दाङ,१२ कार्तिक । तुलसीपुरमा रहेको ज्ञान ज्योति फाउन्डेसनले मास्टर अफ बिजनेस एडमिनिस्ट्रेशन (एमबिए) कार्यक्रममा उत्कृष्ट नतिजा हासिल गरेको छ । विद्यालयले एमबी अध्ययन सञ्चालन गरेको पहिलो वर्षमै प्रथम सेमेस्टरका विद्यार्थीहरूले उत्कृष्ट नतिजा ल्याएका हुन् ।

मङ्गलबार सार्वजनिक भएको एमबिए प्रथम सेमेस्टरको नतिजामा ज्ञान ज्योति फाउन्डेसनका छात्रा वर्षा के.सी.ले ३.६७ जिपिए प्राप्त गरेकी छिन् भने अन्य सबै विद्यार्थीहरूले उत्कृट नतिजा ल्याउन सफल भएको विद्यालय प्रशासनले जानकारी दिएको छ ।

ज्ञान ज्योतिले देशमै प्रथम स्थान हासिल तथा प्रदेश लगायत पश्चिम नेपालमै निरन्तर अब्बल नतिजा ल्याउन सफल ज्ञान ज्योतिको सफलताको प्रमुख आधार बौद्धिक व्यक्तिहरुको कुशल नेतृत्व, सबल व्यवस्थापन, दक्ष तथा अनुभवी शिक्षक शिक्षिकाहरुको साथ र अनुशासित, लगनशील एवं क्षमतावान विद्यार्थीहरुको मेहनत रहेको विद्यालयका सिइओ सुरेन्द्र जिसीले बताए ।

यस विद्यालयले वि.वि.ए., वि.ए.सी.सीएसआईटि, वि.सी.ए, विएस्सी, वि.वि.एस. र वि.ए संकायमा अध्यापन गराउदै आएको छ । ज्ञान ज्योति फाउन्डेसन पश्चिम नेपालमै उच्च ब्यबस्थापनका साथ सञ्चालन भैरहेको विद्यालयको रुपमा परिचित छ । विद्यालयले विभिन्न समय र संकायमा निरन्तर उत्कृष्ट नतिजा ल्याउने गरेको छ ।

काठमाडौ,१२ कार्तिक । ऊर्जा, जलस्रोत तथा सिँचाइमन्त्री कुलमान घिसिङ र भारतका विद्युतमन्त्री मनोहरलाल खट्ठरबीच भेटवार्ता भएको छ।

अन्तर्राष्ट्रिय सौर्य गठबन्धन (ISA) को आठौँ महासभामा भाग लिन नयाँ दिल्ली पुगेका मन्त्री घिसिङले आज (बुधबार) भारतीय समकक्षी खट्ठरसँग भेटवार्ता गरेका हुन्।

भारतको विद्युत मन्त्रालयमा भएको उक्त भेटमा नेपाल–भारतबीचको ऊर्जासम्बन्धी सहकार्य, विद्युत व्यापार, प्रसारण लाइन विस्तार, भारतीय लगानीमा निर्माणाधीन जलविद्युत आयोजनाको प्रगति तथा दीर्घकालीन साझेदारीका विषयमा विस्तृत छलफल भएको ऊर्जा मन्त्रालयले जनाएको छ।

त्यसैबीच नेपाल र भारतबीच दुईवटा अन्तरदेशीय प्रसारण लाइन निर्माणका लागि संयुक्त उपक्रम (जेभी) तथा सेयरहोल्डर सम्झौतामा हस्ताक्षर भएको छ। इनरुवा–पूर्णिया र लम्की–दोधारा–बरेली ४०० केभी प्रसारण लाइन निर्माणका लागि सम्झौता गरिएको हो।

ऊर्जामन्त्री घिसिङ र भारतीय विद्युतमन्त्री खट्ठरको उपस्थितिमा नेपाल विद्युत प्राधिकरणका तर्फबाट उप–कार्यकारी निर्देशक सुभाषकुमार मिश्र र पावर ग्रिड कर्पोरेशन अफ इन्डिया लिमिटेडका प्रमुख सञ्चालन अधिकृत सञ्जयकुमार गुप्ताले सम्झौतापत्रमा हस्ताक्षर गरेका छन्। यस सम्झौतापछि प्राधिकरण र पावर ग्रिडको संयुक्त लगानीमा दुवै प्रसारण लाइन निर्माणका लागि कम्पनी स्थापनाको बाटो खुलेको मन्त्रालयले जनाएको छ।

