काठमाडौ,२६ जेठ । नवनियुक्त गृहमन्त्री सुधन गुरुङ र विज्ञान, प्रविधि तथा नवप्रवर्तन मन्त्री महावीर पुनले पद तथा गोपनीयताको सपथ लिएका छन्। शीतल निवासमा आयोजित कार्यक्रममा राष्ट्रपति रामचन्द्र पौडेलले उनीहरूलाई सपथ खुवाएका हुन्।
प्रधानमन्त्री बालेन्द्र शाहको सिफारिसमा राष्ट्रपति पौडेलले मंगलबार दुवै जनालाई मन्त्रीमा नियुक्त गरेका थिए।

गुरुङ यसअघि पनि गृहमन्त्री रहिसकेका छन्। सम्पत्ति शुद्धीकरणसम्बन्धी विवादपछि उनले राजीनामा दिएका थिए। छानबिन समितिले क्लिन चिट दिएपछि उनलाई पुनः गृह मन्त्रालयको जिम्मेवारी दिइएको हो।

पुन यसअघि अन्तरिम सरकारमा शिक्षा मन्त्री भइसकेका छन्। पछिल्लो निर्वाचनमा स्वतन्त्र उम्मेदवारका रूपमा म्याग्दीबाट प्रतिनिधिसभा सदस्यमा निर्वाचित भएका हुन्।

काठमाडौ,२६ जेठ । आकर्षक मुलुकमा रोजगारी र उच्च तलबको प्रलोभन देखाएर ठगी गरेको आरोपमा प्रहरीले ६ जनालाई पक्राउ गरेको छ। काठमाडौं उपत्यका अपराध अनुसन्धान कार्यालय, टेकुको टोलीले काठमाडौं, ललितपुर र भक्तपुरका विभिन्न स्थानबाट उनीहरूलाई नियन्त्रणमा लिएको हो।

पक्राउ पर्नेहरूमा हुमबहादुर कुँवर, लोकेन्द्र बस्नेत, तोरणकुमार कार्की, रबिन्द्र खत्री, निरज गुरुङ र रिन्कु कुमारी रौनियार रहेका छन्। प्रहरीले उनीहरूले बेलायत, आइसल्यान्ड, सर्बिया, हङकङ र बुल्गेरिया पठाइदिने भन्दै विभिन्न व्यक्तिबाट लाखौं रुपैयाँ ठगी गरेको जनाएको छ।

प्रहरीका अनुसार सबैभन्दा बढी रकम कुँवरले दुई जनाबाट ८८ लाख ७० हजार रुपैयाँ असुलेका छन् भने अन्य अभियुक्तहरूले पनि विभिन्न देश पठाइदिने भन्दै रकम उठाएर सम्पर्कविहीन भएका थिए।

पीडितहरूको उजुरीपछि पक्राउ परेका उनीहरूलाई थप अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।

दाङ, २६ जेठ । भारतीय नागरिकलाई गैरकानुनी रूपमा नेपाली नागरिकता दिलाउन संलग्न रहेको आरोपमा एक वडाध्यक्षसहित चार जना पक्राउ परेका छन्।

पक्राउ पर्नेमा राजपुर गाउँपालिका–४ का वडाध्यक्ष ६५ वर्षीय रामेश्वर अहिर, सोही वडाका सचिव तथा स्थानीय पञ्जिकाअधिकारी ४७ वर्षीय राजेशकुमार कहर, कार्यालय सहायक ३४ वर्षीया मीना चौधरी र ४५ वर्षीय आलम जोल्दा रहेका छन्।

जिल्ला अदालतले सोमबार उनीहरूलाई पाँच दिन थुनामा राखेर अनुसन्धान गर्न अनुमति दिएको छ। यस प्रकरणमा इलाका प्रशासन कार्यालय लमहीका तत्कालीन प्रमुख प्रेमबहादुर खवास र भारतीय नागरिक आयशा जोल्दाविरुद्ध पनि पक्राउ पुर्जी जारी गरिएको छ, तर उनीहरू हाल फरार छन्।

