काठमाडौं,७ असोज । मुलुककै सबैभन्दा व्यस्त राजमार्गहरू मध्येको एक मुग्लिन–नारायणघाट सडकखण्ड सुख्खा पहिरोका कारण पूर्ण रूपमा बन्द भएको छ।

चितवनको इच्छाकामना–५ स्थित तुइन खोलामा मंगलबार अपरान्ह करिब ५ बजेतिर पहाडको ठूलो हिस्सा खसेपछि यातायात आवागमन अनिश्चित बनेको हो।

सडक विभागका महानिर्देशक डा. विजय जैशीले पहिरोको आकार निकै ठूलो भएकाले पन्छाउन कम्तीमा तीन दिन लाग्ने अनुमान व्यक्त गरे।
‘आज तुइन खोलामा खसेको पहिरो सामान्य होइन, सानो पहाड नै खसेको जस्तो छ,’ डा. जैशीले भने। ‘त्यसैले यो खण्डमा यात्रा नगर्न र वैकल्पिक मार्ग प्रयोग गर्न हामी सबैमा अनुरोध गर्दछौं।’

विभागले यात्रुहरूलाई काठमाडौं आवतजावतका लागि त्रिभुवन राजपथ र कान्ति लोकपथ प्रयोग गर्न आग्रह गरेको छ। पहिरोसँगै खसेको विशाल ढुङ्गाले सडक खोल्ने कार्य थप चुनौतीपूर्ण बनाएको छ।
‘पहिरो पन्छाउन समय लाग्छ नै, त्यसभन्दा ठूलो चुनौती एउटा विशाल ढुङ्गा बनेको छ,’ जैशीले भने।

यस वर्षायाममा तुइन खोला पहिरोको ‘हटस्पट’ बनेको छ। पटक–पटक पहिरो खसेर यात्रुहरूले सास्ती खेप्दै आएका छन्।
विभागका एक अधिकारीका अनुसार, तीन दिनभित्र खुलाउने प्रयास भए पनि पहिरोको प्रकृति हेर्दा यो खण्ड अनिश्चितकालका लागि बन्द भएको जस्तै छ। दशैंको मुखमा मुख्य राजमार्ग अवरुद्ध हुँदा हजारौं यात्रुको यात्रा थप कष्टकर र अनिश्चित बनेको छ।

काठमाडौं,७ असोज । नवनियुक्त शिक्षा मन्त्री महावीर पुनले पदभार ग्रहणलगत्तै तीनवटा निर्णय सार्वजनिक गरेका छन्।

उनले पहिलो कदमका रूपमा नेपालभरका सामुदायिक माध्यमिक विद्यालयमा प्रत्येक विद्यालयमा अनिवार्य रूपमा एक जना कम्प्युटर शिक्षकको दरबन्दी थपिने घोषणा गरेका छन्।

दोस्रो निर्णयमा, विश्वविद्यालयहरूले अब बढीमा तीन महिनाभित्रै परीक्षाफल प्रकाशित गर्नुपर्ने व्यवस्था हुने मन्त्री पुनले बताए। निर्धारित समयभित्र नतिजा नदिने विश्वविद्यालयहरूको अनुदान रोक्का गरिने चेतावनी पनि उनले दिएका छन्।

तेस्रो निर्णयअनुसार त्रिभुवन विश्वविद्यालय कीर्तिपुर परिसरभित्र रहेका झाडी फाँडेर (ठूला रुख नकटाई) सफा गर्ने, आकर्षक बगैँचा र फुटपाथ निर्माण गर्ने कार्य अघि बढाइनेछ।

मन्त्री पुनका यी निर्णयलाई शिक्षा क्षेत्रमा सुधारतर्फको तत्कालीन पहलका रूपमा लिइएको छ।

काठमाडौँ,७ असोज। प्रधानमन्त्री सुशीला कार्कीले निर्वाचन आयोगका पदाधिकारीसंग छलफल गरेकी छन् । प्रधानमन्त्री कार्कीले चुनावको तयारीका विषयमा आयोगका पदाधिकारीसंग छलफल गरेकी हुन् ।