मन्त्री घिसिङले थप दुईवटा ‘क्रस–बोर्डर’ प्रसारण लाइन निर्माण अघि बढ्नु नेपाल–भारतबीचको द्विपक्षीय तथा क्षेत्रीय विद्युत व्यापारका लागि महत्वपूर्ण उपलब्धि भएको बताए। उनले उक्त प्रसारण लाइनमार्फत नेपालमा उत्पादित विद्युत निर्यात गर्न सहज हुने र अन्तर्राष्ट्रिय ऊर्जा बजारमा नेपालको पहुँच विस्तार हुने विश्वास व्यक्त गरे।

त्यस्तै, उनले नेपालका जलविद्युत परियोजनामा स्वदेशी तथा विदेशी लगानी आकर्षित गर्न द्विपक्षीय सहकार्यले महत्वपूर्ण भूमिका खेल्ने बताउँदै लगानीका लागि आग्रह गरे।

भारतीय विद्युतमन्त्री खट्ठरले पनि थप दुई ‘क्रस–बोर्डर’ प्रसारण लाइन निर्माण सम्पन्न भएपछि नेपाल–भारतबीचको विद्युत विनिमय सहज हुने, क्षेत्रीय ऊर्जा सुरक्षामा सुधार आउने र दुवै देशको आर्थिक वृद्धिमा योगदान पुग्ने बताए।

यसअघि, मन्त्रिपरिषद्को ३० असोजको बैठकले नेपाल विद्युत प्राधिकरण र पावर ग्रिडबीच संयुक्त लगानीमा दुईवटा कम्पनी स्थापना गर्न तथा ती कम्पनीहरूमा स्वपुँजी (इक्विटी) लगानीका लागि स्वीकृति दिएको थियो।

काठमाडौ,१२ कार्तिक । डोटीमा एक शिक्षिकाले आत्महत्या गरेकी छिन्। विवाहका लागि दबाब दिँदै धम्की दिने विद्यालय निरीक्षकविरुद्ध प्रहरी अनुसन्धान अघि बढाएको छ।

डोटीको पूर्वीचौकी गाउँपालिका–१ की २७ वर्षीया जानकी खड्का घर नजिकै झुन्डिएको अवस्थामा मृत फेला परेकी हुन्। उनी बाजुराको बुढीगंगा नगरपालिका–५ स्थित भानोदय माध्यमिक विद्यालयमा गणित शिक्षिकाका रूपमा कार्यरत थिइन्।

जानकीले यसअघि धनगढीस्थित डिस्कभरी स्कुलमा अध्यापन गर्दै शिक्षक सेवा आयोगमार्फत स्थायी नियुक्ति प्राप्त गरेकी थिइन्।

प्रहरीका अनुसार जानकीको सुसाइड नोटमा शिक्षा समन्वय इकाई डोटीका शिक्षा अधिकृत (विद्यालय निरीक्षक) गणेशबहादुर रावलले विवाहका लागि दबाब दिँदै धम्की दिएको उल्लेख छ। विवाह प्रस्ताव अस्वीकार गरेपछि रावलले जानकीका भाइलाई फोन गरेर, “तिम्रो दिदीले मसँग विवाह नगरे मारिदिन्छु,” भन्दै धम्की दिएका थिए।

रावलको निरन्तरको धम्कीपछि जानकीले गत १० कात्तिकमा घरभन्दा करिब ७ सय मिटर तल खोला किनारमा रहेको उत्तिसको रुखमा झुन्डिएर आत्महत्या गरेकी थिइन्।

मृतककी बुबा चक्रबहादुर खड्काले रावलविरुद्ध आत्महत्या दुरुत्साहन मुद्दा दर्ता गराएका छन्। जाहेरीपछि प्रहरीले ११ कात्तिकमा रावललाई नियन्त्रणमा लिई अनुसन्धान सुरु गरेको हो।

