काठमाडौँ,२४ भदौ । काठमाडौँ महानगरपालिकाका मेयर बालेन शाहले संसद् विघटनको माग गर्दै अबको नेतृत्व जेनजी पुस्ताले लिनुपर्ने बताएका छन् ।

जेनजी आन्दोलन चर्किएपछि प्रधानमन्त्रीले राजीनामा दिएसँगै उनले मंगलबार आन्दोलनकारीलाई संयमित हुन आग्रह गरे ।
‘यो नितान्त जेनजीको आन्दोलन हो । प्रिय जेनजी, तपाईँहरूको हत्याराको राजीनामा आइसकेको छ । अब संयमित हुनुहोला,’ बालेनले भने ।

उनले जनधनको क्षति देशकै सम्पत्ति भएको भन्दै आन्दोलनलाई शान्तिपूर्ण ढंगले अघि बढाउन आग्रह गरे ।
‘अब तपाईंको पुस्ताले नै देशको नेतृत्व गर्नु पर्नेछ । तयार रहनुहोला,’ उनले भने, ‘तर याद रहोस्— वार्ता गर्नु अघि संसद् विघटन भएको हुनु पर्छ ।’

काठमाडौं,२३ भदौ । भ्रष्टाचार र सामाजिक सञ्जालमाथि प्रतिबन्धविरुद्ध सडकमा उत्रिएका जेन–जी समूहको प्रदर्शन भड्किएपछि स्थानीय प्रशासनले देशभरका विभिन्न सहरमा कर्फ्यू आदेश जारी गरेको छ। सोमबार भएको प्रदर्शनमा काठमाडौंमा मात्रै एक दर्जनभन्दा बढी प्रदर्शनकारीको मृत्यु भएको र दुई सयभन्दा बढी घाइते भएको विवरण सार्वजनिक भएको छ।

काठमाडौं उपत्यकाबाहेक झापाको दमकसहितका स्थानमा अश्रुग्याँस प्रहार र गोलीसमेत चलेका छन्। प्रदर्शन अनियन्त्रित भएपछि काठमाडौं, पोखरा, इटहरी, बुटवल र भैरहवामा प्रशासनले कर्फ्यू आदेश जारी गरेको हो। यस अवधिमा भेला, प्रदर्शन, नाराजुलुस र कुनै पनि भीड जम्मा गर्न निषेध गरिएको छ।

जिल्ला प्रशासन कार्यालय काठमाडौंले संसद भवन, सिंहदरबार, प्रधानमन्त्री निवास, नारायणहिटी दरबार, राष्ट्रपति र उपराष्ट्रपति निवास क्षेत्रलाई लक्षित गर्दै सोमबार दिउँसो १ बजेदेखि राति १० बजेसम्मका लागि कर्फ्यू आदेश जारी गरेको छ। आदेशअनुसार शीतल निवास, लैनचौर, नारायणहिटी, सिंहदरबार, वालुवाटार र नयाँबानेश्वर क्षेत्रका विभिन्न चार किल्ला तोकिएका स्थानभित्र प्रवेश, सभा, जुलुस, प्रदर्शन र आवतजावत गर्न प्रतिबन्ध लगाइएको छ।

यस्तै, कास्की जिल्लामा प्रमुख जिल्ला अधिकारी रुद्रादेवी शर्माले पोखरा महानगरपालिकाभित्र सोमबार दिउँसो २ बजेदेखि अर्को आदेश नभएसम्म अनिश्चितकालीन निषेधाज्ञा जारी गरेकी छिन्। निषेधाज्ञा क्षेत्रमा वाईचोकदेखि फिस्टेल गेट, मालपोत कार्यालयदेखि राष्ट्रबैंक चोकसम्मका स्थान पर्छन्।

जिल्ला प्रशासन कार्यालय सुनसरीले पनि सोमबार अपरान्हदेखि लागू हुने गरी इटहरी उपमहानगरपालिकाका विभिन्न क्षेत्रमा अनिश्चितकालीन कर्फ्यू आदेश जारी गरेको छ। आदेशअनुसार हलगडा सेनाको ब्यारेकदेखि पारुहाङ चोक, मिलनचोकदेखि जुट विकास, अख्तियार दुरुपयोग अनुसन्धान आयोगदेखि बसपार्क, र कलङ्की मोडदेखि जनता बस्तीभित्र कर्फ्यू लगाइएको छ।

