रुकुमपूर्व,१३ वैशाख। शनिबार साँझ परेको भारी वर्षापछि आएको पहिरोका कारण मध्यपहाडी लोकमार्ग अवरुद्ध भएको छ।वर्षासँगै लेदोसहितका पहिरो झर्दा जिल्लाका दर्जनौँ स्थानमा सडक अवरुद्ध भएको ट्राफिक प्रहरी कार्यालयले जनाएको छ। सहायक मार्गहरू पनि पहिरोका कारण प्रभावित भएका छन्।

प्रहरी सहायक निरीक्षक वीरबहादुर थापाका अनुसार धौलापहिरा, काँडाबगर, किमुबोट, सुन्तलाबारी, सैपातुङ, काँक्री र सीता लगायत स्थानमा पहिरो खसेको छ। मुरुका दुई स्थानमा पनि पहिरो गएको छ भने धाउन्ने सडकखण्ड समेत अवरुद्ध भएको छ।

भूमे गाउँपालिकाको स्काभेटरसँग समन्वय गरेर पहिरो हटाउने प्रयास भइरहेको छ। मौसम सुधार नआएसम्म अत्यावश्यकबाहेक यात्रा नगर्न प्रहरीले आग्रह गरेको छ।

यसैबीच, शनिबार साँझ करिब ६ बजेदेखि जिल्लामा विद्युत् सेवा पनि अवरुद्ध भएको छ। वर्षासँगै परेको असिनाले गहुँबालीमा समेत क्षति पुर्‍याएको छ।

काठमाडौ,१३ वैशाख । अनेरास्ववियुका नेताहरुले विद्यार्थी राजनीतिको प्रतिबन्धको विरोध जनाएका छन् । आइतबार बसेको सचिवालय बैठकमा नेताहरूले ‘मलाई बोल्न दे सरकार’ लेखिएको कालो फेटा बाँधेर विरोध जनाएका हुन् ।

नेकपा एमाले निकट विद्यार्थी संगठनले बालेन्द्र शाह नेतृत्वको सरकारले विद्यार्थी राजनीति प्रतिबन्ध लगाउने तयारी गरेको भन्दै विरोध गरेको अध्यक्ष दीपक धामीले बताएका छन्।

सरकारले विश्वविद्यालयभित्र रहेका विद्यार्थी संगठनहरू प्रतिबन्ध गर्ने तथा सुरक्षा जोखिम भए प्रहरी पोस्ट स्थापना गर्ने योजना अघि सारेको छ।

विद्यार्थी संगठन खारेजको विषयमा संसदमा अनेरास्ववियुका पूर्वअध्यक्ष तथा हालका एमाले सांसद ऐन महरले पनि विरोध जनाएका छन्।

रोल्पा,१३ वैशाख । रोल्पामा चट्याङ लागेर एक वृद्धको मृत्यु भएको छ। शनिबार राति परेको चट्याङका कारण परिवर्तन गाउँपालिका–४ तातापानीस्थित तुसारवोट बस्तीका ७७ वर्षीय लालु वलीको भएको हो।

प्रहरीका अनुसार राति करिब साढे ८ बजे वलीको घरदेखि करिब ५ मिटर पश्चिमतर्फ रहेको रुखमा चट्याङ परेको थियो। सोही चट्याङको असर घरसम्म पुग्दा घरभित्रै रहेका वलीलाई लागेर घटनास्थलमै मृत्यु भएको हो। चट्याङकै कारण एउटा गोरु पनि मरेको प्रहरीले जनाएको छ।

