काठमाडौ,२४ कार्तिक । नेपाल प्रहरीले नयाँ महानिरीक्षक (आईजीपी) पाएको छ। एआईजी दानबहादुर कार्कीलाई सोमबार बसेको मन्त्रिपरिषद् बैठकले नेपाल प्रहरीको महानिरीक्षकमा नियुक्त गरेको सञ्चार, सूचना तथा प्रविधिमन्त्री जगदीश खरेलले जानकारी दिएका छन्।

कार्की हाल काठमाडौं उपत्यका प्रहरी कार्यालय, रानीपोखरीमा कार्यरत छन्। वर्तमान आईजीपी चन्द्रकुवेर खापुङ ३० वर्षे सेवा अवधि पूरा भएपछि २६ कात्तिक राति १२ बजेबाट अनिवार्य अवकाशमा जान लागेका छन्। त्यसअघि नै सरकारले कार्कीलाई नयाँ आईजीपीको जिम्मेवारी दिएको हो।

२४ भदौमा जेन–जी आन्दोलनका बेला कार्कीले उपत्यकाको कमाण्ड सम्हालेका थिए। त्यसअघि उनले प्रहरी प्रधान कार्यालयमा मानव स्रोत साधन विभागको प्रमुखको जिम्मेवारी सम्हालेका थिए।

डीआईजी हुँदा उनले लुम्बिनी प्रदेशको कमाण्ड गरेका थिए भने एसएसपीका रूपमा काठमाडौं जिल्ला प्रहरी परिसरमा रहँदा चर्चित भुटानी शरणार्थी प्रकरणको मुद्दा चलेको थियो।

ईमानदार र अनुशासित प्रहरी अधिकृतका रूपमा परिचित कार्की आर्थिक विवादमा नपरेका अधिकारी हुन्। उनी विदेशमा विभिन्न तालिम लिइसकेका छन् र नेपाल प्रहरीका केन्द्रीय प्रवक्ताको जिम्मेवारी पनि सम्हालिसकेका छन्।

काठमाडौ,२४ कार्तिक । मधेश प्रदेशमा मुख्यमन्त्री नियुक्तिको विषयलाई लिएर उत्पन्न विवादले हिंसात्मक रूप लिएको छ। असन्तुष्ट दलका नेता तथा कार्यकर्ताहरूले मुख्यमन्त्री कार्यालयमा तोडफोड गर्नुका साथै त्यहाँका कर्मचारीलाई समेत कुटपिट गरेका छन्।

मुख्यमन्त्रीको कार्यकक्षमा रहेका एक पुरुष कर्मचारीले रेकर्ड फाइल जोगाउन खोज्दा भीडले उनलाई कुटेको भिडियो सार्वजनिक भएको छ। भिडले उनको टाउकोमा मुक्का प्रहार गरेको देखिन्छ। फाइल भुइँमा खसाएपछि अन्य कर्मचारीले उनलाई कोठाबाट बाहिर निकालेर ज्यान जोगाएका थिए।

मुख्यमन्त्री नियुक्तिको विवादपछि प्रदेश प्रमुख र मुख्यमन्त्री कार्यालयमा तोडफोड भएको र मधेश भवन अगाडि टायर बालेर प्रदर्शन समेत गरिएको छ।

आज बिहानै नेपाली कांग्रेस, जनता समाजवादी पार्टी (जसपा), लोकतान्त्रिक समाजवादी पार्टी (लोसपा) लगायतका सांसदहरू मुख्यमन्त्रीको कार्यकक्षमा पुगेर तोडफोड गरेका थिए। यस क्रममा एक सांसदले नेपालको राष्ट्रिय झन्डा समेत फालिदिएका छन्।

यी दलका सांसद र कार्यकर्ताहरू एमालेका नेता सरोजकुमार यादवलाई मुख्यमन्त्री नियुक्त गरिएको विरोधमा प्रदर्शनमा उत्रिएका हुन्।

प्रदेश प्रमुख सुमित्रा सुवेदी भण्डारीले आज बिहान ४ बजे बिरामी भएको भन्दै काठमाडौं जान लागेको बताएकी थिइन्। निवर्तमान मुख्यमन्त्री जितेन्द्र सोनलले उनलाई फूल दिएर बिदाइ पनि गरेका थिए। तर पछि उनी महोत्तरीको बर्दिबास नगरपालिका–३ कालापानीस्थित होटल पानसमा पुगेर एमाले संसदीय दलका नेता सरोजकुमार यादवलाई मुख्यमन्त्री पदको शपथ गराएकी थिइन्।

