दाङ,१९ जेठ । दाङको तुलसीपुर उपमहानगरपालिकाले वडा नं. १५ दक्षिण कुररियामा थारू भाषाको विद्यालय सञ्चालन गर्न अनुमति दिएको छ।

थारू समुदायको बाहुल्यता रहेको जिल्लामा मातृभाषामा शिक्षा दिन यो निर्णय गरिएको नगरप्रमुख टीकाराम खड्काले बताए। विद्यालय गुठीका रूपमा सञ्चालन हुने जनाइएको छ। तीन वर्षअघि स्थानीय रोहित चौधरीले दिएको निवेदनका आधारमा उपमहानगरपालिकाको ४७औँ कार्यपालिका बैठकले यो निर्णय गरेको हो।

जिल्लामा अहिलेसम्म थारू समुदायका लागि छुट्टै विद्यालय सञ्चालनमा थिएन। उपमहानगरपालिकाले विद्यालयका लागि स्वयंसेवक शिक्षकसमेत उपलब्ध गराउने जनाएको छ।
नगरप्रमुख खड्काका अनुसार आवश्यक परे विद्यालयलाई आवासीय बनाउन पनि सकिनेछ। यो अभ्यास देशमै नयाँ भएको उनको भनाइ छ।

राष्ट्रिय जनगणना २०७८ अनुसार तुलसीपुरमा करिब २१ प्रतिशत थारू समुदायको बसोबास छ। यसअघि वीरेन्द्र मावि भ्यूडहर सुनपुरमा मगर भाषाको कक्षा सञ्चालनमा थियो। स्थानीय पाठ्यक्रममार्फत पनि भाषागत कक्षा सञ्चालन गर्न सकिने शिक्षा शाखा प्रमुख चक्र भण्डारीले बताएका छन्।

काठमाडौ,१९ जेठ । प्रतिपक्षी दलहरूको अवरोधका कारण राष्ट्रिय सभाको मंगलबारको बैठक प्रभावित भएको छ।

प्रधानमन्त्री बालेन्द्र शाहले दिएको अभिव्यक्तिप्रति आपत्ति जनाउँदै प्रतिपक्षी दलहरूले बैठक सुरु हुनासाथ अवरोध गरेका हुन्।

उनीहरूले प्रधानमन्त्रीले नेपालले भारतीय भूमि मिचेको भन्ने भनाइका लागि माफी माग्नुपर्ने माग गरेका छन्।

प्रतिपक्षी सांसदहरूले उक्त अभिव्यक्तिले देशको सार्वभौमसत्तामा असर पुगेको भन्दै प्रमाण भए सदनमा पेश गर्न पनि माग गरेका छन्।

यसैबीच, राष्ट्रिय स्वतन्त्र पार्टीका सभापति रवि लामिछानेले भारतसँगको सम्बन्धबारे विदेशी सञ्चारमाध्यममा लेख लेखेको विषयमा पनि उनीहरूले आपत्ति जनाएका छन्।

लगातार अवरोध भएपछि राष्ट्रिय सभा अध्यक्ष नारायणप्रसाद दाहालले बैठक बुधबारसम्मका लागि स्थगित गरेका छन्।

दाङ,१९ जेठ । लुम्बिनी प्रदेशका मुख्यमन्त्री चेतनारायण आचार्यले महिला स्वास्थ्य स्वयंसेविकाहरूको कामको प्रशंसा गर्दै उनीहरूको हकहितका लागि सरकार सकारात्मक रहेको बताएका छन्।

सोमबार नेपाल स्वास्थ्य स्वयंसेवी संघ (नेभा) लुम्बिनी प्रदेशले मुख्यमन्त्री कार्यालयमा बुझाएको मागपत्र ग्रहण गर्दै उनले स्वयंसेविकाहरू समुदायस्तरको स्वास्थ्य सेवामा महत्वपूर्ण रहेको बताए। मातृ–शिशु स्वास्थ्य, खोप, परिवार नियोजन र जनचेतनामा उनीहरूको योगदान ठूलो रहेको उनले बताए।