वनजङ्गल पृथ्वीको फोक्सो मात्र होइनन्, यिनीहरू मानव सभ्यता, पशुपक्षीको अस्तित्व र सम्पूर्ण पारिस्थितिक प्रणालीका प्राणवायु हुन्। अक्सिजनको निरन्तर आपूर्ति, कार्बन चक्रको सन्तुलन, वर्षाको नियमितता, माटोको गुणस्तर संरक्षण र जैविक विविधताको रक्षामा वनजङ्गलको भूमिका अपरिहार्य छ। नेपालजस्तो भौगोलिक विविधता र प्राकृतिक सौन्दर्यले भरिपूर्ण मुलुकका लागि वनजङ्गल एक अमूल्य सम्पत्ति हो। तर पछिल्ला वर्षहरूमा नेपाललगायत विश्वका विभिन्न भागमा वन डढेलोको समस्या एक भयावह वातावरणीय सङ्कटका रूपमा देखा परेको छ। विशेषगरी सुख्खा मौसममा बारम्बार देखिने वन डढेलोले वातावरणीय सन्तुलन मात्र बिगारेको छैन, यसले मानव जीवन, पशुपक्षीको बासस्थान र समग्र आर्थिक संरचनालाई समेत अपूरणीय क्षति पुर्‍याइरहेको छ। यो समस्या अहिले केवल वन विनाशको मुद्दामा मात्र सीमित नभई जलवायु परिवर्तन र जनस्वास्थ्यको गम्भीर विषय बनेको छ।
नेपालको भौगोलिक बनावट र मौसमी चक्रअनुसार प्रत्येक वर्ष फागुनदेखि जेठ महिनासम्मको अवधि वन डढेलोका लागि अत्यन्तै संवेदनशील मानिन्छ। यस समयमा तापक्रम बढ्दै जाने, वर्षा कम हुने र वायुमण्डलमा सापेक्षिक आर्द्रता न्यून हुने भएकाले वन क्षेत्रमा रहेका सुक्खा पातपतिङ्गर र जैविक पदार्थहरू प्रज्वलनशील बन्दछन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणका विभिन्न तथ्याङ्कहरूले देखाएअनुसार नेपालमा हरेक वर्ष सयौँ स्थानमा भीषण डढेलो लाग्ने गरेको छ। डढेलोका कारणहरूलाई मसिनो गरी केलाउँदा यसलाई प्राकृतिक र मानवीय गरी दुई भागमा बाँड्न सकिए पनि नेपालको सन्दर्भमा ९० प्रतिशतभन्दा बढी घटनाहरू मानवीय क्रियाकलाप र लापरवाहीकै उपज हुन्। प्राकृतिक रूपमा बिजुली चम्किँदा वा घर्षणका कारण आगो लाग्ने सम्भावना न्यून रहन्छ। तर, जङ्गल सफाइ गर्ने बहानामा लगाइएको आगो नियन्त्रण बाहिर जानु, चोरी सिकारीले जनावरलाई घेर्न आगो लगाउनु, नयाँ र राम्रो घाँस पलाउने अन्धविश्वासमा गोठालाहरूले डढेलो लगाउनु र वनभोज वा पदयात्रामा जानेहरूले आगो पूर्ण रूपमा ननिभाई छाड्नु जस्ता मानवीय गल्तीहरू नै डढेलोका मुख्य कारक हुन्।
वन डढेलोले वातावरणमा पार्ने बहुआयामिक असरहरू निकै गम्भीर छन्। सबैभन्दा प्रत्यक्ष असर वायुमण्डलमा पर्दछ। डढेलोका कारण ठूलो मात्रामा कार्बनडाइअक्साइड, मिथेन र अन्य हरितगृह ग्यासहरू उत्सर्जन हुन्छन्, जसले विश्वव्यापी उष्णता अर्थात् ग्लोबल वार्मिङलाई बढावा दिन्छ। यसले गर्दा नेपालका हिमालहरू पग्लने क्रम तीव्र भएको छ र वर्षाको परम्परागत चक्रमा