यस घटनापछि मधेशको राजनीति तनावग्रस्त बनेको छ। निवर्तमान मुख्यमन्त्री सोनलले प्रदेश प्रमुखले “मधेशको अस्मिता लुटेको” आरोप लगाएका छन्।

यस्तै, जनमत पार्टीका अध्यक्ष डा. सीके राउतले मधेशलाई स्वायत्त प्रदेश घोषणा गर्ने यही मौका भएको भन्दै सडकमै प्रदेशसभाको बैठक डाकेर स्वायत्त घोषणा गर्न आह्वान गरेका छन्।

विराटनगर,२४ कार्तिक । कोशी प्रदेशका मुख्यमन्त्री हिक्मतकुमार कार्कीले नेकपा एमालेबाट सहभागी भएका मन्त्रीहरूलाई परिवर्तन गर्ने अन्तिम तयारी गरेका छन्।

एमाले कोशी प्रदेश इन्चार्ज शेरधन राईका अनुसार पार्टीले मुख्यमन्त्रीलाई मन्त्रिपरिषद् पुनर्गठन गर्न निर्देशन दिइसकेको छ।

‘हामीले मुख्यमन्त्रीलाई लामो समयअघि नै मन्त्रिपरिषद् पुनः गठन गर्न भनेका थियौं,’ राईले बताए, ‘अब छिट्टै पुनर्गठन हुने सम्भावना छ।’

उनका अनुसार एमालेको निर्णयअनुसार पार्टीका सबै मन्त्रीहरूलाई परिवर्तन गर्ने तयारी भएको छ।
‘कांग्रेसले गरेन भने पनि एमालेका मात्रै भए पनि सबै मन्त्री परिवर्तन हुन्छन्,’ राईले स्पष्ट पारे।

यस्तै, एमाले कोशी प्रदेश संसदीय दलका प्रमुख सचेतक विदुरकुमार लिङ्थेपले पनि छिट्टै मन्त्रीमण्डल परिवर्तन हुने बताए।
‘मुख्यमन्त्रीको तयारी भइसकेको छ,’ उनले भने, ‘कांग्रेसले नमाने पनि एमालेका मन्त्रीहरू फेर्ने योजना छ।’

हाल एमालेबाट प्रदेश सरकारमा आर्थिक मामिला तथा योजना मन्त्री रामबहादुर मगर, सामाजिक विकास मन्त्री पाँचकर्ण राई, खानेपानी, सिँचाइ तथा ऊर्जा मन्त्री एकराज कार्की, आन्तरिक मामिला तथा कानुन मन्त्री रेवतीरमण भण्डारी र राज्यमन्त्री सिर्जना राई रहेका छन्।

आन्तरिक मामिला तथा कानुन मन्त्री भण्डारी २०८१ मंसिर १७ गते मात्र नियुक्त भएका हुन्। यसअघि सो पदमा रहेका लिलाबल्लभ अधिकारीले अवैध रूपमा जापान पुगेको घटना सार्वजनिक भएपछि राजीनामा दिएका थिए।

हाल प्रदेश सरकार कांग्रेस–एमाले गठबन्धनमा आधारित छ। कांग्रेसको तर्फबाट भूपेन्द्र राई भौतिक पूर्वाधार विकास, खगेनसिंह हाङ्गाम उद्योग, कृषि तथा सहकारी, सदानन्द मण्डल पर्यटन, वन तथा वातावरण मन्त्री र भूमिप्रसाद राजवंशी भौतिक पूर्वाधार विकास राज्यमन्त्रीका रूपमा रहेका छन्।

काठमाडौ, २४ कार्तिक । राष्ट्रिय स्वतन्त्र पार्टी (रास्वपा) ले आगामी निर्वाचनका लागि समानुपातिक तर्फ उम्मेदवार हुन इच्छुक व्यक्तिहरूलाई ५० हजार रुपैयाँ आवेदन शुल्क तिर्नुपर्ने व्यवस्था गरेको छ।

रास्वपाले २२ कात्तिकदेखि समानुपातिक उम्मेदवारका लागि आवेदन खुला गरेको हो। निर्वाचन आयोगको प्रारम्भिक कार्यतालिका अनुसार समानुपातिक उम्मेदवारको बन्द सूची पेस गर्ने मिति पुस १८ र १९ तय गरिएको छ।