त्यस्तै, रुपन्देही जिल्ला प्रशासन कार्यालयले सोमबार अपरान्ह ४ बजेदेखि राति १० बजेसम्म बुटवल र भैरहवामा कर्फ्यू आदेश जारी गरेको छ। बुटवलमा पेट्रोल पम्प धागो कारखाना पुलदेखि बेलवास चोक, चिडिया खोला र मंगलापुरसम्म तथा भैरहवामा रोहिणी खोला पुलदेखि बेथरी पुल, बुद्धचोक र मेउडीहवासम्मको क्षेत्रमा कर्फ्यू जारी गरिएको छ। साथै, बेलहिया सडकखण्डको दायाँ–बायाँ १०० मिटरभित्र पनि आवतजावतमा प्रतिबन्ध लगाइएको छ।

काठमाडौँ,२३ भदौ । नेपाली कांग्रेसका सभापति शेरबहादुर देउवाले पार्टीको केन्द्रीय कार्यसम्पादन समितिको बैठक बोलाएका छन्।

सोमबार भएको जेन जेनरेशन (जेनजी) का युवाहरूको प्रदर्शन र उनीहरूले उठाएका मागका विषयमा छलफल गर्नका लागि देउवाले बैठक आह्वान गरेका हुन्।

पार्टी स्रोतका अनुसार बैठक मंगलबार बिहान ९ बजे सभापति देउवाको बूढानीलकण्ठस्थित निवासमा बस्नेछ।

काठमाडौं,२३ भदौ। प्रत्येक वर्ष आश्विन कृष्ण प्रतिपदादेखि सुरु हुने सोह्रश्राद्ध अर्थात् पितृ पक्ष आजदेखि विधिवत् सुरु भएको छ।

नेपाल पञ्चाङ्ग निर्णायक विकास समितिका अनुसार आज प्रतिपदा तिथिको श्राद्ध अपराह्नकालसम्म पिण्डदान गरेर सम्पन्न गर्नुपर्ने हुन्छ। समितिका सदस्य एवं धर्मशास्त्रविद् प्राडा देवमणि भट्टराईले प्रतिपदा तिथिदेखि आश्विन शुक्ल प्रतिपदासम्म दिवंगत पितृलाई सम्मानका साथ तर्पण, सिदादान र पिण्डदान गरिने भएकाले यसलाई सोह्रश्राद्ध भनिएको जानकारी दिए।

धर्मशास्त्रअनुसार पितृलाई श्रद्धापूर्वक सम्झिने वैदिक सनातन परम्पराअनुसार सोह्रश्राद्ध गर्ने गरिन्छ। यस समयमा पितृले आश गरी बस्ने विश्वास गरिन्छ। श्राद्ध नगरे अक्षम्य दोष लाग्ने भएकाले यो काललाई विशेष मानिएको धर्मशास्त्रविद् प्रा तोयराज नेपालले बताए।

उनका अनुसार जाताशौच, मृताशौच वा पत्नी रजस्वला भएका अवस्थामा बाहेक श्राद्ध छोड्न नहुने प्रावधान छ। कुनै कारणवश रोकिएमा आश्विन कृष्ण औँसीदेखि आश्विन शुक्ल पञ्चमीसम्म वा कार्तिक कृष्ण औँसी अर्थात् लक्ष्मीपूजाका दिनसम्म पनि गर्न सकिने विकल्प शास्त्रमा उल्लेख छ। अझै गर्न नसकेमा वृश्चिक सङ्क्रान्तिसम्म, वा धर्मसिन्धु र निर्णयसिन्धुजस्ता ग्रन्थमा उल्लेख भएअनुसार विशेष तिथि वा योगमा सम्पन्न गर्न सकिने व्यवस्था छ।

सोह्रश्राद्ध अपराह्नकालमै गर्नुपर्नेमा कतिपय पुरोहितले बिहानै गर्नुपर्ने सुझाव दिने गरेको पाइएकाले त्यो शास्त्रसम्मत नभएको समितिका अध्यक्ष प्रा शम्भुप्रसाद ढकालले स्पष्ट पारे।