सिंहदरबारमा रहेको प्रधानमन्त्री तथा मन्त्रिपरिषद्को कार्यालयमा भएको भेटमा प्रतिनिधिसभाको विघटन भई आउँदो फागुन २१ गतेका लागि चुनाव तोकिएको सन्दर्भमा त्यसका लागि आवश्यक कानून संशोधन, निर्वाचन व्यवस्थापन र स्रोत परिचालनलगायत विषयमा कार्यवाहक प्रमुख निर्वाचन आयुक्त रामप्रसाद भण्डारीसहितका पदाधिकारीले छलफल गरेका हुन् ।

छलफलमा सहभागी कानून, न्याय तथा संसदीय मामिलामन्त्री अनिलकुमार सिन्हाले चुनावको तयारी गर्नैपर्ने र तयारीका सम्बन्धमा कुनै अवरोधहरू भए त्यसलाई पहिचान गरेर सम्बोधन गर्नुपर्ने विषयमा छलफल भएको जानकारी दिए।

आयोगका प्रवक्ता नारायणप्रसाद भट्टराईले चुनावका लागि प्रभावकारी समन्वय गर्न प्रारम्भिक कुराकानी भएको जनाउँदै पछि आउने चुनौतीका विषयमा नेपाल सरकारसँग निरन्तर छलफल हुने बताए।

आयोगले तोकिएको समयमा प्रतिनिधिसभाको चुनाव सम्पन्न गर्न मतदाता नामावली ऐन २०७३ मा संशोधनलगायत आवश्यक स्रोत साधनको सुनिश्चितताका लागि नेपाल सरकारसँग आग्रह गर्दै आएको छ । अहिले आउँदो कात्तिक १६ गतेसम्म १८ वर्ष उमेर पुगेका मतदाताको सङ्ख्या १ करोड ८१ लाख ६८ हजार २ सय ३० रहेको छ ।

यसअघि यही असोज २ गते आयोगले गृहमन्त्री ओमप्रकाश अर्यालसँग छलफल गरेको थियो । उपचुनावको मिति तोकिएको सन्दर्भमा गएको असार १६ गतेदेखि मतदाता नामावली सङ्कलन स्थगन भएकाले मध्यावधि चुनावको मिति घोषणा भइसकेपछि मतदाता नामावली सङ्कलन खुला गर्न कानूनी प्रबन्ध गर्नुपर्नेछ ।

गृहमन्त्री अर्यालले सर्वोच्च अदालतको आदेश बमोजिम विदेशमा रहेका नेपालीलाई पनि मताधिकार दिने उपायबारे सोच्न भनेपछि आयोगले त्यसका लागि कानूनी विज्ञसँग छलफल गरेको छ ।

गएको भदौ २३ र २४ गतेको जेन–जी प्रदर्शन र उत्पन्न परिस्थितिमा पूर्वप्रधानन्यायाधीश कार्कीको नेतृत्वमा गठित अन्तरिम सरकारले आउँदो फागुन २१ गते चुनाव गर्ने घोषणा गरेको हो ।

तुफानबाबु श्रेष्ठ,७ असोज । बाल्यकाल देखिनै सल्यान जिल्लाबाट आफ्नो साङ्गितिक यात्रालाई निरन्तरता दिईरहेका गायक तथा सङ्गीतकार चेतन राईको पाँचौँ गीति सङ्ग्रह “स्पिड” र सोही एल्बमको “हाँसि देउन” बोलको म्युजिक भिडियो राजधानीमा आयोजित विशेष समारोहका बीच लोकार्पण गरिएको छ।

कार्यक्रममा वरिष्ठ सङ्गीतकार राजु सिंह, प्रख्यात गीतकार लोकराज अधिकारी र सङ्गीतकार सन्तोष श्रेष्ठ लगायतका अतिथिहरूले संयुक्त रुपमा गीति सङ्ग्रह र म्युजिक भिडियो सार्वजनिक गरेका हुन् । कार्यक्रममा कलाकार, सञ्चारकर्मी, सङ्गीतप्रेमी र चेतन राईका शुभेच्छुकहरूको उल्लेख्य उपस्थिति थियो।