समानुपातिक उम्मेदवार छनोटका मापदण्ड तयार गर्ने जिम्मेवारी सहमहामन्त्री विपिन आचार्यलाई तोकिएको थियो। आचार्यका अनुसार उम्मेदवारका लागि कानुनी प्रावधानका साथ पार्टीले आन्तरिक मापदण्डहरू तयार गरेको छ।

‘उम्मेदवार हुनका लागि शुल्क ५० हजार रुपैयाँ कायम गरिएको छ,’ आचार्यले जानकारी दिए।

उनका अनुसार समानुपातिकको बन्द सूचीमा नाम परे पनि दलले प्राप्त गरेको मतका आधारमा उम्मेदवार छनोट हुन नसकेमा बुझाइएको शुल्क फिर्ता नहुनेछ।

यसअघि रुपन्देही–३ उपनिर्वाचनका लागि उम्मेदवार बन्न चाहनेहरूबाट २५ हजार रुपैयाँ शुल्क लिएको पार्टीले अघिल्लो चुनावमा समानुपातिक तर्फ उम्मेदवार बनेकाहरूलाई यसपटक पुनः उम्मेदवार नबनाउने निर्णय पनि गरेको छ।

आचार्यले उम्मेदवारका लागि सार्वजनिक पदको दुरुपयोग नगरेको, वैध आयस्रोत भएको, र द्वेषपूर्ण गतिविधि नगर्ने स्वघोषणा गर्नुपर्ने व्यवस्था गरिएको बताए।

उम्मेदवार छनोट प्रक्रिया ‘लिडरसिप एकेडेमी’ र ‘पोलिटिकल प्रोक्सिमिटी’ लगायतका विधिबाट हुनेछ। सातै प्रदेशबाट प्रतिनिधित्व हुने उम्मेदवार मूल्यांकन समिति गठन गरी अंकका आधारमा अन्तिम सूची तयार गरिने पनि उनले जानकारी दिए।

आवेदन पेस गर्ने अन्तिम मिति पार्टीको आगामी बैठकले तय गर्ने रास्वपाले जनाएको छ।

मनाङ,२३ कार्तिक । कार्तिक ३ गतेदेखि सम्पर्कविहीन भएका दुई भारतीय नागरिकको शव सशस्त्र प्रहरीले फेला पारेको छ।

फेला पर्नेमा ५२ वर्षीय जिग्नेसकुमार लल्लुभाई पटेल र १७ वर्षीया प्रियन्सा कुमारी पटेल रहेका छन्।

सशस्त्र प्रहरीका अनुसार उनीहरू मनाङ जिल्लाको ङिस्याङ गाउँपालिका–४ स्थित ग्याल्सेन होटलमा बसोबास गर्दै आएका थिए। कार्तिक ३ गते सोही गाउँपालिका–५ स्थित मलेरिपा गुम्बा घुम्न जाँदै हिँडेका उनीहरू त्यसपछि सम्पर्कविहीन भएका थिए।

सम्पर्क टुटेपछि ग्याल्सेन होटलले सशस्त्र प्रहरी बल, नेपाल पर्वतीय उद्धार तालिम शिक्षालय मनाङलाई जानकारी गराएको थियो। प्रारम्भिक खोजीमा उनीहरू नभेटिएपछि कार्तिक २३ गते सशस्त्र प्रहरी नायब उपरीक्षक हिरा बहादुर जिसीको कमाण्डमा खटिएको पर्वतीय उद्धार टोलीले उनीहरूको शव फेला पारेको हो।

टोलीले मलेरिपा गुम्बाबाट करिब सय मिटर माथि हिउँले पुरिएको अवस्थामा उनीहरूको शव भेटेको जनाएको छ। शवलाई घटनास्थलबाट तल झार्ने कार्य भइरहेको प्रहरीले जनाएको छ।

सल्यान, २३ कार्तिक । सल्यानको दार्मा गाउँपालिकामा स्क्रबटाइफस संक्रमण तीव्र गतिमा फैलिएको छ। गाउँपालिकाका ४९८ जनाको स्वास्थ्य परीक्षण गर्दा १२८ जनामा स्क्रबटाइफस पोजिटिभ देखिएको हो।

गाउँपालिका स्वास्थ्य शाखा प्रमुख यज्ञबहादुर बस्नेतका अनुसार असोजदेखि कात्तिक पहिलो सातासम्म उच्च ज्वरोका कारण चार महिलाको मृत्यु भइसकेको छ। पछिल्लो समय पनि गाउँभर ज्वरोका बिरामी बढिरहेका छन्।

