काठमाडौ,४ असार । गृहमन्त्री सुधन गुरुङले यस वर्ष मनसुनजन्य विपद व्यवस्थापनमा मन्त्रीस्तरीय निरीक्षणभन्दा जनताको सुरक्षालाई प्राथमिकतामा राखिएको बताएका छन्।

राष्ट्रिय विपद जोखिम न्यूनीकरण तथा व्यवस्थापन प्राधिकरणबाट बाहिरिने क्रममा सञ्चारकर्मीसँग कुरा गर्दै मन्त्री गुरुङले विपद् प्रतिकार्यलाई प्रभावकारी बनाउन विभिन्न तयारी गरिएको जानकारी दिए।

उनका अनुसार आवश्यक परे हेलिकप्टर परिचालनदेखि मोबाइल एपमार्फत पहिरो प्रभावित क्षेत्र पहिचान गर्ने व्यवस्था गरिएको छ।

“हाम्रो लाइन मन्त्रालयले एउटा एप विकास गरेको छ, जसबाट डोजरहरू कहाँ-कहाँ छन् भन्ने जानकारी तत्काल प्राप्त हुन्छ,” उनले भने,-“आवश्यक परेको ठाउँमा तुरुन्तै प्रतिक्रिया जनाउँदै बाटो खुलाउने व्यवस्था मिलाइएको छ।”

मन्त्री गुरुङले आफू विगतमा पनि विपद्का बेला उद्धार तथा राहत कार्यमा सक्रिय रूपमा खटिएको उल्लेख गर्दै अघिल्ला वर्षका कमजोरी दोहोरिन नदिने प्रतिबद्धता जनाए।

उनले विपद्का कारण नागरिकले लामो समय सडकमा अलपत्र पर्नु नपरोस् भन्ने लक्ष्यसहित काम भइरहेको बताए।

दाङ,४ असार । लायन्स क्लव अफ दाङको लायन वर्ष २०२६/२७ का लागि नयाँ नेतृत्व सर्वसम्मत रूपमा चयन गरिएको छ। क्लवको वर्ष २०२6/२६ को अध्यक्षमा लोकबहादुर बिष्ट निर्वाचित भएका छन् ।

नवनिर्वाचित कार्यसमिति अन्तर्गत प्रथम उपाध्यक्षमा कोपाल रावत, द्वितीय उपाध्यक्षमा सरोजकुमार लामिछाने, तृतीय उपाध्यक्षमा कोमल डिसी चयन भएका छन् ।

त्यसैगरी सचिवमा रोमप्रसाद भट्टराई, सहसचिवमा माधव पोख्रेल, कोषाध्यक्षमा हरिश गिरी र सहकोषाध्यक्षमा सूर्यप्रसाद शर्मा निर्वाचित भएका छन् ।

अन्य विभिन्न पद तथा जिम्मेवारीहरूमा समेत क्लवका सदस्यहरू सर्वसम्मत रूपमा चयन भएका छन्।

क्लबले नयाँ नेतृत्वहरुलाई एक कार्यक्रमकाबिच पद हस्तान्तरण समेत गरेको छ। वर्ष २०२५/२६ का अध्यक्ष लायन बिनिल केसीको अध्यक्षतामा कार्यक्रम गरि नयाँ कार्यसमितिलाई पद हस्तान्तरण गरिएको हो।

बुधबार लायन्स इन्टरनेशनल डिष्ट्रिक्ट ३२५ एन नेपालका निवर्तमान डिष्ट्रिक्ट गभर्नर लायन विनोदकुमार श्रेष्ठको प्रमुख आतिथ्यतामा वर्ष २०२६/२७ का नवनिर्वाचित पदाधिकारीहरुलाई पद हस्तारण गरिएको हो।

कार्यक्रममा ध्रुव गौतम, क्लवका पूर्व अध्यक्षहरू, पदाधिकारीहरू, सदस्यहरू, विभिन्न क्षेत्रका व्यक्तित्व तथा सञ्चारकर्मीहरूको उल्लेखनीय सहभागिता रहेको थियो।

कार्यक्रममा वक्ताहरूले लायन्स क्लव अफ दाङले सामाजिक सेवा, मानवीय सहयोग, नेतृत्व विकास तथा सामुदायिक हितका क्षेत्रमा पुर्‍याएको योगदानको प्रशंसा गर्दै नवनिर्वाचित नेतृत्वलाई सफल कार्यकालको शुभकामना व्यक्त गरेका थिए।