सङ्गीतकार सिंहले चेतन राईलाई बहुमुखी प्रतिभाका धनी कलाकारका रुपमा चित्रण गर्दै उनलाई नेपाली सङ्गीत बजारमा अझ ठूलो सफलता प्राप्त होस् भन्ने शुभकामना व्यक्त गरे।
गीतकार अधिकारीले तीन दशक अघिदेखिको चिनजान र पछिल्ला दुई गीतमा सहकार्यको अनुभव सुनाउँदै एल्बमका गीतहरू श्रोताले मन पराउने विश्वास व्यक्त गरे।

त्यस्तै, सङ्गीतकार श्रेष्ठले डेढ दशकदेखि चेतनलाई चिन्दै आएको र उनले चुपचाप निरन्तर सङ्गीतकर्म गर्दै आएको भन्दै उनको पहिचान गहिरो र सिर्जनात्मक रहेको उल्लेख गरे।

“हाँसि देउन” बोलको म्युजिक भिडियोमा सुजन सुवेदी र ज्योति खड्काको अभिनय रहेको छ। गीतको शब्द लोकराज अधिकारीले लेखेका हुन् भने गायन, सङ्गीत र निर्देशन स्वयं चेतन राईकै हो। भिडियोको छायाङ्कन सविन तिमल्सिना र सङ्गीत संयोजन सबिर कार्कीले गरेका हुन् ।

गायक चेतन राईले सङ्गीतलाई आफ्नो जीवन र कर्मक्षेत्रको रुपमा ग्रहण गर्दै निरन्तर नयाँ सिर्जना ल्याइरहने प्रतिबद्धता व्यक्त गरे। उनले आगामी दिनमा पनि नेपालीपन बोकेका गीतमार्फत श्रोता–दर्शकलाई मनोरञ्जन दिने र सन्देशमूलक सिर्जना ल्याउने लक्ष्य रहेको जानकारी दिए।

कार्यक्रममा उपस्थित सबैले चेतन राईको नयाँ गीति सङ्ग्रह र म्युजिक भिडियोको सफलता र लोकप्रियताको शुभकामना व्यक्त गरेका थिए।

काठमाडौं,६ असोज । नेपाल रेल्वे कम्पनीले आफ्नो सेवालाई व्यावसायिक र नाफामूलक बनाउन कार्गो रेल्वे सेवा सञ्चालनको प्रक्रिया अगाडि बढाएको छ।

भारतको जयनगरदेखि जनकपुरधाम हुँदै महोत्तरीको बिजलपुरासम्म सञ्चालनमा रहेको ६५ किलोमिटर लामो ब्रोडगेज यात्रुवाहक रेल्वेसँगै अब मालसामान ढुवानी गर्ने तयारी भइरहेको कम्पनीले जनाएको छ।

भारत सरकारको करिब १० अर्ब रुपैयाँ लागतमा मर्मत तथा निर्माण सम्पन्न गरी हाल उक्त मार्गमा यात्रुवाहक रेल सञ्चालन भइरहेको छ।

नेपाल सरकारले भारतबाट खरिद गरेको दुई इन्जिन र चार/चार वटा वोगीमार्फत जनतालाई नियमित सेवा दिइँदै आएको छ। तर यात्रु ओसारपसार मात्र गरेर रेल्वे सेवालाई नाफामा लैजान गाह्रो भएकाले कम्पनीले पटक–पटक नेपाल सरकारलाई ध्यानाकर्षण गराउँदै आएको छ।