धर्मशास्त्रविद्हरूका अनुसार, पितृ पक्षमा विधिपूर्वक श्राद्ध गर्नाले पितृ तृप्त हुने, पितृऋणबाट मुक्ति पाइने र आफ्ना धार्मिक दायित्व पूरा हुने विश्वास गरिन्छ। पितृ पक्ष सकिएलगत्तै दुर्गा पक्ष अर्थात् बडादसैँ सुरु हुन्छ।

काठमाडौँ,२२ भदौ । ‘जेन–जी’ पुस्ताले सोमबार आयोजना गर्न लागेको भ्रष्टाचारविरुद्धको प्रदर्शनका लागि जिल्ला प्रशासन कार्यालय काठमाडौंले औपचारिक अनुमति दिएको छ।

प्रमुख जिल्ला अधिकारी छवि रिजालले माइतीघर मण्डलामा शान्तिपूर्ण प्रदर्शन गर्न अनुमति दिइएको र आवश्यक सुरक्षा व्यवस्था मिलाइने जानकारी दिए। उनका अनुसार, प्रदर्शनका आयोजक युवाहरूले कार्यक्रम पूर्ण रूपमा शान्तिपूर्ण र भद्र हुने प्रतिबद्धता जनाएका छन्।

प्रजिअ रिजालले भने, “उनीहरूले भद्र तरिकाले प्रस्तुत हुन्छौं, कुनै नाराबाजी वा तोडफोड हुँदैन, टिसर्ट लगाएर शान्तिपूर्ण प्रदर्शन मात्रै गर्छौं भन्नुभएको छ।”

‘वेक अप नेपाल क्याम्पेन’ का संयोजक सबल गौतम र पुरुषोत्तम यादवले प्रशासनलाई पत्र लेख्दै शान्ति सुरक्षाको व्यवस्था मिलाइदिन आग्रह गरेका थिए। पत्रमा उल्लेख छ, “स्वतन्त्र युवाहरूको सहभागिता रहने भएकाले कार्यक्रम सुव्यवस्थित, मर्यादित र शान्तिपूर्ण वातावरणमा सम्पन्न होस् भन्ने उद्देश्यले सहकार्य आवश्यक छ।”

सरकारले दर्ता नभएका सामाजिक सञ्जालमा प्रतिबन्ध लगाउने निर्णय गरेपछि जेन–जी पुस्ताले भ्रष्टाचार र सरकारी निर्णय दुवैको विरोधमा सडकमा उत्रिने घोषणा गरेका थिए। प्रजिअ रिजालले प्रदर्शनलाई शान्तिपूर्ण राख्न पर्याप्त सुरक्षाकर्मी परिचालन गरिने बताए।

काठमाडौँ,२२ भदौ । गत आर्थिक वर्ष २०७८/७९ मा म्याग्दी जिल्लाबाट करिब एक अर्ब रुपैयाँ बराबरको आलु र सुन्तला बिक्री भएको छ। जिल्लास्थित कृषि ज्ञान केन्द्रका अनुसार आव २०८१/८२ मा ६० करोड रुपैयाँको आलु र ३३ करोड ४६ लाख रुपैयाँ बराबरको सुन्तला बिक्री भएको हो।

कृषि ज्ञान केन्द्रका प्रमुख सञ्जीव बाँस्तोलाका अनुसार गत वर्ष १,८२० हेक्टर क्षेत्रमा उत्पादन भएको ३५,४९० मेट्रिकटन आलु प्रतिकिलो न्यूनतम ३५ रुपैयाँ दरले बिक्री हुँदा ६० करोड रुपैयाँको कारोबार भएको हो। त्यस्तै ४२५ हेक्टर क्षेत्रमा उत्पादन भएको ४,७८१.३ मेट्रिकटन सुन्तला प्रतिकिलो ८० रुपैयाँमा बिक्री भएको बताइएको छ।

बेनी, पोखरा, काठमाडौँ र चितवनका बजारमा म्याग्दीको आलु र सुन्तला बिक्री भइरहेको छ। क्षेत्रफल विस्तार, अनुकूल मौसम र रोग/कीराको कम जोखिमका कारण उत्पादन वृद्धि भएको केन्द्रले जनाएको छ।