संघकी अध्यक्ष सुनिता शर्माको नेतृत्वमा गएको टोलीले ९ बुँदे माग राखेको थियो। जसमा ६० वर्षपछि अवकाश सुविधा, तालिम, सामाजिक सुरक्षा, चाडपर्व खर्च, दुर्घटना राहत र मासिक भत्ता जस्ता विषय समावेश छन्। हाल प्रदेश सरकारले अवकाश हुने स्वयंसेविकालाई ५० हजार रुपैयाँ दिँदै आएको छ।

मुख्यमन्त्री आचार्यले यी मागहरू अध्ययन गरी सम्भव भएका विषयलाई प्राथमिकतामा राखेर सम्बोधन गर्ने बताएका छन्।

काठमाडौ,१९ जेठ। राष्ट्रिय स्वतन्त्र पार्टी (रास्वपा) ले भुवन केसीलाई केन्द्रीय निर्वाचन आयोगको प्रमुखमा नियुक्त गरेको छ।

पार्टी सचिवालयको बैठकले टोखा–६, काठमाडौं निवासी केसीलाई उक्त जिम्मेवारी दिने निर्णय गरेको हो।

महामन्त्री कविन्द्र बुर्लाकोटीले हस्ताक्षर गरेको पत्रमा केसीले पार्टीको विधान, नीति र नियम अनुसार आफ्नो जिम्मेवारी राम्रोसँग पूरा गर्ने विश्वास व्यक्त गरिएको छ।

दाङ,१९ जेठ । दाङको तुलसीपुरस्थित राप्ती प्रादेशिक अस्पताल ५० बेडको स्वीकृत भए पनि अहिले १४१ बेड सञ्चालनमा छ। बिरामीको चाप बढेपछि अस्पतालले थप बेड राखेर सेवा दिइरहेको छ।

अस्पताललाई २०० बेडमा विस्तार गर्न २०८० सालमै ओएनएम सर्वे प्रदेश सरकारलाई पठाइएको थियो।

स्वास्थ्य मन्त्रालयले अर्थ मन्त्रालयको सहमति लिएर फाइल मन्त्रिपरिषदमा पठाए पनि मुख्यमन्त्री कार्यालयमै अड्कियो। पछि नयाँ कार्यविधि आएको भन्दै फाइल फेरि अस्पतालमै फर्काइएको छ।

अस्पतालका अनुसार अब फेरि नयाँ फाइल बनाएर पठाउन भनिएको छ। चार वर्षदेखि यो प्रक्रिया अघि नबढ्दा सेवा सञ्चालनमा समस्या भएको बताइएको छ।

अस्पताल विकास समितिका अध्यक्ष महेन्द्र लामिछानेले जनशक्ति अभाव ठूलो समस्या भएको बताए। उनले समस्या समाधानका लागि पहल गर्ने बताएका छन्।

२०० बेडको प्रस्तावमा ५१५ जना जनशक्ति आवश्यक पर्ने उल्लेख थियो। तर फाइल अगाडि नबढ्दा काम रोकिएको छ। हाल अस्पतालमा ७४ जनाको मात्रै दरबन्दी रहेको छ।

काठमाडौ,१९ जेठ। लेबनानमा इजरायलको बढ्दो सैन्य आक्रमणको विरोध गर्दै इरानले अमेरिकासँगको उच्चस्तरीय वार्ता स्थगित गरेको छ।

तीन महिनादेखि जारी युद्ध अन्त्य गर्ने प्रयास भइरहेका बेला इरानको यो निर्णयले स्थिति थप जटिल बनेको छ। ‘तस्निम’ समाचार संस्थाका अनुसार इरानी टोलीले मध्यस्थकर्तामार्फत हुने वार्ता रोक्ने निर्णय गरेको हो।

इरानी संसदका सभामुख मोहम्मद बागेर गालिबाफले लेबनानमा आक्रमण जारी रहे इरानले जवाफी कदम चाल्न सक्ने चेतावनी दिएका छन्।

उनले इजरायली आक्रमण रोक्न प्रयास भइरहेको तर जारी रहेमा वार्ता मात्र होइन, प्रतिकार पनि गरिने बताएका छन्।

उनका अनुसार यदि इरान र अमेरिकाबीच सहमति भयो भने लेबनानसहित सबै क्षेत्रमा आक्रमण रोक्ने विषय समेटिनेछ।

इरानको विदेश मन्त्रालयले अमेरिका नै युद्धविराम उल्लंघनका लागि जिम्मेवार रहेको आरोप लगाएको छ।