दुई दिन शिविर र पाँच दिन घरघरमै स्वास्थ्य परीक्षण गर्दा १२८ जनामा संक्रमण पुष्टि भएको हो। तीमध्ये करिब ७० प्रतिशत महिला रहेका बस्नेतले बताए।

उनका अनुसार स्वास्थ्य सेवा कार्यालयसँग समन्वय गरेर सञ्चालन गरिएको शिविरमा ५१ जना, प्रदेश सरकारसँगको सहकार्यमा घरघरमा परीक्षण गर्दा ७३ जना र गाउँपालिकाका स्वास्थ्य संस्थामा परीक्षण गर्दा ४ जनामा स्क्रबटाइफस पोजिटिभ देखिएको छ।

‘असोज र कात्तिक पहिलो साता चार महिलाको मृत्यु भए पनि अहिले पोजिटिभ देखिएका बिरामीलाई गाउँमै उपचार गर्न थालेपछि मृत्यु हुन रोकिएको छ,’ बस्नेतले बताए।

हाल पनि गाउँघरमा ज्वरोका बिरामी छन्। प्रदेश सरकारले खटाएका स्वास्थ्यकर्मी आइतबार फर्किएका छन्। बस्नेतका अनुसार स्क्रबटाइफस परीक्षणका किटको अभावका कारण थप परीक्षणमा समस्या भइरहेको छ।

‘केही स्वास्थ्य संस्थामा किट उपलब्ध गराइएका छन्,’ उनले भने, ‘तर ती समाप्त भएपछि बिरामी भएका ठाउँमा पुगेर परीक्षण गर्न कठिनाइ हुने अवस्था आएको छ।’

गाउँपालिका अध्यक्ष नीमबहादुर केसीले स्क्रबटाइफसले स्थानीयस्तरमा गम्भीर समस्या उत्पन्न गरेको बताए। उनका अनुसार अहिले संक्रमण केही घट्दै गए पनि जोखिम भने कायम छ।

अध्यक्ष केसीले संक्रमणबाट बच्न सरसफाइमा ध्यान दिन, जंगल वा घर नजिक बारीमा काम गर्दा सावधानी अपनाउन आग्रह गरेका छन्। साथै, परीक्षण किटका लागि सम्बन्धित निकायसँग माग गरिएको उनले जानकारी दिए।

काठमाडौं, २३ कार्तिक ।नेपाल प्रहरीको ट्र्याकसुट लगाएर हिँडेका एक व्यक्ति लुटपाटमा संलग्न भएको आरोपमा पक्राउ परेका छन्।

प्रहरीका अनुसार पक्राउ पर्ने व्यक्ति अछाम मल्लेक गाउँपालिका–७ घर भई हाल काठमाडौंको कपनमा बस्दै आएका २२ वर्षीय अमृत साउँद हुन्। उनलाई आइतबार बिहान ७ बजे प्रहरी वृत्त बौद्धबाट खटिएको टोलीले पक्राउ गरेको हो।

साउँद भदौ २४ गते प्रहरी प्रभाग कपनमा भएको लुटपाट घटनामा संलग्न रहेको खुलेको प्रहरीको भनाइ छ। प्रहरीले उनलाई ट्र्याकसुट लगाएर हिँडिरहेको अवस्थामा फेला पारेपछि उनको डेरामा तलासी लिएको थियो।

तलासीका क्रममा कपन प्रहरी प्रभागबाट लुटिएका कम्प्युटर, सिपियू, प्रिन्टर, प्रहरीको रेनकोट, बुट र तरबार फेला परेको प्रहरीले जनाएको छ।

घटनाबारे थप अनुसन्धान भइरहेको प्रहरीले जनाएको छ।

दाङ, २२ कार्तिक । दाङको गढवामा जुकाको औषधि घाँटीमा अड्किएर एक बालिकाको मृत्यु भएको छ।
मृत्यु हुनेमा गढवा गाउँपालिका–४ अजगढवाका शिवकुमार यादवकी छोरी जमुना यादव रहेकी छन्, इलाका प्रहरी कार्यालय गढवाका प्रहरी निरीक्षक डबल बहादुर बमले जानकारी दिए।

प्रहरीका अनुसार स्थानीय महिला स्वास्थ्य स्वयंसेविकाले औषधि खुवाउने क्रममा औषधि घाँटीमा अड्किएपछि बालिकाको श्वासप्रश्वास रोकिएको थियो। सोही कारण दुई मिनेटमै उनको मृत्यु भएको बताइएको छ।