फेरबदल आएको छ। जब वन डढेलो लाग्छ, त्यसबाट निस्कने धुवाँ र सूक्ष्म कणहरूले वायुमण्डललाई ढपक्कै ढाक्छन्। यसले गर्दा वायुको गुणस्तर सूचकाङ्क खतरनाक तहमा पुग्दछ। यस्तो प्रदूषित हावामा सास फेर्दा मानिसहरूमा दम, ब्रोन्काइटिस, मुटुको समस्या र आँखा पोल्ने जस्ता तत्कालिन तथा दीर्घकालीन स्वास्थ्य समस्याहरू देखा पर्दछन्। विशेषगरी बालबालिका, वृद्धवृद्धा र श्वासप्रश्वासका बिरामीहरू यसबाट सबैभन्दा बढी प्रभावित हुन्छन्। कतिपय अवस्थामा त वायु प्रदूषण यति बढ्छ कि दृश्यता कम भएर हवाई उडानहरू समेत अवरुद्ध हुने गरेका छन्।
जैविक विविधताको दृष्टिकोणले वन डढेलो एक महाविपत्ति नै हो। वनजङ्गल लाखौँ जीवजन्तु, चराचुरुङ्गी र कीटपतङ्गको सुरक्षित बासस्थान हो। डढेलोले यस्ता बासस्थानहरूलाई खरानी बनाइदिन्छ। आगोको चपेटामा परेर धेरै वन्यजन्तुहरूले ज्यान गुमाउँछन् भने बाँचेकाहरू पनि बासस्थान र आहारको खोजीमा मानव वस्तीतिर पस्न बाध्य हुन्छन्। यसले गर्दा मानववन्यजन्तु द्वन्द्व बढ्न जान्छ। कतिपय दुर्लभ र लोपोन्मुख वनस्पति तथा जडीबुटीहरू डढेलोका कारण सदाका लागि नष्ट हुने खतरा रहन्छ। यसबाहेक, डढेलोले माटोको माथिल्लो सतहमा रहेका सूक्ष्म जीवाणुहरू र पोषक तत्वहरूलाई नष्ट गरिदिन्छ। माटोको संरचना बिग्रेपछि वर्षाको समयमा पानी सोस्ने क्षमता कम हुन्छ र यसले बाढी, पहिरो तथा भू-क्षयको जोखिमलाई दोब्बर बनाउँछ। पहाडी भेगमा डढेलो लागेका भिरालो जमिनहरूमा वर्षायाममा ठूला पहिरोहरू जाने गरेको पाइन्छ, जसले तल्लो तटीय क्षेत्रका वस्तीहरूलाई जोखिममा पार्दछ।
आर्थिक र सामाजिक दृष्टिकोणले पनि वन डढेलोको प्रभाव उत्तिकै डरलाग्दो छ। नेपालका ग्रामीण समुदायको ठूलो हिस्सा जीविकोपार्जनका लागि वनमा आश्रित छ। काठ, दाउरा, पशु आहारका लागि घाँस र बहुमूल्य जडीबुटीहरू वनबाटै प्राप्त हुन्छन्। डढेलोले यी स्रोतहरू नष्ट गर्दा स्थानीय अर्थतन्त्रमा ठूलो धक्का लाग्छ। धेरै ठाउँमा त वनको आगो वस्तीसम्म पुगेर घरगोठ जलेका, पशुचौपाया मरेका र मानिसले ज्यान गुमाएका दुःखद घटनाहरू हामीले वर्षेनी सुन्दै आएका छौँ। डढेलो नियन्त्रणका लागि राज्यले ठूलो धनराशि र जनशक्ति खर्च गर्नुपर्ने हुन्छ, जुन विकास निर्माणमा खर्च हुन सक्थ्यो। यसरी हेर्दा डढेलोले एकातिर प्राकृतिक स्रोतको विनाश गर्छ भने अर्कोतिर सामाजिक सुरक्षा र आर्थिक स्थिरतामा पनि चुनौती थप्छ।