यसैबीच, अमेरिकी राष्ट्रपति डोनाल्ड ट्रम्पले आफूले इजरायली प्रधानमन्त्री र हिजबुल्लाहका प्रतिनिधिसँग कुरा गरेको र अब बेरुततर्फ सेना नपठाइने बताएका छन्।

रोल्पा ,१८ जेठ । रोल्पामा माछा मार्ने क्रममा करेन्ट लागेर एक जनाको मृत्यु भएको छ। जिल्लाको माडी गाउँपालिका–४ तार्केवाङस्थित स्याङखोलामा ३९ वर्षीय हरि बहादुर घर्ती मगरको घटनास्थलमै मृत्यु भएको प्रहरीले जनाएको छ।

सोमबार दिउँसो उनी र ३४ वर्षीय चालक कर्मलाल घर्ती मगर गाडी धुन खोलामा गएका थिए। गाडी धुँदै गर्दा हरि बहादुर करिब १५० मिटर टाढा माछा मार्न गएका बेला आफूसँग ल्याएको १२ भोल्टको ब्याट्री प्रयोग गर्दा करेन्ट लागेर ढलेका थिए।

बाख्रा गोठालाले उनलाई अचेत अवस्थामा देखेपछि घटनाबारे जानकारी गराएका थिए। घटनास्थलमै उनको मृत्यु भइसकेको प्रहरीले जनाएको छ। प्रहरीले चालक, पिकअप गाडी, ब्याट्री र तार नियन्त्रणमा लिएर अनुसन्धान गरिरहेको छ।

काठमाडौ,१८ जेठ । दैलेखमा जीप दुर्घटना हुँदा ३ जनाको घटनास्थलमै मृत्यु भएको छ भने ५ जना गम्भीर घाइते भएका छन्।

सुर्खेतबाट कालीकोटको शुभकालिका–६ हाउडीतर्फ जाँदै गरेको जीप भैरवी गाउँपालिका–७ कालगौडाको भित्री सडकमा दुर्घटनामा परेको हो।

दुर्घटनामा चालक शुभकालिका–५ का ३२ वर्षीय कलबहादुर रोकाया, शुभकालिका–४ का ३८ वर्षीय नेत्र सुनार र शुभकालिका–६ की ६५ वर्षीया पुल्तीसरा कामीको ज्यान गएको प्रहरीले जनाएको छ।

घाइते ५ जनालाई उपचारका लागि दैलेख जिल्ला अस्पतालमा भर्ना गरिएको छ। प्रहरीका अनुसार जीप अनियन्त्रित भई करिब ३०० मिटर तल खसेको हो।

काठमाडौ,१८ जेठ । नेपाली कांग्रेसका महामन्त्री गुरुराज घिमिरेले आगामी निर्वाचनमा कांग्रेसलाई पहिलो पार्टी बनाउन कार्यकर्तालाई सक्रिय हुन आग्रह गरेका छन्।

सोमबार लुम्बिनी प्रदेशमा आयोजित ‘जरा अभियान’ कार्यक्रममा उनले यस्तो बताएका हुन्। उनले पार्टीलाई बलियो बनाउँदै स्थानीय, प्रदेश र संघीय निर्वाचनमा राम्रो परिणाम ल्याउने लक्ष्य रहेको बताए।

उनका अनुसार पार्टीभित्र एकता कायम गर्ने, संगठन मजबुत बनाउने र जनतासँग नजिकिने अभियान अहिले चलिरहेको छ।

दाङ,१८ जेठ । नेपाली बजारमा सोमबार सुनको मूल्य सामान्य घटेको छ भने चाँदीको मूल्य बढेको छ। नेपाल सुनचाँदी व्यवसायी महासंघका अनुसार आइतबारको तुलनामा सोमबार सुन प्रतितोला २०० रुपैयाँले घटेर ३ लाख १० हजार ९०० रुपैयाँ पुगेको छ। आइतबार सुनको मूल्य ३ लाख ११ हजार १०० रुपैयाँ थियो।

यस्तै, चाँदीको मूल्य भने बढेको छ। सोमबार चाँदी प्रतितोला १० रुपैयाँले बढेर ५ हजार ३५५ रुपैयाँ पुगेको छ। आइतबार चाँदी ५ हजार ३४५ रुपैयाँमा कारोबार भएको थियो।