आर्थिक वर्ष २०८०/८१ मा १,७५० हेक्टर क्षेत्रमा ३१,४५० मेट्रिकटन आलु र ३,६०० मेट्रिकटन सुन्तला उत्पादन भएको थियो। कृषि ज्ञान केन्द्रले ‘क्रपकटिङ’ विधिबाट जिल्लामा फलफूल, तरकारी र खाद्यबालीको तथ्याङ्क संकलन गर्दै आएको छ।

जिल्लाका अन्नपूर्ण, रघुगङ्गा र बेनी नगरपालिकाका विभिन्न स्थानहरूमा आलु उत्पादन हुने गर्छ भने २०० भन्दा बढी सुन्तला बगैँचा विभिन्न गाउँमा फैलिएका छन्। सवारीसाधनको पहुँचले उत्पादन भएको आलु र सुन्तला सहजै बजारमा पुगेको केन्द्रले जनाएको छ।

कृषि ज्ञान केन्द्र र राष्ट्रिय कृषि आधुनिकीकरण परियोजनाले जिल्लामा आलु र सुन्तलाखेती विस्तार तथा प्रवर्द्धनका लागि विभिन्न कार्यक्रम सञ्चालन गरेका छन्। गत आर्थिक वर्षमा ४२ वटा फार्म तथा समूहमा आबद्ध १६४ किसान परिवारले बगैँचा सुदृढीकरण र विस्तारमा सहयोग पाएका छन्।

केन्द्रले बीउ, यान्त्रिकरण, सिँचाइ पूर्वाधार, प्याकेजिङ र ढुवानीका लागि ८७ लाख रुपैयाँभन्दा बढी अनुदान उपलब्ध गराएको छ। यस वर्ष सुन्तलाजात फलफूल बगैँचा स्थापना तथा विस्तारका लागि २६ लाख रुपैयाँको बजेट उपलब्ध भएको छ भने आलु जोन कार्यक्रमले अन्नपूर्ण र रघुगङ्गा गाउँपालिका तथा बेनी नगरपालिकामा आलुखेती विस्तारमा सहयोग गर्दै आएको छ।

काठमाडौँ,२० भदौ । हिमाली जिल्ला मनाङमा समेत प्रतिनिधिसभा निर्वाचन क्षेत्र नं। १ अन्तर्गत प्रदेशसभा निर्वाचन क्षेत्र ९२० का लागि कात्तिक १७ गते उपनिर्वाचन हुने भएको छ।

निर्वाचन आयोगको बिहीबार बसेको बैठकले उपनिर्वाचनको कार्यतालिका तय गर्दै जिल्ला निर्वाचन कार्यालयलाई पत्र पठाएको हो। यसअघि आयोगले रुपन्देही क्षेत्र नम्बर ३ मा पनि त्यही मितिमा उपनिर्वाचन गर्ने निर्णय गरिसकेको छ।

रुपन्देहीमा राप्रपाबाट निर्वाचित सांसद दीपक बोहराको निधन भएपछि र मनाङमा निर्वाचित राजिव गुरुङ ९दीपक मनाङे० आपराधिक मुद्दामा जेल परेपछि दुवै स्थान रिक्त बनेका हुन्।

मनाङ उपनिर्वाचनको कार्यतालिकाअनुसार २०८२ साल भदौ १३ गतेदेखि निर्वाचन अवधि सुरु भएको निमित्त प्रमुख निर्वाचन अधिकृत गोविन्दप्रसाद अर्यालले जानकारी दिए। विसं २०७९ मङ्सिर ४ गते भएको निर्वाचनमा प्रदेशसभा ९२० तर्फ गुरुङ सर्वसम्मत निर्वाचित भएका थिए।

निर्वाचन आयोगले असोज २१ गते उम्मेदवारको मनोनयन दर्ता गर्ने, असोज २५ गते अन्तिम नामावली प्रकाशनसहित चुनाव चिन्ह वितरण गर्ने, कात्तिक ११ गते मतदान अधिकृत, सहायक मतदान अधिकृत र अन्य कर्मचारी तोक्ने तालिका सार्वजनिक गरेको छ।