‘जाहेरी परेपछि तुरुन्तै पक्राउ गरी आज अदालतमा पेस गर्दैछौं,’ जिल्ला प्रहरी कार्यालय डोटीका डीएसपी दिपेन्द्र पालले जानकारी दिए।

प्रहरीका अनुसार मृतक खड्का अविवाहित थिइन् भने रावल विवाहित जीवनपछि सम्बन्ध विच्छेद गरी बसेका डिभोर्सी हुन्।

घटनास्थलबाट रावलका नाममा लेखिएको सुसाइड नोट फेला परेपछि थप अनुसन्धान भइरहेको प्रहरीले जनाएको छ। मृतकको शव पोस्टमार्टमका लागि जिल्ला अस्पताल डोटीमा राखिएको छ।

धनगढी,१२ कार्तिक । डडेल्धुराको आलिताल गाउँपालिका-३ मा रहेको कैलाश समैजेश्वर सामुदायिक वन उपभोक्ता समितिका अध्यक्ष सर्वजित मडै विरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।

सामुदायिक वनको कोषबाट १८ लाखभन्दा बढी रकम हिनामिना गरेको प्रमाणित भएपछि आयोगले मडैविरुद्ध विशेष अदालत काठमाडौंमा आरोपपत्र दायर गरेको हो।

अख्तियारका अनुसार मडैले १० मंसिर २०७८ मा समितिको बैठक माइन्युट नक्कली तयार गरी, सचिव र कोषाध्यक्षको जानकारीबिना किर्ते हस्ताक्षर गरेर चेकमार्फत रकम निकालेका थिए।

उनले १६ मंसिर २०७८ देखि २५ वैशाख २०७९ सम्म विभिन्न मितिमा ७ वटा चेकमार्फत २० लाख १५ हजार रुपैयाँ आफ्नै नाममा निकालेका थिए। समितिले सो कुरा पत्ता लगाएपछि मडैले २ लाख रुपैयाँ मात्र फिर्ता गरेका थिए।

रकम उनले डडेल्धुरा, धनगढी, अत्तरिया, चौमाला र महेन्द्रनगरस्थित राष्ट्रिय वाणिज्य बैंकका शाखाबाट निकालेका थिए।

आयोगका अनुसार समितिको निर्णयपत्र र बैंकमा दर्ता भएको निर्णयपत्रबीच फरक–फरक विवरण पाइएपछि, मडैले किर्ते निर्णय बनाई रकम निकालेको पुष्टि भएको हो।

फरेन्सिक परीक्षण, स्थलगत मुचुल्का र डिभिजन वन कार्यालय डडेल्धुराको प्रतिवेदनका आधारमा मडैको किर्ते सहिछाप र नक्कली कागजात तयार गरी रकम दुरुपयोग गरेको प्रमाणित भएको आयोगले जनाएको छ।

आयोगले मडैको कार्यलाई भ्रष्टाचार निवारण ऐन, २०५९ को दफा १७ बमोजिमको कसूर ठहर गर्दै १८ लाख १५ हजार रुपैयाँ बिगो रकम कायम गरेको छ।

सोही ऐनको दफा ३ (१) को देहाय (च) तथा (घ) अनुसार कैद र जरिवानाको सजाय माग गर्दै आज (बुधबार) विशेष अदालत काठमाडौंमा आरोपपत्र दायर गरिएको आयोगले जनाएको छ।

काठमाडौ,१२ कार्तिक । इजरायलले गाजामा पुनः हवाई आक्रमण गरेको छ।जसमा ३३ जना प्यालेस्टिनी नागरिकको ज्यान गएको अन्तर्राष्ट्रिय सञ्चारमाध्यमहरूले जनाएका छन्। इजरायलले गाजा सहरसँगै बेइत ला र खान युनिससहितका विभिन्न सहरका घर, विद्यालय र आवासीय भवनहरूमा आक्रमण गरेको बताइएको छ।

गाजास्थित अस्पतालका अनुसार मृतकमध्ये महिला र बालबालिका पनि छन्। गाजा सहरको साब्रा क्षेत्रमा एक घरमा बम विस्फोट हुँदा तीन महिलासहित चार जनाको मृत्यु भएको छ।