प्रहरीका अनुसार आलम जोल्दाले २०७५ कात्तिक २८ गते वंशजका आधारमा नागरिकता लिएको देखिएको छ, जसमा तत्कालीन कार्यालय प्रमुख खवासको हस्ताक्षर रहेको छ। अनुसन्धानका क्रममा बाबुको मृत्यु मितिसम्बन्धी विवरणमा सरकारी अभिलेख र नागरिकतामा फरक पाइएपछि शंकास्पद देखिएको हो।

अख्तियार दुरुपयोग अनुसन्धान आयोगको पत्राचारका आधारमा प्रहरीले अनुसन्धान अघि बढाउँदै वडाध्यक्षसहित चार जनालाई पक्राउ गरेको जनाएको छ।

काठमाडौ,२६ जेठ । सरकारले बर्डफ्लु प्रभावित क्षेत्रमा रोग नियन्त्रणसँगै थप फैलिन नदिन आकस्मिक कार्य सुरु गरेको छ।

पशु सेवा विभागका महानिर्देशक डा. उमेश दाहालका अनुसार रोग पुष्टि भएका १० जिल्लामा हालसम्म ७२ वटा फार्मका करिब ५ लाख १५ हजार पन्छी तथा पन्छीजन्य सामग्री नष्ट गरिएको छ। प्रभावितमध्ये लेयर्स र स्थानीय कुखुरामा बढी समस्या देखिएको छ।

द्रुत कार्य टोलीमार्फत करिब ७ लाख अण्डा र १८३ टन दाना पनि नष्ट गरिएको छ। केही साताअघि झापा, मोरङ र सुनसरीबाट सुरु भएको संक्रमण महोत्तरी, बारा, चितवन हुँदै काठमाण्डौ, भक्तपुर र ललितपुरसम्म फैलिएको छ भने पछिल्लो समय नवलपरासीमा पनि देखिन थालेको छ। काठमाण्डौ उपत्यका अझै जोखिममा रहेको छ।

संक्रमण नियन्त्रणका लागि प्रभावित क्षेत्रका सबै पन्छीजन्य उत्पादन नष्ट गरिएको मितिबाट करिब दुई महिनापछि मात्रै व्यवसाय पुनः सञ्चालन गर्न पाइने व्यवस्था गरिएको छ।

बर्डफ्लु नियन्त्रण नियमावली, २०७८ अनुसार प्रभावित किसानलाई लागत मूल्यको ७५ प्रतिशतसम्म राहत दिने प्रावधान रहेको छ। लागत निर्धारण भने सम्बन्धित जिल्लाका प्रमुख जिल्ला अधिकारीसहितको बैठकले गर्ने जनाइएको छ।

काठमाडौ,२६ जेठ । राष्ट्रिय प्रजातन्त्र पार्टी (राप्रपा)ले अर्थमन्त्री डा. स्वर्णिम वाग्लेको राजीनामा माग गरेको छ। प्रतिनिधिसभा बैठकमा बोल्दै राप्रपाकी प्रमुख सचेतक खुस्बु ओलीले विद्युतीय गाडी आयातमा कर छली प्रकरणमा अर्थमन्त्रीको नाम जोडिएको भन्दै नैतिकताका आधारमा राजीनामा दिनुपर्ने बताइन्। उनले निष्पक्ष र विश्वसनीय छानबिनका लागि मन्त्रीले पदबाट अलग रहनुपर्ने धारणा राखिन्।

ओलीले अघिल्ला घटनाहरू स्मरण गर्दै सरकार आफैंले बनाएको छानबिन समितिले निष्पक्षता नदेखाउने आशंका व्यक्त गरिन्। उनले मन्त्रीकै प्रस्तावमा गठन हुने समितिले ‘सुनपानी छर्कने’ काम मात्र गर्ने भन्दै त्यस्तो प्रक्रिया स्वीकार्य नहुने बताइन्।