महाप्रबन्धक निरञ्जन झाले निकट भविष्यमै कार्गो रेल्वे सेवा सुरु हुने विश्वास व्यक्त गरे। उनका अनुसार हालको रेल्वेमा वोगी थप्ने वा नयाँ रेल ल्याएर सेवा विस्तार गर्ने विषयमा छलफल भइरहेको छ। साथै, कार्गो रेल सञ्चालनका लागि महोत्तरीको रामनगर र बर्दिवाससम्म रेल्वे विस्तार गरी नयाँ स्टेशन निर्माण गर्ने काममा भारतीय पक्ष पहल गरिरहेको उनले बताए।

यसअघि नै कलकत्ता बन्दरगाहबाट सस्तो दरमा नेपालमा मालसामान ढुवानीका लागि कार्गो रेल सेवा सुरु गर्न यहाँका व्यवसायीले माग गर्दै आए पनि अझै सञ्चालन हुन सकेको छैन। जनकपुरका व्यवसायी रामनरेश साहका अनुसार कार्गो रेल सञ्चालन भएमा ढुवानी कार्य सहज र किफायती हुनेछ।

काठमाडौं,६ असोज । पूर्व-पश्चिम राजमार्गमा सवारी साधन एकआपसमा ठोक्किदा ३१ जना घाइते भएका छन् ।

राजमार्ग अन्तर्गत मकवानपुरको हेटौंडा-१९ दारिमटारमा ३ वटा सवारी साधन आपसमा ठोक्किँदा ३१ जना घाइते भएका छन्।

जिल्ला प्रहरी कार्यालय मकवानपुरका अनुसार तेल बोकेको ट्याङ्कर, मालबाहक ट्रक र यात्रुवाहक बस एक-आपसमा ठोक्किँदा दुर्घटना भएको हो। 

घाइते सबैलाई तत्काल उद्धार गरी उपचारका लागि अस्पताल पठाइएको प्रहरी प्रवक्ता डिएसपी श्यामु अर्यालले जानकारी दिए।

दुर्घटनास्थलमा प्रहरीको टोली खटिएको छ भने घटनाको विस्तृत विवरण संकलन भइरहेको प्रहरीले जनाएको छ।

काठमाडौं,६ असोज । प्रधानमन्त्री सुशीला कार्कीले आइतबार स्वास्थ्य तथा जनसंख्या मन्त्रीका लागि सिफारिस गरेकी डा. संगीता कौशल मिश्र अन्तिम घडीमा सूचीबाट हटेकी छन्।

कार्कीले मिश्रसहित पाँच जनाको नाम राष्ट्रपति कार्यालयमा पठाएकी थिइन्। तर मिश्रको नागरिकता विवाद र अनियमिततासम्बन्धी मुद्दा गम्भीर रूपमा उठेपछि आज बिहानै उनको नाम काटेर चार जनाको मात्र नाम पुनः राष्ट्रपति रामचन्द्र पौडेलकहाँ पठाइएको हो।

मन्त्रिपरिषद् स्रोतका अनुसार, आज उद्योगमन्त्री अनिलकुमार सिन्हा, शिक्षामन्त्री महावीर पुन, कृषिमन्त्री मदन परियार र सञ्चारमन्त्री जगदीश खरेलले शपथ लिने छन्। शपथ समारोह दिउँसो २ बजे शीतल निवासमा हुनेछ।

‘अहिलेलाई स्वास्थ्य मन्त्री पद खाली राखिएको छ,’ स्रोतले भन्यो।

यौन तथा प्रजनन स्वास्थ्य विशेषज्ञका रूपमा परिचित मिश्रले प्रसूति तथा स्त्री रोग विशेषज्ञको रूपमा समेत योगदान दिएकी छन्। उनले स्वास्थ्य सेवा विभाग र थापाथलीस्थित परोपकार प्रसूति अस्पतालको नेतृत्व गरिसकेकी छिन्।

तीन वर्षदेखि अतिरिक्त सचिव रहेकी मिश्र गत वर्ष सचिव बढुवामा डा. विकास देवकोटा चयन भएपछि असन्तुष्टि जनाउँदै बिदामा बसेकी थिइन्। मन्त्री बन्ने तयारी मिलाएपछि उनले अतिरिक्त सचिव पदबाट राजीनामा समेत दिएकी थिइन्।