वन डढेलोको यो विकराल समस्या समाधानका लागि अब परम्परागत शैलीले मात्र पुग्दैन। यसका लागि एकीकृत र बहुआयामिक रणनीति आवश्यक छ। सबैभन्दा पहिले जनचेतनाको स्तरलाई तल्लो तहसम्म पुर्‍याउनु पर्दछ। वन डढेलो लाग्नु भनेको केवल रुख डढ्नु मात्र होइन, यो आफ्नै भविष्य डढ्नु हो भन्ने कुरा प्रत्येक नागरिकले बुझ्न जरुरी छ। विद्यालयको पाठ्यक्रमदेखि नै वन संरक्षणका कुराहरू समावेश गरिनुपर्छ। नेपालको वन संरक्षणमा ‘सामुदायिक वन उपभोक्ता समूह’ हरूको भूमिका विश्वमै उदाहरणीय छ। यी समूहहरूलाई डढेलो नियन्त्रणका लागि आवश्यक पर्ने आधुनिक उपकरण, सुरक्षा पोसाक र प्राविधिक तालिम प्रदान गरिनुपर्छ। आगो लागेपछि निभाउनु भन्दा आगो लाग्नै नदिनु उत्तम उपाय हो। यसका लागि वन क्षेत्रमा ‘फायर लाइन’ अर्थात् अग्नि रेखाको निर्माण र मर्मत गर्ने, सुक्खा मौसममा वनको नियमित गस्ती गर्ने र आगलागीको उच्च जोखिम भएका क्षेत्रहरूको पहिचान गरी पूर्वतयारी अपनाउनु पर्दछ।
प्रविधिको प्रयोग आजको आवश्यकता हो। उपग्रह (स्याटेलाइट) मार्फत वनमा कतै आगो लाग्ने बित्तिकै त्यसको सङ्केत पाउने प्रणालीलाई अझ प्रभावकारी बनाउनु पर्दछ। ड्रोन प्रविधिको प्रयोग गरेर दुर्गम क्षेत्रको निगरानी गर्न सकिन्छ। यस्तै, डढेलो नियन्त्रणका लागि स्थानीय प्रहरी, प्रशासन, सेना र समुदायबीच बलियो समन्वय हुनुपर्दछ। कानुनी पाटोलाई पनि उत्तिकै कडाइका साथ लागू गरिनुपर्छ। वन ऐनमा डढेलो लगाउने विरुद्ध कडा सजायको व्यवस्था भए पनि यसको कार्यान्वयन पक्ष फितलो छ। जानीजानी वा लापरवाहीपूर्वक आगो लगाउने जो कोहीलाई पनि कानुनी कठघरामा उभ्याएर दण्डित गरिनुपर्छ ताकि भविष्यमा कसैले यस्तो गल्ती गर्ने आँट नगरोस्। वन संरक्षणमा योगदान पुर्‍याउने समुदायलाई पुरस्कृत गर्ने र क्षति पुर्‍याउनेलाई दण्डित गर्ने प्रणालीले नै यसलाई नियन्त्रण गर्न मद्दत पुर्‍याउँछ।
वन डढेलो आजको युगको एक साझा शत्रु हो। जलवायु परिवर्तनको मारमा परेको नेपाल जस्तो मुलुकका लागि यो समस्या झनै संवेदनशील छ। प्रकृतिले हामीलाई दिएको यो अनुपम उपहारको संरक्षण गर्नु हाम्रो नैतिक र संवैधानिक दायित्व हो। डढेलो नियन्त्रणको कार्य केवल सरकार वा वन विभागको मात्र जिम्मेवारी होइन, यो त प्रत्येक नागरिकको सामूहिक दायित्व हो। यदि हामीले अहिले नै यसतर्फ ठोस कदम चालेनौँ भने हाम्रा आगामी पुस्ताले हरियो वन र स्वच्छ हावा केवल किताबमा मात्रै सीमित देख्नेछन्। त्यसैले वन जोगाऔँ, वातावरण बचाऔँ र मानव अस्तित्वको रक्षा गरौँ। सानो सचेतना र सावधानीले ठूलो विनाश रोक्न सकिन्छ। वन रहे मात्र हामी रहन्छौँ भन्ने मूल मन्त्रलाई आत्मसात गर्दै सबै मिलेर वन डढेलो विरुद्धको अभियानमा जुट्नु आजको मुख्य आवश्यकता हो।