इजरायली रक्षामन्त्री इजरायल काट्जले हमासले इजरायली सैनिकमाथि आक्रमण गरी मृत बन्धकहरूको शव फिर्ता गर्ने सम्झौताको उल्लंघन गरेको आरोप लगाएका छन्। तर, हमासले ती सबै आरोप अस्वीकार गर्दै कुनै पनि आक्रमणमा आफ्नो संलग्नता नरहेको र युद्धविरामप्रति प्रतिबद्ध रहेको दाबी गरेको छ।

रक्षामन्त्री काट्जले हमासले ‘रेडलाइन’ पार गरेको भन्दै त्यसको भारी मूल्य चुकाउनुपर्ने चेतावनी दिएका छन्। इजरायली प्रधानमन्त्री बेन्जामिन नेतान्याहूले पनि हमासविरुद्ध सैन्य कारबाही गर्न आदेश दिएका छन्। नेतान्याहूले युद्धविराम सम्झौताअन्तर्गत हमासले गलत शव फिर्ता गरेको आरोप समेत लगाएका छन्।

करीब २० दिनअघि मात्रै इजरायल र हमासबीच युद्धविराम सम्झौता भएको थियो। अमेरिकी राष्ट्रपति डोनाल्ड ट्रम्पले सेप्टेम्बर २९ मा नेतान्याहूको उपस्थितिमा प्रस्तुत गरेको २० बुँदे शान्ति योजनामा हमासले अक्टोबर ९ मा सहमति जनाएको थियो। तर पछिल्ला आक्रमणसँगै युद्धविराम सम्झौता पुनः संकटमा परेको छ।

संघर्ष बढ्दै जाँदा अहिलेसम्म गाजामा ६७ हजारभन्दा बढी मानिसको ज्यान गइसकेको अन्तर्राष्ट्रिय निकायहरूले जनाएका छन्।

काठमाडौ,१२ कार्तिक । नेपाल प्रहरीका वरिष्ठ उपरीक्षक (एसएसपी) प्रकाश रानाभाटले पदबाट राजीनामा दिएका छन्। हाल सुदूरपश्चिम प्रदेश प्रहरी कार्यालयमा कार्यरत रानाभाटले आफ्नो राजीनामा पत्र प्रहरी प्रधान कार्यालयमा बुझाएका हुन्।

प्रहरी प्रधान कार्यालयका एक उच्च अधिकृतका अनुसार रानाभाटले व्यक्तिगत कारण देखाउँदै राजीनामा पेस गरेका हुन्। अधिकृतले भने, “उहाँले राजीनामा पेस गर्नुभएको पुष्टि भएको छ।”

२०५८ साउन १८ गते इन्स्पेक्टर पदबाट प्रहरी सेवामा प्रवेश गरेका रानाभाट यसै वर्ष एसएसपीमा बढुवा भएका थिए। उनी २०८२ साउनमा प्रहरी वरिष्ठ उपरीक्षकमा पदोन्नति भएका हुन्।

कानुन अनुसार एसएसपी तहका अधिकृतको राजीनामा स्वीकृत गर्न प्रहरी महानिरीक्षक (आईजीपी) ले निर्णय गरी गृह मन्त्रालयमा पठाउनुपर्छ। अन्ततः मन्त्रालयबाट स्वीकृति भएपछि मात्र राजीनामा औपचारिक रूपमा स्वीकार गरिन्छ।

दाङ ,१२ कार्तिक । लुम्बिनी प्रदेशका मुख्यमन्त्री चेतनारायण आचार्यले डेडिकेटेड फिडर र ट्रंकलाइनको बक्यौता नतिरेका उद्योगहरूको विद्युत् आपूर्ति बन्द भएको विवाद संवाद र सहकार्यमार्फत समाधान गर्न आग्रह गरेका छन् ।

नेपाल विद्युत् प्राधिकरणले बक्यौता नतिरेका उद्योगहरूको बिजुली काटेपछि प्रदेशका धेरै उद्योग बन्द भएका र सयौं श्रमिक रोजगारीविहीन बनेका छन्। यसले स्थानीय अर्थतन्त्रमा नकारात्मक असर परेको प्रदेश सरकारको भनाइ छ।