यसअघि रामेश्वर खनाल (अर्थ), कुलमान घिसिङ (सहरी विकास, ऊर्जा, जलस्रोत तथा सिँचाइ तथा भौतिक पूर्वाधार), र ओमप्रकाश अर्याल (गृह तथा कानुन, न्याय र संसदीय मामिला) मन्त्री बनिसकेका छन्।

भदौ २३ र २४ गतेको जेनजी विद्रोहपछि केपी शर्मा ओली नेतृत्वको सरकार ढलेपछि राष्ट्रपति पौडेलले भदौ २७ गते पूर्वप्रधानन्यायाधीश कार्कीलाई अन्तरिम प्रधानमन्त्री नियुक्त गरेका थिए। त्यसपछि संसद् विघटन गरी आगामी फागुन २१ गतेका लागि प्रतिनिधि सभा निर्वाचन घोषणा भइसकेको छ।

काठमाडौं,६ असोज। नेपालीहरूको महान् पर्व बडादसैँ आजदेखि सुरु भएको छ। प्रत्येक वर्ष आश्विन शुक्ल प्रतिपदादेखि सुरु हुने यो पर्व आश्विन शुक्ल पूर्णिमासम्म १५ दिनसम्म धुमधामका साथ मनाइन्छ।

बडादसैँको पहिलो दिन घटस्थापना गर्ने परम्परा छ। आज बिहानै नित्यकर्म सम्पन्न गरी घरघरमा दियो, कलश र गणेश स्थापना गरी दुर्गादेवीको आह्वानसहित पूजा आरम्भ गरिएको छ। पूजाकोठा वा दसैँघरमा चोखो माटो वा बालुवा ल्याई गाईको गोबरले लिपपोत गरिएको स्थानमा विधिपूर्वक जौँ रोपेर जमरा राखिन्छ। विजयादशमीका दिन यही जमरालाई टीका–प्रसादसँगै ग्रहण गर्ने गरिन्छ।

धर्मशास्त्रविद्हरूका अनुसार जमरामा जौँबाहेक अन्य अन्न रोप्ने शास्त्रीय आधार छैन। जमरालाई समृद्धि तथा आयुर्वेदिक उपयोग दुवैका लागि महत्वपूर्ण मानिन्छ।

नेपाल पञ्चाङ्ग निर्णायक विकास समितिका अनुसार यस वर्ष घटस्थापनाको साइत बिहान ९ः१३ बजे तोकिएको छ। समितिका अध्यक्ष प्रा. श्रीकृष्ण अधिकारीका अनुसार सूर्योदयकालमै प्रतिपदा परेको हुँदा आजै घटस्थापना गर्नुपर्ने मान्यता छ।

दुर्गादेवीका महाकाली, महालक्ष्मी र महासरस्वती गरी तीन रूपको नवरात्रभर पूजा गरिन्छ। महाकाली शक्तिको, महालक्ष्मी ऐश्वर्य र धनधान्यको तथा महासरस्वती विद्या–बुद्धिको प्रतीक मानिन्छ।

नवरात्रका नौ दिन क्रमशः शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्रि, महागौरी र सिद्धिदात्री गरी नवदुर्गाको पूजा गर्ने परम्परा छ। यही कारण यस पर्वलाई नवदुर्गा पूजा पनि भनिन्छ।

बडादसैँलाई असत्यमाथि सत्य र आसुरी प्रवृत्तिमाथि दैवी शक्तिको विजयको प्रतीकका रूपमा मनाउने गरिएको छ। सातौँ दिन फूलपाती भित्र्याउने, महाअष्टमी र महानवमीका दिन बलिपूजा गर्ने तथा विजयादशमीका दिन टीका–प्रसाद ग्रहण गर्ने धार्मिक परम्परा रहिआएको छ।