मुख्य हाइलाइट विषयवस्तुहरू

वन डढेलो केवल प्राकृतिक घटना नभएर नेपालको सन्दर्भमा ९० प्रतिशतभन्दा बढी मानवीय लापरवाही र असावधानीको प्रत्यक्ष परिणाम हो।

वन डढेलोले वायुमण्डलमा कार्बन उत्सर्जन बढाई जलवायु परिवर्तनलाई तीव्र बनाउनुका साथै जनस्वास्थ्यमा श्वासप्रश्वाससम्बन्धी गम्भीर संकट निम्त्याएको छ।

जैविक विविधताको विनाश र माटोको उर्वराशक्ति नष्ट हुने भएकाले डढेलोले दीर्घकालीन रूपमा खाद्य सुरक्षा र ग्रामीण अर्थतन्त्रलाई तहसनहस पार्ने निश्चित छ।

आधुनिक प्रविधिको प्रयोग, कडा कानुनी कार्यान्वयन र सामुदायिक वन उपभोक्ता समूहहरूको सक्रिय परिचालन नै डढेलो नियन्त्रणका अचुक उपायहरू हुन्।

दाङ,१२वैशाख । प्रहरीले बुवाको हत्याको आरोपमा उनका छोरालाई पक्राउ गरेको छ । प्रहरीका अनुसार ५८ वर्षीय जङ्गबहादुर थारूको हत्या आरोपमा रुपन्देहीबाट उनका आफ्नै छोरा पक्राउ परेका हुन् ।

शुक्रबार कञ्चन गाउँपालिका–४ बेलडाँडाका २४ वर्षीय सुनिल थारूलाई प्रहरीले नियन्त्रणमा लिएको हो। प्रहरीका अनुसार सुनिलले कुटपिट गर्दा गम्भीर घाइते भएका जङ्गबहादुरको कपिलवस्तुको पिपरा अस्पतालमा उपचारका क्रममा मृत्यु भएको थियो।

घटनाको जानकारी पाएपछि इलाका प्रहरी कार्यालय रूद्रपुरबाट खटिएको टोलीले उनलाई पक्राउ गरेको हो। यस विषयमा थप अनुसन्धान भइरहेको प्रहरीले जनाएको छ।

काठमाडौ,१२ वैशाख । अमेरिकी सेन्ट्रल कमाण्डले आफ्नो एक युद्धपोतले इरानी झण्डा बोकेको जहाजलाई इरानी बन्दरगाहतर्फ जानबाट रोकेको जनाएको छ।

कमाण्डले सामाजिक सञ्जाल ‘एक्स’मार्फत जानकारी दिँदै यूएसएस राफेल पेराल्टा नामक गाइडेड मिसाइल डेस्ट्रोयरले शुक्रबार उक्त जहाज रोकेको उल्लेख गरेको छ। जहाज इरानतर्फ जाँदै गर्दा नियन्त्रणमा लिइएको जनाइएको छ।

यसअघि पनि अमेरिकी पक्षले नौसैनिक नाकाबन्दी सुरु भएदेखि हालसम्म ३४ वटा जहाजको मार्ग परिवर्तन गराइसकेको दाबी गरेको छ।

इरान र संयुक्त राज्य अमेरिकाबीच भएको पहिलो चरणको वार्ता निष्कर्षविहीन भएपछि अमेरिकी राष्ट्रपति डोनाल्ड ट्रम्पले इरानी बन्दरगाहमा नाकाबन्दी गर्ने घोषणा गरेका थिए।