यस विषयमा संसदमा यसअघि पनि विवाद हुँदै आएको छ। रास्वपा सांसदहरूले समेत सरकारद्वारा गठित छानबिन समितिप्रति असहमति जनाउँदै बैठक बहिष्कार गरेका थिए।

काठमाडौ,२६ जेठ । राष्ट्रिय स्वतन्त्र पार्टी (रास्वपा)का सांसद सुधन गुरुङ पुनः गृहमन्त्री बन्ने भएका छन्। प्रधानमन्त्री वालेन्द्र शाह (बालेन)ले उनलाई पुनः उक्त जिम्मेवारी दिन लागेका हुन्।

प्रधानमन्त्री तथा मन्त्रिपरिषद् कार्यालय स्रोतका अनुसार मंगलबार (जेठ २६) दिउँसो ३ बजे गुरुङको शपथ कार्यक्रम तय गरिएको छ।

यसअघि सोही सरकारमा गृहमन्त्री रहेका गुरुङले सम्पत्तिसम्बन्धी प्रश्न उठेपछि पदबाट राजीनामा दिएका थिए। उनको सम्पत्तिबारे छानबिन गर्न गठन गरिएको समितिले प्रधानमन्त्रीलाई प्रतिवेदन बुझाइसकेको छ।

दाङ,२६ जेठ । दाङको लमहीमा ट्रकसँग मोटरसाइकल ठोकिँदा एकजनाको मृत्यु भएको छ। अर्का एकजना गम्भीर घाइते भएका छन्। पूर्वपश्चिम राजमार्ग अन्तर्गत लमही नगरपालिका–५ रातोडाँडामा बिग्रिएर सडकमा रोकिराखेको ट्रकको पछाडि मोटरसाइकल ठोक्किएको हो।

मोटरसाइकल ठोक्किँदा लमही–७ हस्नापुरका अन्दाजी ३७ वर्षीय जीवन गिरीको मृत्यु भएको प्रहरीले जनाएको छ।

गम्भीर घाइते भएका गिरीलाई लमही अस्पताल पुर्‍याइएपछि चिकित्सकले मृत घोषणा गरेका हुन्।
दुर्घटनामा मोटरसाइकलमा सवार अन्दाजी ३२ वर्षीय धनिराम चौधरी गम्भीर घाइते भएका छन्।

उनको राप्ती स्वास्थ्य विज्ञान प्रतिष्ठान, घोराहीमा उपचार भइरहेको जिल्ला प्रहरी कार्यालय दाङका प्रवक्ता डिएसपी डा. हेमबहादुर केसीले जानकारी दिए।

प्रहरीका अनुसार मङ्गलबार बिहान करिब ४ बजे ना ५ ख ९३३६ नम्बरको ट्रक र लु १२ प ९८४० नम्बरको मोटरसाइकल ठोक्किएको हो। घटनाबारे थप अनुसन्धान भइरहेको प्रहरीले जनाएको छ।

दाङ,२५जेठ । नेकपा एमाले लुम्बिनी प्रदेश सभाको प्रमुख सचेतकमा रोल्पाकी यमुना रोका मगर र सचेतकमा कपिलवस्तुका नवराज लामिछाने नियुक्त भएका छन्।

मुख्यमन्त्री चेतनारायण आचार्यले एमाले संसदीय दलको विधानअनुसार दुवै जनालाई २०८३ जेठ २५ गतेदेखि लागू हुने गरी नियुक्त गरेका हुन्।

यसअघि प्रमुख सचेतक रहेका रुपन्देहीका तुलसीप्रसाद चौधरी कृषि, भूमि व्यवस्था तथा सहकारी मन्त्री बनेपछि उक्त पद रिक्त भएको थियो।

त्यस्तै, सचेतक रहेकी रोका मगर प्रमुख सचेतकमा बढुवा भएपछि खाली भएको सचेतक पदमा लामिछानेलाई नियुक्त गरिएको हो।