घटना गढवा गाउँपालिका–४ रामनगरमा भएको हो। मृतक बालिकाको शवलाई पोष्टमार्टमका लागि राप्ती स्वास्थ्य विज्ञान प्रतिष्ठान, घोराही लगिएको र पोष्टमार्टमपछि परिवारको जिम्मा लगाइएको प्रहरीले जनाएको छ।

जनकपुर,२२ कार्तिक । मधेस प्रदेशका माओवादी केन्द्रका सांसद रहबर अन्सारीले प्रदेशसभा बैठकमै आफ्नै मुखमा मोसो दलेका छन्। उनले कुनै पनि सरकारले मधेसी जनताको पक्षमा काम नगरेको भन्दै विरोधस्वरूप यस्तो कदम उठाएका हुन्।

प्रदेशसभा बैठकमा रोस्ट्रममा भाषण गर्दै अन्सारीले मधेसका जनतालाई लगातार बेवास्ता गरिँदै आएको भन्दै आफ्नो सांसदको भूमिकाप्रति आत्मग्लानि प्रकट गरे। “कुनै पनि सरकारले मधेसी जनताको पक्षमा काम गरेन, हरेक सरकारले मधेसलाई लज्जित बनायो,” उनले भने, “त्यसैले मैले आज आफ्नो अनुहारमा कालो मोसो दल्दै सार्वजनिक अपराध स्वीकार गरेको छु।”

अन्सारीले प्रदेशमा रहेका सबै सरकार जनताको पक्षमा नउत्रिएको आरोप लगाए। उनले मुख्यमन्त्री जितेन्द्रप्रसाद सोनार (सोनल) को पक्षमा विश्वासको मत नदिने घोषणा पनि गरे।

मुख्यमन्त्री सोनारले आज प्रदेशसभाबाट विश्वासको मत लिँदै गर्दा दलका सांसदहरूलाई बोल्ने अवसर दिइएको थियो। यही क्रममा माओवादी केन्द्रका सांसद अन्सारीले बोल्ने क्रममा आफ्नो अनुहारमा मोसो दलेका हुन्।

उनको यो कदमलाई प्रदेशसभा हलमै उपस्थित सांसदहरू र दर्शकहरूले अचम्मका साथ हेरिरहेका थिए। अन्सारीको कार्यलाई केही सांसदहरूले असन्तोषजनक भनेका छन् भने केहीले यो जनताको पीडा अभिव्यक्त गर्ने असामान्य तर प्रभावशाली विरोधको रूप भएको टिप्पणी गरेका छन्।

महोत्तरी,२२ कार्तिक । महोत्तरीका ११ सिमानाका ७२ घण्टाका लागि बन्द गरिएको छ। भारतको बिहार राज्यमा आउँदो मंगलबार हुने विधानसभा निर्वाचनलाई लक्षित गरी नेपाल-भारत सिमानाका आजदेखि तीन दिनका लागि बन्द गरिएका छन्। महोत्तरीसँग जोडिएका ११ वटा सीमानाका शनिबार साँझ ६ बजेदेखि २५ कात्तिकको साँझ ६ बजेसम्म पूर्ण रूपमा बन्द रहने भएका छन्।

महोत्तरीका प्रमुख जिल्ला अधिकारी इन्द्रदेव यादवका अनुसार बिहारको विभिन्न सिटमा यही २५ कात्तिकमा हुने दोस्रो चरणको मतदानलाई दृष्टिगत गरी सिमानामा उच्च सतर्कता अपनाइएको छ। चुनावी सुरक्षालाई ध्यानमा राख्दै आवागमनमा कडाइ गरिएको उनले बताए।

जिल्ला प्रशासन कार्यालय महोत्तरीले सूचना जारी गर्दै शान्ति–सुरक्षा व्यवस्थापनका लागि मानवीय आकस्मिक सेवा बाहेक सिमानाका सबै प्रकारका आवागमन पूर्ण रूपमा रोक्ने निर्णय गरेको छ।

यस अवधिमा आवश्यक सुरक्षाकर्मीहरूको निगरानी बढाइने र कुनै पनि गैरकानुनी गतिविधि हुन नदिन कडाइका साथ अनुगमन गरिने प्रशासनले जनाएको छ।

भारतमा हुने निर्वाचनका कारण सीमा क्षेत्रमा अस्थिरता आउन नदिन नेपाल पक्षले अपनाएको यो कदमले सिमावर्ती क्षेत्रमा सुरक्षात्मक वातावरण कायम हुने अपेक्षा गरिएको छ।