । जातीय वा लैंगिक विभेद, घरेलु हिंसा, यौन उत्पीडन, मानव बेचबिखनजस्ता अपराधमा दोषी ठहरिएका व्यक्ति पार्टीबाट उम्मेदवार बन्न नपाउने व्यवस्था गरिएको छ ।

राजनीतिक रूपमा पार्टीको नीति, कार्यक्रम र विचारप्रति पूर्ण प्रतिबद्धता, आन्दोलनमा निरन्तर योगदान, सामाजिक प्रतिष्ठा तथा जनताबीच लोकप्रियता उम्मेदवारका अनिवार्य मापदण्ड तोकिएका छन् । उम्मेदवार सिफारिस गर्दा विषयगत विज्ञता, नीति निर्माण क्षमता र सार्वजनिक संवाद कौशललाई पनि आधार बनाइनेछ ।

प्रत्यक्ष निर्वाचन प्रणालीतर्फ प्रत्येक क्षेत्रबाट कम्तीमा एक युवा र एक महिलासहित बढीमा पाँच जना उम्मेदवार सिफारिस गर्नुपर्नेछ । जित्ने सम्भावना भएका लोकप्रिय व्यक्तिलाई प्राथमिकता दिन निर्देशन दिइएको छ ।

समानुपातिक प्रणालीतर्फ महिला, दलित, जनजाति, मधेसीलगायत क्लस्टरको अनिवार्य समावेशीकरण गर्दै सहिद तथा बेपत्ता परिवार, द्वन्द्वपीडित र विपन्न वर्गलाई विशेष प्राथमिकता दिनुपर्ने उल्लेख छ । एकै परिवारबाट एकभन्दा बढी व्यक्ति सिफारिस गर्न पूर्ण रूपमा प्रतिबन्ध लगाइएको छ ।

राष्ट्रियसभातर्फ प्रदेशस्तरबाट प्रत्येक क्लस्टरका लागि बढीमा पाँच–पाँच जना सिफारिस गर्ने प्रावधान राखिएको छ ।

पार्टी नेतृत्वले यी मापदण्ड कडाइका साथ कार्यान्वयन गरी स्वच्छ, सक्षम र जनमुखी उम्मेदवार मात्र निर्वाचन मैदानमा उतार्ने प्रतिबद्धता जनाएको छ । यस कदमले आगामी निर्वाचनमा पार्टीको छवि थप सुदृढ हुने अपेक्षा गरिएको छ । पार्टीका अनुसार परिपत्र सबै तहका कमिटीसम्म पुगिसकेको छ ।

काठमाडौं,४ पुस। अमेरिकाले ‘डाइभर्सिटी भिसा’ (डीभी) लोटरी कार्यक्रम तत्कालका लागि स्थगित गरेको छ।

राष्ट्रपति डोनाल्ड ट्रम्पको निर्देशनअनुसार अमेरिकी गृह सुरक्षा विभागले डीभी कार्यक्रम रोक्ने निर्णय गरेको हो। हालै रोड आइल्याण्डस्थित ब्राउन युनिभर्सिटीमा भएको घातक गोलीकाण्डमा संलग्न मुख्य संदिग्ध व्यक्ति डीभी लोटरीमार्फत अमेरिका प्रवेश गरेको तथ्य खुलेपछि कार्यक्रम स्थगित गरिएको बताइएको छ।

अमेरिकी गृह सुरक्षा मन्त्री क्रिस्टी नोमले सामाजिक सञ्जालमार्फत जानकारी दिँदै ब्राउन युनिभर्सिटी गोलीकाण्डका संदिग्ध क्लाउडियो म्यानुअल नेभ्स भ्यालेन्टे सन् २०१७ मा डीभी–१ कार्यक्रममार्फत अमेरिका आएको उल्लेख गरेकी छन्। राष्ट्रपति ट्रम्पको निर्देशनमा तत्काल लागू हुने गरी डीभी कार्यक्रम स्थगित गरिएको उनको भनाइ छ।

गत हप्ता ब्राउन युनिभर्सिटी परिसरमा भएको अन्धाधुन्ध गोली प्रहारमा दुई जना विद्यार्थीको मृत्यु भएको थियो भने नौ जना घाइते भएका थिए। घटनाका मुख्य आरोपी ४८ वर्षीय पोर्चुगाली नागरिक रहेको अमेरिकी सञ्चारमाध्यमहरूले जनाएका छन्। उनी दुई दशकअघि ब्राउन युनिभर्सिटीमै विद्यार्थी थिए र पछि डीभी लोटरीमार्फत स्थायी बसोबास अनुमति (ग्रीन कार्ड) प्राप्त गरेका थिए।

काठमाडौं,४ पुस। नेपाल प्रहरीले काठमाडौं उपत्यकाका विभिन्न स्पा, होटल तथा मनोरञ्जन स्थलबाट आठ जना नाबालिकाको उद्धार गरेको छ। नाबालिकालाई यौनजन्य क्रियाकलापमा संलग्न गराएको आरोपमा पाँच जनालाई पक्राउ गरिएको मानव बेचबिखन अनुसन्धान ब्यूरोले जनाएको छ।