नवनिर्वाचित अध्यक्ष बिष्टले क्लवलाई अझ सक्रिय, प्रभावकारी र सेवामुखी बनाउँदै समाजसेवाका कार्यलाई थप विस्तार गर्ने प्रतिबद्धता व्यक्त गरे । लायन्स क्लव अफ दाङको नयाँ नेतृत्व चयन तथा पद हस्तान्तरण कार्यक्रम उत्साहपूर्ण वातावरणमा सम्पन्न भएको छ।

दाङ,३ असार । दाङका विभिन्न स्थानबाट प्रहरीले ४ नाल अवैध भरुवा बन्दुकसहित अन्य सामग्री बरामद गरेको छ।

इलाका प्रहरी कार्यालय तुलसीपुरबाट प्रहरी निरीक्षक असिम हमालको कमाण्डमा खटिएको टोलीले मंगलबार गस्तीका क्रममा तुलसीपुर उपमहानगरपालिका–१३ स्थित जुमिलकुला लेडुवा सामुदायिक वनबाट १ नाल अवैध भरुवा बन्दुक बरामद गरेको हो।

त्यसैगरी, बुधबार प्रहरी चौकी रामपुरबाट प्रहरी सहायक निरीक्षक टेकबहादुर कुसारीको कमाण्डमा खटिएको टोलीले घोराही उपमहानगरपालिका–२ बलारामपुरस्थित गौरी बबई सामुदायिक वनबाट ३ नाल अवैध भरुवा बन्दुक बरामद गरेको प्रहरीले जनाएको छ।

सोही स्थानबाट बन्दुकमा प्रयोग हुने ४२ वटा फलामका टुक्रा, २० वटा केप, एक थान चक्कु तथा करिब २०० ग्राम बारुद समेत बरामद गरिएको छ।

बरामद भएका सामग्रीका सम्बन्धमा थप अनुसन्धान भइरहेको जिल्ला प्रहरी कार्यालय दाङका सूचना अधिकारी प्रहरी नायव उपरीक्षक डा. हेमबहादुर कसीले जानकारी दिए।

दाङ,३ असार ।दाङमा पहिलो पटक १०८ कुण्डीय देव यज्ञ सन्चाल नभएको छ। १२औँ अन्तर्राष्ट्रिय योग दिवसको अवसर पारेर तुलसीपुरस्थित अरणिको मैदानमा पतञ्जलि योग रोग निवारण केन्द्र तुलसीपुरको आयोजनामा उक्त यज्ञ सन्चालन भएको हो।

तीन दिनसम्म सञ्चालन भएको योग शिविर तथा देव यज्ञमा योग साधक तथा विभिन्न क्षेत्रका व्यक्तित्वहरूको उपस्थिति रहेको थियो। धार्मिक, आध्यात्मिक तथा सांस्कृतिक चेतना अभिवृद्धि गर्ने उद्देश्यले आयोजित कार्यक्रममा वैदिक मन्त्र उच्चारण, हवन, योग अभ्यास तथा आध्यात्मिक प्रवचन समावेश गरिएको थियो।

पतञ्जलि योग रोग निवारण केन्द्रका अध्यक्ष बामदेव धितालले यस यज्ञले दाङमा योग, ध्यान तथा सनातन संस्कृतिप्रति जनचासो बढाउन महत्वपूर्ण भूमिका खेलेको बताए ।

कार्यक्रम पतञ्जलि योग रोग निवारण केन्द्रको आयोजना, तुलसीपुर उपमहानगरपालिकाको समन्वय तथा तुलसीपुर उद्योग वाणिज्य संघको सहकार्यमा सम्पन्न भएको हो। सहभागीहरूले यस महायज्ञले धार्मिक पर्यटन, सामाजिक सद्भाव तथा आध्यात्मिक जागरणमा नयाँ आयाम थपेको बताएका छन्।

यज्ञको अन्तिम दिनको पहिलो सत्र तुलसीपुर उद्योग वाणिज्य संघका अध्यक्ष बिनिल केसीले उद्घाटन गरेका थिए। उनले योग र प्रेरणाले व्यक्ति तथा समाज परिवर्तनमा महत्वपूर्ण भूमिका खेल्ने धारणा व्यक्त गर्दै कार्यक्रमलाई सफल बनाउन सहयोग गर्ने सबैप्रति आभार प्रकट गरे।