दाङ,२५ जेठ । प्रहरीले अवैध रूपमा नदीजन्य पदार्थ ओसारपसारमा संलग्न सवारी साधनलाई नियन्त्रणमा लिई जरिवाना गराएको छ।

जिल्ला प्रहरी कार्यालय दाङ तथा मातहतका प्रहरी टोलीले जेठ २१ देखि २५ गतेसम्म सञ्चालन गरेको निगरानी तथा अनुगमन अभियानका क्रममा ३ वटा स्काभेटर (जेसिबी), २ वटा ट्रिपर र ४ वटा ट्याक्टर नियन्त्रणमा लिएको हो।

प्रहरीका अनुसार ती सवारीसाधन अवैध रूपमा ढुङ्गा, गिट्टी र बालुवा ओसारपसारमा प्रयोग भइरहेको अवस्थामा फेला परेका थिए। नियन्त्रणमा लिइएका सवारीसाधनलाई आवश्यक कारबाहीका लागि सम्बन्धित निकायमा बुझाइएको छ।

कारबाहीका क्रममा सवारीसाधनका सञ्चालक तथा सम्बन्धित व्यक्तिबाट कुल ५ लाख १५ हजार रुपैयाँ जरिवाना असुल गरिएको प्रहरीले जनाएको छ। जरिवाना प्रक्रिया पूरा भएपछि सवारीसाधन सम्बन्धित व्यक्तिको जिम्मा लगाइएको छ।

प्रहरीले नदी तथा खोलाबाट हुने अवैध उत्खनन र ओसारपसार नियन्त्रण गर्न नियमित निगरानी जारी राखेको जनाएको छ।

यस्ता गतिविधिले वातावरणीय असर पार्ने र प्राकृतिक स्रोतको दोहन बढाउने भएकाले नियन्त्रणलाई प्राथमिकता दिइएको छ।
प्रहरीले अवैध गतिविधिबारे सूचना भए नजिकको प्रहरी कार्यालयमा जानकारी गराउन सर्वसाधारणलाई आग्रह गरेको छ।

दाङ,२५ जेठ । प्रहरीले दाङमा ब्राउन सुगरसहित एकजनालाई पक्राउ गरेको छ। दाङको भालुबाङ क्षेत्रबाट लागूऔषध ब्राउन सुगर बिक्रीवितरणमा संलग्न रहेको आशंकामा प्रहरीले एक जनालाई पक्राउ गरेको हो।

इलाका प्रहरी कार्यालय भालुबाङबाट खटिएको टोलीले विशेष सूचनाका आधारमा स्वीप अपरेशन सञ्चालन गर्दै शंकास्पद अवस्थामा हिँडिरहेका कपिलवस्तुको शिवराज नगरपालिका–५ निवासी ४२ वर्षीय साकिर खानलाई नियन्त्रणमा लिएको हो।

प्रहरीका अनुसार जेठ २२ गते राप्ती गाउँपालिका–१ भालुबाङ क्षेत्रमा गस्तीका क्रममा खानलाई पक्राउ गरिएको हो। उनको साथबाट ब्राउन सुगरजस्तो पदार्थ बरामद भएको छ। उनको साथबाट ६ ग्राम ७७० मिलिग्राम ब्राउन सुगर बरामद गरिएको हो।

पक्राउ परेका खानमाथि लागूऔषध सम्बन्धी कसुरमा अनुसन्धान भइरहेको प्रहरीले जनाएको छ। बरामद पदार्थ परीक्षणका लागि सम्बन्धित निकायमा पठाइने र घटनाबारे थप अनुसन्धान जारी रहेको छ।

पछिल्लो समय दाङलगायत क्षेत्रमा लागूऔषध कारोबार र ओसारपसारका घटना बढ्दै गएको भन्दै प्रहरीले निगरानी तथा नियन्त्रण अभियानलाई तीव्र बनाएको छ। प्रहरीले यस्ता गतिविधिबारे जानकारी भए तत्काल सूचना दिन स्थानीयवासीलाई आग्रह गरेको छ।