ब्यूरोले बिहीबार सार्वजनिक गरेको जानकारीअनुसार अनुसन्धानका क्रममा नाबालिकाहरूलाई जबर्जस्ती वेश्यावृत्तिमा लगाउने कार्य भइरहेको पाइएपछि प्रहरी कारबाहीमा उत्रिएको हो। सोही क्रममा विभिन्न स्थानबाट आठ जना बालिकाको उद्धार गरिएको ब्यूरोका प्रवक्ता प्रहरी उपरीक्षक विश्वराज खड्काले जानकारी दिए।

पक्राउ पर्नेमा काठमाडौं बूढानीलकण्ठ नगरपालिका–१३ का ३२ वर्षीय हेमन्त श्रेष्ठ, सिन्धुली दुधौली नगरपालिका–१२ की ४० वर्षीया गीताकुमारी आचार्य, सल्यान कुमाख गाउँपालिका–४ का ४५ वर्षीय गोविन्द बुढाथोकी, बझाङ छबिसपाथीभेरा गाउँपालिका–१ का ४२ वर्षीय हरिभक्त गिरी र कैलाली गौरीगङ्गा नगरपालिका–६ का ४९ वर्षीय भीमबहादुर साउद रहेका छन्।

काठमाडौं उपत्यकाका विभिन्न डान्सबार, क्लब, दोहोरी सेन्टर, खाजाघर, स्पा सेन्टर तथा गेस्टहाउसहरूमा आर्थिक लाभ लिई नाबालिकालाई यौनशोषण र वेश्यावृत्तिमा संलग्न गराउने गरिएको भन्ने सूचनाका आधारमा मानव बेचबिखन अनुसन्धान ब्यूरोबाट खटिएको प्रहरी टोलीले छापा मारेको हो।

प्रहरीले ठमेलस्थित गोल्डेन स्पा, चावहिलस्थित फायर लाउन्ज एण्ड क्लब, बौद्धस्थित लक्की स्पा, मित्रनगरस्थित सुदूरपश्चिम खाजाघर तथा खप्तड सुदूरपश्चिम गेस्टहाउसबाट ती बालिकाको उद्धार गरेको जनाएको छ।

पक्राउ परेका व्यक्तिहरूमाथि जिल्ला अदालत काठमाडौंबाट म्याद थप अनुमति लिई मानव बेचबिखन तथा बालबालिकाविरुद्धको कसूरसम्बन्धी मुद्दामा थप अनुसन्धान भइरहेको प्रहरीले जनाएको छ।

दाङ,३पुस । भोलिदेखि दाङको तुलसीपुरमा प्रथम तुलसीपुर महोत्सव सन्चालन हुन लागेको छ। शुक्रबार देखी सुरु हुने महोत्सवको उद्घाटन लुम्बिनी प्रदेश सभाका सभामुख तुलाराम घर्तीले गर्ने भएका छन्। नेपाल घरेलु तथा साना उद्योग संघ तुलसीपुरको आयोजनामा सञ्चालन हुन लागेको छ। महोत्सवबारे जानकारी दिन आयोजना गरिएको पत्रकार सम्मेलन सो कुराको जानकारी गराइएको हो ।

महोत्सव उद्घाटनका अवसरमा बिहान ११ बजे तुलसीपुर बसपार्कबाट र्‍याली सुरु हुने आयोजकले जनाएको छ। कार्यक्रमको प्रमुख अतिथि लुम्बिनी प्रदेश सभाका सभामुख तुलाराम घर्ती रहनेछन्।

“स्थानीय उत्पादनलाई प्रवर्द्धन गरौं, औद्योगिक वातावरणको सुधार, दिगो अर्थतन्त्रको सुधार” भन्ने मूल नारासहित महोत्सव सञ्चालन हुन लागेको हो। महोत्सवमा ४० वर्षमुनिका युवालाई लक्षित गरी आइडिया कन्स्टेस्ट तथा २५ वर्षमुनिका युवायुवतीका लागि वक्तृत्वकला प्रतियोगिता आयोजना गरिनेछ।

सुरक्षाका लागि ५० भन्दा बढी सुरक्षाकर्मी परिचालन गरिने र महोत्सव स्थलमा सिसिटिभी क्यामेरा जडान गरिएको आयोजकले जानकारी दिएको छ।

कृषि तथा स्थानीय उत्पादन प्रवर्द्धनका लागि ५० वटा स्टल निःशुल्क उपलब्ध गराइनेछ। साथै बिक्री–वितरणको आधारमा उत्कृष्ट स्टललाई प्रोत्साहन स्वरूप पुरस्कार प्रदान गरिने जनाइएको छ।

महोत्सव सञ्चालनका लागि २५१ सदस्यीय मूल आयोजक समिति गठन गरिएको छ भने व्यवस्थापनका लागि २७ वटा विभिन्न उपसमिति बनाइएको आयोजकले जनाएको छ।महोत्सव पुस ४ गतेदेखि १९ गतेसम्म सन्चालन हुनेछ ।