तीन दिनसम्म योग गुरु ललितशंकर योगीले सहभागीहरूलाई योग, ध्यान, भक्ति, ज्ञान तथा जीवन व्यवस्थापनका विषयमा प्रशिक्षण तथा प्रवचन दिएका थिए ।

समापन समारोहमा तुलसीपुर उद्योग वाणिज्य संघका पूर्व अध्यक्ष विमल रिजालले परिवर्तन आफैँबाट सुरु गर्नुपर्ने उल्लेख गर्दै योग र साधनाले जीवनलाई सरल, स्वस्थ र अनुशासित बनाउन मद्दत गर्ने बताए।

कार्यक्रममा डा. किशोर खत्रीले नियमित बिहानको हिँडाइ तथा जुम्बा अभ्यासले स्वास्थ्यमा सकारात्मक प्रभाव पार्ने उल्लेख गरे। साथै, योग गुरु डा. अरुण श्रेष्ठलगायतले शुभकामना मन्तव्य व्यक्त गरेका थिए।

धार्मिक तथा सांस्कृतिक दृष्टिले महत्वपूर्ण मानिने दाङमा आयोजना गरिएको यस महायज्ञले योग, ध्यान तथा सनातन संस्कृतिको प्रवर्द्धनमा उल्लेखनीय योगदान पुर्‍याएको आयोजकले विश्वास व्यक्त गरेको छ।

दाङ,३ असार । प्रहरीले बालिकामाथि जबरजस्ती करणी गरेको आरोपमा एक युवकलाई पक्राउ गरेको छ। दाङको तुलसीपुर उपमहानगरपालिकास्थित एक घरमा ११ वर्षीया बालिकामाथि जबरजस्ती करणी गरेको आरोपमा उनलाई पक्राउ गरेको हो।

पक्राउ पर्नेमा तुलसीपुर उपमहानगरपालिका निवासी २२ वर्षीय चुडामणी डाँगी रहेका छन्। उनले बालिकामाथि जबरजस्ती करणी गरेको आरोप लागेको जिल्ला प्रहरी कार्यालय दाङले जनाएको छ।

प्रहरीका अनुसार घटनापछि तत्कालै अनुसन्धान प्रक्रिया अघि बढाइएको छ। पीडित बालिकाको स्वास्थ्य अवस्था तथा अन्य आवश्यक सहयोगका लागि सम्बन्धित निकायसँग समन्वय भइरहेको बताइएको छ। घटनाबारे थप अनुसन्धान जारी रहेको प्रहरीले जनाएको छ।

रोल्पा,३ असार । रोल्पामा खाना पकाउने क्रममा प्रेसर कुकर पड्किँदा एक महिला गम्भीर घाइते भएकी छन्। घाइते हुनेमा परिवर्तन गाउँपालिका–१, कुरेलीकी अन्दाजी २४ वर्षीया रुपा राना रहेको जिल्ला प्रहरी कार्यालय रोल्पाले जनाएको छ।

प्रहरीका अनुसार राना आफ्नो माइतीघर परिवर्तन गाउँपालिका–२, चौधारामा ८ दिनअघि आएकी थिइन्। बुधबार बिहान करिब साढे ७ बजे भान्सामा खाना पकाउँदै गर्दा अचानक प्रेसर कुकर पड्किएको हो।

घटनामा रानाको अनुहार, ढाड, दाहिने हात र बायाँ खुट्टामा गम्भीर जलन र चोट लागेको प्रहरीले जनाएको छ। उनको अवस्था गम्भीर रहेको बताइएको छ।

घाइते रानालाई थप उपचारका लागि दाङस्थित राप्ती स्वास्थ्य विज्ञान प्रतिष्ठान पठाइएको जिल्ला प्रहरी कार्यालय रोल्पाका प्रवक्ता प्रहरी निरीक्षक सुनील थापा नेपालीले जानकारी दिएका छन्।

काठमाडौ,३ असार। राष्ट्रिय स्वतन्त्र पार्टी (रास्वपा) ले पहिलो महाधिवेशन नजिकिँदै गर्दा केन्द्रीय समितिमा उम्मेदवार बन्नेहरूका लागि शुल्क निर्धारण गरेको छ, जसले पार्टीभित्र आन्तरिक प्रतिस्पर्धा थप सक्रिय हुने संकेत देखाएको छ।