यस कदमको इरानले कडा विरोध गर्दै यसलाई युद्धविराम उल्लंघन भएको जनाएको छ। प्रतिक्रिया स्वरूप इरानले रणनीतिक रूपमा महत्वपूर्ण होर्मुज जलसन्धि बन्द गर्ने निर्णय लिएको बताइएको छ।

काठमाडौ ,१२ वैशाख । परराष्ट्रमन्त्री शिशिर खनालले कूटनीतिक आचारसंहिता पालनामा जोड दिँदै परराष्ट्र सम्बन्धलाई व्यवस्थित बनाउन सरकार सक्रिय रहेको बताएका छन्।

राष्ट्रिय स्वतन्त्र पार्टीले आयोजना गरेको कार्यक्रममा उनले प्रधानमन्त्री, मन्त्री तथा सार्वजनिक पदमा रहेका सबै व्यक्तिलाई कूटनीतिक आचरण समान रूपमा लागू गरिने बताए।

“प्रधानमन्त्री, मन्त्रीलगायत सबैका लागि कूटनीतिक आचरण अनिवार्य बनाउन तालिमको व्यवस्था गरेका छौँ,” उनले भने। उनले कूटनीतिक नियम सबैले पालना गर्नुपर्नेमा जोड दिए।

फरक प्रसङ्गमा मन्त्री खनालले सरकारले सुशासन र आर्थिक समृद्धिका लागि काम गरिरहेको बताए। पार्टीको वाचापत्रअनुसार सरकार अघि बढिरहेको उल्लेख गर्दै उनले भ्रष्टाचारविरुद्ध शून्य सहनशीलताको नीति अपनाइएको बताए।

दाङ,१२ वैशाख । तुलसीपुरमा युवा उद्यमशीलता अभियानअन्तर्गत नर्सरी व्यवस्थापन सम्बन्धी पाँच दिने तालिम सुरु भएको छ। तुलसीपुर उपमहानगरपालिकाको आर्थिक सहयोग र राप्ती परोपकार सङ्घ तुलसीपुरको आयोजनामा वडा नम्बर ९ मा शुक्रबारदेखि तालिम सञ्चालनमा आएको हो।

तालिमको उद्घाटन गर्दै तुलसीपुर उपमहानरपालिकाका प्रमुख प्रशासकीय अधिकृत केशवराज पार्धेले तालिमबाट सिकेका सीप व्यवहारमा उतार्नु नै सफलता भएको बताए। उनले उद्यमशीलतामा तत्काल नाफाभन्दा धैर्यता र दीर्घकालीन सोच आवश्यक हुने उल्लेख गरे।

उनले पछिल्लो समय केही व्यक्तिहरूले निरन्तर तालिम मात्र लिने प्रवृत्ति बढेको भन्दै यस्तो प्रवृत्तिले राज्यको लगानी खेर जाने बताए। साथै, पालिकाले विभिन्न तालिमका लागि सूचना जारी गर्दै आएको र इच्छाअनुसार सहभागी हुन सकिने जानकारी दिए।

कार्यक्रममा वडा नम्बर ९ का अध्यक्ष घनश्याम ढकालले युवालाई उद्यमी बनाउने उद्देश्यले यस्तो तालिम सञ्चालन हुनु सकारात्मक भएको बताए। अन्य वक्ताहरूले पनि तालिमपछि व्यवसायिक रूपमा अघि बढ्न सहभागीलाई सुझाव दिएका थिए।

पाँच दिनसम्म चल्ने तालिमपछि सहभागीलाई व्यवसायिक रूपमा अघि बढाउन पाँच जनाको समूह बनाएर काम गर्न इच्छुक समूहलाई २५ हजार रुपैयाँ सहयोग गरिने कार्यक्रम व्यवस्थापक गणेश भण्डारीले जानकारी दिए।