त्यस्तै, २०८२ साल भदौ २५ गते आयोगबाट प्रकाशन भएको अन्तिम मतदाता नामावली नै यस उपनिर्वाचनमा प्रयोग गरिने भएको छ। यसअनुसार आगामी कात्तिक १६ गतेसम्म १८ वर्ष पूरा गरेका नागरिकलाई मतदान गर्न पाउने व्यवस्था गरिएको छ।

गत निर्वाचनमा मनाङ जिल्लामा ६ हजार ७७९ मतदाता रहेका थिए। कुल मतदातामध्ये ४ हजार ८४५ अर्थात् ७१।४७ प्रतिशत मत खसेको थियो। मनाङ–२ प्रदेशसभा क्षेत्रमा मात्रै ४ हजार १९७ मतदाता रहेको निमित्त प्रमुख निर्वाचन अधिकृत अर्यालले जानकारी दिए।

दाङ,१९ भदौ । फेसबुक सञ्चालक संस्था मेटा नेपाल सरकारको सम्पर्कमा आएको छ । मेटाले नेपालको सञ्चार तथा सूचना प्रविधि मन्त्रालयसँग कम्पनी दर्ताका लागि आवश्यक कागजातको विवरण माग गरेको छ ।

मन्त्रालयका सहसचिव एवं प्रवक्ता गजेन्द्रकुमार ठाकुरका अनुसार मेटाका प्रतिनिधिले सञ्चार तथा सूचना प्रविधि मन्त्रीका विज्ञ सल्लाहकार शालिकराम पराजुलीलाई इमेल गरेर कागजातको विवरण माग गरेका हुन् ।

‘पौने ५ बजे मेटाका कोही प्रतिनिधिले मन्त्रीज्यूका विज्ञ सल्लाहकारलाई इमेल गरेर दर्ता हुनका लागि आवश्यक कागजातको विवरण माग्नुभएको रहेछ,’ उनले भने, ’हामीले त्यसको ५ मिनेटभित्रै सामाजिक सञ्जाल प्ल्याटफर्म दर्ता हुन आवश्यक पर्ने कागजातको विवरणबारे जानकारी दिंदै इमेल गरेका छौं ।’

सरकारले क्रमशस् लागू हुनेगरी सूचीकृत नभएका सामाजिक सञ्जालहरू चल्न रोक लगाउने निर्णय गरेको छ ।

यो सँगै सामाजिक सञ्जाल यतिबेला तरंगित बनेको छ । नेपाल दूरसञ्चार प्राधिकरणले इन्टरनेट प्रदायक कम्पनीहरूलाई २६ वटा सञ्जाल चल्न रोक लगाउन पत्राचार समेत गरिसकेको छ ।

दाङ, १९ भदौ । दाङका प्रमुख जिल्ला अधिकारी विश्वप्रकाश अर्यालले व्यवसायी र प्रशासनको सहकार्यले मात्र सामाजिक अपराध नियन्त्रण सम्भव रहेको बताएका छन् । उनले जिल्लामा लागुऔषध र सामाजिक अपराध नियन्त्रण चुनौतीको विषय रहेको भन्दै निजी क्षेत्रले राज्य संयन्त्रलाई सहयोग गर्नुपर्ने बताए ।

बिहीबार तुलसीपुर उद्योग वाणिज्य संघले आयोजना गरेको स्वागत तथा भेटघाट कार्यक्रममा प्रजिअ अर्यालले यस्तो बताएका हुन् । उनले निजी क्षेत्र सरकारको अभिन्न अंग भएको बताउँदै व्यवसायी र राज्य संयन्त्रबीच सहयोगी भूमिकाको आवश्यकता रहेको उल्लेख गरे ।

जिल्लाको शान्ति सुरक्षा र व्यवस्थापनका लागि बाह्य वातावरण र समन्वयको भूमिका उत्तिकै रहने भन्दै उनले सकारात्मक मार्गदर्शनको अपेक्षा पनि गरे । “काम के कसरी गर्ने भन्ने कुरा बाह्य वातावरण र समन्वयले निर्धारण गर्छ । मुलुकको विकासमा निजी क्षेत्रको ५० प्रतिशत योगदान रहेको छ, त्यसैले जिल्लाको सुरक्षा कायम गर्न र सामाजिक अपराध नियन्त्रण गर्न एकअर्काबीच सहयोग आवश्यक छ,” उनले भने ।