पार्टीका अनुसार सभापति पदका लागि उम्मेदवार बन्न ५१ हजार रुपैयाँ शुल्क तोकिएको छ भने उपसभापति, महामन्त्री र सहमहामन्त्री पदका लागि ४१ हजार रुपैयाँ शुल्क निर्धारण गरिएको छ। त्यस्तै, केन्द्रीय सदस्य पदका उम्मेदवारले २१ हजार रुपैयाँ बुझाउनुपर्नेछ।

रास्वपाको विधानअनुसार एक महिला सहित तीन उपसभापति, दुई महामन्त्री र एक महिला सहित चार सहमहामन्त्री रहने व्यवस्था छ। साथै, कोषाध्यक्ष, सहकोषाध्यक्ष र प्रवक्ता एक एक जना तथा सहप्रवक्ता तीन जना मनोनित गरिनेछन्।

विधानअनुसार ९९ जना केन्द्रीय सदस्य निर्वाचित हुनेछन् भने २२ जना सभापतिबाट मनोनित हुने व्यवस्था छ। सातै प्रदेशका सभापतिहरू केन्द्रीय समितिको पदेन सदस्य रहनेछन्।

रास्वपाले आगामी सोमबारदेखि बुधबारसम्म चितवनमा पहिलो महाधिवेशन आयोजना गर्ने तयारी गरेको छ। महाधिवेशनसँगै नयाँ नेतृत्व चयन प्रक्रिया अघि बढ्ने भएकाले उम्मेदवारी शुल्क निर्धारणलाई संगठनात्मक व्यवस्थापन र प्रतिस्पर्धा व्यवस्थित गर्ने कदमका रूपमा हेरिएको छ।

प्यूठान, ३असार । वर्षायामसँगै बढेको खोलाको जोखिमका कारण प्यूठानमा दुई बालकको मृत्यु भएको छ । विद्यालयबाट घर फर्किने क्रममा खोलाले बगाउँदा दाजुभाइको मृत्यु भएको हो।

नौबहिनी गाउँपालिका–५ का १० वर्षीय मिलन खत्री र ७ वर्षीय विमल खत्री मंगलबार दिउँसो करिब ३ बजेतिर विद्यालयबाट घर फर्किँदै गर्दा जोगी पनेरा खहरे खोला तर्ने प्रयासमा बाढीले बगाएको थियो।

घटनापछि गरिएको खोजीका क्रममा भाइ विमलको शव मंगलबार साँझ नै फेला परेको थियो भने दाजु मिलनको शव बुधबार बिहान भेटिएको जिल्ला प्रहरी कार्यालय प्यूठानले जनाएको छ।

मृतक दुवै जना काँटेस्थित श्री जनता प्राथमिक विद्यालयका विद्यार्थी हुन्। मिलन कक्षा ३ मा र विमल कक्षा १ मा अध्ययनरत थिए। उनीहरू स्थानीय यामबहादुर खत्रीका छोरा हुन्।

स्थानीय वडा सदस्य कुलबहादुर खत्रीले साँझ करिब साढे ६ बजे घटनाबारे प्रहरीलाई जानकारी गराएपछि प्रहरी टोली खोजीमा खटिएको थियो। प्रहरी चौकी डार्मी र इलाका प्रहरी कार्यालय लुङबाङबाट खटिएको टोलीले घटनास्थल आसपास खोजी गरेको थियो।

एकै परिवारका दुई नाबालकको मृत्यु भएपछि खत्री परिवारसँगै सिंगो गाउँ शोकमा डुबेको छ। केही समयअघि रोल्पामा पनि यस्तै घटनामा दुई बालकको ज्यान गएको थियो, जसले वर्षायाममा खोलानाला पार गर्दा सावधानी अपनाउनुपर्ने आवश्यकता पुनः स्मरण गराएको छ।

काठमाडौ,३ असार । नेपाल–भारत सीमा सम्बन्धमा प्रधानमन्त्रीले दिएको अभिव्यक्तिलाई लिएर प्रतिनिधिसभामा बहस चर्किएको छ। विभिन्न दलका सांसदहरूले प्रधानमन्त्रीसँग स्पष्टिकरण माग्दै संसदमा जवाफदेहिता सुनिश्चित गर्न आग्रह गरेका छन्।