तालिममा तुलसीपुरका १९ वटै वडाबाट आएका तथा विभिन्न शैक्षिक संस्थामा अध्ययनरत गरी ३० जना युवाको सहभागिता रहेको छ। कार्यक्रम नेपाल परोपकार सङ्घ तुलसीपुरका वरिष्ठ उपाध्यक्ष गोरखबहादुर वलीको अध्यक्षतामा सम्पन्न भएको हो।

काठमाडौ,१२ वैशाख। लामो समयदेखि युद्धमा रहेका युक्रेन र रूसबीच शुक्रबार ठूलो संख्यामा युद्धबन्दीहरूको आदानप्रदान गरिएको छ। दुवै पक्षले आफ्नो नियन्त्रणमा रहेका १९३–१९३ जना सैनिक तथा सुरक्षाकर्मीलाई रिहा गरेका छन्। यस मानवीय पहलमा संयुक्त राज्य अमेरिका र संयुक्त अरब इमिरेट्सले सहजकर्ताको भूमिका निर्वाह गरेका थिए।

युक्रेनी राष्ट्रपति भोलोडिमिर जेलेन्स्कीले सामाजिक सञ्जालमार्फत आफ्ना नागरिक स्वदेश फर्किएकोमा खुसी व्यक्त गर्दै यस प्रक्रियालाई निकै महत्वपूर्ण बताएका छन्। उनका अनुसार फर्किएकामध्ये सेना, सीमा सुरक्षा गार्ड र प्रहरी अधिकारीहरू छन्, जसमा केही घाइते पनि रहेका छन् भने केहीले रूसमा मुद्दासमेत खेपेका थिए।

युक्रेनका गुप्तचर प्रमुख किरिलो बुडानोभ र रूसी रक्षा मन्त्रालयले पनि यस जटिल प्रक्रियामा अमेरिका र यूएईको सहयोग रहेको स्वीकार गरेका छन्।

रिहा भएर फर्किएका कैदीहरू निकै भावुक देखिएका थिए। बसबाट ओर्लँदै गर्दा धेरैले आफ्नो देशको झण्डा ओढेका थिए र खुशीका आँसु झारेका थिए। तीन वर्षसम्म रूसी नियन्त्रणमा रहेका एक सैनिकले स्वदेश फर्किनु अझै विश्वास नलागेको प्रतिक्रिया दिएका छन्।

चार वर्षदेखि जारी यस युद्धमा दुवै देशबीच पटक–पटक युद्धबन्दी साटासाट हुँदै आएको छ। यसअघि पनि हजारौँको संख्यामा बन्दीहरू आदानप्रदान भइसकेका छन्।

दाङ,११ वैशाख । लमही बसपार्क क्षेत्रभित्र रहेका अस्थायी टहरा हटाइने भएको छ । लमही नगर विकास समितिले लमही बसपार्क क्षेत्रमा निर्माण गरिएका अस्थायी टहराहरू हटाउने निर्णय गरेको हो ।

समितिले २०८२ चैत ८ गते ३५ दिने सूचना जारी गर्दै व्यवसायीहरूलाई टहरा खाली गर्न आग्रह गरेको थियो। उक्त सूचनाको म्याद वैशाख १२ गतेसम्म रहेको र वैशाख १३ गतेदेखि टहरा खाली गराइने जनाएको छ।

समितिका अध्यक्ष जोगराज चौधरीका अनुसार तोकिएको समयभित्र सबै व्यवसायीलाई टहरा खाली गर्न अनुरोध गरिएको थियो। यदि समयमै खाली नगरेमा सुरक्षा निकायको सहयोगमा हटाइने उनले बताए।

लमही नगर विकास समितिले उक्त क्षेत्रमा निर्माण गरिएका ३९ वटा व्यावसायिक टहरा लामो समयदेखि भाडामा उपलब्ध गराउँदै आएको थियो।