मुख्यमन्त्री आचार्यले बुधबार जारी विज्ञप्तिमा संघीय सरकारले अभिभावकको भूमिकामा रही प्राधिकरण र उद्योगीबीच वार्ता गरेर दीर्घकालीन समाधान खोज्नुपर्ने बताएका छन् ।

उहाँले उद्योग व्यवसायमा विश्वास पुनःस्थापना, श्रमिक हकहितको रक्षा र आर्थिक सन्तुलन कायम गर्न सबै पक्ष जिम्मेवार र संवेदनशील बन्नुपर्नेमा जोड दिएका छन् ।

विज्ञप्तिमा लुम्बिनी प्रदेश सरकार उद्योग प्रवर्द्धन, श्रमिक हित संरक्षण र समग्र आर्थिक विकासप्रति निरन्तर प्रतिबद्ध रहेको उल्लेख गरिएको छ।

मनाङ,१२ कार्तिक । मनाङमा भारी हिमपातपछि जनजीवन प्रभावित भएको छ। हिउँमा फसेका पर्यटकको उद्धारका लागि सुरक्षा निकाय बिहानैदेखि खटिएका छन् तर सवारी साधनको अभावले उद्धार कार्यमा कठिनाइ भएको छ।

प्रमुख जिल्ला अधिकारी नवराज पौड्यालका अनुसार हिउँमा फसेका पर्यटकलाई उद्धार गरिँदैछ तर सवारी साधन हिउँमा फसेका र अन्य सवारी अभाव भएकाले समस्या भएको हो।
‘फसेका पर्यटकको उद्धार जारी छ। तर हिउँमा सवारी फसेका र अन्य सवारी साधन अभाव भएकाले कठिनाइ भइरहेको छ,’ उनले बताए।

उनका अनुसार तिलिचो आधार शिविरमा अलपत्र परेका पर्यटकलाई उद्धार गरिएको छ भने खाङ्सार क्षेत्रमा अन्य व्यवस्थापन गरिएको छ। साथै, करिब २५ किलोमिटर सडकमा हिउँ हटाएर आवागमन सहज बनाइएको उनले जानकारी दिए।

स्थानीय पर्यटन व्यवसायीका अनुसार केही पर्यटकलाई घरबास र केहीलाई निजी घरमा राखेर व्यवस्थापन गरिएको छ। सबै विदेशी पर्यटक सुरक्षित रहेको पनि उनीहरूले बताएका छन्।

काठमाडौ,१२ कार्तिक ।सोलुखुम्बुको लबुचेमा अल्टिच्युड एयरको हेलिकप्टर दुर्घटना भएको छ।

अवतरणका क्रममा हेलिकप्टर दुर्घटनाग्रस्त भएको बताइएको छ। घटनाको विस्तृत विवरण आउन बाँकी छ।

हेलिकप्टरका पाइलट विवेक खड्का सकुशल रहेका छन्। हेलिकप्टरमा यात्रु भने थिएनन्।

काठमाडौ,१२ कार्तिक । प्रतिनिधि सभा विघटनविरुद्ध सर्वोच्च अदालतमा दायर परेका १६ वटा रिट निवेदनमाथि आज (बुधवार)देखि सुनुवाइ सुरु हुने भएको छ।

सर्वोच्च अदालतका प्रवक्ता अर्जुन प्रसाद कोइरालाका अनुसार प्रधानमन्त्रीको नियुक्ति र संसद् विघटन बदर गर्दै पुनःस्थापनाको मागसहित दायर रिटमाथि प्रारम्भिक सुनुवाइ आजबाट हुने तय भएको हो।

उनका अनुसार संवैधानिक इजलासमा ती १६ वटा रिट निवेदनमाथि एकैपटक (एकमुष्ट) सुनुवाइ हुनेछ।

सुनुवाइ सर्वोच्च अदालतको मूल भवन नजिकै रहेको एनेक्स भवनको माथिल्लो तलामा रहेको पुरानो कोठामा सञ्चालन हुने अदालतका प्रवक्ता कोइरालाले जानकारी दिए।