यस अवसरमा देशभरका शक्तिपीठहरूमा विशेष पूजा–आराधना गर्ने परम्परा रहँदै आएको छ। गुह्येश्वरी, नक्साल भगवती, शोभा भगवती, नाला भगवती, पलाञ्चोक भगवतीलगायतका शक्तिपीठमा दर्शन गर्न भक्तजनको ठूलो भीड लाग्ने गरेको छ।

काठमाडौं,५ असोज । नक्कली भुटानी शरणार्थी प्रकरणको अनुसन्धान अघि बढाएका प्रहरी अतिरिक्त महानिरीक्षक (एआईजी) मनोज केसीलाई सरकारले केन्द्रीय अनुसन्धान ब्यूरो (सीआईबी) प्रमुखको जिम्मेवारी दिएको छ ।

आइतबार बसेको मन्त्रिपरिषद् बैठकले केसीलाई सीआईबी प्रमुखका रुपमा सरुवा गर्ने निर्णय गरेको हो ।

तत्कालीन सत्ता गठबन्धनमा रहेका नेपाली कांग्रेसको दबाबका कारण उनी यसअघि जिम्मेवारीबाट हटाइएका थिए । केसी नेतृत्वको टोलीले पूर्वगृहमन्त्री बालकृष्ण खाँणलाई समेत पक्राउ गरेको थियो ।

त्यसै कारण उनी एमाले–कांग्रेस गठबन्धन सरकारमा समेत उपयुक्त पोष्टिङ पाउनबाट वञ्चित भएका थिए । हाल उनी प्रदेश समन्वय विभागमा कार्यरत थिए ।

२०७९ चैत १२ गते केसी नेतृत्वको अपराध अनुसन्धान कार्यालयले ‘भुटानी शरणार्थी बनाएर अमेरिका पठाइदिन्छु’ भन्दै असुली गरेको आरोपमा मोरङका केशव दुलाल, ललितपुरका सानु भण्डारी र पाँचथरका टेक गुरुङलाई पक्राउ गरेको थियो ।

दुलाल र भण्डारीको बयानपछि गृह मन्त्रालयका उच्च पदस्थ अधिकारीहरु नै प्रकरणमा संलग्न रहेको तथ्य फेला परेको थियो ।

यसअघि सीआईबी प्रमुख रहेका चन्द्रकुबेर खापुङ प्रहरी महानिरीक्षक बनेपछि ब्यूरो कार्यवाहक नेतृत्वमा चलिरहेको थियो ।

काठमाडौँ, ५ असोज। प्रधानमन्त्री सुशीला कार्कीलाई भेट्न सिंहदरबार पुगेका जेन–जी आन्दोलनका घाइतेलाई प्रहरीले नियन्त्रणमा लिएर केही समयपछि बाहिर छाडेको छ।

सिंहदरबारको गेटमै धर्ना बसेपछि प्रहरीले उनीहरूलाई भित्र प्रवेश गराएको थियो। भित्र गएर घाइतेहरूले गृहमन्त्री ओमप्रकाश अर्याललाई भेटेर ज्ञापनपत्र बुझाएका थिए। त्यही क्रममा उनीहरूले सुदन गुरुङ जेन–जी आन्दोलनका नेता नभएको दाबी गर्दै आक्रोश व्यक्त गरेका थिए।

प्रधानमन्त्रीसँग भेट्न पुगेका घाइतेहरूले सुदन समूहले आन्दोलनलाई अपहरण गरेको आरोप लगाउँदै आन्दोलनका शहीद र घाइतेहरूको अपमान हुने कार्य अस्वीकार्य हुने बताएका थिए।

तर, उनीहरू आक्रोशित सुनिन थालेपछि प्रहरीले नियन्त्रणमा लिएर सिंहदरबारबाहिर ल्याइदिएको हो। सिंहदरबार प्रहरी बृत्तले भने पक्राउ गरेको आरोप अस्वीकार गर्दै, घाइते भएकाले सुरक्षित राख्न मात्रै गाडीमा राखिएको दाबी गरेको छ।