बुधबार बसेको प्रतिनिधिसभा बैठकको सुरुमै समय लिएर श्रम संस्कृति पार्टीका सांसद हर्कराज राईले प्रधानमन्त्रीले सीमा विषयमा दिएको धारणा प्रष्ट पार्न माग गरे। उनले काठमाडौंका विभिन्न ‘होल्डिङ सेन्टर’मा राखिएका सुकुम्बासीहरूको व्यवस्थापनमा समेत ध्यान दिन सरकारसँग आग्रह गरे।

नेपाली कम्युनिस्ट पार्टीका सांसद गोपाल शर्माले संविधानअनुसार सरकार संसद्प्रति उत्तरदायी हुनुपर्ने उल्लेख गर्दै प्रधानमन्त्रीले सीमा सम्बन्धी अभिव्यक्तिमा संसदमै आएर धारणा सच्याउनुपर्ने बताए। उनले यस विषयमा सभामुखबाट ‘रुलिङ’को माग पनि गरे।

एमालेका सांसद कृपाराम रानाले लिपुलेक, कालापानी, लिम्पियाधुरा र सुस्तालगायत क्षेत्रमा सीमा अतिक्रमण भएको उल्लेख गर्दै राष्ट्रिय स्वाभिमानको विषयमा सरकार गम्भीर हुनुपर्ने धारणा राखे। उनले सुकुम्बासीलाई राखिएका ‘होल्डिङ सेन्टर’मा मानवोचित व्यवहार नभएको भन्दै सरकारको ध्यानाकर्षण गराए।

त्यसैगरी, नेपाली कांग्रेसका सांसद चन्द्रमोहन यादवले प्रधानमन्त्रीको अभिव्यक्तिको आलोचना गर्दै त्यसलाई सच्याउनुपर्ने बताए। उनले सभामुखको निष्पक्ष भूमिकामाथि प्रश्न उठाउँदै राष्ट्रिय स्वतन्त्र पार्टीसँगको सम्बन्धबारे टिप्पणी गरेका थिए।

यादवको उक्त अभिव्यक्तिप्रति रास्वपाका सांसद गणेश कार्कीले नियमापत्ति जनाएपछि बैठकमा केही समय तनाव उत्पन्न भएको थियो। सभामुख डोलप्रसाद अर्यालले उक्त विषयमा ध्यानाकर्षण भएको जनाएका छन्।

बैठकमा सांसदहरूले सरकारको जवाफदेहिता, सीमा सुरक्षाको संवेदनशीलता र नागरिक अधिकारका विषयमा गम्भीर रूपमा आवाज उठाएका थिए।

दाङ,३ असार । सामाजिक सञ्जालमा भाइरल बनेको एक भिडियोका आधारमा युवतीमाथि खुकुरी देखाई कुटपिट गर्ने एक युवकलाई प्रहरीले पक्राउ गरेको छ।

तुलसीपुर उपमहानगरपालिका–२ भमकेका २४ वर्षीय रमेश ठाडा मगरलाई इलाका प्रहरी कार्यालय तुलसीपुरबाट खटिएको टोलीले उनकै घरबाट पक्राउ गरेको हो। उनले एक युवतीलाई जंगलमा लगेर खुकुरी देखाउँदै डरधम्की दिँदै कुटपिट गरेको भिडियो सामाजिक सञ्जालमा सार्वजनिक भएपछि प्रहरी सक्रिय बनेको थियो।

पक्राउका क्रममा प्रहरीले उनको साथबाट विभिन्न प्रकारका लागुऔषध बरामद गरेको जनाएको छ। बरामद हुनेमा रेगाम्याक्स १ ट्याब्लेट, ट्रोमो ४१ ट्याब्लेट, एन्टिकोप २ ट्याब्लेट र नाइट्राजोहम ५ ट्याब्लेट रहेका छन्।

उक्त घटनामा संलग्न रहेको आरोपमा २१ वर्षीय जिबराज खत्रीलाई समेत नियन्त्रणमा लिएर थप अनुसन्धान भइरहेको प्रहरीले जनाएको छ।

प्रहरीका अनुसार पीडित युवतीको स्वास्थ्य अवस्था सामान्य रहेको छ। घटना सम्बन्धमा थप अनुसन्धान जारी रहेको छ।