उनले सामाजिक अपराध नियन्त्रणमा प्रशासनको संयन्त्र मात्र पर्याप्त नभएकाले व्यवसायीको आचारसंहिता र सहयोग अपरिहार्य हुने बताए । चाडपर्वमा अनुचित मूल्यवृद्धि, कमसल वस्तुको बिक्री वितरण र यातायात समस्या नियन्त्रण गर्न व्यवसायी, सुरक्षा निकाय र प्रशासन मिलेर सुरक्षा संयन्त्र समिति बनाएर काम गर्ने तयारी भइरहेको जानकारी पनि दिए ।

तुलसीपुर उद्योग वाणिज्य संघका पूर्व अध्यक्ष बिमल रिजालले उपभोक्ताको हितमा प्रस्तुत हुन सके विवाद नहुने बताए । उनले जिल्लाको सुरक्षाका लागि व्यवसायीहरूको सहयोग निरन्तर रहँदै आएको जानकारी दिँदै, दाङ लागुऔषध कारोबारको ट्रान्जिट प्वाइन्ट भएकाले नियन्त्रण चुनौतीपूर्ण रहेको उल्लेख गरे ।

कार्यक्रममा उद्योग वाणिज्य संघका अध्यक्ष विनिल केसीले खाद्य सुरक्षा चुनौती कम गर्न सामाजिक सञ्जालमार्फत सचेतना फैलाउने कार्य भइरहेको बताए । होटल व्यवसायलाई व्यवस्थित गर्ने र व्यवसायी मुदामा प्रशासनसँग सहकार्य गर्ने प्रतिबद्धता पनि व्यक्त गरे ।

संघका प्रेस सल्लाहकार शरद रेग्मीले प्रशासनको ध्यान मुख्यतः बजार व्यवस्थापनमा केन्द्रित हुनुपर्नेमा जोड दिए ।

कार्यक्रमको सहजीकरण महासचिव केशवराज केसीले गरेका थिए भने स्वागत देव बहादुर केसीले गरेका थिए ।

दाङ,१९ भदौ । दाङको तुलसीपुरमा खुकुरी प्रहार गरी फरार रहेका पाँच जनालाई प्रहरीले नियन्त्रणमा लिएको छ । खुकुरी प्रहारबाट दुईजना घाइते भएका छन् ।

तुलसीपुर उपमहानगरपालिका–६ स्याउली बजारस्थित विष्णु नास्ता पसल नजिक बिहिबार बिहान भएको खुकुरी प्रहार प्रकरणमा प्रहरीले पाँच जना युवालाई नियन्त्रणमा लिएको छ ।

घटनामा घाइते भएका तुलसीपुर–५ बसपार्कका २१ वर्षीय आयुष बिक र १९ वर्षीय प्रवेश योगीलाई प्रारम्भिक उपचारपछि थप उपचारका लागि नेपालगन्जस्थित संजिवनी कलेज अफ मेडिकल साइन्सेस प्रालिमा पठाइएको छ । आयुषको टाउको र ढाडमा चोट लागेको र अवस्था मध्यम रहेको प्रहरीले जनाएको छ भने योगीको बायाँ हातमा चोट लागेको छ ।

इलाका प्रहरी कार्यालय तुलसीपुरका प्रहरी निरीक्षक सुर्य बहादुर राना मगरको कमाण्डमा खटिएको टोलीले घटनामा संलग्न भएको आरोपमा तुलसीपुर–४ रक्षा चौरबाट पाँच जनालाई नियन्त्रणमा लिएको छ । पक्राउ पर्नेमा तुलसीपुर–६ गोलौरा बस्ने १८ वर्षीय जीवन बिक, बसपार्क बस्ने १८ वर्षीय राजेश परियार, १९ वर्षीय नविन राना, १८ वर्षीय बसन्त परियार र १८ वर्षीय नविन सुनार रहेका छन् ।घटनाबारे थप अनुसन्धान भइरहेको प्रहरीले जनाएको छ ।